Lajme

E enjte, 16 janar 2003

Përmbajtja:

• Presidenti Rugova në takimin me Papandreun ka thënë se në Ballkan të gjithë shikojnë nga Evropa

• Kuvendi miratoi Ligjin për ambientin

• BSPK kundër vendimit për rritjen e shkallës së tatimeve

• Darian Pavli nga HRW: Disa vrasje shumë shqetësuese me natyrë politike në Kosovë

• Papandreu në takimin me z. Shtajner tha se integrimi i vendeve të Ballkanit kërkon përkushtimin e BE-së

• Mijëra qytetarë të Kosovës vizituan dje Reçakun për të përkujtuar katërvjetorin e masakrës serbe

• Takimi i përfaqësuesve të serbëve të Kosovës me Mihael Shtajnerin ka përfunduar pa rezultate

• Ministria e Transportit dhe e Telekomunikacionit është dakorduar për formimin e bordit për mbikëqyrjen e punëve

• Këshilli i NATO-s thotë se në Kosovë do të qëndrojnë midis 28 - 30 mijë paqeruajtës të KFOR-it

• Paqeruajtësit e NATO-s në Kosovë filluan stërvitjet e quajtuar "Rojtari i shpejt 2003"

• Qeveria e Kosovës kundër rritjes së shkallës së tatimeve në paga

• Dy persona të armatosur kanë plaçkitur një cisternë me 32 mijë litra naftë

• Shqipëria ka marrë kryesinë e Forumit të Bashkëpunimit për Sigurim të OSBE-së

• Uashingtoni e quan spekulim lajmin për marrjen me qira të bazave ushtarake jugosllave

• Edhe Beogradi përgënjeshtron lajmin për marrjen me qira të bazave ushtarake nga ana e Uashingtonit

• Solana përfundon vizitën në Shkup

• Gjermania ka shënuar shtim të deficitit publik në shkallën rekorde në vitin 2002

• Ekspertët e armëve të OKB-së kanë bastisur befas shtëpitë e dy shkencëtarëve irakianë

• Bliks ka deklaruar se do t'i thotë Irakut se situata është "shumë e tensionuar dhe shumë e rrezikshme"

• Moska kërkon fundin e krizës në Irakut

• Bliks: Iraku ka ende mundësi ta parandalojë luftën

• Koreja e Veriut nuk pranon ofertën amerikane për bisedime

Presidenti Rugova në takimin me Papandreun ka thënë se në Ballkan të gjithë shikojnë nga Evropa

 

Prishtinë, 16 janar 2003 - Presidenti i Kosovës Ibrahim Rugova priti mbrëmë shefin e diplomacisë greke Jorgos Papandreu, vendi i të cilit është kyesues aktual i Bashkimit Evropian. Presidenti Rugova dhe ministri Papandreu kanë biseduar për situatën në Kosovë dhe rajon. Pas takimit Presidenti Rugova tha se ka falendëruar Greqinë për praninë ushtarake dhe humanitare në Kosovë dhe i ka shprehur ministrit Papandreu objektivat e institucioneve të Kosovës, siç janë zhvillimi ekonomik, privatizimi dhe po ashtu integrimi i grupeve etnike në shoqërinë kosovare.

  

Presidenti tha se njohja e një Kosove të pavarur, demokratike dhe paqësore, të integruar në Evropë, do të qetësonte rajonin.

Presidenti i Kosovës vlerësoi se në Ballkan po shënohen lëvizje pozitive dhe të gjitha vendet tashmë shikojnë nga Evropa, por njëherit shtoi se në këtë rajon ende ka probleme.

 

 

Papandreu në takimin me z. Shtajner tha se integrimi i vendeve të Ballkanit kërkon përkushtimin e BE-së

 

Prishtinë, 16 janar 2003 - Gjatë vizitës në Kosovë ministri i jashtëm grek Jorgos Papndreu, në cilësinë e kryesuesit të radhës së BE-së, në takimin me kryeadministratorin e Kosovës Mihael Shtajner ka theksuar se stabiliteti në rajon dhe integrimi i vendeve të Ballkanit është interes i BE-së.

