Lajme

E premte, 7 shkurt 2003

Përmbajtja:

• Rugova i shkruan Bushit: Kosova qëndron plotësisht në përkrahje të SHBA-ve në luftën kundër terrorizmit

• Presidenti Rugova u takua me zyrtaren e lartë të Departamentit të Shtetit

• Presidenti Rugova u takua me kongresistët Eliot Engëll dhe Sju Kelli

• Presidenti Rugova mori pjesë në "Lutjen e mëngjesit" në Uashington

• Zëdhënësi i LDK-së për fjalimin e Shtajnerit para KS të OKB-sëZëdhënësi i LDK-së për fjalimin e Shtajnerit para KS të OKB-së

• SHBA-të i bashkojnë shqiptarët e Kosovës dhe Shqipërisë

• Podujevë: KFOR-i në bashkëpunim me policinë e UNMIK-ut dhe SHPK-në po punojnë për mbajtjen e sigurisë

• U protestua për lirimin e të akuzuarve të Grupit të Llapit

• LDK në Gjilan: Të njihet pavarësia e Kosovës, sepse ajo është shpallur me Referendum

• Rusia nuk pakëson numrin e paqeruajtësve në Kosovë

• Kongresistët amerikanë Eliot Engëll dhe Xhim Moren konstatojnë se ka ardhur koha që Kosovës t'i njihet pavarësia

• Shtajner përsëriti para Këshillit të Sigurimit se ende nuk mund të të definohet statusi final i Kosovës

• Asociacionet e familjeve të zhdukura kanë diskutuar çështjen e personave të zhdukur

• Buçkovski dhe Çoviq "të shqetësuar" për "disa sinjale" në luginën e Preshevës dhe në Kosovë

• Britania vështirëson azilin për shqiptarët

• Presidenti Moisiu përsërit mbështejtjen e vendit ndaj SHBA për cështjen e Irakut

• Shqiptarët e Maqedonisë të diplomuar në Kosovë kërkojnë njohjen e diplomave të tyre

• Ambasadori i NATO-s në Shkup thotë se nuk do të lejohet asnjë trazirë në Maqedoni

• Tre kryengritës të Tigrave Tamilë kanë hedhur veten në erë pasi janë zënë duke kontrabanduar armë

• Siria ka strehuar një sasi të armëve të Irakut

• Një oficer i CIA-s ka vdekur dhe dy të tjerë janë plagosur në një aksident në Afganistan

• Forcat speciale amerikane kanë arrestuar disa persona në Afganistan

• Bush i thotë Irakut "loja mbaroi"

• Bler bind britanikët për Irakun

• Turqia i ofron bazat SHBA-së për Irakun

• Reagimet e vendeve evropiane për krizën rreth Irakut

Rugova i shkruan Bushit: Kosova qëndron plotësisht në përkrahje të SHBA-ve në luftën kundër terrorizmit

 

Uashington 7 shkurt 2003 - President i Kosovës Ibrahim Rugova i ka dërguar Presidentit të SHBA-ve, Xhorxh Bush, një letër përkrahjeje në lidhje me politikën amerikane rreth Irakut.

Po e japim të plotë tekstin e letrës:

"Po ju shkruaj në emër të popullit të Kosovës për të shprehur mirënjohjen time për përkrahjen tuaj të vazhdueshme për Kosovën. Jemi të vetëdijshëm se lidershipi juaj dhe i administratës suaj janë me rëndësi thelbësore për paqen, stabilitetin dhe prosperitin në rajonin tonë.

Nga ana jonë, Presidenca, Qeveria, Kuvendi dhe populli i Kosovës angazhohen fuqishëm për progres në ndërtimin e një shoqërie plotësisht përfshirëse, për sundim të ligjit, si dhe të qeverisjes së mirë, me synimin për një Kosovë të pavarur dhe demokratike.

Kosova qëndron plotësisht në përkrahje të Shteteve të Bashkuara në luftën kundër terrorizmit. Ne jemi me ju në përcaktimin Tuaj për të luftuar këtë të keqe kudo që kërcënon lirinë dhe shoqërinë e lirë. Duke pasë përjetuar vetë tiraninë dhe terrorin, ne e dimë se Shtetet e Bashkuara dhe bashkësia e kombeve të civilizuara nuk mund të sprapsen nga kjo detyrë.

Në kohën kur vendi juaj po përgatitet për veprim eventual në Irak, ju keni përkrahjen tonë të plotë politike. Veç kësaj, ne do të kishim nderin dhe kënaqësinë të ofrojmë ndihmë konkrete në cilëndo fushë që ju e kërkoni dhe është e realizueshme.

Ju falënderojmë sërish për përkrahjen tuaj. Faleminderit për vëmendjen tuaj", thuhet në fund të letrës së së Presidentit Rugova drejtuar Presidentit amerikan Xhorxh Bush.

 

 

Presidenti Rugova u takua me zyrtaren e lartë të Departamentit të Shtetit

 

Uashington, 7 shkurt 2003 – Presidenti i Kosovës, Dr. Ibrahim Rugova, pati të enjtën një takim në Departamentin e Shtetit me zonjën Xhenet Bog (Janet Bogue), zëvendësndihmëse e Sekretarit Amerikan të Shtetit.

Në takim u bisedua për çështjet aktuale dhe perspektivat e zhvillimit në Kosovë.

