Lajme

E marte, 28 janar 2003

Përmbajtja:

• Presidenti Rugova priti dje shefin e Zyrës Amerikane në Prishtinë, Harnish

• Për Ministrinë e Shëndetësisë emërimi i Pleurat Sejdiut sekretar permanent është i pavlefshëm

• Ombduspersoni Nowicki vizitoi KK të Prishtinës

• K.Portman: Kosova nuk mund të marrë kredi nga Bankës Botërore, por vetëm ndihma të kufizuara

• Në Lucern të Zvicrës tubim përkujtimor për kolonel Tahir Zemaj

• Sipas institutit "Riinvest", shkalla e papunësisë në Kosovë është 49 për qind

• Vazhdon takimi i ministrave të jashtëm të BE-së për Bllkanin

• Novicki thotë se mbi 20 mijë qytetarë nga të dyja anët e Mitrovicës kërkojnë lirimin e banesave të uzurpuara

• Qeveria maqedonase paralajmëron transformimin e njësitit "Luanët", ndërkaq BDI kërkon shpërbërjen e tyre

• Në Shkup është vrarë një inspektor i policisë maqedonase

• BE ka emëruar admiralin gjerman Rajner Feist si komandant të Misionit paqeruajtës në Maqedoni

• Forcat serbe bllokuan aksin rrugor Bujanoc - Konçul për shkak të një sulmi mbi një patrullë të policisë

• Në territoret palestineze janë vrarë 7 palestinezë

• Iraku premton bashkëpunim me inspektorët

• Armata izraelite ka vrarë dy palestinezë dhe ka plagosur një fotograf

• Të pakten 18 persona janë vrarë në luftimet në Afganistan

• Të pakten 42 udhëtarë kanë humbur jetën në një aksident trafiku

• Raporti i Bliksit: Iraku duhet të bëjë më shumë

• Komando terroriste afgane kanë hyrë në Çeki

• Në një aksident të një treni në tunelet alpine franceze, dy të vdekur dhe 10 të tjerë të lënduar

• Pauell: Përdorimi i forcës kundër Irakut mund të jetë i afërt

• Sonte presidenti Bush mban fjalim mbi gjendjen e vendit

Presidenti Rugova priti dje shefin e Zyrës Amerikane në Prishtinë, Harnish

 

Prishtinë, 28 janar 2003 - Presidenti i Kosovës Ibrahim Rugova priti dje shefin e Zyrës amerikane në Prishtinë z.Reno Harnish.

Në këtë takim u bisedua për çështjet aktuale në Kosovë dhe prioritetet e institucioneve të Kosovës në vitin 2003. Ambasadori Harnish e njoftoi presidentin Rugova për takimet që kishte gjatë qëndrimit të tij në Shtetet e Bashkuara me zyrtarë të lartë të administratës amerikane rreth Kosovës dhe rajonit.

 

Diplomati amerikan theksoi se do të vazhdojë përkushtimi dhe vemendja e qeverisë amerikane për Kosovën edhe në kohën kur SHBA-të janë të angazhuara rreth krizave të mëdha në botë, thuhet në një njoftim të Zyrës së Presidentit të Kosovës.

 

 

Për Ministrinë e Shëndetësisë emërimi i Pleurat Sejdiut sekretar permanent është i pavlefshëm

 

Prishtinë, 28 janar 2003 - Ministria e Shëndetësisë së Kosovës ka shpallur të pavlefshëm emërimin e Pleurat Sejdiut në detyrën e sekretarit permanent të kësaj ministrie.

 

Këshilltari i lartë i kësaj ministrie Muhamet Jusufi thotë se Pleurat Sejdiu nuk i plotëson kushtet meqenëse ai është një person aktiv në politikë, kurse, sipas tij, sekretari permanent duhet të jetë apolitik.

 

 

Ombduspersoni Nowicki vizitoi KK të Prishtinës

 

Prishtine, 28 janar 2003 - Ombduspersoni i Kosovës Marek Antonio Nowicki vizitoi sot Kuvendin Komunal të Prishtinës dhe bisedoi me kryetarin e KK të Prishtinës, Ismet Beqirin.

