Lajme

E premte, 24 janar 2003

Përmbajtja:

• Kuvendi i Kosovës miratoi deklaratën e përbashkët të grupeve parlamentare për sigurinë

• Presidenti Rugova dënon aktin kriminal në Pejë

• Dështoi edhe takimi i djeshëm i Shtajnerit me Çoviqin në Prishtinë

• Këshilli Ekonomik Fiskal përfundmisht vendosi lidhur me shkallën e tatimit në paga

• Rasti i Pejës nuk do të pengojë policinë dhe KFOR-in ta ndihmojnë popullatën e Kosovës

• Sot në Prishtinë vdiq Prof.Dr. Kajmak Gazideda

• Gjilan: Administratori rajonal Paskualino Verdekia largohet nga misioni i UNMIK-ut

• Zëdhënësi i policisë nuk prejudikon vlerësimet për sulmin ndaj selisë së policisë së UNMIK-ut në Pejë

• Sindikata mirëpret propozimin e Qeverisë së Kosovës rreth tatimit në të ardhura personale

• Në një fshat të Gostivarit vriten tri gra bullgare

• Berisha prishi marrëveshjen me Nanon

• Nga Medvegja është tërhequr misioni vëzhgues i Bashkimit Evropian

• Serbia duhet t'i paguajë Kroacisë 15 miliardë euro për dëmet e luftës, thotë presidenti kroat

• BDI është thellësisht e indinjuar me sulmin kundër zyrës së saj në Gostivar

• Sekretarët e shtetit të ministrive të jashtme të Kroacisë, Shqipërisë dhe Maqedonisë dakorduan tekstin për partneritet

• Zhbllokohet rruga Shkup-Prishtinë të cilën tash dy ditë e mbajtën të bllokuar paramilitarë maqedonas "Luanët"

• R. Prodi thotë se statusi i pazgjidhur i Kosovës është një pengesë për progresin dhe jostabilitetin potencial në rajon

• Katër aviatorë amerikanë rezervë kanë humbur jetën kur dy helikopterë janë ndeshur aksidentalisht

• Një burrë dhje një grua palestineze janë vrarë gjatë një sulmi ushtarak izraelit afër Nablusit

• Policia spanjolle ka arrestuar rreth 10 persona të Al Kaidës në rajonin e Katalionisë

• Vdiq Xhani Anjeli, një nga manjatët më të shquar evropianë

• Në protestat në Karakas nga një shpërthim është vrarë një protestues

• Vriten tre ushtarë izraelitë afër qyteti Hebron

• Një palestinez është plagosur rëndë gjatë një sulmi raketor natën me helikopter në Rripin e Gazës

• Pauell ka thënë se Shtetet e Bashkuara nuk do të vepronin të vetmuara ndaj Irakut

• Ministrat e Jashtëm të vendeve të rajonit në Stamboll diskutuan se si të shmanget lufta në Irak

• Putin e ka informuar me telefon Bushin për negociatat e të dërguarit të tij në Korenë Veriore

• Tri grupe militante palestineze kanë refuzuar që të heqin dorë nga sulmet kundër Izraelit

• Thellohet mosmarrëveshja në Këshillin e Sigurimit të OKB-së mbi përdorimin e forcës në Irak

• NATO-ja shtyn vendimin për Irakun

• Policia italiane në gjurmim të terrorizmit ka arrestuar 5 marokienë

• Zjarri që ka marrë hov dhe po i kanoset kryeqytetit australian

• Rusia dhe Kina kundër luftës në Irak

Kuvendi i Kosovës miratoi deklaratën e përbashkët të grupeve parlamentare për sigurinë

 

Prishtinë, 24 janar 2003 - Kuvendi i Kosovës pas diskutimeve maratonike për sigurinë në Kosovë ka miratuar një deklaratë të përbashkët të grupeve parlamentare, të cilën para deputetëve e paraqiti shefi i Grupit parlamentar të LDK-së Sabri Hamiti. Në këtë deklaratë theksohet:

Kuvendi i Kosovës është fuqimisht kundër dhunës, çfaredo krimi dhe krimi të organizuar në Kosovë dhe mbështet fuqimisht luftën e përgjegjësve institucionalë kunder krimit dhe krijimin e sigurisë në Kosovë për të gjithë qytetaret e saj;

 

- Kuvendi i Kosovës është i përcaktuar që të bashkëpunojë me KFOR-in dhe UNMIK-un për çështje të sigurisë dhe për zhvillimet e tjera në Kosovë;

- Kuvendi i Kosovës kërkon që së paku një herë në muaj të jetë i informuar nga institucionet përgjegjëse për gjendjen e sigurisë në Kosovë;