 

Ai shprehu përkrahjen e BE-së dhe të vendit të tij për proceset aktuale poliitike në Kosovë. Papandreu nënvizoi se BE-ja do të ndihmojë këtë rajon që të përparojë, por edhe përkushtimin e rajonit që të punojë për të përmbushur standardet evropiane që të bëjnë reformat praktike që të dëshmojnë gatishmëri për t'u përballur me sakrifica dhe ndryshimet për të bërë një Ballkan të suksesshëm.

 

Papandreu tha se kjo është shumë e rëndësishme për vendet si Kosova e cila ka kaluar nëpër një konflikt etnik.

 

Grupet e ndryshme etnike, fetare, ideologjike dhe njerëzit e ndryshëm mund të jetojnë së bashku si qytetarë të Evropës duke kultivuar vepra të njëjta të demokracisë, sundimit të ligjit, respektimit të të drejtave të njeriut dhe të komuniteteve pakicë, tha ai.

 

Përmbushja e këtyre parimeve përshpejton procesin e integrimit në Evropë, por nuk pranoi të komentojë për zgjidhjen e statusit politik të Kosovës.

 

Ai vetëm shtoi se se në takimin e lartë të BE-së që do të mbahet në qershor të këtij viti në Selanik do të ripërsëritet qëndrimi se ky rajon nuk është harruar dhe se është në interesin e BE-së që ai të jetë i qëndrueshëm dhe i integruar.

Shefi i UNMIK-ut Mihael Shtajner tha se është mirë që z. Papandreu po viziton Kosovën mu në përvjetorin e tragjedisë së Reçakut skenë e mizorive të forcave serbe në janar të vitit 1999, kur edhe është shënuar një ndër kthesat më të rëndësishme në luftën e Kosovës.

 

Shtajner tha se kjo vizitë dëshmon për qëndrimin e BE-së në rajon dhe përkushtimin e tij për Kosovën dhe për procesin që po zhvillohet këtu.

 

 

Kuvendi miratoi Ligjin për ambientin

 

Prishtinë, 16 janar 2003 - Pas një shyrtimi nën për nen, deputetët e Kuvendit të Kosovës sot me 87 vota pro dhe pa asnjë votë kundër dhe abstenim miratuan Ligjin për mbrojtjen e ambientit.

Praprakisht kryetarët e komisioneve të mjedisit, buxhetit dhe atij të komuniteteve dhanë përkrahjen e tyre për projektligjin në fjalë së bashku me 83 amandamentet e tyre dhe të qeverisë.

Ministri i dikasterit përkatës Ethem Çeku miratimin e ligjit e vlerësoi shumë të rëndësishëm, sepse Kosova deri më tash kishte ndonjë ligj që rregullonte këtë fushë.

 

 

BSPK kundër vendimit për rritjen e shkallës së tatimeve

 

Prishtinë, 16 janar 2003 - Në një konferencë me gazetarë të Bashkimit të Sindikatave të Pavarura të Kosovës u u tha se ngritja e tatimit në rroga i ka shqetësuar sindikatat e Kosovës. Sipas tyre, kjo rritje e tatimit qind për qind ështe e papërballueshme për të punësuarit, tha Bahri Shabani, kryetar i BSPK-së, i cili druan se nuk do të mund të përballohet kjo rritje e tatimit.

Sindikata kërkon që të shtyhet ngritja e tatimit në rroga ose të anulohet vendimi përderisa të mos ngriten rrogat e punëtorëve. Megjithatë BSPK ka caktuar një afat deri më 31 janar 2003 për të marrë përgjigje, ose do të detyrohet të ndërmarrë hapa për t'i rezistuar vendimit të administratës tatimore.

Gjithashtu BSPK lidhur me këtë çështje u ka dërguar një kërkesë kryeadministratorit Shtajner dhe kryeministrit të Kosovës Bajram Rexhepi.

 

 

Darian Pavli nga HRW: Disa vrasje shumë shqetësuese me natyrë politike në Kosovë

 

Londër, 16 janar 2003 - Organizata ndërkombëtare për mbrojtjen e të drejtave të njeriut, Human Rights Watch (Hjuman Rajts Uoç), ka botuar raportin vjetor për vitin e kaluar.

