Lajme

E shtune, 25 janar 2003

Përmbajtja:

• Mbrëmë në Pejë është vrarë Sinan Kastrati 21-vjeçar

• Qeveria amerikane dënon sulmin ndaj selisë së policisë së UNMIK-ut në Pejë

• Lejohet procesimi i metejshem i pronave private

• Forcat e KFOR-it në kufirin midis Kosovës dhe Serbisë filluan stërvitjen "Roja e shpejtë"

• R. Harnish: Investitorët amerikanë do të investojnë ndërtimin e disa objekteve prodhuese në komunën e Prishtinës

• Deputetët e koalicioni serb "Kthimi" i japin fund bojkotimit të punimeve të Parlamentit të Kosovës

• Misioni i KFOR-t u dorëzoi autoriteteve civile kalimin kufitar ndërmjet Kosovës dhe Serbisë

• Beogradi kërkoi nga Kombet e Bashkuara kthimin e forcave ushtarake e policore jugosllave në Kosovë

• Ali Ahmeti është hequr nga "lista e zezë" e Bushit?

• Bashkimi Evropian do të riorganizojë misionin e tij në Luginën e Preshevës

• Amnesti Interneshënel kritikoi ashpër Maqedoninë për torturimin e të arrestuarve

• FMN shtyn mbledhjen e bordit për Shqipërinë

• Pauell: SHBA llogarisin mbështetjen e "të pakten një duzine" qeverish nëse vendosin të sulmojnë Irakun

• Shkencëtarët amerikanë kanë zbuluar një proteinë, që shkakton vetëshkatërrimin e qelizave kanceroze

• Sadam Husein t'u lejojë inspektorëve që të intervistojnë privatisht shkencëtarët irakianë

• Putin dhe Shreder janë dakorduar të kërkojnë shtegdalje politike për zgjidhjen e krizës irakiane

• Komandanti i ri i forcave të NATO-s u takua me kryeshefin e Shtatmadhërisë turke

• Policia spanjolle se ka arrestuar 16 persona në Bilbao

• Në fatkeqësi ajrore kanë humbur jetën një ministër dhe një pilot, kurse tre ministra janë plagosur

• Ligjvënës amerikanë i bëjnë thirrje Presidentit ta peshojë mirë ndërhyrjen në Irak

Mbrëmë në Pejë është vrarë Sinan Kastrati 21-vjeçar

 

Pejë, 25 janar 2003 - Mbrëmë në Pejë me një plumb në kokë është vrarë Sinan Kastrati (20) nga fshati Zahaq. Kjo vrasje ka ndodhur në orën 22,30, në rrethana ende të panjohura, afër restoranit "Peja Citi" në Pejë, pas një konflikti mes dy grupeve.

 

Policia ka dalë menjëherë në vendin e ngjarjes për t'i zhvilluar hetimet lidhur me këtë vrasje. Tash për tash nuk dihen motivet e kësaj vrasjeje.

Sipas mediave lokale, dy persona janë arrestuar si të dyshimtë për vrasjen e Sinan Kastratit. Ata janë: Muhamet Dreshaj dhe Elton Arifaj.

Edhe kjo vrasje ka shqetësuar pa masë qytetarët e Pejës, pas një serie të vrasjeve që kanë ndodhur në këtë qytet.

 

 

Qeveria amerikane dënon sulmin ndaj selisë së policisë së UNMIK-ut në Pejë

 

Prishtinë, 25 janar 2003 - Qeveria e Shteteve të Bashkuara dënoi dje sulmin e natës së kaluar ndaj selisë së policisë së UNMIK-ut në Pejë. Në një deklaratë të Zyrës Amerikane në Prishtinë thuhet se ky akt nuk ishte thjesht një sulm ndaj ndërtesës, por ndaj strukturave ligjore dhe sistemit të drejtësisë në Kosovë.

 

Në deklaratë thuhet se kohët e fundit ka pasur një varg sulmesh në Prishtinë dhe Pejë si dhe njoftime për një grup të armatosur që ka kërcënuar për hakmarrje në kundërshtim me ligjin, gjë që Qeveria amerikane e dënon me forcë.

