Lajme

E marte, 4 shkurt 2003

Përmbajtja:

• Kryesia e Kuvendit kërkesën e AAK-së do ta shqyrtojë javën e ardhshme

• Ambasadori gjerman në Uashington thotë se është tepër herët që të zgjidhet statusi përfundimtar i Kosovës

• Galak: Gjingjiq vetëm mund të ëndërrojë për kthimin e forcave serbe në Kosovë

• Bashkimi Evropian nuk e mbështet nismën e duputetëve të Kosovës

• Kthimi i ushtrisë jugosllave në Kosovë aktualisht nuk është i mundur, u tha në një takim për media

• Nuk ka të arrestuar lidhur me sulmin kundër stacionit të policisë në Pejë

• Buxheti i komunës së Podujevës për këtë vit do të jetë 20% më i lartë se vitin e kaluar

• Mbi 40 deputetë i dorëzuan Parlamentit një deklaratë me të cilën kërkojnë që Kosova të shpallet shtet sovran dhe i pavarur

• Deputetit serb Ivanoviq e vlerëson të rrezikshme kërkesën e deputetëve të Kosovës për shpalljen e pavarësisë

• Forcat e policisë ndërkombëtare morën kompetencat mbi sigurinë në portën kufitare me Serbinë

• Ministria e Shëndetësisë nuk pranon emrimimin e Pleurat Sejdiut për sekretar të përhershëm të kësaj ministrie

• Gjykata e Qarkut në Prishtinë dënoi me një vit heqje lirie një polic nga Gana

• Gjykata Ndërkombëtare në Hagë shqyrton kërkesën e Bosnjës për kompensim

• Gjukanoviq: Fundi i ambicieve pushtuese të Millosheviqit, si katalizator i një projekti serbomadh

• Gjingjiq u shkruan liderëve të botës për gjendjen e "rëndë:" në Kosovë

• Rreth 30 mijë banorë të zonave veriore të Shqipërisë gjenden të izoluar nga bora

• Qeveria e Maqedonisë miratoi planin aksional të Marrëveshjes së Ohrit

• Zvicra do të organizojë konferencën për Irakun

• Anan paralajmëron nga tragjedia humanitare në Korenë e Veriut

• Afganistani prodhuesi më i madh i opiumit në botë

• Bush merr pjesë në shërbesën përkujtimore për 7 astronautët

• Hetime intensive për anijen Kolumbia

• Pauell ka fakte të reja që provojnë se Iraku nuk po çarmatoset.

• Europarlamentarja britanike thotë se Iraku fsheh armët

• Bler e Shirak takohen për bisedime për Irakun

• Presidenti Bush ka kërkuar miratimin e buxhetit prej 41.3 miliardë dollarësh për siguri

• Në Hungari ka filluar aftësimi i vullnetarëve irakianë

• Inspektorët e KB-së kanë vizituar të paktën 9 qendra të dyshuara për armët e fshehura

• Nuk ka një kufi kohor për inspektimet e armëve në Irak

• Putin: Përgjegjësia për krizën i takon Irakut

• Kryeministri turk është takuar me kreun e partisë kryesore opozitare irakiane

Kryesia e Kuvendit kërkesën e AAK-së do ta shqyrtojë javën e ardhshme

 

Prishtinë, 4 shkurt 2003 - Tashmë ka mbërritur në sekretarinë e Kuvendit të Kosovës kërkesa e Grupit parlamentar të AAK-së që Kuvendi të shqyrtojë Deklaratën për shpalljen e pavarësisë së Kosovës, kurse Kryesia e Kuvendit do ta shqyrtojë në takimin e radhës javën e ardhshme.

Ndërkohë kryetari i Kuvendit Nexhat Daci do të thërrasë shefat e grupeve parlamentare për konsultime, meqenëse kjo vlerësohet si çështje shumë e rëndësishme. Lidhur me këtë çështje do të bëhen konsultime edhe me misionin e UNMIK-ut, me përfaqësitë e huaja diplomatike në Prishtinë, për marrjen e hapave që duken më radikalë a po që bëjnë kthesë në zhvillimet e përgjithshme në Kosovë, tha Ramush Tahiri këshilltar i kryeparlamentarit Daci.