 

Ky raport bën një vlerësim global mbi situatën e të drejtave të njeriut në gjashtëdhjetë vende të botës. Raporti shqyrton situatën e të drejtave të njeriut dhe në Shqipëri, Kosovë dhe Maqedoni.

Përfaqësuesi i kësaj organizate Darian Pavli, që mbulon Shqipërinë, Kosovën dhe Maqedoninë, duke komentuar për BBC-në specifikat e problemeve lidhur me të drejtat e njeriut në Kosovë, tha:

 

"Në Kosovë, një nga problemet që kemi parë gjatë këtij viti, sidomos në muajt e fundit, është ekzistenca dhe tolerimi i një ekstremizmi politik dhe etnik në të dyja palët e spektrit etnik, qoftë në shqiptarët, qoftë në serbët".

Ai thotë se te shqiptarët kjo manifestohet me disa vrasje shumë shqetësuese me natyrë politike, apo që të paktën duken se janë me natyrë politike dhe perceptohen nga publiku si të tilla.

 

"Kemi vrasjen e z. Bytyçi, kemi vrasjen mjaft të rëndë të z. Tahir Zemaj këto ditët e fundit, por nuk janë këto të vetmit, është një listë e gjatë e vrasjeve që duken se janë me natyrë politike në Kosovë, që mbeten të pandëshkuara", tha ai.

Darian Pavli është i mendimit se një pjesë e madhe e përgjegjësisë i takon autoriteteve të OKB-së atje dhe të KFOR-it, sepse janë në një masë të madhe pasoja të një tolerimi mjaft të gjatë dhe të papranueshëm të ekstremizmit dhe tolerancës.

Ndërkaq për palën serbe ai thot e njëjta gjë vlen edhe për rojet e urës në Mitrovicë. Ngjarjet e prillit në Mitrovicë, kur një turmë e madhe e rojeve të urës dhe ekstremistëve të tjerë iu përgjigjën me armë zjarri dhe me granata edhe vetë policisë së UNMIK-ut, ishte incidenti më i rëndë që policia e UNMIK-ut ishte përballur gjatë këtyre viteve.

 

 

Mijëra qytetarë të Kosovës vizituan dje Reçakun për të përkujtuar katërvjetorin e masakrës serbe

 

Reçak, 16 janar 2003 - Mijëra qytetarë nga shumë vise të Kosovës vizituan dje fshatin Reçak për të përkujtuar katërvjetorin e masakrës që ndodhi në këtë vendbanim më 15 janar të vitit 1999, kur forcat serbe kishin masakruar 42 shqiptarë, si dhe për të ndarë dhembjen me familjarët e viktimave. Ish-shefi i Misionit të OSBE-së, ambasadori amerikan Uiliam Voker në katër vjetorin e kësaj masakre ua ka dërguar një letër banorëve të këtij fshati.

Mbrëmë u mbajt edhe një akademi përkujtimore në Teatrin Kombëtar të Kosovës, ku u vlerësua se masakra e Reçakut i dëshmoi bashkësisë ndërkombëtare se ishte çasti i fundit që ta kuptonte se çfarë po ndodhte në Kosovë, nëse nuk intervenohet me kohë, tha në fjalën e tij kryetari i Asamblesë komunale të Shtimës Fehmi Mujota.

Ndërkaq në fjalën e rastit kryetari i Parlamentit të Kosovës Nexhat Daci tha se masakra e Reçakut në të cilën u masakruan 42 civilë të moshave dhe gjinive të ndryshme nga forcat e armatosura serbe është ngjarje tronditëse në historinë e Kosovës. Ai ka shtuar se kjo është një nga ngjarjet më të dhimbshme të popullit shqiptar.

Në përkujtim të kësaj ngjarje të hidhur u shfaq edhe dokumentari i RTK-së kushtuar masakrës së Reçakut.

 

 

Takimi i përfaqësuesve të serbëve të Kosovës me Mihael Shtajnerin ka përfunduar pa rezultate

 

Prishtinë, 16 janar 2003 - Takimi i përfaqësuesve të serbëve të Kosovës dhe shefit të UNMIK-ut Mihael Shtajner ka përfunduar pa rezultate. Kërkesat e përfaqësuesve të koalicionit serb "Kthimi" janë refuzuar nga nga shefi i UNMIK-ut, duke ua bërë të qartë edhe njëherë se ata janë të obliguar ta respektojnë votën e qytetarëve të tyre.

