E enjte, 23 janar 2003 LAJME


	23.01.2003 - Trepca.net
	Lajme
	E enjte, 23 janar 2003


	Përmbajtja: Shtajner e Rugova biseduan për bartjen e përgjegjësive nga ndërkombëtarët tek institucionet e Kosovës Nga aktiviteti i komisioneve parlamentare të Kuvendit të Kosovës Harnish - Daci: Në vitin 2003 Kosova duhet të dëshmojë se mund të ecë përpara në rrugën e demokracisë Në Kosovë po rriten rastet e krimit të organizuar dhe të krimit mafioz, thanë Kadi e Feler Një delegacion i Komisionit të mbrojtjes i Senatit italian ndodhet për vizitë në Kosovë Londra dënon sulmin kundër policisë në Pejë Strazburi hap dyert për kuadrot mjekësore nga Kosova Tirana zyrtare dënon atentatin ndaj stacionit të policisë së UNMIK-ut në Pejë Banorët serbë bllokojnë rrugën Prishtinë-Shkup Kuvendi i Kosovës po debaton sot për gjendjen e sigurisë në vend Mbrëmë në Pejë me një predhë antitank është sulmuar selia e policisë se UNMIK-ut Qeveria e Kosovës ka dënuar krijimin e bashkësisë të komunave serbe në veri të Kosovës Qeveria e Kosovës konstaton se tatimi duhet të rritet vetëm në të ardhurat mbi 450 euro Çoviq thotë se asnjë politikan i vendit të tij nuk mund të lejojë që Kosova të lundrojë në pavarësi Rezervistë të armatosur "Luanët" prej dje po e mbajnë të bllokuar rrugën që lidhë Shkupin me pikën kufitare të Bllaces Partia Kristian Demokratike ka shënuar fitore të ngushtë kundrejt Partisë Laburiste në zgjedhjet e Holandës Është arrestuar gruaja e liderit të Frontit Popullor për Çlirimin e Palestinës Uashington: Tom Rixh - ministër i parë i Sigurimit të atdheut Samiti vjetor i Forumit Ekonomik Botëror filloi punën sot në Davos Në Stamboll fqinjët e Irakut diskutojnë krizën Arabia Saudite ka arrestuar vrasësin kuvajtian të amerikanit, që punonte në bazën ushtarake në Kuvajt Fisher fillon sot misionin katërditor në Lindjen e Mesme Numri i viktimave të termetit në Meksikë është ngritur në 28 veta Bush ka paralajmëruar ushtarakët e Irakut të mos përdorin armët për zhdukje në masë në luftë Bliks: Iraku duhet të përmbushë kërkesat e inspektorëve për bashkëpunim "pro-aktiv" Shirak dhe Shreder thanë se duhet të bëhet gjithëçka për të shmangur luftën në Irak Gjenerali amerikan Tomi Frenks arriti në Jordani Çeçenët vazhdojnë të rrëmbehen dhe vriten nga forcat ruse të sigurisë D'Esten kritikoi propozimin e fundit gjermano-francez Programi bërthamor i Koresë së Veriut kërcënon paqen botërore
	Shtajner e Rugova biseduan për bartjen e përgjegjësive nga ndërkombëtarët tek institucionet e Kosovës Prishtinë, 23 janar 2003 - Kryeadministratori i Kosovës Mihael Shtajner bisedoi dje me presidentin e Kosovës Ibrahim Rugova rreth bartjes së përgjegjësive nga ndërkombëtarët tek institucionet e Kosovës. Presidenti Rugova pas takimit tha se me administratën e UNMIK-ut do të ketë edhe më tutje një bashkëpunim të ngushtë. Por, zoti Rugova u shpreh i kënaqur edhe me arritjet e vitit të kaluar. "Vitin e kaluar e kemi kryer gati këtë punë dhe tash vjen faza tjetër e objektivave që i kemi së bashku me UNMIK-un: zhvillimi ekonomik, privatizimi, investimet, vendet e reja të punës. Për të gjitha këto duhet një stabilitet politik", tha presidenti Rugova. Ai theksoi se në përgjithësi është i kënaqur me procesin e bartjes së kompetencave, meqenëse viti i kaluar kryesisht kishte të bënte me formimin e institucioneve të Kosovës. Sivjet pritet realizimi i përparësive që janë hartuar së bashku me administratën ndërkombëtare. Presidenti Rugova po ashtu ka bërë thirrje që të tejkalohen frustrimet apo të shndërrohen në frustrime pozitive. Z. Shtajner, i kënaqur nga mbështetja e ofruar, tha se vetëm së bashku duke punuar seriozisht mund të tejkalohen sfidat me të cilat Kosova do të ndeshet gjatë këtij viti. "Ne u pajtuam që të punojmë ngushtë në mënyrë që të përballojmë sfidat me të cilat do të ndeshemi", tha Shtajner dhe u shpreh i lumtur për përkrahjen që ka marrë nga presidenti