Lajme

E shtune, 1 shkurt 2003

Përmbajtja:

• Në Kosovë do të mbesin rreth 15 -17 mijë forca të NATO-s

• Dy shqiptarë nga Vitia akuzohen si pjesëtarë të AKSH-së

• U graduan 49 pjesëtarë të Shërbimit Policor të Kosovës

• Server: SHBA-të të qëndrojnë në Kosovë derisa të zgjidhet e ardhmja e saj

• Njësiti i Ushtrisë shqiptare do të përfshihet së shpejti në trupat e koalicionit botëror kundër regjimit irakien

• Shqipëria nënshkroi marrëveshjen për hapjen e negociatave me Bashkimin Evropian

• Ndihmëssekretarët e Departamentit amerikan thanë se Maqedonia duhet shënuar përparim drejt bashkimit me NATO-n

• Misioni i trupave evropiane në Maqedoni pritet të zgjasë 6 muaj dhe është i ngjashëm me atë të NATO-s

• Komesioneri evropian për çështje humanitare thotë se emergjenca në Maqedoni ka përfunduar

• Ushtarët izraelitë kanë vrarë sot një pelestinez 19-vjeçar

• Tetë 8 vetë kanë humbur jetën dhe qindra të tjerë janë plagosur në përleshjet e sotme në Bangladesh

• Të pakten 30 vetë kanë humbur jetën në një përplasje trenash në Zimbabve

• Turqia kërkon rritjen e kërcënimeve ushtarake ndaj Irakut

• Bagdadi nuk garanton sigurinë e aeroplanëve vëzhgues të Kombeve të Bashkuara

• Athina për mbajtjen e një konference evropiane

• Protesta në Pragë kundër luftës në Irak

• Shtëpia e Bardhë i ka tërhequr vëmendjen Koresë së Veriut

• OBSH: Kujdes lidhur me kërcënimet terroriste ndaj ushqimit

• Bush: Sadami "nuk po çarmatoset"

Në Kosovë do të mbesin rreth 15 -17 mijë forca të NATO-s

Prishtinë, 1 shkurt - Zyrtarët e KFOR-it thanë se sipas komandantit të forcës paqeruajtëse Fabio Mini deri në fund të vitit në Kosovë do të mbesin rreth 15 -17 mijë forca të NATO-s. Zëdhënësi i KFOR-it Antoni Adams tha se kjo do të ndodhë në qoftë se në Kosovë vazhdon klima e mirë e sigurisë.

"Ne aktualisht kemi rreth 30 mijë ushtarë dhe numrat do të varen nga ambienti i mirë i sigurisë. Kjo do të thotë se nëse vazhdon kjo situatë nuk na nevojiten kaq shumë trupa, pasi detyrat tona do t'ia transferojmë policisë së UNMIK-ut, Shërbimit Policor të Kosovës dhe autoriteteve civile", tha majori Adams.

 

 

Dy shqiptarë nga Vitia akuzohen si pjesëtarë të AKSH-së

 

Gjilan, 1 shkurt - Një prokuror ndërkombëtar në Gjilan ka ngritur aktakuzën kundër dy shqiptarëve nga komuna e Vitisë - Naser Azemi dhe Gazmend Zeqiri - të cilët aktakuza i ngarkon për terrorizëm, grumbullim të armëve, rekrutim të anëtarëve për AKSH-në (Armata Kombëtare Shqiptare) dhe për nxitjen e urrejtjes raciale.

Në aktukuzë thuhet se këta dy shqiptarë i takojnë grupit të armatosur të AKSH-së, e cila vepron në Kosovë dhe në Maqedoni. Sipas aktakuzës, Gazmend Zeqiri ka deklaruar se është një nga komandantët e AKSH-së. Këta dy janë arrestuar para më shumë se gjashtë muajve dhe mbahen në paraburgim.

 

 

U graduan 49 pjesëtarë të Shërbimit Policor të Kosovës

 

Prishtinë, 1 shkurt - Me një ceremoni solemne në Prishtinë u graduan 49 pjesëtarë të Shërbimit Policor të Kosovës, 46 rreshterë dhe tre kapiten. Në këtë ceremoni morën pjesë udhëheqës vendorë dhe ndërkombëtarë.

