Lajme

E mërkure, 22 janar 2003

Përmbajtja:

• KFOR-i amerikan dëshiron t`i bartë disa nga kompetencat tek administrata civile

• Në Kosovë katër orë në terr dhe dy me drita

• D. Çapell thotë se UNMIK-u nuk posedon informata për ekzistimin e grupit "Siguria e Atdheut" në Kosovë

• Sasia e fenolit nga KEK-u në lumin Sitnica nuk kalon parametrat e lejuar

• F.Bastalio ka theksuar në Mitrovicë se vendimi për krijimin e bashkësisë së komunave serbe është i paligjshëm

• Policia e Kandasë konfirmoi arrestimin e një serbi të akuzuar për vrasjen e 19 shqiptarëve në Podujevë

• Policët e njësisë së shpërbërë maqedonase "Luanët" kanë bllokuar sot rrugën Shkup-Prishtinë

• Forcat paqeruajtëse ruse tërhiqen plotësisht nga hapësira e ish-Jugosllavisë

• Ministria e Punëve të Jashtme e Shqipërisë vlerëson qëndrimet e shefit të UNMIK-ut Mihael Shtajner

• Në takimin Mesiq-Shtajner: Kroacia i kërkon pronat e veta në Kosovë

• Realizimi i Marrëveshjes së Ohrit kushton rreth 70 milionë dollarë

• Sipas drejtuesit të opozitës VMRO-DPMN Lube Boshkovski në Maqedoni veprojnë së paku 500-600 muxhahedin nga vendet arabe?!

• Australia paralajmëroi dërgimin e ushtarëve në rajonin e gjirit

• Robertson ka deklaruar se do të tërhiqet në dhjetor

• Nga një termet i fuqishëm në Meksikë kanë humbur jetën të pakten 21 persona

• Gjermania kundër luftës në Irak

• Bush: Sadam Huseinit i është dhënë kohë me bollëk që të çarmatoset

• Britania do të sulmojë me SHBA-të nëse anëtarë të KS-së vënë veto në rezolutën e dytë

• Izraeli ndërmori dje sulme ajrore dhe artilerike në jug të Libanit

• Gjermania ka vënë në dispozicion sistemin për gjurmim "Luna" për inspektorët e KB

KFOR-i amerikan dëshiron t`i bartë disa nga kompetencat tek administrata civile

 

Gjilan, 22 janar 2003 - KFOR-i amerikan që kontrollon sektorin e lindjes në Kosovë, ka filluar t`i mbyllë nënbazat e veta në terren, ku ato ishin vendosur në qershor të vitit 1999, duke filluar në këtë mënyrë bartjen graduale të disa kompetencave të sigurisë tek administrata civile lokale.

Edhe nënkoloneli Dejvid Jexh (David Sage), komandant i kampit "Montith" në Gjilan dhe Lutfi Haziri, kryetar i komunës, në një takim që mbajtën sot me gazetarë, e kanë vlerësuar të mirë gjendjen e sigurisë në Gjilan, ndërsa kanë pohuar se po punojnë bashkarisht në zgjidhjen e problemeve ekzistuese, duke e nxitur në bashkëpunim të ndërsjellë edhe komunitetin e Cërnicës, ku para disa ditësh ndodhi vrasja e serbit TrajanTrifunoviq.

 

Koloneli Sejxh tha se është i kënaqur me reagimin e shpejtë të organeve të ndjekjes dhe hetuesisë, të cilat kanë arrestuar disa të dyshuar, ndërsa tash është kompetencë e gjyqit që ta bëjë punën e vetë.

 

Ai ka sqaruar se mbajtja në bisedë për disa orë e Afrim Zeqirit, nuk kishte lidhje me rastin e Trifunoviqit, por ishte një proces ku u morën në pyetje disa njerëz, pas një incidenti të gjuajtjes me gurë, që kishte ndodhur në Cërnicë.

"Ne kemi vendosur që t`i mbyllim bazat tona në Zhegër dhe në Cërnicë, meqenëse ka një siguri të mjaftueshme në këtë komunë, ndërsa edhe numri i ushtarëve tanë në kampin e Gjilanit është zvogëluar", tha sot koloneli Sejxh, duke hequr dilemën se KFOR-i do të mbetet këtu për të vazhduar patrullimet në këto zona, madje me prezencë më të madh të ushtarëve.

