Lajme

E shtune, 8 shkurt 2003

Përmbajtja:

• Presidenti Rugova u kthye sot në Prishtinë nga vizita në SHBA

• Rexhepi: Nuk është koha për deklaratë në parlament mbi pavarësinë

• Dita e parë e Kurban-Bajramit është e martë 11 shkurt

• Përfaqësuesit e pesëshes u takuan me shefat e grupeve kryesore parlamentare të Kosovës

• Organizata "Serbët e bashkuar" drejtohet nga Qeveria e Beogradit

• H. Solana ka shprehur shqetësimin për nismën e grupit të deputetëve të Kosovës për miratimin e deklaratës së pavarësisë

• Më 17 shkurt do të fillojë procesi gjyqësor kundër grupit të Llapit

• KMDLNJ ka dënuar sulmin kundër kryetarit të Gjykatës së Qarkut në Prizren Engjell Çettaj

• Bujanovc: Situatë e tensionuar në luginën e Preshevës pas arrestimit të shumë shqiptarëve nga forcat serbe

• Forcat serbe të sigurimit kanë arrestuar sot disa shqiptarë në Tërnoc e Konçul të Bujanovcit

• Në Serbi zbulohet fabrika më e madhe për prodhimin e drogës në Evropë

• A. Moisiu: Drejtësia të reagojë më ashpër ndaj krimit dhe korrupsionit

• OSBE kritikoi ashpër edhe projektligjin e qeverisë shqiptare mbi pronat

• Shqipëria bën përpjekje për të shtuar mundësitë e anëtarësimit në NATO

• Qeveria federale gjermane refuzon një Rezolutë të re të Kombeve të Bashkuara

• Donald Ramsfled flet sot në Muynih në Konferenca e 39-të ndërkombëtare për politikën e sigurisë

• Solana ka hedhur poshtë kritikat e Ramsfeldit për qëndrimin gjerman ndaj Irakut

• SHBA-të u kanë tërhequr qytetarëve të tyre për rrezikun nga sulmet terroriste me armë biologjike

• Nga një shpërthim në Bogotë kanë humbur jetën të paktën 20 njerëz

• Hans Bliks: Iraku po bën përpjekje për bashkëpunim

• Rusia kundër një rezolute të re për Irakun

• Ramsfeld në Evropë për të bindur aleatët për nevojën e veprimit ushrak kundër Irakut

Presidenti Rugova u kthye sot në Prishtinë nga vizita në SHBA
  

Prishtinë, 8 shkurt 2003 - Presidenti i Kosovës Ibrahim Rugova u kthye sot në Prishtinë nga një vizitë në SHBA.

Presidenti Rugova deklaroi në aeroportin e Prishtinës se ishte në Uashington ku mori pjesë në një manifestim madhështor dhe të rëndësishëm, në "Lutjet e mëngjesit".

 

Zoti Rugova tha se bashku me Presidentin Bush është lutur për paqen, mirëqenien dhe prosperitetin kombeve të botës.

 
Poashtu Presidenti Rugova tha se gjatë qëndrimit në Uashington ndërkohë ka pasur disa takime, si me senatorin Doll, që përafqëson zyrën e Kosovës, pastaj me bashkëdrejtuesit e Komitetit shqiptar, zotin Eliot Engëll dhe zonjën Sju Kelli, ku kanë biseduar për progresin arritur në Kosovë.

 

Ndërkaq në Stejt Departament zoti Rugova tha se ka biseduar me zonjën Xhenet Boug.

 

Me atë rast zyrtares së lartë të Stejt Departamentit i kishte dorëzuar një letër për Presidentin Bush që është përkrahja e Kosovës për aksionin e mundshëm në Irak, një përkrahje për paqe dhe një falenderim për Amerikën, që po e përkrah Kosovën, dhe për Presidentin Bush, tha Presidenti Rugova në deklaratën e tij të shkurtër për media në aeroportin e Prishtinës.

