Lajme

E enjte, 30 janar 2003

Përmbajtja:

• Qentë endacakë mbysin një djalosh 7-vjeçar në fshatin Vojnik të Skënderajt

• Shtajner: Dorëzimi i pushtetit në Kosovë nuk do të ndodhë menjëherë, por gradualisht

• Pejë: Shtajner është i impresionuar me profesionalizmin e policëve ndërkombëtarë dhe vendorë

• Zgjedhen drejtorët e shkollave të mesme të Kosovës

• Disa ish-policë serbë dhe ekstremistë nga "Rojet e urës" kanë fillur aftësimin për policë të Kosovës?!

• Administrata Tatimore thotë se nuk duhet të ketë paqartësi rreth shkallës tatimore

• Papunësia në Kosovë do të mund të zbutet vetëm nëse çdo vit hapen 25-30 mijë vende të reja pune

• Qeveria e Kosovës kundërshton fuqishëm përfshirjen e Kosovës në Kartën Kushtetuese serbo-malazeze

• Ministri i Jashtëm shqiptar Ilir Meta vizitoi Plavën dhe Gucinë

• Moisiu: Shqipëria e gatshme të mbështesë SHBA me çdo mënyrë

• Forcat e BE-së do të marrin nga NATO misionin paqeruajtës në Maqedoni nga mesi i marsit

• Ambasadori i OSBE-së në Beograd vizitoi Preshevën

• Parlamenti malazez miratoi Kartën Kushtetuese të Unionit Serbi-Mali i Zi - deputetët shqiptarë votuan kundër saj

• Kryeministri serb Gjingjiq ka kërkur që serbët e Kosovës të kenë të drejtën të jenë element konstitutiv

• L. Batler: Lufta në Maqedoni ka përfunduar dhe nuk do të ketë ofensivë në pranverë

• Forcat izraelite kanë bërë një depërtim në Bregun Perendimor në kërkim të militantëve

• Kleriku disident i Iranit, Ajatollah Hysein Ali Montazeri, është liruar nga burgu shtëpiak

• Antarët e Këshillit të Sigurimit janë shprehur për vazhdimin e kontrollit të armatimit në Irak

• Pentagoni ka konfirmuar njoftimet se në veri të Irakut ndodhen ushtarët amerikanë

• Tre vetë vdiqën nga një shpërthim që ndodhi në fabrikën farmaceutike në Karolinën Veriore

• Aeroplanët amerikanë mund të shfrytëzojnë bazat ushtarake italiane

• Thirrje Evropës që të bashkohet rreth amerikanëve

• Bler e Berluskoni shkojnë në Uashington

• Iraku akuzon kryeinspektorin Bliks

• ShBA: Demokratët mbështesin përpjekjet e presidentit në luftën kundër terrorizmit

• Shtëpia e Bardhë: Gjendja e nderë me Irakun po hyn në "etapën finale"

• Iraku shpreson për paqe

• Asambleja e BE-së ka filluar debatin lidhur me krizën irakiane

• Palestinezët e brengosur pas zgjedhjeve në Izrael

Qentë endacakë mbysin një djalosh 7-vjeçar në fshatin Vojnik të Skënderajt

 

Skënderaj, 30 janar 2003 - Në fshatin Vojnik të Skënderajt një tufë qensh endacakë e kanë mbytur një djalosh 7-vjeçar, Valmir Beqirin. Pas kafshimeve të qenve Valmiri vdes në vend. Trupi i tij i pajetë i Valmirit është dërguar për obduksion në Rahovec.

 

 

Shtajner: Dorëzimi i pushtetit në Kosovë nuk do të ndodhë menjëherë, por gradualisht

 

Londër, 30 janar 2003 - Kryeadministratori i Kosovës, Mihael Shtajner, tha se ndërtimi i paqes dhe institucioneve në situata të pasluftës është i mundur, por se kjo mund të arrihet vetëm atëhere kur ekziston një mbështetje e fortë dhe një pozitë e unifikuar e bashkësisë ndërkombëtare. Zoti Shtajner i bëri këto komente në emisionin e njohur të kanalit televiziv të BBC-së, News 24, Hard Talk.

