Lajme

E hëne, 3 shkurt 2003

Përmbajtja:

• Presidenti Rugova dhe kryeministri Rexhepi udhëtuan për në SHBA

• Shtajner thotë se KFOR-i dhe UNMIK-u janë përgjegjëse për sigurinë në Kosovë

• Policia ndërkombëtare ka arrestuar 6 persona me dyshimin se kanë sulmuar policinë rajonale të UNMIK-ut në Pejë

• Policia ka gjetur veturën nga e cila është qëlluar koloneli Tahir Zemaj

• Zëdhënësi i Presidentit të Kosovës thotë se strategjia e Beogradit është vetëm iluzion serb

• Gjatë një operacioni të KFOR-it në Pejë është gjetur një sasi e madhe armësh dhe eksploziv

• Më 6 shkurt Këshilli i Sigurimit do të debatojë për situatën në Kosovë

• Istref Begolli ishte aktor i kalibrit botëror

• Në Prishtinë vdiq dhe u varros atdhetari Osman Dumoshi

• Gjilani fiton edhe dy projekte të reja, ndërsa pesë të tjera presin aprovimin e Ministrisë së Financave

• Serbi Angjellko Kollashinac, për krime lufte, u dënua me 8 vjet burgim

• Sivjet pritet të ekshumohen edhe trupat e 500-700 personave

• Edhe zëdhënësi i KFOR-it është kundër çfarëdo ushtrie tjetër në Kosovë

• NATO thekson se nuk ekzistojnë rrethanat për të biseduar rreth kthimit të forcave serbe në Kosovë

• Trupi gjykues në Prizren pritet të shpallë sot dënimin kundër një serbi të akuzuar për krime lufte

• Ushtria jugosllave thotë se është e gatshme të kthehet në Kosovë

• Ushtria jugosllave thotë se është e gatshme të kthehet në Kosovë

• Në rajonin e Tetovës dhe të Gostivarit janë zbuluar 32 shtetase të huaja që merreshin me prostitucion

• Kryeministri i Serbisë kërkon kthimin e forcave serbe në Kosovë

• Në Shkup me një granatë dore janë plagosur tre serbë

• In Memoriam - Istref Begolli (1933-2003)

• Gjenden trupat e disa astronautëve

• Të martën zhvillohet ceremonia e përmortshme

• Bliks u ka bërë thirrje SHBA-ve që këtë javë të ofrojnë dëshmi bindëse për armët ilegale irakiane

• Pauell thotë se të mërkurën do t'i prezentojë KS se Sadam Huseini po i fsheh armët e veta

• NASA jep hollësi të reja rreth anijes Kolumbia

• Rusia dërgon ndihma në Stacionin Hapësinor

• Arrestime antiterroriste në Greqi

• Partia e Shrëderit humb në zgjedhjet vendore

• Iraku mund të bëjë lëshime gjatë vizitës së kryeinspektorit Hans Bliks

• Qeveria amerikanë do të ndërmarrë hetime për shkaqet e tragjedisë së anijes Kolumbia

• Mbi 3.000 bomba dhe raketa të dirigjuara do të derdheshin mbi ushtrinë irakiane në 48 orët e para

• Nga një shpërthim i fuqishëm 40 të vrarë

• Në Kinë në një hotel kanë humbur jetën 33 njerëz

• Është vrarë shefi i policisë së një distrikti të Groznit

• Havel largohet nga posti i Presidentit

Presidenti Rugova dhe kryeministri Rexhepi udhëtuan për në SHBA

 

Prishtinë, 3 shkurt 2003 - Presidenti i Kosovës Ibrahim Rugova dje ka udhëtuar për në SHBA, me ftesë të Kongresit amerikan, ku të enjtën do të marrë pjesë ceremoninë tradicionale "Lutjet e mëngjesit".

Poashtu Presidenti gjatë qëndrimit në SHBA do të ketë edhe aktivitete të tjera. Presidenti Rugova para nisjes, në aeroportin e Prishtinës deklaroi: "Po nisem sot në SHBA të marrë pjesë në takimin tradicional që është në këtë vend në 'Lutjen e Mëngjesit'dhe të lutem bashkë me presidentin Bush për paqen, lumturinë dhe prosperitetin në botë".

Po dje edhe kryeministri i Kosovës Bajram Rexhepi ka udhëtuar në SHBA për të marrë pjesë në "Lutjen e mëngjesit" e cila mbahet me 6 shkurt.

Në këtë ceremoni tradicionale marrin pjesë përfaqësuesit e 160 vendeve të botës.