 

 

Rexhepi: Nuk është koha për deklaratë në parlament mbi pavarësinë

 

Uashington, 8 shkurt 2003 - Kryeminitri i Kosovës Bajram Rexhepi, duke komentuar nismën e një grupi deputetësh për shpalljen e Kosovës shtet të pavarur deklaroi:

 

"Edhe unë i ndaj shqetësimet e bashkësisë ndërkombëtare dhe në një mënyrë dua t'i përcjell edhe shqetësimet e miqve tanë amerikanë si në Departamentin e Shtetit ashtu edhe në Këshillin e Sigurisë Kombëtare të cilët janë mjaft të shqetësuar me këtë nismë".

Zoti Rexhepi në një intervistë për "Zërin e Amerikës" tha se "në kohën kur vëmendja e Shteteve të Bashkuara të Amerikës është e përqëndruar drejt krizës në Irak dhe Korenë e Veriut, dhe në kohën kur zoti Gjingjiq ka dalë me disa deklarata ose kërkesa të cilat janë konsideruar si mjaft negative nga ana e Departamentit të Shtetit dhe Këshillit për Siguri Kombëtare, të hyjë një iniciativë e tillë në Parlament mendoj se është kohë e papërshtatshme dhe sigurisht që atëherë edhe ne ulemi, në një ekuivalencë me ato që ka kërkuar zoti Gjingjiq".

Kryeministri Rexhepi në vazhdim tha se "nuk është koha për këtë deklaratë dhe duhet të presim një moment shumë më të volitshëm", duke shtuar se "vëmendja jonë këtë vit duhet të përqëndrohet në konsolidimin e institucioneve tona dhe në arritjen e përparimeve në të gjitha fushat".

 

 

Dita e parë e Kurban-Bajramit është e martë 11 shkurt

 

Prishtinë, 8 shkurt 2003 - Kryesia e Bashkësisë Islame të Kosovës njofton opinonin se dita e parë e festës së Kurban-Bajrami është e martë, 11 shkurt 2003.

Namzi i i Kurban-Bajrami do te falet në të gjitha xhamitë e Kosovës, ndrësa manifestimi qendror për territorin e Kosovës do të mbahet në Xhaminë "Sulltan Mehmet Fatih" (Xhamia e Madhe) të Prishinës, që fillon në ora 6:15 min me faljen e namazit të sabahut. Ndërkaq namazi i Kurban-Bajrami do të falet në ora 7.20 minuta.

Gjithashtu të martën, më 11 shkurt, ditën e parë të festës së Kurban-Bajramit si zakonisht Myftiu i Kosovë, dr. Rexhep Boja me bashkëpunëtorët jep pritje përurimi nga ora 9-12 në selinë e Kryesisë së Bashkësisë Islame të Kosovë në Prishtinë.

 

 

Përfaqësuesit e pesëshes u takuan me shefat e grupeve kryesore parlamentare të Kosovës

 

Prishtinë, 8 shkurt 2003 - Shefat e tri grupeve mjë të mëdha parlamentare të Kuvendit të Kosovës, Sabri Hamiti i LDK-së, Fatmir Limaj i PDK-së dhe Bujar Dugolli i AAK-së, janë takuar dje në Zyrën amerikane në Prishtinë me përfaqësuesit e pesëshes - Shteteve të Bashkuara, Britanisë së Madhe, Francës, Gjermanisë dhe Italisë - dhe kanë disktuar për nismën e një grupi deputetësh për të paraqitur në Kuvend një deklaratë për pavarësinë e Kosovës.

 

Nga ky takim nuk është dhënë asnjë njoftim zyrtar, por thuhet se diplomatët e huaj kanë kërkuar të mos shqyrtohet projektdeklarata e grupit parlamentar për Kosovën shtet të pavarur të mos trajtohet apo miratohet nga Kuvendi i Kosovës në seancën e ardhshme.

Nga ana e tyre, shefat e grupeve parlamentare në këtë takim kanë paraqitur pikëpamjet tyre lidhur me këtë nismë.