I pyetur se kur duhet dorëzuar pushteti politikanëve vendas, Shtajner tha se "dorëzimi i pushtetit nuk do të ndodhë menjëherë por gradualisht", duke thënë se politika e jashtme dhe siguria janë përgjegjësi e tij. Por ai paralajmëroi se edhe këto përgjegjësi do t'u kalohen udhëheqësve vendas.

 

"Ky do të jetë procesi, dhe vitin e ardhshëm kur kemi të bëjmë me buxhetin, parlamenti do të ketë pjesëmarrje më të madhe, ndërsa në fund të gjitha përgjegjësitë do t'u kalojmë atyre", thotë Shtajner.
Duke folur lidhur problemit të Mitrovicës Shtajner tha:

"Ne ende jemi larg arritjes së bashkimit të Mitrovicës, por ne jemi atje dhe kemi marrë veriun dhe ne tashmë e administrojmë atë. Marrëveshja me Beogradin ka qenë që ai të ndërprejë çdo mbështetje për rojet e urës, pasi të kemi arritur ne atje. Beogradi e bëri këtë dhe unë jam i lumtur për këtë".

 

 

Pejë: Shtajner është i impresionuar me profesionalizmin e policëve ndërkombëtarë dhe vendorë

 

Pejë, 30 janar - Kryeadministratori i Kosovës Mihael Shtajner ka vizituar sot qytetin e Pejës. Fillimisht Shtajner ka vizituar zyrën e policisë së UNMIk-ut në Pejë, e cila ditë më parë u sulmua me një predhë nga persona të panjohur dhe me atë rast ka biseduar me stafin udhëheqës të Policisë UNMIK-ut dhe SHPK-së lidhur me hetimet që po zhvillohen për këtë incident.

Shtajner u deklaroi gazetarëve se është i impresionuar me profesionalizmin e policëve ndërkombëtarë dhe vendorë, duke thënë se aty mbretëron një frymë dhe shpirt për ta luftuar krimin. Shtajneri pasi bëri një sheti nëpër çarshinë e Pejës, u takua me punëtorët e kulturës dhe të disa organizatave joqeveritare që veprojnë në Pejë.

 

 

Zgjedhen drejtorët e shkollave të mesme të Kosovës

 

Prishtinë, 30 janar 2003 - Nga 140 kandidatë sa kanë konkurruar për drejtorë të shkollave të mesme në Kosovë, 47 janë prej tyre zgjedhur, 30 janë riemëruar, ndërsa 17 janë drejtorë të rinj, njoftoi ministri i Arsimit, Rexhep Osmani. Ndërka në 27 shkolla do të përsëritet konkursi për shkak të mosparaqitjes së kundërkandidatëve.

 

Zgjedhja e drejtorëve të shkollave të mesme është bërë në bazë të Ligjit për arsimin e mesëm e fillor, tha ministri Osmani dhe hodhi poshtë pohimet se Kryeministria nuk i pranon këto zgjedhje, duke i quajtur këto si spekulime dhe obstruksione. Osmani hodhi poshtë edhe spekulimet se drejtorët janë zgjedhur sipas përkatësisë partiake.

 

 

Disa ish-policë serbë dhe ekstremistë nga "Rojet e urës" kanë fillur aftësimin për policë të Kosovës?!

 

Mitrovicë, 30 janar 2003 - Disa ish-policë serbë nga Kosova, por edhe ekstremistë serbë nga të ashtuquajturat "Rojet e urës" kanë filluar trajnimin për policë të Kosovës në Akademinë policore në Vushtrri, citojnë mediat lokale burimet e UNMIK-ut.

Zëdhënësi i UNMIK-ut në Mitrovicë Xhorxhi Kakuk, ndërkaq thotë se nuk është në dijeni rreth kësaj çështjeje dhe nuk e di nëse ish-pjesëtarët e "Rojeve të urës" janë duke u aftësuar për policë në Vushtrri. Ai thekson se nuk mund të aftësohen për policë ata që kanë histori kriminale.