 

Të gjitha prononcimet e përfaqësuesve serbë pas takimit tregonin mospërmbushjen e kërkesave të tyre nga UNMIK-u.

 

Si rezultat atyre u mbetet që në ditët e ardhshme të vendosin nëse do të kthehen në punimet e Parlamentit të Kosovës të cilin e kanë braktisur më 7 nëntor. Serbët kanë kërkuar një kontroll të zyrtarizuar të Parlamentit i cili do të duhej t'i përfshinte edhe komisionet parlamentare, kërkesë kjo e paarsyeshme për Shtajnerin.

 

Ky i fundit tha se nuk është këtu që të plotësojë kushtet, por vetëm të ndihmojë dhe të sigurojë se Kuvendi do të respektojë rregullat dhe Kornizën Kushtetuese.

 

 

Ministria e Transportit dhe e Telekomunikacionit është dakorduar për formimin e bordit për mbikëqyrjen e punëve

 

Prishtinë, 16 janar 2003 - Ministria e Transportit dhe e Telekomunikacionit është dakorduar për formimin e Bordit për mbikëqyrjen e punëve të sektorëve të kësaj ministrie.

 

Këtë vit kompania e postës dhe telekomunikacionit do të përballet me konkurrencë në të dy telefonitë atë fikse dhe mobile, ka deklaruar ministri i Transportit dhe Telekomunikacionit Zef Morina.

 

Ai ka theksuar se ky bord do të mbikëqyrë dhe do të përkujdeset për evitimin e keqpërdorimeve të mundshme që mund të vijnë si pasojë e mosmenaxhimit të mirë të punëve në këtë ministri.

Në këtë takim ka marrë pjesë edhe përfaqësuesi i Zyrës së BE-së në Kosovë Endi Birpark dhe Lars Jansen nga AKM-ja dhe zyrtarë të tjerë vendorë dhe ndërkombëtarë.

 

 

Këshilli i NATO-s thotë se në Kosovë do të qëndrojnë midis 28 - 30 mijë paqeruajtës të KFOR-it

 

Bruksel, 16 janar 2003 - Këshilli i NATO-s ka konkluduar se problemet e mëdha që rrezikojnë sigurinë e Ballkanit imponojnë që forcat ndërkombëtare ushtarake dhe civile të qëndrojnë edhe mëtej në atë rajon.

 

Duke shqyrtuar se sa forca ushtarake do të duhej të mbesin në atë rajon është konkluduar se në Kosovë edhe mëtej do të qëndrojnë midis 28 e 30 mijë paqeruajtës të KFOR-it.

Zyrtarët e NATO-s kanë diskutuar edhe rreth situatës në Kosovë dhe kanë theksuar se prania e NATO-s në këtë vend është e domosdoshme për një kohë shumë të gjatë në mënyrë që të krijohet ambient i sigurt për organizmat e tjerë vendorë dhe ndërkombëtarë në përballjen me sfida të reja siç janë kryesisht krimi i organizuar dhe zgjidhjet e problemeve politike.

Një zyrtar i lartë ka theksuar qëllimi i NATO-së është që në Kosovë të funksionojë një qeveri stabile, por sipas tij ky qëllim ende është i largët.

 

Ai ka theksuar se NATO-ja kurrë nuk ka pretenduar se mund t'i zgjidhë të gjitha problemet në Kosovë, por ajo është vetëm një prej lojtarëve të rëndësishëm që duhet edhe në të ardhmen të krijojë ambient të sigurtë.

 

 

Paqeruajtësit e NATO-s në Kosovë filluan stërvitjet e quajtuar "Rojtari i shpejt 2003"

 

Prishtinë, 16 janar 2003 - Paqeruajtësit e udhëhequr nga NATO-ja në Kosovë me kërcime parashutiste nga avioni filluan stërvitjet e quajtuar "Rojtari i shpejtë 2003", me qëllim të trajnimit të forcave rezervë për ndërmarrjen e operacioneve paqeruajtëse në Ballkan.