 

Përfaqësuesi i shtyllës së parë të UNMIK-ut Zhan Kristian Kadi pasi përshëndeti SHPK-në për punën dhe profesionalizimin e saj, vlerësoi se ky është edhe një hap tjetër drejt transferimit të kompetencave të plota dhe avancimit të SHPK-së.

Ndërkaq, kolonel Sheramet Ahmeti tha se me ngritjen e numrit të pjesëtarëve të SHPK-së, i cili tash është mbi 5000, si rezultat i punës së tyre bëhet edhe gradimi në mënyrë që të formohen strukturat komannduese dhe që vetë kosovarët t'i udhëheqin stacionet policore.

 

 

Server: SHBA-të të qëndrojnë në Kosovë derisa të zgjidhet e ardhmja e saj

 

Uashington, 1 shkurt - Drejtori i Studimeve për Ballkanin, në Institutin Amerikan të Paqes, Daniel Server thotë se Shtetet e Bashkuara duhet të vazhdojnë të jenë të pranishme në Kosovë, derisa të merret vendimi për statusin e saj përfundimtar. Në një intervistë për "Zërin e Amerikës", Server tha se respektimi i të drejtave të serbëve dhe pakicave të tjera, është vendimtar për të ardhmen e Kosovës.

 

Ai foli gjithashtu edhe për gjendjen e rëndë të krimit të organizuar në Ballkan.

Në pyetjen se a meritojnë shqiptarët në Kosovë më shumë kompetenca dhe përgjegjësi, Server tha se mendonte se do të ishte mirë për ta që të kishin më shumë kompetenca. "Besoj se Kombet e Bashkuara kanë në plan t'u japin më shumë përgjegjësi institucioneve vetëqeverisëse".

Ndërkaq, lidhur me krimin e organizuar në Ballkan, z. Server mendon se gjendja është shumë serioze dhe në vend që të përmirësohet, po përkeqësohet. Lufta ndaj krimit të organizuar është një nga sfidat më të mëdha në Ballkan dhe kjo çështje do të vazhdojë të paraqesë interes për Shtetet e Bashkuara.

 

Server tha se në rajon ka një rrjet të zgjeruar të krimit të organizuar, që shkon përtej përkatësive etnike. Në këtë rrjet bëjnë pjesë gjithashtu segmente të errëta të regjimeve të kaluara, si ai i Millosheviçit, njerëz në Bosnje që janë kundër marrëveshjes, njerëz në Kosovë që mund të kenë patur lidhje me luftën guerilase, si edhe në Maqedoni.

"Unë mendoj se gjithkush duhet ta kuptojë se Shtetet e Bashkuara nuk duan të kenë miq mashtrues. Shtetet e Bashkuara kanë nevojë për qeveri të ndershme në gjithë Ballkanin, që të kenë vullnetin të luftojnë kriminalitetin kudo që shfaqet", thotë Daniel Server.

 

 

Njësiti i Ushtrisë shqiptare do të përfshihet së shpejti në trupat e koalicionit botëror kundër regjimit irakien

 

Tiranë, 1 shkurt - Një njësit i ushtrisë shqiptare do të përfshihet së shpejti në trupat e koalicionit botëror kundër regjimit irakien. Këtë e bëri të ditur ambasadori i SHBA-ve në Tiranë Xhejms Xhefri gjatë një konfrence të Shoqatës Shqiptare të Atlantikut Verior që u zhvillua dje në Tiranë, në të cilën mori pjesë edhe presidenti i Shqipërisë Alfred Moisiu.

Shtetet e Bashkuara të Amerikës u janë shumë mirënjohëse Shqipërisë për bashkëpunimin ushtarak, tha ambasadori Xhefri. Pikërisht forcat amerikane tani po stërvitin ushtarakët shqiptarë, duke kryer ushtrime shumë domethënëse këto njësi shumë shpejt mund të dislokohen në Gjirin Persik ku do t'i zbatojnë këto stërvitje në realitet tha ai.

 

Ambasadori amerikan premtoi se Shtetet e Bashkuara do të mbështesin fuqimisht anëtarësimin e Shqipërisë në NATO gjatë Samitit të ardhshëm të Aleancës Veriatlantike.

