Lajme

E marte, 14 janar 2003

Përmbajtja:

• Shefi i misionit të SHBA-së në Prishtinë thotë se pavarësia e Kosovës duhet të meritohet

• Është gjetur i vdekur një ushtar i KFOR-it

• Vitin qe shkoi ne rajonin e Gjilanit ndodhen 8 vrasje

• Kryesia e Kuvendit të Kosovës vendosi që çështja e sigurisë të shtyhet për javën tjetër

• As dje nuk u nënshkrua marrëveshja për njohjen e targave të automjeteve të Kosovës në Serbi

• Në mungesë të thëngjillit sot reduktimet janë tri orë me rrymë e tri pa të

• Janë identifikuar edhe dy të vrarë gjatë luftës nga komuna e Klinës

• Përgënjeshtrim nga Shkupi lidhur me vdekjen e një pasagjeri shqiptar në aeroportin e Shkupit

• Reshjet e borës kanë shkaktuar vështirësi të mëdha në rrugët që lidhin Kosovën me Luginën e Preshevës

• U promovua monografia në dy vëllime për Shaban Palluzhën

• Dy biznismenë gjermanë po gjykohen me akuzat se Irakut i kanë shitur pajisje ushtarake

• Amerikanët kanë konfiskuar mbi 300 raketa në Afganistanin Lindor

• Bagdadi pohon se Sadam Hysein do të luftojë deri në plumbin e fundit të Irakut

• Trupat izraelite kanë vrarë dy palestinezë të armatosur

• Delegatët palestinezë do të flasin në konferencën e paqes në nëpërmjet lidhjeve videotelefonike

• Uashington: Ndihmat mund të rifillojnë nëse Koreja e Veriut ndryshon qëndrimin

• Kërkimet për armë të ndaluara në Irak mund të zgjasin deri në një vit

• Liberman vendos kandidaturën për zgjedhjet presidenciale

• Bliks thotë se mund të mos jetë kurrë në gjendje të deklarojë se Iraku është çarmatosur plotësisht

• Afganistani me statusin e favorizuar në eksportin me Shtetet e Bashkuara

• Një gjykatë amerikane ka filluar gjykimin ndaj ish-ekspertit të agjencisë së spiunazhit satelitor

• Numri i viktimave nga moti i ftohtë në Evropë dhe Azi ka arritur në mbi 1 mijë

Shefi i misionit të SHBA-së në Prishtinë thotë se pavarësia e Kosovës duhet të meritohet

 

Uashington, 14 janar 2003 - Udhëheqësit politikë të Kosovës duhet ta kuptojnë se pavarësia duhet merituar, tha Reno Harnish, shef i misionit të SHBA-së në Prishtinë, në një takim me Martin Vulajn, drejtor ekzekutiv i Këshillit Kombëtar Shqiptaro-Amerikan (KKSHA) në zyrat e KKSHA-së në Uashington.

Duke diskutuar gjendjen aktuale te Kosovës, progresin e arritur që prej përfundimit të luftës si dhe sfidat që mbeten për të ardhmen, ambasadori Harnish tha se misioni i SHBA-ve në Kosovë po përqendrohet kryesisht në tri përparësi: ligjin dhe rregullin, zhvilimin ekonomik dhe kthimin e refugjatëve. Ai tha se shumë më tepër duhet bërë në secilën prej këtyre fushave.

Udhëheqësit politikë duhet të punojnë më tepër për kthimin e serbëve; jo thjeshtë të flasin, por ta dëshmojnë përkrahjen e tyre për kthimet, tha Harnish, duke shtuar se politikanët e Kosovës "nuk kanë ngulmuar edhe aq për këtë çështje dhe duhet ta kuptojnë që është pengesa më e madhe për pavarësinë".

Z.Vulaj ra dakord se duhet bërë më tepër në këtë drejtim, por njëkohësisht theksoi se kthimet duhet të bëhen në baza vullnetare dhe individuale, që në ndonjë rast të caktuar mund të kërkojnë edhe një periudhë koheje të gjatë. Sipas tij, ata që duan të kthehen duhet pikësëpari të kalojnë nëpër një proces verifikimi në mënyrë që të sigurohet se nuk do të lejohet kthimi në Kosovë i atyre që planifikuan krimet e luftës apo i atyre që kryen barbarizmat.

