Lajme

E shtune, 11 janar 2003

Përmbajtja:

• Ministria e arsimit është duke pritur njoftimin zyrtar nga Rektorati në lidhje me vendimet e bordit të UP

• Vendimin për pjesëmarrje në punimet e Kuvendit të Kosovës duhet ta marrin vetë deputetët e koalicionit "Kthimi"

• Shirat e mëdha të ditëve të fundit kanë shkaktuar vërshime në disa vise të Kosovës

• Nga 1 janari 2003 administrata tatimore ka ngritur shkallën e tatimit në paga për 100 për qind

• Sipas një sondazhi, Kosova nuk është më vendi më optimist në botë

• Në Qeverinë e re malazeze ministër i pakicave u emërua sërish Gëzim Hajdinaga

• Ministrat e jashtëm të Kroacisë dhe Maqedonisë kanë diskutuar integrim në strukturat evroatlantike

• Prodi garantoi vendet e Ballkanit se do të bëhen një ditë pjesë e një Evrope më të madhe

• Batler: Janë pa baza spekulimet se mund të ketë një ofensivë të re në pranverë në Maqedoni

• Të pakten 33 minatorë janë zhdukur pas një shpërthimi të gasit në një minierë thëngjilli në Kinën verilindore

• Avionët e koalicionit sulmojnë objekte ushtarake irakiane

• Armata izraelite ka mbyllur pothuaj të gjitha zyrat e lidhjes me palestinezët

Ministria e arsimit është duke pritur njoftimin zyrtar nga Rektorati në lidhje me vendimet e bordit të UP

 

Prishtinë, 11 janar 2003 - Ministria e Arsimit, Shkencës dhe Teknologjisë është duke pritur njoftimin zyrtar nga Rektorati i Universitetit të Prishtinës në lidhje me vendimet e fundit të Bordit të UP. Kjo ministri nuk dëshiron të komentojë zgjedhjen e dekanëve dhe drejtorëve të shkollave të larta nga Rektorati ende nuk është pranuar.

 

Me një vendim administrativ të ministrit të arsimit paraprakisht është kërkuar që drejtuesve të fakulteteve dhe Senatit të Universitetit të Prishtinës t'u zgjatet mandati për gjashtë muaj kur, derisa të miratohet statuti i ri i Universitetit në përputhje me Ligjin për arsimin e lartë. Ky është aprovuar nga Kuvendi i Kosovës, por kryeadministratori Shtajner e ka kthyer në rishqyrtim.

 

 

Vendimin për pjesëmarrje në punimet e Kuvendit të Kosovës duhet ta marrin vetë deputetët e koalicionit "Kthimi"

 

Beograd, 11 janar 2003 - Vendimin definitiv për pjesëmarrje në punimet e Kuvendit të Kosovës duhet ta marrin vetë deputetët e koalicionit "Kthimi" nëse bashkësia ndërkombëtare u siguron respektimin e të drejtave themelore, deklaruan autoritetet e Beogradit, duke mos saktësuar se cilat janë ato të drejta.

 

Deputetët serbë të koalicionit "Kthimi" zhvilluan bisedime në Beograd tri ditë me zyrtarët më të lartë.

 

 

Shirat e mëdha të ditëve të fundit kanë shkaktuar vërshime në disa vise të Kosovës

 

Prishtinë, 11 janar 2003 - Shirat e mëdha të ditëve të fundit kanë shkaktuar vërshime në disa vise të Kosovës. Vërshimet më rëndë kanë goditur Pejën, fshatin Miradi të Fushë-Kosovës.

 

Janë vërshuar një numër i madh i shtëpive dhe janë bllokuar shumë rrugë, por edhe shumë banorë janë detyruar të largohen nga shtëpitë e tyre. Njëhërësh në disa lagje të Gjilanit, uji ka depërtuar në 30 shtëpi. Rreziku nga vërshimet i kanoset edhe një pjese të Skënderajt, qytetit të Klinës dhe fshatrave përreth.

Po kështu, disa shtëpi në "Lagjen e Spitalit" në Prishtinë janë përmbytur nga uji. Në Prishtinë është e rrezikuar edhe lagjja "Kodra e Trimave", si pasojë e pamundësisë që ujërat e rrëmbyeshëm t'i përbijnë kanalet ekzistuese. Poashtu edhe në Mitrovicë shumë janë rrezikuar nga vërshimet, si edhe në Gjakovë e gjetiu.