President Rugova foli për arritjet në Kosovë, për objektivat e institucioneve tona – zhvillimin ekonomik, investimet, privatizimin, si dhe integrimin e brendshëm të shoqërisë e të grupeve etnike të Kosovës.

Presidenti ritheksoi qëndrimin se njohja formale e pavarësisë së Kosovës krijon stabilitet në rajon, duke vënë në pah poashtu se është punuar dhe po punohet edhe në shtegun e standardeve, që shihen si të domosdoshme për përcaktimin e statusit përfundimtar.

Zyrtarja e lartë e Departamentit të Shtetit, Xhenet Bog, vlerësoi autoritetin moral e politik udhëheqës të Presidentit Rugova, dhe parashtroi qëndrimin amerikan në lidhje me rrugën që duhet ndjekur për të krijuar një ambient përfshirës për të gjithë në Kosovë.

Presidenti Rugova dhe zonja Bog biseduan edhe për kontekstin e sotëm ndërkombëtar, në radhë të parë në lidhje me krizën në Irak.

Presidenti i Kosovës shprehu përkrahje për politikën amerikane rreth Irakut. Me këtë rast, Presidenti Rugova ia dorëzoi zonjës Bog një letër për Presidentin Bush.

 

 

Presidenti Rugova u takua me kongresistët Eliot Engëll dhe Sju Kelli

 

Uashington, 7 shkurt 2003 – Presidenti i Kosovës Ibrahim Rugova pati takime të veçanta me dy miq të Kosovës, kongresistin Eliot Engëll dhe kongresisten Sju Kelli (Sue Kelly), bashkëdrejtues të Këshillit për Çështje Shqiptare në Kongresin Amerikan.

Në takime u bisedua për gjendjen në Kosovë, për çështjet aktuale politike e ekonomike, për funksionimin e institucioneve të Kosovës, si dhe për rrugën që duhet ndjekur për të hapur perspektiva të zhvillimit të vendit tonë.

Në një bisedë të gjatë e miqësore, Presidenti Rugova dhe kongresisti Engel këmbyen mendime për aspekte të ndryshme të gjendjes në Kosovë, përfshirë edhe statusin, duke qenë të një mendjeje se pavarësia e Kosovës siguron stabilitet politik e ekonomik në Kosovë e në rajon.

Presidenti Rugova falënderoi zotin Engëll dhe zonjën Kelli për angazhimin e tyre të vazhdueshëm në të mirë të Kosovës.

 

 

Presidenti Rugova mori pjesë në "Lutjen e mëngjesit" në Uashington

 

Uashington, 7 shkurt 2003 – Me ftesë të Kongresit Amerikan, Presidenti i Kosovës Ibrahim Rugova mori pjesë të enjtën në Uashington në ceremoninë tradicionale amerikane, e 51-ta me radhë sivjet, të njohur si "Lutja e mëngjesit".

Në sallën gjigante të hotelit Hilton, ku merrnin pjesë figura të rëndësishme amerikane e ndërkombëtare, duke filluar nga Presidenti Bush, Presidenti i Kosovës gjendej në grupin e pjesëmarrësve nga kreu i sallës.

Gjatë qëndrimit disaditësh në Uashington, Presidenti Rugova ka realizuar disa takime me zyrtarë amerikanë e miq të vendit tonë në SHBA.

 

 

Zëdhënësi i LDK-së për fjalimin e Shtajnerit para KS të OKB-sëZëdhënësi i LDK-së për fjalimin e Shtajnerit para KS të OKB-së

 

Prishtinë, 7 shkurt 2003 - Raporti i djeshëm i kryeadministratorit të Kosovës, z.Shtajner, para KS të OKB-së është në vazhdën e raporteve që paraqet përfaqësuesi special i Sekretarit të Përgjithshëm të OKB-së para Këshillit të Sigurimit për çdo tre muaj. Varësisht edhe nga konteksti kohor, raporti i fundit i tij dallon nga ai paraprak, deklaroi Lulzim Zeneli, zëdhënës i LDK-së.

Në raportin e fundit, kryeadministratori Shtajner u fokusua në dy çështje: në çështjen e statusit të Kosovës, për të cilën tha, se si viti 2003 do të jetë një vit kur do të vihen themelen dhe një bazë e fortë që do të çonte nga zgjidhja e statusit final të Kosovës, që aludon në përmbushjen e standardeve para statusit që ai i ka vënë, thotë Zeneli.

"Natyrisht se qëndrimi i LDK-së është i njohur publikisht, se krahas angazhimit tonë të përbashkët me ndërkombëtarët, ne kërkojmë njohjen formale të pavarësisë së Kosovës, ku edhe të gjitha proceset që po zhvillohen në Kosovë dhe rajon japin premisa të realizimit të saj", tha zëdhënësi Zeneli.

Ai theksoi përqëndrimi i z.Shtajner gjatë raportimit të tij ishte në arritjet e shumta që janë bërë në Kosovë, por edhe në sfidat me të cilat po përballet Kosova. Me fjalë të tjera, raporti i kryeadministratorit Shtajner para KS të OKB-së ishte në suazat e vlerësimit të autoriteteve ndërkombëtare që janë të vendosura në Kosovë me mandat administratimi.

Para së gjithash, në këtë raport e mira është se megjithatë zhvillimet e shumta të politikave globale në këtë kohë, bota e para së gjithash, SHBA-të dhe OKB-ja vazhdon të jetë e përqëndruar në Kosovë dhe rajon, Lulzim Zeneli, zëdhënës i LDK-së.