- Kuvendi i Kosovës konsideron se zgjidhja e statusit politik të Kosovës sipas vullnetit të qytetareve krijon siguri në vend dhe në rajon;

- Kuvendi kërkon dhe sygjeron që institucionet vendëse të marrin sa më shumë kompetenca dhe përgjegjësi rreth problemeve të sigurisë dhe të kenë një bashkëpunim më të madh me institucionet ndërkombëtare;

- Kuvendi i Kosovës kërkon që të krijohen dhe të strukturohen institucionet e rendit, mbrojtjes, drejtësisë e të përfaqësimit të jashtëm nga ana e institucioneve të Kosovës dhe të kenë kontroll civil;

- Kuvendi i Kosovës i thërret të gjithë qytetarët qe ta denoncojnë krimin dhe të ndihmojnë në parandalimin dhe zbulimin e tij nëpërmjet dëshmive, duke konsideruar këtë si detyrë qytetare dhe si domosdo jetësore individuale;

- Kuvendi i Kosovës konsideron se ka edhe implikime të jashtme për prishjen e sigurisë në Kosovë me qëllim të pengimit të zhvillimit demokratik të saj;

- Kuvendi i Kosovës i fton mediat e shkruara dhe elektronike që të trajtojnë problemet e sigurisë në Kosovë me profesionalizëm, duke iu përmbajtur të dhënave, duke i ikur gjuhës së egër të urrejtjes, në mënyrë që të ndihmojnë për sqarimin e situatave dhe për krijimin e opinionit pozitiv në Kosovë.

 

 

Presidenti Rugova dënon aktin kriminal në Pejë

 

Prishtinë, 24 janar 2003 - Presidenti i Kosovës Ibrahim Rugova ka dënuar dje aktin kriminal që ndodhi të mërkurën mbrëma në Pejë, kur me një predhë u godit stacioni i komandës rajonale të policisë në këtë qytet. Në deklaratën e Presidentit thuhet:

"Sulmi i parmbrëmshëm në Pejë përbën një akt kriminal me përmasa të veprimit terrorist kundër institucioneve të sigurisë në Kosovë. E dënojmë fuqishëm këtë akt të drejtuar ndaj policisë, qytetarëve të Kosovës, dhe përpjekjeve të përbashkëta për të krijuar siguri dhe për të luftuar krimin në vendin tonë".

"Institucionet që kujdesen për sigurinë në Kosovë e kanë përkrahjen e plotë të popullit të Kosovës dhe të autoriteteve të zgjedhura me votën e lirë".

"Me këtë rast, u bëj thirrje të gjithë qytetarëve të Kosovës që të bashkëpunojnë ngusht me organet e sigurisë dhe të drejtësisë për të ndriçuar këtë akt dhe aktet e mëhershme kriminale, të cilat në thelb synojnë të destabilizojnë Kosovën dhe të dëmtojnë të ardhmen e vendit tonë".

 

 

Dështoi edhe takimi i djeshëm i Shtajnerit me Çoviqin në Prishtinë

 

Prishtinë, 24 janar 2003 - Në takimin e djeshëm në Prishtinë ndërmjet kryeadministratorit të Kosovës Mihael Shtajner dhe zëvendëskryeministrit të Serbisë Nebojsha Çoviq, i cili ka zgjatur mbi dy orë e gjysmë u shfaqën mospajtime të mëdha.

 

Këto mospajtime kanë pamundësuar edhe nënshkrimin e marrëveshjes me të cilën Beogradi do të njihte targat e veturave të Kosovës, ndonëse kohë më parë ishin kryer të gjitha formalitetet rreth kësaj çështje.

Zëvendëskryeministri serb Çoviq tha se qeveritarët e Beogradit nuk mund të pajtohen me zhvillimet aktuale politike në Kosovë. Ai tha se i ka transmetuar z. Shtajner qëndrimin se Serbia dhe Jugosllavia nuk mund të lejojnë, siç u shpreh ai, ndërtimin e institucioneve që punojnë pavarësimin e Kosovës dhe kjo sipas tij është e palejueshme.

 

Sipas tij shumë nga udhëheqësit shqiptarë provokojnë komunitetin serb, por ka paraqitur edhe pakënaqësinë e tij me procesin e kthimit të personave të zhvendosur.

Ndërkaq, zyrtarët e Misionit të OKB-së shprehën dëshprimin e tyre për shkak të mosnënshkrimit të marrëveshjes mbi targat e veturave të Kosovës, me çka thanë ata shkurtohet liria e lëvizjes posaçërisht për vetë pjesëtarët e komunitetit serb.

Burimet brenda Misionit të UNMIK-ut thanë se përfaqësuesi serb Çoviq është shprehur i pakënaqur me qëndrimin e z. Shtajner i cili ka pohuar se Beogradi mund të bashkëpunojë, por nuk mund të përzihet në punët e brendshme të Kosovës.

