Lajme

E mërkure, 29 janar 2003

Përmbajtja:

• Qeveria e Kosovës ka diskutuar lidhur me transferin e kompetencave

• Në Velekincë të Gjilanit u përura shkolla e re dhe busti i Mulla Idriz Gjilanit

• Solana mbështet qëndrimin e Shtajnerit - standardet para statusit të Kosovës

• Zëdhënësi Çapell thotë se po mbahet në burg një person i rrezikshëm që dyshohet për terrorizëm

• Komuna e Podujevës ndau 50 bursa për studentët e drejtimeve deficitare

• USAID përuron sot rrugën në fshatin Pllanjan

• Në dy shkolla të Gjilanit ende nuk ka filluar gjysmëvjetori i dytë

• Të dëmtuarit nga tërmeti mund të lirohen nga taksat komunale për renovimin e shtëpive

• Shtajner ka thënë se Kosova është pjesë e Evropës dhe ajo duhet të integrohet në Evropë

• Në zyrën e Qeverisë së Kosovës ka filluar punën një grup ekspertësh ndërkombëtarë në fushën e legjislacionit

• Kriminelët serbë në pjesën veriore të Mitrovicës pengojnë punën e pjesëtarëve të SHPK-së

• Pensionistët kërkojnë nga UNMIK-u dhe Qeveria e Kosovës që t'u kthehen parat e Fondit pensional e invalidor

• Romano Prodi thotë se roli i BE-së në Kosovë është ende larg përfundimit të tij

• Forcat ushtarake shqiptare dhe amerikane afër Vlorës po mbajnë një stërvitje të përbashkët

• Ministri i brendshëm maqedonas thotë se në disa rajone ka grupe të vogla që paraqiten si AKSH

• Përfaqësuesit e serbëve të Kosovës dhe autoritetet e Beogradit arritën marrëveshje për strategjinë e veprimit

• Qeveria e Maqedonisë ka shpërndarë formalisht njësitin kontraverz policor të quajtur "Luanët"

• Doris Pak thotë se Marrëveshja e Ohrit nuk e kufizon përdorimin e gjuhës shqipe, por stimulon përdorimin e saj

• Domenik dë Vilpen: Franca është e gatshme të evakuojë trupat e veta nga Bregu i Fildishtë

• Bush: Nëse Sadam Huseini nuk çarmatoset në mënyrë paqësore, ai do të çarmatoset me forcë

• Putin: Rusia mund të ashpërsojë qëndrimin ndaj Irakut

• Izrael: Zgjedhjet rikthejnë në detyrë kryeministrin Sharon

• Shtëpia e Bardhë parapëlqen një rezolutë të re, por të paobligueshme

• 41 laureatë amerikanë të Çmimit Nobël kundërshtojnë një luftë unilaterale kundër Irakut

• Ushtria gjermane ndihmon misionin e Kombeve të Bashkuara në Irak

Qeveria e Kosovës ka diskutuar lidhur me transferin e kompetencave

 

Prishtinë, 29 janar 2003 - Në takimin e sotëm të rregullt Qeveria e Kosovës ka diskutuar lidhur me transferin e kompetencave, ndërtimin e një administrate publike të efektshme si dhe për gjendjen në Posttelekomin e Kosovës.

 

Në këtë takim kryeministri Bajram Rexhepi u ka kërkuar ministrave të dikasterëve përkatës që deri më 10 shkurt t'i identifikojnë kompetencat që duhet të transferohen nga administrata e UNMIK-ut dhe të përgatisin komentet e tyre rreth standardeve të shefit të UNMIK-ut.

Ministria e Transportit dhe Telekomunikacionit në këtë takim ka paraqitur një raport për punën e Posttelekomit të Kosovës, i cili është vlerësuar jokomplet dhe i vonuar.

 

Kjo Ministri është e angazhuar edhe rreth çështjes së kodit ndërkombëtar për telefoninë fikse dhe mobile të Kosovës, thuhet në një komunikatë nga ky takim.

