Lajme

E premte, 17 janar 2003

Përmbajtja:

• Presidenti Rugova priti sot një delegacion të Bankës Botërore

• Akademi përkujtimore dëshmorëve Jusuf, Bardhosh Gërvalla dhe Kadri Zeka

• Dyfishimin e tatimit në të ardhura e ka refuzuar edhe Aleanca e Biznesit të Kosovës

• UNMIK-u është pajtuar me iniciativën e Qeverisë së Kosovës për krijimin e një aviokompanie vendees

• Ministri Morina ka thënë se agjencitë mund të konkurrojnë në tender me ndonjë marrëveshje të përbashkët apo veç e veç

• D. Janjiq: Ekziston një rrymë në politikën ndërkombëtare se duhet njohur pavarësinë e kushtëzuar të Kosovës

• Robertson thotë se ende nuk mund të parashihet kur do të merren vesh NATO dhe BE për Maqedoninë

• Më 1 mars do të bëhet ndërrimi i misionit të NATO-s në Maqedoni, thotë kryeminsitri grek

• Ilir Meta bisedoi me një delegacion partiak kinez

• Kryeministri i Serbisë thotë se në Kosovë po ndodhin procese që defakto po e kthejnë atë në një shtet të pavarur

• Këshilli i Evropës vlerëson se policia maqedonase ka rrahur, torturuar dhe vrarë persona që mbaheshin në arrest

• "Standard": Serbia dhe Mali i Zi - një shtet për vetëm tri vjet

• Presidenti i Turqisë thotë se vendi i tij mund të japë ndihmesë të kufizuar në luftën kundër Irakut

• Hamasi ka shpallur se do të vazhdojë sulmet vetëvrasëse

• Xhejms L. Xhons, komandant i ri i Shtabit të Përgjithshëm të NATO-s për Evropë

• Bliks thotë se ekipi i tij ende nuk është i sigurt se Iraku është liruar nga armët e veta të ndaluara

• Sadami është përbetuar se do t'i mundë trupat amerikane

• Inspektorët kanë gjetur në Irak 11 predha të zbrazta në gjendje shumë të mirë

• Iraku thotë se bëhet fjalë për armë të vjetra

• Raketa gjermane Patriot për Izraelin

• Gjermania dhe Franca do të angazhohen së bashku për një rritje më të fortë ekonomike

• SHBA sërish të gatshme për bisedime me Korenë e Veriut

Presidenti Rugova priti sot një delegacion të Bankës Botërore

 

Prishtinë, 17 janar 2003 - Presidenti i Kosovës Ibrahim Rugova priti sot një delegacion të Bankës Botërore, të kryesuar nga drejtori i përgjithshëm i grupit të kësaj Banke Shengman Zhang, e ku merrnin pjesë edhe përfaqësuesi i saj në Kosovë Sidi Baubacer, koordinatori i saj për Evropën Juglindore Kristian Portman etj. Më këtë takim u bisedua për ndihmën e Bankës Botërore për Kosovën dhe mënyrën sesi duhet të vazhdojë kjo ndihmë.

 

Presidenti Rugova theksoi me këtë rast njohja e pavarësisë së Kosovës do të hapte perspektivën e zhvillimit të saj ekonomik si dhe marrjen e kredive ndërkombëtare.

 

 

Akademi përkujtimore dëshmorëve Jusuf, Bardhosh Gërvalla dhe Kadri Zeka

 

Prishtinë, 17 janar 2003 - Me rastin e 21-vjetorit të rënies së dëshmorëve Jusuf, Bardhosh Gërvalla dhe Kadri Zeka, Kryesia e Lidhjes Demokratike të Kosovës sot, më 17 janar 2003, në ora 17:00, në Teatrin Kombëtar të Prishtinës organizon Akademi përkujtimore.

Në këtë akademi do të flasë Presidenti i Kosovës, Ibrahim Rugova.