 

 

Shtajner thotë se KFOR-i dhe UNMIK-u janë përgjegjëse për sigurinë në Kosovë

 

Prishtinë, 3 shkurt 2003 - KFOR-i dhe UNMIK-u janë autoritetet e vetme përgjegjëse për sigurinë në Kosovë dhe nuk ka arsye për ndryshimin e Rezolutës 1244 të KS të OKB-së, ka deklaruar kryeadministratori i Kosovës Mihael Shtajner duke i përgjigjur letrës së kryeministrit të Serbisë Zoran Gjingjiq për kthimin e forcave serbe në Kosovë.

 

 

Policia ndërkombëtare ka arrestuar 6 persona me dyshimin se kanë sulmuar policinë rajonale të UNMIK-ut në Pejë

 

Pejë, 3 shkurt 2003 - Policia ndërkombëtare ka arrestuar 6 shqiptarë në rajonin e Pejës në kuadrin e hetimeve lidhur me sulmin e fundit kundër stacionit të policisë rajonale të UNMIK-ut në Pejë, ka bërë ditur zëdhënësi i policisë së UNMIK-ut. Ai ka konfirmuar se tre nga personat e arrestuar janë liruar, ndërkohë që tre të tjerë po merren në pyetje nga policia.

Zëdhënësi ka saktësuar se gjashtë personat e arrestuar janë shqiptarë të Kosovës, por emrat e tyre nuk mund të bëhen publik përderisa hetuesia të mos kryejë hetimet lidhur me shkallën e përgjegjësisë së tyre.

 

Policia thotë se ka dëshmi të qëndrueshme por jo edhe të bollshme se këta tre persona janë përgjegjës të drejtpërdrejt për sulmin kundër stacionit të policisë rajonale të UNMIK-ut në Pejë.

Tre nga personat e arrestuar janë liruar, ndërkohë që tre të tjerë po merren në pyetje nga policia.

 

 

Policia ka gjetur veturën nga e cila është qëlluar koloneli Tahir Zemaj

 

Pejë, 3 shkurt 2003 - Një pjesëtar i SHPK-së ka bërë të ditur se është gjetur një nga veturat nga e cila është qëlluar koloneli Tahir Zemaj, më 4 janar të këtij viti në Pejë.

 

Një rreshter i policisë ka konfirmuar se bëhet fjalë për makinën "Opel askona" me ngjyrë të kaltër, e cila është gjetur e djegur dhe e shkatërruar në një fshat të Pejës.

 

Mediat lokale citojnë rreshterin e policisë së hetimeve Enver Gashin të ketë pohuar për gjetjen e kësaj veture dhe identifikimin e pronarëve të saj të mëparshëm.

 

Ai ka thënë se kjo veturë ka ndërruar disa pronarë dhe se policia po bën përpjekje për idenitfikimin e pronarit të saj të fundit.

 

 

Zëdhënësi i Presidentit të Kosovës thotë se strategjia e Beogradit është vetëm iluzion serb

 

Prishtinë, 3 shkurt 2003 - Zëdhënësi i presidentit të Kosovës, Muhamet Hamiti thotë se strategjia e re e Beogradit për Kosovën është vetëm iluzion serb dhe se nuk do të ketë kthim të forcave serbe.

 

Kosova aktualisht ndërton mëvetësinë e saj, deri në njohjen e pavarësisë dhe ka institucionet e veta të cilat do të sigurojnë sovranitetin në gjithë territorin e saj, ka thënë Muhamet Hamiti.

 

 

Gjatë një operacioni të KFOR-it në Pejë është gjetur një sasi e madhe armësh dhe eksploziv

 

Pejë, 3 shkurt 2003 - Gjatë një aksioni të bastisjeve të dy shtëpive nga KFOR-i në Pejë janë gjetur 16 "kallashnikov", katër granata dore, një sasi e eksplozivit dhe dy pushkë M-48.

 

Zëdhënësi i policisë së UNMIK-ut Derek Çapell tha se personat e arrestuar gjatë natës së të shtunës, nuk kanë të bëjnë me sulmin kundër policisë, por do të merren në pyetje për mbajtjen e kundërligjshme të armëve. Çepell tha se operacioni do të vazhdojë edhe më tutje dhe do të ndihmohet nga forcat e KFOR-it.

 

Sipas tij, e gjithë kjo bëhet që të ndalohen elementët kriminalë të cilët po veprojnë në Kosovë dhe po shkaktojnë vrasje dhe sulme të tilla.

 

  

Më 6 shkurt Këshilli i Sigurimit do të debatojë për situatën në Kosovë

 

Nju-Jork, 3 shkurt 2003 - Me 6 shkurt, Këshilli i Sigurimit të Kombeve të Bashkuara do të debatojë mbi zhvillimet e fundit politike e të sigurisë në Kosovë, njoftojnë burimet e selisë së OKB-së në Nju-Jork. Në këtë takim për situatën në Kosoëv do të raportojë edhe kryeadministratori Shtajner.