Rugova. "Është e rëndësishme që institucionet e Kosovës të punojnë më seriozisht dhe jemi pajtuar po ashtu edhe për bartjen e më shumë përgjegjësive për të cilat unë kam folur edhe në fjalimin tim dy ditë më parë", tha Shtajner. Gjithashtu Shtajner dje ka takuar edhe kryetarin e PDK-së Hashim Thaçi dhe atë të AAK-së Ramush Haradinajn. Nga aktiviteti i komisioneve parlamentare të Kuvendit të Kosovës Prishtinë, 23 janar 2003 - Komisioni parlamentar për Barazi Gjinore në një takim të djeshëm ka diskutuar çështjen e një porpozimligji për çështjet gjinore dhe për konkretizimin e veprimeve që duhet ndjekur për hartimin e këtij projektligji. Në fazën e parë të punës, që do të jetë fazë e kontakteve dhe e gjetjes së modeleve, u tha në këtë mbledhje, do të zhvillohen takime të nduarndurta me instancat relevante vendore dhe ndërkombëtare, nisur nga OSBE-a, UNMIK-u, NDI-a, zyret e huaja diplomatike dhe OJQ-të e ndryshme vendore e ndërkombëtare që merren me çështje gjinore ose e mbështesin barazinë gjinore etj. Ndërkaq, Komisioni për të Humburit dhe të Kidnapuarit në një takim aprovoi programin e punës për tre muajt e ardhshëm, sipas të cilit dy herë në muaj do të mbahet mbledhja e Komisionit, ndërkaq do të kryhen edhe aktivitete të tjera. Komisioni theksoi se do të kërkojë nga Kuvendi i Kosovës që t'i rekomandojë z. Shtajner për pjesëmarrjen e disa përfaqësuesve të këtij Komisioni në Gjenevë ku mbi këtë problematikë do të diskutohet në Komisariatin e Lartë. Nga ana tjetër edhe Kuvendi i Kosovës, sipas informacioneve nga kryeparlamentari Daci, së shpejti do të shqyrtojë problematikën e personave të humbur dhe të zhdukur në një nga seancat e ardhshme plenare. Komisioni për Transport dhe Telekomunikacion mbajti një dëshmi lidhur me iniciativën për formimin e një kompanie ajrore, e cila do të jetë e autorizuar për përfaqësimin e Kosovës në sferën e aviacionit gjate periudhës tranzitore. Në këtë dëshmi morën pjesë përfaqësuesit e Aeroportit të Prishtinës, drejtori i kontrollit të trafikut ajror dhe përfaqësuesit e disa agjencive fluturuese vendore. Pjesëmarrësit e kësaj dëshmie e njoftuan Komisionin me pikëpamjet e tyre lidhur me rëndësinë e kësaj iniciative për proceset e avancimit të komunikacionit ajror të Kosovës. Ata theksuan interesat dhe sfidat që e presin Kosovën, Qeverinë e Kosovës, UNMIK-un dhe dhe sektorin privat, në rrugën e realizimit të këtyre objektivave. Anëtarët e Komisionit, duke i dhënë mbështetje kësaj çështjeje, vlerësuan se kjo është një iniciativë shumë pozitive për Kosovën. Komisioni vlerësoi gjithashtu se kjo inciativë shënon një hap përpara në drejtim të krijimit të një Kompanie ajrore nacionale, për të cilën Kosova ka nevojë në rrugën e vet drejt realizimit të shtetësisë së Kosovës. Harnish - Daci: Në vitin 2003 Kosova duhet të dëshmojë se mund të ecë përpara në rrugën e demokracisë Prishtinë, 23 janar 2003 - Në vitin 2003 Kosova duhet të dëshmojë se mund të ecë përpara në rrugën e demokracisë, kanë vlerësuar mbrëmë pas një takimit të zhvilluar, kryetari i Kuvendit të Kosovës Nexhat Daci dhe shefi i Zyrës Amerikane në Prishtinë Rino Harnish. Pas takimit Harnish tha se zoti Daci ka gjithmonë gjëra të mëdha të thotë në lidhje me zhvillimet politike që ndodhin sot në Kosovë. "Qëllimi im ishte që t'i sqaroj atij rezultatet e takimeve që i kam zhvilluar kohë më parë në Uashington", shtoi Harnish, duke potencuar se Shetet e Bashkuara kanë shprehur interesim të posaçëm në lidhje me çështjet siç janë sundimi i rendit dhe ligjit, zhvillimi ekonomik dhe çështja e kthimit të personave të zhvendosur në Kosovë. "Mendoj se unë dhe Daci pajtohemi që viti 2003 është vendimtar për t'u ballafaquar me problemet fundamentale me të cilat po ballafaqohen qytetarët e Kosovës", ka thënë Harnish. Ndërkohë kryeparlamentari Daci tha se fakti që ai kishte zhvilluar një takim gati një orë e gjysmë, tregon për rëndësinë e këtij takimi. "Unë