Ndërkaq, një zëdhënës tjetër i policisë ndërkombëtare në Mitrovicë Soxhi Dou ka konfirmuar se në Akademinë policore në Vushtrri kanë filluar aftësimin disa ish-policë serbë. "Eshtë e vërtetë se aktualisht ne kemi disa rekrutë për aftësim në Vushtrri, të cilët kanë eksperiencë policore", tha ai, por ata që verifikohen se kanë histori kriminale, duhet të largohen menjëherë nga ky aftësim për policë, thotë ky zëdhënës.

Ndërkaq, Vlladimir Rakiq, përfaqësues politik i "Rojeve të urës" i konfirmoi një radioje lokale se disa pjesëtarë të këtij formacioni kanë filluar aftësimin në Vushtrri.

 

 

Administrata Tatimore thotë se nuk duhet të ketë paqartësi rreth shkallës tatimore

 

Prishtinë, 30 janar 2003 - Nuk duhet të ketë kurrëfarë paqartësi rreth shkallës tatimore, që duhet përllogaritur për punëtorët në tre muajt e parë, thonë në Administratën Tatimore të Kosovës.

Këshilltari në këtë administratë, Florian Mima, thotë se tatimi i paguar padrejtësisht më pak, apo më shumë në tre muajt e parë për shkak të përllogaritjes së vitit të kaluar, do të barazohet në vazhdim.

 

Ai theksoi se duhet të kihet parasysh se ky tatim është tatim vjetor dhe nëse në ndonjë muaj të caktuar ndalet më shumë ose më pak, tatimi vjetor përfundimtar do të jetë në përputhje me rregulloren e re të nënshkruar nga përfaqësuesi special i sekretarit të përgjithshëm të OKB-së z. Mihael Shtajner.

 

 

Papunësia në Kosovë do të mund të zbutet vetëm nëse çdo vit hapen 25-30 mijë vende të reja pune

 

Prishtinë, 30 janar 2003 - Papunësia në Kosovë do të mund të zbutej vetëm nëse për çdo vit hapen 25-30 mijë vende të reja pune. Kështu vlerësuan përfaqësuesit e "Riinvestit" në tryezën e Forumit Ndërkombëtar "Tregu i punës dhe papunësia në Kosovë" që është organizuar në bashkëpunim me USAID-in.

 

Sipas studimit të Institutit për Hulumtime Zhvillimore Riinvest shkalla e papunësisë në Kosovë është 49 për qind. Kështu nga dy milionë e gjysmë banorë sa vlerësohet nga ky institut se ka Kosova vetëm 450 mijë janë të punësuar.

Ndërkaq Ministria e Punës dhe e Mirëqenies Sociale, pohon se në qendrat rajonale të punësimit janë paraqitur 256 mijë punëkërkues, por ky nuk është numër real për shkak të mosparaqitjes të gjithë të papunëve.

 

 

Qeveria e Kosovës kundërshton fuqishëm përfshirjen e Kosovës në Kartën Kushtetuese serbo-malazeze

 

Prishtinë, 30 janar 2003 - Qeveria e Kosovës ka kundërshtuar fuqishëm përfshirjen e Kosovës në Kartën Kushtetuese të Serbisë dhe Malit të Zi, e cila tashmë është miratuar nga Parlamenti i Serbisë dhe mbrëmë edhe nga ai i Malit të Zi.

Qeveria e Kosovës i ka dërguar një letër Bashkimit Evropian në të cilën rikonfirmohet qëndrimi i institucioneve lidhur me Kartën Kushtetuese të Unionit Serbi-Mali i Zi në preambulen e të cilës Kosova përmendet si pjesë e Serbisë.

 

Qeveria e Kosovës konstaton se ky dokument serbo-malazez nuk paraqet kurrëfarë detyrimesh për Kosovën, ngase ajo po shkon në rrugën e saj drejt definimit të statusit përfundimtar të Kosovës, përkatësisht të pavarësisë së saj, si dhe drejt integrimeve ne strukturat evropiane.

