Lajme

E hëne, 13 janar 2003

Përmbajtja:

• Presidenti Rugova nuk do të marrë pjesë në takimin e thirrur nga kryeministri Rexhepi

• Harnish: Standardet nuk pengojnë diskutimin e statusit, por janë plani i punës për transformimin e Kosovës

• Në Prizren rifilloi procesi gjyqësor kundër katër të akuzuarve për vrasjen e Ekrem Rexhës - komandant Drinit

• Policia njofton për dy sulme të armatosura në Gjilan por pa pasoja në njerëz

• Nënshkruhet një marrëveshje bashkëpunimi ndërmjet RTV Kosovës dhe Unionit Evropian të Transmetimeve

• Temperaturat e ulta kanë ndikuar që sërish të vazhdojë reduktimi 4 orë me rrymë e dy pa të

• Aeroporti i Prishtinës dje ka qenë i mbyllur shkak të borës

• Sot rifilloi gjysëmvjetori i dytë në të gjitha shkollat e mesme dhe në ato fillore

• UNDP do të bëjë rehabilitimin e disa objekteve elektroenergjetike në Komunën e Mitrovicës

• Shefi i diplomacisë evropiane Havier Solana të martën do të vizitojë Kosovën

• Ish-presidenti serb Millutinoviq të mërkurën mund të dërgohet në Hagë

• Solana anulon turneun ballkanik

• Burzan: Politika e jashtme malazeze do të ndërtohet sipas modelit të shteteve të pavarura

• Sot në Tiranë arrin Treshja evropiane për të nxitur fillimin e negociatave për stabilizim-asociim me BE-në

• Amasadori i BE-së në Shkup thotë se për viti 2002 ishte një vit i kthimit kah stabilizimi i Maqedonisë

• Rreth 150 zyrtarë amerikanë kanë filluar inspektimin e bazave ushtarake turke

• Policia britanike ka arrestuar 6 persona lidhur me ricinin e zbuluar në një banesë në Londër

• Perl ia ka tërhequr vërejtjen Irakut se nëse nuk i dorëzon armët do të ballafaqohet me aksion ushtarak

• Një aksion i mundshëm ushtarak kundër Irakut do të kishte pasoja katastrofike, thotë presidenti egjiptian

• Gadafi thotë se Libia e SHBA-të këmbejnë informata për Al Kaidën

• Gjatë luftimeve të përgjakshme izraelito-palestineze të fundjavës u vranë gjithsej 11 vetë

• Ramsfeld jep urdhër për dislokimin e 27 mijë trupave shtesë në Gjirin Persik

• Përpjekje amerikane për të zbutur krizën me Korenë e Veriut

• Inspektorëve u duhet "një vit" për të kryer detyrën

• Viktima të reja nga përplasjet mes Izraelit e palestinezëve

• Rusia dërgon dy luftanije në Gjirin Persik

• Vdiq ylli i grupit "Bee Gees"

Presidenti Rugova nuk do të marrë pjesë në takimin e thirrur nga kryeministri Rexhepi

 

Prishtinë, 13 janar 2003 - Presidenti i Kosovës Ibrahim Rugova nuk do të marrë pjesë në takimin e thirrur nga kryeministri Rexhepi në të cilin ishin ftuar kryetari i PDK-së Hashim Thaçi dhe ai i AAK-së Ramush Haradinaj, kanë bërë të ditur zyrtarë të kabinetit të presidentit Rugova.

 

Zëdhënësi i presidentit Rugova, Muhamet Hamiti ka thënë se një ftesë për këtë takim e nënshkruar nga kryeministri Rexhepi ka arritur në Zyrën e presidentit të enjtën, mirëpo, takimi është thirrur pa konsultime paraprake për kohën, rendin e ditës dhe as për formatin.

 

Zëdhënësi Hamiti ka bërë të ditur se presidenti Rugova nuk do të marrë pjesë në këtë takim. "Presidenti i Kosovës është institucioni më i lartë dhe rendi e do dhe këtë duhet ta dijë besoj edhe kryeministri që para çdo nisme për takime ku ai ftohet të marrë pjesë të bëhen konsultime paraprake dhe të merret pajtimi i tij, pra i presidentit", tha zëdhënësi i Presidentit.