 

 

Nga 1 janari 2003 administrata tatimore ka ngritur shkallën e tatimit në paga për 100 për qind

 

Prishtinë, 11 janar 2003 - Administrata tatimore ka ngritur nga 1 janari 2003 shkallën e tatimit në paga për 100 për qind, njoftuan zyrtarët e kësaj administrate.

 

Për periudhën tatimore 2003 tatimi mbi të ardhurat do t'i ngarkohet të ardhurave në këto përqindje: për të ardhurat deri në 50 euro përqindja është 0, për të ardhurat ndërmjet 50-250 euro tatimohen 10 për qind, për të ardhurat mbi 250 euro tatimi do të jetë 20 për qind.

 

 

Sipas një sondazhi, Kosova nuk është më vendi më optimist në botë

 

Prishtinë, 11 janar 2003 - Qytetarët e Kenisë janë qytetarët më optimistë në botë – sipas hulumtimit të fundvitit të Gallup International, ku u anketuan më shumë se 67,500 respondentë në 65 vende të botës, gjatë nëntorit dhe dhjetorit të vitit 2002.

 

Kosova ka qenë vendi më optimist në botë gjatë dy viteve të kaluara, por këtë vit u mund nga më shumë se tre të katërtat e qytetarëve të Kenisë (77%), që mendojnë se viti 2003 do të jetë më i mirë se viti 2002.

Ndryshe, një vend tjetër afrikan – Zimbabve – është vendi më pesimist në botë, ku gati tre të katërtat e këtij vendi (72%) mendojnë se viti i ri do të jetë më i keq se viti i kaluar. Në vendet tjera, si në Portugali, dy të tretat (65%) janë pesimistë për vitin e ri dhe parashikojnë se viti 2003 do të jetë vit i vështirësive ekonomike (69%).

Situata e vështirë në Irak është reflektuar edhe në rezultate, ku 38 nga 65 vendet e përfshira në hulumtim mendojnë se viti 2003 do të jetë vit problematik me trazira ndërkombëtare, e veçanërisht në SHBA (60%) dhe në vendet aleate të saj, ku 64% të britanezëve dhe 68% të gjermanëve pohojnë të njejtën gjë.

Në Kosovë hulumtimi u zhvillua nga Index Kosova, partner me BBSS Gallup International gjatë nëntorit të vitit 2002, me 1,000 qytetarë shqiptarë dhe me 500 qytetarë serbë, mbi 18 vjet.

Kosova për dy vite me radhë ishte vendi më optimist në botë, ku shumica absolute e qytetarëve shpreheshin optimistë për vitin që vinte.

 

Megjithatë, ky optimizëm shënoi një trend të rënies, i cili sivjet Kosovën e plasoi në vendin e dytë më optimist në botë. Ndryshe nga hulumtimet e kaluara të fundvitit, këtë herë në hulumtim u përfshinë edhe qytetarët serbë të Kosovës.

 

Edhe pse shkalla e optimizmit të shqiptarëve të Kosovës ka shënuar një rënie nga viti i kaluar, prapëseprapë shumica (77%) janë optimistë për vitin 2003, derisa shkalla e përgjithshme e optimizmit në Kosovë është 74%, pasi që serbët e Kosovës janë shumë më pak optimistë se shqiptarët (34%).

 

 

Në Qeverinë e re malazeze ministër i pakicave u emërua sërish Gëzim Hajdinaga

 

Podgoricë, 11 janar 2003 - Në Qeverinë e re malazeze Ministria e Pakicave iu nda partisë shqiptare Unioni Demokratik e cila edhe në mandatin e kaluar e udhëhoqi këtë dikaster. Mbajtja e këtij dikasteri nga një forcë politike shqiptare vlerësohet e një rëndësie të veçantë nga fakti se aty mund të artikulohen synimet themelore në fushën e të drejtave dhe lirive të njeriut.

 

Ministri i pakicave Gëzim Hajdinaga shprehet optimist për realizimin e të drejtave të pakicave në përputhje me normat dhe standardet demkokratike evropiane. Sipas tij objektivë themelore mbetet miratimi i ligjit për popujt pakicë i cili mund të ndikojë në shlirimin e kornizës ligjore në Mal të Zi.