 

 

Këshilli Ekonomik Fiskal përfundmisht vendosi lidhur me shkallën e tatimit në paga

 

Prishtinë, 24 janar 2003 - Në një mbledhje të Këshillit Ekonomik Fiskal përfundmisht u vendos lidhur me shkallën e tatimit në pagat. Kështu në të pagat deri në 80 euro nuk do të ketë tatim.

 

Nga 80 deri në 250 tatmi do të jetë 5 pë qind, kurse nga 250 deri më 450, tatimi është 10 për qind. Ndërkaq vetëm për pagat që kalojnë mbi 450 euro tatimi do të jetë 20 për qind.

Siç u tha në këtë mbledhje kjo do të zvogëlojë buxhetin e Kosovës për 6 milionë euro, por kjo shumë do të kompensohet nga doganat.

Praktikisht Këshilli Ekonomik Fiskal ka përkrahur propozimin e qeverisë së Kosovës dhe të Ministrisë së Ekonomisë dhe Financave për tatimin në paga.

Shefi i UNMIK-ut Mihael Shtajner deklaroi se ky vendim do të zbatohet pas dy ose tre muajve, kurse gjatë kësaj kohe do të vlejë tatimi siç ishte gjatë vitit të kaluar.

 

 

Rasti i Pejës nuk do të pengojë policinë dhe KFOR-in ta ndihmojnë popullatën e Kosovës

 

Podujevë, 24 janar 2003 (QIK) – "Gjatë punës sime 14 mujore si komandant i stacionit të policisë në Podujevë, situata e sigurisë është përmirësuar dukshëm.

 

Ndërkaq gjatë 6 muajve të parë ka pasur gjashtë sulme në rrugën 'Snake' (Merdar-Prishtinë), kurse muajt e fundit nuk ka pasur asnjë", deklaroi në konferenën e sotme të shtypit komandanti Xhon Duset, i cili gjendet në prag të përfundimit të misionit të tij në Podujevë.

 

Sipas tij, gjatë kohës së shërbimit të tij ka pasur 12 protesta paqësore dhe asnjë incident. Duke komentuar rastin e Pejës z. Duset tha se ky rast i keqbërësve nuk do ta pengojë policinë dhe KFOR-in që të ndihmojë popullatën e Kosovës.

Duset lavdëroi edhe bashkëpunimin e policisë së UNMIK-ut, KFOR-it dhe të popullatës, por edhe profesionalizmin e SHPK-së. "Qëllimi im ka qenë që t'i shtyj oficerët e SHPK-së të punojnë më shumë ndërkaq ndërkombëtarët ta vëzhgojnë punën e tyre", pohoi z. Duset.

Ndërkaq shefi i ekipit të SIMIC-ut i Batalionit çek e sllovak mbitogeri Pavel Mraz tha se situata e sigurisë është në nivel sepse nuk ka pasur incidente të raportuara.

 

Ai njoftoi se javën e kaluar këto trupa i ka vizituar ministri i Mbrojtjes i Çekisë Jaroslav Tvrdik, kurse sot për vizitë ndodhen Kryeministri i Sllovakisë z. Mikolash Dxurina dhe Ministri i Mbrojtjes Shimko.

 

 

Sot në Prishtinë vdiq Prof.Dr. Kajmak Gazideda

 

Prishtinë, 24 janar 2003 - Sot në mesditë vdiq papritmas Prof.Dr. Kajmak Gazideda nga një infarkt që pësoi në zemër në vendin e tij të punës në Klinikën Infektive në Prishtinë. Dr. Gazideda ishte ekspert i njohur i sëmundjeve infektive dhe ligjërues në Faklultetin e Mjekësisë në Prishtinë.

 

 

Gjilan: Administratori rajonal Paskualino Verdekia largohet nga misioni i UNMIK-ut

 

Gjilan, 24 janar 2003 (QIK) - Pasqualino Verdecchia, administrator rajonal i UNMIK-ut në sektorin e lindjes, pas dy vitesh misioni në Kosovë, do të largohet nga këtu për shkaqe familjare.

 

Në një takim lamtumirës që ka organizuar mbrëmë z.Verdecchia dhe ku kanë marrë pjesë edhe komandanti i KFOR-it në Kosovë, gjenerali Fabio Mini, gjenerali i BSHL, Kif, kryetari i komunës së Gjilanit, Lutfi Haziri, administratori Bob Simons si dhe zyrtarë tjerë të lartë të administratës së UNMIK-ut në Kosovë dhe të institucioneve vendore, ai tha se nuk e kishte lehtë ta merrte këtë vendim, por ishte i obliguar ta bënte këtë, sepse familja e tij në Itali, tani ka shumë nevojë ta ketë afër.