 

 

Në Velekincë të Gjilanit u përura shkolla e re dhe busti i Mulla Idriz Gjilanit

 

Gjilan, 29 janar 2003 (QIK) - Në fshatin Velekincë të komunës së Gjilanit, sot u përurua busti i atdhetarit, Mulla Idriz Gjilani si dhe shkolla e re fillore, që është dhuratë nga donatorët arabë. Fillimisht është zbuluar busti i Mulla Idriz Gjilanit, nga djali i tij, Isa Hajrullahu, vajza Eminja dhe nga një pjesëtar i familjes së Selim Sadikut, ku kishte gjetur strehim Mulla Idrizi, në ditët më të vështira.

Kryetari i komunës, Lutfi Haziri, në fjalën e tij të rastit, pasi ka falenderuar donatorin arab, tha se tash e tutje, nxënësit dhe arsimtarët e këushëm nuk do të friksohen nga kushtet e vështira atmosferike, siç ishte në objektin e vjetër.

Vlera e projektit është një milion e 300 mijë marka gjermane. Ndërkaq përfaqësuesi i Bankës Zhvillimore Islamike theksoi se kjo bankë për nevojat e ndryshme në Kosovë ka ndarë një fond prej 40 milionë dollarësh, kurse vetëm 10 milionë dollarë janë ndarë për nevojat e arsimit.

 

Sipas tij, rreth 17 shkolla deri tashti janë ndërtuar nga mjetet e ketij fondi, në Kosovë, kurse 20 milionë dollarë kanë mbetur të shfrytëzohen në infrastrukturë dhe ndihma tjera për Kosovën.

 

Zyrtari i UNMIK-ut nga Ministria e Arsimit, z. Vasim Sejd tha se arritja më e madhe e shqiptarëve në këto dekada ka qenë mbajtja e procesit mësimor në kushte të okupimit dhe ka uruar që fat edhe në realizimin e aspiratave kombëtare.

 

 

Solana mbështet qëndrimin e Shtajnerit - standardet para statusit të Kosovës

 

Bruksel, 29 janar 2003 - Në një deklaratë me shkrim, shefi i diplomacisë së BE-së Havier Solana, mbështet fuqimisht qëndrimin e kryeadministratorit të Kosovës Mihaal Shtajner - standardet para statusit.

 

Kjo deklaratë erdhi pas takimit të djeshëm të Solanës me Shtajnerin, ku janë diskutuar temat aktuale dhe sfidat që priten në të ardhmen - përmirësimi i gjendjes së sigurisë, lufta kundër krimit të organizuar dhe aspektet për fillimin e bisedimeve me autoritetet e Beogradit.

Solana në këtë deklaratë thotë se në bisedë me Shtajnerin ka inkurajuar liderët politikë të Kosovës që të marrin më shumë përgjegjësi për t'u përballur me sfidat kritike gjatë vitit, ku në radhë të parë do të jetë lufta kundër kriminalitetit dhe ndërtimi i një shoqërie multientike e demokratike.

Solana përshëndet fjalimin e paradokohshëm të Shtajnerit dhe kthimin e deputetëve serbë në Kuvendin e Kosovës, dhe premton ndihmën e BE-së për Kosovën në ndërtimin e një shoqërie demokratike dhe multietnike.

 

 

Zëdhënësi Çapell thotë se po mbahet në burg një person i rrezikshëm që dyshohet për terrorizëm

 

Prishtinë, 29 janar 2003 - Një person i rrezikshëm është në duart e policisë së UNMIK-ut në Gjilan, ka bërë të ditur zëdhënësi i policisë Derek Çapell. Ky person, me kombësi shqiptare, identiteti i të clit nuk njoftohet, është arrestuar më 24 janar nga ana e KFOR-it dhe pas tri ditëve i është dorëzuar policisë për hetime të mëtejshme.

 

Sipas zëdhënësit Çapell personi i arrestuar është marrë me aktivitete ilegale dhe organizim për të kryer dhunë që hyn në kategorinë e terrorizmit. Zëdhënësi ka shtuar se aktiviteti ilegal i të arrestuarit paraqet rrezik për sigurinë e tërë rajonit.