Tërheqja e ushtarëve nga nënbazat, në kampin "Montith", duhet shikuar si një lëvizje pozitive dhe si një argument që institucionet vendore po bëjnë një punë të mirë, është shprehur nënkoloneli Sejxh.

Pyetjes nëse mund të quhet i qëlluar për momentin ky hap i KFOR-it për heqjen e nënbazave nga terreni, tani kur gjithnjë e më shpeshë flitet për një acarim të mundshëm të gjendjes përreth kufirit, në pranverë, komandanti Dejvid Sejxh është përgjigjur duke thënë se mundësitë e tyre për ta shtuar prezencën në zonën e kufirit, me patrullime 24 orëshe, do të jenë edhe më të mëdha.

Ndërkaq, kryetari i komunës Lutfi Haziri tha se ky është një proces normal që po e bënë KFOR-i, sepse më herët janë tërhequr nënbazat edhe nga Pogragja, Poneshi dhe disa punkte tjera dhe kjo nuk duhet të jetë arsye për brengosje, sepse ushtarët amerikanë do të jenë këtu edhe në të ardhmen.

 

 

Në Kosovë katër orë në terr dhe dy me drita

 

Prishtinë, 22 janar 2003 - Gjatë ditës së sotme është ashpërsuar regjimi i reduktimeve të energjisë elektrike në Kosovë. Kështu sot orari është katër pa drita dhe dy me drita. Nuk është dhënë ndonjë njoftim i arsyes së këtyre reduktimeve.

 

 

D. Çapell thotë se UNMIK-u nuk posedon informata për ekzistimin e grupit "Siguria e Atdheut" në Kosovë

 

Prishtinë, 22 janar 2003 - Misioni i UNMIK-ut thotë se nuk posedon informata për ekzistimin e grupit të quajtur "Siguria e Atdheut" apo për veprimin e tij në Kosovë. Në adresë të disa mediave të Kosovës ka arritur një komunikatë e nënshkruar në emër të këtij grupi ku thuhej se do të ndërrmerren veprime kundër atyre që ata i quajnë armiq të Kosovës.

 

Zëdhënësi i UNMIK-ut Derek Çapell në një prononcim për BBC-në thotë se kjo mendohet se bëhet si hakmarrje ndaj vrasjes së Tahir Zemajt dhe dy bashkëpunëtorëve të tij para një jave e gjysmë.

 

Por askush nuk ka marrë përgjegjësinë dhe askush nuk ka vënë emrin për të nënshkruar këtë deklaratë. "Ne nuk e kemi idenë se kanë qenë dy veta që e kanë nënshkruar këtë deklaratë, apo nëse pas saj qëndron një organizatë e tërë", tha Çapell.

 

Ai ka shtuar se ka pasur shumë spekulime në shtypin lokal i cili është përpjekur që t'ia atribuojë grupeve të veçanta politike. Këto janë thjeshtë spekulime të shtypit, policia nuk ka njoftime nga askush se kush e ka organizuar këtë grup, apo nëse në fakt ekziston njër grup pas këtij emri, thekson Çapell.

 

Siaps tij "kërcënimi më i madh për Kosovën tani nuk është nga ndonjë forcë jashtë Kosovës, por nga forca brendapërbrenda saj që duan ta destabilizojnë atë. Disa nga këto forca kanë lidhje me krimin e organizuar, disa janë grupe si ky nëse ai ekziston, grupe militantësh".

 

 

Sasia e fenolit nga KEK-u në lumin Sitnica nuk kalon parametrat e lejuar

 

Prishtinë, 22 janar 2003 - Sasia e fenolit që derdhet nga KEK-u në lumin Sitnica nuk kalon parametrat e lejuar, por megjithatë nuk preferohet të përdoret uji i pijëshëm i puseve përgjatë rrjedhës së këtij lumi, thonë zyrtarët e Ministrisë së Ambientit. Nga analizat e Institutit Hidrometeorlogjik të Kosovës dhe të Institutit Kombëtar të Shëndetësisë në fshatin Vragoli në një litër ujë është koncentruar 0.12 miligram sasi e fenollit, ndërsa në dalje të KEK-ut në fshatin Plemetin 0,13 miligram.

 

Sasia maksimale e lejuar është 0,57 miligram në një litër, thotë dr. Jusuf Dedushaj nga Instituti Kombëtar i Shëndetësisë.