Gjithashtu thuhet se Kryesia e Kvendit rezervon të drejtën të mos e procedojë këtë kërkesë, nëse jo bazohet në rregulloren e Kuvendit dhe në Kornizën kushtetuese. Tahiri thotë se ky mandat i deputetëve është i limituar me Kornizën kushtetuese dhe Kryesia nëse vlerëson se një propozim i tillë nuk është në harmoni me këtë dokument, atëherë ajo ka të drejtë që të mos e vërë në rend dite të Kuvendit.

 

 

Ambasadori gjerman në Uashington thotë se është tepër herët që të zgjidhet statusi përfundimtar i Kosovës

 

Uashington, 4 shkurt 2003 - Ambasadori gjerman në Uashington, Volfgand Ishinger, ka vlerësuar se tani është tepër herët që të zgjidhet statusi përfundimtar i Kosovës. Sipas ambasadorit gjerman, paraprakisht duhet bërë shumë ndryshime në Kosovë.

 

 

Galak: Gjingjiq vetëm mund të ëndërrojë për kthimin e forcave serbe në Kosovë

 

Bruksel, 4 shkurt 2003 - Duke komentuar kërkesën e kryeministrit serb Zoran Gjingjiq për kthimin e trupave serbe në Kosovë, zëdhënësja e Havier Solanës, Kristina Galak ka thënë: "Gjingjiq tani vetëm mund të ëndërrojë. As tash, as në të ardhmen e afërt, ajo kërkesë nuk do të gjendet në rendi dite", ka thënë ajo.

 

 

Bashkimi Evropian nuk e mbështet nismën e duputetëve të Kosovës

 

Bruksel 4 shkurt 2003 - Në një njoftim nga Brukseli thuhet se Bashkimi Evropian nuk e mbështet nismën e duputetëve të Kosovës që përmes një deklarate të shpallin Kosovën si shtet të pavarur dhe sovran.

 

Kristina Galak, zëdhënëse e shefit të diplomacisë së BE-së Havier Solana, citohet të ketë thënë se nuk ka rrethana për nisma të tilla. Justifikimi se kjo po bëhet si reagim ndaj Kartës kushtetuese të Serbisë e Malit të Zi nuk qëndron, sepse BE-ja gjithnjë ka insistuar se nuk është mirë që të përmendet Kosova në preambulën e kësaj Karte kushtetuese, ka thënë Galak. Ajo ka shtuar se kjo preambulë nuk do të mund të ndikojë në situatën legale në Kosovë.

Zëdhënësja e Solanës ka thënë se do të ishte shumë më mirë që liderët kosovarë të merren me forcimin e institucioneve të Kosovës sesa me deklarata të cilat "nuk kanë kuptim".

Gjithashtu ajo ka thënë se BE-ja mbështet politikën e Mihael Shtajnerit për Kosovën dhe parimet e njohura standardet para statusit përfundimtar sepse ky është qëndrim edhe i Solanës dhe i tërë BE-së.

 

Zëdhënësja e Solanës ka pralajmëruar se edhe nëse miratohet një deklaratë e tillë asgjë nuk do të ndryshojë as në jetën e kosovarëve as në qëndrimin e bashkësisë ndërkombëtare.

 

 

Kthimi i ushtrisë jugosllave në Kosovë aktualisht nuk është i mundur, u tha në një takim për media

 

Prishtinë, 4 shkurt 2003 - Në një konferencë për media të UNMIK-ut e KFOR-it u tha se kthimi i ushtrisë jugosllave në Kosovë aktualisht nuk është i mundur, sepse për sigurinë e Kosovës përgjegjës është KFOR-i dhe UNMKIK-u, tha Derek Çepell, zëdhënës i policisë së UNMIK-ut.

Ndërkaq duke komentuar nismën e deputetëve të Kosovës për shpalljen e Kosovës shtet të pavarur de sovran, Sunil Narula, zëdhënës i UNMIK-ut tha se administrata ndërkombëtare tash për tash nuk ka ndonjë qëndrim, por megjithatë ai shtoi se kjo do të bëhet pas konsultimeve të shefit të UNMIK-ut Shtajner me Këshillin e Sigurimit të OKB-së.

Në këtë konferencë u njoftua edhe për arrestimin e 33 personave për posedim ilegal të armëve dhe konfiskimin e një sasie armësh, madje edhe një lancues raketash.