 

 

Istref Begolli ishte aktor i kalibrit botëror

 

Prishtinë, 3 shkurt 2003 - Me rastin e vdekjes së aktorit tonë të madh Istref Begolli, sot në Prishtinë u mbajt një mbledhje përkujtimore në kinemanë ABC.

 

Për figurën prej aktori në këtë mbeldhje përkujtimore foli regjisori Agim Sopi, i cili evokoi kujtime për aktorin Begolli, me të cilin në vitin 1990 xhiroi telefilmin “Kulla” sipas tregimit po me këtë titull të Anton Pashkut.

Poashtu në këtë mbledhje foli edhe regjisori nga Maqedonia Vladimir Milçin, i cili me fjalë shumë të zgjedhura foli për Istrefi Begollin si aktor të kalibrit botëror.

Gjithashtu me një fjalë rasti për figurën e Istref Begollit foli edhe minsitri i kulturës Behxhet Brajshori.

Para pjesëamrrësve të shumtë u shfaq telefilmi “Kulla”, ku aktori i ndjerë Istref Begolli realizoi një rol shumë të arrirë.

 

 

Në Prishtinë vdiq dhe u varros atdhetari Osman Dumoshi

 

Prishtinë, 3 shkurt 2003 - Pas një sëmundjeje të gjatë dhe të rëndë mbrëmë në Prishtinë vdiq atdhetari i njohur Osman Dumoshi, i cili tërë jetën ia kushtoi aktivitetit patriotik..

 

Osman Dumoshi ishte një nga organizatorët e demostratave të njohura të 27 nëntorit të vitit 1968. Për veprimtarinë e tij patriotike ai ka qenë i dënuar me shumë vjet burgim.

Ceremonia mortore e varrimit të Osman Dumoshit u bë sot në varrezat e qyetit në Prishtinë, në të cilën folën miqtë e bashkëvprimtarë të ndjerit Dumoshi.

 

 

Gjilani fiton edhe dy projekte të reja, ndërsa pesë të tjera presin aprovimin e Ministrisë së Financave

 

Gjilan, 3 shkurt 2003 (QIK) - Njëra ndër komunat e cila ka arritur t`i përfitojë më së shumti donatorët e jashtëm, është Gjilani, ku deri tani janë realizuar mbi 280 projekte, sipas prioritetit të përcaktuar me programin për zhvillimin e shpejtë strategjik të komunës, duke u krijuar kështu qytetarëve një infrastrukturë më funksionale dhe kushte për një jetë më të avancuar.

 

Enver Muja, kryshef ekzekutiv thotë se janë në pritje të përgjegjes pozitive nga Ministria e Ekonomisë dhe Financave edhe për pesë projekte të tjera, të cilat i kanë dorëzuar para disa ditëve.

Rrjeti i kanalizimit dhe sigurimi i ujit të pijshëm për gjithë qytetin, janë ndër problemet me të cilat, në Kosovë, nuk ballafaqohet vetëm komuna e Gjilanit, por edhe shumë qytete, prandaj sipas z. Muja, pesë nga projektet që presin vizën e Ministrisë, për lejimin e mjeteve nga buxheti për investime në komuna, në shumë të përgjithshme prej 600 mijë euro, janë nxjerrë si prioritete.

 

Në lagjen "Arbëria", në fshatin serb Koretishtë si dhe në Poneshin e Muhaxhirëve, do të shtrihet rrjeti i kanalizimit, ndërkaq, projektet për ujësjellësin janë paraparë për lagjet "Ramiz Cërnica" dhe "Zabeli i Sahit Agës". Komuna do të participojë në këto investime me 25 për qind nga buxheti i vetë.

Ndërkaq komuna është dakorduar me USAID-in për pjesëmarrje me 40 për qind të mjeteve edhe në projektin e shkollës fillore në fshatin Livoç i Epërm, që ka vlerë mbi 300 mijë euro, ndërsa do të shfrytëzohet nga të dy komunitetet që jetojnë atje.

 

Edhe banorët e Poneshit kanë nënshkruar një marrëveshje mirëkuptimi për një projekt të shkollës, ku do të mund të vijonin nxënësit shqiptarë dhe serbë, të cilët edhe tani punojnë nën një çati, por në hyrje të veçanta.

 

Gjenerali i Brigadës Shuëkombëshe të Lindjes, Kith Huber i kishte inkurajuar banorët e Poneshit qysh vitin e kaluar për të pranuar projektin për një shkollë të përbashkët, por asokohe kishte munguar gatishmëria e liderëve serbë, të cilët kishin insistuar për hyrje të ndara.

 

Zyrtari për projekte Fadil Osmani thotë se presin një donatorë për ta realizuar projektin, sepse shkolla e tashme është në ndërtesë përdhese shumë e vjetër dhe që nuk i plotëson kushtet për mësim.