Ministria e Ambientit nuk ka pranuar ekspertë nga Serbia për verifikimin e sasisë së Fenollit që ka ardhur nga presioni i zyrtarëve serbë te ndërkombëtarët e UNMIK-ut.

 

 

F.Bastalio ka theksuar në Mitrovicë se vendimi për krijimin e bashkësisë së komunave serbe është i paligjshëm

 

Mitrovicë, 22 janar 2003 - Zëvendëskryeadministratori i Kosovës Françesko Bastalio ka qënduar në Mitrovicë në përpjekje për ta bindur kryetarin e komunës Faruk Spahija se vendimi i serbëve për krijimin e bashkësisë së komunave serbe në veri të Kosovës është i paligjshëm dhe nuk përkrahet nga administrata ndërkombëtare.

 

Ndërkaq, Faruk Spahija tha se zëvendësadministratori nuk i ka dhënë përgjigje nëse UNMIK-u ka nënshkruar apo jo marrëveshjen e publikuar në mediat serbe për problemin e Mitrovicës. Ai tha kreut të UNMIK-ut z. Shtajner do t'ia përcjellë ftesën e z. Spahija për t'u sqaruar para Kuvendit komunal në lidhje me ngjarjet e fundit në Mitrovicë.

 

 

Policia e Kandasë konfirmoi arrestimin e një serbi të akuzuar për vrasjen e 19 shqiptarëve në Podujevë

 

Prishtinë, 22 janar 2003 - Policia e Kandasë javën e kaluar në qytetin Vinstor ka arrestuar Dejan Demiroviqin të akuzuar për krime të luftës të popullatës shqiptare në Podujevë. Këtë lajm e ka konfirmuar shefi i Zyrës së Kandasë në Prishtinë Shon Barber.

 

Ai ka shtuar se Demiroviq së bashku me një tjetër kanë vrarë 19 civilë shqiptarë në Podujevë. Demiroviq më parë është gjykuar në Gjykatën e Qarkut në Beograd për krime lufte.

 

Ai dhe Sasha Cvijetan janë akuzuar për vrasjen e 19 shqiptarëve në mars të vitit 1999 në Podujevë, ka thënë Barber.

 

 

Policët e njësisë së shpërbërë maqedonase "Luanët" kanë bllokuar sot rrugën Shkup-Prishtinë

 

Shkup, 22 janar 2003 - Pjesëtarët e njësisë së shpërbërë të policisë maqedonase "Luanët" kanë bllokuar sot rrugën Shkup-Prishtinë, duke kërkuar nga Ministria e Punëve të Brendshme që t'ua plotësojë disa kërkesa të caktura.

 

Bashkë me policët rezervistë, "Luanët" e armatosur janë kërcënuar se do të vazhdojnë me bllokimin e kësaj rruge ndërkombëtare derisa ministria nuk ua paguan rrogat e mbetura si dhe t'i punësojë në institucionet shetërore. Njoftohet se janë duke u zhvilluar bisedime për zhbllokimin e rrugës.

 

 

Forcat paqeruajtëse ruse tërhiqen plotësisht nga hapësira e ish-Jugosllavisë

 

Moskë, 22 janar 2003 - Gazeta moskovite "Nezavisnaja gazeta" shkruan se së shpejti pritet tërheqja e plotë e forcave paqeruajtëse ruse nga hapësira e ish-Jugosllavisë.

Gazeta pohon se ka në dorë një urdhër sekret ushtarak me të cilin parashihet qëndrimi i një numri të vogël oficerësh rus në Kosovë, detyrë parësore e të cilëve është të tregojnë sesi Rusia i mbetet besnik obligimeve të saj ndërkombëtare.

Siç shprehet gazeta, e tërë kjo i përngjan nëpunësit i cili për ta mashtruar shefin e lë sakon mbi karrigë. Angazhimet paqësore ruse nuk kanë kurrfarë ndikimi në ekuilibrin politik e ushtarak të forcës e as që Moska mund të fitojë çkadoqoftë nga krijimi i shtetit separatist në Kosovë.

Kremlini ka ardhur në përfundim se kjo barrë është bërë tepër e rëndë: tekefundit Rusia s'ka çka të humbë në Kosovë dhe në Bosnjë - deri më tash ka humbur tepër, përfundon gazeta.