Duke bërë një krahasim të gjendjes së tashme në Kosovë, me atë të kohës kur ai kishte ardhur në krye të misionit të UNMIK-ut, Verdecchia tha se janë bërë hapa fundamentalë për të ardhmen e Kosovës dhe demokracinë e saj. Gjilani ishte dhe mbeti një shembull i mirë në Kosovë i pajtimit ndërmjet komuniteteve, integrimit, multietnicitetit dhe i lirisë së lëvizjes.

Gjenerali italian, Pasqualino Verdecchia, i cili në Kosovë erdhi nga qendra e forcave të NATO-s për Evropën Lindore në Napoli, do të mbetet në kujtesën e popullit të rajonit të Gjilanit dhe të Kosovës si njeri i luftës për paqe, për demokraci, për progres në Kosovë si dhe për mesazhet e tij të mëhershme se "Kosova duhet të ndërtojë një shoqëri, ku secili qytetar, pa dallim, duhet ta ndiej veten mirë e të lirë".

 

 

Zëdhënësi i policisë nuk prejudikon vlerësimet për sulmin ndaj selisë së policisë së UNMIK-ut në Pejë

 

Prishtinë, 24 janar 2003 - Tash për tash nuk ka asnjë informacion mbi kryesit dhe motivet e sulmit të së mërkurës në Shtëpinë e Kulturës në Pejë ku është stacionuar policia rajonale e UNMIK-ut.

Në këtë kontekst zëdhënësi i Shërbimit Policor të Kosovës Refki Morina, duke folur për këtë sulm ka theksuar se derisa nuk bëhet vlerësimi i gjithanshëm i hetuesisë rajonale të Pejës nuk do të prejudikohen gjërat.

 

 

Sindikata mirëpret propozimin e Qeverisë së Kosovës rreth tatimit në të ardhura personale

 

Prishtinë, 24 janar 2003 - Bashkimi i Sindikatave të Pavarura të Kosovës ka mirëpritur propozimin e Qeverisë së Kosovës rreth tatimit në të ardhura personale të punëtorëve.

 

Drejtuesit e kësaj organizate konsiderojnë se ky propozim mbron sadopak shtresën e punëtorëve me paga më të ulëta. Megjithatë, vendimi i këtij asociacioni të punëtorëve të Kosovës lidhur me shkallën e tatimit pritet të merret javën e ardhshme.

Nënkryetari i BSPK-së Ukë Bashota tha se prozimi i ri i Qeverisë së Kosovës paraqet një lehtësim për punëtorët, duke shtuar se edhe sindikata përkrah masat për shtimin e buxhetit të Kosovës, por jo duke goditur drejtpërdrejt shtresën e punëtorëve me paga më të ulëta.

 

Ai theksoi se edhe në takimin e sotëm të Këshillit Ekonomik Fiskal drejtuesit e BSPK-së do të dalin me propozime konkrete për përmbushjen e kërkesave të tyre.

 

 

Në një fshat të Gostivarit vriten tri gra bullgare

 

Gostivar, 24 janar 2003 - Sot në orën 3 të mëngjesit në një lokal nate në fshatin Dobridol të Gostivarit janë vrarë tri gra, shtetase të Bullgarisë, kurse një është plagosur rëndë. Këto vrasje kanë ndodhur gjatë një përleshjeje ndërmjet dy grupeve rivale të armatosura.

Poashtu njoftohet se në spitalin e Tetovës është sjellë trupi i pajetë i një burri, emri i të cilit nuk është bërë i ditur. Trupi i të ndjerit është gjetur në fshatin Senekos të Gostivarit.

 

 

Berisha prishi marrëveshjen me Nanon

 

Tiranë, 24 janar 2003 - Nga Tirana bëhet e ditur se kryetari i Partisë Demokratike Sali Berisha ka prishur sot marrëveshjen me kryetarin socialist Fatos Nano në qershor të vitit të kaluar. Rezultati i parë i kësaj marrëveshjeje ishte zgjedhja e presidentit konsensual të Shqipërisë.

 

 

Nga Medvegja është tërhequr misioni vëzhgues i Bashkimit Evropian

 

Medvegjë, 24 janar 2003 - Nga Medvegja është tërhequr misioni vëzhgues i Bashkimit Evropian pas qëndrimit gati dyvjeçar në këtë mjedis shumënacional, tha prefekti i këtij qyteti Sllobodan Drashkoviq.

 

Në një takim të përbashkët të përfaqësuesve të këtij misioni, bashkësisë nacionale shqiptare, të administratës lokale dhe të policisë është konstatuar se kanë pushuar arsyet për qëndrimin e tyre atje.