 

Zëdhënësi i KFOR-it Toni Adams tha se këto stërvitje vjetore demonstrojnë zotimet vijuese të NATO-s për paqe dhe siguri në Ballkan. Zëdhënësi Adams tha se shumica e pjesëmarrësve në stërvitje janë trupa amerikane me bazën e tyre në Gjermani dhe Itali.

 

 

Qeveria e Kosovës kundër rritjes së shkallës së tatimeve në paga

 

Prishtinë, 16 janar 2003 - Qeveria e Kosovës konsideron se duhet të shtyhet ngritja enorme tatimore në të ardhurat personale deri sa të aprovohet ligji për menaxhimin e financave i cili po procedohet në Parlamentin e Kosovës.

 

Deri atëherë Qeveria e Kosovës rekomandon të vazhdojë praktika e tatimit sikur në vitin 2002. Qeveria mbrojti këtë qëndrim me faktin se një shkallë kaq e lartë e tatimit në të ardhurat personale do të dëmtonte seriozisht standardin jetësor të punësuarve dhe mund të rrezikonte shkallën aktuale të stabilitetit social në Kosovë.

 

Ndërkohë qeveria do të shqyrtojë dhe rekomandojë mundësitë e zgjerimit të bazës tatimore për të kompenzuar mungesën buxhetore që do të rezultonte nga pezullimi i zbatimit të kësaj rregullore.

Qeveria e Kosovës në këtë takim aprovoi projektligjin për arkivat e Kosovës, projektligjin për bibliotekat dhe projektligjin për vendosjen e tatimit në pronën e paluajtëshme në Kosovë.

 

 

Dy persona të armatosur kanë plaçkitur një cisternë me 32 mijë litra naftë

 

Prishtinë, 16 janar 2003 - Dy persona të armatosur kanë rrëmbyer një vozitës të Maqedonisë, i cili drejtonte një kamion cisternë me 32 mijë litra naftë të dedikuar për termocentralet e Kosovës.

 

Njoftohet se personat e armatosur kanë ndaluar kamionin dhe i kanë detyruar vozitësit që të ndryshojnë drejtimin e rrugës, duke e kthyer atë në Fushë-Kosovë.

 

Më pas këta persona të armatosur kanë zbrazur këtë sasi të naftës në një cisternë tjetër dhe i kanë liruar vozitësit, ka thënë zëdhënësi i UNMIK-ut Andrea Anjeli. Policia e UNMIK-u është duke hetuar rastin e raportuar dhe se ndaj vozitësit nuk është ushtruar dhunë.

 

 

Shqipëria ka marrë kryesinë e Forumit të Bashkëpunimit për Sigurim të OSBE-së

 

Tiranë, 16 janar 2003 - Në katërmujorin e parë të këtij viti Shqipëria ka marrë kryesinë e Forumit të Bashkëpunimit për Sigurim të OSBE-së. Kjo është hera e parë që Shqipëria merr kryesinë e njërit prej dy forumeve kryesore te OSBE që prej antarësimit saj në këtë organizatë me 1991.

Ambasadori i Shqipërisë në OSBE, z. Zef Mazi, në kapacitetin e kryetarit të Forumit të Bashkëpunimit për Sigurim, gjatë një takimi që pati me kryetarin e radhës të OSBE-së, Ministrin e Jashtëm të Holandes, z. Jaap De Hoop Scheffer, e siguroi per angazhimin e Shqipërisë për realizimin e të gjitha objektivave që Kryesia i ka vënë vetes dhe Organizatës për vitin 2003.

Nën kryesinë e Shqipërisë, Forumi i Bashkëpunimit për Sigurim i OSBE-së do të përgatisë një numër kontributesh për objektivat që ka paraqitur kryesia holandeze e OSBE-së.

Ky forum, që prej krijimit të tij është mandatuar të zhvillojë negociata midis shteteve pjesëmarrëse për kontrollin e armëve, çarmatimin dhe paketës se plotë të krijimit të masave te besimit dhe të sigurimit.