Drejtori ekzekutiv i KKSHA-së gjithashtu shprehu shqetësim mbi vrasjet e shumta që janë bërë në Kosovë që prej përfundimit të luftës paçka pranisë së madhe të NATO-s në vend. Vulaj pyeti, "si është e mundur që 40.000 trupa të NATO-s janë të vendosura nëpër Kosovë dhe sërish kanë ndodhur një numër vrasjesh – duke përfshirë edhe disa që duket se janë bërë për motive politike – ndërkohë që askush nuk është arrestuar në lidhje me vrasjet"?

Ambasadori Harnish, i cili shoqërohej në takim nga Donald Braum, zëvendësdrejtor për Kosovën në Departamentin e Shtetit Amerikan, tha se përpjekjet e paqeruajtësve shumëkombëtarë po dëmtohen nga hezitimi i dëshmitarëve për të dëshmuar në proceset gjyqësore.

 

Megjithatë, diplomati amerikan ishte optimist për përmirësimet në ligj e rregull në të ardhmen, duke vlerësuar lart efikasitetin e Shërbimeve Policore të Kosovës që përbëhet nga 5.300 policë.

Në vazhdim, Harnish beri të ditur se Departamenti i Drejtësisë së SHBA-ve, që është angazhuar në fushën e ligjit dhe rregullit në Kosovë, është i përgatitur më mirë për të luftuar krimin sesa forcat paqeruajtëse të NATO-s.

 

 

As dje nuk u nënshkrua marrëveshja për njohjen e targave të automjeteve të Kosovës në Serbi

 

Prishtinë, 14 janar 2003 - Zëdhënësi i administratës së UNMIK-ut ka bërë të ditur se për shkak të motit të lig e ka anuluar vizitën e djeshme në Kosovë zëvendëskryeministri serb Nebojsha Çoviq.

 

Ai do të duhej të nënshkruante me UNMIK-un marrëveshjen për njohjen e targave që përdorin automjetet e regjistruara në Kosovë, si dhe të diskutonte marrëveshjen për njohjen e dokumentave të identifikimit.

Kjo është hera e dytë që për një arsye apo tjetër shtyhet nënshkrimi i kësaj marrëveshjeje.

 

 

Është gjetur i vdekur një ushtar i KFOR-it

 

Viti, 14 janar 2003 - Është gjetur i vdekur një ushtar i KFOR-it të hënën në mëngjes në bazën ushtarake "Megrat" të Vitisë, kanë bërë të ditur burimet e komandës së KFOR-it në bazën Bondstill.

 

Ushtari ka qenë pjesëtar diviziont të këmbësorisë së Brigadës së Lindjes. Ushtari, identiteti i të cilit nuk është njoftuar, është gjetur i vdekur në dhomën e tij, kurse hetimet po kryen policia ushtarake.

 

 

Vitin qe shkoi ne rajonin e Gjilanit ndodhen 8 vrasje

 

Gjilan, 14 janar 2003 (QIK) - Gjatë viti 2002 në rajonin e Gjilanit kanë ndodhur 8 vrasje. Kështu tha sot për gazetarët Naser Ibrahimi, zëdhënës rajonal i policisë, duke iu referuar statistikave të njësisë të hetimeve antkrim.

Viktima kanë qenë 5 shqiptarë dhe 3 serbë, ndërkaq që në arrest janë vënë 8 të dyshimtë. Pesë prej tyre janë shqiptarë, 1 është serb, ndërsa 3 të tjerët nuk identifikohen.

Janë shënuar edhe 8 raste të braktisjes, lënies, ngulfatjes apo mbytjes së foshnjave të posalindura që poashtu konsiderohen si krim i rendë. Policia ka arrestuar dy femra të dyshimta, një shqiptare dhe një serbe, tha sot zëdhënësi Ibrahimi.

 

 

Kryesia e Kuvendit të Kosovës vendosi që çështja e sigurisë të shtyhet për javën tjetër

 

Prishtinë, 14 janar 2003 - Duke pasur parasysh se nuk është përgatitur si duhet trajtimi i çështjes së sigurisë për seancën plenare të 16 janarit, siç ishin pajtuar kryetarët e tri grupeve parlamentare dhe e kishin miratuar edhe deputetët në seancën e shkuar dhe për faktin që z. Steiner dhe udhëheqës të tjerë të UNMIK-ut, përgjegjës të sektorëve që lidhen me sigurinë në Kosovë atë ditë nuk do të jenë në Kosovë, Kryesia e Kuvendit të Kosovës vendosi që çështjen e sigurisë ta vërë në rend dite në seancën plenare të 23 dhjetorit.