 

 

Dyfishimin e tatimit në të ardhura e ka refuzuar edhe Aleanca e Biznesit të Kosovës

 

Prishtinë, 17 janar 2003 - Dyfishimin e tatimit në të ardhura e ka refuzuar edhe Aleanca e Biznesit të Kosovës. Ky asociacion thotë se duke marrë parasysh situatën e rëndë sociale në Kosovë, nivelin e ulët të pagave, papunësinë e madhe dhe varfërinë e lartë në vend, kërkon që vendimi në tatimin e pagave të shtyhet të paktën edhe për një vit.

 

Aplikimi i këtij tatimi në kushtet e sotme jo vetëm që do të arrinte varfërinë e popullatës, por do të dëmtonte investitorët dhe biznesin në Kosovë, pohojnë përfaqësuesit e kësaj organizate.

Gjithashtu edhe institucioni më i lartë në Kosovë për ekonomi dhe politikë fiskale ka kundërshtuar dyfishimin e tatimit në paga. Ky institucion do të mbajë sot një takim ku pritet të vendoset për dyfishimin ose jo të tatimit të pagave.

 

 

UNMIK-u është pajtuar me iniciativën e Qeverisë së Kosovës për krijimin e një aviokompanie vendees

 

Prishtinë, 17 janar 2003 - UNMIK-u është pajtuar me iniciativën e Qeverisë së Kosovës për krijimin e një aviokompanie vendëse, e cila sipas parashikimeve do të shtonte buxhetin e Kosovës për 20 milionë euro në vit.

"Aviokompania nuk do të dëmtonte bartësit kryesorë të agjencive të udhëtimit, por do të vente rregulla të përpikta në këtë fushë, të cilave do t'u përmbaheshin të gjithë pjesëmarrësit", thotë ministri i Transportit dhe Telekomunikacionit, Zef Morina.

 

Ai ka theksuar se Ministria që ai drejton ka marrë vendim që më 23 janar t'i ftojë të gjithë konkurruesit e interesuar për pjesëmarrje në tender për t'i informuar me kushtet të cilat duhet t'i plotësojnë.

 

 

Ministri Morina ka thënë se agjencitë mund të konkurrojnë në tender me ndonjë marrëveshje të përbashkët apo veç e veç

 

Prishtinë, 17 janar 2003 - Ministri i Shëndetësisë Numan Balliq ka kërkuar nga kryeadministratori i Kosovës Mihael Shtajner që të anulojë vendimin e djeshëm të Komisionit për emërime të larta publike që Pleurat Sejdiu të zgjedhet sekretar i përhershëm i kësaj ministrie. Baliq kërkon që sekretari i përhershëm të zgjedhet me një procedurë të re në bashkëpunim me Ministrinë e Shëndetësisë.

Në letrën dërguar kryeadministratorit Shtajner, ministri Baliq vlerëson se anëtarët e Komisionit për emërime të larta publike gjatë procedurës për zgjedhjen e sekretarit të përgjithshëm kanë qenë të ndikuar në mënyrë të drejtpërdrejtë nga anëtarët e këtij Komisioni nga radhët e Partisë Demokratike të Kosovës.

Baliq dyshon se rezultatet e votimit kanë qenë të përgatitura më parë, prandaj ai e ka braktisur mbledhjen e komisionit. Sipas Rregullores së Komisionit të emërimeve të larta mbi zgjedhjen e sekretarit të përhershem ministri duhet të jetë i pranishëm gjatë votimit, përndryshe zgjedhja nuk është e vlefshme.

 

 

D. Janjiq: Ekziston një rrymë në politikën ndërkombëtare se duhet njohur pavarësinë e kushtëzuar të Kosovës

 

Pragë, 17 janar 2003 - Analisti beogradas Dushan Janjiq thotë se, sa u përket bisedimeve për statusin e Kosovës, Beogradi është duke u vonuar, ndonëse askush nuk mund të parashikojë kohën e miratimit të vendimit për statusin final të Kosovës.

 

Ai ka shtuar se ekziston një rrymë në politikën ndërkombëtare që përfaqësohet nga z. Shtajner, një pjesë e Kongresit (amerikan) dhe një pjesë e politikanëve serbë, pra z. Gjingjiq që konsiderojnë se relativisht shpejt duhet njohur pavarësinë e kushtëzuar të Kosovës.