 

 

Harnish: Standardet nuk pengojnë diskutimin e statusit, por janë plani i punës për transformimin e Kosovës

 

Uashington, 13 janar 2003 - Standardet e vendosura nga komuniteti ndërkombëtar në Kosovë nuk kanë për synim të pengojnë diskutimin e statusit të ardhshëm, por janë kushtet për krijimin dhe funksionimin e një shoqërie të suksesshme, ka theksuar shefi i Misionit të SHBA-ve në Prishtinë, Reno Harnish, në një diskutim zhvilluar më 10 janar në Institutin amerikan të Paqes. "Këto standarde nuk kanë për synim të shërbejnë si pengesa ndaj diskutimit të statusit përfundimtar, por janë kërkesa që do ta shndërrojnë Kosovën në pjesë të Evropës moderne.

 

Këto standarte kërkojnë një shoqëri shumë-etnike, një ekonomi tregu funksionale, reforma të trupave mbrojtëse të Kosovës, pra elementë që krijojnë planin e punës për të transformuar Kosovën", ka thënë zoti Harnish, njofton "Zëri i Amerikës".

Njerëzit, vazhdon shefi i misionit të Shteteve të Bashkuara në Kosovë, mund dhe duhet të veprojnë edhe pa shpalljen e pavarësisë në mënyrë që të zhvillojnë tipare si përgjegjshmëria, respekti për ligjin dhe të vazhdojë ndërtimi i komuniteteve.

Harnish ka theksuar se pikësynimi kryesor i punës së misionit që kryeson ai, është arritja e standardeve të vendosura nga komuniteti ndërkombëtar. Në këtë këndvështrim, thotë zoti Harnish, procesi i kalimit të kompetencave merr një rëndësi të veçantë për t'i dhënë popullit të Kosovës mundësinë të përmbushë standardet që priten prej tij.

Por zoti Harnish pohon se një ndër pasojat e mostrajtimit të çështjes së statusit të ardhshëm është mungesa e garancive sovrane, gjë që e bën të pamundur për një numër të konsiderueshëm institucionesh financiare të angazhohen me investime.

 

Një tjetër problem që pengon zhvillimin ekonomik është edhe niveli i kufizuar i veprimtarisë tregëtare në shkallë rajonale.

 

Procesi i Bashkimit Evropian për Stabilizim, vazhdon zoti Harnish, u ka hapur rrugën marrëveshjeve rajonale në Ballkan për liberalizimin e tregëtisë dhe harmonizimin e veprimtarisë ekonomike, por Kosova nuk është përfshirë në këto diskutime.

 

 

Në Prizren rifilloi procesi gjyqësor kundër katër të akuzuarve për vrasjen e Ekrem Rexhës - komandant Drinit

 

Prizren, 13 janar 2003 - Sot në Gjykatën e qarkut në Prizren rifilloi procesi gjyqësor kundër katër të akuzuarve për vrasjen e Ekrem Rexhës - komandant Drinit, i cili qe ndërprerë më 18 korrik të vitit të kaluar.

 

I akuzuari kryesor, siç thuhet në aktakuz, për nxitjen e dhënien e urdhërit për vrasjen e Drinit, është eprori i lartë i TMK-së e ish-komandant i Zonës së dytë TMK-së, Sali Veseli.

Procesi filloi me një vonesë të konsiderueshme dhe pas një ore u ndërpre për të vazhduar pasdite. Trupi gjykues të akuzuarve vetëm ua ka lexuar një rregullore në bazë të së cilës katër të akuzuarit duhet t'i përcjellin disa kritere sipas ligjit në mënyrë që procedura gjyqësore të jetë më e efektshme.

 

Duhet theksuar se sot në gjykatë është paraqitur një trup gjykues tjetër ndërkombëtar nga ai mëparshmi.