Zëdhënësi i KFOR-it Entoni Adams bëri të ditur se në rajonin e Klinës është duke u zhvilluar stërvitja "Rapid gaardian" që ka për qëllim demonstrimin e vendosmërisë së NATO-s për paqen dhe stabilitetin në rajon.

 

 

Nuk ka të arrestuar lidhur me sulmin kundër stacionit të policisë në Pejë

 

Pejë, 4 shkurt 2003 - Gjashtë personat e arrestuar ditë më parë ka të bëjë me posedem ilegal të armëve e jo me sulmin kundër stacionit të policisë rajonale në Pejë, deklaroi zëdhënësja e SHPK-së në Pejë Hedije Kelmendi.

 

Tre prej këtyre personave janë liruar, kurse tre të tjerët ndodhen në arrest. Ata janë ndaluar sepse në veturat e tyre janë gjetur aramtim ilegal, tha ajo.

SHPK, policia e UNMIK-ut dhe KFOR-i ditëve të fundit kanë shtuar kontrollin në Pejë që qytetarët të kenë një siguri më të madhe.

 

 

Buxheti i komunës së Podujevës për këtë vit do të jetë 20% më i lartë se vitin e kaluar

 

Podujevë, 4 shkurt 2003 – Kuvendi i komunës i Podujevës mbajti sot seancën e katërt të cilën e udhëhoqi kryetari Agim Veliu e në të cilën mori pjesë edhe administratori komunal Majkëll Verlling.

Kryeshefi Ekzekutiv, Ejup Visoka, paraqiti propozimin e buxhetit për vitet 2003-2005 me theks të veçantë për vitin 2003, kurse këshilltarët pas shqyrtimit dhe paraqitjes së vërejtjeve dhe sugjerimeve aprovuan njëzëri buxhetin e komunës.

Buxheti për vitin fiskal 2003 për komunën e Podujevës është propozuar të jetë 6.797.713 euro, e që është 23 % më i lartë se buxheti i vitit 2002, deklaroi para këshilltarëve z. Visoka.

Kuvendi miratoi vendimin për ristrukturimin e shërbimit civil dhe në këtë kuadër ua vazhdoi kontratat të gjithë të zënëve me punë në këtë shërbim për 2 muaj.

Kryetari i KK Agim Veliu njoftoi për dorëheqjen e këshilltarit të PDK-së z. Bajram Ajeti me arsyen se është punëtor në shërbimin civil të Kosovës dhe se dëshiron t'i përkushtohet këtij shërbimi.

KK i Podujevës vendosi që ngritjen e Komitetit për Komunitete dhe Komitetit për Ndërmjetsim ta bëjë në seancën e radhës.

 

 

Mbi 40 deputetë i dorëzuan Parlamentit një deklaratë me të cilën kërkojnë që Kosova të shpallet shtet sovran dhe i pavarur

 

Prishtinë, 4 shkurt 2003 - Mbi 40 deputetë i dorëzuan edhe zyrtarisht Parlamentit një deklaratë me të cilën kërkojnë që Kosova të shpallet shtet sovran dhe i pavarur në një seancë të jashtëzakonshme e Parlamentit të Kosovës më 13 shkurt. Kjo kërkesë së bashku me tekstin e kësaj deklarate i është dorëzuar kryetarit të Kuvendit të Kosovës, por me të janë njoftuar edhe të gjitha instancat ndërkombëtare.

Duke arsyetuar nismën e kësaj deklarate për shpalljen e pavarësisë së Kosovës në emër të nënshkruesve të saj, Bujar Dugolli kryetar i Grupit parlamentar të AAK-së, ka theksuar se "arsyeja më e fortë që na ka shtyrë neve të marrim këtë hap në këto momente është miratimi i Kartës Kushtetuese Serbi - Mali i Zi nga Kuvendi i Serbisë e Malit të Zi e cila Kosovën e trajton si pjesë integrale të Serbisë".

 

Ndër arsyet e tjera për kërkesën e pavarësisë së Kosovës, ai përmendi edhe mosreagimin adekuat të BE-së ndaj kërkesës së deputetëve për të kundërshtuar përfshirjen e Kosovës në preambulën e Kartës Kushtetuese të shtetit të ri serbo-malazez.