Ndërkaq, presidenti i Shqipërisë Alfred Moisiu pohoi mbështetjen shqiptare SHBA-ve në konfliktin ndaj regjimit irakien, ndërkaq kërkoi përshpejtimin e procesit të anëtarësimit në NATO. Ai tha se pas disa ditësh përfaqësuesit e Shqipërisë, Kroacisë dhe Maqedonisë do të bisedojnë në Tiranë një strategji rajonale të integrimit në Aleancë.

 

 

Shqipëria nënshkroi marrëveshjen për hapjen e negociatave me Bashkimin Evropian

 

Tiranë, 1 shkurt - Shqipëria dhe Bashkimi Evropian nënshkruan dje edhe zyrtarisht marrëveshjen për hapjen e negociatave të asociim-stabilizimit. Kjo marrëveshje u nënshkrua në Tiranë nga presidenti i Komisionit Evropian Romano Prodi dhe kryeministri shqiptar Fatos Nano.

 

"Kjo marrëveshje konsiderohet si hap i parë drejt anëtarësimit të mundshëm të Shqipërisë në BE si anëtare me të drejta të plota", tha z. Prodi dhe shtoi se kjo ditë shënon një fazë të re për historinë e Shqipërisë, por edhe në atë të BE-së.

Megjithatë z. Prodi tha se që të arrihet marrëveshja, duhen shumë përpjekje dhe punë. Ai shtoi se BE do të kërkojë nga autoritetet shqiptare të plotësojnë një numër angazhimesh gjatë negociatave, siç janë: lufta kundër krimit të organizuar e trafiqeve, funksionimi i shtetit ligjor, përmirësimi i sistemit gjyqësor dhe zgjidhja e çështjes së pronës.

Me këto kërkesa u dakordua edhe kryeministri Fatos Nano, i cili marrëveshjen për negociata me BE-në e quajti një ngjarje historike për Shqipërinë.

Presidenti i Komisionit Evropoian Romano Prodi iu drejtuar me një fjalim deputetëve shqiptarë dhe me këtë rast tha se parlamenti ka përgjegjësinë për të transformuar vendin në një shtet ku funksionon demokracia, të nxisë një sjellje konstruktive mbi temat e mëdha të integrimit dhe të identifikojë çështjet me interes kombëtar.

 

 

Ndihmëssekretarët e Departamentit amerikan thanë se Maqedonia duhet shënuar përparim drejt bashkimit me NATO-n

 

Shkup, 1 shkurt - Ndihmëssekretarët e Departamentit amerikan të Shtetit Xhenet Boug dhe Robert Bratke biseduan dje me autoritetet e larta shtetërore në Shkup mbi çështjet politike dhe të mbrojtjes. Zyrtarët e lartë maqedonas u thanë përfaqësuesve të Departamentit të Shtetit se po bëhen hapa pozitiv drejt uljes së kriminalitetit dhe zbatimit të Marrëveshjes së Ohrit.

Zyrtarët e lartë amerikanë thanë para gazetarëve se Kryeministri dhe Presidenti maqedonas kishin shprehur shqetësimet e tyre se si duhet vepruar për shumë çështjesh, si kriminaliteti i organizuar në radhë të parë dhe për të bërë hapa pozitiv në këtë drejtim.

 

Ndihmësja e zëvendëssekretarit amerikan të Shtetit për çështjet evropiane dhe evroaziatike Xhenet Boug tha se Shtetet e Bashkuara dëshirojnë të bashkëpunojnë me Maqedoninë si në rrafshin e zhvillimit ekonomik po ashtu edhe për zbatimin e Marrëveshjes së Ohrit.

Të dy zytarët amerikanë shprehën mbështetjen e tyre duke pohuar se qëllimi i SHBA-ve është që Maqedonia të bëhet sa më shpejt anëtare e NATO-s.

 

 

Misioni i trupave evropiane në Maqedoni pritet të zgjasë 6 muaj dhe është i ngjashëm me atë të NATO-s

 

Shkup, 1 shkurt - Mandati i trupave evropiane në Maqedoni pritet që të jetë 6 muaj dhe misioni do të jetë i ngjashëm me atë aktual të NATO-s "Harmonia aleate", tha dje në Shkup Rejnar Feist, i cili pritet të emërohet komandant i trupave evropiane dhe që aktualisht gjendet në postin e zëvendëskomandantit të NATO-s për Evropën. Sipas z. Fiest BE do të dëshironte që komandën e Misionit nga NATO ta marrë nga mesi i muajit mars të këtij viti.