 

 

Ministri i Jashtëm shqiptar Ilir Meta vizitoi Plavën dhe Gucinë

 

Plavë, 30 janar 2003 - Ministri shqiptar i Punëve të Jashtme, Ilir Meta, i cili ndodhet për një vizitë dyditore në Mal të Zi, dje pasdite është takuar me autoritetet lokale të Plavës dhe Gucisë. Në njoftim thuhet se është ranë dakort për hapjen e një pike të re kufitare mes Shqipërisë dhe Mali të Zi, në zonën midis Vermoshit dhe Plavës.

Z.Meta zhvilloi një takim me banorët dhe autoritetet lokale të kësaj zone, ku u shpreh dëshira për një bashkëpunim të gjithanshëm mes dy vendeve. Ai vizitoi këtë pikë kufitare i shoqëruar nga autoritet lokale dhe garantoi inagurimin e saj brenda pranverës së këtij viti.

"Jemi të angazhuar të realizojmë infrastrukturën e domosdoshme për të bërë të mundur hapjen e kësaj pike", tha z.Meta, duke shtuar se ajo "do të jetë një pikë bashkëpunimi e integrimit të dy vendeve, veçanërisht për banorët e këtyre zonave".

Meta në një darkë pune që pati me autoritetet lokale të Plavës dhe Gucisë, tha se Qeveria shqiptare ka planifikuar ndërtimin e infrastrukturës, objekt i së cilës është dhe hapja e pikës kufitare në zonën midis Vermoshit dhe Plavës, nga e cila do të përfitojnë këto zona.

Sipas tij, marrëdhëniet mes Shqipërisë dhe Mali të Zi janë të mira, sepse të dy qeveritë janë të angazhuara për forcimin e demokracisë respektive, për të forcuar bashkëpunimin e besimin reciprok, për të respektuar pakicat, pasi të dy vendet synojnë integrimin në Bashkimin Europian, i cili i ka rregullat njëlloj për të gjitha vendet.

 

 

Moisiu: Shqipëria e gatshme të mbështesë SHBA me çdo mënyrë

 

Tiranë, 30 janar 2003 - Në një intervistë për Zërin e Amerikës, Presidenti i Shqipërisë, Alfred Moisiu tha se Shqipëria i mbështet Shtetet e Bashkuara në të gjitha veprimet që ato do t'i quajnë të arsyeshme.

 

Presidenti Moisiu i bëri këto komente në përgjigje të pyetjes nëse do ta mbështeste apo jo Shqipëria një luftë të mundshme të Shteteve të Bashkuara kundër Irakut.

 

 

Forcat e BE-së do të marrin nga NATO misionin paqeruajtës në Maqedoni nga mesi i marsit

 

Shkup, 30 janar 2003 - Forcat e Bashkimit Evropian do të marrin nga NATO misionin paqëruajtës në Maqedoni nga mesi i marsit apo më së voni deri nga fillimi i prillit, ka deklaruar në Shkup përfaqësuesja e BE-së, Klaris Pastori.

Në konferencë për shtyp, zyrtari i NATO-s, Per Strosmoen e ka vlerësuar si të qetë dhe stabile situatën e sigurisë në Maqedoni, kurse zëdhënësi i OSBE-së, Volfgang Greven tha se është rritur tejmase kriminaliteti.

 

 

Ambasadori i OSBE-së në Beograd vizitoi Preshevën

 

Preshevë, 30 janar 2003 - Ambasadori i OSBE-së në Beograd, Mauricio Masari dje pasdite ka qëndruar në Preshevë ku është takuar veç e veç me liderët e partive politike shqiptare ë Luginën e Preshevës. Temë e këtyre takimeve ishte situata politike dhe e sigurisë në Luginën e Preshevës.

 

Në veçanti është biseduar për pozitën e rëndë të shqiptarëve në këtë rajon, për praninë e forcave policore serbe në numër të theksuar, si dhe për çështjet e arsimit në gjuhën shqipe në këto tri komuna me shumicë shqiptare.