Në këtë deklaratë veç tjerash theksohet se Kuvendi i Kosovës kërkon nga të gjitha shtetet demokratike, në veçanti nga Shtetet e Bashkuara të Amerikës dhe shtetet e BE-së që të mbështesin dhe të ndihmojnë popullin riridashës të Kosovës në krijimin dhe në njohjen ndërkombëtare të shtetit të Kosovës.

 

Kuvendi i Kosovës kërkon nga KS i OKB-së që realitetin e ri të krijuar në Kosovë ta njohë si të arritur të përbashkët të qytetarëve të Kosovës dhe të bashkësisë ndërkombëtare dhe këtë ta miratojë në një rezolutë për njohjen e shtetit të pavarur të Kosovës.

 

 

Deputetit serb Ivanoviq e vlerëson të rrezikshme kërkesën e deputetëve të Kosovës për shpalljen e pavarësisë

 

Mitrovicë, 4 shkurt 2003 - Kërkesën e 42 deputetëve të Parlamenit për shpalljen e pavarësisë së Kosovës, anëtari i kryesisë së Kuvendit deputeti serb Oliver Ivanoviq e vlerësoi të rrezikshme. Sipas tij kjo deklaratë do ta ashpërsojë edhe më shumë situatën edhe ashtu të tendosur në Kosovë.

 

"Mendoj se një iniciativë e këtillë mund të jetë shumë e rrezikshme aq më tepër kur ndodhemi në një situatë të tendosur dhe mund të pritet edhe reagimi i z. Shtajner, i cili në KS nuk do ta ketë lehtë të shpjegojë këtë zhvillim të fundit në Kosovë", tha Ivanoviq.

 

 

Forcat e policisë ndërkombëtare morën kompetencat mbi sigurinë në portën kufitare me Serbinë

 

Kopaonik, 4 shkurt 2003 - Forcat e policisë ndërkombëtare kanë marrë dje kompetencat nga forcat paqeruajtëse mbi sigurinë në portën kufitare me Serbinë në fshatin Jarinë. Zyrtarët e policisë thanë se brenda muajit policia kufitare do t'i marrë kompetencat mbi të gjitha pikat kufitare.

 

Mirëpo, në këtë detyrë nuk janë përfshirë fare pjesëtarët shqiptarë të Shërbimit Policor të Kosovës. Një polic ndërkombëtar lidhur me faktin pse në kuadër të policisë ndërkombëtare nuk janë inkuadruar edhe policët shqiptarë të SHPK-së, theksoi se kjo është një çështje politike.

Zyrtarët ndërkombëtarë të policisë kufitare në këtë vendkalim theksuan se do të angazhohen për rendin dhe parandalimin e çdo lloj kontrabande, përkatësisht të ndërpriten të gjitha veprimet ilegale nga të dy anët e kufirit.

 

 

Ministria e Shëndetësisë nuk pranon emrimimin e Pleurat Sejdiut për sekretar të përhershëm të kësaj ministrie

 

Prishtinë, 4 shkurt 2003 - Ministria e Shëndetësisë nuk pranon emërimin e Pleurat Sejdiut për sekretar të përhershëm të kësaj ministrie. Ai ka pranuar këtë detyrë pas mbledhjes me zyrtarë të lartë të UNMIK-ut e cila zgjati mëse dy orë.

 

Ndryshe këshilltari i lartë i ministrit të Shëndetësisë Muhamet Jusufi përsëriti edhe njëherë qëndrimin e kësaj Ministrie dhe theksoi se Plurat Sejdiun nuk e njeh as ministri Baliq e as Ministria e Shëndetësisë.

 

Madje edhe në mbledhjen e rregullt të djeshme mes drejtorëve dhe këshilltarëve të kësaj ministrie, ministri dhe të tjerët e konfirmuan të njëjtën gjë se nuk e njohin Pleurat Sejdiun në postin e sekretarit të përgjithshëm, përderisa Këshilli i ministrave të dalë me një vendim përfundimtar rreth këtij problemi brenda Ministrisë së Shëndetësisë, thotë z. Jusufi.

Megjithatë, Pleurat Sejdiu dje e ka filluar punën në këtë post edhepse ministri Baliq nuk e njeh atë.

Ndërkaq, këshilltari kryeministrit të Kosovës, Rexhep Hoti pohoi se z. Sejdiu është zgjedhur sekretar me procedurë të rregullt nga Komisioni për emërime të larta.