 

 

Komesioneri evropian për çështje humanitare thotë se emergjenca në Maqedoni ka përfunduar

 

Bruksel, 1 shkurt - Zyra e Komisionit Evropian që merret me ndihmat humanitare do të përbyllë aktivitetin e saj në Maqedoni në pranverën e ardhshme. Komesioneri evropian për çështje humanitare, Pol Nilson tha se emergjenca në Maqedoni ka përfunduar dhe misioni i zyrës në këtë vend është përmbushur.

 

 

Ushtarët izraelitë kanë vrarë sot një pelestinez 19-vjeçar

 

Qyteti Gaza, 1 shkurt - Trupat izraelite kanë vrarë sot një palestinez të armatosur në Rripin e Gazës dhe kanë imponuar orën policore në qytetin Hebron të Bregut Perëndimor.

Një burim ushtarak izrealit thotë se ushtarët kishin vërejtur palestinezin e armatosur duke iu afruar kufirit me Egjiptin afër qytetit Rafah.

Fronti Demokratik për Çlirimin e Palestinës ka identifikuar të vrarin si një 19-vjeçar, anëtar i grupit të tij, i cili ka kryer sulme në Izrael gjatë kryengritjes 28 muajshe.

 

 

Tetë 8 vetë kanë humbur jetën dhe qindra të tjerë janë plagosur në përleshjet e sotme në Bangladesh

 

Daka, 1 shkurt – Të pakten 8 vetë kanë humbur jetën dhe qindra të tjerë janë plagosur në përleshjet e sotme (të së shtunës) ndërmjet grupeve rivale me rastin e zgjedhjeve vendore komunale në Bangladesh, që filluan më 25 janar, njofton Rojter.

 

Afër 200 mijë kandidatë kandidojnë oër 4.200 këshilla komunale, që pritet të përfundojnë më 16 mars. Deri tash zgjedhjet janë kryer në njëmijë këshilla, ka thënë një zyrtar i komisionit zgjedhor. Policia ka thënë se ka arrestuar mbi 200 veta pjesëmarrës në këto trazira në gjithë vendin.

 

 

Të pakten 30 vetë kanë humbur jetën në një përplasje trenash në Zimbabve

 

Harare, 1 shkurt – Të pakten 30 vetë kanë humbur jetën dhe disa të tjerë janë lënduar pasi një tren udhëtarësh, që udhëtonte në drejtim të qytetit zimbabvian Viktoria, është përplasur me një tren mallrash, njofton Rojter. Aksidenti ka ndodhur sot (të shtunën), rreth orës 3:00 sipas kohës lokale. Ekipet e shpëtimit po bëjnë çmos për të nxjerrë të lënduarit nga trenat.

 

 

Turqia kërkon rritjen e kërcënimeve ushtarake ndaj Irakut

 

Ankara, 1 shkurt - Turqia ka kërkuar rritjen e kërcënimeve ushtarake ndaj Irakut si mënyrë për të nxitur bashkëpunimin e Bagdadit me inspektorët e Kombeve të Bashkuara.

Ministri i jashtëm turk, Jasar Jakis, ka thënë se zgjidhja paqësore e krizës irakiane vjen vetëm nga rritja e presioneve ushtarake.

"Nëse ulemi dhe i themi Sadam Huseinit dhe udhëheqjes irakiane se nuk keni përmbushur rezolutën e Këshillit të Sigurimit, dhe thjesht të presim që ata të bëjnë një gjë të tillë, kjo është një rrugë që nuk do ketë asnjë efekt. Në të kundërt nëse rritet presioni ushtarak rreth Irakut atëherë Bagdadi do të mund të jetë i shtrënguar për zgjidhje paqësore", tha Jakis.