 

 

Ministria e Punëve të Jashtme e Shqipërisë vlerëson qëndrimet e shefit të UNMIK-ut Mihael Shtajner

 

Tiranë, 22 janar 2003 - Ministria e Punëve të Jashtme e Shqipërisë vlerëson qëndrimet e shefit të UNMIK-ut Mihael Shtajner të shprehura, në fjalimin drejtuar popullit të Kosovës mbi përballimin dhe transferimin e përgjegjësive gjatë vitit 2003.

"Me këtë rast përshëndesim dhe një herë përpjekjet e bashkësisë ndërkombëtare dhe në veçanti kontributin e Kryeadministratorit Shtajner për përparimin dhe zhvillimin e mëtejshëm të Kosovës, e cila ndeshet me vështirësi dhe probleme tashmë të njohura, por që duhen kapërcyer", thuhet në një njoftim të kësaj Ministrie.

 

Njëherit shprehet besimi se bashkërendimi i përpjekjeve dhe angazhimit të forcave politike kosovare dhe bashkëpunimi me UNMIK-un do të përshpejtojnë procesin e transferimit të përgjegjësive dhe kompetencave, gjatë vitit 2003, tek organet e zgjedhura të Kosovës.

Gjithashtu Qeveria shqiptare shpreh bindjen se konsolidimi i një dialogu të hapur dhe të sinqertë midis autoriteteve vendore dhe atyre ndërkombëtare do të shënojë një fazë të re inkurajuese në forcimin e mëtejshëm të besimit midis tyre, duke jetësuar vizionin e përbashkët për një Kosovë demokratike, shumetnike, të sigurtë dhe me ekonomi të rimëkëmbur.

 

 

Në takimin Mesiq-Shtajner: Kroacia i kërkon pronat e veta në Kosovë

 

Zagreb, 22 janar 2003 - Kryeadministratori i Kosovës Mihael Shtajner dhe presidenti kroat Stipe Mesiq biseduan në Zagreb për mundësitë e bashkëpunimit ndërmjet Kroacisë dhe Kosovës.

 

Njoftohet se në këtë takim është buseduar për pronësinë e disa ndërmarrjeve të Kroacisë, të cilat i ka pasur përpara luftës në Kosovë. Në radhë të parë këtu mendohet për 22 pompa të benzinës të kompanisë INA dhe për disa dyqane të Varteksit dhe Borovos në Kosovë. Zyrtarët më të lartë kroatë kanë kërkuar që ato t'u kthehen në pronësi të Kroacisë.

 

Mesiq dhe Shtajner pas takimti kanë deklaruar se paqja është kusht për bashkëpunim në rajon. Mesiq ka shfaqur dëshirën që në Kosovë të funksionojë në tërësi shteti ligjor dhe ajo të jetë e lirë, sepse në Kosovë Kroacia ka interesat e saj, deklaroi ai.

 

Në këtë kontekst Mesiq ka theksuar se disa kolektive të Kroacisë i kanë në Kosovë pronat e tyre dhe ka dëshirë që punët atje të zhvillohen pozitivisht. Kthimi i pasurisë, tha Mesiq, nënkupton interesimin e Kroacisë për të investuar dhe për të hapur vende të reja pune në Kosovë.

Nga ana e tij Shtajner ka deklaruar se Kroacia është një shtet mik që ndihmon avancimin e proceseve, të cilat në Kosovë nuk janë të lehta, duke shtuar se Kosova përshëndet angazhimin e Kroacisë, posaçërisht në fushën e ekonomisë.

 

Sipas z. Shtajner i tërë rajoni përballet me shumë probleme, njëri ndër të cilët është edhe papunësia. "Mendoj se kemi interes të përbashkët të zhvillojmë ekonominë. Po ashtu jam i lumtur që presidenti Mesiq e pranoi ftesën time të vizitojë Kosovën që do të stimulonte bashkëpunimin", tha z. Shtajner.

 

 

Realizimi i Marrëveshjes së Ohrit kushton rreth 70 milionë dollarë

 

Shkup, 22 janar 2003 - Realizimi i Marrëveshjes së Ohrit kushton rreth 70 milionë dollarë. Sipas zyrtarëve të Shkupit kjo shifër parashihet në planin e implementimit të Marrëveshjes që pritet të miratohet në mbledhjen e rregullt të Qeverisë maqedonase javën e ardhshme.