 

Sipas prefektit, gjatë dy viteve të fundit në Medvegjë nuk ka pasur konflikte ndërnacionale dhe se ka rënë tensioni. Zyrat e misionit evropian janë hapur në Medvegjë në prill të vitit 2001.

 

 

Serbia duhet t'i paguajë Kroacisë 15 miliardë euro për dëmet e luftës, thotë presidenti kroat

 

Banjallukë, 24 janar 2003 - Sipas vlerësimeve të para Kroacia nga Jugosllavia do të kërkojë rreth 15 miliardë euro për dëmet e shkaktuara gjatë luftës së kaluar, ka deklaruar presidenti kroat Stipe Mesiq.

 

Kroacia ka qenë viktimë e agresionit dhe Jugosllavia, përkatësisht Serbia patjetër duhet të përgjigjet për ato që kanë ndodhur në Kroaci dhe të paguajë dëmet.

 

"Nëse vullnetarët e grumbulluar në Serbi bashkë me Armatën jugosllave kanë sulmuar qytetet kroate dhe i kanë shkatërruar, kanë vrarë qytetarët kroatë, Serbia nuk mund të thotë se këtë nuk e ka ditur, ka thënë Mesiq për një gazetë të Banjallukës.

 

 

BDI është thellësisht e indinjuar me sulmin kundër zyrës së saj në Gostivar

 

Shkup, 24 janar 2003 - Në mbrëmjen e 22 janar 2003it, rreth orës 22:00, persona të panjohur kanë hapur zjarr ndaj zyrave të Bashkimit Demokratik për Integrim në Gostivar, thuhet në një njoftim për media atë BDI-së.

Incidenti ka ndodhur derisa kryesia e degës së Bashkimit Demokratik për Integrim po mbante mbledhjen e vet të rregullt me anëtarët e partisë.

Në këtë incident më lehtë është plagosur Muhamet Hamiti, kryetar i Këshillit Vendor të Bashkimit Demokratik për Integrim për Negotinë.

Bashkimi Demokratik për Integrim është thellësisht i indinjuar me këtë incident të drejtuar kundër partisë dhe njëkohësisht apelon deri tek organet kompetente që të bëjnë ndriçimin e rastit dhe nxjerrjen e autorëve para organeve të gjyqësisë, thuhet në një njkoftim të zëdhënësit të BDI-së.

 

 

Sekretarët e shtetit të ministrive të jashtme të Kroacisë, Shqipërisë dhe Maqedonisë dakorduan tekstin për partneritet

 

Shkup, 24 janar 2003 - Sekretarët e shtetit të ministrive të punëve të jashtme të Kroacisë, Shqipërisë dhe Maqedonisë dje në Shkup kanë rënë dakord për tekstin që lidhet me marrëveshjen e përbashkët me të cilin do të institucionalizohet marrëveshja trilaterale mes tri shteteve.

 

Marrëveshja për partneritet mes Kroacisë, Shqipërisë dhe Maqedonisë është një dokument që shfaq përpjekjet e këtyre vendeve për integrimet në Aleancën Veriatlantike.

 

Marrëveshja, teksti i së cilës është përgatitur dje, do të siglohet në mars në Kroaci, ndërkaq do të nënshkruhet në Uashington, sepse Shtetet e Bashkuara prezentohen si partnere të këtyre tri shteteve në këtë proces.

 

 

Zhbllokohet rruga Shkup-Prishtinë të cilën tash dy ditë e mbajtën të bllokuar paramilitarë maqedonas "Luanët"

 

Shkup, 24 janar 2003 - Zhllokohet rruga Shkup-Prishtinë pasi zyrtarët e lartë të Maqedoinisë, Trajkovski, Cërvenkovski dhe ministri i brendshëm maqedonas Kostov arritën marrëveshje me përfaqësuesit e njësitit paraushtarak maqedonas "Luanët".

"Transformimi i batalionit të dytë të njësisë policore për ndërhyrje të shpjet 'Luanët' dhe formimi i komisionit të përbashkët nga ana e Ministrisë së Punëve të Brendshme të Maqedonisë për ndjekjen e atij procesi janë konkludimet kryesore nga takimi që zgjati mbi dy orë në kabinetin e presidentit Trajkovski", ka bërë të ditur përfaqësuesi i këtij njësiti kontestues policor Mihajllovski.

 

Ndërkaq kryeministri Cërvenkovski ka theksuar se do të fillojë transformimi i njësitit rezervist "Luanët" i cili nuk është konstituuar në formë ligjore.

