OPINIONE

Rinia e Kosovës është e ardhmja e një Kosove pa krime politike

Rinia e Kosovës është e ardhmja e një Kosove pa krime politike

Inteligjenca dhe rinia shqiptare duhet të gjejë forcën e saj dhe të ballafaqohet si përherë me të keqen, me hijen e zezë që po e ndjek Kosovës pas çlirimit e këndej. Rinia Shqiptare nuk duhet të lejojë që Kosovës t'i shtohen Ditët e Zisë, por të kujdeset që t'i rriten Kosovës rrezet e Diellit të Lirisë mbi tërë hapësirën e saj pa dallim, qoftë në Dukagjin, në Drenicë apo qoftë edhe në Llap e Shalë të Bajgorës.

14 janar 2003 / Shkruan: Besim KRASNIQI

Pas vrasjes makabre të kolonelit tonë Tahir Zemaj është koha e fundit që Rinia e Kosovës Demokratike tani ta thotë fjalën e saj, sepse ajo është pjesa më vitale e ish-Ushtrisë Çlirimtare të Kosovës dhe e Ushtrisë së Ardhshme të Kosovës, me të cilën do të krenohet e tërë Kosova.

Askush nuk mundet një rinie të tërë t'ia mbyll gojën, asnjë kriminel nuk mund t'i dalë përballë ideve të reja dhe progresive, asnjë politikan i stërkequr nuk mund t'ia ndal hovin një vazhdimësie historike, që qëndron e mbështetur fort për heronjët e saj të Lirisë siç janë Adem e Hamëz Jashari, Zahir Pajaziti, Sali Çeku, Ahmet Krasniqi, Tahir Zemaj, Xhemajl Mustafa e shumë e shumë trima të Lirisë, që ia falën jetën ardhmërisë së kësaj rinie madhështore.

Rinia e Kosovës Demokratike duhet të jetë vazhdimisht në komunikim të përhershëm me popullin e Kosovës, për të mos i lënë më hapësirë krimit politik dhe çfarëdo krimi tjetër, që po e kthen Kosovën në perspektiva të errëta e me mjegull. Rinia e këtij vendi ia shton edhe më tepër sigurinë popullit të Kosovës, i cili u trondit si asnjëherë më parë nga vrasja e të madhit kolonel Tahir Zemaj me djalin e tij Enisin dhe aktivistin politik të Rrafshit të Dukagjinit Hasan Zemaj.

Inteligjenca dhe rinia shqiptare duhet të gjejë forcën e saj dhe të ballafaqohet si përherë me të keqen, me hijen e zezë që po e ndjek Kosovës pas çlirimit e këndej. Rinia Shqiptare nuk duhet të lejojë që Kosovës t'i shtohen Ditët e Zisë, por të kujdeset që t'i rriten Kosovës rrezet e Diellit të Lirisë mbi tërë hapësirën e saj pa dallim, qoftë në Dukagjin, në Drenicë apo qoftë edhe në Llap e Shalë të Bajgorës.

Diktatura staliniste-komuniste në Shqipëri mori jetëra të tëra të kokave më të shquara të kombit shqiptar, për të ruajtur miqësitë dhe krushqitë ruso-shqiptare, serbo-shqiptare e kinezo-shqiptare që i kishin lidhur djajtë e kuq të stalinizmit shqiptar për interesa të veta klanore. Pesëdhjetë vite me rradhë shqiptari nuk ka patur mundësi të shprehet lirshëm ashtu siç e kërkon natyra e njeriut, ashtu siç e do edhe vetë Zoti, por gjithnjë i përbuzur dhe i nënçmuar deri në pafundësi nga armiqtë e Shqiptarisë.

E njëjta farë e djallit ka mbirë në Kosovën tonë demokratike, e cila fatkeqësisht është ngritur edhe në nivel të politikës zyrtare të Kosovës, dhe iu është lënë dorë e lirë në shumë sfera të jetës shoqërore. Ruajtja e pushtetit dhe e karrigës pushtetore kësaj kategorie të pandershme politikanësh me orientime të mbrapshta cariste, ka bërë që ky bllok politikanësh të mos ndiejnë fare për faktin se ata po e rrezikojnë esencën e qenies shqiptare, esencës e asaj për çfarë luftuan dhe vdiqën trimat e Lirisë.

Klanet majtiste nuk po mjaftohen me gjakun e derdhur gjatë luftës çlirimtare, por ato po e vazhdojnë punën dhe veprimtarinë e pakryer të Serbosllavisë, duke eliminuar fizikisht figurat më eminente që ka mundur t'i ketë Kosova në historinë e saj më të re! Pastaj, është më se iluzore që Rinia Shqiptare e Kosovës Demokratike të shpresojë se kjo pari e mjeranëve politik do të kthejnë fytyrën nga Kombi dhe mirëqenia e tij, andaj demaskimi i dhe luftimi i këtyre grupimeve ideologjike është më se i domosdoshëm për ardhmërinë e Kosovës.

Po të dëgjojmë me vëmendje deklaratën e zyrtarëve perëndimorë të qendrave të vendosjes pas atentatit politik ndaj kolonelit Tahir Zemaj, bindemi fare lehtë se ku po na shpiejnë këto vrasje të liga e tradhtare. Rinia e Kosovës është ajo që do t'i thotë Stop krimit politik në Kosovës, sikurse i tha serbosllavisë në vitet 1968, 1981, 1989, 1998, sepse Rinia shqiptare nuk do të lejon sakrifikimin e Kosovës dhe gjakut të dëshmorëve për hir të disa kokave të krisura e heretike, të cilat po e stopojnë me vetëdije të plotë procesin e shtetëzimit dhe pavarësimit të Kosovës.

Copyright©2000-2003 Trepca.net - Të gjitha të  drejtat e rezervuara.