 

Këto forca mendojnë se protektorati ndërkombëtar në Kosovë duhet të zëvendësohet me protektoratin e Bashkimit Evropian, thotë Janjiq për të shtuar:

"Por ekziston edhe rryma tjetër që është në shumicë dhe dominante dhe që thotë se për një gjë të tillë, pra për atë nëse Kosova duhet të jetë e pavarur ose jo duhen 10 ose 15 vjetë", thotë analisti beogradas Dushan Janjiq në intervistën për radion "Evropa e lirë".

 

 

Robertson thotë se ende nuk mund të parashihet kur do të merren vesh NATO dhe BE për Maqedoninë

 

Athinë, 17 janar 2003 - Sekretari i përgjithshëm i NATO-s lordi Xhorxh Robertson ka deklaruar mbrëmë në Athinë se ende është herët të parashihet se kur NATO dhe BE-ja mund të arrijnë një marrëveshje për marrjen e misionit "Harmonia aleate" në Maqedoni.

 

Robertson është shprehur se në gjashtë muajt e ardhshëm bashkëpunimi ndërmjet këtyre dy organizatave do të marrë përmasa historike pasi të aktivizohet angazhmani i NATO-s dhe i BE-së në Ballkan me qëllim që t'i mundësohet rajonit për t'i zgjidhur problemet.

 

 

Më 1 mars do të bëhet ndërrimi i misionit të NATO-s në Maqedoni, thotë kryeminsitri grek

 

Athinë, 17 janar 2003 - Kryeminsitri grek Kostas Simitis, pas takimit me shefin e diplomacisë së BE-së Havier Solana ka deklaruar se më 1 mars do të duhej që të bëhet ndërrimi i misionit të NATO-s në Maqedoni.

 

Sipas fjalëve të tij gjatë javëve të ardhshme duhet të përgatitet "korniza institucionale" pasi do të pasojë transferi i forcave. Maqedonia tashmë ka bërë të ditur se evroforcat janë të pranueshme në këtë vend.

 

Qëndrimin zyrtar për këtë çështje presidenti maqedonas Trajkovski do ta njoftojë me një letër që këtyre ditëve do t'ia dërgojë Bashkimit Evropian.

 

 

Ilir Meta bisedoi me një delegacion partiak kinez

 

Tiranë, 17 janar 2003 - Ministri i Punëve të Jashtme të Shqipërisë, Ilir Meta, priti në një takim pune, delegacionin e Partisë Komuniste Kineze të kryesuar nga Cai U.

Ilir Meta dhe delegacioni kinez shkëmbyen mendime rreth marrëdhënieve të mira dhe bashkëpunimit që ekzistojnë mes dy qeverive dhe vendeve, si dhe rreth perspektivës së tyre për të ardhmen.

 

Në këtë kuadër, u vlerësua bashkëpunimi në fushën ekonomike ku janë nënshkruar disa marrëveshje.
Delegacioni kinez shprehu konsideratat e tij rreth ecurisë së reformave dhe për përpjekjet e Shqipërisë në drejtim të integrimit të saj në Europë.

Në kuadër të marrëdhënieve midis dy vendeve, zoti Meta shprehu angazhimin e diplomacisë shqiptare për forcimin e mëtejshëm të këtij bashkëpunimi, duke vlerësuar rolin e rëndësishëm të Kinës në çështjet ndërkombëtare si Anëtare e Përhershme e Këshillit të Sigurimit të Kombeve të Bashkuara.

 

 

Kryeministri i Serbisë thotë se në Kosovë po ndodhin procese që defakto po e kthejnë atë në një shtet të pavarur

 

Beograd, 17 janar 2003 - Kryeministri i Serbisë Zoran Gjingjiq në një konferencë me gazetarë ka thënë se ka ardhur koha për të shtruar çështjen e statusit përfundimtar të Kosovës.