 

 

Komuna e Podujevës ndau 50 bursa për studentët e drejtimeve deficitare

 

Podujevë, 29 janar 2003 (QIK) – Një komision i veçantë pas shqyrtimit të 111 aplikuesve ndau 50 bursa për studentët e drejtimeve deficitare të cekura edhe në konkursin publik, ka njoftuar z. Liman Zeqiri.

 

Në bazë të kritereve komisoni u ka dhënë përparësi studentëve me notë mesatare më të lartë dhe drejtimet si: mjekësi, akademi e arteve, menaxhment, ekologji, veterinari, psikologji, elektroenergjetikë, etj., mirëpo është marrë parasysh edhe gjendja sociale e atyre që kanë përfituar ndihmën nga komuna.

Gatishmërinë për t'i ndihmuar studentët e kanë shprehur edhe qytetarë të komunës së Podujevës”, ka pohuar Liman Zeiqir, i cili njoftoi se Ibrahim Ejupi nga fshati Sekiraçë ka marrë përsipër financimin në formë burse të një studenti në Universitetin e Tiranës – Dega e mjekësisë veterinare.

 

 

USAID përuron sot rrugën në fshatin Pllanjan

 

Prishtinë, 29 janar 2003 – Drejtori i Agjencionit të Shteteve të Bashkuara për Zhvillim Ndërkombëtar (USAID), Dejll Fajfer, në një solemnitet që do të zhvillohet sot më 29 janar, në orën 11:30, do të përurojë rrugën në Pllanjan.

Në një njoftim të USAID-it thuhet se ky projekt është pjesë e përkushtimit të qeverisë së SHBA-ve për mbështetjen e zhvillimit demokratik dhe ekonomik të Kosovës.

 

Përmes USAID-it, populli amerikan investon 88,000 dollarë për shtrimin e rrugës njëkilometërshe e cila kalon nëpër qendrën e fshatit Pllanjan, një fshat i largët kodrinor i boshnjakëve që numëron 1,300 banorë dhe ku veprimtaria kryesore ekonomike është bujqësia.

 

 

Në dy shkolla të Gjilanit ende nuk ka filluar gjysmëvjetori i dytë

 

Gjilan, 29 janar 2003 (QIK) - Enver Kadriu, ushtrues i detyrës së drejtorit për arsim në Gjilan dekalroi sot se në dy shkolla të mesme të kësaj komune, ende nuk ka filluar gjysmëvjetori i dytë. Rreth 3 mijë nxënës të teknikës dhe të bujqësisë nuk kanë mundur të kthehen në objektet e tyre shkollore, për arsye se riparimet nuk kanë përfunduar ende.

Z. Kadriu tha se ndjehet i shqetësuar veçmas për maturantët. Ata do ta kenë shumë vështirë që ta realizojnë në tërësi ciklin e fundit të arsimimit të mesëm, meqenëse duhet të përfundojnë më herët se klasët tjera.

Kadriu thotë se janë hulumtuar mundësitë për vendosje të përkohshme në ndonjë objekt tjetër, por ka pak gjasa për një zgjidhje të tillë, sepse në shumicën e shkollave punohet edhe ditëve të shtuna dhe me orar të reduktuar.

Kryeshefi ekzekutiv i Gjilanit Enver Muja tha në mbledhjen e Bordit të drejtorëve, ku u raportua problemi, se ai shpreson që në këto dy shkolla, mësimi do të fillojë sa më shpejt.

 

 

Të dëmtuarit nga tërmeti mund të lirohen nga taksat komunale për renovimin e shtëpive

 

Gjilan, 29 janar 2003 - Bordi i drejtorëve të shërbimit administrativ civil në komunën e Gjilanit është dakorduar në parim për lirimin e të dëmtuarve nga tërmeti prej kontributeve komunale, në rast se ata bëjnë kërkesë për renovimin e shtëpive që kanë pësuar dëme dhe nëse objekti i mëparshëm ka patur leje ndërtimi, por me kusht që t`iu përmbahen dimensioneve ekzistuese.