 

 

Gjykata e Qarkut në Prishtinë dënoi me një vit heqje lirie një polic nga Gana

 

Prishtinë, 4 shkurt 2003 - Në Gjykatën e Qarkut në Prishtinë është dënuar me një vit heqje lirie polici i Kombeve të Bashkuara në Kosovë Xhon Atanga nga Gana, pasi ai në një aksident rrugor ka shkaktuar vdekjen e dy qytetarëve në vendin tonë.

 

 

Gjykata Ndërkombëtare në Hagë shqyrton kërkesën e Bosnjës për kompensim

 

Hagë, 4 shkurt 2003 - Gjykata Ndërkombëtare e Kombeve të Bashkuara, e cila ka nisur aktivitetin në korrik të vitit të kaluar, do të shqyrtojë kërkesën e Bosnjës, e cila kërkon kompensim nga Jugosllavia për ushtrimin e gjenocidit në luftën e viteve 1992 – '95.

Beogradi kishte kërkuar të pengonte një gjykim të tillë, por Gjykata në fjalë ka hedhur poshtë kërkesën jugosllave.

 

 

Gjukanoviq: Fundi i ambicieve pushtuese të Millosheviqit, si katalizator i një projekti serbomadh

 

Podgoricë, 4 shkurt 2003 - Kryeministri malazez Milo Gjukamoviq ka vlerësuar se arsyeja kryesore për krijimin e RF Jugosllavisë ka qenë dëshira që të fshehen ambiciet pushtuese të Sllobodan Millohseviqit, si katalizator i një projekti serbomadh.

 

Gjukanoviq ka thënë se fundi i kësaj Jugosllavie është përfundim logjik dhe i drejtë i një procesi, duke shtuar se Serbia e Mali i Zi janë të vetëdijshme se duhet t'i kthehen vetvetes.

 

 

Gjingjiq u shkruan liderëve të botës për gjendjen e "rëndë:" në Kosovë

 

Beograd, 4 shkurt 2003 - Kryeministri serb Zoran Gjingjiq u ka drejtuar një letër presidentëve të Rusisë dhe SHBA-ve, Putin e Bush, dhe kryeministrit britanik Bler në të cilën i njofton për gjendjen e "rëndë" në Kosovë dhe kërkon që kriza sa më parë të zgjidhet, njoftojnë mediat serbe.

Gjingjiq të njëjtën letër u ka drejtuar edhe presidenti të Francës Shirak, kryeministrit italian Berluskoni dhe kancelarit gjerman Shrëder. Gjingjiq kërkon ndihmë nga liderët kryesorë të botës që situata sa më parë të definohet dhe deri në fund të respektohet dhe zbatohet rezoluta 1244 për Kosovën, sepse sipas Gjingjiqit, Kosova po shkon drejt pavarësisë.

* * *

Pothuajse nuk kalon një ditë që kryeministri serbe të mos dalë me ndonjë "shqetësim" të tij rreth Kosovës. Kjo është një praktikë e zakonshme e politikanëve serbë saherë që i kanë punët ngushtë në shtëpi të vet.

 

Tani që është miratuar Karta kushtetuese e krijesës së re Serbi - Mali i Zi, Gjingjiq dëshiron të marrë supremacionin politik në Serbi për të shtyrë në plan të dytë rivalin e tij kryesor Vojisllav Koshtunica, i cili te serbët ashiqare gëzon popullaritet dhe mbështetje më të madhe. Kosova edhe njeherë po u shërben politikanëve serbë si "kartë e fortë" për dominim në skenën politike të Beogradit.

 

Por njëherit synohet edhe destabilizimi i Kosovës tani kur pritet transferi më i madh pushtetit nga ndërkombëtarët te vendorët.

 

 

Rreth 30 mijë banorë të zonave veriore të Shqipërisë gjenden të izoluar nga bora

 

Shkodër, 4 shkurt 2003 - Rreth 30 mijë banorë të zonave veriore të Shqipërisë gjenden të izoluar nga bora, e cila për pesë ditë me radhë ka bllokuar rrugët automobilistike, që lidhin qendrat e qyteteteve me komunat. Deri më tash as qeveria dhe as organizatat humanitare nuk kanë kërkuar ndihma në këto zona.