 

Anëtarët e Kryesisë u pajtuan që çështja të mos trajtohet si ekscesive dhe që Komisioni parlamentar për Gatishmëri Emergjente të përgatisë një material bazë për diskutim.

Kryesia e Kuvendit të Kosovës vendosi që në seancën e të enjtës ( 16 janar) ta nxjerrë për shqyrtim të dytë projektligjin për Ambientin, pasi që nga komisionet kompetente parlamentare janë harmonizuar amendamentet e propozuara në këtë projektligj.

Në këtë takim të Kryesisë u shqyrtua edhe kalendari i mbledhjeve të Kuvendit, të Kryesisë dhe të komisioneve për periudhën kohore janar-mars 2003 dhe çështje të tjera të organizimit të brendshëm në funksion të mbarëvajtjes së punës në organin legjistlativ të Kosovës.

 

 

IRC stimulon gratë për dialog dhe diskutim të përbashkët të problemeve

 

Gjilan, 14 janar 2003 - IRC do t`i tubojë gratë nga rajoni i Anamoravës, përkatësisht sektori i lindjes, në një takim të përbashkët që do të mbahet më 16 janar, në Brezovicë.

Takimi u ofron mundësinë grave që të njihen me Rregulloren 2000/45 të UNMIK-ut si dhe funksionimin e pushtetit lokal. Qëllimi i këtij takimi, që është rasti i parë ku do të tubohen gratë e të gjitha komuniteteve dhe nga të gjitha vendbanimet, është që të stimulohet dialogu dhe që gratë të kenë mundësinë per t`i diskutuar bashkarisht çështjet me interes të përgjithshëm.

 

 

Në mungesë të thëngjillit sot reduktimet janë tri orë me rrymë e tri pa të

 

Prishtinë, 14 janar 2003 - Në mungesë të thëngjillit sot reduktimet në Kosovë janë tri orë me rrymë e tri pa të. Moti i lig dhe temperaturat e ulëta kanë goditur prodhimin e energjisë elektrike edhe ashtu në gjendje të rëndë.

 

Për shkak të mungesës së thëngjillit nuk mund të startojë gjeneratori A-3 i gatshëm për prodhim. Në tri blloqe të tjera po prodhohen 200 megavatë energji elektrike sa edhe importohen nga Shqipëria.

 

 

Janë identifikuar edhe dy të vrarë gjatë luftës nga komuna e Klinës

 

Klinë, 14 janar 2003 - Nënkëshilli për Mbrojtjen e të Drejtave e të Lirive të Njeriut në Klinë njofton se pas ekzaminimit të bërë në Institutin e Mjekësisë Ligjore në Rahovec, janë identifikuar edhe dy të vrarë gjatë luftës në Kosovë nga komuna e Klinës, të cilët deri më tani konsideroheshin të zhdukur.

Bëhet fjalë për Ilaz Hysen Gashin (1955) nga Mleqani i Malishevës, me vendbanim në Klinë, ish-mësimdhënës në Gjimnazin "Luigj Gurakuqi" në Klinë, i zhdukur më 31 mars 1999 në fshatin Pastasellë të Rahovecit dhe Leonard Dedë Palucajn (1972) nga Klina, ushtar i Ushtrisë Çlirimtare të Kosovës, i zhdukur në maj të vitit 1999 në Koshare të Gjakovës.

Sipas njoftimeve nga NKMDLNJ në Klinë po vazhdon edhe më tej puna në identifikimin e kufomave të tjera.

 

 

Përgënjeshtrim nga Shkupi lidhur me vdekjen e një pasagjeri shqiptar në aeroportin e Shkupit

 

Shkup, 14 janar 2003 - Ditë më parë në aeroportin e Shkupit ka vdekur një pasagjer nga Kosova në një aeroplan që kishte ateruar nga Gjermania. Meqenëse pasagjerët nuk janë lejuar të dalin nga aeroplani, një pasagjer ka vdekur, thuhej në një njoftim nga Shkupi. Nga drejtori i Ndërmarrjes Publike për Shërbime të Aeroporteve të Maqedonisë ka arritur ky përgënjështrim.

"Me shqetësim të jashtëzakonshëm i pritëm akuzat ndaj Aeroportit të Shkupit për mosbashkëpunim dhe maltretim të udhëtarëve të fluturimeve të divertuara prej Aeroportit të Prishtinës.