 

 

Organizata "Serbët e bashkuar" drejtohet nga Qeveria e Beogradit

 

Mitrovicë, 8 shkurt 2003 - Një organizatë e quajtur "Serbët e bashkuar" është formuar me urdhër të qeverisë së Beogradit. Në krye të saj është një ish-inspektor i Shërbimit Sekret Jugosllav, i cili gjatë kohës së luftës ka punuar në Mitrovicë, njoftojnë mediat lokale dhe theksojnë se se në këtë organizatë ekstremiste serbe janë përfshirë pjesëtarë të "Rojave të urës" dhe të policisë serbe.

Qëllimi i kësaj organizate ekstremiste serbe thuhet se është pengimi dhe moslejimi i funksionimit të Shërbimit Policor të Kosovës në veri të Mitrovicës dhe pamunësimi i funksionimit i administratës së UNMIK-ut. Kjo rrganizata ekstremiste ka kërcënuar edhe pejsëtarët e SHPK-së në veri të Mitrovicës prania e të cilëve është lejuar sipas një marrëveshje paraprake mes UNMIK-ut dhe qeverisë së Serbisë.

Zyrtarët e policisë ndërkombëtare thonë se nuk kanë dijeni për organizatën "Serbët e bashkuar", mënyrën e veprimit dhe strukturën e tyre, ndonëse kohë më parë administratori rajonal i Mitrovicës ka marrë një letër kërcënueese nga kjo organizatë.

 

 

H. Solana ka shprehur shqetësimin për nismën e grupit të deputetëve të Kosovës për miratimin e deklaratës së pavarësisë

 

Bruksel, 8 shkurt 2003 - Shefi për Politikë të Jashtme dhe Siguri i Bashkimin Evropian Havier Solana i ka dërguar një letër kryetarit të Kuvendit të Kosovës Nexhat Daci. Në këtë letër z. Solana ka shprehur shqetësimin e tij lidhur me iniciativën e një grupi të deputetëve të Kuvendit të Kosovës për miratimin e deklaratës së pavarësisë.

 

Në këtë letër po ashtu thuhet se ende nuk ka ardhur momenti i përcaktimit të statusit final të Kosovës dhe se miratimi eventual i deklaratës për pavarësinë nga ana e Kuvendit të Kosovës do të ishte tejkalim i kompetencave të këtij institucioni.

 

 

Më 17 shkurt do të fillojë procesi gjyqësor kundër grupit të Llapit

 

Prishtinë, 8 shkurt 2003 - Organet gjyqësore bëjnë të ditur se më 17 shkurt do të fillojë procesi gjyqësor kundër të ashtuquajturit "grupi i Llapit" - ish-komandantit të UÇK-së, Rrustem Mustafa i njohur me emrin e luftës si "Komandant Remi" dhe tre bashkëluftëtarëve të tij. Të gjithë ata akuzohen për krime kundër civilëve shqiptarë gjatë luftës në Kosovë.

Ndërkaq dje në qytetin e Podujevës u zhvilluan protesta të qytetarëve të cilët kërkuan lirimin e të gjithë pjesëtarëve të ish-UÇK-së të arrestuar gjatë vitit të kaluar.

 

 

KMDLNJ ka dënuar sulmin kundër kryetarit të Gjykatës së Qarkut në Prizren Engjell Çettaj

 

Prishtinë, 8 shkurt 2003 - KMDLNJ e ka dënuar sulmin kundër kryetarit të Gjykatës së Qarkut në Prizren Engjell Çettaj. Duke dënuar këtë akt të shëmtuar ky asocion për mbrojtjen e drejtave dhe lirive të njeriut e cilëson këtë akt si sulm ndaj gjyqësisë së Kosovës dhe organeve të drejtësisë.

"Në një shoqëri të civilizuar dhe demokratike këto akte nuk duhet të zënë vend, prandaj kërkojmë nga organet e ndjekjes dhe hetimet që t'i marrin sa më seriozisht të gjitha aktet e kërcënimeve dhe sulmeve jo vetëm ndaj gjykatësve dhe organeve të drejtësisë, por ndaj të gjithë qytetarëve të Kosovës", thuhet në deklaratën e KMDLNJ-së.