 

Organizatorët e këtyre sulmeve, thotë Zyra amerikane në Prishtinë, nuk duan një Kosovë me një shoqëri civile të rregullit, por një Kosovë ku do të sundojë dhuna. Ata po punojnë kundër ëndrrave dhe shpresave të popullit të Kosovës që don një Kosovë ku të sundonte ligji pa dhunë dhe që të përparojë paqësishtë dhe në rrugë demokratike me Rezolutën 1244.

 

Në këtë komunikatë pastaj theksohet se Qeveria amerikane u bënë thirrje kujtdo që di diçka për këto sulme të bashkëpunojë me policinë dhe institucionet e drejtësisë në Kosovë për të nxjerr fajtorët para drejtësisë.

 

 

Lejohet procesimi i metejshem i pronave private

 

Prishtinë, 25 janar 2003 - Administratori Komunal i Prishtines z.Anil Vasisht ka njoftuar me shkrim Drejtoratin për Katastër dhe Gjeodozi të KK të Prishtinës lidhur me ndryshimin e vendimit ekzekutiv të datës 26.12.2002. Në njoftimin e administratorit komunal thguhet se Komisioni për Revizion nën mbikqyrjen e administratorit komunal të Prishtinës ka rekomanduar ndryshimin e mëposhtëm të vendimit ekzekutiv të datës 26.12.2002.

 

Sipas këtij ndryshimi tani e tutje të gjitha bartjet e pronave private te kryera nga 12 qershori i 1999 deri më 24 shtator 2002 lejohen në procesim të mëtutjeshëm. Zyra Komunale për Kastaster e Prishtines lejhohet që të lëshojë listat poseduese vetëm për bartjen e pronave private.

Të gjitha rastet në lidhje me bartjen e pronave shoqërore që i përkasin periudhës nga 12 qershori 1999 e deri më tani mbeten të përjashtuara nga bartja e pronësisë dhe lëshimi i listave poseduese, përveç rasteve me autorizim të Komisionit për Revizion.

 

 

Forcat e KFOR-it në kufirin midis Kosovës dhe Serbisë filluan stërvitjen "Roja e shpejtë"

 

Prishtinë, 25 janar 2003 - Forcat e KFOR-it amerikan dje në kufirin midis Kosovës dhe Serbisë në fshatin Barajli të Komunës së Dardanës kanë filluar stërvitjen ushtarake vjetore "Roja e shpejtë".

 

"Fillimi i ushtrimeve që ne po i bëjmë në Kosovë është që të jemi në gjendje gatishmërie në rast se një gjë të tillë e kërkon nevoja", tha një kapiten i forcave amerikane. Ai vlerësoi me këtë rast se gjendja në këtë zonë kufitare mes Kosovës dhe Serbisë është e sigurt dhe e qetë.

 

Nuk është shënuar asnjë incident dhe ushtrimet po shkojnë ashtu siç janë planifikuar. Ushtarët që po i bëjnë këto ushtrime theksuan se janë krenarë që gjenden në këtë detyrë në Kosovë dhe porositën popullatën e Kosovës që të flenë e qetë sepse kufiri dhe territori i Kosovës është i sigurt.

Ushtrimet ushtarake "Roja e shpejtë" do të përfundojnë nga fundi i muajit shkurt.

 

 

R. Harnish: Investitorët amerikanë do të investojnë ndërtimin e disa objekteve prodhuese në komunën e Prishtinës

 

Prishtinë, 25 janar 2003 - Shefi i Zyrës Amerikane në Prishtinë ambasadori Reno Harnish ka deklaruar gjatë vizitës së djeshme në Kuvendin Komunal të Prishtinës se investitorët nga Shtetet e Bashkuara të Amerikës do të investojnë ndërtimin e disa objekteve prodhuese në Komunën e Prishtinës.

 

 

Deputetët e koalicioni serb "Kthimi" i japin fund bojkotimit të punimeve të Parlamentit të Kosovës

 

Prishtinë, 25 janar 2003 - Deputetët e koalicioni serb "Kthimi" kanë vendosur t'i japin fund bojkotimit të punimeve të Parlamentit të Kosovës. Ky vendim i tyre u bë i ditur nga shefi i grupit parlamentar Dragisha Kërstoviq, i cili tha se tashmë një kohë të gjatë ky koalicion ishte preokupuar që të kthehet apo të vazhdojë bojkotimin e Parlamentit.