 

 

SHBA-të i bashkojnë shqiptarët e Kosovës dhe Shqipërisë

 

Uashington, 7 shkurt 2003 - Këshilli Kombëtar Shqiptaro – Amerikan (KKSHA), të mërkuren mbrema organizoi një takim koktej në Rejbërn Office Bilding të Kongresit Amerikan në kryeqytetin e SHBA – ve, Washington DC për delegacionin e Shqipërisë, delegacionin e Kosovës, delegacione këto që janë të ftuara të marrin pjesë në takimin tradicional amerikan "Lutjet e Mëngjesit", dhe zyrtarëve amerikanë.

Të pranishëm në këtë takim ishin Presidenti i Kosovës Ibrahim Rugova, Alush Gashi, Servet Pëllumbi, Namik Dokle dhe delegacioni përcjellës i Shqipërisë, kongresistët demokratë dhe bashkëkryetarët e grupit për shqiptarë në Kongresin e SHBA – ve Eliot Engel dhe Sue Kelli, kongresmeni Erl Pomeroj, kongresmeni Xhejms Moran, miku i madh i shqiptarëve ambasadori William Woker, zoti Donald Braum nga Departamenti i Shtetit, ambasadori William Rajerson, Xhoshua Blek nga desku për Kosovën pranë Departamentit të Shtetit, Polla Fini – drejtoreshë për Europën në USID, analistët dhe ekspertët për të drejtën nderkombëtare Poll Williams dhe Xhejms Huper, etj.

Në një komunikatë të KKSHA thuhet se qëllimi i këtij takimi, që tashmë është bërë tradicional ishte që delegacioni i Shqipërisë dhe ai i Kosovës drejtpërsedrejti të takohen me zyrtarët dhe miqtë amerikanë dhe të shkëmbejnë mendimet në mes veti, që doli një takim shumë i qëlluar dhe konstruktiv për të gjitha palët.

Tema për të cilat më së shumti u bisedua dhe të cilat dominuan gjatë mbrëmjes ishin: statusi politiko–juridik i Kosovës d.m.th. mosdefinimi i tij; siguria dhe lufta kundër krimit të organizuar dhe lufta kundër korrupsionit si në Shqipëri ashtu edhe në Kosovë; korridori i tetë; rruga Durrës Prishtinë; joshja e investimeve nga jashtë si në Shqipëri ashtu edhe në Kosovë etj.

Sa i përket Kosovës dhe statusit politiko – juridik me këtë janë lidhura si zhvillimi ekonomiko – shoqëror ashtu edhe investimi potencial nga jashtë. Gjithashtu në komunikatë më tutje theksohet:

Mosdefinimi i statusit të Kosovës frenon zhvillimin ekonomik si dhe atë shoqëror-kulturor dhe largon e zbraps investitorët potencialë nga jashtë.

 

Statusi i padefinuar i Kosovës është duke e pamundësuar Kosovën që t'i shfrytëzojë ndihmat dhe kreditimet e ndryshme nga institucionet ndërkombëtare siç janë Banka Botërore, Fondi Monetar Nderkombëtar etj. dhe mu për këtë bisedimet për statusin e Kosovës duhët të fillojnë sa më pare dhe atë nën mbikqyrjen e SHBA–ve dhe se me dhënien e kompetencave të plota qeverisëse kosovarëve.

 

Kosovarët pra, do të jenë në gjendje që edhe standardet demokratike që po i kërkon bashkësia nderkombëtare t'i përmbushin, thuhet në komunikatën e KKSHA.

 

 

Podujevë: KFOR-i në bashkëpunim me policinë e UNMIK-ut dhe SHPK-në po punojnë për mbajtjen e sigurisë

 

Podujevë, 7 janar – Situata në rajonin tonë të përgjegjësisë është e qetë dhe kjo gjendje mbretëron edhe në kufi, - ka pohuar oficeri i Batalionit çeko-sllovak, Kollarik, në konferencën e sotme për gazetarë e cila u mbajt në zyrën e SIMIC-ut çeko-sllovak. Kollarik njoftoi KFOR-i se në një operacion në Majac të Poshtëm janë gjetur 5 armë gjueti, njëra nga të cilat pa leje.

 

"Gjatë operacionit janë gjetur edh edy thika dhe një uniformë e UÇK-së dhe një uniformë serbe", pohoi Kollarik. Ai njoftoi gazetarët se KFOR-i çeko-sllovak po vazhdon eliminimin e qenëve endacakë dhe se kjo do të vazhdojë edhe këtë muaj.

Në pikën G-3 misioni i Kombeve të Bashkuara në Kosovë ka organizuar një lloj ekspozite rrobash të të vdekurve për t'u mundësuar disa serbëve që t'i identifikojnë ato, por serbët nuk kanë gjetur asgjë, tha Kollarik.

 

Ndërkaq shefi i SIMIC-ut mbitogeri Pavel Mraz njoftoi se në kuadër të bashkëpunimit me popullatën civile KFOR-i ka shpërndarë ushqim për familjet e varfëra që ka siguruar ADRA çeke. "Jemi duke punuar bashkë me DMPD-në e komunës që ta hapim një ekspozitë nga vizita e nxënësve të shkollave të Podujevës bërë Republikës Çeke vitin e kaluar", tha z. Mraz.

Në pyetjen lidhur me paraqitjen e njerëzve të armatosur e me maska edhe në fshatin Bradash mbitogeri Lofler nuk e komentoi, por tha se KFOR-i në bashkëpunim me policinë e UNMIK-ut dhe SHPK-në po punojnë për mbajtjen e sigurisë për të gjithë qytetarët.