Edhe Agjensioni Evropian për Rindërtim, përkatësisht MLIF/3 ka aprovuar sot projektin për një shkollë katërklasëshe në lagjen Mihir të Bresalcit, në shumë të përgjithshme prej 170 mijë euro, ku komuna participon me rreth 70 mijë euro.

Enver Muja thotë se në përgatitje e sipër janë edhe disa projekte për renovimin e infarstrukturës publike, të dëmtuar nga tërmeti, me mjetet e lejuara nga Ministria për Ekonomi dhe Financa.

Gjilani do të përfitojë edhe Qendrën për Rehabiltim të grave dhe fëmijëve, për të cilin Karitasi austriak ka ndarë 180 mijë euro, ndërsa edhe komuna do ta japë pjesën e vetë të mjeteve në këtë projekt që ka shumë rëndësi për komunën tonë, thotë z. Muja.

 

 

Serbi Angjellko Kollashinac, për krime lufte, u dënua me 8 vjet burgim

 

Prizren, 3 shkurt 2003 - Një trup gjykatësish ndërkombëtarë sot në Gjykatën e qarkut në Prizren shpalli serbin Angjellko Kollashinac fajtor dhe e dënoi me tetë vjet burgim. Kollashinac është akuzuar për krime lufte në Kosovë gjatë vitit 1999.

 

 

Sivjet pritet të ekshumohen edhe trupat e 500-700 personave

 

Prishtinë, 3 shkurt 2003 - Që nga viti 1999 janë gjetur 4019 persona të vdekur si pasojë e konfliktit në Kosovë, kurse rreth 2212 trupa janë identifikuar, bëri të ditur Zyra e UNMIK-ut për personat e zhdukur dhe mjekësi ligjore.

 

Shefi i kësaj zyre, Pablo Baraibar, tha se deri në fund të vitit 2002 janë ekshumuar 80 për qind e trupave që janë zbuluar në vendet e panjohura. Ai tha se sivjet pritet të ekshumohen edhe trupat e 500-700 personave të tjerë.

 

Gjithashtu ai tha se 1000 trupat e ekshumuar më parë nga Tribunali i Hagës do të riekshumohen edhe njëherë për shkak se ekipi i patologëve nuk ka mbledhur shenjat e ADN-së.

 

Numri i trupave të paidentifikuar e të zbuluarr në Serbi është rreth 100 persona, ndërsa të zhdukur konsiderohen 4233 persona, prej të cilëve 3324 janë shqiptarë e 909 joshqiptarë, tha Baraibar.

Ditëve të ardhshme do të ekspozohen rrobat dhe gjësendet personale të personave të vrarë për identifikimin e tyre nga familjarët.

 

 

Edhe zëdhënësi i KFOR-it është kundër çfarëdo ushtrie tjetër në Kosovë

 

Prishtinë, 3 shkurt 2003 - Zëdhënësi i forcave paqeruajtëse të NATO-së në Kosovë Entoni Adams ka deklaruar se nuk ka nevojë për veprim të çfarëdo ushtrie tjetër në Kosovë përveç ushtarëve të KFOR-it. KJo deklaratë e tij është reagim ndaj letrës së kryeministrit serb Gjingjiq për kthimin e forcave serbe në Kosovë.

 

 

NATO thekson se nuk ekzistojnë rrethanat për të biseduar rreth kthimit të forcave serbe në Kosovë

 

Bruksel, 3 shkurt 2003 - Nuk ekzistojnë rrethanat adekuate për të biseduar rreth kthimit të forcave serbe në Kosovë, thonë zyrtarët e NATO-s në Bruksel, duke reaguar ndaj letrës së kryeministrit Zoran Gjingjiq nëpërmjet së cilës ai kërkon kthimin e së paku 1000 ushtarëve dhe policëve serbë në Kosovë.

 

Në NATO theksojnë se nuk ekziston ndonjë marrëveshje me Beogradin e cila përmend kthimin e ushtrisë në Kosovë. Madje në marrëveshjen tekniko-ushtarake të nënshkruar në Kumanovë nuk përmendet kthimi i policëve dhe ushtarëve të uniformuar dhe të armatosur, por përfshihet vetëm mundësia e kthimit të limituar të personelit ushtarak dhe atij policor.

 

NATO-ja rikujton se çdo vendim që ka të bëjë me Kosovën merret pas shqyrtimit të rrethanave të sigurisë dhe pasojave të mundshme.

 

 

Trupi gjykues në Prizren pritet të shpallë sot dënimin kundër një serbi të akuzuar për krime lufte

 

Prizren, 3 shkurt 2003 - Trupi gjykues ndërkombëtar në Prizren pritet të shpallë sot verdiktin nga procesi gjyqësor kundër Angjellko Kollashinac të akuzuar për krime lufte në Kosovë.