 

I shprehim ngushëllimet tona më të thella për familjen dhe të afërmit e të ndjerit dhe njëkohësisht përgënjeshtrojmë informatën se rasti në fjalë ka të bëjë me ndonjë lëshim nga ana e shërbimeve të Aeroportit të Shkupit", thuhet në një reagim të Fatmir Besimit, drejtor i Ndërmarrjes Publike për Shërbime të Aeroporteve të Maqedonisë.

Për rastin konkret kontrolli i fluturimeve i informon shërbimet e aeroportit se në aeroplanin e kompanisë Eurowings të divertuar nga Prishtina gjendet një udhëtar i sëmurë, i cili ka nevojë për intervenim të shpejtë mjekësor.

Menjëherë, pas parkimit të aeroplanit, ekipi mjekësor i ndihmës së shpejtë të aeroportit e ka pranuar të sëmurin dhe i njëjti është dërguar në klinikën e Shkupit, thuhet në vazhdim të këtij reagimi.

Poashtu theksohet se bashkëpunimi me Aeroportin e Prishtinës paraqet një nga synimet e udhëheqësisë së Aeroportit të Shkupit në koordinim me Drejtorinë për fluturime civile.

"Obligim profesional dhe moral i yni është që të informojmë opinionin Kosovar se udhëtarët nga fluturimet e divertuara nga Aeroporti i Prishtinës kanë trajtim jo vetëm të barabartë, por edhe të privilegjuar në krahasim me udhetarët e rregullt.

 

Atyre u ofrohet edhe mundësia që të mos u nënshtrohen kontrolleve të rregullta të pasaportave dhe doganave dhe të kalojnë 'tranzit' nëpër Maqedoni, kështu që kontrolli i vetëm bëhet nga autoritetet e UNMIK-ut në hyrje të Kosovës (dmth. llogariten sikur të kenë aterruar ne Aeroport të Prishtinës)", thuhet në fund të këtij reagimi dërguar redaksisë sonë.

 

 

Reshjet e borës kanë shkaktuar vështirësi të mëdha në rrugët që lidhin Kosovën me Luginën e Preshevës

 

Preshevë, 14 janar 2003 - Reshjet e borës kanë shkaktuar vështirësi të mëdha në rrugët që lidhin Kosovën me Luginën e Preshevës. Kështu që qytetarët për të arritur në Kosovë udhëtojnë me orë të tëra nëpërmjet Bujanocit. Në pozitë më të vështirë mbeten banorët e Malësisë së Preshevës në këtë acar të vërtetë dimri.

 

 

U promovua monografia në dy vëllime për Shaban Palluzhën

 

Prishtinë, 14 janar 2003 - Në Bibliotekën Kombëtare Universitare në Prishtinë dje u promovua monografia në dy vëllime "Shaban Palluzha" të autorit Azem Hajdini - Xani. Diskutuesit tha për këtë monografi thanë se ajo është një kronikë për lëvizjen kombëtare shqiptare për çlirimin dhe bashkimin kombëtar të viteve 1941-1945.

 

Recenzenti Bedri Zyberaj tha se autori nëpërmjet këtij libri sjell dëshmi dhe fakte të panjohura deri më tash për njerën ndër figurat e rëndësishme të përpjekjeve të shqiptarëve për çlirimin kombëtar. Poashtu u tha se autori i kësaj monografie ishte bashkëpjesëmarrës i atyre ngjarjeve dhe kjo vepër historike u vlerësua e një rëndësie të veçantë.

 

 

Dy biznismenë gjermanë po gjykohen me akuzat se Irakut i kanë shitur pajisje ushtarake

 

Manhajm, 14 janar 2003 - Dy biznismenë gjermanë sot po gjykohen në Manhajm për shkak të akuzave se Irakut i kanë shitur pajisje ushtarake, me çka kanë shkelur embargon ndërkombëtare në eksportin e armëve në këtë atë vend.

Të akuzuarit në periudhën prej prillit deri në shtator të vitit 1999 kanë dërguar nëpërmjet Jordanisë në Irak pajisje ushtarake në vlerë prej 205.000 dollarësh.

 

 

Amerikanët kanë konfiskuar mbi 300 raketa në Afganistanin Lindor

 

Bagram, 14 janar 2003 - Sipas njoftimeve të ushtrisë amerikane, sot pjesëtarët e saj kanë konfiskuar mbi 300 raketa, me të cilat pothuajse çdo ditë sulmoheshin bazat amerikane në lindje të Afganistanit.