 

 

Policia njofton për dy sulme të armatosura në Gjilan por pa pasoja në njerëz

 

Gjilan, 13 janar 2003 - Gjatë ditëve të fundit në rajonin e komunës së Gjilanit kanë ndodhur 23 krime të ndryshme dhe kjo tregon se krimi ka shënuar rritje në këtë komunë, tha zëdhënësi i SHPK-së.

 

Sipas tij dy krimet më serioze kanë ndodhur dje kur në një pompë benzine në Gjilan dy persona të armatosur dhe me maska në kokë kanë plaçkitur punëtorin e kësaj pompe dhe i kanë marrë 600 euro, telefonin mobil dhe një pushke gjuetie.

 

Poashtu gjatë ditës së djeshme dy persona të armatosur me pushkë e të veshur në të zeza kanë hapur zjarr ndaj dy të rinjve, por pas pasoja.

 

 

Nënshkruhet një marrëveshje bashkëpunimi ndërmjet RTV Kosovës dhe Unionit Evropian të Transmetimeve

 

Prishtinë, 13 janar - Në mjediset e RT Kosovës sot u nënshkrua një marrëveshje bashkëpunimi ndërmjet RTV Kosovës dhe Unionit Evropian të Transmetimeve.

 

Kjo marrëveshje parasheh ndihmën konkrete për RTK-në, siç janë dokumentarët e ndryshëm, programe edukative, programe për fëmijë etj.

 

Poashtu me marrëveshje parashihet edhe një bashkëpunim më i ngushtë i ndërsjellë.

 

 

Temperaturat e ulta kanë ndikuar që sërish të vazhdojë reduktimi 4 orë me rrymë e dy pa të

 

Prishtinë, 13 janar 2003 - Temperaturat e ulëta dhe bora që vazhdon të bie ka bërë që të vështirësohet dukshëm edhe furnizimi me energji elektrike pas rënies nga sistemi i gjeneratorit në Termocentralin Kosova B.

 

Aktualisht të dy termocentralet në Kosovë prodhojnë rreth 300 megavatë energji elektrike, ndërsa 200 megavatë të tjerë importohen nga Shqipëria. Në këtë situatë, sipas zyrtarëve të KEK-ut, reduktimi i energjisë elektrike është i domosdoshëm sipas orarit 4 orë me rrymë dhe dy pa të.

 

 

Aeroporti i Prishtinës dje ka qenë i mbyllur shkak të borës

 

Prishtinë, 13 janar 2003 - Reshjet e borës anembanë Kosovës kanë vështirësuar dukshëm trafikun rrugor, kurse ai ajror dje është pezulluar. Përgjegjësit që mirëmbajjen e rrugëve pohojnë se ato tash për tash në pjesën më të madhe të vendit janë të kalueshme, por tërheqin vërejtjen se vozitësit e automjeteve duhet patur kujdes gjatë vozitjes e në veçanti kërkohet nga ata të kenë pajisje dimërore.

 

Moti i ftohtë dhe bora që ra ka vështirësuar gjendjen edhe në aeroportin e Prishtinës. Nga 15 fluturimet e planifikura dje nuk është realizuar asnjë. Zyrtarët e këtij aeroporti kanë pohuar se është duke u punuar në pastrimin e pistës, ku po ndihmojnë edhe pjesëtarët e forcave paqeruajtëse.

 

 

Sot rifilloi gjysëmvjetori i dytë në të gjitha shkollat e mesme dhe në ato fillore

 

Prishtinë, 13 janar 2003 - Megjithë të reshurat e mëdha të borës sot rifilloi gjysmëvjetori i dytë një shkollat e mesme dhe në ato filore. Ministria e Arsimit njofton se nuk ka arsye të ketë ndryshim të datës të rifillimit të procesit mësimor.

 

Edhe në komunën e Prishtinës gjysmëvjetori i dytë do të fillojë sot në të gjitha shkollat e kësaj komune me përjashtim të shkollave fillore "Faik Konica" dhe "Gjergj Fishta" në të cilat janë duke u bërë përgatitjet e fundit.