 

Ai tha se ky koalicion me shumicë votash ka marrë vendimin për t'u kthyer në Parlamentin e Kosovës. Vendimi, tha ai, pasoi bisedimet e ngjeshura që janë zhvilluar kohëve të fundit me zyrtarët e Beogradit, me patrikun e kishës ortodokse serbe, si dhe me Misionin e OKB-së në Kosovë Mihael Shtajner si dhe me ambasadorët e pesë vendeve më me ndikim në botë, me përfaqësuesit e të cilëve është biseduar edhe dje në Prishtinë.

Kërstoviq tha se gjatë këtyre bisedimeve janë marrë garanci se bashkësia ndërkombëtare e posaqërisht prania ndërkombëtre në Kosovë do të angazhohet për mbrojtjen e interesave të serbëve.

Kryeadministratori i Kosovës Mihael Shtajner ka përshëndetur vendimin e deputetëve serbë nga Koalicioni "Kthimi" që të marrin pjesë në Kuvendin e Kosovës duke thënë se vetëm në këtë mënyrë ata mund ta bëjnë zërin e tij të dëgjohet.

 

 

Misioni i KFOR-t u dorëzoi autoriteteve civile kalimin kufitar ndërmjet Kosovës dhe Serbisë

 

Prishtinë, 25 janar 2003 - Misioni paqeruajtës ndërkombëtar KFOR u dorëzoi dje autoriteteve civile kalimin kufitar ndërmjet Kosovësët dhe Serbisë. Vijën kufitare me Serbinë edhe mëtutje do ta kontrollojë KFOR-i.

 

Komandanti i sektorit verior të forcave paqeruajtëse në mënyrë simbolike ia ka dorëzuar çelësat e portë numër një e cila gjendet në veri të Kosovës komandantit rajonal të policisë së OKB-së Poll Beri.

"Policia e UNMIK-ut dhe ushtarët e Brigadës Shumkombëshe të Veriut kanë arritur ta krijojnë dhe ta ruajnë një mjedis të sigurt që na mundëson zbatimin e kësaj qasjeje të re prej secilës do të përfitojnë vet qytetarët e Kosovës", tha komandanti i Sektorit Verior Alan Bidar.

 

 

Beogradi kërkoi nga Kombet e Bashkuara kthimin e forcave ushtarake e policore jugosllave në Kosovë

 

Beograd, 25 janar 2003 - Autoritetet jugosllave kanë kërkuar që Kombet e Bashkuara të lejojnë kthimin e një pjese të forcave ushtarake e policore në Kosovë. Këtë e ka bërë të ditur ministri jugosllav i punëve të brendshme Zoran Zhivkoviq, i cili ka deklaruar se me rëndësi është që forcat jugosllave të kthehen në kufi me Shqipërinë dhe Maqedoninë nga të cilat, sipas Zhivkoviqit, hyjnë "pjesa më e madhe të këqijave".

 

 

Ali Ahmeti është hequr nga "lista e zezë" e Bushit?

 

Shkup, 25 janar 2003 - Ali Ahmeti, kryetar i BDI-së dhe lider i ri i shqiptarëve te Maqedonisë, është hequr definitivisht nga "lista e zezë" e Presidentit Xhorxh Bush. Kështu thonë burime të LOBI-t ende të pakonfirmuara, që kanë dashur të mbeten anonime.

 

Po këto burime thonë gjithashtu se kryetari i BDI-se, Ali Ahmeti së shpejti do të qëndrojë për një vizitë në Uashington, njofton Press online nga Shkupi.

 

 

Bashkimi Evropian do të riorganizojë misionin e tij në Luginën e Preshevës

 

Bruksel, 25 janar 2003 - Bashkimi Evropian ka bërë të ditur se do të riorganizojë misionin e tij në Luginën e Preshevës, i cili ishte instaluar atje me qëllim të tejkalimit të krizës dhe uljes së tensioneve në këtë rajon.

Zyrtarët e BE-së që janë kompetentë për Luginën e Preshevës kanë kumtuar se në kuadër të këtij riorganizimi është marrë vendimi që të mbyllet Zyra e Misionit në Medvegjë me vlerësimin se situata është përmirësuar dhe nuk kërkon më prani ndërkombëtare meqë incidentet ndëretnike gati se nuk ekzistojnë.