Ombduspersoni Novicki është njoftuar me ecuritë e përgjithshme në komunë me theks të veçantë rreth halleve dhe problemeve të shumta të qytetarëve siç është çështja e strehimit, banimit, aspektet e ndryshme sociale, pjesëmarrja e minoriteteve në administratën e komunes, infrastrukturën ligjore e të ngjashme.

Kyetari i KK të Prishtinës Ismet Beqiri tha se problemet janë të ndryshme dhe të shumta por po bëhen përpjekje që ato të tejkalohen sa më parë, kurse synim parësor është që qytetarëve t`u afrohen kushte e shërbime sa më të mira.

Ombduspersoni Nowicki tha se vizita e tij kishte për qëllim që të njihet me problemet dhe hallet e pushtetit lokal dhe me këtë rast shtroi disa pyetje lidhur me hallet e qytetarëve dhe për problemet sociale duke marrë parasysh shkallën e lartë të varfërisë ekstreme etj.

 

Nowicki përmendi me këtë rast edhe aktivitetin e Habitatit, i cili po zhvillon aksione konkrete rreth definimit të pronës. Ai shfaqi shqetësimin me atë se çfarë do të ndodhë me njerëzit që po nxirren jashtë banesave, dhe nuk kanë ku të strehohen.

Rreth këtyre çështjeve sqarime të duhura ka dhënë kryeshefi i ekzekutivit Berim Ramosaj dhe zëvendëskryetari i KK të Prishtinës, Shefki Gashi.

 

 

K.Portman: Kosova nuk mund të marrë kredi nga Bankës Botërore, por vetëm ndihma të kufizuara

 

Uashington, 28 janar 2003 - Meqenëse Kosova nuk është anëtare e Bankës Botërore nuk mund të marrë kredi nga kjo bankë, por merr vetëm ndihma të kufizuara, pasi nuk e ka të zgjidhur çështjen e statusit përfundimtar, thotë drejtori rajonal i Bankës Botërore për Evropën Juglindore, Kristian Portman.

Portman deklaroi për "Zërin e Amerikës" se statusi përfundimtar ndikon gjithashtu në kushtet e përgjithshme për zhvillimin e biznesit, pasi investitorët ngurojnë të angazhohen në Kosovë.

 

Por, Portman megjithatë theksoi se Banka Botërore do të vazhdojë ndihmat për Kosovën, në radhë të parë me një program që, siç thotë ai, është pritur mjaft mirë si nga UNMIK-u ashtu edhe nga qeveria e Kosovës. "Ne do t'i vazhdojmë këto përpjekje, por zhvillimi afatgjatë i Kosovës kërkon ndryshimin e gjendjes aktuale", nënvizoi Portman.

 

 

Në Lucern të Zvicrës tubim përkujtimor për kolonel Tahir Zemaj

 

Lucern, 28 janar 2003 - Të dielen më 26 janar 2003, në Perlen të kantonit Lucern, në organizim të Degës së LDK-së për Zvicër u mbajt një tubim përkujtimor ku u nderua figura e kolonel Tahir Zemajt, të vrarë më 4 janar, si dhe u përkujtuan të gjitha figurat kombëtare të vrara tradhtisht në muajin janar.

Në këtë tubim foli anëtari i kësaj dege inxh. Gani Demi, i cili tha se se janar 2003ët janë plagë e rëndë kombëtare, dhe pavarësisht nga qëllimet kobzeza Kosova do ta realizojë pavarësinë e saj, e me këtë do të çojë në vend amanetin e të gjithë brezave të rënë për idealin e lirisë.

 

Një kronologji historike të vrasjeve dhe atentateve që kanë ndodhur pikërisht në muajin janar e bëri Hajdar Sadrija, sekretar i kësaj dege, kurse nënkryetari i degës inxh.Isa Maliqi foli për jetën dhe vepren e kolonelit duke e potencuar shkollimin dhe arritjet e Tahir Zemajt në fushën ushtarake.

 

Fjalimi që emocionoi më shumë të pranishmit ishte ai i Agim Mehmetajt, zëvendësministër i ushtrisë së Kosovës i cili foli në mënyrë profesionale për Tahir Zemajn, duke e cilësuar ndër ekspertët e rrallë ushtarak që ka pasur Kosova.