Në një njoftim nga baza amerikane Bagram thuhet se afër vendit Zarin Kalaja më provincën Pakti, është gjetur kutia me 322 raketa 107 milimetrash. Mbi bazat amerikane në Afganistanin Lindor gati çdo ditë shhkrepen raketa, të cilat kryesisht nuk qëllojnë objetiktivat.

 

 

Bagdadi pohon se Sadam Hysein do të luftojë deri në plumbin e fundit të Irakut

 

Bagdad, 14 janar 2003 – Britania ka thënë të martën se lufta me Irakun mund të mos ketë nevojë për rezolutë të re të OKB-së, madje as mbështetje të saj, ndërsa Bagdadi pohon se çështja e programit të armëve tashmë është sqaruar, ndaj presidenti irakian do të luftojë deri në plumbin e fundit të Irakut, njofton Rojter. Një prononcim të tillë, në emër të presidentit irakian Sadam Hysein e ka bërë sot (të martën) ndihmëskryeministri irakian, Tarik Aziz.

Ndërkaq, sekretari britanik i Jashtëm, Xhek Strou, ka thënë se Britania dëshiron një rezolutë të re të KS të OKB-së për çarmatim, por këtë nuk e sheh si vitale.

Ndërkaq, kancelari gjerman, Gerhard Shrëder ka thënë se ai është në favor të një rezolute të re të Këshillit të Sigurimit për Irakun, duke kundërshtuar kështu sugjerimet e diplomatëve gjermanë se një votim i ri nuk është i nevojshëm.

 

 

Trupat izraelite kanë vrarë dy palestinezë të armatosur

 

Gaza, 14 janar 2003 - Trupat izraelite kanë vrarë dy palestinezë të armatosur, të cilët po i afroheshin autobusit të kolonëve ebraitë në Gaza, ndërsa një aktivist i Xhihadit islamik ka humbur jetën në një shpërthim misterioz, njofton AFP.

 

Këto incidente kanë ndodhur vetëm disa orë pasi ministri izraelit i Mbrojtjes, Shaul Mofaz, ka tërhequr vërejtjen për dhunën e shtuar.

 

Njoftohet se dy tinejxherët palestinezë të armatosur po vraponin në drejtim të autobusit, i cili sapo nisej për vendbanimin ebrait Nezarim. Kur u vranë, ata ishin të armatosur me granata punim dore dhe pushkë automatike.

 

 

Delegatët palestinezë do të flasin në konferencën e paqes në nëpërmjet lidhjeve videotelefonike

 

Londër, 14 janar 2003 – Në Londër ka filluar sot (të martën) punimet Konferenca ndërkombëtare për paqe në Lindjen e Mesme, por Izraeli ka refuzuar të lejojë delegacionin palestinez të shkojë në këtë konferencë.

 

Megjithatë, delegatët palestinezë do të flasin në këtë konferencë nëpërmjet lidhjeve videotelefonike. Shtetet e Bashkuara kanë thënë dje se do të dërgojnë një diplomat të lartë për të marrë pjesë në këtë konferencë ndërkombëtare, në të cilën gjithashtu marrin pjesë edhe përfaqësuesit e Moskës, të BE-së, të OKB-së dhe zyrtarë nga Jordani, Egjipti dhe Arabia Saudite. Kjo konferencë është organizuar nga Britania e Madhe.

 

 

Uashington: Ndihmat mund të rifillojnë nëse Koreja e Veriut ndryshon qëndrimin

 

Uashington, 14 janar 2003 - Administrata e presidentit Bush thotë se ndihmat energjetike për Korenë e Veriut mund të fillojnë sërish, sapo Pheniani të heqë dorë nga programi nërthamor. Mirëpo, Shtëpia e Bardhë mohon njoftimet se ka ofruar të bëjë ndonjë lëshim, dhe thekson se asgjë nuk do të ndodh në qoftë se Korea e Veriut nuk përmbush detyrimet e saj ndërkombëtare.

 

Ndihmat energjetike për Korenë e Veriut u ndërprenë vitin e kaluar, pasi zyrtarët amerikanë thanë se Pheniani kishte pranuar se nuk ka mbajtur premtimin për të ndaluar programin e vet bërthamor. Në komentet që bëri dje në Seul, ndihmëssekretari amerikan i shtetit Xhejms Kelli tha se dhënia e ndihmave mund të fillojnë sërish, nëse Korea e Veriut ndryshon qëndrimin e saj.