 

Qeveria maqedonase pritet t'i fillojë negociatat me Fondin Monetar Ndërkombëtar ku do të përcaktohet politika makroekonomike e Maqedonisë për vitin 2003. Ministri i finacave tha se thelbi i politikës makroekonomike do të jetë shtimi i vendeve të punës dhe zvogëlimin e varfërisë.

 

 

Sipas drejtuesit të opozitës VMRO-DPMN Lube Boshkovski në Maqedoni veprojnë së paku 500-600 muxhahedin nga vendet arabe?!

 

Shkup, 22 janar 2003 - Drejtuesi i opozitës VMRO-DPMN Lube Boshkovski ka bërë të ditur se në Maqedoni veprojnë grupe të shumta të armatosura dhe aktualisht në në këtë vend ekzistojnë më së paku 500-600 muxhahedin, të cilët vijnë nga shtetet e ndryshme të botës arabe dhe të cilët janë të vendosur në rajonin e Likovës, Tetovës dhe Kumanovës dhe në afërësi të Shkupit.

 

Sipas tij njësitë e dikurshme të UÇK-së së shpërbërë ende nuk i kanë dorëzuar armët, ndërsa rreth 20.000 njerëz gjenden nga ana tjetër e kufirit dhe ata janë në gjendje gatishmërie që nëse marrin ndonjë sinjal ta prishin sigurinë për shkak se nuk pajtohen me rendin kushtetues të vendit.

 

Mirëpo, Talat Xhaferi, deputet i BDI-së, i ka demantuar këto spekulime të Boshkovskit. Ai ka shtuar se Boshkovski edhe njëherë tenton t'i bëjë provokime pjesës shqiptare në qeverinë aktuale.

 

 

Australia paralajmëroi dërgimin e ushtarëve në rajonin e gjirit

 

Kambera, 22 janar 2003 - Australia ka paralajmëruar dërgimin e ushtarëve në rajonin e gjirit. Siq ka njoftuar ministri i mbrojtjes Robert Hill trupat e para do të zhvendosen të enjëten.

 

Njëkohësisht ai theksoi se qeveria në Kanbera akoma nuk ka vendosur lidhur me zbatimin e aksionit. Zhvendosja e ushtarëve megjithate ndihmon për ashpërsimin e sfondit kërcnues kundër Irakut.

 

 

Robertson ka deklaruar se do të tërhiqet në dhjetor

 

Bruksel, 22 janar 2003 – Sekretari i përgjithshëm i NATO-s, Xhorxh Robertson, ka deklaruar sot (të merkurën) se ai do të tërhiqet në dhjetor, përkundër trysnive të fuqishme që të qëndrojë edhe për një vit dhe kështu ka hapur garën e kandidatëve për ta zëvendësuar atë, njofton Rojter.

 

"Kanë kërkuar prej meje një numër qeverish të vazhdoj të qendroj në këtë post, por mendoj se katër vjet janë afat i mjaftueshëm", ka thënë Robertson në një prononcim të tij.

 

 

Nga një termet i fuqishëm në Meksikë kanë humbur jetën të pakten 21 persona

 

Meksiko, 22 janar 2003 – Një termet i fuqishëm ka goditur të martën mbrëma pjesën qendrore dhe perendimore të Meksikës, ku kanë humbur jetën të pakten 21 persona në brigjet e Pacifikut dhe banorët kanë dalë nga shtëpia në rrugë me panik dhe duke qarë, njofton Rojter.

 

Në qytetin Kolima, i cili gjendet afër epiqendrës së termetit, janë rrëzuar shumë shtëpi dhe shumë syresh janë shkatërruar krejtësisht. Termeti ka qenë të pakten i shkallës 7.6 dhe mjaft i lartë për të shkaktuar dëme të mëdha.

 

Rreth 125 mijë njerëz kanë mbetur pa kulm mbi kokë, pa energji elektrike, pa barëra dhe pa asgjë, thonë burimet e Kryqit të Kuq të qytetit Kolima.

 

 

Gjermania kundër luftës në Irak

 

Berlin, 22 janar 2003 - Kancelari gjerman, Gerhard Shrëder, thotë se Gjermania nuk do të mbështesë rezolutën e Kombeve të Bashkuara që favorizon luftën kundër Irakut.