jam i kënaqur dhe i lumtur me qëndrimet e z. Harnish dhe sqarimet e tij lidhur me vizitën në Uashington", pohoi z. Daci. Ai nënvizoi se ky vit do të shënojë një prej momenteve kyçe në përballimin e sidave të reja për Kosovën për çka tha se gëzonte edhe mbështetjen e diplomatit amerikan. Në Kosovë po rriten rastet e krimit të organizuar dhe të krimit mafioz, thanë Kadi e Feler Prishtinë, 23 janar 2003 - Në seancën e sotme të Kuvendit të Kosovës për gjendjen e sigurisë në vend raportuan Kristian Kadi nga departamenti i drejtësisë dhe Shtefan Feler, komisioner i policisë së UNMIK-ut. Të dy përfaqësuesit ndërkombëtarë, duke folur para deputetëve të Kuvendit për gjendjen e sigurisë, thanë se ajo nuk është e mirë, ndonëse ka pasur krime më pak se një vit më parë. Ata theksuan se në Kosovë po rriten rastet e krimit të organizuar dhe të krimit mafioz, siç e quajtën ata. Gjatë tre muajve të fundit në Kosovë janë shënuar tetë raste të krimeve të tilla. Këto raste, thanë Kadi e Feler, janë të motivuara edhe politikisht. Ata përmendën shpërthimin e autobombës që ndodhi në Prishtinë në dhjetor të vitit të kaluar, vrasjen e kryetarit të Asamblesë komunale në Therandë (Suharekë) menjeherë pas zgjedhjeve komunale, vrasjen e fundit më 4 janar 2003 në Pejë e kolonel Tahir Zemajt, duke theksuar posaçësisht rastin e fundit të sulmit kundër komandës rajonale të policisë në Pejë. Këto raste, thanë ata, janë raste që shqetësojnë opinionin dhe organet përgjegjëse në Kosovë, sepse fillojnë fillimin e funksionimit të krimit të organizuar në Kosovë, që sipas tyre, dukuri kjo deri më tash e panjohur në Kosovë. Ata thanë se gjatë këtij viti do të barten shumë përgjegjësi të policisë ndërkombëtare mbi Shërbimin Policor të Kosovës, duke vlerësuar se ky shërbim do të mund të ketë një komunikim shumë më të mirë me popullatën, e cila do të ndihmojë në zbulimin e krimeve. Ata paralajmëruan se ka mundësi që në Kosovë të vijnë edhe njësi të specializuara nga vendet e ndryshme për të ndihmuar në luftë kundër krimit të organizuar. Problem thelbësor, thanë Kadi e Feler, paraqet dëshmitarët të cilët qëllojnë në vendin e ngjarjes apo kanë informacione për krimin, por kanë frikë të paraqesin krimin. Lidhur me këtë çështje Feler tha se ka rreth 200 dëshmitarë, ndërkaq asnjëri nga ata s'ka guxuar të raportojë se çka ka parë. Policia do të ndërmarrë masa të mbrojtjes së dëshmitarëve. Deputetët patën shumë vërejtje në paraqitjen e dy përfaqësuesve ndërkombëtarë për gjendjen e sigurisë. Duke diskutuar në këtë temë, Sabri Hamiti, kryetari Grupit parlamentar të LDK-së, tha se shpjegimet se vrasjet e mëdha nuk mund të zbulohen lehtë sepse janë të organizuara mirë, në mënyrë implicite thonë që në Kosovë ka një rrjet të organizuar të krimit - një krim ekonomik që përmban lidhje me një krim politik. "Ka shpjegime që thonë se krimi e dhuna në Kosovë janë pasojë e daljes nga lufta, nga shkatërrimi e gjenocidi, duke e parë të lidhur me një gjendje të hallakatur njësoj sociale e psikologjike. Mirëpo, tha deputeti Hamiti, është esenciale të thuhet shkoqur, a ka rrjet të krimit të organizuar në Kosovë? A e prodhon krimin Kosova dhe a është e zonja Kosova të eksportojë krim? Duket që pyetja do të shtrohet krejt ndryshe. Për shkak të pozitës, për shkak të gjendjes, për shkak të qarkullimit të pakontrolluar, për shkak të kapacitetit të saj Kosova nuk mund të përhapë, pra të eksportojë krimin. Por është evidente që dhuna e krimi i pandëshkuar shpejt e fuqishëm mund t'i përmbysin të gjitha vlerat, mund të rrënojë gjithë ardhmërinë e Kosovës. Ramush Haradina pasi pyeti sesi mund të ndërtojmë për vete, tha se këtë duhet bërë duke pasë besim në njëri tjetrin, duke mos iu frikuar njëri tjetrit për shkak të një pakënaqësie ose partiake ose etnike në Kosovë. Ai propozoi të ndërtohen grupe me përbërje të gjerë dhe të kërkohet përgjegjësinë për të. Haradinaj tha se shpreson që parlamenti