Do theksuar se policia rajonale e UNMIK-ut e Prishtinës ka njoftuar se një person ka lajmëruar policinë se mbrëmë rreth orës 21.50, derisa po udhëtonte drejt fshatit Bradash me familjen e tij, persona të maskuar e kanë ndalur duke i bllokuar rrugën me dy vetura, por ai ka shpëtuar pasi ka alarmuar shtëpitë e afërta dhe të dyshuarit kanë ikur nga vendi ngjarjes.

 

 

U protestua për lirimin e të akuzuarve të Grupit të Llapit

 

Podujevë, 7 janar – Rreth orës 12 në rrugën “Zahir Pajaziti” në qendër të Podujevës, tri asociacionet e dala nga lufta e UÇK-së organizuan një protestë për lirimin e të ashtuçuajturit Grupi i Llapit gjykimi i të cilit është paralajmëruar këtë muaj.

Në këtë protestë morën pjesë disa qindra qytetarë që brohoritën dhe kërkuan lirimin e ish Komandantit të ZOLL-it Rrustem Mustafës – Remit, dhe të akuzuarve Latif Gashi, Naim Kadriu dhe Nazif Mehmeti.

 

 

LDK në Gjilan: Të njihet pavarësia e Kosovës, sepse ajo është shpallur me Referendum

 

Gjilan, 6 shkurt 2003 - Dega e LDK-së në Gjilan, bashkë me Forumin e Rinisë, Forumin e Gruas si dhe nëndegët e aktivet, lidhur me iniciativën e 42 deputetëve të Kuvendit të Kosovës për shpalljen e Pavarësisë së Kosovës, nëpërmjet zëdhënësit të kësaj Dege, zotit Sabit Rrustemi, ka lëshuar këtë reagim:

Nisma e Aleancës për Ardhmërinë e Kosovës (AAK), që tashmë si e "pavarur" ka marrë mbështetjen e 42 deputetëve të Kuvendit të Kosovës për shpalljen e Pavarësisë së Kosovës, nuk ka nevojë për t'i përsëritur aktet që shumë vite më parë i kemi kryer por, ka nevojë që ato akte, siç është edhe shpallja e Pavarësisë së Kosovës nëpërmjet Referendumit të vitit 1991 t'i avancojë mëtutje, përmes forcimit të instituconeve demokratike, funksionalizimit të tyre dhe vënies në shërbim të qytetarëve si dhe të kërkesës këmbëngulëse dhe të vazhdueshme qarqeve ndërkombëtare për njohjen e Pavarësisë së Kosovës.

Mbajtja e një Referendumi për Pavarësinë e Kosovës, siç ishte ai i 26-30 shtatorit të vitit 1991 është akt më i fuqishëm se çdo Deklaratë e cilitdo kuvend qoftë ai, pavarësisht se edhe në këtë Kuvend të Kosovës janë të zgjedhurit e popullit.

Mbi themelet e atij Referendimi për Kosovës shtet sovran dhe të pavarur u mbajtën edhe dy herë radhazi zgjedhjet parlamentare dhe presidenciale dhe, ne sot, në rrethana krejtsisht të lira nuk guxojmë t'i përbuzim apo nëpërkëmbur.

Ngjashëm si Presidenti i Kosovës, Ibrahim Rugova, do të duhej që edhe Kuvendi i Kosovës po edhe Qeveria e saj, të kërkojnë edhe njohjen formale të kësaj Pavarësie, sepse nuk kemi nevojë për ta nëpërkëmbur atë vullnet të asaj kohe i cili u shpreh para tytave të artilerisë së rëndë serbe.

Sigurisht që sot, po edhe në çfarëdo dite tjetër, i njejti vullnet jo vetëm që nuk ka ndërruar por, vetëm është fuqizuar andaj, nuk ka nevojë për t'i kthyer proceset e pavarësimit të Kosovës mbrapa.

Kuvendi i Kosovës vetëm do të t'i drejtohet OKB-së, Shteteve të Bashkuara të Amerikës si dhe Bashkimit Europian e vendeve të tjera të botës për njohjen e Pavarësisë së Kosovës.

Nuk kemi nevojë të manifestojmë diletantizëm politik si dhe sa herë të ndërrohen garniturat politike në Kuvendin e Kosovës të kërkojmë edhe "shpallje" të pavarësisë së Kosovës për marketing apo alibi politike.

Po, kemi nevojë për një koncensus brenda vetë Kuvendit të Kosovës për njohjen formale të Pavarësisë së Kosovës, koncensus i arritur edhe me pajtimin e ndërkombëtarëve i cili do ta unifikonte si faktorin politik të përfaqësuar në Kuvend, ashtu edhe atë jashtë Kuvendit dhe do ta sforconte besimin në popull se ecja drejt procesit të realizimit të pavarësisë së Kosovës bëhet nga të gjithë dhe është e përbashkët.

Po, edhe para botës demokratike dalim më seriozë, anipse ata mirëfilli e dinë përcaktimin tonë. Të njihet pavarësia e Kosovës se ajo është e shpallur me Refrendum.

 

 

Rusia nuk pakëson numrin e paqeruajtësve në Kosovë

 

Moskë, 7 shkurt 2003 - Komandanti i kontigjentit paqeruajtës rus në Kosovë, gjeneralmajori Nikollaj Krivencov, ka njoftuar se është bërë vetëm ndërrimi i planifikuar i këtij kontigjenti e jo pakësimi i numrit të paqeruajtësve rusë në Kosovë.