 

 

R. Prodi thotë se statusi i pazgjidhur i Kosovës është një pengesë për progresin dhe jostabilitetin potencial në rajon

 

Bruksel, 24 janar 2003 - Në një letër që presidenti i Komisionit Evropian, Romano Prodi i ka dërguar kryeministrit grek Simitis dhe atij italian Berluskoni, ku bëhet fjalë për situatën në Ballkan dhe atë në Mediteran, përfshihet edhe çështja e statusit të pazgjidhur të Kosovës.

 

Romano Prodi, duke paraqitur problemet në rajon ka thënë se Maqedonia vazhdon të mbetet shumë e brishtë, Bosnja e Hercegovina ende nuk është shndërruar në një shtet politikisht të vetëqëndrueshëm, se në Shqipëri është në fazën fillimtare zhvillimi institucional dhe ai ekonomik.

 

Pastaj sipas tij, zhvillimi i Serbisë është duke ngecur për shkak të situatës së paqartë kushtetuese me Malin e Zi. Por, statusi i pazgjidhur i Kosovës, sipas Prodit, është një pengesë për progreset e madje edhe faktori i një jostabiliteti të madh potencial në rajon, ka theksuar presidenti i KE.

 

 

Katër aviatorë amerikanë rezervë kanë humbur jetën kur dy helikopterë janë ndeshur aksidentalisht

 

Laredo, Teksas, 24 janar 2003 – Katër aviatorë amerikanë rezervë kanë humbur jetën kur dy helikopterë janë ndeshur gjatë natës në një patrullim antidrogë në Teksasin jugor, 65 milja në juglindje të qytetit Laredo, njofton UPI.

 

 

Një burrë dhje një grua palestineze janë vrarë gjatë një sulmi ushtarak izraelit afër Nablusit

 

Nablus, 24 janar 2003 – Një burrë dhje një grua palestineze janë vrarë gjatë një sulmi në një postbllok ushtarak izraelit afër qytetit Nablus të Bregut Perendimor, vetëm disa orë pasi janë vrarë tre ushtarë izraelitë në një shpërthim dhune para zgjedhjeve izraelite, njofton AFP.

 

Grupi prej katër palestinezësh të armatosur kanë sulmuar pozicionin e armatës afër vendbanimit ebrait Homesh në veri të Bregut Perendimor dhe gjatë shkëmbimit të zjarrit me ushtarët izraelitë, janë vrarë dy dhe është plagosur një syresh, kurse i katërti ka ikur.

 

 

Policia spanjolle ka arrestuar rreth 10 persona të Al Kaidës në rajonin e Katalionisë

 

Barcelonë, 24 janar 2003 - Policia spanjolle ka kryer një operacion të madh kundër militantëve të dyshimtë të Al Kaidës në rajonin verilindor të Katalionisë, ku janë arrestuar rreth 10 persona, por operacioni vazhdon ende, njofton BBCWorld.

 

Në këtë operacion kanë marrë pjesë mbi 100 agjentë policorë kundërterrroristë dhe gjatë orëve të para të mëngjesit të sotëm (të së premtes) janë arrestuar pjesëtarët e celulave të Al Kaidës në Barcelonë dhe gjithandej në rajonin e Katalonisë.

 

Janë zbuluar dokumente të ndryshme të rëndësishme. Militantët e arrestuar thuhet se janë ushtruar në kampet e Osama bin Ladenit.

 

 

Vdiq Xhani Anjeli, një nga manjatët më të shquar evropianë

 

Romë, 24 janar 2003 - Xhani Anjeli, kryetar nderi i "Fiatit" dhe një nga manjatët më të shquar evropianë ka vdekur në moshën 81-vjeçare. Ai ishte biznesmeni më me ndikim italian i shekullit të 20-të, i cili e ngriti "Fiatin" nga një ofiçinë e vogël në një konglomerat industrial dhe financiar.

 

Ai vdiq vetëm disa orë para se të kryesonte një takim të familijes së tij, ku pritej të diskutohej e ardhmja e "Fiatit". Familja e Anjelit banon në qytetin verior italian Turin dhe posedon rreth 30 për qind të "Fiatit".

 

 

Në protestat në Karakas nga një shpërthim është vrarë një protestues

 

Karakas, 24 janar 2003 – Qindra mijë njerëz kanë brohoritur të gatshëm për të luftuar presidentin venezuelan, Hugo Çavez dhe zëshëm kanë kërkuar dorëheqjen e tij përkundër një shpërthimi, ku është vrarë një person në qendër të qytetit Karakas, njofton AFP.

 

Duke qendruar në maje të një kamioni, presidenti majtist populist, triumfalisht arriti në Avenunë Bolivar, ku përkrahsit e tij kundërshtonin protestën 53-ditëshe që synon shkarkimin e tij mde forcë.

 

 

Vriten tre ushtarë izraelitë afër qyteti Hebron

 

Hebron, 24 janar 2003 - Armata izraelite ka njoftuar se sulmuesit palestinezë kanë vrarë tre ushtarë izraelitë afër qytetit Hebron në Bregun Perëndimor.