Ambasadori i OSBE-së, Mauricio Masari me këtë rast bëri edhe përurimin e kopshtit të fëmijëve në Preshevë.

 

 

Parlamenti malazez miratoi Kartën Kushtetuese të Unionit Serbi-Mali i Zi - deputetët shqiptarë votuan kundër saj

 

Podgoricë, 30 janar 2003 - Parlamenti i Malit të Zi ka miratur mbrëmë me shumicë votash Kartën Kushtetuese të Unionit Serbi-Mali i Zi dhe ligjin për zbatimin e saj. Për këtë dokument votuan dy partitë më të mëdha në këtë republikë - Partia Demokratike Socialiste dhe Partia Popullore Socialiste.

 

Ndërkaq kundër miratimit të kësaj karte kushtetuese ishte Partia Socialdemokrate dhe partitë politike shqiptare, ndërkohë që Lidhja Liberale e Malit të Zi nuk mori pjesë në seancën e Parlamentit.

Deputetët shqiptarë Ferhat Dinosha dhe Mehmet Bardhi kundërshtuan ashpër Kartën Kushtetuese nga fakti se, siç është shprehur z. Dinosha, dokumenti që Kosovën e sheh si pjesë integrale të Serbisë, nuk mund të ketë përkrahjen e shqiptarëve nga partitë nacionale.

 

Ndërkaq, deputeti i Lidhjes Demokratike në Mal të Zi Mehmet Bardhi theksoi se futja e Kosovës në preambulë si pjesë e Serbisë për shqiptarët është e papranueshme. Ky dokument shtoi z. Bardhi është në dëm të interesit të përgjithshëm të shqiptarëve, por edhe në dëm të qëndrueshmërisë në rajon.

 

 

Kryeministri serb Gjingjiq ka kërkur që serbët e Kosovës të kenë të drejtën të jenë element konstitutiv

 

Beograd, 30 janar 2003 - Kryeministri i Serbisë Zoran Gjingjiq në takimin me liderët e serbëve të Kosovës ka kërkur që serbët e Kosovës të kenë të drejtën të jenë element konstitutiv. Autoritetet e Beogradit dhe përfaqësuesit e pakicës serbe të Kosovës harmonizuan në takimet e tyre strategjinë e përbashkët të veprimit.

 

Nebojsha Çoviq pati deklaruar gjatë janari të këtij viti se qëllimi i strategjisë është të pengohet siç u shpreh ai rrëshqitja e Kosovës drejt pavarësisë.

 

 

L. Batler: Lufta në Maqedoni ka përfunduar dhe nuk do të ketë ofensivë në pranverë

 

Shkup, 30 janar 2003 - "Lufta ka përfunduar këtu. Nuk do të ketë ofensivë në pranverë. Ata që kërcënojnë të përdorin forcën, do të ndeshen me veprime nga ne, pavarësisht nëse kjo do të jetë NATO apo BE. Ata që duan të përdorin forcën janë humbës patetikë, qofshnin shqiptarë ose maqedonas etnikë", ka thënë ambasadori amerikan në Shkup Lorens Batler.

Ndërkaq, duke i komentuar pohimet për ekzistimin e grupeve të armatosura në këtë vend, ambasadori amerikan, ka thënë për disa media se persona të tillë janë "humbës patetikë". Mund të jenë njerëz të cilët qëndrojnë në Viti të Kosovës dhe të cilët dërgojnë fakse, apo është ndonjë person i cili e ka vetëshpallur veten komandant në Prejlep i cili gjithashtu dërgon fakse, tha Batler.

 

Ai ka shtuar se ka kaluar koha kur me granata dhe armë imponohej axhenda politike. Është e qartë se njerëzit e Vitisë nuk kanë kurrëfarë përkrahje. Ata duhet të kthehen prej andaj nga kanë ardhur para se ne t'i kapim dhe se ekzistojnë mënyra të shumta se si mund të kapen ata që mbajnë armë pa leje.

Ambasadori amerikan në Shkup ka thënë se kryetari i BDI-së Ali Ahmeti ende gjendet në listën e zezë dhe vendimin për heqjen nga kjo listë mund ta marrë vetëm presidenti amerikan Xhorxh Bush.

