Lajme

E marte, 21 janar 2003

Përmbajtja:

• Nexhat Daci: Qershori i këtij viti do të jetë periudha e përcaktimeve vendimtare për ardhmërinë e Kosovës

• Presidenti Rugova takohet nesër me kryeadministratorin Shtajner

• Të enjtën Kuvendi i Kosovës debaton për gjendjen e sigurisë në vend

• "Guardia di finanza" do të luftojë krimin ekonomik edhe në Kosovë

• Kuvendi i Gjilanit miratoi buxehtin për vitin 2003 dhe zgjodhi Enver Mujën për kryeshef ekzekutiv

• Përfaqësues të Këshillit Kombëtar Shqiptaro-Amerikan u takuan në Nju Jork me zëvendëskryeadministratorin e Kosovës

• Në Vushtrri u përurua spitali i ri

• UNMIK-u kundërshton vendimin serb

• Shqipëria parashikohet të marrë rreth 28 milion dollarë ndihmë amerikane këtë vit

• Në muajin mars BE-ja do të marrë drejtimin e Misionit të NATO-s në Maqedoni

• Deputetët serbë t'i japin fund bojkotit të punës së Kuvendit të Kosovës

• Bler: Grupet terroriste do të orvaten të sulmojnë në Britani

• Një civil amerikan është vrarë dhe një tjetër është plagsour afër një baze amerikane në Kuvajt
• Në periferi të Los Angjelosit janë vrarë dy fëmijë

Nexhat Daci: Qershori i këtij viti do të jetë periudha e përcaktimeve vendimtare për ardhmërinë e Kosovës

 

Prishtinë, 21 janar 2003 (QIK) - Në një intervistë të gjatë dhënë radios "Evropa e lirë", kryetari i Kuvendit të Kosovës Nexhat Daci, duke komentuar fjalimin e mbrëmshëm të shefit të UNMIK-ut Mihael Shtajner, drejtuar qytetarëve të Kosovës, tha se përshtypjet e tij janë se "për një vit qëndrimi në Kosovë, zoti Shtajner mban vetëm fjalime teorike.   Kësaj radhe në atë empirizëm të tij ka mjaft të vërteta që ilustrojnë naivitetin tonë, të institucioneve, besimin tonë në bashkësinë ndërkombëtare", tha zoti Daci, duke shtuar se mikpritja kosovare është keqinterpretuar nga zoti Shtajner, kurse disa e institucione kosovare kanë qenë "tepër, tepër tepër, të ndëgjueshme", shprehet kryeparlamentari Daci dhe thekson se përshtypjen e tij: "Ne jemi sjellë tepër shumë në mënyrë vazale ndaj UNMIK-ut".

 

Vendimi i Parlamentit është që do ta kryejë këtë vit punën e vet sipas përgjegjësive të marra nga elektorati vendor, por edhe nga parimet e politikës ndërkombëtare, thotë na vazhdim zoti Daci, për të theksuar se "Shtajner e ka kuptuar porosinë e institucioneve kosovare dhe në qoftë se e vazhdon vetëm me premtime terorike dhe nuk realizon asgjë nga ato do të hasë në një përgjigje jashtëzakonisht, politikisht të pjekur po edhe të fuqishme".

Në konstatimin e gazetarit sesi vitin e kaluar zoti Shtajner ka ndërhyrë shpesh në punën e Kuvendit, kryeparlamebtari Daci tha se "Shtajner vitin e kaluar e ka shfrytëzuar maksimalisht autoritetetin që i kanë dhënë Kombet e Bashkuara dhe nuk ka nënshkruar ligje të cilat e rregullojnë esencën e jetës në Kosovë edhe pse ato ligje janë përgatitur nga ekspertë të Brukselit e Uashingtonit".

 

Por, Parlamenti, sipas z. Daci, në asnjë mënyrë nuk mendon t'i ndërprejë kontaktet dhe bashkëpunimin me UNMIK-un dhe bashkësinë ndërkombëtare, përkundrazi do të jetë partner i fuqishëm, por do t'i bëjë punët në përgjegjësi me drejtësinë ndërkombëtare dhe nevojat e elektoratit.

 

"Në qoftë se Shtajner vazhdon më mosnënshkruarjen e ligjeve të përgatitura nga ekspertë ndërkombëtarë, Parlamenti ndoshta do të vendosë që të mos i dërgojë fare ligjet në nënshkrim", thekson Daci.