 

"Ne kemi obligim që t`u dalim në ndihmë qytetarëve tanë, për aq sa kemi mudësi dhe, t`iu ofrojmë lehtësi në renovimin e infrastrukturës së banimit", ka deklaruar kryeshefi ekzekutiv Enver Muja dhe ka kërkuar nga drejtoritë përkatëse që t`i kenë në konsideratë këto kërkesa, të cilat edhe më parë kanë qenë të adresuara në Komitetin për banim.

 

 

Shtajner ka thënë se Kosova është pjesë e Evropës dhe ajo duhet të integrohet në Evropë

 

Bruksel, 29 janar 2003 - Kryeadministratori i Kosovës Mihael Shtajner, i cili ndodhet në Bruksel, ka biseduar me shefin e Politikës së Jashtme të BE-së, Havier Solana.

 

Shtajner pas takimit me Solanën u tha gazetarëve se Kosova është pjesë e Evropës dhe se ajo duhet të integrohet në Evropë, por tash duhet shikuar se si të gjendet rruga për integrimin e Kosovës në BE.

I pyetur nëse është paraqitur ndonjë ide konkrete që Kosova mund ta ketë në procesin e stabilizimit dhe asociimit, Shtajner ka thënë se është duke u punuar në këtë drejtim.

 

Duhet pasur prasysh mungesën e statusit të Kosovës, porse duhet shikuar edhe nevojat specifike që ka Kosova, tha Shtajner dhe shtoi se për të mos lënë Kosovën jashtë procesit janë të rëndësishme dy pika:

 

e para është kanali i dyfishtë që BE-ja bën në rastin e Kosovës,

 

ndërsa pika tjetër është rëndësia që Kosova vetë të bëhet më tërheqëse për BE-në. Kosova duhet të bëhet më atraktive për BE-në, siç është edhe BE-ja tërheqëse për Kosovën, tha Shtajner.

Me Solanën, tha Shtajner, ka biseduar edhe për preambulën e Kartës Kushtetuese të Serbisë dhe Malit të Zi në të cilën përmendet Kosova si pjesë e Serbisë.

 

Shtajner nënvizoi se për këtë çështje, ai dhe Solana kanë mendime të njëjta, kurse Solana ka përsëritur qëndrimin e prerë të BE-së se statusi i Kosovës do të vendoset më vonë dhe tash mbetet në fuqi Rezoluta 1244 dhe asnjë akt unilateral nuk do të ketë ndikim legal në statusin final të Kosovës.

 

Ndërkaq Shtajner theksoi se veprimet e njëanshme nuk munden assesi të prejudikojnë statusin e Kosovës dhe përsëriti se për Kosovën nuk mund të vendosë Beogradi, por KS i OKB-së.

 

 

Në zyrën e Qeverisë së Kosovës ka filluar punën një grup ekspertësh ndërkombëtarë në fushën e legjislacionit

 

Prishtinë, 29 janar 2003 - Shoaqta gjermane për bashkëpunim teknik në Prishtinë KDZ paralajmëroi intensifikimin e ndihmave në përpilimin e ligjeve të Kosovës. Ekspertët e legjislacionit nga Gjermania, Hollanda dhe Sllovenia i ofruan Qeverisë së Kosovës ndihma konkrete në këtë aspekt, kurse projekti është financuar nga Agjencia Evropiane për Rindërtim.

Pranë Zyrës së Qeverisë së Kosovës ka filluar punën një grup ekspertësh ndërkombëtarë dhe vendor, të cilët do të ndihmojnë në fushën e legjislacionit, njoftoi kryeministri i Kosovës Bajram Rexhepi.

 

Ai shtoi se inkuadrimi i këtyre ekspertëve do t'i mundësojë Qeverisë së Kosovës dhe zyrës ligjore të saj të jetë shumë më efikase në realizimin e synimeve për hartimin e ligjeve të nevojshme në përputhje me ato të vendeve evropiane.