i Kosovës rendin e sigurinë do ta kuptojë si një prej segmenteve edhe pse situata politike është jo aq e favorshme, si edhe ajo ekonomike. Ai tha duhet kërkuar zgjidhjen duke marrë përgjegjësitë mbi vete duke u përmballë me sfidat në funksion të daljes nga kjo situatë. Deputetja Nekibe Kelmendi pyeti përgjegjësit e UNMIK-ut sa po punojnë në ndalimin e përzierjes së përfaqësuesve të Ministrisë Punëve të Brendshme të Serbisë në veriun e Kosovës, pse janë marrë instruktorë nga Serbia në shkollën policore në Vushtrri etj. Hajredin Kuçi pyeti se kush është përgjegjës për kufijtë e Kosovës sepse nuk ka pika kontrolli dhe në Kosovë infiltrehen ekstremistë të ndryshëm. Deputeti Bujar Dugolli pyeti për kapjen e kriminelëve të luftës që janë arratisur nga burgjet e Kosovës etj. Një delegacion i Komisionit të mbrojtjes i Senatit italian ndodhet për vizitë në Kosovë Prishtinë, 23 janar 2003 - Në Kosovë ndodhet për një vizitë dyditore delegacioni i Komisionit të mbrojtjes i Senatit italian. Mes tjerash delegacioni do të vizitojë task forc italiane Sauro, e pastaj Prizrenin, ku ndodhet qendra e komandës italo-gjermane e Brigadës shumëkombëshe e KFOR-it. Nesër pritet që delegacioni të takohet me komandantin e KFOR-it, Fabio Mini. Londra dënon sulmin kundër policisë në Pejë Prishtinë, 23 janar 2003 - Shefi i zyrës britanike në Kosovë, Mark Dikinson ka dënuar sulmin që ndodhi mbrëmë në Pejë. "Qeveria britanike e dënon këtë sulm në praninë ndërkombëtare. Askush nuk u lëndua dhe nuk u vra. Në Kosovë në të kaluarën kanë ndodhur edhe krime më të rënda se ky i fundit. Po ata që kanë kryer këtë krim rrezikojnë veten dhe tërë shoqërinë kosovare". Zoti Dikinson njëherit përmes një deklarate u ka bërë thirrje të gjithë atyre që dinë diçka për këtë krim, ta njoftojnë policinë. Strazburi hap dyert për kuadrot mjekësore nga Kosova Gjilan, 23 janar 2003 - Dr.Halil Ajvazit, specialist i oftamologjisë nga Gjilani, në bazë të një konkursi që ka shpallur Agjencioni Evropian për shkollimin e kuadrove, i është akorduar bursa tremujore për një subspecializim jashtë Kosovës dhe pikërisht në njërën nga klinikat më të njohura të Strazburit. Dr. Halili thotë se këtë e kupton edhe si një rast të mire për të, por edhe si përgjegjësi, sepse ai është i vetëdijshëm se në Strasbur do të jetë edhe një përfaqësues nga Kosova, në të njëjtën kohë. "Do të mundohem të jem ambasador i Kosovës edhe në shkencë", thote Halili. Studimet e thella në lëmin e mikrokirurgjisë së syrit, dr. Halili do t`i vazhdojë te profesori Zhak Flaman në Strasbur në Universitetin e njohur të Lui Pasterit. Kuvendi Komunal i Gjilanit e ka mbështetur shkuarjen e dr.Halilit në Strasbur, sepse Gjilani aktualisht ka nevojë për kuadro nga lëmi i oftamologjisë dhe pacientët detyrohen që ndihmën mjekësore ta kërkojnë jashtë Gjilanit. Tirana zyrtare dënon atentatin ndaj stacionit të policisë së UNMIK-ut në Pejë Tiranë, 23 janar 2003 - Ministria e Punëve të Jashtme shpreh shqetësim dhe dënon atentatin e kryer dje ndaj stacionit të policisë së UNMIK-ut në Pejë. "Shprehim bindjen se ky veprim nuk i shërben qëllimit dhe interesave të Kosovës, sigurisë dhe paqes në rajon. Njëkohësisht shprehim besimin se autoritetet kompetente do të bëjnë të mundur gjetjen dhe ndëshkimin e autorëve të këtij akti", thuhet në një deklaratë të Agim Nezës, zëdhënës i MPJ. Banorët serbë bllokojnë rrugën Prishtinë-Shkup Prishtinë, 23 janar 2003 - Banorët e disa shfatrave afër Prishtinës, sot në mesditë për një orë kanë bllokuar rrugën magjistrale Prishtinë-Shkup, në shenjë pakënaqësie për shkak të mungesës së energjisë elektrike. Banorët serbë ankohen se për shkak se zona industriale në këtë pjesë harxhon tepër energji dhe ata kanë mungesë në furnizim. Por këta banorë të fshatrave serbe në anën tjetër nuk e paguajnë energjinë e shpenzuar. Ndërkohë rruga është zhbllokuar, por serbët kanë paralajmëruar se nesër përsëri do ta