"Lajmi mbi tërheqjen tonë të plotë do të jetë më i miri në rajon sepse do të dëshmojë se situata në këtë rajon është përmirësuar në atë masë ku më nuk nevojitet prania ndërkombëtare", kanë vlerësuar burimet nga BE-ja.

 

 

Amnesti Interneshënel kritikoi ashpër Maqedoninë për torturimin e të arrestuarve

 

Shkup, 25 janar 2003 - Grupi i njohur ndërkombëtar për të drejtat e njeriut, Amnesti Interneshënal, ka kritikuar ashpër Maqedoninë për torturimin e të arrestuarve nga ana e policisë, veçanërisht të pjesëtarëve të minoriteteve.

 

Në komunikatën e saj thotë se keqtrajtimet nga ana e oficerëve të policisë në Maqedoni po vazhdojnë, megjithë kërkesat ndërkombëtare që ato të ndërpriten.

 

Grupi shton se incidentet që ndërlikojnë brutalitetin policor "kanë në vete motivim të hapur etnik apo racial" dhe kërkon nga qeveria e Shkupit që të shqyrtojë urgjentisht çështjen.

"Autoritetet e Maqedonisë duhet t'u dërgojnë sinjal të qartë forcave të tyre policore se tortura, keqtrajtimi dhe trajtimi diskriminues i të arrestuarve nuk do të tolerohen", thuhet në komunikatë të AI.

 

 

FMN shtyn mbledhjen e bordit për Shqipërinë

 

Tiranë, 25 janar 2003 - Fondi Momentar Ndërkombëtar thotë se ka shtyrë një mbledhje të bordit të saj drejtues në të cilën do të duhej të vendosej për financimin e projekteve për varfërinë në Shqipëri.

 

Përfaqësuesi i këtij organizmi financiar në Tiranë, Zhan Piter Olters i tha BBC-në se FMN-ja parashikon të mbështesë me 30 milionë dollarë projekte të qeverisë kundër varfërisë dhe për zhvillimin.

 

Ai thotë se arsyeja e shtyrjes së mbledhjes së bordit është se Shqipëria ende nuk ka miratuar një nga kushtet kryesore të vëna nga FMN-ja, që është mbyllja e dyqaneve pata taksa, "duty-free".

 

 

Pauell: SHBA llogarisin mbështetjen e "të pakten një duzine" qeverish nëse vendosin të sulmojnë Irakun

 

Cyrih, 25 janar 2003 – Shtetet e Bashkuara llogarisin mbështetjen e "të pakten një duzine" qeverish nëse vendosin të sulmojnë Irakun pa rezolutë të re të KB-së, ka deklaruar sot (të shtunën) sekretari amerikan i Shtetit, Kolin Pauell, njofton Rojter.

 

Pauell ka thënë se këto qeveri, të cilat nuk i emëroi, do të preferonin njësoj si Uashingtoni një rezolutë të re të Këshillit të Sigurimit, që do të autorizonte përdorimin e forcës kundër Irakut, por nuk do të insistonin për këtë.

 

 

Shkencëtarët amerikanë kanë zbuluar një proteinë, që shkakton vetëshkatërrimin e qelizave kanceroze

 

Uashington, 25 janar 2003 – Shkencëtarët amerikanë kanë zbuluar një proteinë, e cila shkakton vetëshkatërrimin e qelizave kanceroze deri në 70 për qind të tyre, njofton BBCWorld. Kjo proteinë rregullon prodhimin e enzimit kryesor, Cox-2, që ndikon në regjenerimin e gjakut, i cili pastaj ushqen qelizat e shtuara kanceroze.

 

Enzimi në fjalë është i njohur, që luan rol në shkaktimin e artritit. "Mund të jetë e mundshme të përdoret ky protein si mjet për mbytjen e qelizave të tumorit pa i dëmtuar qelizat normale", ka thënë profesori Shrikant Anant, nga Shkolla Universitare e Mjekësisë në Uashington.

 

 

Sadam Husein t'u lejojë inspektorëve që të intervistojnë privatisht shkencëtarët irakianë

 

Uashington, 25 janar 2003 - Shtetet e Bashkuara thonë se është i "papranueshëm" refuzimi i presidentit irakian, Sadam Husein që t'u lejojë inspektorëve të armatimit të OKB-së që të intervistojnë privatisht shkencëtarët irakianë. "Kjo nuk është çështje për debat. Sadam Husein nuk ka zgjedhje.