 

Kryeministri Rexhepi tha po ashtu se projekti që kushton 4.5 milionë euro dhe i cili do të zgjasë 18 muaj do të ndihmojë edhe në aftësimin e kuadrit vendorë.

 

 

Kriminelët serbë në pjesën veriore të Mitrovicës pengojnë punën e pjesëtarëve të SHPK-së

 

Mitrovicë, 29 janar 2003 - Kriminelët serbë në pjesën veriore të Mitrovicës po pengojnë punën e pjesëtarëve të Shërbimit Policor të Kosovës, duke dashur të krijojnë probleme ndërmjet popullatës civile dhe pjesëtarëve të SHPK-së. Policia e UNMIK-ut për këtë shkak ka urdhëruar ndërprerjen e patrullimeve dhe kthimin e policëve të SHPK-së në stacionin policor.

Zëdhënës i policisë ndërkombëtare në Mitrovicë tha se ditëve të fundit janë shtuar ofendimet dhe kërcënimet verbale nga ana e disa njerëzve drejtuar pjesëtarëve të SHPK-së.

 

"Një numër i vogël i kriminelëve serbë dëshirojnë të krijojnë probleme mes SHPK-së dhe popullatës në mënyrë që pastaj ata të thonë se kjo polici nuk pranohet në pjesën veriore", thotë zëdhënësi. Ai theksoi se këto kërcënime kryhen nga njerëz të caktuar me të cilët policia është e gatshme të ballafaqohet, përfshirë edhe arrestimin e personave të tillë.

 

 

Pensionistët kërkojnë nga UNMIK-u dhe Qeveria e Kosovës që t'u kthehen parat e Fondit pensional e invalidor

 

Prishtinë, 29 janar 2003 - Sindikata e Pavarur e Pensionistëve dhe e Invalidëve të Punës së Kosovës kërkojnë nga UNMIK-u dhe Qeveria e Kosovës që t'u kthehen parat e Fondit pensional e invalidor nga Serbia, si dhe të kthehet statusi i pensionistit i cili duhet të marrë pension e jo ndihmë sociale.

Kryetari i kësaj sindikate Fazli Kajtazi ka kërkuar që të gjenden format për ngritjen e shumës së pensioneve, kurse nga buxheti i Kosovës të ndahen 32 milionë euro në mënyrë që një pension të mos jetë më i vogël se 70 euro.

 

Ai me këtë rast ka përkujtuar edhe ligjin pensional e invalidor të Kosovës i cili në bazë të rregullores së UNMIK-ut është ende në fuqi.

 

 

Romano Prodi thotë se roli i BE-së në Kosovë është ende larg përfundimit të tij

 

Bruksel, 29 janar 2003 - Duke folur për situatën në Kosovë në takimin e ministrave të jashtëm të BE-së në Bruksel presidenti i Komisionit Evropian Romano Prodi ka thënë se nuk mund të trajtohet me dy fjalë problematika e Kosovës. Ai ka theksuar se roli i BE-së atje është ende larg përfundimit të tij tha ai.

 

 

Forcat ushtarake shqiptare dhe amerikane afër Vlorës po mbajnë një stërvitje të përbashkët

 

Tiranë, 29 janar 2003 - Njësitë e forcave ushtarake shqiptare dhe amerikane po zhvillojnë këto ditë në rajonet e Karaburunit, ishulli i Sazanit dhe në gjirin e Vlorës stërvitjen e përbashkët të koduar "Adriatik Sideks O35".

 

Kjo stërvitje drejtohet nga një shtab i përbashkët ekspertësh ku nga pala shqiptare marrin pjesë njësitë e forcave detare, një grup koordinimi dhe vëzhgimi i forcave ajrore, ndërkaq nga pala amerikane merr pjesë edhe aeroplambajtësja "Heri Truman", një luftanije dhe grupe avionësh luftarakë.