 

Sipas Gjingjiqit, në Kosovë po lind një shtet i ri dhe i pavarur dhe po ndodhin procese të cilat Kosovën praktikisht po e shndërrojnë në një shtet, i cili në një çast do të pranohet edhe juridikisht.

 

Gjatë dy viteve të shkuara në Serbi ka mbizotëruar mendimi se duhet pritur dhe nuk është momenti për inicimin e çështjes së statusit përfundimtar të Kosovës, thotë Gjingjiq, por shton se koha e pritjes ka ikur.

 

Prandaj ai ka kërkuar që menjëherë të fillojë debati mbi statusin përfundimtar të Kosovës. "Instikti ma thotë se koha është duke punuar kundër Serbisë", ka theksuar kryeministri serb.

 

Ai vuri në dukje se autoritetet e Serbisë po kërkojnë nga Bashkimi Evropian që të inkuadrohet në problemin e Kosovës dhe t'i zbatojë parimet e marrëveshjes së Dejtonit mbi observimin e kufijve dhe të drejtat kolektive të bashkësive kombëtare e të sigurisë si parim rajonal.

 

Edhe nënkryetari i qeverisë serbe Nebojsha Çoviq e ka vlerësuar si pozitive deklaratën e kryeministrit serb Gjingjiq. Çoviq ka theksuar se Gjingjiq dhe ai ndajnë të njëjtin mendim për atë se duhet të ndalet procesi për tentimin e krijimit të Kosovës së pavarur, duke shtuar se "gëzon fakti që Serbia ka strategjinë e saj për këtë çështje".

 

 

Këshilli i Evropës vlerëson se policia maqedonase ka rrahur, torturuar dhe vrarë persona që mbaheshin në arrest

 

Bruksel, 17 janar 2003 - Këshilli i Evropës publikoi dy raporte që thonë se policia e Maqedonisë ka rrahur, torturuar dhe vrarë të dyshuarit që mbaheshin të arrestuar. Raportet e publikuara nga Komiteti Antitorturë i këtij Këshilli bazohen në informatat të publikuara pas vizitës në Maqedoni në nëntor të vitit 2001.

 

Raportet përshkruajnë provat e torturës, përfshirë edhe abuzimet e dhunshme nga ana e policisë me shfrytëzimin e shufrave metalike, shkopinjve të bejzbollit, imitimin e tredhjes dhe ekzekutime.

 

Këshilli i Evropës u ka bërë thirrje zyrtarëve të Maqedonisë që me një deklaratë të tërhiqen vërejtjen të gjithë policëve se tortura nuk do të tolerohet. Qeveria e Maqedonisë është përgjigjur duke thënë se ata kanë organizuar trajnime nga fusha e të drejtave të njeriut për oficerë të policisë.

 

 

"Standard": Serbia dhe Mali i Zi - një shtet për vetëm tri vjet

 

Vjenë, 17 janar 2003 - Jugosllavia e tretë pas shkëputjes së Sllovenisë, Kroacisë, Bosnje dhe Maqedonisë ishte shtet i cunguar, ndërsa me shkëputjen e Malit të Zi dhe protektoratin ndërkombëtar në Kosovë nga kjo krijesë ka mbetur vetëm një fiksion, shkruan në numrin e djeshëm gazeta vjeneze "Standard".

 

Mbi këto gërmadha dhe nën presionin e Perëndimit gjatë kësaj jave lind shteti i ri me emërtimin Serbia dhe Mali i Zi, një shtet i përkohshëm për vetëm tri vjet me qëllim të evitimit të destabilizimit të rrezikshëm të rajonit.

 

Askush pos disa burokratëve në Bruksel nuk beson që pas katër luftërash, 200 mijë viktimave dhe miliona të shpërngulurve, ky shtet i imponuar mund të bëjë kthesë, vë në pah e përditshmja austriake "Standard".

 

 

Presidenti i Turqisë thotë se vendi i tij mund të japë ndihmesë të kufizuar në luftën kundër Irakut

 

Ankara, 17 janar 2003 – Presidenti i Turqisë, Taxhan Ildem, ka deklaruar sot (të premten) në një takim me gazetarë në Ankara se vendi i tij mund të japë vetëm ndihmesë të kufizuar për çfarëdo lufte të udhëhequr nga SHBA-të kundër Irakut, fqinjit të tij jugor, njofton Rojter.