 

 

Uashingtoni e quan spekulim lajmin për marrjen me qira të bazave ushtarake jugosllave

 

Uashington, 16 janar 2003 - Departamenti i Shtetit dhe ai i Mbrojtjes së SHBA-ve kanë hedhur poshtë si spekulim të mediave lajmin nga Brukseli për kinse bisedimet e SHBA-ve me autoritetet e Beogradit për marrjen me qira të bazave ushtarake në Jugosllavi.

 

Në Uashington theksojnë se fjala është për një "informacion plotësisht pa bazë" i cili, edhe para një viti është lansuar nga një burim i Brukselit, e pastaj është përgënjështruar nga ana amerikane.

 

Poashtu në Uashington theksohet se meqë RFJ nuk është anëtare e Partneritetit për Paqe, e përjashton mundësinë e një marrëveshjeje bilaterale ndërshtetërore për bashkëpunimin konkret me Beogradin.

 

 

Edhe Beogradi përgënjeshtron lajmin për marrjen me qira të bazave ushtarake nga ana e Uashingtonit

 

Beograd, 16 janar 2003 - Edhe shefi i diplomacsië jugosllave Goran Svillnaoviq ka përgënjeshtruar lajmin se kinse SHBA-të i kanë propozuar autoriteteve të Beogradit për të marrë me qira për 99 vjet disa baza ushtarake jugosllave.

 

Svillanoviq ka thënë për mediat serbe se ky lajm nuk është i vërtetë dhe ka përkujtuar se vetëm pas hyrjes së vendit të tij në Partneritetin për Paqe do të definohen më qartë ineteresat e Beogradit dhe të vendeve me të cilat do të jetë partner.

 

 

Solana përfundon vizitën në Shkup

 

Shkup, 16 janar 2003 - Përfaqësuesi i lartë i Bashkimit Evropiane për politikë të Jashtme Havier Solana, e konsideroi vizitën e tij në Shkup si të suksesshme.

 

Vizita e z. Solana të mërkurën në kryeqytetin e Maqedonisë kishte dy qëllime: për të analizuar zbatimin e deritanishëm të Marrëveshjes së Ohrit dhe për të diskutuar për zëvendësimin e misionit paqëruajtës të NATO-s në vend me trupa të Bashkimit Evropian.

Ai tha se BE është i gatshëm të marrë në duar misionin ushtarak dhe konfirmoi se dhe zyrtarët e Shkupit kanë dhënë pëlqimin e tyre për këtë.

 

 

Gjermania ka shënuar shtim të deficitit publik në shkallën rekorde në vitin 2002

 

Visbaden, Gjermani, 16 janar 2003 – Gjermania, e cila ka ekonominë më të madhe në 12 vendet e zonës së euros, ka shënuar shtim të deficitit publik në shkallën rekorde në vitin 2002, madje ka tejkaluar limitet e BE-së dhe ky shtim ka lëvizur herë më shumë e herë më pak derisa është ndalur në muajt e fundit të vitit të kaluar, kanë bërë të ditur zyrtarët, njofton AFP.

 

Deficiti publik gjerman ka kërcyer në 77. 2 milionë euro (81 milionë dollarë) në vitin 2002, që është baras me 3.7 për qind të shtimit të brutoproduktit në vitin 2002. Në krahasaim me deficitin 57,5 milionë euro, sa ishte më 2001, shprehur në përqindje, është 2.8 për qind më shumë, kanë bërë llogsaritjen zyrtarët e Zyrës federale të statistikës.

 

 

Ekspertët e armëve të OKB-së kanë bastisur befas shtëpitë e dy shkencëtarëve irakianë

 

Bagdad, 16 janar 2003 – Ekspertët e armëve të Kombeve të Bashkuara kanë vizituar befas sot (të enjten) shtëpitë e dy shkencëtarëve irakianë në Bagdat, ku për herë të parë kanë bastisur banesat e tyre në këtrkim të armëve irakiane të shkatërrimit masiv, njofton Rojter.

 

Dëshmitarët kanë pohuar se ekipi i Agjencisë ndërkombëtare të energjisë bërthamore kanë arritur pa paralajmërim dhe kanë hyrë në shtëpinë e shkencëtarit Faleh hasan, i cili udhëheq Kompaninë shtetërore Al Razi, e cila ka qenë e implikuar në programin e bërthamuar të Irakut në të kaluarën.