Në njoftim thuhet se patrulla është sulmuar në udhëkryqin afër një kolonie ebraite në Beit Hagai.
Sulmi ka ndodhur përkundër masave të fuqishme të sigurimit të aplikuara në prag të zgjedhjeve parlamentare në Izrael, të cilat mbahen pas katër ditëve.

 

Gjithashtu njoftohet se vetëm disa orë më vonë helikopterët izraelitë kanë shkrepur raketa mbi objektivat në qytetin Gaza, njofton BBC.

 

 

Një palestinez është plagosur rëndë gjatë një sulmi raketor natën me helikopter në Rripin e Gazës

 

Jerusalem, 24 janar 2003 – Një palestinez është plagosur rëndë gjatë një sulmi raketor natën me helikopter në Rripin e Gazës, me ç’rast u janë shkaktuar dëme të mëdha edhe një kishëze katolike, një punëtorie mekanike dhe ndërtesave të tjera, kanë bërë të ditur burimet palestineze mjekësore dhe të sigurimit, njofton AFP. Gjatë sulmit, kur u shkrehen tetë raketa, u plagos me shrapnel Abed Nasrallah 18 vjeçar.

 

 

Pauell ka thënë se Shtetet e Bashkuara nuk do të vepronin të vetmuara ndaj Irakut

 

Uashington, 24 janar 2003 - Sekertari amerikan i Shtetit, Kolin Pauell ka thënë se Shtetet e Bashkuara nuk do të vepronin të vetmuara ndaj Irakut, megjithë kundërvënien nga Franca dhe Gjermania ndaj luftës së mundëshme me Bagdadin.

 

Pauell ka thënë se megjithë opozitën e shfaqur nga Parisi dhe Berlini ndaj çdo lufte, ai është i bindur se Uashingtoni do të ketë mjaft aeleatë nëse vendosë të ndërmarrë aksion ushtarak kundër Bagdadit.

 

Sekretari amerikan i Shtetit ka shfaqur optimizëm se anëtarët e Këshillit të Sigurimit mund të arrijnë qasje të përbashkët ndaj krizës irakiane pasi kryeinspektori i Kombeve të Bashkuara për armartimin, Hans Bliks t'i raportojë Këshillit ditën e hënë. Pauell i ka bërë këto komente në Uashington bashkë me sekretarin e Jashtëm britanik, Xhek Strou.

 

 

Ministrat e Jashtëm të vendeve të rajonit në Stamboll diskutuan se si të shmanget lufta në Irak

 

Stamboll, 24 janar 2003 - Ministrat e Jashtëm të Turqisë, Iranit, Jordanit, Sirisë, Arabisë Saudite dhe Egjiptit u tubuan dje në Stamboll që të diskutojnë se si të shmanget lufta e mundëshme në Irak e udhëhequr nga Shtetet e Bashkuara. Ministri i Jashtëm jordanez, Marvan Muasher ka shfaqur brengosje lidhur me pasojat e luftës së mundshme kundër Irakut.

 

"Mesazhi është se vendet e rajonit janë të brengosur dhe se kjo luftë nuk do të prekte vetëm Irakun, por mbarë rajonin. Si e tillë, u takon vendeve të rajonit të përqiqen të gjejnë shtegdaljen diplomatike dhe shpresojë se të paktën do të kemi diskutime të mira lidhur me këtë", tha zyrtari jordanez.

 

Ministri i jashtëm Saudit, princi Saud al-Faisal ka shfaqur shpresën se do të arrihet "qëndrim i përbashkët me qëllim të parandalimit të luftës në Irak".

 

 

Putin e ka informuar me telefon Bushin për negociatat e të dërguarit të tij në Korenë Veriore

 

Moskë, 24 janar 2003 - Presidenti i Rusisë, Vladimir Putin e ka informuar në linjë telefonike presidentin e Shteteve të Bashkuara, Xhorxh Bush për negociatat e fundit të të dërguarit të tij në Korenë Veriore lidhur me krizën bërthamore. Putin i ka thënë Bushit se ka gjasa të mira për pashitjen paqësore të krizës lidhur me programin bërthamor të Koresë Veriore.

 

 

Tri grupe militante palestineze kanë refuzuar që të heqin dorë nga sulmet kundër Izraelit

 

Jerusalem, 24 janar 2003 - Tri grupe militante palestineze, Brigadat e Martirëve Al-Aksa, Xhihadi Islamik dhe Hamasi kanë refuzuar që të heqin dorë nga sulmet kundër Izraelit. Në komunikatat e tyre thuhet se kanë vendosur të vazhdojnë siç thonë “operacionet martire” kundër Izraelit derisa të tërhiqet nga territori i okupuar palestinez.

