Lajme

E mërkue, 5 shkurt 2003

Përmbajtja:

• Presidenti Rugova u takua me Senatorin Doll, Ambasador Nderi i Kosovës në SHBA

• Daci dhe Abramovic vlerësuan se institucionet e Kosovës duhet ta fitojnë peshën që u takon

• Përkundër kundërshtimit të ministrit Baliq, Pleurat Sejdiu merr postin e sekretarit të përhershëm

• Punëtorët e RTP-së shënuan 58-vjetorin e themelimit

• Në fshatin Grejçevc të Theranadës është zbuluar një sasi armësh, dy vetë arrestohen

• Në një aksident trafiku në Mal të Zi, janë lënduar 11 udhëtarë të një autobusi të Kosovës

• Ndihma amerikanë për Kosovën do të jetë 79 milionë dollarë, kurse për Shqipërinë 28 milionë

• Në shkollën e mesme "Arbëria", pas një vonese njëmuajshe, ka filluar procesi mësimor

• Gjilan: Ministria e Financave nuk lejon inkasimin e tatimit mbi pronë për vitin e kaluar

• Drejtori rajona për Evropë në Zyrën Amerikane në Prishtinë vizitoi Kuvendin Komunal të Prishtinës

• S. Narula: Misioni i UNMIK-ut ende nuk ka qëndrim rreth nismës për shpalljen e Kosovës shtet të pavarur e sovran

• Përfaqësuesit serbë kanë reaguar ashpër ndaj nismës për shpalljen e Kosovës shtet të pavarur

• Jugosllavia edhe zyrtarisht nuk ekziston më dhe është varrosur përgjithmonë

• Presidentët Moisiu, Mesiq dhe Trajkovski do të takohen më 24 shkurt në Tiranë

• Armata maqedonase vrau një qytetar shqiptar afër vijës kufitare Maqedoni – Shqipëri

• Persona të maskuar kanë plagosur me armë zjarri dy persona në afërsi të Dobroshit të Tetovës

• Ambasadori i SHBA-ve në Beograd dhe shefi i Zyrës Amerikane në Prishtinë kanë qëndruar dje në Bujanoc

• Në Bujanoc është vrarë një pjesëtar i Agjencisë Informative Serbe të Sigurisë me përkatësi shqiptare

• Qeveria e Shqipërisë ka vendosur të pajisë me pasaporta diplomatike familjen mbretërore të ish-Mbretit Zog

• Agjencia e OKB-së për Refugjatët përgatitet për një krizë të mundshme nga lufta në Irak

• Trupat izraelite kanë vrarë një polic palestinez Baha, një grua ka humbur jetën në rrënoja

• Këshilli i Sigurimit ka mandatuar dislokimin e trupave franceze në Bregun e Fildishtë

• NASA dhe Izraeli kanë konfirmuar se është identifikuar trupi i pilotit izraelit

• Sekretari Pauell do të paraqesë në OKB një raport me materiale tepër sekrete mbi Irakun

• Kuvajti shpall zonë të ndaluar ushtarake veriun e Emiratit

• Bashkëpunimi mes Gjermanisë dhe SHBA në luftën kundër terrorizmit është i shkëlqyer

• Përleshje të reja mes trupave qeveritare dhe milicisë talebane në Afganistan

• Ushtarët izraelitë hedhin në erë shtëpinë e një aktivisti të organizatës Fatah

• Nga një shpërthim në Pakistan kanë humbur jetën së paku 17 veta

• Bush iu bashkua mijëra njerëzve në qendrën NASA për t’u bërë nderime shtatë astronautëve

• Erdogan thotë se interesat e vendit dëmtohen nëse nuk mbështet SHBA në luftë kundër Irakut

• Shirak ka përsëritur kërkesën që inspektorëve të OKB-së për armatimin t'u jepet më shumë kohë

• Gjykata izraelite ka urdhëruar Arafatin t'i paguajë më se 10 milionë dollarë kompanisë së autobusëve

Presidenti Rugova u takua me Senatorin Doll, Ambasador Nderi i Kosovës në SHBA

 

Uashington, 5 shkurt 2003 – Presidenti i Kosovës Ibrahim Rugova pati të martën një takim të përzemërt me Senatorin Bob Doll (Bob Dole), i emëruar nga fundi i vitit të kaluar si përfaqësues i lartë i Kosovës, me titull Ambasador Nderi, në Uashington. Presidenti Rugova dhe Senatori Doll, personalitete që njihen tash trembëdhjetë vjet, u takuan për herë të parë pas emërimit të Dollit në këtë post përfaqësimi e nderi për Kosovën. Në takim u bisedua për gjendjen në Kosovë, për çështje aktuale politike e ekonomike, për funskionimin e institucioneve të Kosovës, si dhe për rrugën që duhet ndjekur për të hapur perspektiva të zhvillimit të vendit tonë.