Në këtë tubim folën edhe bashkëluftëtarët e kolonelit, oficerët e karrierës Nazif Ramabaja dhe Shpend Shala të cilët nga këndvështrimet e tyre evokuan kujtime për kolegun dhe komandantin Tahir Zemaj.

Në emër të familjes për organizimin e kësaj akademie Degën e LDK-së në Zvicër e falenderoi Nexhat Zemaj, i vëllai i kolenelit.

 

 

Sipas institutit "Riinvest", shkalla e papunësisë në Kosovë është 49 për qind

 

Prishtinë, 28 janar 2003 - Shkalla e papunësisë në Kosovë vlerësohet 49 për qind, ndërkaq numri i të rinjve të papunë është 72 për qind. Ndryshe 62 për qind e të papunëve llogariten të jenë femra.

 

Këto janë të dhënat e një ankete nga Instituti për Hulumtime Zhvillimore - "Riinvest". Hulumtimi bazohet në anketimin e 1200 familjeve kosovare, 600 ndërmarrjeve të vogla dhe të mesme si dhe nga informacionet e institucioneve të rëndësishme, bëjnë të ditur burimet e këtij Instituti.

Mirëpo këto rezultate nuk përputhen me statistikat zyrtare në Kosovë. Sipas Entit të Statistikave të Kosovës dhe Ministrisë së Punës dhe Mirëqenies Sociale, shkalla e papunësisë në Kosovë është rreth 57 për qind.

 

 

Vazhdon takimi i ministrave të jashtëm të BE-së për Bllkanin

 

Bruksel, 28 janar 2003 - Ministrat e jashtëm të BE-së në takimin e tyre në Bruksel diskutuan dje mes tjerash edhe për mundësinë që të gjendet modalitetet e përfshirjes së Kosovës në procesin e stabilizim - asociimit, megjithëse nuk është afruar fare në gjetjen e formulës që kërkohet për këtë gjë.

 

Në këtë rrafsh presidenca greke e BE-së vlerëson se gjetja e modaliteteve të përmendura duhet të jetë konform Rezolutës 1244 dhe parimit të standardeve para statusit politik të Kosovës. Ky debat është bërë duke komentuar një letër pune për Ballkanin të paraqitur nga ministri i jashtëm i Greqisë Jorgos Papandreu, i cili edhe është kryesues i Këshillit të ministrave të BE-së.

 

Ministrat e tjerë të vendeve të BE-së i kanë dhënë mbështetje këtij projekti të Greqisë me të cilin ftohet BE-ja që të përfshijë edhe Ballkanin në procesin e zgjerimit. Në konkluzat e takimit të djeshëm të ministrave të jashtëm të BE-së lidhur me Ballkanin më shumë janë adresuar çështjet e Bosnje e Hercegovinës dhe problemet në raportet mes Serbisë dhe Malit të Zi.

Në takimin e ministrave të jashtëm të BE-së është paraqitur po ashtu edhe një dokument, në të cilin nënvizohet përkrahja për fillimin sa më të shpejt të negociatave me Shqipërinë në procesin e stabilizim - asociimit.

Në ditën e dytë të takimit të ministrave në Bruksel, sot do të marrë pjesë edhe kryedministratori i Kosovës Mihael Shtajner.

Për sot ministrat e jashtëm të BE-së kanë paralajmëruar një debat publik për situatën në Ballkan.

 

 

Novicki thotë se mbi 20 mijë qytetarë nga të dyja anët e Mitrovicës kërkojnë lirimin e banesave të uzurpuara

 

Mitrovicë, 28 janar 2003 - Çështja e kthimit të njerëzve në Mitrovicë nëpër shtëpitë e tyre mvaret nga zhvillimet dhe vendimet politike jo vetëm për Mitrovicën, por për Kosovën në përgjithësi, ka deklaruar gjatë vizitës së djeshme në këtë qytet, ombduspersoni Marek Antoni Novicki.

 

Ai ka zhvillur biseda me qytetarët e Mitrovicës në mënyrë që të identifikojë mosrespektimin e të drejtave të njeriut.

 

Sipas z. Novicki njëri ndër problemet më të theksuara është ai i banimit. Për mbi 20 mijë qytetarë të zhvendosur nga të dyja anët e qytetit sipas tij kërkojnë që banesat e tyre të uzurpuara të lirohen.