 

 

Bujanovc: Situatë e tensionuar në luginën e Preshevës pas arrestimit të shumë shqiptarëve nga forcat serbe

 

Bujanovc, 8 shkurt 2003 - Në një aksion brutal të forcave të kombinuara serbe të xhandarmërisë, të shërbimit sekret dhe njësive speciale antiterroriste në disa fshatra shqiptare të komunës së Bujanovcit janë arrestuar me dhjetra shqiptarë. Burimet shqiptare nga lugina e Preshevës njoftojnë se me atë rast janë arrestuar kryesisht ish-pjesëtarët e UÇPMB-së së shpërbërë.

 

Situata paraqitet shumë e tensionuar sidomos në fshatin Konçul e Tërnoc, ku janë tubuar me mijëra banorë shqiptarë në shenjë revolte për shkak të ndërhyrjes së forcave serbe dhe brutalitetit të tyre gjatë bastisjeve dhe arrestimeve të shqiptarëve.

 

Thuhet se janë arrestuar dhe anëtarë të Shefket Musliut, ish-komandant i UÇPMB-së, por sipas një burimi tjetër është arrestuar edhe Jonuz Musliu, kryetar i Partisë për Progres Demokratik, parti kjo e dalë nga UÇPMB-ja.

 

Ndërkaq në Tërnoc janë arrestuar tre persona, në mesin e tyre edhe Ilhami Saliu, ish-pjesëtar i UÇPMB-së. Situata ka qenë e tensionuar rreth mesditësnë Trënoc, ku banorët shqiptarë kishin rrethuar forcat serbe, por nuk njoftohet për ndonjë incident.

Sipas burimeve serbe janë arretsuar tetë shqiptarë.

Një ditë më parë zëvendëskryeministri serb Nebojsha Çoviq kishte akuzuar ish-pjesëtarët e UÇPMB-së për "akte terroriste".

 

 

Forcat serbe të sigurimit kanë arrestuar sot disa shqiptarë në Tërnoc e Konçul të Bujanovcit

 

Bujanovc, 8 shkurt 2003 - Forcat serbe të sigurimit kanë arrestuar të shtunën herët në mëngjes në fshatin Tërnoc e Konçul të Bujanovcit disa shqiptarë dhe kanë konfiskuar një sasi armësh dhe pajisjesh ushtarake.

 

Sipas mediave serbe ky aksion është ndërmarrë pas disa "akteve terroriste" në luginën e Preshevës, siç ishte vrasja e një pjestërari të sigurimit sekret serb në Bujanovc. Gjatë këtij aksioni është hequr edhe flamuri shqiptar nga përmendorja e Ridvan Qazimit, i njohur si komandant "Lleshi" në Tërnoc.

 

 

Në Serbi zbulohet fabrika më e madhe për prodhimin e drogës në Evropë

 

Beograd, 8 shkurt 2003 - Policia e Serbisë ka zbuluar fabrikën më të madhe për prodhimin e drogës sintetike në Evropë dhe me atë rast ka arrestuar 30 persona.

 

Vlera e drogës së gjetur në fabrikë dhe në laboratret në Novi Sad dhe Stara Pazovë vlerësohet në 10 milionë euro. Me atë rast janë gjetur dy milionë tableta drogë sintetike dhe 20 ton të një lloj acidi acetik që ka shërbyer për prodhimin e tabletave.

Tabletat e prodhuara, sipas policisë serbe, kanë përfunduar në tregjet e Lindjes së Largët e të Mesme, kurse vlera e këtij biznesi arrin në 50 mlionë dollarë.

 

 

A. Moisiu: Drejtësia të reagojë më ashpër ndaj krimit dhe korrupsionit

 

Tiranë, 8 shkurt 2003 - Presidenti Alfred Moisiu kërkoi të premten një reagim më të ashpër të Drejtësisë ndaj krimit të organizuar dhe korrupsionit. Presidenti shqiptar, i cili mori pjesë në analizën njëvjetore të Prokurorisë së Përgjithshme, u shpreh se "mosveprimi dhe heshtja dëmtojnë besimin e qytetarëve tek drejtësia dhe njollosin pa të drejtë ose nuk e pastrojnë politikën". Zoti Moisiu deklaroi se krimi dhe korrupsioni nxiten edhe nga mungesa e ndëshkimit të shpejtë.