 

 

Thellohet mosmarrëveshja në Këshillin e Sigurimit të OKB-së mbi përdorimin e forcës në Irak

 

Uashington, 24 janar 2003 - Shumica e pesë anëtarëve të përhershëm të Këshillit të Sigurimit të OKB-së, Kina, Rusia dhe Franca, janë të mendimit se provat janë të pamjaftueshme për të justifikuar një sulm kundër Irakut.

 

Kjo është në kontrast të thellë me mendimin e dy anëtarëve të tjera të Këshillit të Sigurimit, Shteteve të Bashkuara dhe Britanisë, të cilat kanë arritur tashmë në përfundimin se Bagdadi nuk po bashkëpunon me inspektorët e armëve.

 

Të dyja vendet po vazhdojnë përqendrimin masiv të trupave ushtarake në gjirin Persik në përgatitje për një sulm të mundshëm. Kjo çarje mes anëtareve të Këshillit të Sigurimit shtyu sekretarin amerikan të Shtetit, Kolin Pauell, dhe homologun e tij britanik Strou që të përdorin një gjuhë të ashpër.

 

Në fjalën e tyre dje ata veçuan Francën dhe Gjermaninë se po i shmangen rezolutës 14-41 të Këshillit të Sigurimit, e cila parashikon "pasoja serioze" nëse Bagdadi nuk çarmatoset.

 

 

NATO-ja shtyn vendimin për Irakun

 

Bruksel, 24 janar 2003 - NATO-ja shtyu marrjen e vendimit nëse të fillojë apo jo planifikimin ushtarak për të mbështetur një luftë të mundshme të udhëhequr nga Shtetet e Bashkuara kundër Irakut.

 

Javën e kaluar, Shtetet e Bashkuara kërkuan nga aleanca ndihmë të kufizuar në rast të një lufte, përfshirë ndihmën për mbrojtjen e Turqisë, i vetmi vend anëtar i Natos që kufizohet me Irakun.

 

Diplomatë në selinë e Natos në Bruksel thonë se të gjitha vendet anëtare kanë rënë dakord në parim në një takim të djeshëm se aleanca mund të ketë një rol për të luajtur nëse shpërthen lufta.

 

Mirëpo, diplomatët theksojnë se disa vende anëtare, të kryesuara nga Franca dhe Gjermania, argumentuan se nuk është koha e përshtatshme për të filluar plkanifikimin ushtarak.

 

 

Policia italiane në gjurmim të terrorizmit ka arrestuar 5 marokienë

 

Rovigo, 24 janar 2003 - Policia italiane në gjurmim të terrorizmit ka arrestuar 5 marokienë në banesën e të cilëve ka gjetur një kilogram lëndë shpërthyese. Njëkohësisht policia në aksionin në Rovigo të Italisë veriore po gjurmojnë harten në të ciën ishin nënvizuar pikat ushtarake të Nato-s dhe stacionet e policisë.

 

Muajve të kaluar në Itali qenë arrestuar shumë afrikano-veriorë të cilët sypozohet të kenë pasur lidhje me rrjetin e El-Kaida-s. Disa prej tyre prokurori publik i ka akuzuar për përgatitje atentatesh vetvrasëse në Evropë.

 

 

Zjarri që ka marrë hov dhe po i kanoset kryeqytetit australian

 

Kambera, 24 janar 2003 - Nga zjarri që ka marrë hov dhe po i kanoset kryeqytetit australian gjendja vazhdon të jetë e tendosur. Meteorologët edhe për të premten kanë parashikuar temperatura të larta dhe erëra të ashpra.

 

Shumë njerëz janë arratisur nga zjarri i cili pothuaj ka përfshirë më shumë se 140.000 hektarë pyje dhe më shumë se 500 shtëpi janë shkatrruar. Zjarri që ka përfshirë edhe shkurret në ishullin Tasmania ka dalur nga kontroli.

 

 

Rusia dhe Kina kundër luftës në Irak

 

Moskë, 24 janar 2003 - Rusia dhe Kina, dy vende anëtare të përhershme të Këshillit të Sigurimit të OKB-së, me të drejtë veto, kanë shprehur kundërshtimin e tyre ndaj luftës në Irak. Rusia tha se nuk sheh asnjë provë për momentin e cila të justifikojë një veprim ushtarak.

 

Edhe Kina në një ndërhyrje të veçantë për një çështje ndërkombëtare, ka shprehur pakënqësinë e vet ndaj shtimit të madh të pranisë ushtarake në trupa dhe pajisje në Gjirin Persik.

Copyright©2000-2003 Trepca.net - Të gjitha të  drejtat e rezervuara.