    

Presidenti Rugova dhe Senatori Doll u pajtuan se pavarësia e Kosovës, që është vullnet i popullit, është zgjidhja që mban perspektivën për stabilitet politik e ekonomik në Kosovë e në rajon.

Presidenti Rugova po qëndron në një vizitë në Uashington për të marrë pjesë në ceremoninë tradicionale, e 51-ta me radhë sivjet, të njohur si "Lutja e mëngjesit". Ceremonia kryesore mbahet ditën e enjte.

Të mërkurën, Presidenti pritet të takojë miq të Kosovës në Kongresin amerikan.

 

 

Daci dhe Abramovic vlerësuan se institucionet e Kosovës duhet ta fitojnë peshën që u takon

 

Prishtinë, 5 shkurt 2003 - Institucionet e Kosovës duhet ta fitojnë peshën që u takon dhe se është i domosdoshëm bashkëpunimi ndërmjet institucioneve vendëse dhe atyre ndërkombëtare në Kosovë, vlerësuan gjatë takimit kryeparalamenari Nexhat Daci dhe Morton Abramovic, anëtar i Grupit Ndërkombëtar të Krizave.

Kryetari i Kuvendit në këtë takim i tha mysafirit se është bërë pak në planin ekonomik dhe social, prandaj është e kuptueshme që qytetarët e kanë zbehur disponimin pozitiv për institucionet. Ndërkaq duke folur aktivitetet e ardhshme të Kuvendit z. Daci e përsërit idenë se këtë vit do të fillojë periudha e marrjes së kompetencave dhe përgjegjësive të vërteta nga institucionet legjitime të Kosovës.

Ndërkaq Morton Abramovic u shpreh se krahas rritjes së kompetencave për vendësit duhet thelluar bashkëpunimin me KFOR-in dhe UNMIK-un rreth sigurisë, paqes dhe stabilitetit të Kosovës dhe rajonit.

 

Abramovic tha nga qytetarët e Kosovës ka vërejtur pasivitet dhe apati, duke shtuar se po punohet pak për një të ardhme më të mirë të Kosovës, e cila sipas tij, nuk mund të realizohet me ndonjë akt të njëanshëm të përcaktimit të ndonjë statusi të synuar.

Morton Abramovic është takuar edhe me Komisionin e Parlamentit të Kosovës për Marrëdhënie me Jashtë.

 

 

Përkundër kundërshtimit të ministrit Baliq, Pleurat Sejdiu merr postin e sekretarit të përhershëm

 

Prishtinë, 5 shkurt 2003 - Edhe përkundër kundërshtimeve të Ministrit të Shëndetësisë Numan Baliq që të mos njihet emërimi i Pleurat Sejdiut në postin e sekretar permanent, megjithatë ai sot ia ka filluar punës.

Ndërkohë Pleurat Sejdiu pranoi detyrën e sekretarit të përhershëm nga Hanu Uori i cili ishte ushtrues i kësaj detyre deri më tani dhe nënshkroi kontratën për marrjen e detyrës në këtë post.

 

Ministri Baliq në një konferencë shtypi edhe një herë përsëriti qëndrimin e tij dhe të ministrisë se nuk e njohin emërimin e z.Sejdiu në këtë post.

 

 

Punëtorët e RTP-së shënuan 58-vjetorin e themelimit

 

Prishtinë, 5 shkurt 2003 - Me një tubim të mbajtur në kinemanë ABC, punëtorët e RTP-së sot shënuan 58-vjetorin e themelimit të këtij institucioni. Punëtorët e RTP-së thanë se ky përvjetor po shënohet në kohën e përpjekjeve të vazhueshme për ruajtjen identitetit të burimor të RTP-së, me qëllim që të flas zëri i lirë i kësaj medie.

 

Udhëheqësi i sindikatës së pavarur të RTP-së Feriz Ratkoceri kërkoi nga institucionet e Kosovës dhe ato ndërkombëtare që urgjentisht të zgjidhin statusin e RTP-së. Njëherit në këtë tubim u kërkua që punëtorët e RTP-së të kthehen në vendet e punës.

Pas tubimit, punëtorët e RTP-së protestuan para Kuvendit të Kosovës duke kërkuar realizimin e kërkesave të tyre.

 

 

Në fshatin Grejçevc të Theranadës është zbuluar një sasi armësh, dy vetë arrestohen

 

Prishtinë, 5 shkurt 2003 - Gjatë një kontrolli policia e UNMIK-ut dhe pjesëtarët e KFOR-it, mbrëmë në fshatin Greçejvc të komunës së Therandës (Suharekës) kanë zbuluar një sasi të madhe armësh.