 

Uashingtoni po bën trysni në aleatët e vet të NATO-s për të hapur bazat ajrore dhe për të ofruar lehtësitë e tjera për aeroplanët luftarakë dhe trupat amerikane në rast sulmi kundër Irakut.

 

Ankaraja ka kundërshtuar luftën dhe ka këmbëngulur të mos u përgjigjet kërkesava amerikane, me arsyetim se do të nevojitej mitratimi i luftës nga Kombet e Bashkuara dhe votimi i parlamentit turk, ka thënë ai, duke mos dhënë detaje të tjera.

 

 

Hamasi ka shpallur se do të vazhdojë sulmet vetëvrasëse

 

Gaza, 17 janar 2003 – Hamasi, që i takon vijës së fortë, ka kundërshtuar bisedimet palestineze për armëpushim, që pritet të mbahen në Kajro javën e ardhshme dhe ka shpallur se ata do të vazhdojnë sulmet vetëvrasëse brenda në Izrael, njofton AFP. Ky vendim është edhe një goditje e re në shpresat për t’i dhënë fund konfliktit 27-mujor izraelito-palestinez.

 

 

Xhejms L. Xhons, komandant i ri i Shtabit të Përgjithshëm të NATO-s për Evropë

 

Mons, 17 janar 2003 – Sot në Mons të Belgjikës u bë ceromonia e ndërrimit të komandës supreme të Shtabit të Përgjithshëm të NATO-s për Evropë, ku komandanti mori funksionet e veta.

 

Gjeneralin e Forcave Ajrore Amerikane, Xhozef W. Ralston e zëvendësoi gjenerali i Marinës Amerikane, Xhejms L. Xhons. Gjenerali Xhons është emëruar në këtë pozitë më 18 korrik 2002, me anë të një letre të presidentit amerikan, Xhorxh Bush, dërguar lordit Robertson dhe me pëlqimin e vendeve anëtare të NATO-s. Emrimi bëhet për një afat mesatar trevjeçar.

 

 

Bliks thotë se ekipi i tij ende nuk është i sigurt se Iraku është liruar nga armët e veta të ndaluara

 

Paris, 17 janar 2003 – Kryeinspektori i armëve i Kombeve të Bashkuara, Hans Bliks, ka deklaruar sot (të premten) se ekipi i tij ende nuk është i sigurt se Iraku është liruar nga armët e veta të ndaluara dhe ka nxitur Bagdadin të demonstrojë se të gjitha armët biologjike dhe kimike janë të asgjësuara, njofton Rojter.

 

Bliks dhe kolegu i tij, Mohamed El Baradej kanë qenë në Paris për të njoftuar presidentin francez, Zhak Shirak, për punën e ekipit të tij 10 ditë para se të paraqesin raportin në Këshillin e Sigurimit të KB-së.

 

Shiraku ka thënë se inspektorëve të Kombeve të Bashkuara për armë duhet t'u jipet kohë e nevojshme për të përfunduar punën e tyre në Irak. Franca beson se lufta është zgjidhja më e keqe, ka thënë ai.

 

 

Sadami është përbetuar se do t'i mundë trupat amerikane

 

Bagdad, 17 janar 2003 – Presidenti irakian, Sadam Hysein, ka shënuar sot (të ptremtën) 12-vjetorin e Luftës së Gjirit të vitit 1991, dhe është përbetuar se do t'i mundë trupat amerikane, siç është shprehur, në dyert e Bagdadit, njofton Rojter. Ai ka thënë, gjithashtu, se ka mobilizuar armatën e tij dhe ka përpiluar planin kundër çdo invazioni të trupave amerikane, të grumbulluara tash në rajonin e Gjirit.