 

 

Bliks ka deklaruar se do t'i thotë Irakut se situata është "shumë e tensionuar dhe shumë e rrezikshme"

 

Bruksel, 16 janar 2003 – Kryeinspektori i Kombeve të Bashkuara, Hans Bliks, ka deklaruar sot (të enjten) se do t'i thotë Irakut se situata është "shumë e tensionuar dhe shumë e rrezikshme" dhe vetëm bashkëpunimi i plotë me ekipin e tij mund të mënjanojë opsionin e luftës, njofton Rojter.

 

Pas takimit me zyrtarët e BE-së në Bruksel, z. Bliks ka thënë në një konferencë të shkurtër për media se inspektorët e Kombeve të Bashkuara kanë zbuluar në Irak materiale të armëve konvencionale, disa syresh të dy vjetve të fundit, që janë importuar ilegalisht, por mbetet ende të vërtetohet nëse ato u janë dedikuar armëve të shkatërrimit në masë.

 

Për të evituar luftën, Bagdadi, duhet të japë të dhëna të besueshme se ka asgjësuar programet e dyshimta bërthamore, kimike dhe biologjike dhe të lejojë shkencëtarët e vet të intervistohen lirisht pa ndërmjetësim brenda ose jashtë vendit, kurse alternativa tjetër është, siç e dini, opsioni i aksionit të armatosur kundër Irakut, ka thënë Bliks.

 

 

Moska kërkon fundin e krizës në Irakut

 

Moskë, 16 janar 2003 - Rusia ka dërguar një delegacion të nivelit të lartë në Irak. Ndërkohë që kryeinspektori i armëve i OKB-së, Hans Bliks pritet të udhëtojë të dielën drejt Bagdadit.

Menjëherë me të arritur në Bagdad, kryetari i delegacionit rus, zëvendësministri i Jashtëm, Aleksandër Saltanov tha se Moska dëshiron që të gjejë një zgjidhje diplomatike dhe politike për krizën rreth programit irakian të armatimit.

Sipas tij, Rusia do që të ndalojë një konflikt ushtarak të Irakut me Shtetet e Bashkuara.

 

 

Bliks: Iraku ka ende mundësi ta parandalojë luftën

 

Nju Jork, 16 janar 2003 - Kryeinspektori i armëve të Kombeve të Bashkuara, Hans Bliks, tha se Iraku ndodhet para një situate tepër të vështirë, por ka ende mundësi ta parandalojë luftën duke siguruar prova të reja mbi programin e tij të armëve bërthamore.

 

Zoti Bliks tha se ai do ta përcjellë këtë mesazh tek zyrtarët irakianë kur së bashku me drejtorin e Agjencisë Ndërkombëre të Energjisë Bërthamore, Mohammed ElBaradei, të vizitojnë Bagdadin të dielën.

 

Vizita bëhet para se raporti i inspektimit i 27 janarit ti dorëzohet Këshillit të Sigurimit. Gjithashtu dje, Shtetet e Bashkuara i kërkuan zyrtarisht ndihmë NATO-s në rast lufte me Irakun.

 

 

Koreja e Veriut nuk pranon ofertën amerikane për bisedime

 

Pekin, 16 janar 2003 - Diplomati më i lartë amerikan për çështjet e Azisë Lindore thotë se zgjidhja e mosmarrëveshjes bërthamore me Korenë e Veriut do të jetë një proces shumë i ngadalshëm. Ndihmëssekretari i Shtetet, Xhejs Kelli, foli sot në Pekin pasi u dha fund bisedimeve me zyrtarët kinezë. Më pas zoti Kelli shkoi në Singapor.

Zoti Kelli tha se Shtetet e Bashkuara, Kina, Koreja e Jugut, Russia dhe Japonia janë dakord se gadishulli korean duhet të jetë një zonë pa armë bërthamore. Por ai tha se arritja e këtij qëllimi do të kërkojë kohë në mënyrë që të bëhet “siç duhet”, siç u shpreh ai.

Copyright©2000-2003 Trepca.net - Të gjitha të  drejtat e rezervuara.