 

Zëdhënësi i UNMIK-ut, Andrea Anjeli u ka deklaruar mediave të huaja se me atë rast janë arrestuar dy persona.

 

Policët e UNMIK-ut dhe ushtarët e KFOR-it me atë rast sekuestruan 80 mina antitank dhe kundër këmbësorisë, 4 pushkë, 2 pushkë snajper, dy raketa antitank dhe pajisje ushtarake. Paraprakisht janë ndaluar dy persona që po lëviznin me një veturë.

 

Gjatë kontrollit në veturën e tyre janë gjetur disa pistoleta dhe pastaj ka pasuar kontrolli në pesë shtëpi, thotë Anjeli.

Sipas "Zërit të Amerikës" bëhet fjalë për Jetullah Qarrin, një ish-komandant i UÇK-së, i njohur me emrin e luftës si komandant "Guri", kurse aktualisht përfaqësues i Shoqatës së Invalidëve të Luftës së ish-UÇK-së.

 

 

Në një aksident trafiku në Mal të Zi, janë lënduar 11 udhëtarë të një autobusi të Kosovës

 

Ulqin, 5 shkurt 2003 - Në një aksident trafiku në Mal të Zi, 11 persona janë lënduar kur një autobus me targa të Kosovës është rrokollisur 50 metra. Ky autobus qarkullonte në relacionin Ulqin-Prishtinë.

 

Aksidenti ka ndodhur rreth orës 21.00 në magjistralen e Adriatikut Tivar-Petrovac, kur shoferi kishte humbur kontrollin për shkak të motit të keq.

 

Me intervenimin e shpejtë të policisë malazeze udhëtarët kanë shpëtuar pa pasoja tragjike. Në spitalin e Podgoricës janë të shtrirë pesë udhëtarë të lënduar të cilët janë jashtë rrezikut për jetë.

 

 

Ndihma amerikanë për Kosovën do të jetë 79 milionë dollarë, kurse për Shqipërinë 28 milionë

 

Uashington, 5 shkurt 2003 - Ndihma e Qeverisë amerikane për Kosovën do të jetë në një shumë prej 79 milionë dollarësh dhe kjo parashihet me një pikë të veçantë të buxhetit, por është me e vogël për 6 milionë dollarë.

Uashingtoni ka bërë shkurtime të buxhetit edhe në ndihmat për vendet e tjera të rajonit të Ballkanit Perëndimor. Shkurtimi i ndihmës për Bosnjën e Hercegovina parashihet nga 50 milionë në 44 milionë dollarë, për Kroacinë nga 30 në 25 milionë dhe Maqedoninë nga 50 në 39 milionë.

 

Ndërkaq ndihmat për Shqipërinë, Bullgarinë dhe Rumaninë kanë mbetur në nivelin prej 28 milionë dollarësh. Për Serbinë është paraparë ndihma prej 113 milionë dollarësh, kurse për Malin e Zi, 18 milionë.

 

Mirëpo, Dhoma përfaqësuese e Kongresit amerikan ka pezulluar ndihmën për Serbinë për shkak të bashkëpunimit të pakënaqshëm të autoriteteve të Beogradit me Tribunalin e Hagës.

Propozimi i buxhetit të SHBA-ve për vitin fiskal 2004, që fillon më 1 tetor të këtij viti, parasheh 2.230 mliardë dollarë, ku përfshihet edhe deficiti prej 307 miliardë dollarësh.

 

 

Në shkollën e mesme "Arbëria", pas një vonese njëmuajshe, ka filluar procesi mësimor

 

Gjilan, 5 shkurt 2003 - Bordi i drejtorëve të Shërbimit Civil Administrativ të komunës së Gjilanit është njoftuar nga ushtruesi i detyrës së drejtorit të arsimit, z. Enver Kadriu se në shkollën e mesme "Arbëria", pas një vonese gati një muajshe, për shkak të renovimeve të objektit, ka filluar mësimi për klasët e nënta dhe vitet e katërta, ndërsa ai shpreson që vijimi të jetë i plotë nga java e ardhshme.

 

Të hënën duhet të hapen dyert e shkollës për vazhdimin e gjysmëvjetorit të dytë edhe në shkollën tjetër "Mehmet Isai", ku poashtu janë duke u bërë renovime.

Nga dje edhe drejtorët e rinj të shkollave të mesme kanë marrë detyrën, përderisa konkurrentët për drejtorë të filloreve, janë duke u intervistuar këto ditë.

 

 

Gjilan: Ministria e Financave nuk lejon inkasimin e tatimit mbi pronë për vitin e kaluar

 

Gjilan, 5 shkurt 2003 - Bordi i drejtorëve ka diskutuar për tatimin mbi pronë, i cili në bazë të vendimit të Komitetit për politikë dhe financa është dashur të inkasohet për vitin 2003, por ndërkohë nga Ministria e Financave është thënë se nuk lejohet forma selektive e tatimit për vitin e kaluar.