bllokojnë këtë aks rrugor. Kuvendi i Kosovës po debaton sot për gjendjen e sigurisë në vend Prishtinë, 23 janar 2003 - Kuvendi i Kosovës në seancën e sotme plenare po debaton për gjendjen e sigurisë në vend. Fillimisht para deputetëve lidhur me këtë temë folën Kristian Kadi nga departamenti i drejtësisë, si dhe komisioneri i policisë së UNMIK-ut Shtefan Feler. Mbrëmë në Pejë me një predhë antitank është sulmuar selia e policisë se UNMIK-ut Prishtinë, 23 janar 2003 - Mbrëmë rreth orës 19:00 është sulmuar me një predhë antitank kati i dytë i selisë së policisë së UNMIK-ut në Pejë. Në momentin e shpërthimit nëpër zyrat e kësaj selie ndodheshin edhe dy agjentë të policisë italiane të cilët nuk kanë pësuar asgjë të keqe sikurse edhe pjesa e personelit. Shpërthimi ka shkaktuar vetëm dëme materiale dhe se vendi ku ka ndodhur vërshimi është i rrethuar nga forcat e sigurisë ka deklaruar zëdhënësi i UNMIK-ut Andrea Anjeli. Këtë incident e ka konfirmuar edhe zëdhënësi i policisë ndërkombëtare në Prishtinë, Derek Çepell. Edhe ai ka pohuar se nuk ka të lënduar apo të vdekur, por vetëm dëme materaiale, kryesisht dritare të thyera. Dëshmitarët okularë kanë deklaruar se shpërthimi ishte i fuqishëm dhe se ka shqetësuar banorët e Pejës të cilët nuk dinin se çfarë po ndodhte. Sidomos pas vrasjes së trefishtë që ndodhi kohë më parë në Pejë, banorët e këtij qyteti për shkak të mosigurisë kanë rralluar në maksimum qarkullimin e tyre në orët e mbrëmjes. Qeveria e Kosovës ka dënuar krijimin e bashkësisë të komunave serbe në veri të Kosovës Prishtinë, 23 janar 2003 - Qeveria e Kosovës ka dënuar krijimin e bashkësisë të komunave serbe në veri të Kosovës. Duke debatuar për transferimin e kompetencave nga administrata e UNMIK-ut në institucionet vendore në këtë mbledhje u tha se deri me 10 shkurt 2003 ministrat duhet të plotësojnë formularët e shpërndarë për të konkretizuar se cilat kompetenca duhet t'u transferohen atyre për të qenë më efikas në punën e qeverisë dhe institucioneve tjera të Kosovës. Qeveria ka diskutuar edhe për privatizimin dhe Agjencinë Kosovare të Mirëbesimit dhe është konkluduar se në të ardhmen qeveria duhet të ketë rol më aktiv në këtë proces. Në mbledhje është debataur edhe gjendja në operatorin e telefonisë mobile në Kosovë Vala 900 për të cilën është thënë se zhvillimi në faza i projektit të kësaj telefonie ka ngecur, sidomos faza e tretë edhepse është kryer pagesa e pajisjeve teknike të cilat janë në Kosovë. Siç u tha ato mbahen të bllokuara nga Agjencia Kosovare e Mirëbesimit. Gjithashtu është diskutuar edhe për operimin jolegjitim të Mobtelit në Kosovë, operator i telefonisë mobile nga Serbia. Në komunikatën e Qeverisë së Kosovës thuhet se ky operator ka operuar në vendin tonë pa qenë i licencuar në Kosovë dhe nuk ka paguar obligimet e veta tatimore ndaj buxhetit të Kosovës. Qeveria e Kosovës konstaton se tatimi duhet të rritet vetëm në të ardhurat mbi 450 euro Prishtinë, 23 janar 2003 - Çështja më e diskutueshme në Kosovë tatimi në paga do të definohet së shpejti. Tatimi duhet të rritet vetëm në të ardhurat mbi 450 euro, propozon Qeveria e Kosovës për çka janë pajtuar edhe pajtuar edhe profesionistët e Fondit Monetar Ndërkombëtar. Ndërkaq vendimin për këtë të premte pritet ta publikojë administratori Mihael Shtajner. Propozimi i Qeverisë së Kosovës për uljen e tatimit në paga do të diskutohet të premtën në takimin e Këshilli Ekonomik Fiskal. Zyrtarët e Ministrisë së Ekonomisë dhe Financave theksuan se Qeveria e Kosovës ka shqyrtuar të gjitha mundësitë dhe propozimi i dalë dje është më i përshtatshmi për situatën ekonomike të Kosovës. Sipas tyre paga deri 80 euro do të jetë pa tatim, ndërkaq nga 81 deri në 250 euro, tatimi do të jetë 5 për qind. Nga 250 deri 450 euro tatimi do të jetë 10 për qind, ndërkaq mbi shumën 450 euro shkalla e tatimit do të rritet në 20 për qind. Çoviq thotë se asnjë politikan i vendit të tij