Krivencov ka saktësuar se me vendimin e komandantit të forcave të armatosura të Federatës ruse, Rusia do të ruajë praninë e saj në Kosovë dhe se Ministria e Mbrojtjes nuk planifikon pakësimin e ushtarëve në rajon. Ky gjeneral rus thotë se aktualisht në Kosovë ka 650 ushtarë dhe oficerë rusë.

 

 

Kongresistët amerikanë Eliot Engëll dhe Xhim Moren konstatojnë se ka ardhur koha që Kosovës t'i njihet pavarësia

 

Uashington, 7 shkurt 2003 - Në Zyrat e Komisionit të Kongresit amerikan për Marrëdhëniet me Jashtë u mbajt një takim me lobistët shqiptaro-amerikanë.

 

Anëtari i lobit drejtues të Këshillit Kombëtar Shqiptaro-Ameriakan Ekrem Bardha deklaroi se ky takim është një rast ideal për përfaqësuesit nga Shqipëria dhe Kosova që të njihen me kolegët e tyre amerikanë dhe të vendosin lidhje të drejtëpërdrejta.

 

Ai tha se miqtë amerikanë e kanë organizuar këtë mbrëmje për të pritur bashkatdhetarët nga Shqipëria dhe nga Kosova. Në këtë takim morën pjesë shumë personalitete amerikane, senatorë, kongresistë për t'u njohur dhe për të biseduar për problemet në rajon, sidomos në Kosovë, në Shqipëri, në Maqedoni dhe në Mal të Zi, njofton "Zëri i Amerikës".

Kongresisti Xhim Moren nga Virgjinia, anëtar i grupit të Kongresit amerikan që merret me çështjet shqiptare dhe që njihet nga përkrahësit kryesor për çështjen e Kosovës në Uashington theksoi se Jugosllavia de jure nuk ekziston më dhe se ka ardhur koha që edhe Kosovës t'i njihet pavarësia.

 
Ndërkaq, kongresisti Eliot Engëll nga Nju-Jorku thotë se grupi në Kongres mbi çështjet shqiptare që ai e kryeson është duke zhvilluar diskutime mbi këtë çështje dhe ligjvënësit ende nuk kanë dalë me një vendim të qartë se si duhet vepruar.

 

Z. Engëll thotë se disa ligjvënës shikojnë paraqitjen e rezolutave për njohjen e pavarësisë së Kosovës, ndërkaq disa të tjerë parapëlqejnë ushtrimin e ndikimit para administratës dhe Departamentit të Shtetit. Ai u bëri thirrje shqiptarëve që të heqin dorë nga grindjet politike ndërpartiake, pasi këto grindje sipas tij i vonon ata nga arritja e qëllimit të përbashkët që është pavarësia e Kosovës.

Përkrahjen e madhe në luftën kundër terrorizmit dhe krizës në Irak që SHBA-të kanë marrë veçanërisht nga shqiptarët në Shqipëri, në Kosovë, Maqedoni e kudo, përbën një kujdes të vazhdueshëm për Uashingtonin se te kombi shqiptar amerikanët kurdoherë do të gjejnë një mik dhe aleat të ngushtë"- theksoi ambasadori amerikan Uiliam Uoker.

 

 

Shtajner përsëriti para Këshillit të Sigurimit se ende nuk mund të të definohet statusi final i Kosovës

 

Nju-Jork, 7 shkurt 2003 - Kryeadministratori i Kosovës Mihael Shtajner mbrëmë iu drejtua KS të OKB-së. Derisa komuniteti ndërkombëtar përqëndrohet në standardet dhe në atë çfarë dëshiron populli, politikanët përqëndrohen në statusin e Kosovës, tha Shtajner.

 

Sipas tij hapi i njëanashëm për krijimin e komunave serbe në veri të Kosovës nuk ka vlerë ligjore. Ndërkaq lidhur me prioritetet e administratës ndërkombëtare në Kosovë, shefi i UNMIK-ut tha:

"Standardet, vendet e punës, siguria dhe shumetniciteti i mirëfilltë, bartja e kompetencave, nisja e dialogut të drejtpërdrejt Prishtinë - Beograd, përgatitja për integrimin evropian, janë prioritetet për vitin 2003".

 

Sipas Shtajnerit, standardet që duhet arritur duhet të jenë reale dhe të shihen karshi të arriturave në rajon. Kosova edhe më tutje është larg institucioneve vërtet demokratike dhe të një shoqërie ku minoritetet mund të marrin pjesë tërësisht.

Papunësia, tha Shtajner vazhdon të jetë brengë kryesore, por investimet nga jashtë do të mund të vijnë kur të plotësohen standardet e një shoqërie demokratike funksionale.

 

Ai ka theksuar se nuk mund të lejohet veprimi i strukturave paralele, prandaj edhe është themeluar administrata e UNMIK-ut në Mitrovicë. Ai lavdëroi Beogradin se ka ndihmuar, por në fushat tjera vazhdon t'i përkrahë strukturat paralele, duke vepruar në baza njëetnike, theksoi Shtajner.