 

Administratori Bob Simons ka sqaruar se sipas rregullores, ose janë të gjithë obligues ose nuk është askush.

 

Rreth dilemës nëse ekziston apo jo baza ligjore për faturimin e taimit për vitin 2002, nga i cili do të mund të inkasoheshin rreth 300 mijë euro, kryeshefi ekzekutiv, Enver Muja ka theksuar se në Kuvend është miratuar vendimi për programin pilot të tatimit mbi pronën dhe duhet të shikohet nëse Ministria ka të drejtë të ndërhyjë në këtë proces.

Nga dje ka filluar afati i regjistrimit të përhershëm të bizneseve dhe këtij procesi, sipas drejtorit për ekonomi dhe menagjment, Abdyl Brestovci, në komunën e Gjilanit duhet të nënshtrohen 3.394 biznese, të cilat kanë qenë të certifikuara përkohësisht, deri tani.

 

Sipas z. Brestovci, afati i fundit është deri më 31 maj 2003 dhe pas kësaj date, të gjitha bizneset që nuk e kryejnë këtë obligim, automatikisht konsiderohen të shuara.

Rreth disa rasteve të uzurpimit të pronave shoqërore ka njoftuar ushtruesi i detyrës së drejtorit të gjeodezisë, kadastrit, pronës dhe banimit, Abdullah Ismajli, i ka prezentuar edhe disa nga rastet konkrete, ndërsa kryeshefi ekzekutiv ka kërkuar që te të gjitha rastet, pos procedurave penale në gjykata, të inicohen edhe procedurat administrative për kthimin e gjendjes së mëparshme. Uzurpatorëve nuk mund t`iu lihen në shfrytëzim pronat e komunës, ka qenë kategorik z. Muja.

 

 

Drejtori rajona për Evropë në Zyrën Amerikane në Prishtinë vizitoi Kuvendin Komunal të Prishtinës

 

Prishtinë, 5 shkurt 2003 – Ned Kabot, drejtor rajonal për Evropë dhe Xhenet D. Shenon, zyrtare për ekonomi në Zyrën Amerikane në Prishtinë, vizituan sot Kuvendin Komunal të Prishtinës dhe u prit nga kryetari Ismet Beqiri, me bashkëpunëtorët.

Ned Cabot tha se bashkëpunimi me komunën e Prishtinës ka për qëllim që të jipen grante për fizibilitetin dhe të promovohet partnershipi me kompanitë amerikane, ndërsa mënyra më e mirë e bashkëpunimit midis Kosovës dhe Amerikës është ardhja e kompanive amerikane në Kosovë.

 

Ai në vazhdim prezentoi disa nga projektet e realizuara të institucionit që përfaqëson ai në Ballkan dhe Evropë.

Kryetari i KK të Prishtinës, Ismet Beqiri tha se Prishtina ka nevoja të mëdha për projekte të shumëta, si në realizimin e projekteve në kanalizimin e qytetit, të nxehjes qendrore, ujësjellësit e tjerë, por projekti jetik është plani i përgjithshëm urbanistik i Prishtinës. Me realizimin e këtij projekti, Prishtina do të shpëtonte nga kaosi urbanistik, tha z.Beqiri.

 

 

S. Narula: Misioni i UNMIK-ut ende nuk ka qëndrim rreth nismës për shpalljen e Kosovës shtet të pavarur e sovran

 

Prishtinë, 5 shkurt 2003 - Zëdhënësi i UNMIK-ut Sunill Narula tha se autoritetet e këtij organizmi ndërkombëtar në Kosovë tash për tash nuk kanë ndonjë qëndrimi për deklaratën e 42 deputetëve të Parlamentit për shpalljen e Kosovës shtet të pavarur dhe sovran.

Ai tha shkurtë se Misioni i OKB-së do të shohë se çfarë do të ndodhë meqë kjo nismë sapo është dorëzuar në Parlament. Por një qëndrim për këtë nismë do të shfaqet nga kryeadministratori Shtajner pas konsultimit me Këshillin e Sigurimit të OKB-së.

 

 

Përfaqësuesit serbë kanë reaguar ashpër ndaj nismës për shpalljen e Kosovës shtet të pavarur

 

Mitrovicë, 5 shkurt 2003 - Përfaqësuesit i minoritetit serb në veri të Mitrovicës kanë reaguar ashpër ndaj nismës së deputetëve të Parlamentit për shpalljen e shtetit të pavarur e sovran të Kosovës.

 

Ata kanë theksuar se një nismë e tillë mund të ketë pasoja për situatën edhe ashtu të brishtë në këtë qytet. Madje i ashtuquajturi "Këshilli nacional serb" kërcënon me përcaktimin e mundshëm të statusit të Kosovës në Kuvendin e Serbisë.