I pyetur nëse ka një komunikim dhe punë efikase ndërmjet institucioneve të Kosovës, kryeparlamentari Daci tha se bashkëpunimi i institucioneve qeverisëse në Kosovë në pjesën e dytë të 2002-shit, ishte krejtësisht normal dhe vlerësoi se institucionet janë të vetëdijshme se 2003-shi është pika e thyerjes për të mirë apo për të keq në Kosovë.

 

"Këtë përgjegjësi e kanë të tri institucionet, Presidenca, Parlamenti dhe Qeveria dhe është një marrëveshje e plotë në mes të kryeministrit dhe timit, që ne të punojmë me përgjegjësi, por në interes të jetës në Kosovë", tha z.Daci.

Në pyetjen se a mund të jetë ky vit përcaktues sa i përket të ardhmes së Kosovës, Nexhat Daci tha se ia ka bërë të njohur tërë bashkësisë ndërkombëtare që në Parlament ka ardhur me një strategji që qershori i 2003-shit do të jetë periudha e përcaktimeve vendimtare për ardhmërinë e Kosovës.

 

"Jam shumë i bindur se institucionet kosovare kanë kapacitet veprues dhe në qoftë se nuk e aktivizojmë këtë kapacitet, unë mendoj se duhet të shkojmë nga pozicionet, nuk e meritojmë ta udhëheqim Kosovën", nënvizoi z.Daci.

Ndërkaq, duke komentuar zhvillimet e djeshme në pjesën veriore të Kosovës, ku subjekte politike të minoritetit serb shpallën një lloj autonimie të kësaj pjese, kryeparlamentari Daci tha se Parlamenti duhet ta shpallë inekzistent një organizim të tillë, duke kritikuar UNMIK-un se në sigurimin e tërësisë territoriale të Kosovës nuk i ka përmbushur qëllimet e ardhjes në Kosovë.

 

"Tolerimi i strukturave paralele të Serbisë në Kosovë duhet të adresohet drejtpërsëdrejti në UNMIK. Prandaj, mendoj që ky vit duhet të jetë vit i ekzistencës edhe për UNMIK-un edhe për institucionet e Kosovës. Cila do palë që nuk i kryen punët e veta duhet të shkojë pa asnjë zvarritje", tha mes tejrash në këtë intervistë dhënë radios "Evropa e lirë" kryetari i Kuvendit të Kosovës Nexhat Daci.

 

 

Presidenti Rugova takohet nesër me kryeadministratorin Shtajner

 

Prishtinë, 21 janar 2003 - Presidenti i Kosovës dhe kryeadministratori i Kosovës Mihael Shtajner do të takohen nesër, më 22 janar. Takimi do të mbahet në selinë e UNMIK-ut në orën 16.00.

 

 

Të enjtën Kuvendi i Kosovës debaton për gjendjen e sigurisë në vend

 

Prishtinë, 21 janar 2003 - Deputetët e Kuvendit të Kosovës të enjtën do të debatojnë për gjendjen e sigurisë pas kërkesës së Grupit parlamentar të LDK-së dhe grupeve të tjera parlamentare.

 

Për situatën e sigurisë në këtë mbledhje para deputetëve do të raportojë shefi i policisë në Kosovë Shtefan Feler dhe përgjegjësi për siguri dhe drejtësi i UNMIK-ut Zhan Kristian Kadi.

 

Bëhet e ditur se në këtë mbledhje nuk do të ketë interpelancë të përgjegjësve ndërkombëtarë, por vetëm njoftim për gjendjen e sigurisë në Kosovë.

 

 

"Guardia di finanza" do të luftojë krimin ekonomik edhe në Kosovë

 

Prishtinë, 21 janar 2003 - "Guardia di finanza", njësi italiane për kontroll financiar, deri në fund të këtij muaji do të fillojë punën në Kosovë. Kjo njësi e re e hetimeve është e speciliaziuar për luftë kundër krimit ekonomik, e cila në Itali është e njohur sidomos me aksione kundër mafias.

 

Siç bëri të ditur zëdhënësi i UNMIK-ut Andrea Anjeli, "Guardia di finanza" sot po fillon kompletimin e ekipit edhe në Kosovë dhe do të jetë komplete brenda dhjetë ditësh.

 

Në Kosovë tashmë ka mbërritur edhe komandanti i këtij ekipi me kërkesën e Shtajnerit për të luftuar korrupsionin dhe krimin ekonomik. Ekipi do të përbëhet nga dhjetë oficerë, tha Anjeli.

 

 

Kuvendi i Gjilanit miratoi buxehtin për vitin 2003 dhe zgjodhi Enver Mujën për kryeshef ekzekutiv

 

Gjilan, 21 (QIK) - Kuvendi Komunal i Gjilanit, në mbledhjen e sotme që e kryesoi Lutfi Haziri, kryetar, ka miratuar buxhetin për vitin 2003, i cili kap shumën prej 9.432.983 euro si dhe ka zgjedhur Enver Mujën për kryeshef ekzekutiv.