 

 

Kërkimet për armë të ndaluara në Irak mund të zgjasin deri në një vit

 

Bagdad, 14 janar 2003 - Agjencia e Kombeve të Bashkuara për mbikëqyrjen e armëve bërthamore njoftoi se kërkimet për armë të ndaluara në Irak mund të zgjasin deri në një vit. Ndërkohë, ka vazhduar me të njejtin vrull grumbullimi i trupave amerikane për një luftë të mundshme me Irakun, i cili pritet të përfundojë nga mesi i muajit shkurt.

 

Drejtori i Agjensisë Ndërkombëtare për Energji Atomike Mohamed El-Baradei tha se trysnia e ushtrisë amerikane mbi Irakun ka dhënë rezultate dhe duhet të shtohet ndërkohë që vazhdojnë inspektimet. Ai tha inspektimet duhet kryer në tërësi.

 

Ndërkaq, Shtëpia e Bardhë theksoi se presidenti Bush nuk ka caktuar ndonjë afat për të vendosur nëse inspektimet kanë dështuar dhe nëse të fillohen operacionet ushtarake.

 

 

Liberman vendos kandidaturën për zgjedhjet presidenciale

 

Uashington, 14 janar 2003 - Senatori demokrat i shtetit Konektikat, Xhozef Libermann bëri të njohur se do të vërë kandidaturën për zgjedhjet presideciale, duke u bërë kështu hebreu i parë që hedh kandidaturën për president në Shtetet e Bashkuara. 62 vjeçari Liberman, i cili u bë i famshëm në vitin 2000, si hebreu i parë që kandidonte për postin e nënpresidentit, ku ai humbi krahas nënpresidentit

 

Al Gor. Në atë kohë ai tha para një grupi nxënësish të shkollës së Mesme Stamford, se po kandidonte për postn e nënpresidentit, për të realizuar ëndërrën amerikane. Ëndrrra amerikane, tha zoti Liberman, rrezikohet nga një numër terroristësh dhe tiranësh nga jashtë, si dhe nga ekonomia e dobësuar amerikane, që e ka vështirësuar më tej jetën për amerikanët.

 

 

Bliks thotë se mund të mos jetë kurrë në gjendje të deklarojë se Iraku është çarmatosur plotësisht

 

Bagdad, 14 janar 2003 - Kryeinspektori i Kombeve të Bashkuara për armët, Hans Bliks thotë se mund të mos jetë kurrë në gjendje të deklarojë se Iraku është çarmatosur plotësisht përsa i përket arsenalit të armëve të shkatërrimit në masë.

 

Shefi i misionit të inspektimit të armëve në Irak tha se, megjithatë, duhej të peshohej edhe kostoja njerëzore dhe financiare e fillimit të një lufte kundër Irakut.

 

 

Afganistani me statusin e favorizuar në eksportin me Shtetet e Bashkuara

 

Uashington, 14 janar 2003 - Presidenti amerikan, Xhorxh Bush, i ka dhënë Afganistanit statusin e favorizuar në eksportin me Shtetet e Bashkuara. Ky vendim e kthen Afganistanin në tregun botëror të tregtisë.

 

 

Një gjykatë amerikane ka filluar gjykimin ndaj ish-ekspertit të agjencisë së spiunazhit satelitor

 

Uashington, 14 janar 2003 - Një gjykatë federale amerikane ka filluar gjykimin ndaj Brajn Regan, ish-ekspert i shërbimeve të inteligjencës në një agjenci që mbulon spiunazhin satelitor.

 

Ai akuzohet se i ka ofruar shërbime presidentit iraken Sadam Hysein në shkëmbim të 13 milionë dollarëve. Ai është arrestuar në përpjekje për të shkuar në Zvicër në gusht të 2001.

 

 

Numri i viktimave nga moti i ftohtë në Evropë dhe Azi ka arritur në mbi 1 mijë

 

Pragë, 14 janar 2003 - Numri i viktimave nga moti i ftohtë në Evropë dhe Azi ka arritur në mbi 1 mijë. Pesë vetë vdiqën gjatë 24 orëve të fundit në rrugët e Moskës, ku deri tani janë shënuar 286 viktima.

 

Qindra të tjerë kanë humbur jetën në Poloni dhe vendet evropiane, ndërsa në Bangladesh, nga temperaturat e ulta, prej dhjetorit deri tani janë evidentuar 590 të vdekur.

Copyright©2000-2003 Trepca.net - Të gjitha të  drejtat e rezervuara.