Në Kosovë është arritur mjaft, por ka mbetur edhe shumë për t'u bërë, tha Shtajner. Ndërkaq sa i përket statusit përfundimtar Shtajner edhe njëherë para KS të OKB-së ka vlerësuar se ende nuk janë pjekur kushtet që të definohet statusi final i Kosovës, duke e përsëritur tashmë formulën për Kosovën, para se të diskutohet statusi i Kosovës duhet të përmbushen tetë standardet e caktuara nga UNMIK-ut.

 

Ai ka shprehur shqetësimin edhe për përçarjet politike siç është shprehur ai të shqiptarëve dhe serbëve në anën tjetër, cila politikë po e pengon ndërtimin e mirëbesimit dhe tolerancës ndëretnike.

 

 

Asociacionet e familjeve të zhdukura kanë diskutuar çështjen e personave të zhdukur

 

Prishtinë, 7 shkurt 2003 - Asociacionet e familjeve të zhdukura kanë organizuar dje një konferencë për të diskutuar çështjen e personave të zhdukur. Në këtë takim ishin ftuar përfaqësuesit e Zyrës së UNMIK-ut dhe Komisionit Parlamentar të Kosovës për Persona të Zhdukur.

 

Qëllimi i kësaj konference është që t'i bashkojmë të gjithë faktorët që janë të involvuar në këtë çështje për hulumtimin dhe për gjetjen e personave të zhdukur dhe të rrëmbyer gjatë luftës në Kosovë, thotë Sheremet Ahmeti kryetar i Asociacioneve familjare për përsona të zhdukur.

 

Ndërkaq, shefi i Zyrës së UNMIK-ut për persona të zhdukur dhe mjekësi ligjore thotë se këtë vit shpreson se do të përfundohet kjo punë në Kosovë. Ai u bëri thirrje të gjitha familjeve që të ofrojnë informata më të sakta lidhur me rrethanat për zhdukjen e më të dashurëve të tyre.

 

 

Buçkovski dhe Çoviq "të shqetësuar" për "disa sinjale" në luginën e Preshevës dhe në Kosovë

 

Vranjë, 7 shkurt 2003 - Ministri maqedonas i Mbrojtjes Vllado Buçkovski dhe zëvendëskryeministri serb Nebojsha Çoviq në një takim të mbrëmshëm në Vranjë, kanë vlerësuar se për shkak të situatës në rajon është i domosdoshëm një aksion i domosdoshëm dhe i sinkronizuar të dy vendeve për eliminimin e terrorizmit.

 

Buçkovski dhe Çoviq kanë shprehur "shqetësimin" për, siç thuhet, "disa sinjaleve" në luginën e Preshevës dhe në Kosovë rreth mundësisë së provokimeve të reja të cilat mund ta destabilizojnë rajonin.

Buçkovksi me këtë rast ka paralajmëruar një vizitë javën e ardhshme në Kosovë. Ndërkaq, Çoviq ka deklarauar se "rajoni nuk ka qetësi dhe siguri përderisa nuk zgjidhet problemi i Kosovës".

 

 

Britania vështirëson azilin për shqiptarët

 

Londër, 7 shkurt 2003 - Shqipëria është përfshirë në listën e vendeve që konsiderohen të sigurta nga qeveria britanike.

Kjo do të thotë se kërkesat për azil që paraqiten nga shtetas të këtyre vendeve, do të konsiderohen si të pabaza.

Listës së shpallur para pak kohësh prej 10 vendesh, përveç Shqipërisë iu shtuan edhe Rumania, Bullgaria, Serbia, Mali i Zi dhe Maqedonia dhe Xhamajka.

Shtetasit nga këto vende që do të kërkojnë azil në Britani duhet që të paraqesin argumenta shumë të forta që të tregojnë se kërkesa e tyre nuk është pa bazë.

Përndryshe atyre do t'iu refuzohet azili dhe nuk do të kenë të drejtë të apelojnë në Britani.

 

 

Presidenti Moisiu përsërit mbështejtjen e vendit ndaj SHBA për cështjen e Irakut

 

Tiranë, 7 shkurt 2003 - Presidenti i Shqipërisë Alfred Moisiu përsëriti mbështetjen e vendit të tij ndaj SHBA dhe aleatëve të saj për çështjen e Irakut.

Gjatë ceremonisë së transferimit të komandës së shtabit të misionit të Natos në Shqipëri ai deklaroi se rreziku terrorist dhe i regjimeve të tilla si Iraku, vlerësohet si një kërcënim real për paqen dhe sigurinë në botë.

 

Presidenti Moisiu rikonfirmoi se shteti dhe ushtria shqiptare janë dhe do të jenë në anën e veprimeve të SHBA dhe aleatëve të saj, kundër këtij rreziku të përbashkët.

Shqipëria është ndër dhjetë vendet europiane ish komuniste të cilat po përgatisin një deklaratë solidariteti ndaj SHBA për krizën irakiane.

 

 

Shqiptarët e Maqedonisë të diplomuar në Kosovë kërkojnë njohjen e diplomave të tyre

 

Shkup, 7 shkurt 2003 - Shqiptarët e Maqedonisë të diplomuar në Universitetin e Prishtinës kërkojnë njohjen uregjente të diplomave të tyre nga autoritetet maqedonase. Në të kundërtën ata kanë paralajmëruar protesta masive.

 

Kjo kërkesë i është dërguar Ministrisë së Arsimit të Maqedonisë, Ministrisë së Arsimit të Kosovës, Rektoratit të Universitetit të Prishtinës, Administratës së OKB-së në Kosovë dhe zyrës së kësaj administrate në Shkup, Zyrës së BE-s dhe asaj të OSBE-së dhe Partisë politike shqiptare në pushtet - Bashkimit Demokratik për Integrim.