 

 

UNDP do të bëjë rehabilitimin e disa objekteve elektroenergjetike në Komunën e Mitrovicës

 

Mitrovicë, 13 janar - UNDP-së në kuadër të programit të rindërtimit të shtëpive dhe elektrifikimit në Kosovë do të fillojë punët në rindërtimin dhe rehabilitimin e disa objekteve elektroenergjetike në komunën e Mitrovicës.

 

Me këtë program do të bëhet rehabilitimi dhe ndërtimi i disa trafostacioneve dhe linjave largpërçuese. Në kuadër të rehabilitimit të rrjetit në tensionin e mesëm do të punohet linja në drejtim të spitalit dhe sistemit të furnizimit me ujë.

 

Gjithashtu do të bëhet vendosje dhe instalimi i pesë trafo-shtyllave të reja si dhe ndërtimi i lidhjes ajërore 20 kilovatë në disa lokalitete të Shales së Bajgorës, si dhe në disa fshatra në periferi të Mitrovicës, thuhet në një njoftim të Zyrës për Informim të Kuvendit Komunal të Mitrovicës.

 

Në realizimin e këtij programi në vlerë prej 7 milionë euro do të përmirësohet situata elektroenergjetike që është mjaft e rëndë në Komunën e Mitrovicës.

 

 

Shefi i diplomacisë evropiane Havier Solana të martën do të vizitojë Kosovën

 

Prishtinë, 13 janar - Në kuadër të një turneu diplomatik në Ballkan të marten do të qëndrojë për një vizitë në Kosovë shefi i diplomacisë evropiane Havier Solana. Këtë turne ai do ta fillojë me një vizitë në Tiranë dhe më pas do të vazhdojë në Prishtinë dhe në Beograd për të përmbyllur turneun me vizitën e tij në Shkup.

 

Kjo vizitë e Solanës po bëhet në kohën kur Bashkimi Evropian është i preokupuar me tensionet në Lindjen e Mesme dhe mundësinë e një konflikti të armatosur ndërmjet Shteteve të Bashkuara dhe Irakut.

 

 

Ish-presidenti serb Millutinoviq të mërkurën mund të dërgohet në Hagë

Hagë, 13 janar 2003 - Ish-presidenti i Serbisë Millan Millutinoviq të mërkurën mund të dërgohet në Hagë bëjnë të ditur burimet nga Beogradi. Millutinoviqi është i akuzuar nga Gjykata e Hagës për Krime Lufte gjatë luftës në Kosovë.

 

 

Solana anulon turneun ballkanik

 

Bruksel, 13 janar 2003 - Shefi i politikës së jashtme të Bashkimti Evropian, Havier Solana, ka anuluar sot turneun ballanik për shkak të angazhimeve të tij në një konference në Londër për Lindjen e Mesme.

 

Solana gjatë këtij turneu është dashur të vizitojë Tiranën, Shkupin, Prishtinën dhe Sarajevën.

 

 

Burzan: Politika e jashtme malazeze do të ndërtohet sipas modelit të shteteve të pavarura

 

Podgoricë, 13 janar 2003 - Ministri i ri malazez i punëve të Jashtme, Dragisha Burzan, ka paralajmëruar se Mali i Zi në periudhën kalimtare trivjeçare strategjinë e vet të politikës së jashtme do ta konceptojë sipas modelit karakteristik për të gjitha shtetet e pavarura.

"Çdo gjë që do të bëjmë në periudhën kalimtare do të jetë në pajtim me Kartën kushtetuese, kurse të gjitha ndryshimet e ardhshme në planin e politikës së jashtme duhet të jenë të përshtatura me modelin, sipas të cilit, Mali i Zi në fund do të jetë shtet i pavarur.

 

Në lidhje direkte me këtë është edhe projeksioni i forcimit të Ministrisë së Jashtme malazeze, e cila do të 'servisojë' nevojat e shtetit të pavarur për tri vjet, natyrisht nëse referendumi do të jetë pozitiv, e jam i bindur se do të jetë", ka deklaruar Burzan për një gazetë të Podgoricës.