 

Derisa në anën jugore organizata që merret me këto çështje "Habitat" ka treguar rezultate qeveria ende nuk ka filluar veprimtarinë. Mirëpo Novicki paralajmëroi aktivizimin e "Habitatit" në veri të qytetit.

Ombduspersoni Novicki paralajmëroi se së shpejti një zyre të këtij institucioni do të hapet edhe në veri të Mitrovicës.

 

 

Qeveria maqedonase paralajmëron transformimin e njësitit "Luanët", ndërkaq BDI kërkon shpërbërjen e tyre

 

Shkup, 28 janar 2003 - Qeveria maqedonase në mledhjen e djeshme nuk ka miratuar planin aksional për jetësimin e Marrëveshjes së Ohrit. Po në këtë mbledhje zëvendëskryeministri Musa Xhaferi ka kërkuar të dhëna më të sakta rreth përfaqësimit të shqiptarëve në Agjencinë për nëpunësit shtetëror dhe në Entin e Punësimit.

Për planin rreth zbatimit të Marrëveshjes së Ohrit qeveria maqedonase do të debatojë të hënën e ardhshmne dhe kjo është hera e tretë që është shtyrë miratimi i këtij plani.

Qeveria ka paralajmëruar se në mbledhjen e parë të saj do diskutojë lidhur me njësitin paramilitar "Luanët" me të cilin autoritetet e këtij vendi kanë arritur marrëveshje që rreth 600 prej tyre të transformohen në strukturat e rregullta të sigurimit dhe të përfshihen në polici, ose në ushtri.

 

Por, partia shqiptare - Bashkimi Demokratik për Integrim, nuk e mbështet këtë plan. Ajo kërkon shpërbërjen e njësitit "Luanët", sepse kështu parasheh Marrëveshja e Ohrit.

 

 

Në Shkup është vrarë një inspektor i policisë maqedonase

 

Shkup, 28 janar 2003 - Persona të paidentifikuar kanë qëlluar për vdekje të dielën në mbrëmje një inspektor të policisë maqedonase në lagjen "Çair" të Shkupit. Organet e rendit kanë njoftuar se vrasja e policit ka ndodhur para banesës kur dy persona me armë zjarri e kanë sulmuar atë.

 

Ende nuk dihen motivet e vrasjes dhe askush nuk e ka marrë përsipër këtë vepër, ndërkaq policia po heton ndriçimin e plotë të saj. Sipas autoriteteve maqedonase brenda dy ditësh në këtë vend vritet nga një person.

 

 

BE ka emëruar admiralin gjerman Rajner Feist si komandant të Misionit paqeruajtës në Maqedoni

 

Bruksel, 27 janar 2003 - Bashkimi Evropian ka emëruar admiralin gjerman Rajner Fist si komandant të Misionit paqeruajtës në Maqedoni, mision i cili besohet se do të nisë veprimtarinë e tij në këtë vend në muajin mars të këtij viti. BE-ja synon të ketë një mision me rreth 400 ushtarë dhe fillimisht do të ketë nevojë për një buxhet prej 4.7 milionë eurosh.

 

 

Forcat serbe bllokuan aksin rrugor Bujanoc - Konçul për shkak të një sulmi mbi një patrullë të policisë

 

Preshevë, 28 janar 2003 - Gjatë natës së diele dhe gjatë paraditës së të hënës, forcat serbe mbajtën të bllokuar aksin rrugor Bujanoc - Konçul. Bllokimi i kësaj rruge ka ndodhur pas sulmit mbi një patrullë të policisë multietnike në të njëjtin aks rrugor.

 

 

Në territoret palestineze janë vrarë 7 palestinezë

 

Gaza, 28 janar 2003 - Dhuna në territoret palestineze ka vazhduar gjatë votimit të izraelitëve dhe kështu përpos vrasjes së dy palestinezëve gjatë një shkëmbimi zjarri me ushtarët izraelitë në qytetin Xhenin të Bregut Perendimor, janë vrarë edhe tre palestinezë gjatë natës në një shpërthim në Gaza, për të cilin palestinezët fajësojnë predhat izraelite, kurse Izraeli ka thënë se është shkaktuar nga një aksident në një fabrikë bombash të militantëve, njofton BBCWorld. Ndërkaq, AFP njofton për shtatë palestinezë të vrarë gjatë sulmeve të sotme izraelite.