Zijadin Maliqi, drejtor i Drejtorisë për buxhet dhe financa, i cili e ka paraqitur para këshilltarëve propozimin për buxhet, tha në arsyetimin e shkurtër se buxheti i këtij viti është më i lartë se ai i vitit 2002 për 33 për qind dhe sqaroi se është aprovuar paraprakisht nga Ministria për Ekonomi dhe Financa si dhe Komiteti për politikë e financa. Për herë të parë, edhe mjetet për arsim, janë bartur në kompetenca të komunës, tha Maliqi.

Në pjesën e debatit, këshilltari Qemajl Mustafa i paraqiti disa vërejtje parimore, të cilat ai tha se i kishte bërë edhe në procedurat paraparke të shqyrtimit të buxhetit dhe kërkoi që të lihet e hapur mundësia për ribalancim të buxhetit, nëse e kërkon nevoja.

Këshilltarët, me votim unanim e miratuan buxhetin, ndërsa kryesuesi Lutfi Haziri theksoi se kjo dëshmon se vërtet Kuvendi është unik në çështjet e interesit të përgjithshëm.

Në pjesën vijuese të seancës së sotme, kryetari i komunës, Lutfi Haziri i paraqiti Kuvendit për miratim formal propozimin për kryeshef ekzekutiv. Ai u ka shpjeguar këshilltarëve se paneli i emëruar nga Kuvendi i kishte intervistuar të pesë kandidatët që ishin paraqitur, Ejup Qerimin, Milaim Maliqin, Qemajl Mustafën, Enver Mujën dhe Halil Bllacën, ndërsa tri vota ia kishte dhënë z. Muja.

 

Haziri tha se ai, duke e marrë parasysh edhe përvojën e tij të mëparshme, vlerëson se ai i plotëson kriteret profesinale dhe morale për të udhëhequr ekzekutivin edhe në mandatin e ardhshëm. Me 17 vota pro, asnjë kundër dhe 17 abstenime, Kuvendi e mandatoi z. Enver Muja për kryeshef ekzekutiv të komunës së Gjilanit.

Me insistimin e disa këshilltarëve për të interpretuar rregulloren dhe statutin për zgjedhjen e kryeshefit, nëse procedimi ishte në rregull, administratori Bob Simons sqaroi se neni 14.4 i Rregullores 2000/45 thotë se vendimet e Kuvendit Komunal duhet të merren me shumicën e thjeshtë të anëtarëve prezent dhe që votojnë. Në këtë rast, propozimi u votua nga shumica e thjeshtë, ndërsa nuk pati asnjë votë kundër dhe ky vendim është iv ligjshëm, tha administratori Simons.

Zgjedhja e kryeshefit ka qenë për disa ditë rresht ndër temat më aktuale në komunën e Gjilanit. Rreth ndarjeve në dy taborre përbrenda LDK-së, të cilat ishin manifestuar rreth këtij posti, Xhemajl Hyseni, kryetar i Degës së LDK-së, pas mbledhjes së sotme të Kuvendit tha se ligji i parë në demokraci është respektimi i vendimeve të shumicës.

                       

 

Përfaqësues të Këshillit Kombëtar Shqiptaro-Amerikan u takuan në Nju Jork me zëvendëskryeadministratorin e Kosovës

 

Uashington, 21 janar 2003 - Këshilli Kombëtar Shqiptaro-Amerikan (KKSHA/NAAC) ka pasur një takim në Nju Jork me zëvendëskryeadministratorin e Kosovës z. Çarls Brajshou, e ku merrnin pjesë edhe përfaqësues të degës së LDK-së në Nju Jork.

Sa më shumë progres të arrijë Kosova për të plotësuar kushtet dhe standardet që i ka vendosur komuniteti ndërkombëtar, aq më mirë do të jetë për Kosovën kur të ulet në tavolinen e negociatave për të diskutuar statusin perfundimtar, tha z.Brajshou.

Drejtori Ekzekutiv i KKSHA-së Martin Vulaj në këtë takim tha se në shumicën e konferencave ndërkombëtare që janë mbajtur për të ardhmen e Kosovës, sidomos ato që janë mbajtur në Uashington, nuk shtrohej çështje se cili do të jetë statusi përfundimtar i Kosovës, por si duhet të arrihet statusi përfundimtar.