 

 

OSBE kritikoi ashpër edhe projektligjin e qeverisë shqiptare mbi pronat

 

Vjenë, 8 shkurt 2003 - Çështja e pronave dhe afrimi i zgjedhjeve vendore në Shqipëri kërcënojnë të prishin marrëveshjen Nano-Berisha, u shpreh ambasadori i OSBE-së në Tiranë, Liponen. Ai i bëri këto komente gjatë raportit që paraqiti në Këshillin e Përhershëm të OSBE-së në Vjenë mbi situatën në Shqipëri.

 

Ai kritikoi ashpër edhe projektligjin e qeverisë mbi pronat, i cili sipas tij nuk ndryshon nga legjislacioni aktual. Ky problem sipas ambasadorit të OSBE-së është kthyer edhe në provën e parë të letrës së lakmuesit për bashkimin e propozuar për partive të djathta dhe ajo që mund të prishë marrëveshjen Nano - Berisha.

 

 

Shqipëria bën përpjekje për të shtuar mundësitë e anëtarësimit në NATO

 

Tiranë, 8 shkurt 2003 - Shqipëria ka lidhë marrëveshje me një firmë amerikane në përpjekje për të shtuar mundësitë e anëtarësimit sa më të shpejtë të vendit në Aleancën Veriatlantike. Kjo firmë ligjore me qendër në Uashington do të aftësojë punonjësit e administratës publike dhe ata të organizmave joqeveritarë.

 

 

Qeveria federale gjermane refuzon një Rezolutë të re të Kombeve të Bashkuara

 

Berlin, 8 shkurt 2003 - Qeveria federale gjermane refuzon një rezolutë të re të Kombeve të Bashkuara ku do të parashikohej një kërcënim me sulm ushtarak ndaj Irakut.

 

Për këtë aktualisht nuk ka asnjë arsye, tha zëvendësi i zëdhënësit qeveritar Hans-Hermann Langguth në Berlin. Për më tepër duhet të vazhdohet puna e inspektorëve të Kombeve të Bashkuara për armatimin posaçërisht tani kur është forcuar mandati i tyre atje.

Ndërkohë kancelari gjerman Gerhard Shrëder pritet që lidhur me krizën e Irakut të takohet dhe bisedojë nesër në Berlin me presidentin rus Vlladimir Putin.

 

 

Donald Ramsfled flet sot në Muynih në Konferenca e 39-të ndërkombëtare për politikën e sigurisë

 

Mynih, 8 shkurt 2003 - Me një fjalim të ministrit amerikan të Mbrojtjes Donald Ramsfeld fillon sot edhe zyrtarisht Konferenca e 39-të ndërkombëtare për politikën e sigurisë. Pritet që në fjalën e tij drejtuar më tepër se 250 ushtarakëve dhe politikanëve për çështje të jashtme dhe të sigurisë nga 40 vende, Ramsfeld të përsërisë shkaqet për insistimin amerikan për një ndërhyrje ushtarake kundër Irakut. Pas ministrit amerikan Ramsfeld fjalën do ta ketë ministri i jashtëm gjerman Joshka Fisher.

 

 

Solana ka hedhur poshtë kritikat e Ramsfeldit për qëndrimin gjerman ndaj Irakut

 

Hamburg, 8 shkurt 2003 - I ngarkuari me politikën e jashtme dhe çështje të sigurisë së Bashkimit Evropian Havier Solana ka hedhur poshtë kritikat e ministrit amerikan të mbrojtjes Donald Ramsfeld për qëndrimin gjerman ndaj konfliktit të Irakut.

 

Për gazetën "Bild am Sonntag" Solana ka deklaruar se evropianët nuk duhet t'i kushtojnë vëmendje të madhe komenteve politike që vijnë nga ana tjetër e Atlantikut. Vendimtar sipas Solanës duhet të jetë vetëm çarmatimi i Irakut.