nuk mund të lejojë që Kosova të lundrojë në pavarësi Beograd, 23 janar 2003 - Zëvendëskryeministri serb Nebojsha Çoviq thotë se asnjë politikan i vendit të tij nuk mund të lejojë që Kosova të lundrojë në pavarësi dhe këtë nuk e parasheh as Rezoluta 1244 e KS të OKB-së. Por, Çoviq ka thënë se duhet të jemi të përgatitur që, siç është shprehur mos dhashtë Zoti të miratohet Rezolutë e re me të cilën Kosova do të ishte e pavarur. Kjo doemos duhet të pengohet ka thënë ky zyrtar serb. Rezervistë të armatosur "Luanët" prej dje po e mbajnë të bllokuar rrugën që lidhë Shkupin me pikën kufitare të Bllaces Shkup, 23 janar 2003 - Qindra rezervistë të njësisë paraushtarake "Luanët", një pjesë e të cilëve janë të armatosur, që prej mëngjesit të djeshëm po e mbajnë të bllokuar rrugën që lidh kryeqytetin e Maqedonisë në pikën kufitare të Bllacës. Ministria e brendshme maqedonase ka dërguar qindra policë në vendin e ngjarjes dhe sipas informacioneve të konfirmuara zyrtarisht të dyja palët janë të armatosura me mitraloz minahedhës dhe raketahedhës. Bisedimet që u zhvilluan midis përfaqësuesve të rezervistëve dhe zyrtarëve të lartë të policisë nuk dhanë asnjë rezultat dhe gjendja mbetet e tensionuar. Kur njësiti "Tigrat" me urdhërin e Ministrisë së Punëve të Brendshme filloi aksionin për të zhbllokuar rrugën i vënë në nishan kolegët e tyre. Në këtë situatë u dha urdhëri tjetër për tërheqjen e forcave të rregullta të policisë, përfshirë edhe njësinë "Tigrat" që të largohen rreth 40 metra prapa për të shmangur konfrontimin me armë midis tyre. Aktualisht të dyja palët qëndrojnë në pozicionet e veta rreth 100 metra largësi nga njëra tjetra dhe të armatosur. Njësiti i rezervistëve dje për herë të parë ka shfaqur edhe disa kërkesa politike. Zëdhënësi i "Luanëve" tha se ata kërkojnë që të izolohen nga pushteti ish-pjesëtarët e Ushtrisë Çlirimtare Kombëtare. Sipas tij ish-strukturat e terroristëve janë të instaluara në pushtet andaj kërkohet që ata të izolohen. Partia Kristian Demokratike ka shënuar fitore të ngushtë kundrejt Partisë Laburiste në zgjedhjet e Holandës Hagë, 23 janar 2003 - Partia në pushtet Kristian Demokratike ka shënuar një fitore të ngushtë kundrejt Partisë Laburiste në zgjedheyt e Holandës, njofton BBC World. Shihet se votuesit janë përcaktuar për stabilitet pas një viti me trazira, kanë theksuar analistët. Ata u janë kthyer dy partive kryesore dhe e kanë braktisur Partinë e populistit të vrarë, Pim Fortajn, i cili pat tronditur politikën holandeze pasi pat zënë vendin e dytë në zgjedhjet e kaluara. Kështu, Partia kristiandemokrate ka fituar 44 vende, Partia laburiste 42 vende, kurse Partia e Pim Fortajnit të vrarë, nga 18 vende sa ka pasur, ka rënë në vetëm 8 vende në parlamentin prej 150 vendesh. Është arrestuar gruaja e liderit të Frontit Popullor për Çlirimin e Palestinës Gaza, 23 janar 2003 – Forcat e sigurimit izraelit kanë arrestuar gruan e liderit të Frontit Popullor për Çlirimit të Palestinës, Ahmed Sadat, bën të ditur Rojter në një njoftim të sotëm. Njoftohet se Abla Sadat është arrestuar të martën në urën Allenbaj duke kaluar kufirin me Jordaninë, prej ku synonte të udhëtonte në Brazil për të marrë pjesë në një konferencë. Zyrtarët izraelitë kanë refuzuar të komentojnë këtë njoftim, që e kanë shpallur zyrtarët e Asosiacionit për të Drejtat e Njeriut në Rripin e Gazës. Sadat, sekretar i përgjithshëm i FPÇP-së, ndodhet në burg që prej majit të kaluar, ngase kishte vrarë një ministër izraelit dhe në burg mbikëqyret nga rojet britanike dhe amerikane. Uashington: Tom Rixh - ministër i parë i Sigurimit të atdheut Uashington, 23 janar 2003 - Senati amerikan njëzërit ka konfirmuar zgjedhjen e Tom Rixhit si ministër i parë i Sigurimit të atdheut, duke ia besuar kështu një rol të madh ministror dhe të mbrojtësit të sigurisë së SHBA-ve, posaçërisht që nga rreziku më i ri nga terrorizmi ndërkombëtar. Rixh është bërë ministër