 

Refuzimi i tij është edhe një provë se Iraku ka diçka për të fshehur. Për të ruajtuar paqen, Iraku duhet t'u lejojë dhe inkurajojë shekncëtarët e vet që të marrin pjesë në intervistime private pa vonesë dhe pa debat", tha zëdhënësi i Shtëpisë së Bardhë, Ari Fleiçer.

Ai nuk tha nëse presidenti Bush është i gatshëm t'u japë më shumë kohë inspektimeve në Irak, por ka thënë se Sadam Husein, me sjelljen e tij, “po e afron edhe më shumë vijën e fundit”.

 

 

Putin dhe Shreder janë dakorduar të kërkojnë shtegdalje politike për zgjidhjen e krizës irakiane

 

Moskë, 25 janar 2003 - Presidenti rus, Vladimir Putin dhe kancelari gjerman, Gerhard Shreder në bisedë telefonike janë dakorduar të kërkojnë shtegdalje politike për zgjidhjen e krizës irakiane.

 

Zëdhënësi i Kremlinit tha se Putin dhe Shreder kanë theksuar afërsinë e qëndrimeve të Rusisë dhe Gjermanisë në kërkimin e zgjidhjes politike të problemit iarkian në kuadrin e korrnizave të Kombeve të Bashkuara.

 

 

Komandanti i ri i forcave të NATO-s u takua me kryeshefin e Shtatmadhërisë turke

 

Ankara, 25 janar 2003 - Komandanti i ri suprem i forcave të NATO-s për Evropën, gjenerali amerikan Xhejms Xhons, u takua në Ankara me kryeshefin e Shtatmadhërisë turke, gjeneralin Hilmi Ozkok.

 

Në komunikatë thuhet se Xhons dhe Ozkok “kanë shkëmbyer mendime lidhur me NATO-n dhe për çështje rajonale”, kurse hollësi të tjera për bisedimet nuk u dhanë.

 

 

Policia spanjolle se ka arrestuar 16 persona në Bilbao

 

Madrid, 25 janar 2003 - Policia spanjolle thotë se ka arrestuar 16 persona në Bilbao dhe qytete të tjera veriore, kryesisht shtetas alegjerianë, në banesat e të cilëve ka gjetur sasi të mëdha materjesh shpërthyese dhe materjesh kimike dhe se kanë planifikuar sulme.

 

Ministri i Brendëshëm spanjoll tha se të arrestuarit janë anëtarë të dyshuar të një organizate ekstremiste algjeriane dhe se kanë lidhje me rrjetin terrorist al Kaida.

 

 

Në fatkeqësi ajrore kanë humbur jetën një ministër dhe një pilot, kurse tre ministra janë plagosur

 

Nairobi, 25 janar 2003 - Në fatkeqësinë e një aeroplani të vogël me të cilin udhëtonin disa anëtarë të qeverisë së re të Kenisë, kanë humbur jetën një ministër dhe një pilot, kurse tre ministra janë plagosur. Aeroplani është rëzuar menjëherë pas fluturimit nga qyteti Busia, pasi kishte prekur telat e largëpërçuesit elektrik.

 

 

Ligjvënës amerikanë i bëjnë thirrje Presidentit ta peshojë mirë ndërhyrjen në Irak

 

Uashington, 25 janar 2003 - Shumica e 122 ligjvënësve që nënshkruan letrën janë demokratë, duke përfshirë edhe disa nga kritikët më të ashpër të qëndrimit të administratës ndaj Irakut. Por vetë letra është shkruar nga dy prej demokratëve më të moderuar në Dhomën e Përfaqësuesve, kongresmenit Sherod Brau dhe Ron Kind.

 
Ligjvënësit i bëjnë thirrje Presidentit Bush, që siç shprehen ata, t'i "peshojë mirë" vendimet në të ardhmen lidhur me Irakun, bazuar në raportin që do t'i paraqesë të hënën Këshillit të Sigurimit, ekipi i inspektorëve të OKB-së, i kryesuar nga Hans Bliks.

Copyright©2000-2003 Trepca.net - Të gjitha të  drejtat e rezervuara.