Në anën tjetër kryetari i "Këshillit nacional serb" Nebojsha Joviq ka deklaruar se përgjigjja e mundshme e miratimit eventual të deklaratës për pavarësinë e Kosovës do të ishte që Kuvendi i Serbisë të vendosë për statusin e Kosovës, ose për këtë të vendosin qytetarët e Serbisë nëpërmjet një referendumi!

 

 

Jugosllavia edhe zyrtarisht nuk ekziston më dhe është varrosur përgjithmonë

 

Beograd, 5 shkurt 2003 - Parlamenti federal jugosllav dje miratoi Kartën Kushtetuese dhe ligjin për bashkësinë e re të quajtur Serbia dhe Mali i Zi. Kështu, prej dje Jugosllavia më zyrtarisht nuk ekziston dhe është varrosur përgjithmonë.

 

Ky shteti i ri do të ketë vetëm disa funksione të përbashkëta, siç janë parlamenti me 125 deputetë, 91 nga Serbia dhe 34 nga Mali i Zi, këshillin e ministrave dhe kryetarin e bashkësisë i cili njëkohësisht do të jetë edhe kryetar i këshillit të ministrave.

 

Në kuadër të Këshillit të ministrave do të funksionojë Ministria e punëve të jashtme, ministria e ushtrisë, ministria e tregtisë ekonomike me jashtë dhe ajo e brendshme si dhe ministria e të drejtave të njeriut.

 

Në bashkësinë e re serbo-malazeze nuk do të ekzistojnë doganat e përbashkëta dhe as banka e përbashkët qendrore, por nuk do të ketë as monedhë të përbashkët.

Në preambulën e Kartës Kushtetuese ka ngelur e paprekur dispozita se Kosova është në përbërje të Serbisë.

 

 

Presidentët Moisiu, Mesiq dhe Trajkovski do të takohen më 24 shkurt në Tiranë

 

Tiranë, 5 shkurt 2003 - Presidenti i Shqipërisë Alfred Moisiu, ai i Kroacisë Stipe Mesiq dhe i Maqedonisë, Boris Trajkovksi do të takohen më 12 shkurt në Tiranë që të shqyrtojnë hapat e mëtejshëm në kuadrin e përpjekjeve të përbashkëta për integrim në Aleancën Veriatlantike.

 

Presidenti Stipe Mesiq dhe Boris Trajkovski do të shkojnë në Tiranë me ftesën e presidentit Alfred Moisiu.

 

 

Armata maqedonase vrau një qytetar shqiptar afër vijës kufitare Maqedoni – Shqipëri

 

Dibër, 5 shkurt 2003 - Armata e Maqedonisë vrau një qytetar shqiptarë nga Dibra afër vijës kufitare Maqedoni - Shqipëri. Sipas burimeve lokale nga Dibra Ylber Shtreza baba i katër fëmijëve prej të cilëve tre janë shurdhërmemecë. Nuk është bërë i ditur motivi i kësaj vrasje dhe në çfarë rrethanash ka ndodhur ajo.

 

 

Persona të maskuar kanë plagosur me armë zjarri dy persona në afërsi të Dobroshit të Tetovës

 

Tetovë, 5 shkurt 2003 - Dy persona kanë marrë plagë të rënda trupore kur persona të maskuar kanë hapur zjarr nga armët automatike në drejtim të një makine në fshatin Dobrosh të Tetovës. Policia po heton rastin, por tash për tashë nuk dihen motivet dhe autorët e këtij incidenti.

 

 

Ambasadori i SHBA-ve në Beograd dhe shefi i Zyrës Amerikane në Prishtinë kanë qëndruar dje në Bujanoc

 

Bujanoc, 5 shkurt 2003 - Ambasadori i Shteteve të Bashkuara në Beograd Uliam Montgomeri dhe shefi i Zyrës Amerikane në Prishtinë, Rino Harnish kanë qëndruar dje në një vizitë pune në Bujanoc.

 

Ata me këtë rast kanë takuar kryetarin e Komunës së Bujanocit Nagip Arifin dhe kryetarin e Komunës së Preshevës Riza Halimin. Temë qëndrore e këtij takimi ishte situata politike dhe e sigurisë në Luginën e Preshevës.

 

Ata gjithashtu kanë biseduar edhe për kthimin e këshilltarëve të koalicionit serb në Kuvendin Komunal të Bujanocit, të cilët disa muaj po e bojkotojnë punën në këtë kuvend.

Ambasadori amerikan në Beograd ka lavdëruar zhvillimin e situatës në Luginën e Preshevës, por ka thënë se ka mbetur edhe shumë për t'u bërë për një jetë të qëndrueshme multietnike të shqiptarëve, serbëve dhe romëve të atjeshëm.