Kushdo që vendos që mjetet dhe kushtet të kërkojnë intervenim ushtarak në Irak, nuk do ta ketë përkrahjen e Gjermanisë, tha kancelari gjerman Gerhard Shrëder.

 

Deklarata e tij është indikacioni më i qartë deri tashti se si do të veprojë Gjermania nëse Këshilli i Sigurimit voton për një veprim ushtarak.

Sipas BBC-së zoti Shrëder mund ta ketë adoptuar qëndrimin e tij, i inkurajuar nga pozicioni i ngjashëm i ndërmarrë nga Franca.

 

 

Bush: Sadam Huseinit i është dhënë kohë me bollëk që të çarmatoset

 

Uashington, 22 janar 2003 - Presidenti i Shteteve të Bashkuara, Xhorxh Bush, ka shfaqur frustrimin e tij me aleatët që kundërshtojnë përdorimin e forcës kundër Irakut, duke thënë se presidentit Sadam Husein i është dhënë kohë me bollëk që të çarmatoset nga armët e tij për zhdukje në masë.

 

“Duket se do të jetë rishfaqje e një filmi të keq. Ai po zvarritet, ai po mashtron, ai po kërkon kohë. Ai po luan mbyllasyzas me inspektorët. Një gjë është e qartë, ai nuk po çarmatoset”, ka thënë presidenti Bush duke folur me reporterë në Shtëpinë e Bardhë.

 

 

Britania do të sulmojë me SHBA-të nëse anëtarë të KS-së vënë veto në rezolutën e dytë

 

Londër, 22 janar 2003 - Kryeministri Britanik, Toni Bler, tha në Parlamentin britanik se bashkësia ndërkombëtare nuk duhet t'i japë asnjë shenjë presidentit irakian se ka ndonjë shtegdalje tjetër nga kriza e tashme, përveç se të çarmatoset nga armët e tij të dyshuara për zhdukje në masë.

 

Bler tha se Britania rezervon të drejtën të sulmojë me Shtetet e Bashkuara nëse anëtarë të Këshillit të Sigurimit vënë veto në rezolutë të dytë që do të autorizonte sulm ushtarak kundër Irakut.

"E mbaj mend nga koha e Kosovës, se kishte shumë zëra që çoheshin e thoshin të mos shkohej asajë rruge sepse do të ishte shkatërruese për Ballkanin po ta bënim atë. Bile kishte edhe njerëz, ndonëse ishte rasti më i qartë që mund të ketë, që thanë se aksioni ushtarak në Afganistan do të ishte gabim", ka reagur Bler ndaj atyre që u frikoheshin aksioneve ushtarake të së kaluarës, të cilat më vonë u dëshmuan se patën rezultate pozitive.

 

 

Izraeli ndërmori dje sulme ajrore dhe artilerike në jug të Libanit

 

Jerusalem, 22 janar 2003 - Izraeli ndërmori dje sulme ajrore dhe artilerike në jug të Libanit në përgjigje të një sulmi raketor nga guerrilët shitë të Hezbollahut me baza në Liban, por nuk pati viktima në asnjërin sulm.

Gjithashtu dje trupat izraelite filluan të shkatërrojnë dyqanet në një fshat palestinez në Bregun perëndimor, duke thënë se ishin ndërtuar pa leje, por kyretari i fshatit akuzoi trupat se kanë ndërmarrë luftë ekonomike kundër palestinezëve.

Ndërkaq Gjykata supreme izraelite ka gjykuar se ushtarakët izraelitë mundë t'i përdorin palestinezët si "mburojë të gjallë" atëherë kur e shohin të nevojshme.

 

 

Gjermania ka vënë në dispozicion sistemin për gjurmim "Luna" për inspektorët e KB

 

Berlin, 22 janar 2003 - Qeveria gjermane për mbështetjen e punës së inspektorëve të KB për armatim ka vënë në dispozicion sistemin e ashtuquajtur për gjurmim "Luna".

 

Vendimi lidhur me dërgimin e 20 mijë ushtarëve të Bundesverit, të cilët do të shërbenin me avionë të vegjël, pritet së shpejti, njoftoi ministria e mbrojtjes. Sistemin e tillë të gjurmimit e kanë kërkuar KB.

 

Copyright©2000-2003 Trepca.net - Të gjitha të  drejtat e rezervuara.