 

 

Sot në Tiranë arrin Treshja evropiane për të nxitur fillimin e negociatave për stabilizim-asociim me BE-në

 

Tiranë, 13 janar 2003 - Sot në Tiranë pritet të arrijë Treshja evropiane për të nxitur përpjekjet e Qeverisë së Shqipërisë lidhur me fillimin e negociatave për stabilizim-asociim me Bashkimin Evropian.

 

Në përbërje të delegacionit janë ministri i jashtëm grek Jorgos Papandreu, vendi i të cilit kohë më parë ka marrë kryesinë e radhës së Bashkimit Evropian, shefi i Politikës së Jashtme të BE-së Havier Solana si dhe përfaqësuesi i Evropës Juglindore në BE Rajnhard Pride.

 

 

Amasadori i BE-së në Shkup thotë se për viti 2002 ishte një vit i kthimit kah stabilizimi i Maqedonisë

 

Shkup, 13 janar 2003 - Duke shfaqur qëndrimin e tij se cilat duhet të jenë prioritetet e Qeverisë së Maqedonisë ambasadori i Bashkimit Evropian në Shkup Aleks Brons në një intervistë dhënë për radion "Evropa e lirë" tha se parësore është lufta kundër kriminalitetit të organizuar, reformat në sektorin publik dhe zbatimi i mëtejmë i Marrëveshjes së Ohrit.

 

Ai vlerësoi se zbatimi i kësaj marrëveshjeje ishte në nivel të duhur gjatë vitit të kaluar, kurse zgjedhjet u mbajtën në një atmosferë të qetë dhe u bë dorëzimi i qetë i pushtetit.

Duke folur për regjistrimin e popullsisë z. Brons tha se ai nga ana teknike dhe politike u mbajt me sukses, në një atmosferë të qetë dhe paqësore, kështu që për shumë gjëra viti 2002 ishte një vit i kthimit ka stabilizimi i shtetit. Ndërkaq viti i sivjetshëm tha se duhet të jetë vit i reformave.

 

 

Rreth 150 zyrtarë amerikanë kanë filluar inspektimin e bazave ushtarake turke

 

Ankara, 13 janar 2003 - Rreth 150 zyrtarë amerikanë kanë filluar inspektimin e bazave ushtarake turke. Marrëveshjen rreth inspektimit të lokacioneve që mund të shfrytëzohen në luftën eventuale kundër Irakut e kanë arritur autoritetet turke dhe amerikane të shtunën.

Amerikanët të shoqëruar nga personeli turk po studiojnë portet dhe bazat ushtarake për të përcaktuar se çfarë ndryshemesh nevojiten për t'i shrytëzuar ushtria amerikane.

Turqia nuk i ka dhënë leje SHBA-ve për të shfrytëzuar bazat e saj ushtarake dhe ka paralajmëruar se nuk do ta bëjë këtë nëse Kombet e Bashkuara nuk miratojnë një aksion kundër Irakut.

 

 

Policia britanike ka arrestuar 6 persona lidhur me ricinin e zbuluar në një banesë në Londër

 

Londër, 13 janar 2003 – Policia antiterroriste britanike, që ka zbuluar ricin në një banesë në Londër javën e kaluar, ka arrestuar 6 persona në Dorset, njofton BBC world. Po kështu, njoftohet se të katër të arrestuarit e mëparshëm në Londër mbeten edhe mëtutje në burg.

 

 

Perl ia ka tërhequr vërejtjen Irakut se nëse nuk i dorëzon armët do të ballafaqohet me aksion ushtarak

 

Uashington, 13 janar 2003 – Një zyrtar i lartë amerikan ia ka tërhequr vërejtjen Irakut se nëse nuk i dorëzon armët e shkatërrimit masiv do të ballafaqohet me aksion ushtarak, njofton BBC World.