dy ditë më parë para se ministria e tij edhe formalisht të fillojë punën. Para tij ndodhet një detyrë e madhe e organizimit të ministrisë së re e cila do t'i tubojë 22 agjenci federale dhe pothuajse 170.000 të punësuar, gjë që është organizata më e madhe e qeverisë federale e ndërmarrë që nga krijimi i ministrisë së mbrojtjes pas Luftës së Dytë Botërore. Komanda e ministrisë do të jetë në Virgjini afër Uashingtonit. Dominon mendimi se do t'i duhet muaj të tërë deri në funksionimin real. Ka një buxhet prej 40 miliardë dollarësh, kurse me kapacitet të plotë duhet të fillojë të funksionojë më 30 shtator. Samiti vjetor i Forumit Ekonomik Botëror filloi punën sot në Davos Davos, 23 janar 2003 – Samiti vjetor i Forumit Ekonomik Botëror është hapur sot (të enjten) në Davos, ku po marrin pjesë përfaqësuesit qeveritarë, të cilët po përballen me ktritikat e praktikave të bizneseve, ndërkaq liderët politikë i ka kapluar pasiguria globale, njfton AFP. Ky sesion i Forumit mbahet në pushimoret e Alpeve zvicërane prej 23 deri më 28 janar 2003. Tema e sivjeme e samitit të Davosit është "Ndërtimi i mirëbesimit". Në Stamboll fqinjët e Irakut diskutojnë krizën Stamboll, 23 janar 2003 - Në Turqi gjashtë shtete fqinje të Irakut po diskutojnë mundësitë e parandalimit të luftës në Irak. Ministrat e jashtëm nga Jordania, Irani, Arabia Saudite, Egjipti dhe Siria janë ftuar nga qeveria turke në Stamboll për të diskutuar rrugën se si të zgjidhet kriza që kërcënon rajonin e tyre. Ky takim rrjedh në radhë të parë nga shqetësimet e Turqisë se çfarë pasojash do të ketë lufta mbi rajonin. Ka mosmarrëveshje mes kampeve pro dhe anti-amerikane. Disa nga vendet kërkojnë që deklarata e takimit të përmbajë edhe një kritikë ndaj qëndrimit agresor amerikan, por çdo kritikë ndaj Amerikës do t'a turpëronte Turqinë, aleate e afërt e SHBA-ve. Deklaratat pritet të mos kenë asnjë referencë ndaj opozitës irakiane në mërgim. Ministri i jashtëm turk, Jashar Jakish se paqa mund të shpëtohej. Në Turqi ky takim shikohet me cinizëm, por qeveria turke thotë se mund të luajë një rol të rëndësishëm. Arabia Saudite ka arrestuar vrasësin kuvajtian të amerikanit, që punonte në bazën ushtarake në Kuvajt Kuvajt Siti, 23 janar 2003 – Arabia Saudite ka arrestuar kuvajtianin e dyshimtë të përzier në vrasjen e amerikanit, që punonte në bazën ushtarake amerikane në Kuvajt, ku Uashingtoni po përgatitet për luftën e mundshme me Irakun, njofton Rojter. Zyrtarët kuvajtianë kanë deklaruar se burri i dyshimtë ka hyrë në Arabinë Saudite menjëherë pas pusisë, ku kishte vrarë 46-vjeçarin Majkëll Rene Pouliot, një punëtor civil që punonte me kontratë në kampin Doha, që është kampi më i madh amerikan në Kuvajt. Z. Pouliot qe vrarë në veturën e tij me një breshëri automatiku në rrugë afër bazës amerikane në fjalë, kurse kolegu i tij Dejvid Karevej qe plagosur dhe qe mjekuar në spitalin e Kuvajtit. Fisher fillon sot misionin katërditor në Lindjen e Mesme Berlin, 23 janar 2003 – Ministri i jashtëm gjerman, Joshka Fisher viziton Lindjen e Mesme më qëllim të forcimit të përpjekjeve diplomatike për të evituar luftën me Irakun, njofton AFP. Ministria gjermane s'ka dhënë informata më të hollësishme për misionin katërditor të z. Fisher, që fillon sot (të enjten) në Turqi, Egjipt dhe Jordan. Është thënë vetëm se ky mision është fokusuar në "zbatimin paqësor" të rezolutës së Kombeve të Bashkuara 1441 për çarmatimin e Irakut. Numri i viktimave të termetit në Meksikë është ngritur në 28 veta Kolima, Meksikë, 23 janar 2003 – Numri i viktimave të termetit të fuqishëm të djeshëm, që goditi Meksikën përgjatë brigjeve të Pacifikut, është ngritur në 28 veta, ndërsa ekipet e shpëtimit po depërtojnë nëpër rrënojat e shtëpive dhe të ndërtesave të shkatërruara nga termeti, njofton AFP. Pjesa dërrmuese e viktimava kanë humbur jetën në rrënojat e ndërtesave në shtetin Kolima. Njoftohet gjithashtu se të pakten 300 