 

 

Inspektorët kanë gjetur në Irak 11 predha të zbrazta në gjendje shumë të mirë

 

Bagdad, 17 janar 2003 - Kombet e Bashkuara thonë se inspektorët e tyre kanë gjetur në Irak 11 predha të zbrazta në gjendje shumë të mirë, të sajuara për bartjen e agjencave kimik të luftës. Zëdhënësi i inspektorëve, Hiro Ueki tha në Bagdad se ato predha nuk kanë qenë të deklaruara më parë nga Iraku, por ka ngurruar të elaborojë më tej për rëndësinë e mundëshme të kësaj gjetjeje.

 

Zëdhënësi i Stejt Departamentit tha se këto gjetje nuk befasojnë Shtetet e Bashkuara sepse municionet kimike ishin një nga fushat e mëdha për të cilat Uashingtoni ka thënë se nuk ishin shpallur në deklaratën irakiane për armtimin drejtuar Kombeve të Bashkuara në dhjetor.

 

 

Iraku thotë se bëhet fjalë për armë të vjetra

 

Bagdad, 17 janar 2003 - Qeveria irakiane e paraqiti gjetjen e armëve si të parëndësishme. Shefi i komisionit vëzhgues kombëtar irakian, Hosam Mohamed Amin tha se bëhet fjalë për armë të vjetra:

 

"Nuk kemi të bëjmë as me armë kimike, as biologjike, kemi të bëjmë me koka eksplozive bosh. Ato janë raketa të vogla artilerie, koha e përdorimit të të cilave ka skaduar. Ato janë harruar pa synimin për t'i përdorur, sepse koha e përdorimit të tyre ka skaduar që 10 vjet më parë".

 

 

Raketa gjermane Patriot për Izraelin

 

Berlin, 17 janar 2003 – Raketat kundërajrore gjermane të tipit Patriot, të kërkuara nga Izraeli do të dërgohen ndoshta në fund të këtij muaji. Një marrëveshje përkatëse u nënshkrua në ministrinë gjermane të mbrojtjes nga të dyja palët. Dërgimi do të bëhet me anije.

 

Sipas marrëveshjes, ushtria gjermane do t'i huajë Izraelit për dy vjet dy sisteme raketash Patriot pa personel. Çdo sistem përbëhet nga një pajisje radari, një qendër të drejtimit të zjarrit dhe tetë aparate nisëse për cdo katër raketa.

 

 

Gjermania dhe Franca do të angazhohen së bashku për një rritje më të fortë ekonomike

 

Berlin, 17 janar 2003 – Gjermania dhe Franca do të angazhohen së bashku për një rritje më të fortë ekonomike. Në të dyja vendet ka ende rezerva për zhvillim, të cilat duhen mobilizuar, thanë në Berlin kancelari gjerman, Gerhard Shrëder dhe kryeministri francez, Zhan Pierr Rafarën.

 

Edhe Rafarën theksoi se Parisi dhe Berlini kanë të njëjtat probleme në fushat e punësimit, të shëndetit dhe pensioneve.

 

Veç kësaj, të dyja palët janë të të njëjtit mendim se pakti i stabilitetit evropian është shumë i rëndësishëm, por se duhet të bëhet e qartë se luftimi i papunësisë ka të njëjtën rëndësi, tha Shrëder. Shrëder dhe Rafarën thanë se gjendja e fortë e euros aktualisht nuk përbën rrezik për eksportin.

 

 

SHBA sërish të gatshme për bisedime me Korenë e Veriut

 

Uashington, 17 janar 2003 - Zëvendësministri amerikan i punëve të jashtme, Riçard Armitazh ritheksoi dëshirën e SHBA për ta zgjidhur në mënyrë paqësore krizën me Korenë e Veriut.

 

Tani e ka radhën Koreja e Veriut të vendosë, tha Armitazh në Uashington. Qeveria amerikane i ofroi Phenianit të mërkurën rinisjen e bisedimeve, por ndeshi në refuzim. Presidenti amerikan, Xhorxh Bush tha se Koreja e Veriut mund të marrë ndihma në ushqime dhe në energji, në rast se e ndryshon qëndrimin në grindjen atomike.

Copyright©2000-2003 Trepca.net - Të gjitha të  drejtat e rezervuara.