 

Kreu i trupit politik të Departamentit amerikan të Mbrojtjes, Riçard Perl, ka deklaruar se inspektorët e Kombeve të Bashkuara, që aktualisht po bëjnë kërkime në Irak, nuk do të mund t'i gjejnë kurrë armët, ngase ato janë të fshehura.

 

"Mendoj që ose Sadami do t'i tregojë këto armë në minutën e fundit ose do të ketë aksion ushtarak", ka thënë z. Perl, në një prononcim të sotëm (të së hënës).

 

 

Një aksion i mundshëm ushtarak kundër Irakut do të kishte pasoja katastrofike, thotë presidenti egjiptian

 

Kairo, 13 janar 2003 - Një aksion i mundshëm ushtarak kundër Irakut do të kishte pasoja katastrofike për të tërë Lindjen e Mesme dhe do të ishte "hedhje e benzinës në zjarr", ka vlerësuar presidenti egjiptian Hosni Mubarak në një intervistë dhënë gazetës "Al ahram".

 

"Pasojat e sulmit ndaj Bagdadit do të jenë të tmerrshme dhe askush tash për tash nuk është në gjendje të përcaktojë saktësisht", ka thënë Mubarak.

 

 

Gadafi thotë se Libia e SHBA-të këmbejnë informata për Al Kaidën

 

Tripoli, 13 janar 2003 - Lideri i Libisë Moamer el Gadafi ka deklaruar se vendi i tij dhe SHBA-të po këmbejnë informata të zbulimit për rrjetin ndërkombëtar terrorist Al Kaida.

 

Gadafi në një intervistë që e boton revista amerikane "Njuzuik" në numrin e së hënës, ndërkaq ka pranuar se në botën muslimane po rritet popullariteti i udhëheqësit të Al Kaidës, Osama bin Ladenit.

 

 

Gjatë luftimeve të përgjakshme izraelito-palestineze të fundjavës u vranë gjithsej 11 vetë

 

Gaza, 13 janar 2003 – Gjatë luftimeve të përgjakshme izraelito-palestineze të fundjavës, kur trupat izraelite depërtuan në Rripin e Gazës, kurse palestinezët e armatosur sulmuan Izraelin verior si dhe me depërtimet e herëpashershme sulmonin nga Egjipti, u vranë gjithsej 11 vetë nga të dy anët, bën të ditur AFP në një njoftim të sotëm (të së hënës).

 

Kryeministri izraelit, Ariel Sharon dhe Autoriteti palestinez kanë këmbyer akuza të ndërsjella rreth këtij cikli të ri të dhunës, i cili ka tensionuar situatën para zgjedhjeve të 28 janarit në Izrael.

 

 

Ramsfeld jep urdhër për dislokimin e 27 mijë trupave shtesë në Gjirin Persik

 

Uashington, 13 janar 2003 - Sekretari amerikan i Mbrojtjes, Donald Ramsfeld, ka dhënë urdhër për dislokimin e mijra trupave të tjera amerikane në Gjirin Persik, në kuadër të shtimit të shpejtë të forcave në rajon në përgatitje për një luftë të mundëshme me Irakun.

 

Sekretari Ramsfeld nënshkroi të shtunën udhërin për dislokimin e 27 mijë trupave të tjerë, një ditë pasi dha urdhër për dislokimin në rajon të 35 mijë trupave. Zyrtatë të Pentagonit thonë se parashikojnë që rreth 150 mijë trupa amerikane të vendosn në rajon deri në mes të muajit shkurt.

 

 

Përpjekje amerikane për të zbutur krizën me Korenë e Veriut

 

Uashington, 13 janar 2003 - Një diplomat i lartë amerikan thotë se Shtetet e Bashkuara mund ta ndihmojnë Korenë e Veriut të përballojë mungesat në karburant, menjëherë sapo të zgjidhet kriza bërthamore.

 

Ndihmës-sekretari amerikan i shtetit, Xhejms Kelli, tha sot në një konferecë shtypi në Seul, të Koresë së Jugut, se Shtetet e Bashkuara janë të gatshme të zhvillojnë bisedime me Korenë e Veriut, lidhur me përgjigjen e Fenianit për komunitetin ndërkombëtar mbi çështjen bërthamore.