 

Këshilli nismëtar nga institucionet e lartpërmendura ka kërkuar që të trajtojnë sa më shpejt problemin e diplomave të Kosovës. Ky këshill kërkon edhe mbështetjen e UNMIK-ut nga i cili kërkon që të përkujtojë Maqedoninë se Universiteti i Prishtinës dhe shkollat e larta në Kosovë janë të njohura nga OKB-ja, anëtare e sëcilës është edhe Maqedonia.

 

 

Ambasadori i NATO-s në Shkup thotë se nuk do të lejohet asnjë trazirë në Maqedoni

 

Shkup, 7 shkurt 2003 - Ambasadori i NATO-s në Maqedoni, Nikollas Bigman paralajmëroi se nuk do të lejohet asnjë trazirë në këtë vend. Ai i ka deklaruar BBC-së se grupe të vogla të parëndësishme duan që të shfrytëzojnë periudhën e ndërrimit të komandës së misioneve ushtarake nga ato të NATO-s në atë të Bashkimit Evropian, por në terren nuk do të ketë asnjë ndryshim dhe një gjë e tillë nuk do të lejohet, tha ambasadori Bigman.

 

Ai nënvizoi se nuk ka asnjë mundësi që dikush të fillojë trazira për shkak të ndërrimit të misioneve. Ky do të jetë një proces i vazhdueshëm, tha ambasadori i NATO-s në Shkup dhe shtoi se komuniteti ndërkombëtar në asnjë mënyrë nuk do të përkrahë idenë e një konflikti në Maqedoni.

 

Sipas ambasadorit të NATO-s ideologjia e këtyre njerëzve është e prapambetur, duke shtuar se nuk ka asnjë mundësi që ata të marrin ndonjë përkrahje nga komuniteti ndërkombëtar. Përkundrazi, logjika e tyre e shekullit XIX për të krijuar shtete të mëdha gjatë 10-15 vjetëve të fundit është bërë alergjike për komunitetin ndërkombëtar, tha ambasadori i NATO-s në Shkup.

 

 

Tre kryengritës të Tigrave Tamilë kanë hedhur veten në erë pasi janë zënë duke kontrabanduar armë

 

Berlin, 7 shkurt 2003 - Tre kryengritës të Tigrave Tamilë kanë hedhur veten në erë pasi mbikëqyrësit e armëpushimit skandinavian sekuistruan barkën e tyre me armë, vetëm disa orë para se të përfundonin bisedimet paqësore në Gjermani, njofton Rojter.

 

Të tre anëtarët e Tigrave për Çlirimin e Elamit Tamil (LTTE) kanë bërë vetëvrasje në barkën e tyre në bregdetin verior të Xhafnës derisa po përpiqeshin të kontrabandojnë armë në ujëdhesë.

 

"Ata kanë hedhur në erë barkën. Ata kanë shkuar bashkë me shpërthimin", ka thënë Tejtur Torkelson, anëtar i Misionit mbikëqyrës të Sri Lankës. Përkundër këtij incidenti, bisedimet ndërmjet kryengritësve dhe qeverisë së Sri Lankës po vazhdojnë, ku në krye të axhendës është çështja e të drejtave të njeriut.

 

Njoftohet se mbikëqyrësit paqësorë, që kishin zënë këtë barkë me armë, kanë shpëtuar të palënduar pasi kishin zbarkuar prej saj para shpërthimit. Thuhet gjithashtu se ky incidet do të jetë temë shqyrtimi në raundin e pëstë të sotëm (të së premtes) të bisedimeve.

 

 

Siria ka strehuar një sasi të armëve të Irakut

 

Damask, 7 shkurt 2003 - Disa agjenci amerikane të zbulimit besojnë se elementë mashtrues të elitës udhëheqëse të Sirisë kanë marrë miliona dollarë mito për strehimin e sigurt të një sasie të armëve të shkatërrimit masiv të Irakut, kanë thënë disa ish-zyrtarë, që kanë shërbyer në këto agjenci, njofton UPI.

 

Armët kimmike dhe biologjike janë bartur me kamionë në një depo municioni afër bazës ushtarake Kan Abu Shamet, rreth 50 mila në verilindje të Damaskut, kanë thënë zyrtarët e lartpërmendur. E dyshimtja kryesore në këtë operacion është Bushra al Asad, motër e presidentit sirian, Bashar al Asad dhe burri i saj gjen.

 

Asaf Çaukat, që është njeriu i dytë në organizatën ushtarake të inteligjencës Mukhabarat. Këta zyrtarë kanë thënë gjithashtu se presidenti Bush ka akuzuar Itrakun se po lëviz gjithandej depot dhe stabilimentet e armëve kimike dhe biologjike për t’i fshehur ato nga inspektorët e Kombeve të Bashkuara.

 

 

Një oficer i CIA-s ka vdekur dhe dy të tjerë janë plagosur në një aksident në Afganistan

 

Uashington, 7 shkurt 2003 – Një oficer amerikan kundërterrorist i CIA-s ka humbur jetën dhe dy të tjerë janë plagosur në një aksident me granatë gjatë stërvitjeve me municion lufte në Afganistan, kanë bërë të ditur zyrtarë të kësaj Agjencie, njofton Rojter.