Ndërkohë, njoftohet se votimi izraelit po zhvillohet në kushte të përforcimit të madh të sigurisë, ku janë dislokuar dhjetëra mijë pollicë dhe ushtarë izraelitë.

 

 

Iraku premton bashkëpunim me inspektorët

 

Bagdad, 28 janar 2003 - Zëvendëskryeministri irakian, Tarik Aziz, ka premtuar bashkëpunim më të plotë me inspektorët e OKB-së për armët të cilët po kërkojnë armë të shkatërrimit në masë që mund të ketë Iraku.

Tarik Aziz tha se midis Irakut dhe inspektorëve ishin vetëm dy çështje për të cilat dallonin qëndrimet e tyre: përdorimi i avionëve të survejimit U2 në hapësirën ajrore të Irakut dhe kushtet në të cilat mund të intervistohen shkencëtarët irakianë, njofton BBC.

Komentet e tij pasojnë një vlerësim të kryeinspektorit të armëve Hans Bliks, i cili tha se kishte pyetje që ende nuk kishin marrë përgjigje lidhur me programin e armëve të Irakut, dhe shprehu dyshimin nëse Bagdadi vërtetë pranonte nevojën për çarmatim.

 

 

Armata izraelite ka vrarë dy palestinezë dhe ka plagosur një fotograf

 

Xhenin, 28 janar 2003 – Armata izraelite ka vrarë sot (të martën) dy palestinezë në një kohë që popullata palestineze është mbyllur në Bregun Perendimor dhe në Rripin e Gazës para ditës së zgjedhjeve të përgjithshme të Izraelit, njofton Rojter.

 

Mjekët palestinezë kanë thënë se një nga dy të vrarët në qytetin e Bregut Perendimor, Xhenin, ishte i armatosur dhe është qëlluar gjatë shkëmbimit të zjarrit me trupat izraelite, kurse tjetri është një 17-vjeçar dhe është qëlluar gjatë shkuarjes së tij me vrap për t'i dhënë ndihmë të armatosurit.

 

Ndërkaq, armata ka thënë se të dy kanë qenë të armatosur dhe janë vrarë në luftimet me ushtarët gjatë një operacioni të arrestimit të militantëve. Po kështu, njoftohet se një fotograf palestinez, që punonte për AFP, është qëlluar në këmbë gjatë këtij incidenti, kanë bërë të ditur mjekët.

 

 

Të pakten 18 persona janë vrarë në luftimet në Afganistan

 

Baza Ajrore e Bagramit, 28 janar 2003 – Të pakten 18 persona janë vrarë gjatë më shumë se 24 orë luftime të rrepta dhe të pandërprera ndërmjet forcave të koalicionit, të udhëhequr nga amerikanët dhe rreth 80 sulmuesve në juglindje të Afganistanit afër kufirit me Pakistanin, thuhet në një deklaratë të forcave ushtarake amerikane nga baza ajrore e Bagramit, në veri të Kabulit, njofton AFP.

 

Njoftohet gjithashtu se nga ana e koalicionit s'ka pasur të vrarë.

 

 

Të pakten 42 udhëtarë kanë humbur jetën në një aksident trafiku

 

Nju Delhi, 28 janar 2003 – Të pakten 42 udhëtarë kanë humbur jetën duke u djegur kur një autobus luksoz turistik është ndeshur sot (të martën) me ballin e një kamioni, që barte ngjyra dhe kemikalie në shtetin lindor të Indisë, në Bengalin Perendimor, njofton UPI.

 

Aksidenti ka ndodhur në kushte të mjegullës së dendur dhe të dukshmërisë së vogël. Informacione më të hollësishme për gjendjen e të lënduarëve eventualë dhe të hospitalizimit të tyre, ende nuk janë dhënë.

 

 

Raporti i Bliksit: Iraku duhet të bëjë më shumë

 

Nju Jork, 28 janar 2003 - Inspektorët e Kombeve të Bashkuara që po kërkojnë për armë të shkatërrimit në masë në Irak, i kanë dorëzuar një raport shumë të rëndësishëm Këshillit të Sigurimit. Kryeinspektori, Hans Bliks ishte shumë kritik ndaj Irakut. Ai tha se Bagdadi ka bashkëpunuar vetëm me ngurrim me inspektorët e Kombeve të Bashkuara.