 

Zoti Kelli sugjeroi se me t’u zgjidhur çështja bërthamore, mund të krijohen mundësi për ta ndihmuar Korenëe Veriut në fushën e energjisë.

 

 

Inspektorëve u duhet "një vit" për të kryer detyrën

 

Nju Jork, 13 janar 2003 - Një zëdhënës i agjencisë së Kombeve të Bashkuara për Energjinë Atomike, tha se inspektorëve të armëve në Irak do t'u duhej një vit për ta kryer detyrën, ndërkohë që zyrtarët amerikanë po flasin hapur për mundësinë e luftës.

 

Në një intervistë për BBC-në, zëdhënësi Mark Gëoydecky tha se periduha një vjetore ishte e nevojshme për një inspektim të besueshëm.

 

Ai shtoi se ky ishte edhe qëndrimi që drejtori i Agjensisë Ndërkombëtare të Energisë Atomike Muhamed al-Baradai dhe kryeinspektori i armëve në Irak, Hans Bliks kishin gjashtë muaj që e bënin publik.

 

Inspektorët pritet që të raportojnë për punën e tyre në Irak para Këshillit të Sigurimit të OKB-së pas dy javësh.

 

 

Viktima të reja nga përplasjet mes Izraelit e palestinezëve

 

Gaza, 13 janar 2003 - Sulmet izraelite me helikopter në jug të Rripit të Gazës vranë dy palestinezë dhe plagosur një të tretë.Zyrtarët palestinezë thanë se sulmet kishin në shënjestër anëtarë të grupit militant Hamas, të cilët ndodheshin në një makinë pranë vendit ku ndodhi sulmi.

 

Dëshmitarët thanë se nga përllogaritja e gabuar u vranë dy adoleshentë, ndërsa militantët u larguan të padëmtuar. Sulmi pason një seri përplasjesh në Rripin e Gazës dhe hedhjen e një numri rraketash mbi Izraelin nga ku u plagos lehtë vetëm një civil.

Në një tjetër zhvillim një sulm në veri të Izraelit ka lënë të vdekur të paktën një person. Televizioni izraelit tha se palestinezë të armatosur sulmuan fshatin izraelit afër Bregut Perëndimor Moshav Gadish.

 

Një numër raketash janë lëshuar mbi Izraelin nga Rripi i Gazës pas një nate të dhunshme atje. Ushtria e Izraelit tha se tre raketat - të ngjashme me ato të fabrikuara nga grupi militant Hamas - goditën qytetin jugor të Sderotit, duke plagosur një shtetas izraelit.

 

 

Rusia dërgon dy luftanije në Gjirin Persik

 

Moskë, 13 janar 2003 - Dy luftanije ruse po përgatiten për t'u vendosur në rajonin e Gjirit Persik. Zëdhenësi i flotës ushtarake tha se misioni i tyre do të zgjasë gjashte muaj. Qëllimi i tij do të jetë vëzhgimi i situatës ushtarake përpara një sulmi të mundshëm ushtarak të SHBA-ve kundër Irakut.

 

Ndërkohë amerikanët e kanë shtuar arsenalin ushtarak ne rajon. Sipas shtypit edhe rreth 15 mijë ushtarë të tjerë do të dislokohen atje brenda pak javesh.

 

 

Vdiq ylli i grupit "Bee Gees"

 

Majami, 13 janar 2003 - Ylli i grupit "Bee Gees", Moris Gib (Maurice Gibb) ka vdekur në një spital në Majami në moshën 53-vjeçare.

Këngëtari vdiq pas një sulmi në zemër gjatë një operacioni emergjent.

Vëllai i tij binjak, Robin Gib ishte afër shtratit pasi kishte arritur nga Londra vetëm një orë para vdekjes së tij.

Gjithashtu të pranishëm ishin edhe familja dhe miqtë e tij, përfshirë vëllain tjetër Barrz, bashkëshorten e tij Yvonnne dhe fëmijët e tij.