 

Prokurori ndërkombëtar Tomas Hikman e ngarkonte Angjellko Kollashincin për pjesëmarrje në vrasje dhe deportime të shqiptarëve të Kosovës nga rrethi i Rahovecit në vitin 1999.

 

 

Ushtria jugosllave thotë se është e gatshme të kthehet në Kosovë

 

Beograd, 3 shkurt 2003 - Ushtria jugosllave është e gatshme në çdo moment të kthehet në Kosovë, në pajtim me rozolutën 1244 të KS të OKB-së, por kjo është çështje e pastër politike, ka deklaruar kryeshefi i Drejtorisë së Shtatmadhorisë së ushtrisë jugosllave, koloneli Nikolla Stojanvoiq.

 

Sipas Stojanoviqit tashmë është formuar një aradhë speciale e cila në bazë të gjendjes numerike, strukturës, pajisjes dhe armatimit u përgjigjet kushteve nga kjo rezolutë.

 

Kthimi është çështje e vlerësimeve të faktorëve ndërkombëtarë dhe kreut politik të shtetit, thotë Stojanoviq dhe thekson se ushtria jugosllave "do t'i kryejë me efikasitet obligimet".

 

 

Ushtria jugosllave thotë se është e gatshme të kthehet në Kosovë

 

Beograd, 3 shkurt 2003 - Ushtria jugosllave është e gatshme në çdo moment të kthehet në Kosovë, në pajtim me rozolutën 1244 të KS të OKB-së, por kjo është çështje e pastër politike, ka deklaruar kryeshefi i Drejtorisë së Shtatmadhorisë së ushtrisë jugosllave, koloneli Nikolla Stojanvoiq.

 

Sipas Stojanoviqit tashmë është formuar një aradhë speciale e cila në bazë të gjendjes numerike, strukturës, pajisjes dhe armatimit u përgjigjet kushteve nga kjo rezolutë.

 

Kthimi është çështje e vlerësimeve të faktorëve ndërkombëtarë dhe kreut politik të shtetit, thotë Stojanoviq dhe thekson se ushtria jugosllave "do t'i kryejë me efikasitet obligimet".

 

 

Në rajonin e Tetovës dhe të Gostivarit janë zbuluar 32 shtetase të huaja që merreshin me prostitucion

 

Tetovë/Gostivar, 3 shkurt 2003 - Ministria e Brendshme e Maqedonisë në një aksion të organizuar, në rajonin e Tetovës dhe të Gostivarit, në 12 lokale dhe bare nate, ka zbuluar 32 shtetase të huaja, viktima të trafikut njerëzor.

 

Zëdhënësja e kësaj Ministrie Mirjana Kontevska ka bërë të ditur se 6 shtetase të huaja janë gjetur në objektin hotelier "Kobra 2000", të cilat ilegalisht kanë kaluar kufirin midis Maqedonisë dhe Serbisë.

 

Ndërkaq në lokalin "Beli" janë gjetur 10 shtetase të huaja, ndërkaq në lokalin "Kristal" i cili gjendet gjithashtu në Tetovë janë gjetur 6 shtetase bullgare. Kontevska tha se kundër pronarëve të këtyre lokaleve janë ngritur akpadi.

 

 

Kryeministri i Serbisë kërkon kthimin e forcave serbe në Kosovë

 

Beograd, 3 shkur - Kryeministri i Serbisë Zoran Gjingjiq kërkon kthimin e forcave serbe në Kosovë. Në një letër dërguar komandantit të NATO-s për Evraopën Juglindore admiralit Gregori Xhonson ai shkruan se Rezoluta 1244 e KS të OKB-së parashikon kthimin e 1000 pjesëtarëve të policisë dhe ushtrisë serbe në Kosovë.

 

Gjingjiq kërkon që çështjet e sigurisë lidhur me transferimin e kompetencave nga ndërkombëtarët tek vendorët të bëhen në marrëveshje me Beogradin.

Me transferimin e pushtetit në duar të pushtetit lokal, sipas Gjingjiqit, pargjykohet statusi final i Kosovës. Bartja e komptencave të rëndësishme në institucionet lokale do të thotë defakto krijimi i pavarësisë së Kosovës, thotë Gjingjiq.

 

Ai më pas shkruan se nëse vlerësohet se janë krijuar kushtet për reduktimin e trupave të NATO-s, atëherë duhet thënë se janë krijuar kushtet për kthimin e forcave serbe.

 

Ai ka shfaqur shpresën se brenda disa muajve në lokalitetet ku banojnë serbët në Kosovë do të jetë i mundshëm kthimi i një kontigjenti të policisë dhe ushtarakëve serbë.