Nga ana e tij Brajshou pohoi se progres i madh është arritur në lidhje me kthimin e serbëve që u larguan pas luftës, por theksoi se është e domosdoshme që të demonstrohet se minoritetet mund të jetojnë në siguri dhe paqe në Kosovë. Ky është një ndër standardet kryesore që duhet të plotësojë qeveria e Kosovs, tha Brajshou.

Përfaqësues të komunitetit shqiptaro-amerikan përkrahën kthimin e serbëve, por theksuan se kthimi duhet të bëhet në baza vullnetare dhe individuale, duke kritikuar Beogradin që nuk i ka kërkuar falje zyrtare popullit te Kosovës për terrorin, pastrimin etnik dhe gjenocidin që shpërtheu në Kosovë.

Zoti Vulaj i shpjegoi përfaqësuesit të lartë të UNMIK-ut se është shumë e vështirë për njerëzit e thjeshtë për të ecur përpara për shkak të mosbesimit si dhe për shkak të disa çështjeve të tjera që kanë mbetur të pazgjidhura, si per shembull, statusi përfundimtar dhe çështja e njerëzve të zhdukur.

Gjithashtu përfaqësuesit e komunitetit shqiptaro-amerikan kërkuan që më shumë përgjegjësi t'u kalohen institucioneve qeveritare te Kosovës, duke thënë se pa kompetenca më të mëdha nuk mund të plotësohen kushtet që i ka vendosur Kosoves komuniteti ndërkombëtar.

 

 

Në Vushtrri u përurua spitali i ri

 

Vushtrri, 21 janar 2003 - Me ndihmën e Emirateve të Bashkuara Arabe në Vushtrri u përurua spitali "Sheik Zahid". Hapjen solemne të këtij spitali me kapacitet prej 52 shtretërve e bëri sheh Hamidi nipi i Lartmadhërisë së tij, presidenti i Emirateve dhe prijësi i forcave të armatosura Sheik Zahid. Në solemnitetin e fillimit të punës morën pjesë, ministri i Shëndetësisë Numan Baliq dhe kryetari i Parlamentit të Kosovës Nexhat Daci.

Spitali i Vushtrrisë do të ndihmohet edhe për një kohë me furnizimin e barnave falas si dhe me personel ndihmës mjekësor nga Emiratet e Bashkuara. Ky spital do t'i kryejë pothuajse të gjitha shërbimet mjekësore.

 

 

UNMIK-u kundërshton vendimin serb

 

Prishtinë, 21 janar 2003 - Misioni i Kombeve të Bashkuara në Kosovë ka kundërshtuar me forcën vendimin e serbëve për shpallur bashkimin administrativ të vendbanimeve me shumicë serbe.

 

Në një takim në Mitrovicën veriore përfaqësues politikë serbë në Kosovë kanë ngritur një këshill, që sipas tyre, do të qeverisë rajonin deri në zgjedhje. Shefi i UNMIK-ut Mihail Shtainer tha se ky vendim është i papranueshëm dhe i jashtëligjshëm, dhe "i pavlefshëm juridikisht".

Rezoluta 1244 e Këshillit të Sigurimit të Kombeve të Bashkuara dhe Korniza Kushtetuese nuk parashikojnë krijimin e institucioneve mbi bazën e njëetnicitetit," thotë zëdhënësi i UNMIK-ut, Sunil Narula. "Ajo që ka ndodhur në Mitrovicë, krijimi i Bashkësisë së Komunave serbe, nuk ka ndonjë vlerë ligjore në Kosovë," ka shtuar ai.

 

 

Shqipëria parashikohet të marrë rreth 28 milion dollarë ndihmë amerikane këtë vit

 

Uashington, 21 janar 2003 - Politika e dhënies së ndihmave amerikane për vendet e tjera, ka ndryshuar drejtim me prirjen për të pasqyruar mbrojtjen e interesave kombëtare amerikane.

 

Ndërkohë sipas administratës së presidentit Bush, ndihma duhet të jepet jo në bazë të premtimeve, por arritjeve dhe përdorimit të mirë të saj. Këto ndryshime dhe faktorë të tjerë mund të ndikojnë në sasinë e ndihmës amerikane për Shqipërinë.

Ndihmësadministratori i agjencisë amerikane për zhvillim ndërkombëtar USAID, përgjegjës për Evropën dhe Eurazinë, Kent Hill tha për "Zërin e Amerikës" se nisma për krijimin e Fondit tregon bindjen e Presidentit se nëse udhëheqësit kanë vullnetin të bëjnë reforma që sjellim përparime, qeveria amerikane do të ketë më shumë vullnet që t’u japë atyre më shumë ndihmë.