 

 

SHBA-të u kanë tërhequr qytetarëve të tyre për rrezikun nga sulmet terroriste me armë biologjike

 

Uashington, 8 shkurt 2003 - Shtetet e Bashkuara të Amerikës u kanë tërhequr vërejtjen qytetarëve të tyre në mbarë botën për rrezikun në rritje nga sulmet terroriste me armë biologjike apo kimike.

 

Ministri amerikan i Drejtësisë Xhon Ashroft deklaroi se ekzistojnë dëshmi të ndryshme që organizata terroriste "El Kaida" të ketë planifikuar sulme në Shtetet e Bashkuara të Amerikës.

 

Rreziku është i madh posaçërisht deri nga mesi i shkurtit kur do të ketë përfunduar vizita e besimtarëve mysliman në Mekë.

 

 

Nga një shpërthim në Bogotë kanë humbur jetën të paktën 20 njerëz

 

Bogotë, 8 shkurt 2003 - Si pasojë e një shpërthimi të rëndë në një klub të natës që ndodhi në kryeqytetin kolumbian jetën kanë humbur të paktën 20 njerëz. Siç njoftuan autoritetet, poashtu janë plagosur edhe shumë se 100 persona tjerë.

 

Klubi i natës "El Nogal" në veri të qytetit milionësh është shkatërruar pothuajse në tërësi. Shkaku i shpërthimit vazhdon të mbetet i paqartë. Megjithatë nuk përjashtohet mundësia e një sulmi terrorist.

 

 

Hans Bliks: Iraku po bën përpjekje për bashkëpunim

 

Vjenë, 8 shkurt 2003 - Kryeinspektori i OKB-së për armët, Hans Bliks, thotë se duket që Iraku po bën përpjekje për të bashkëpunuar me inspektorët e OKB-së. Megjithatë, zoti Bliks thotë se gjatë bisedimeve të ardhshme me zyrtarë irakianë, ekipi i OKB-së kërkon të shohë më shumë të dhëna që provojnë bashkëpunimin nga pala irakiane.

 

Ai i bëri këto komente jashtë zyrave të OKB-së në Vjenë, pas njoftimit se inspektorët në Irak u lejuan të intervistonin për herë të parë, vetëm për vetëm, një shkencëtar irakian. Intervista të tilla janë një nga kërkesat kryesore të Këshillit të Sigurimit.

 

 

Rusia kundër një rezolute të re për Irakun

 

Moskë, 8 shkurt 2003 - Ministri i Jashtëm rus, Igor Ivanov, thotë se Moska do të kundërshtonte çdo rezolutë të re të OKB-së, që do të autorizonte ndërmarrjen e veprimeve ushtarake kundër Irakut. Zoti Ivanov thotë se Rusia nuk sheh ndonjë arsye për një rezolutë të re të Këshillit të Sigurimit, e cila do t’i hapte rrugën përdorimit të forcës kundër Irakut.

 

Ministri i Jashtëm rus i bëri këto komente një ditë pasi presidenti Bush tha se Shtetet e Bashkuara do të mirëprisnin një rezolutë të re, e cila do ta bënte të qartë se Këshilli i Sigurimit këmbëngul në përmbushjen e kërkesave të mëparshme për çarmatimin e Irakut.

 

 

Ramsfeld në Evropë për të bindur aleatët për nevojën e veprimit ushrak kundër Irakut

 

Romë, 8 shkurt 2003 - Sekretari amerikan i Mbrojtjes Donald Ramsfeld u takua në Romë me kryeministrin Silvio Berluskoni, si dhe me zyrtarë të tjerë italianë, për t'u shprehur morënjohjen lidhur me mbështetjen e Italisë për qendrimin amerikan ndaj Irakut.

Sekretari Ramsfeld do të vizitojë trupat amerikane në një bazë ajrore në Italinë veriore, para se të niset për në Mynih të Gjermanisë, ku ai do të flasë në një konferencë evropiane mbi sigurinë dhe do të zhvillojë bisedime me homologët e tij evropianë.

Copyright©2000-2003 Trepca.net - Të gjitha të  drejtat e rezervuara.