 

 

Në Bujanoc është vrarë një pjesëtar i Agjencisë Informative Serbe të Sigurisë me përkatësi shqiptare

 

Bujanoc, 5 shkurt 2003 - Mediat e Beogradit kanë bërë të ditur se në Bujanoc mbrëmë është vrarë një pjesëtar i Agjencisë Informative serbe të sigurisë me përkatësi shqiptare, por nuk u dha emri dhe as motivet e kësaj vrasjeje.

 

 

Qeveria e Shqipërisë ka vendosur të pajisë me pasaporta diplomatike familjen mbretërore të ish-Mbretit Zog

 

Tiranë, 5 shkurt 2003 - Qeveria e Shqipërisë ka vendosur të pajisë me pasaporta diplomatike familjen mbretërore të Leka Zogut. Ajo thotë se synon rehabilitimin civil ndaj anëtarëve të ish-Mbretit Zog. Partia - Lëvizja e Legalitetit, parti kjo e përkrahësve të Mbretit, e mirëpriti këtë vendim.

 

 

Agjencia e OKB-së për Refugjatët përgatitet për një krizë të mundshme nga lufta në Irak

 

Gjenevë, 5 shkurt 2003 - Drejtori i Agjencisë së Kombeve të Bashkuara për Refugjatët tha se organizata e tij po punon me vendet fqinje të Irakut për t'u përgatitur për një krizë të mundshme refugjatësh në rast të një lufte të mundshme.

Komisioneri i Lartë i OKB-së për Refugjatët, Rud Lubers tha dje në Gjenevë se ai ka dërguar ekipe të emergjencës për të biseduar me autoritetet në Iran, Turqi, Siri dhe Jordani që këto vende të hapin kufijtë për refugjatët irakianë në rast lufte.

 

Zoti Lubers tha se planet paraprake parashikojnë sigurimin e ndihmave për 500 mijë njerëz. Ai tha se shpreson se Shtetet e Bashkuara dhe vende të tjera do të ndihmojnë me fonde për të përballuar valën e refugjatëve.

 

 

Trupat izraelite kanë vrarë një polic palestinez Baha, një grua ka humbur jetën në rrënoja

 

Gaza, 5 shkurt 2003 – Forcat izraelite kanë shkatërruar sot (të mërkurën) shtëpinë e një militanti palestinez në Bregun Perëndimor dhe me këtë rast rrënojat e shtëpisaë kanë zënë brenda njerkën e tij, e cila kështu ka humbur jetën, sigurisht duke mos dëgjuar thirrjet për të lëshuar shtëpinë, kanë bërë të ditur zyrtarët e sigurimit palestinez, njofton Rojter.

 

Gjatë sulmit, trupat izraelite kanë vrarë policin palestinez Baha Said, në bazën e tij Kilkilia. Dëshmitarët kanë thënë se ai është qëlluar me armë zjarri derisa po ikte nga shtëpia së bashku me të tjerët.

 

Sipas burimit ushtarak izraelit, ai ka refuzuar urdhërin për ndalim. Njoftohet se militanti Baha Said ishte pjesëtar i Al Fatahut të Jaser Arafatit, i cili kishte vrarë dy izraelitë në një sulm në vendbanimin ebrait Kfar Darom në shtator të vitit 2000.

 

 

Këshilli i Sigurimit ka mandatuar dislokimin e trupave franceze në Bregun e Fildishtë

 

Abixhan, 5 shkurt 2003 – Këshilli i Sigurimit ka mandatuar dislokimin e trupave franceze dhe të rajonit të Afrikës Perendimore në Bregun e Fildishtë pasi kryengritësit kanë refuzuar të sakrifikojnë postet e larta qeveritare në pajtim me marrëveshjen paqësore, të sponzoruar nga francezët, gjë që shkaktoi shpërthimin e gjerë të dhunës dhe të zemrimit, njofton AFP.

 

Këshilli 15-anëtarësh ka votuar unanimisht Rezolutën 1464, e cila autorizon trupat të përdorin forcën për të mbrojtur civilët dhe për të realizuar "mbështetjen e plotë të përpjekjeve të Komunitetit Ekonomik të Shteteve të Afrikës Perendimore për të përkrahur zgjidhjen paqësore të konfliktit" në Bregun e Fildishtë.

 

 

NASA dhe Izraeli kanë konfirmuar se është identifikuar trupi i pilotit izraelit

 

Hemfill, Teksas, 5 janar 2003 – Ekipet e kërkimshpëtimit kanë zbuluar pjesën kryesore të anijes kozmike "Kolumbia", përfshirë edhe mbeturinat e trupit dhe mekanizmin e aterimit të saj, që mund t'u ndihmojnë hetuesve për të përcaktuar shkakun e prishjes së saj mbi Teksas, njofton Rojter.