 

 

Në Shkup me një granatë dore janë plagosur tre serbë

 

Shkup, 3 shkurt 2003 - Policia e Maqedonisë njofton se janë plagosur 2 jugosllavë dhe një serb i Bosnjes gjatë një sulmi me granata dore ndaj banesës së tyre në Shkup në orët e djeshme të mëngjesit. Një zëdhënës i Ministris së Brendshme të Maqedonisë ka thënë se sulmi duket të jetë vepër kriminelësh, por nuk u qartësuan plotësisht rrethanat lidhur me këtë sulm.

 

 

In Memoriam - Istref Begolli (1933-2003)

 

Prishtinë, 3 shkurt 2003 - Të premtën më 31 janar pushoi së rrahuri zemra e aktorit tonë të madh Istref Begolli.

Istref Begolli ishte korife i skenës së teatrit tonë dhe krahas Abdurrahman Shalës, Shani Pallaskës e ndonjë tjetri, i takon plejadës së aktorëve më të shquar, emri i të cilët do të skalitet me shkronja të arta në historinë e teatrit të Kosovës.

Mund të thuhet se Istref Begolli ka qenë aktor i lindur, ngase nuk kishte kryer ndonjë shkollë profesionale as tjetër. Si 16 vjeçar ai do të hyjë në skenën atëherë të sapoformuar të Teatrit Popullor Krahinor (më 1949) dhe me ndërprerje të shkurta, aty edhe do ta përfundojë (pa dëshirën e tij) karrierën teatrore më 1990. Një kohë të shkurtër do të punojë në një teatër profesionist të Beogradit dhe një kohë ka qenë artist i lirë.

Në teatër ka luajtur mbi 100 role të ndryshme nga dramaturgjia shqiptare e botërore. T'i përmendim vetëm disa (nga dramat origjinale): "Erveheja", "Gjenerali i ushtrisë së vdekur", "Fosilet", "Shpend Sokoli i Soko Shpendit" e deri tek ato botërore: "Makbethi", "Othello", "Shtettrrethimi", "Cubat", "Ifigjenia në Aulidë", "Konfiteori" etj., ku ka realizuar kreacione të shkëlqyeshme.

 

Dramat më të njohura të dramaturgjisë botërore në Teatrin e Prishtinës u vunë në skenë nga regjisorët më të njohur jugosllavë, si Paro, Turbeshiq, Mijaç, Milçin etj.

Istref Begolli ndonëse jo me aq sukses si në teatër ka luajtur edhe në disa filma jugosllavë dhe të Kosovës.

Istref Begolli vdiq në një qendër rehablitimi në Kroaci, ndërkaq të shtunën më 1 shkurt u bë ceremonia e varrimit në varrezat e Prishtinës, vetëm në praninë e familjes, meqë kështu e kishte lënë amanet.

 

 

Gjenden trupat e disa astronautëve

 

Hjuston, 3 shkurt 2003 - Zyrtarët e NASA-s thonë se është ende e paqartë nëse ekipet e kërkimit kanë gjetur pjesë nga trupat e të 7 astronautëve.

 

Drejtori i fluturimeve të NASA-s kishte thënë më parë se ishin gjetur pjesë trupash nga të gjithë astronautët. Por më pas NASA njoftoi se nuk ishte e sigurtë për një gjë të tillë. Zyrtarët ende nuk i kanë identifikuar trupat e gjetur deri tani.

 

Zyrtarët përsëri u bënë thirrje njerëzve të mos prekin asnjë prej copave të anijes pasi ato mund të jenë të ndotura me elementë helmues. NASA u ka bërë thirrje njerëzve që gjejnë ndonjë copë të anijes të njoftojnë menjëherë auritetet.

 

 

Të martën zhvillohet ceremonia e përmortshme

 

Uashington, 3 shkurt 2003 - Shtëpia e Bardhë tha se presidenti Bush do të marrë pjesë të martën në shërbesën e përmortshme për ekuipazhin e anijes së hapësirës Kolumbia që do të zhvillohet në qendrën e hapësirës Johnson në Teksas.

Tragjedia, tha presidenti Bush, ka prekur të gjithë amerikanët. Të dielën presidenti Bush mori pjesë në shërbesat fetare në një kishë në Washington pasi bisedoi në telefon me familjet e 7 anëtarëve të ekuipazhit. Po ashtu ai bisedoi në telefon me kryeministrin e Indisë Atal Behari Vaxhpaii.

 

Një nga anëtarët e ekuipazhit ishte me origjinë nga India. Humbjen e anijes Kolumbia po e përjeton thellë edhe Izraeli. Gjatë tragjedisë humbi jetën edhe astronauti i parë i këtij vendi.