 

 

Forcat izraelite kanë bërë një depërtim në Bregun Perendimor në kërkim të militantëve

 

Jerusalem, 30 janar 2003 – Forcat izraelite kanë bërë sot (të enjtën) një depërtim në Bregun Perendimor në kërkim të militantëve, pasi kryeministri Ariel Sharon refuzoi degën e ullirit, të cilën ia zgjati pas rizgjedhjes së tij Jaser Arafati, njofton Rojter.

 

Ky është aksioni i parë i madh në Bregun Perendimor pas zgjedhjeve, ku armata ka përdorur tanke dhe këmbësori në sektorin e qeverisur nga palestinezët të qytetit të ndarë Hebron dhe, siç ka thënë zëdhënësi ushtarak izraelit, "armata ka goditur infrastrukturën e e terrorit".

 

Njëherësh, njoftohet se përpjekjet e Sharonit për të krijuar një koalicion të gjerë qeveritar, të udhëhequr nga krahu i djathtë i partisë së tij Likud, që fitoi zgjedhjet të martën e kaluar, po shkojnë ngadalë, por pritet që javën e ardhshme presidenti izraelit të formojë qeverinë.

 

 

Kleriku disident i Iranit, Ajatollah Hysein Ali Montazeri, është liruar nga burgu shtëpiak

 

Teheran, 30 janar 2003 - Kleriku disident më i njohur i Iranit, Ajatollah Hysein Ali Montazeri, është liruar, siç është thënë, pa kurrëfarë kushtesh, pas pesë vjetësh nën arrest shtëpiak, njofton Rojter.

 

Ajatullah Montazeri, i cili është i moshës mbi 80-vjeçare, dukej me shëndet të mirë kur doli të përdshëndetej me ithtarët e tij, shumë syresh me lot në sy, nga shtëpia e tij në qytetin e shenjtë shit Kom, 130 kilometra në jugperendim të Teheranit.

 

 

Antarët e Këshillit të Sigurimit janë shprehur për vazhdimin e kontrollit të armatimit në Irak

 

Nju Jork, 30 janar 2003 - Me gjasë shumica e anëtarëve e Këshillit të Sigurimit të Kombeve të Bashkuara janë shprehur për vazhdimin e kontrollit të armatimit në Irak. Siç njofton agjencia e lajmeve AP e cila thirret në burime të diplomatëve të Kombeve të Bashkuara në kuadër të takimit me dyer të mbyllura Shtetet e Bashkuara të Amerikës dhe Britania e Madhe janë përkrahur vetëm nga Bullgaria dhe Spanja.

 

11 anëtarët tjerë e kanë bërë të qartë se mbështesin vazhdimin e inspektimeve në Irak. Sekretari amerikan i shtetit Kolin Pauell pritet që me 5 shkurt ti prezantoj Këshillit të Sigurimit informacione shtesë për arsenalin ilegal të armatimit irakian.

 

 

Pentagoni ka konfirmuar njoftimet se në veri të Irakut ndodhen ushtarët amerikanë

 

Uashington, 30 janar 2003 - Pentagoni amerikan ka konfirmuar njoftimet sipas të cilave në veri të Irakut ndodhen ndërkohë ushtarët amerikanë por sipas fjalëve të kryeshefit të Shtabit të Përgjithshëm Riçard Majers ata atje ndodhen në numër të vogël.

 

"Ne tani nuk mund të saktësojmë se ku ndodhen ushtarët, por ata janë në numërtë vogël në veri të Irakut" tha të mërkurën mbrëma gjenreali Majers në konferencën për gazetarë në Uashington.

 

 

Tre vetë vdiqën nga një shpërthim që ndodhi në fabrikën farmaceutike në Karolinën Veriore

 

Kinston, Karolina Veriore, 30 janar 2003 – Të pakten tre vetë kanë humbur jetën nga një shpërthim që ka ndodhur në fabrikën farmaceutike në Karolinën Veriore, të cilën pastaj e ka kapluar flaka, njofton UPI. Njoftohet se në momentin e shpërthimit kanë qenë brenda fabrikës 115 punëtorë, nga 255 të punësuar sa ka gjithsej kjo fabrikë.