 

Njoftohet gjithashtu se zëdhënësi i armatës izraelite ka bërë të ditur sot heret (të merkurën) zbulimin e trupit të izraelitit të parë në gjithësi. Ky njoftim është dhënë fillimisht nga NASA dhe është konfirmuar nga përfaqësuesit armatës së Izraelit se piloti, Kol Ilan Ramon, është identifikuar.

 

Për këtë është njoftuar gjithashu edhe familja e Ramonit. Të gjitha përgatitjet e nevojshme për sjelljen dhe varrosjen e tij në Izrael, thuhet në këtë njoftim, do të bëhen në ditët e ardhshme. Ndërkaq, asnjë fjalë nuk ësht thënë deri tash për trupat e gjashtë astronautëve të tjerë amerikanë.

 

 

Sekretari Pauell do të paraqesë në OKB një raport me materiale tepër sekrete mbi Irakun

 

Nju Jork, 5 shkurt 2003 - Sekretari amerikan i Shtetit Kolin Pauell thotë se do t'i paraqesë sot Këshillit të Sigurimit të OKB-së prova bindëse se Iraku po fsheh armë të ndaluara të shkatërrimit në masë.

 

Zyrtarët thonë se sekretari Pauell do të paraqesë fotografi zbulimi dhe regjistrime të bisedave mes zyrtarëve irakianë, që planifikonin të lëviznin materiale të armëve të ndaluara. Iraku thotë se ka bashkëpunuar me inspektorët e Kombeve të Bashkuara dhe mohon të ketë armë të shkatërrimit në masë.

Në prag të raportit të sekretarit Pauell, kryeinspektori i OKB-së për armët, Hans Bliks, tha përsëri se bashkëpunimi i Irakut me inspektorët ka qënë i mjaftueshëm si pjesë e procesit, por jo kur bëhet fjalë për cilësinë e bashkëpunimit, madje ai e këshilloi Irakun që ti marë me seriozitet kërcënimet e Shteteve të Bashkuara për përdorimin e forcës ushtarake.

 

 

Kuvajti shpall zonë të ndaluar ushtarake veriun e Emiratit

 

Kuvajt, 5 shkurt 2003 - Qeveria në Kuvajt ka deklaruar zonë të ndaluar ushtarake veriun e Emiratit në kufi me Irakun. Urdhëresa hyn në fuqi më 15 shkurt ka bërë të ditur agjencia shtetërore e lajmeve Kuna e cila i referohet informacioneve të ushtrisë.

 

Rajoni në kufi me Irakun konsiderohet zona më e mundshme e mësymjes në rast të pushtimit të Irakut nga trupat amerikane. SHBA kanë stacionuar deri tani rreth 35.000 ushtarë në Kuvajt në kuadër të përgatitjeve për një sulm të mundshëm kundër Irakut.

 

 

Bashkëpunimi mes Gjermanisë dhe SHBA në luftën kundër terrorizmit është i shkëlqyer

 

Uashington, 5 shkurt 2003  - Ministri gjerman i punëve të brendshme Oto Shili e ka cilësuar të shkëlqyer bashkëpunimin mes Gjermanisë dhe SHBA në fushën e sigurisë së brendshme.

 

Këtë vlerësim ka edhe qeveria amerikane është shprehur Shili pas bisedimeve në Uashington me shefin e ministrisë së re amerikane për mbrojtjen e atdheut Tom Rixh dhe ministrin amerikan të drejtësisë Xhon Eshkroft.

 

Atmosfera gjatë konsultimeve mbi cështje të luftës kundër terrorizimit ishte tejet miqësore ka thënë më tej ministri gjerman Shili. Gjermania dhe SHBA konsiderojnë tepër të rëndësishëm shkëmbimin intensiv të përvojës dhe informacionit.

 

 

Përleshje të reja mes trupave qeveritare dhe milicisë talebane në Afganistan

 

Kabul, 5 shkurt 2003 - Luftëtarë të milicisë talibane dhe të organizatës terroriste El Kaida janë përleshur përsëri me trupat qeveritare në juglindje të Afganistanit. Një zëdhënës i ushtrisë bëri të ditur se luftimet kishin filluar ndërkohë që trupat qeveritare kërkonin ekstremistë në juglindje të Kandaharit.

 

Për herë të parë avionë ushtarake danezë kanë mbështetur me bombardime ushtrinë qeveritare në operacionin e drejtuar nga trupat amerikane.

 

 

Ushtarët izraelitë hedhin në erë shtëpinë e një aktivisti të organizatës Fatah

 

Jeruzalem, 5 shkurt 2003 - Ushtarë izraelitë gjatë natës së mbrëmshme kanë hyrë me tanke në kampin me refugjatë palestinezë Magazi në Rripin e Gazës. Drejtues të ushtrisë izraelite e kanë cilësuar mësymjen e fundit operacion rutinë.