Sipas zyrtarëve vendorë banorët në prefekturën e Shkodrës dhe atë të Kukësit kanë nevoja të ngutshme për ushqime. Në prefekturën e Shkodrës dhe në atë të Pukës situata është rënduar jo vetëm për shkak të bllokimit të rrugëve por edhe të ndërprerjes së energjisë elektrike.

 

 

Qeveria e Maqedonisë miratoi planin aksional të Marrëveshjes së Ohrit

 

Shkup, 4 shkurt 2003 - Qeveria e Maqedonisë në seancën e djeshme ka miratuar planin aksional me të cilin parashihet zbatimi i Marrëveshjes Kornizë të Ohrit.

 

Në këtë plan janë përcaktuar afatet kohore për miratimin e rreth 90 ligjeve, ndërkaq qeveria ka shprehu vullnet politik edhe për sjelljen e një ligji të veçantë për përdorimin e gjuhëve të komuniteteve, i cili ligj nuk është parashikuar në Marrëveshjen e Ohrit, por kjo e drejtë është parapar me kushtetutë.

 

Sipas zëdhënësit të Qeverisë maqedonase, në këtë plan përfshihen tri segmente: plani operativ, decentralizimi i pushtetit lokal, si dhe baza për përgatitjen e programit për përfaqësimin proporcional të bashkësive etnike në administratën shtetërore dhe publike në këtë vend. Qeveria e Maqedonisë po ashtu ka ngritur iniciativën për përgatitjen e një ligji për përdorimin e gjuhës, të cilin duhet të përgatis Ministria e Drejtësisë.

 

Ai paralajmëroi se Ligji për përdorimin e simboleve të bashkësive etnike pritet që të miratohet nga deputetët gjatë këtij muaji.

 

 

Zvicra do të organizojë konferencën për Irakun

 

Bernë, 4 shkurt 2003 - Në kuadër të kërcënimit të luftës në Irak, Zvicra do të organizojë një konferencë për respektimin e së drejtës nderkombëtare ndërkombëtare. Këto e bëri të ditur ministrja e jashtme Mishelin Kalmi-Rej. Zvicra bën të gjitha përpjekjet për të zbutur vuajtjen e popullsisë civile.

 

Pjesëmarrëse në konferencë do të jenë vendet fqinje të Irakut, SHBA, BE, Britania e Madhe, Gjermania dhe organizata të ndihmës.

 

Sipas zonjës Kalmi-Rej është planifikuar, që konferenca të mbahet që këtë muaj në Gjenevë. Ekspertët e OKB-së mendojnë se në rast lufte në Irak një gjysmë milionë njerëz kanë nevojë për ndihmë mjekësore. Përveç kësaj priten 900 000 refugjatë.

 

 

Anan paralajmëron nga tragjedia humanitare në Korenë e Veriut

 

Nju Jork, 4 shkurt 2003 - Sekretari i përgjithsöm i OKB-së Anan ka kerkuar nga bashkösia ndörkombëtare ndihmë financiare për Korenë e Veriut. Përndryshe ky vend komunist rrezikohet nga një katastrofë humanitare, deklaroi një zëdhënës i Ananit.

 

Vetem deri në fund të marsit programit botëror të ushqimit i duhen 97 000 tonë ushqime për të furnizuar më të varfrit në Korenë e Veriut. Sipas organizatës gjermane kundër urisë në botë rreth 3 milionë nga 23 milionë koreanoveriorët vuajnë nga uria. Nddr fëmijët e vegjël 45% janë të paushqyer kronikë.

 

 

Afganistani prodhuesi më i madh i opiumit në botë

 

Vjenë, 4 shkurt 2003 - Afganistani sipas të dhënave të OKB-së është vendi me prodhimin më të lartë të opiumit në botë. Pothuajse 3/4 e opiumit vjen nga Afganistani, njoftoi zyra e OKB-së për luftimin e drogës dhe të kriminalitetit, në një raport të publikuar në Vjenë.

 

Vitin e kaluar 3.400 tonë opium janë prodhuar në këtë vend. Fshatarët e varfër duhen stimuluar me qëllim që të kalojnë në mbjedhjen e bimëve legale.