 

Dhjetëra syresh janë lënduar. Shkaku i shpërthimit, ende nuk dihet. Zjarri është lokalizuar, por ende vazhdon djegja, duke lëshuar një tym të dendur në ajër. Shpërthimi ka shkaktuar edhe dëme të ndërtesave për rreth. Gjashtë të lënduar janë dërguar me helikopter në spitalin e afërm.

 

 

Aeroplanët amerikanë mund të shfrytëzojnë bazat ushtarake italiane

 

Romë, 30 janar 2003 - Italia ka pranuar kërkesat e administratës amerikane që aeroplanët transportues në rrugë për në Gjirin Persik të shfrytëzojnë bazat ushtarake italiane për aterime teknike dhe karburante.

Ministri italian i Mbrojtjes Antonio Martino lidhur me këtë çështje e ka njoftuar me përmes një letre parlamentin.

Ndërkaq kryeministri Berluskoni nesër do të takohet me presidentin amerikan Bush në Uashington.

 

 

Thirrje Evropës që të bashkohet rreth amerikanëve

 

Londër, 30 janar 2003 - Derisa Shtetet e Bashkuara po rrisin trysninë e tyre mbi Irakun që të çarmatoset, një numër i udhëheqësve me ndikim në Evropë i kanë bërë thirrje kontinentit që të bashkohet rreth amerikanëve.

 

Porosia është nënshkruar nga kryeministri britanik, Toni Bler, nga Hoze Maria Aznar i Spanjës dhe Silvio Berluskoni i Italisë, si dhe nga homologët e tyre në Portugali, Republikën Çeke, Danimarkë, Poloni dhe Hungari.

Ata thonë se Evropa ka një lidhje me Shtetet e Bashkuara, që i ka qëndruar testimit të kohës dhe nuk duhet të bëhet viktimë e përpjekjeve të vazhdueshme të Irakut për të kërcënuar sigurinë e botës. Ata i bënë thirrje Këshillit të Sigurimit të Kombeve të Bashkuara që të mbajë kredibilitetin e tij përmes sigurimit se Iraku i është përmbajtur plotësisht rezolutave për çaramatim.

 

Porosia nuk është nënshkruar nga Franca dhe Gjermania, të cilat ishin më të zëshmet në shfaqjen e dyshimeve për mençurinë e luftës me Irakun.

 

 

Bler e Berluskoni shkojnë në Uashington

 

Londër, 30 janar 2003 - Një raund i ri i diplomacisë evropiane mbi Irakun ka filluar me kryeministrin britanik Toni Bler, i cili zhvilloi takime në Londër me homologun e tij italian, Silvio Berluskoni.

Të dy udhëheqësit pritet të takohen me presidentin Bush në Uashington, zoti Berluskoni sot gjatë ditës, ndërkaq kryeministri britanik Bler ditën e premte.

 

 

Iraku akuzon kryeinspektorin Bliks

 

Bagdad, 30 janar 2003 - Iraku ka akuzuar shefin e inspektorëve të armëve të Kombeve të Bahskuara, Hans Bliks, për keqinterpretim të shënimeve irakiane për përmbushje të obligimeve për çarmatim.

 

Një letër që iu shpërnda anëtarëve të Këshillit të Sigurimit të Kombeve të Bashkuara përshkruan si fatkeqe vlerësimet e zotit Bliks se pas dymbëdhjetë vjetësh, Iraku ende duhet të pranojë me sinqeritet obligimet për eliminimin e armëve të shkatërrimeve masive.

 

Zëdhënësi i zotit Bliks ka mbrojtur vlerësimin e tij si objektiv, i balancuar dhe me fakte dhe tha se është në duart e Irakut të japë arsyetime të sinqerta

 

 

ShBA: Demokratët mbështesin përpjekjet e presidentit në luftën kundër terrorizmit

 

Uashington, 30 janar 2003 - Në përgjigjen e saj ndaj fjalimit mbi gjendjen e vendit, Partia Demokratike shprehu mbështetjen për përpjekjet e presidentit Bush në luftën kundër terrorizmit dhe për zhdukjen e kërcënimeve që paraqesin Iraku dhe Koreja e Veriut.