 

Kjo stërvitje konsiderohet si njëra nga më të mëdha të organizuara deri më sot me trupat amerikane.

 

 

Ministri i brendshëm maqedonas thotë se në disa rajone ka grupe të vogla që paraqiten si AKSH

 

Shkup, 29 janar 2003 - Ministri i brendshëm maqedonas Hari Kostov konfirmoi se projektligji për mbledhjen e armëve ilegale do t'i paraqitet qeverisë dhe më pas Parlamentit gjatë muajit mars.

Për gjendjen e sigurisë në Maqedoni, ministri Kostov tha se nuk mund ta quante atë të shkëlqyeshme, sepse ka probleme. Sipas tij, bëhet fjalë për grupe të vogla që paraqiten si AKSH në disa rajone të Tetovës, Gostivarit dhe Kumanovës.

 

Ai theksoi se nuk mund të bëhet fjalë për ndonjë strukturë të fortë të organizuar të quajtur Armata Kombëtare Shqiptare. Sipas tij para se gjithash bëhet fjalë për elementë kriminalë që merren me biznese ilegale armësh, prostitucion e trafikim droge, tha ministri i brendshëm maqedonas.

 

 

Përfaqësuesit e serbëve të Kosovës dhe autoritetet e Beogradit arritën marrëveshje për strategjinë e veprimit

 

Beograd, 29 janar 2003 - Përfaqësuesit e serbëve të Kosovës dhe autoritetet e Beogradit kanë arritur një marrëveshje për strategjinë e përbashkët të veprimit në Kosovë të cilën më parë e ka miratuar qeveria serbe dhe DOS-i.

 

Oliver Ivanoviq tha pas bisedimeve se serbët nga veriu i Kosovës gjatë mëse tre viteve kanë vepruar në frymën e asaj strategjie dhe se në atë frymë është edhe iniciativa për bashkimin e komunave dhe vendbanimeve që banojnë me shumicë nga minoriteti serb në Kosovë.

 

 

Qeveria e Maqedonisë ka shpërndarë formalisht njësitin kontraverz policor të quajtur "Luanët"

 

Shkup, 29 janar 2003 - Qeveria e Maqedonisë ka shpërndarë formalisht njësitin kontraverz policor për ndërhyrje të shpejtë të quajtur "Luanët", kurse 600 nga 1200 pjesëtarë do të transferohen në njësitë e tjera policore dhe ushtarake, përfshirë edhe brigadën elite ndërkufitare të sapoformuar, tha ministri i brendshëm maqedonas Hari Kostov.

Ndërkohë përfaqësuesit e partive politike shqiptare kanë thënë se forcat speciale "Luanët" nuk duhet integruar, por ato duhet shpërbërë, kurse angazhimi i policëve të rinj duhet bërë ashtu siç është paraparë me Marrëveshjen e Ohrit.

 

 

Doris Pak thotë se Marrëveshja e Ohrit nuk e kufizon përdorimin e gjuhës shqipe, por stimulon përdorimin e saj

 

Shkup, 29 janar 2003 - Në Shkup po qëndron për vizitë eurodeputetja Doris Pak e cila do të takohet me të gjithë liderët e Maqedonisë. Ajo tha se detyrë kryesore e forcave politike duhet të jetë zbatimi i Marrëveshjes së Ohrit dhe lufta kundër korrupsionit.

 

Doris Pak foli edhe për përdorimin e gjuhës shqipe në vend, duke shtuar se Parlamenti është ai që duhet ta zgjidhë këtë problem. Eurodeputetja gjermane po ashtu nënvizoi se Marrëveshja e Ohrit nuk e kufizon përdorimin e gjuhës shqipe, por stimulon përdorimin e saj.

 

 

Domenik dë Vilpen: Franca është e gatshme të evakuojë trupat e veta nga Bregu i Fildishtë

 

Paris, 29 janar 2003 – Ministri i Jashtëm i Francës, Domenik dë Vilpen, ka deklaruar sot (të merkurën) se Franca është e gatshme të evakuojë trupat e veta nga Bregu i Fildishtë pas shpërthimit të protestave të dhunshme, që ndodhen pas marrëveshjes paqësore, që kishte për qëllim t'i jepë fund luftës katërmujore civile në vend, njofton BBCWorld.