 

 

Bliks u ka bërë thirrje SHBA-ve që këtë javë të ofrojnë dëshmi bindëse për armët ilegale irakiane

 

Berlin, 3 shkurt 2003 - Kryeinspektori i Kombeve të Bashkuara për çarmatim Hans Bliks u ka bërë thirrje Shteteve të Bashkuara që këtë javë të ofrojnë dëshmi bindëse që i kanë për armët ilegale irakiane, thekson gazeta gjermane "Frankfurter algemajne cajtung".

"Presim dëshmi bindëse të cilat do të na mundësojnë të përcaktojmë vendet e caktuara", ka thën ëBliks në një intervistë dhënë gazetës gjermane, duke theksuar njëkohësisht se Iraku duhet të jetë më kooperativ na raport me inspektorët e KB që ndodhen në atë vend. "Nëse ata këtë nuk e bëjnë... atëherë nuk ka shpresë se çarmatimi mund të realizohet në mënyrë paqësore me ndihmën e inspektorëve", ka thënë Bliks.

 

Nëse Iraku bashkëpunon, inspektorëve u nevojiten "disa muaj" që deri në fund ta kryejnë punën, ka thënë ai.

 

 

Pauell thotë se të mërkurën do t'i prezentojë KS se Sadam Huseini po i fsheh armët e veta

 

Nju Jork, 3 shkurt 2003 - Presidenti irakian Sadam Husein po i fsheh armët e veta, kurse provat që dokumentojnë këtë do t'i prezentohon Këshillit të Sigurimit të KB-së të mërkurën, paralajmëroi sot sekretari amerikan i Shtetit Kolin Pauell.

 

"Do të ofrjmë prova se Sadami po i fsheh armët e veta për shkatërrim në masë", thekson Pauell për gazetën "Uollstrit xhornal".

 

"Bota patjetër duhet ta kuptojë se Iraku nuk respekton vullnetin e bashkësisë ndërkombëtare të shprehur në rezolutën 1441", thotë Pauell, i cili në komentet e tij për këtë gazetë thekson se të mërkurën do t'i dorëzojë Këshillit të Sigurimit të KB të dhënat amerikane të zbulimit që do të ofrojnë prova të mëtejshme se si Iraku po e fsheh të vërtetën nga inspektorët e KB.

 

 

NASA jep hollësi të reja rreth anijes Kolumbia

 

Hjuston, 3 shkurt 2003 - Agjencia amerikane e hapësirës ka ofruar hollësi të reja të problemeve teknike me të cilat është përballur anija kozmike Kolumbia, vetëm disa minuta para se të shkatërrohej në ajër, duke vrarë shtatë anëtarë të ekuipazhit.

Drejtori i programit hapësinor, Ron Dittemore, tha se ka patur rritje të temperaturës në anën e majtë të anijes në kohën kur po fillonte të zbriste drejt Kalifornisë.

Ai gjithashtu tha se anija përjetoi edhe tërheqje nga ana e majtë por kompjutorët në bord provuan ta rregullojnë këtë problem. Dittemore megjithatë kërkoi durim derisa të mos kryhen të gjitha hetimet.

 

 

Rusia dërgon ndihma në Stacionin Hapësinor

 

Moskë, 3 shkurt 2003 - Rusia ka lansuar një raketë në hapësirë me ushqim, derivate dhe oksigjen për tre astronautët në stacion.

Raketat ruse Sojuz, kanë mundësinë që të dërgojnë në hapësirë si ndihma ashtu edhe njerëz por Rusia ka vetëm dy raketa të tilla në përdorim.

 

 

Arrestime antiterroriste në Greqi

 

Athinë, 3 shkurt 2003 - Policia greke ka bërë të ditur arrestimin e tre personave që thuhet të jenë ndër drejtuesit e organizatës më të hershme guerrile në Greqi, me emrin Lufta Popullore Revolucionare.

 

Policia thotë se në ditët e ardhshme priten edhe arrestime të tjera lidhur me këtë organizatë, si dhe me degëzime të saj.

 

Sipas autoriteteve, kjo është faza e dytë e operacionit kundër terrorizmit në Greqi, që filloi gjatë verës së kaluar me arrestimin e një numri personash që akuzohen se janë pjesëtarë të organizatës më të njohur guerrile vendase, 17 nëntori.

Zëdhënësi i policisë greke bëri të ditur se janë arrestuar me akuzën për pjesëmarrje në organizatë terroriste tre persona, dy meshkuj e një femër, të moshës nga 49 deri në 55 vjeç.

 

 

Partia e Shrëderit humb në zgjedhjet vendore

 

Berlin, 3 shkurt 2003 - Partia Social Demokrate e kancelarit gjerman Gerhard Shrëder pësoi një humbje të thellë në zgjedhjet vendore të së djelës duke mos arritur të fitojë në shtetin e Saksonisë së Poshtme nga është vetë kancelari si dhe në shtetin fqinj të Hesit.