 

Po kështu, sipas z. Bliks, Iraku ende ka stoqe të antraksit, nuk ka dhënë përgjigje se ku ndodhen rreth 300 motora raketash dhe se deklarata e arsenalit të armëve të Irakut nuk përmban materiale të reja."Iraku duket se nuk e ka pranuar çarmatimin që iu kërkua të bëjë," tha ai.

 

Shefi i Agjencisë Atomike Ndërkombëtare, megjithatë tha se inspektorët nuk kanë gjetur prova se Iraku ka rifilluar programin bërthamor që e ndaloi përkohësisht në fillim të viteve '90.Por Muhamed El-Baradai tha se inspektorëve u duheshin "disa muaj të tjerë" për të vazhduar punën dhe e përshkroi këtë si "investim me vlerë për paqen".

 

 

Komando terroriste afgane kanë hyrë në Çeki

 

Pragë, 28 janar 2003 - Zyrtarët dhe forcat e rendit në Republikën Çeke janë në gjendje gatishmërie pas njoftimeve se komando terroriste afgane kanë hyrë në këtë vend. Kreu i policisë, Jiri Kolar, tha se ata po shqyrtojnë informacionet e ardhura nga shërbimet e sigurisë. Edhe policia federale gjermane ka njoftuar se ka informacione se komando terroriste afgane kanë hyrë dhe në Gjermani.

 

 

Në një aksident të një treni në tunelet alpine franceze, dy të vdekur dhe 10 të tjerë të lënduar

 

Nisë, 28 janar 2003 - Një tren është aksidentuar në një nga tunelet alpine franceze, që lidh Francën me Italinë, duke shkaktuar vdekjen e dy pasagjerëve dhe plagosjen e 10 të tjerëve.

 

 

Pauell: Përdorimi i forcës kundër Irakut mund të jetë i afërt

 

Uashington, 28 janar 2003 - Sekretari amerikan i Shtetit, Kolin Pauell, duke dhënë përgjigjen zyrtare të administratës së presidentit Bush ndaj raportit të inspektorëve të Kombeve të Bashkuara për armët, tha se Irakut nuk i ka mbetur shumë kohë të zbatojë rezolutën e Këshillit të Sigurimit, që u miratua nëntorin e kaluar. Pauell la të kuptohet se vendimet lidhur me përdorimin e mundshëm të forcës kundër Irakut mund të merren brenda disa ditësh.

 

Pauell tha se gjatë pak ditëve të ardhshme nuk do të meret ndonjë vendim lidhur me ndërhyrjen ushtarake kundër Irakut, ndërkohë që raporti i inspektorëve debatohet dhe administrata e presidentit Bush këshillohet me vendet mike dhe aleate lidhur me masat e ardhshme.

 

Megjithatë, zoti Pauell e bëri më se të qartë se Shtetet e Bashkuara nuk kanë asnjë interes që ta zgjasin me javë ose muaj procesin e inspektimeve gjatë të cilin Iraku nuk ka dhënë asgjë më shumë se sa vetëm një bashkëpunim pasiv.

 

 

Sonte presidenti Bush mban fjalim mbi gjendjen e vendit

 

Uashington, 28 janar 2003 - Sonte presidenti Bush del përpara Kongresit dhe popullit amerikan për të mbajtur fjalimin e tij mbi gjendjen e vendit. Ai do të përpiqet të sigurojë mbështetje për një sulm të mundshëm kundër Irakut si dhe të rrisë besimin e publikut për politikat e tij ekonomike.

 

Ky fjalim do të mbahet në një moment kritik dhe mund të jetë fjalimi më i rëndësishëm i presidencës së zotit Bush. Zëdhënësi i Shtëpisë së Bardhë, Ari Fleiçer, thotë se pjesa e fjalimit që ka të bëjë me Irakun, nuk do të përfshijë afate, apo ndonjë deklarim lufte.

Copyright©2000-2003 Trepca.net - Të gjitha të  drejtat e rezervuara.