 

Marrëveshja e nënshkruar të shtunën e kaluar, përcaktoi përkrahësit e presidentit Loran Gabo se duhet ndarë pushtetin me kryengritës në një qeveri të unitetit. Por, në një letër, dërguar presidentit, armata ka thënë se nuk do të pranojë që kryengritësit të marrin ministritë e mbrojtjes dhe të rendit. Z. Gabo pritet t'i drejtohet kombit pëtr t'ia sqaruar marrëveshjen, e cila shkaktoi shpërthimin e protestave të dhunshme të martën (sot).

 

 

Bush: Nëse Sadam Huseini nuk çarmatoset në mënyrë paqësore, ai do të çarmatoset me forcë

 

Uashington, 29 janar 2003 - Presidenti amerikan Xhorxh Bush në fjalimin e tij drejtuar Kongresit dhe gjithë vendit, u përpoq të siguronte mbështetje në vend dhe në botë për një ndërhyrje të mundshme ushtarake kundër Irakut.

Ky ishte ndoshta fjalimi më i rëndësishëm i presidencës së tij, një fjalim mbi gjendjen e vendit që synonte ta përgatiste vendin për luftë dhe të shtonte besimin tek administrata dhe politikat e saj.
 

Pikë për pikë, presidenti Bush foli në hollësi rreth kërcënimit irakian dhe parashtroi qëndrimin e tij për të vepruar. Ai tha se Sadam Huseini nuk ka përfillur kërkesat e komunitetit ndërkombëtar për tu çarmatosur dhe për këtë duhet të mbajë përgjegjësi.

"Thuajse 3 muaj më parë, Këshilli i Sigurimit i Kombeve të Bashkuara i dha Sadam Huseinit shansin e tij të fundit për t'u çarmatosur. Në vend që të çarmatoset, ai ka treguar një përbuzje të plotë për Kombet e Bashkuara dhe për opinionin e botës".

Presidenti tha se ekzistojnë prova të lidhjeve midis Irakut dhe terroristëve. Ai shtoi se Sadam Huseini synon të zotërojë armë të shkatërrimit në masë për të mbizotëruar, kërcënuar dhe sulmuar. Ai njoftoi se sekretari i Shtetit Kolin Pauell do të shkojë të mërkurën e ardhshme në Kombet e Bashkuara për t'i paraqitur prova Këshillit të Sigurimit.

Zoti Bush tha se Shtetet e Bashkuara do të këshillohen me Kombet e Bashkuara, por ai e bëri të qartë edhe një herë se në rast se Sadam Huseini nuk çarmatoset në mënyrë paqësore, ai do të çarmatoset me forcë. Në se lufta do të jetë e nevojshme, tha presidenti, ushtria amerikane me të gjithë fuqinë e saj do të hidhet në veprim dhe do të fitojë.

"Disa thonë që ne nuk duhet të veprojmë derisa rreziku të jetë real. Që kur terroristët dhe tiranët na kanë bërë të njohur qëllimet e tyre, dhe me mirësjellje na kanë paralajmëruar para se të godasin"?

Megjithëse presidenti Bush foli rreth një përgjigje të mundshme ushtarake kundër Irakut, ai theksoi se programi i armëve bërthamore të Koresë së Veriut dikton një strategji tjetër. Ai tha se administrata e tij po bashkëpunon me Korenë e Jugut, Japoninë, Kinën dhe Rusinë për të gjetur një zgjidhje paqësore. (ZA)

 

 

Putin: Rusia mund të ashpërsojë qëndrimin ndaj Irakut

 

Moskë, 29 janar 2003 - Presidenti rus, Vladimir Putin, tha se vendi i tij mund të ashpërsojë qëndrimin ndaj Irakut nëse Bagdadi pengon punën e inspektorëve të Kombeve të Bashkuara për armët.