 

Oficeri i vrarë është Helge Boes, 32-vjeçar, pjestër i Qendrës Kundërterroriste në Afganistan dhe ka humbur jetën kur granata ka shpërthyer para kohe, thuhet në deklaratën e CIA-s, në të cilën shtohet se njëri nga të plagosurit e lartpërmendur ka qenë plagosur rëndë, por tash është në gjendje stabile, kurse tjetri është plagosur lehtë dhe të dy pritet të shërohen krejtësisht.

 

 

Forcat speciale amerikane kanë arrestuar disa persona në Afganistan

 

Bagram, 7 shkurt 2003 – Forcat speciale amerikane kanë arrestuar disa persona, të cilët janë zënë pas një shkëmbimi zjarri të sotëm (të së premtës) në Afganistanin lindor, ka bërë të ditur zëdhënësi ushtarak amerikan, njofton Rojter.

 

Roxher King ka deklaruar gjithashtu se ata kanë shkrehur zjarr në trupat amerikane derisa ato po kërkonin një kazermë të tyre në jugperendim të qytetit Gardez. Ai tha se s’ka pasur viktima në asnjërën palë.

 

 

Bush i thotë Irakut "loja mbaroi"

 

Uashington, 7 shkurt 2003 - Presidenti Bush e ka paralajmëruar Sadam Huseinin se Iraku duhet të veprojë tani nëse dëshiron të shmangë një sulm të udhëhequr nga amerikanët.

Në një emision të drejtpërdrejtë televiziv, zoti Bush tha se Shtetet e Bashkuara e mirëpresin dhe e mbështesin miratimin e një rezolute të re në Këshillin e Sigurimit të Kombeve të Bashkuara, për sa kohë që ajo do të përforcojë kërkesat për çarmatosjen e Irakut.

"Këshilli i Sigurimit nuk duhet të tërhiqet kur kërkesat e paraqitura prej tij sfidohen në mënyrë cinike nga një diktator. Shtetet e Bashkuara e përshëndesin dhe e përkrahin miratimin e një rezolute të re e cila duhet ta bëjë të qartë se Këshilli i Sigurimit qëndron fort pas kërkesave që i ka parashtruar Irakut," tha Bush.

Megjithatë zoti Bush e bëri të qartë se në qoftë se Këshilli i Sigurimit nuk vepron, atëherë Amerika me aleatët e saj do të ndërmerrnin të gjithë hapat e nevojshëm për ta çarmatosur Irakun.

 

 

Bler bind britanikët për Irakun

 

Londër, 7 shkurt 2003 - Kryeministri britanik Toni Bler, ka pranuar se pjesa më e madhe e opinionit në vendin e tij nuk do ta mbështesin një sulm ushtarak kundër Irakut në qoftë se ai nuk autorizohet nga Kombet e Bashkuara.

Duke folur në televizionin britanik përpara një audience me kritikë të politikës së tij ndaj Irakut, zoti Bler tha se konfrontimi me Irakun ishte një veprim i drejtë edhe në qoftë se do të bllokohej miratimi i një rezolute të dytë në Këshillin e Sigurimit të OKB-së.

Por ai pranoi se ende kishte shumë për të bërë në mënyrë që ta bindte publikun për nevojën e luftës kundër Irakut.

 

 

Turqia i ofron bazat SHBA-së për Irakun

 

Ankara, 7 shkurt 2003 - Parlamenti turk ka votuar që t'u lejojë Shteteve të Bashkuara që të fillojnë përgatitjen e bazave dhe të porteve ushtarake për një sulm të mundshëm ndaj Irakut, në një hap të parë të Turqisë në rrugën drejt luftës.

Qeveria pati një shumicë të rehatshme - 308 vota pro dhe 193 kundër - megjithatë pak vetë në Turqi e duan luftën, pak duan që të ndihmojnë SHBA-në në konfliktin me Irakun.

Por në momentin që Turqia u bind se nuk mund ta ndalonte luftën, udhëheqja e saj e kuptoi se nuk ka zgjidhje tjetër, por të pranonte kërkesat amerikane për ndihmë.

 

 

Reagimet e vendeve evropiane për krizën rreth Irakut

 

Paris, Berlin, 7 shkurt 2003 - Franca dhe Gjermania përsëritën qëndrimin e tyre për vazhdimin e inspektimeve të Kombeve të Bashkuara për armët në Irak, pas raportit të djeshëm të Sekretarit amerikan të Shtetit, Kolin Pauell në OKB.

Ministri i Jashtëm francez, Dominik dë Vilpen tha se Iraku përbën rrezik dhe duhet t'u përgjigjet shqetësimeve ndërkombëtare për armë të shkatërrimit në masë.

 

Por ai tha se inspektimet duhet të vazhdojnë dhe bëri thirrje për rritje të konsiderueshme të numrit të inspektorëve të Kombeve të Bashkuara për armët në Irak.

Ndërkohë, Gjermania mbështeti propozimin francez për të vazhduar inspektimet dhe i bëri thirrje Irakut që të bashkëpunojë.

Shefi i politikës së jashtme të Bashkimit Evropian Havier Solana, u tha gazetarëve se raporti i zotit Pauell e bëri shumë të qartë se Bagdadi po fsheh materiale të rrezikshme. Zoti Solana tha se koha nuk pret më dhe Presidenti Saddam Hussein duhet të bashkëpunojë dhe të çarmatoset plotësisht.

 

Copyright©2000-2003 Trepca.net - Të gjitha të  drejtat e rezervuara.