"Strategjia e Presidentit Bush e bën shumë të qartë se nëse një vend si Shqipëria ka vullnetin të ecë përpara, ka më shumë shpresa që ndihma të vazhdojë. Nëse zyrtarët në Shqipëri kanë vullnetin të bashkëpunojnë me ne, kjo e lehtëson argumentimin e kërkesës tonë drejtuar Kongresit për vazhdimësinë e ndihmës për këtë vend", tha zoti Hill.

Ai thekson se Shqipëria është shumë e rëndësishme për Shtetet e Bashkuara, duke lënë të kuptohet se ndihma për të nuk rrezikohet nga ideja e Shteteve të Bashkuara për të ndihmuar vende që paraqesin më shumë interes strategjik për to.

Shqipëria parashikohet të marrë rreth 28 milion dollarë ndihmë amerikane këtë vit, shifër që do të vërtetohet me miratimin e buxhetit në Kongres, në krahasim me 35 milionë dollarë që ka marrë vitin e kaluar.

 

 

Në muajin mars BE-ja do të marrë drejtimin e Misionit të NATO-s në Maqedoni

 

Shkup-Bruksel, 21 janar 2003 - "Objektivi ynë të fillojmë në mars", ka deklarur Kristina Galak zëdhënëse e shefit të diplomacisë evropiane Havier Solana lidhur me Misionin paqeruajtës në Maqedoni. Kjo deklaratë vjen pas kërkesës zyrtare të fundjavës nga ana e presidentit maqedonas drejtuar BE-së që të marrë drejtimin e Misionit paqeruajtës nga NATO-ja.

 

 

Deputetët serbë t'i japin fund bojkotit të punës së Kuvendit të Kosovës

 

Beograd, 21 janar 2003 - Ambasadorët e Shteteve të Bashkuara, Britanisë së Madhe, Gjermanisë, Italisë e Francës në Beograd, u kanë rekomanduar deputetëve serbë, që t'i japin fund bojkotit të punës së Kuvendit të Kosovës.

  

Me këtë rast ata theksuan se pjesëmarrja në institucionet e Kosovës, pos të tjerash, do të ndihmojë dhe procesin e kthimit.Takimi i djeshëm i 22 deputetëve të koalicionit "Kthimi" dhe ambasadorëve të pesë vendeve perëndimore u mbajt në ambsadën amerikane në Beograd.

 

 

Bler: Grupet terroriste do të orvaten të sulmojnë në Britani

 

Londër, 21 janar 2003 – Kryeministri britanik, Toni Bler, ka deklaruar sot (të martën) se ai pret që grupet terroriste, si Al Kaida, do të orvaten të sulmojnë në Britani, njofton Rojter. "Unë besoj se është e paevitueshme që ata do të përpiqen në një ose tjetër mënyrë.

 

Mendoj se mund të shohim provat nga të sapoarrestuarit se rrjeti terrorist shtrihet këtu, siç është shtrirë në gjithë pjesën tjetër të Evropës, në gjithë pjesën tjetër të botës", ka thënë Bler në një takim dëshmish me juristë të lartë.

 

 

Një civil amerikan është vrarë dhe një tjetër është plagsour afër një baze amerikane në Kuvajt

 

Qyteti i Kuvajtit, 21 janar 2003 – Të pakten një person i armatosur ka hapur zjarr sot (të martën) në një automjet, në të cilin ndodheshin dy civilë amerikanë afër një baze ushtarake amerikane, ku ka humbur jetën njëri syresh, kurse tjetri është plagosur rëndë, njofton AP.

 

Ambasada amerikane e ka quajtur këtë akt sulm terrorist. "Ne e dënojmë këtë incident terrorist, i cili i kushtoi tragjikisht me jetë një qytetari të pafajshëm amerikan", ka thënë ambasadori amerikan në Kuvajt, Riçard Xhons.

 

 

Në periferi të Los Angjelosit janë vrarë dy fëmijë

 

Los Angjelos, 21 janar 2003 – Dje në periferi të Los Angjelosit kanë ndodhur dy raste të veçanta vrasjeje të dy fëmijëve, që kanë shokuar qytetarët dhe kanë përkujtuar serinë e vrasjeve të vjetme në kryeqytetin amerikan, njofton UPI.

 

Në rastin e parë, është vrarë me armë zjarri një fëmijë dyvjeçar. Rasti i dytë ka ndodhur vetëm pesë orë pas të parit dhe është vrarë një 7-vjeçar pas një aksidenti trafiku, ku është goditur me breshëri gjashtë plumbash.

 

Copyright©2000-2003 Trepca.net - Të gjitha të  drejtat e rezervuara.