 

 

Bagdadi nuk garanton sigurinë e aeroplanëve vëzhgues të Kombeve të Bashkuara

 

Bagdad, 1 shkurt - Një zyrtar i lartë irakiann ka bërë të ditur se qeveria e tij nuk mund të garantojë sigurinë e aeroplanëve vëzhgues të Kombeve të Bashkuara derisa aeroplanët amerikanë dhe britanikë qarkullojnë në zonën e ndalim-fluturimit.

 

Sipas zyrtarit iraken kjo është arsyeja që nuk po i lejohet inspektorëve ushtrimi i kontrollit nga ajri.

 

 

Athina për mbajtjen e një konference evropiane

 

Athinë, 1 shkurt - Greqia, e cila ka kryesinë e radhës së Bashkimit Evropian, ka njoftuar për mbajtjen e një takimi mes vendeve evropiane, për të diskutuar mbi qëndrimet e ndryshme lidhur me krizën irakene.
Gjermania ka mirëpritur idenë e takimit dhe ka bërë të ditur se kancelari gjerman Shrëder do të marrë pjesë në takime të tilla.

 

 

Protesta në Pragë kundër luftës në Irak

 

Pragë, 1 shkurt - Protesta kundër një lufte të mundshme në Irak kanë nxjerrë në rrugë demonstrues në tre qytete evropiane, Gjenevë, Lubjanë dhe Berlin.

Ata kanë protestuar kundër carmatimit me forcë të Irakut.

 

 

Shtëpia e Bardhë i ka tërhequr vëmendjen Koresë së Veriut

 

Uashington, 1 shkurt - Shtëpia e Bardhë ka tërhequr vëmendjen e Koresë së Veriut që të mos marrë hapa provokues, që mund të çojnë drejt prodhimit të bombës me plutonium nga ana e Penjanit.

Zëdhënësi i Shtëpisë së Bardhë, Ari Fleischer, tha se veprime të tilla do të thellonin izolimin e Koresë së Veriut nga bashkësia ndërkombëtare.

 

 

OBSH: Kujdes lidhur me kërcënimet terroriste ndaj ushqimit

 

Gjenevë, 1 shkurt - Organizata Botërore e Shëndetësisë (OBSH) ka kërkuar nga qeveritë të jenë të kujdesshme lidhur me kërcënimet terroriste ndaj ushqimit. Sipas kësaj organizate ekziston mundësia e helmimit të qëllimshëm të ushqimeve me synime terroriste. Kjo u bë e ditur në një raport të publikuar gjatë ditës.

 

 

Bush: Sadami "nuk po çarmatoset"

 

Uashington, 1 shkurt - Pas një takimi në Uashington me kryeministrin britanik, Toni Bler, presidenti amerikan Xhorxh Bush tha se është e qartë që udhëheqësi irakian, Sadam Husein nuk po çarmatoset.Z. Bush tha se zgjidhja e kësaj çështje është punë javësh, jo muajsh.

 

"Sadam Huseini nuk po çarmatoset. Ai përbën rrezik për botën dhe duhet të çarmatoset. Pikërisht për këtë, unë dhe kryeministri e kemi thënë se kjo çështje do të zgjidhet brenda javësh, jo brenda muajsh," tha ai.Z. Bush shtoi se një rezolutë e re e Kombeve të Bashkuara rreth Irakut, do të jetë e mirëpritur nëse dërgon një sinjal të pagabueshëm se komuniteti ndërkombëtar kërkon ta çarmatosë Bagdadin.

Ndërkaq, Z. Bler tha se ka ardhur koha që Irakut t'i bëhet me dije se është e papranueshme që ai nuk po çarmatoset. Z. Bler tha se bota po përballet me dy çështje të vështira: terrorizmin ndërkombëtar dhe armët e shkatërrimit në masë dhe me kërcënimin se këto të dy rreziqe do të bëhen bashkë.

 

"Është esenciale në çdo aspekt, me çdo mënyrë që mundemi, të mobilizojmë mbështetjen në komunitetin ndërkombëtar për t'u siguruar që këto dy kërcënime binjake të përballohen. Terrorizmi dhe armët e shkatërrimit në masë, janë të lidhura. Dhe përballimi i tyre është esencial për paqen, sigurinë dhe përparimin në botë në të ardhmen", theksoi zoti Bler.

Copyright©2000-2003 Trepca.net - Të gjitha të  drejtat e rezervuara.