 

Dëshmitarë okularë kanë treguar se trupat izraelite kanë shpërthyer shtëpinë e një aktivisti të organizatës Fatah të presidentit të palestinezëve Jasir Arafat.

 

 

Nga një shpërthim në Pakistan kanë humbur jetën së paku 17 veta

 

Islamabad, 5 shkurt 2003 - Si pasojë e eksplodimit të një konteineri të fishekzjarreve në Pakistan kanë humbur jetën së paku 17 veta, kurse një numër tjerë janë lënduar me rastin e eksplodimit në zonën industriale në qytetin Sialkot ka njoftuar një zëdhënës policie. Në mesin e viktimave ka shumë fëmijë, kurse shkakku i fatkeqësisë akoma nuk dihet.

 

 

Bush iu bashkua mijëra njerëzve në qendrën NASA për t’u bërë nderime shtatë astronautëve

 

Uashington, 5 janar 2003 - Presidenti i Shteteve të Bashkuara, Xhorxh Bush, iu bashkua mijëra njerëzve në qendrën kontrolluese të misioneve të NASA-s në Hjuston të Teksasit, për t'u bërë nderime shtatë astronautëve që humbën jetën në katastrofën e anijes kozmike Kolumbia.

"Astronautët dhe astronautet e Kolumbias udhëtuan mëse 6 milion milja dhe ishin vetëm disa minuta largë se të kthehen. Humbja ishte pikëlluese dhe e tmerrshme, kurse për familjet e tyre dhembja është e mdhe. Kombi ynë ndan me ju pikëllimin dhe krenarinë", ka thënë presidenti i Shteteve të Bashkuara.

 

 

Erdogan thotë se interesat e vendit dëmtohen nëse nuk mbështet SHBA në luftë kundër Irakut

 

Ankara, 5 janar 2003 - Lideri i partisë në pushtet në Turqi, Rexhep Tajip Erdogan ka tërhequr vërejtjen se interesat e vendit rrezikojnë të dëmtohen, nëse Turqia nuk mbështet Shtetet e Bashkuara në një luftë të mundshme në Irak.

"Nëse Turqia nuk do të angazhohet që në fillim në përgatitjet për luftë, ajo mund të humbë mundësinë për të ndikuar në përfundimin e saj", ka thënë Erdogan.

Ai ka shtuar më tej se nëse lufta do të jetë e pashmangshme, Turqia shpreson të kontribuojë për arritjen sa më të shpejtë të paqes. Turqia ka qenë kundër luftës në Irakun fqinj, si pasojë e shqetësimeve për destabilizimin e rajonit.

 

 

Shirak ka përsëritur kërkesën që inspektorëve të OKB-së për armatimin t'u jepet më shumë kohë

 

Paris, 5 janar 2003 - Presidenti francez, Zhak Shirak, ka përsëritur kërkesën e tij që inspektorëve të Kombeve të Bashkuara për armatimin t'u jepet më shumë kohë që të kompletojnë misionin e tyre në Irak.

 

Pas bisedimeve që kishin me kryeministrin britanik Toni Bler, Shirak tha se Franca dhe Britania janë të një mendje se Iraku duhet çaramtosur.

 

"Ne kemi qasje të ndryshme ndaj krizës irakiane, por e para dhe kryesorja ndajmë dy bindje fundamentale- se Iraku duhet të çarmatoset dhe se kjo duhet të ndiqet nëpërmjet Këshillit të Sigurimit të OKB-së", tha presidenti francez, duke shtuar se "lufta është gjithmonë më e keqja nga të gjitha solucionet".

 

 

Gjykata izraelite ka urdhëruar Arafatin t'i paguajë më se 10 milionë dollarë kompanisë së autobusëve

 

Jerusalem, 5 janar 2003 - Gjykata izraelite ka urdhëruar që lideri palestinez, Jaser Arafat t'i paguajë më se 10 milionë dollarë kompanisë kryesore izraelite të autobusëve për humbjet e shkaktuara nga bombarduesit vetëvrasës palestinezë.

 

Kompania thotë se që kur filloi kryengritja palestineze në vitin 2000 autobusët e saj kanë qenë në shënjestër, se janë vrarë 113 njerëz dhe plagosur 594 kurse shumë izraelitë janë friguar të shfrytëzojnë shërbimet e saj.

 

Kompania thotë në padinë e saj se Arafati dhe Autoriteti palestinez kishin dështuar të frenojnë militantët që kanë bërë sulmet, por mbetet e paqartë se si Arafat mundë të detyrohet të paguaj dëmshpërblimin.

Copyright©2000-2003 Trepca.net - Të gjitha të  drejtat e rezervuara.