Rezultatet përfundimtare tregojnë se kristian-demokratët fituan 48 përqind të votave në Saksoninë e Poshtme ndërsa social-demokratët 33 përqind. Në shtetin e Hesit, kristian-demokratët fituan 49 përqind të votave ndërsa social-demokratët vetëm 29 përqind.

Analistët thonë se humbja e zotit Shroeder pasqyron mungesën e besimit të votuesve për politikat ekonomike të qeverisë, megjithëse qëndrimi i tij kundër luftës me Irakun gëzon popullaritet të madh në Gjermani dhe e ndihmoi atë në shtator të rizgjidhej si kancelar.

 

 

Iraku mund të bëjë lëshime gjatë vizitës së kryeinspektorit Hans Bliks

 

Bagdad, 3 shkurt 2003 - Iraku tha se dëshiron të zgjidhë gjithë problemet e pasqaruara me kryeinspektorin e OKB-së për armët Hans Bliks gjatë vizitës së tij në Irak këtë javë.

 

Por gjenerali Hossam Mohamed Amin tha se Iraku mund ta respektojë kërkesën e OKB-së për fluturime të avionëve spiunë mbi territorin e vendit të tij vetëm në se Shtetet e Bashkuara dhe Britania ndërpresin patrullimet mbi zonat e ndaluara për fluturime në Irak.

Gjenerali irakian i ngarkuar nga qeveria e tij për të mbajtur lidhjet me inspektorët tha po ashtu se Iraku nuk mund t’i detyrojë shkencëtarët e tij t’u japin intervista private inspektorëve të OKB-së.

 

 

Qeveria amerikanë do të ndërmarrë hetime për shkaqet e tragjedisë së anijes Kolumbia

 

Uashington, 3 shkurt 2003 - Qeveria e Shteteve të Bashkuara do të ndërmarrë hetime të trefishta paralele për caktimin e shkaqeve të tragjedisë së anijes së Gjithësisë, Kolumbia ku humbën jetën shtatë astronautë.

Kryetari i Komitetit për Shkencë pranë Dhomës Përfaqësuese, Sherwood Boehlert tha se NASA dhe Kongresi i Shteteve të Bashkuara duhet të punojnë bashkërisht që të sigurojnë hetime më të plota të mundshme.

NASA njofton se fluturimet në Gjithësi do të shtyhen derisa të vërtetohen shkaqet e sakta për katastrofën e Kolumbias.

 

 

Mbi 3.000 bomba dhe raketa të dirigjuara do të derdheshin mbi ushtrinë irakiane në 48 orët e para

 

Uashington, 3 shkurt 2003 - Në planet e Shteteve të Bashkuara për luftë të mundshme në Irak, mbi 3.000 bomba dhe raketa të dirigjuara do të derdheshin mbi ushtrinë irakiane në 48 orët e para, duke hapur rrugën për sulme tokësore nga jugu dhe veriu i Irakut, shkruan gazeta "Nju Jork tajms".

 

 

Nga një shpërthim i fuqishëm 40 të vrarë

 

Lagos, 3 shkurt 2003 - Një shpërthim i fuqishëm ka rrënuar një ndërtesë katërkatëshe në kryeqytetin e Nigerisë, ku ndodhej edhe një bankë, duke lënë së paku 40 të vrarë dhe mjaftë të plagosur.

Policia spekulonë se shpërthimi mundë të jetë kurdisur edhe për vjedhjen e bankës.

 

 

Në Kinë në një hotel kanë humbur jetën 33 njerëz

 

Pekin, 3 shkurt 2003 - Nga zjarri që ka shpërthyer në një hotel në qytetin Harbin të Kinës kanë humbur jetën 33 njerëz, njofton agjencia qeveritare e lajmeve, Xinhua.

 

 

Është vrarë shefi i policisë së një distrikti të Groznit

 

Vladikaukaz/Rusi, 3 shkurt 2003 - Në Çeçeni është vrarë shefi i policisë së një distrikti të Groznit, kur vetura e tij ka shkelur në minë, njoftojnë zyrtarë të administratës pro-moskovite.

Zyrtari anonim ka thënë se në sulme dhe konfrontime me kryengritës çeçenë në harkun e fundit kohorë janë vrarë 4 ushtarë rus, kurse 12 janë plagosur.

 

 

Havel largohet nga posti i Presidentit

 

Pragë, 3 shkurt 2003 - Vaclav Havel, shkrimtari disident dhe lideri anti-komunist i cili pat ndihmuar për rrënimin e Perdes së Hekurt në Evropën Lindore, sot u nda nga posti pas 13 vitesh si president i Republikës Çeke.

Havel falenderoi bashkëkombasit në një fjalim për besimin që i patën dhënë dhe uroi që sa më parë të zgjedhin pasardhësin e tij.

Copyright©2000-2003 Trepca.net - Të gjitha të  drejtat e rezervuara.