Duke folur në universitetin e Kievit, udhëheqësi rus tha se pengesat e shkaktuara nga Iraku në veprimtarinë e inspektorëve mund ta shtyjnë Rusinë të bashkohet me Shtetet e Bashkuara për të kërkuar masa më të rrepta nga Këshilli i Sigurimit.

Por ai theksoi gjithashtu se të gjitha këto veprime duhet të bashkërendohen përmes Këshillit të Sigurimit.

 

 

Izrael: Zgjedhjet rikthejnë në detyrë kryeministrin Sharon

 

Tel Aviv, 29 janar 2003 - Kryeministri izraelit Ariel Sharon bëri thirrje për një qeveri të bashkimit kombëtar me bazë të gjerë, pasi partia e tij Likud fitoi zgjedhjet e djeshme parlamentare.

Kryeministri Sharon tha se dëshiron që të gjitha partitë politike të bashkohen me partinë Likud për të luftuar terrorizmin. Por Partia Laboriste tha se nuk do të bëjë pjesë në asnjë qeveri të kryesuar nga zoti Sharon.

Pas numërimit të thuajse të gjitha votave, partia Likud ka fituar 37 prej 120 vendeve të parlamentit. Partia laboriste fitoi 19 vende dhe partia laike Shinui fitoi 15 vende. Zyrtarë palestinezë thanë se fitorja e zotit Sharon do të thotë se procesi i paqes do të pezullohet edhe më shumë dhe dhuna do të shkallëzohet.

 

 

Shtëpia e Bardhë parapëlqen një rezolutë të re, por të paobligueshme

 

Uashington, 29 janar 2003 - Shtëpia e Bardhë ka shfaqur mbështetje të kufizuar për një rezolutë të re të Kombeve të Bashkuara për Irakun, duke e konsideruar ate të dëshirueshme, por të paobligueshme para se të ndërmerrej akison ushtarak.

 

Zëdhënësi Ari Fleisçer tha se presidenti Bush parapëlqen të veprojë me mbështetjen më të madhe të mundëshme ndërkombëtare, por ka shtuar se po të mos ketë mbështetje të mjaftueshme, kjo nuk do të ndalte Shtetet e Bashkuara dhe aleatët që të veprojnë.

 

 

41 laureatë amerikanë të Çmimit Nobël kundërshtojnë një luftë unilaterale kundër Irakut

 

Uashington, 29 janar 2003 - Në një letër drejtuar Kongresit të Shteteve të Bashkuara, 41 laureatë amerikanë të Çmimit Nobël nga fusha të ndryshme të shkencës thonë se ata e kundërshtojnë një luftë unilaterale, preventive të Shteteve të Bashkuara kundër Irakut pa një mbështeje të gjërë ndërkombëtare.

 

Në letër thuhet se operacionet ushtarake kundër Irakut mund të shpienin vërtet në një fitore relativisht të shpejtë në aftat të shkurtër. Por në letër thuhet se lufta karakterizohhet nga befasi, humbje njerzore dhe pasoja të padëshirueshme.

 

 

Ushtria gjermane ndihmon misionin e Kombeve të Bashkuara në Irak

 

Berlin, 29 janar 2003 - Ushtria gjermane Bundesver do të dërgojë 45 specialistë për mbështetjen e misionit të inspektorëve të armatimit të Kombeve të Bashkuara në Irak. Ushtarët gjermanë do të marrin përsipër avionin e spiunazhit pa ekuipazh "Luna", njoftoi Bundesvehri në Berlin.

 

Për kohën e misionit ekspertët e Bundesverit do të marrin pushim dhe do të paguhen nga Kombet e Bashkuara. Me avionin e paekupipazh nga ajri do të vëzhgohen objektet e kontrolluara nga eskpertët e armatimit të Kombeve të Bashkuara.

Copyright©2000-2003 Trepca.net - Të gjitha të  drejtat e rezervuara.