 

Mirëpo, demokratët theksuan se Shteteve të Bashkuara u nevojiten aleatët në çdo veprim dhe thanë se Ëashingtoni duhet të bindë botën se udhëheqësi irakian, Sadam Husein, nuk përbën problem vetëm për Amerikën.

 

Për sa i përket ekonomisë, demokratët kritikuan planin e presidentit për shkurtim taksash, duke e cilësuar atë se politikë kokëposhtë ekonomike që siguron përfitimet më të mëdha për të pasurit.

 

 

Shtëpia e Bardhë: Gjendja e nderë me Irakun po hyn në "etapën finale"

 

Uashington, 30 janar 2003 - Shtëpia e Bardhë thotë se gjendja e nderë me Irakun lidhur me kërkesat e Kombeve të Bashkuara për çarmatosje po hyn në "etapën finale".

Zëdhënësi Ari Fleiçer ka thënë se presidenti Bush akoma shpreson se diplomacia e minutave të fundit mundë të rezultojë në çarmatosjen e liderit irakian Sadam Husein nga armët e tij të dyshuara për shdukje në masë, ndryshe nuk duhet gabuar fare për vendosmërinë e Xhorxh Bushit.

Ndërkaq, sekertari amerikan i shtetit, Kolin Pauell ka thënë se Shtetet e Bashkuara mund të ndihmonin presidentin irakian, Sadam Husein të gjejë një vend për të shkuar në ekzil nëse ai largohet nga Iraku dhe kjo mund të ishte "një shtegdalje për ta që të shmangin luftën".

 

 

Iraku shpreson për paqe

 

Bagdad, 30 janar 2003 - Zëvendës presidenti irakian, Taha Jasin Ramadan tha se vendi i tij shpreson për paqe, por po përgatitet për luftë.

"Ne do të bëjmë gjithë çka mundemi për paqë. Kemi bërë ate që na thanë fqinjët arabë se duhet bërë-të bashkëpunojmë me inspektorët e armatimit. Por në të njejtën kohë, irakianët po bëjnë gjithë ate që munden për t'u përgatitur për luftë, sepse populli ynë beson se kauza e tij është e drejtë", ka thënë Taha Jasin Ramadan.

 

 

Asambleja e BE-së ka filluar debatin lidhur me krizën irakiane

 

Bruksel, 30 janar 2003 - Asambleja e Bashkimit Evropian ka filluar debatin lidhur me krizën irakiane, ndërsa disa deputetë valvitën pankarta proteste ndaj luftës së mundshme në Irak.

Zyrtarët e lartë të Bashkësisë, Havier Solana dhe Kris Paten thanë se çfarëdo lufte kundër Irakut varet nga Kombet e Bashkuara, e jo nga Shtetet e Bashkuara.

Blloku i 15 vendeve është i përçarë kur është fjala se a do të mbështeste një fushatë ushtarake të prirë nga Shtetet e Bashkuara kundër Irakut.

 

 

Palestinezët e brengosur pas zgjedhjeve në Izrael

 

Gaza, 30 janar 2003 - Palestinezët shfaqën brengosje lidhur me prospektet për paqe dhe ardhmërinë e territoreve të pushtuara nga Izraeli pasi partia e kryeministrit Ariel Sharon fitoi më shumë vende në parlament në zgjedjet e djeshme dhe pritet të formojë qeverinë e koalicionit nga parti të krahut të djathtë.

Abil Abu Redeina tha se votimet ishin “zgjedhje e popullit të Izraelit”, por i ka bërë thirrje qeverisë së re izraelite që të “tërheqë menjëherë trupat nga territoret palestineze dhe të kthehet në tryezën e bisedimeve”.

Copyright©2000-2003 Trepca.net - Të gjitha të  drejtat e rezervuara.