 

 

Bush merr pjesë në shërbesën përkujtimore për 7 astronautët

 

Uashington, 4 shkurt 2003 - Presidenti Bush merr pjesë të martën në shërbesat e përmortshme për anëtarët e ekuipazhit të anijes Kolumbia në Qendrën e Fluturimeve në Hapësirë Johnson në Teksas. Presidenti Bush tha se astronautët bënë sakrificën më sublime për hir të zbulimeve shkencore.

 

Presidenti theksoi se Shtetet e Bashkuara do ta vazhdojnë programin e hapësirës dhe ai premtoi se Agjencia Amerikane e Hapësirës, NASA do ta kapëcejë tragjedinë e së shtunës me anijen Kolumbia.

 

 

Hetime intensive për anijen Kolumbia

 

Hjuston, 4 shkurt 2003 - Çelësi i gjetjes së shkakut që çoi në shpërbërjen e anijes Kolumbia mund të qëndrojë në zbulimin e faktorëve që çuan në ngritjen e shpejtë të temperaturës së sipërfaqes në anën e majtë të trupit të anijes disa minuta para se ajo të çahej në hapësirë.

"Na mungon një hallkë në zinxhirin e ngjarjeve që çuan në rritjen e temperaturës, të cilën duhet ta zbulojmë", thotë drejtuesi i programeve të fluturimit të Nasës, Ron Dittemore. Nasa shpreson të gjejë copat e pllakave refraktare izoluese që mbrojnë anijen nga mbi-nxehja të cilat mund të japin përgjigjen.

"Hallka që na mungon ndodhet diku, ne duhet të këmbëngulim derisa ta gjejmë", thotë zoti Dittemore.

 

 

Pauell ka fakte të reja që provojnë se Iraku nuk po çarmatoset.

 

Uashington, 4 shkurt 2003 - Zyrtarët amerikanë thonë se Sekretari i Shtetit Kolin Pauell ka fakte të mëtejshme që provojnë se Iraku nuk po çarmatoset. Zyrtarët thonë se Sekretari i Shtetit do të bëjë publike fotografi të siguruara nga agjensitë e zbulimit si dhe tekstet e disa bisedave të përgjuara.

 

Materialet do të bëhen të ditura të mërkurën gjatë një takimi në Këshillin e Sigurimit.

Zyrtarët thonë se sekretari Pauell është ende duke shqyrtuar materialet e agjencive të zbulimit për të zgjedhur pjesët që ai do të bëjë publike të mërkurën gjatë një takimi të rëndësishëm në Këshillin e Sigurimit të OKB-së.

"Iraku nuk po bashkëpunon. Iraku i fsheh të dhënat. Iraku po përpiqet ta ruajë programin e armëve të shkatërrimit në masë. Informacioni që do të japë sekretari i shtetit do ta bëjë të qartë, me fakte, këtë gjë", tha zëdhënësi Bauçer.

Sekretari Pauell thotë se Shtetet e Bashkuara ende kërkojnë një çarmatim me mjete paqësore, por "nuk do të tërhiqen nga rruga e luftës", në se ajo mbetet mjeti i vetëm për t'i hequr Irakut armët e shkatërrimit në masë.

 

 

Europarlamentarja britanike thotë se Iraku fsheh armët

 

Nju Jork, 4 shkurt 2003 - Një anëtare britanike e Parlamentit Evropian i ka dorëzuar kryeinspektorit të armëve Hans Bliks, ato, që ajo e cilëson si, prova të reja, që Iraku fsheh materiale për prodhimin e armëve.

Parlamentarja britanike, Ema Nikolson, tha të hënën në Nju Jork se një informator irakian i ka treguar asaj dy vende të ndryshme ku janë fshehur materiale për prodhimin e armëve të shkatërrimit në masë.

Këto dy vende, tha ajo, nuk janë kontrolluar ende nga ispektorët.

 

Zonja Nikolson tha se ajo i ka dhënë kryeinspektorit Bliks edhe një formë që tregon se Iraku është përpjekur të porosisë materiale për armët madje edhe muajin e kaluar. Zëdhënësi i zotit Bliks tha se informacioni i deputetes po vlerësohet dhe ai i premtoi zonjës Nikolson se hollësitë e tij nuk do t’i bëhen publike për të mbrojtur burimin e informacionit.

 

 

Bler e Shirak takohen për bisedime për Irakun

 

Londër, 4 shkurt 2003 - Britania dhe Franca kanë në plan të zhvillojnë të martën një takim të nivelit të lartë që pritet të përqendrohet rreth luftës së mundshme kundër Irakut.