persona janë lënduar në këtë termet, manjituda e të cilit ishte 7.8. Bush ka paralajmëruar ushtarakët e Irakut të mos përdorin armët për zhdukje në masë në luftë Uashington, 23 janar 2003 - Presidenti amerikan Xhorxh Bush u ka tërhequr vërejtjen gjeneralëve të Irakut kundër përdorimit të armëve për zhdukje në masë në një luftë me forcat e prira nga Shtetet e Bashkuara. "Po qe se ndonjë oficer apo ushtar irakian merr urdhër nga Sadam Husein apo i biri, ose nga cilido vrasës që zë pozita të larta në qeverinë e tyre, këshilla ime është, mos e ndiqni atw urdhër, sepse po të zgjidhni ta bëni këte, kur Iraku do të çlirohet, ju do të ngarkoheni, gjykoheni dhe dënoheni si kriminelë lufte", ka thënë Bush. Ai ka theksuar se do të ketë pasoja serioze për Saddamin poqese Shtetet e Bashkuara shkojnë në luftë për çarmatosjen e vendit të tij. Bush ka thënë se do të preferonte që paqësisht të spastronte Irakun nga armët vrastare, por ka shtuar se është i përgatitur të shkojë në luftë për ta bërë këtë. Bliks: Iraku duhet të përmbushë kërkesat e inspektorëve për bashkëpunim "pro-aktiv" Nju Jork, 23 janar 2003 - Kryeinspektori i Kombeve të Bashkuara për armatimin, Hans Bliks pas bisedimeve dy ditëshe në Bagdad deklaroi se Iraku tek duhet të përmbushë kërkesat e inspektorëve për bashkëpunim "pro-aktiv". Kryeinspektorët duhet të paraqesin në 27 janar para Këshillit të Sigurimit raportin për dy muajt e para të inspektimeve në Irak për armë të zhdukjes në masë. Shirak dhe Shreder thanë se duhet të bëhet gjithëçka për të shmangur luftën në Irak Londër, 23 janar - Kryeministri Toni Bler tha se Britania mund të mbështesë luftën e udhëhequr nga Shtetet e Bashkuara kundër Irakut pa mbështejen e Këshillit të Sigurimit të OKB-së. Presidenti francez Shirak dhe kancelari gjerman Shreder u takuan në Paris e thanë se duhet të bëhet gjithëçka për të shmangur luftën në Irak. Gjenerali amerikan Tomi Frenks arriti në Jordani Aman, 23 janar 2003 - Tomi Frenks, gjeneral i Shteteve të Bashkuara, i cili do të komandonte me ndonjë invadim të Irakuat, arriti në Jordani për bisedime me zyratarët më të lartë të vendit, në kuadrin e turneut në Lindje të Afërt. Nuk u dhanë hollësi për temat për të cilat do të diskutohet. Çeçenët vazhdojnë të rrëmbehen dhe vriten nga forcat ruse të sigurisë Vjenë, 23 janar 2003 - Fderata ndërkombëtare e Helsinkit për të drejtat e njeriut thotë se civilët çeçenë vazhdojnë të rrëmbehen, rrihen dhe vriten nga forcat ruse të sigurisë. Kjo organizatë ndërkombëtare me seli në Vienë publikoi komunikatën e saj ndërkohë që delegacini nga Këshilli i Evropës vizitoi Çeçeninë për bisedime me zyrtarët rusë e çeçenë. D'Esten kritikoi propozimin e fundit gjermano-francez Paris, 23 janar 2003 - Presidenti i Konventës së BE, Valeri Zhiskar d'Esten e ka kritikuar propozimin e fundit gjermano-francez për ta kryesuar BE me dy presidentë. Propozimi që presidenti i komisionit të BE të zgjidhet nga Parlamenti Evropian mund të çojë në një politizim të komisionit, i tha Zhiskar De Esten gazetës së Parisit, "Le Figaro". Konventa Evropiane diskutoi dje për herë të parë për reformën ndërkombëtare të Bashkimit Evropian. Programi bërthamor i Koresë së Veriut kërcënon paqen botërore Uashington, 23 janar 2003 - Nënsekretari amerikan i Shtetit për kontrollin e armatimeve, Xhon Bolton, tha se Këshilli i Sigurimit i Kombeve të Bashkuara mund të marrë në shqyrtim çështjen e programit bërthamor të Koresë së Veriut nga fundi i javës. Zoti Bolton tha se të pesë anëtarët e përhershëm të Këshillit të Sigurimit janë dakord se Korea e Veriut nuk duhet të lejohet të ketë armë bërthamore. Korea e Veriut ka thënë se vendosja e çdo lloj sanksionesh kundër saj mund të shkaktojë luftën. Një tjetër zyrtar i lartë i Shteteve të Bashkuara thotë se nuk ka plane të menjëhershme për të kërkuar vendosjen e sanksioneve.

	Copyright©2000-2003 Trepca.net - Të gjitha të drejtat e rezervuara.