Kryeministri britanik Toni Bler dhe presidenti francez Zhak Shirak do të takohen për bisedime në një pikë turistike në veri të Francës.

Kryeministri Bler mbështet qëndrimin amerikan për një ndërhyrje të mundshme ushtarake në se Iraku nuk pranon të çarmatoset. Franca është kundër ndërhyrjes dhe mbështet zgjatjen e misionit të inspektimeve në Irak.

 

 

Presidenti Bush ka kërkuar miratimin e buxhetit prej 41.3 miliardë dollarësh për siguri

 

Uashington, 4 shkurt 2003 - Në buxhetin e propozuar nga presidenti Xhorxh Bush, që duhet ta miratojë Kongresi amerikan, nuk përfshihet asnjë fond për një luftë të mundshme me Irakun.

 

Arsyeja për këtë, njofton Shtëpia e Bardhë, është se administrata amerikane shpreson në një zgjidhje paqësore.

Nga ana tjetër presidenti ka kërkuar miratimin e buxhetit prej 41.3 miliardë dollarësh për sigurinë e brendshme të vendit.

 

 

Në Hungari ka filluar aftësimi i vullnetarëve irakianë

 

Budapest, 4 shkurt 2003 - Në një bazë ushtarake në Hungari ka filluar aftësimi i vullnetarëve irakianë, të cilët gjenden në mërgim, në mënyrë që të punojnë me forcat amerikane në rast të një lufte të mundshme në Irak, njoftojnë burimet amerikane.

Hungaria ka lejuar aftësimin në këtë vend deri të mbi 3 mijë irakianëve për një afat kohor mbi 90 ditë.

 

 

Inspektorët e KB-së kanë vizituar të paktën 9 qendra të dyshuara për armët e fshehura

 

Bagdad, 4 shkurt 2003 - Inspektorët e Kombeve të Bashkuara gjatë ditës së djeshme kanë vizituar të paktën 9 qendra të dyshuara për armët biologjike, kimike dhe bërthamore.

I ngarkuari për ndërlidhjeje me inspektorët, gjenerali Hosam Mohamed Amin tha se Bagdadi është i gatshëm të zhvillojë bisedime të reja me inspektorët e Kombeve të Bashkuara.

Amin tha se Iraku do të lejojë fluturimin e aeroplanëve vëzhgues U-2, nëse amerikanët dhe britanikët japin garanci se nuk do të ndërmarrin sulme në zonën e ndalim-fluturimit.

 

 

Nuk ka një kufi kohor për inspektimet e armëve në Irak

 

Uashington, 4 shkurt 2003 - Shtëpia e Bardhë ka hedhur poshtë njoftimet në disa media amerikane se Shtetet e Bashkuara dhe Britania e Madhe kërkojnë të kufizojnë inspektimet në Irak në 6 javë.

Zëdhënësi i Shtëpisë së Bardhë, Ari Fleiçër, ka pohuar se presidenti Bush nuk ka vendosur një kufi kohor për inspektimet.

 

 

Putin: Përgjegjësia për krizën i takon Irakut

 

Moskë, 4 shkurt 2003 - Presidenti rus Vladimir Putin ka deklaruar se përgjegjësia më e madhe në rastin e krizës irakiane i takon Irakut.

Kjo u bë e ditur pas takimit me kryeministrin italian Silvio Berluskoni.

 

 

Kryeministri turk është takuar me kreun e partisë kryesore opozitare irakiane

 

Ankara, 4 shkurt 2003 - Kryeministri turk, Abdullah Gul është takuar gjatë ditës me kreun e partisë kryesore opozitare Deniz Bajkal, lidhur me krizën irakene.

Qeveria turke duhet të vendosë së shpejti nëse do lejojë trupat amerikane në vend në rast të një lufte me Irakun.

Pas takimit kryeministri turk Gul deklaroi: "Derisa jemi në një pikë kritike, lidhur me çështjen irakiane, i kam treguar zotit Bajkal zhvillimet më të fundit dhe i kam dhënë një mori informacionesh. E përsëris se kjo javë është kyç në zhvillimet e mëtejshme", nënvizoi kryeministri turk.

Copyright©2000-2003 Trepca.net - Të gjitha të  drejtat e rezervuara.