 

 

Ministrat e jashtëm të Kroacisë dhe Maqedonisë kanë diskutuar integrim në strukturat evroatlantike

 

Shkup, 11 janar 2003 - Ministrat e jashtëm të Kroacisë dhe Maqedonisë, Tonino Picula dhe Ilinka Mitreva kanë diskutuar bashkëpunimin bilateral dhe përpjekjet e përbashkëta për integrim në strukturat evroatlantike.

 

Pas bisedimeve që kishin në Shkup dy ministrat thanë se presin që bashkëpunimi trepalësh midis Kroacisë, Maqedonisë dhe Shqipërisë të ndihmojnë përpjekjet e tyre për aderim në NATO.

 

 

Prodi garantoi vendet e Ballkanit se do të bëhen një ditë pjesë e një Evrope më të madhe

 

Bruksel, 11 janar 2003 - Presidenti i Komisionit Evropian, Romano Prodi, garantoi vendet e Ballkanit se do të bëhen një ditë pjesë e një Evrope më të madhe.

 

Zoti Prodi, që kryeson organizmin kryesor ekzekutiv të Bashkimit Evropian, tha në një konferencë shtypi në Athinë se raundi i tanishmëm i zgjerimit evropian nuk do të jetë i fundit. Ai theksoi se dyert e organizatës do të mbeten të hapura për vendet e Ballkanit.

Organizata pranoi kohët e fundit kandidaturën e 10 vendeve evropiane që do të anëtarësohen vitin tjetër, por e ka shtyrë për disa vjet ftesën për Bullgarinë dhe Rumaninë, për t’u dhënë atyre më shumë kohë që të përgatiten për anëtarësimin.

 

 

Batler: Janë pa baza spekulimet se mund të ketë një ofensivë të re në pranverë në Maqedoni

 

Shkup, 11 janar 2003 (QIK) - Ambasadori amerikan në Shkup Lorens Batler, lidhur me mundësinë e rifillimit të luftimeve këtë pranverë në Maqedoni, tha se i vetmi aktivitet i armatosur që ka parë gjatë gjithë vitit të kaluar ka qenë ai i natyrës kriminale.

 

"Ka patur edhe ndonjë rast të natyrës politike, por unë besoj se vëzhguesit që lënë të kuptohet se ka një rrezik për ringjallje të dhunës politike, siç ishte në vitin 2001, gabohen", u shpreh ambasadori Batler për "Zërin e Amerikës".

Ambasadori amerikan tha se njerëzit u gënjyen edhe para një viti kur kishte mbërritur në Maqedoni dhe kur flitej për një ofensivë në pranverë.

 

"Diskutimet dhe spekulimet se mund të kishte një ofensivë të re në pranverë, janë pa bazë, nuk ka ndonjë mbështetje brenda Maqedonisë për dhunë tjetër, njerëzit po rindërtojnë shtëpitë dhe po rregullojnë ndërtesat që ishin prishur", vlerësoi Batler.

 

 

Të pakten 33 minatorë janë zhdukur pas një shpërthimi të gasit në një minierë thëngjilli në Kinën verilindore

 

Peking, 11 janar 2003 - Të pakten 33 minatorë janë zhdukur pas një shpërthimi të gazit në orët e hershme të mengjesit të sotëm (të shtunën) në një minierë thëngjilli në Kinën verilindore, njofton Rojter.

 

Njoftohet se në momentin e shpërthimit ishin duke punuar 35 minatorë, nga të cilët kanë shpëtuar dy veta. Hetimet për shkakun e shpërthimit po vazhdojnë. Në industrinë minerare të Kinës, e cila është më e madhja në botë, mbahet edhe rekordi i vdekjeve të punëtorëve të saj.

 

Vetëm në vitin 2001 kanë vdekur 7 mijë njerëz në aksidente të tilla.

 

 

Avionët e koalicionit sulmojnë objekte ushtarake irakiane

 

Bagdad, 11 janar 2003 - Avionët e koalicionit perëndimor kryen sulme kundër pesë objekteve ushtarake irakiane në zonën jugore të ndalim fluturimit. Komanda qendrore ushtarake amerikane njofton se avionët përdorën armë të precizionit të lartë për të goditur një qendër komande dhe kontrolli dhe katër qendra komunikimi, të gjitha në juglindje të Bagdadit.

Në një deklaratë të Komandës Qendrore thuhet se sulmet u ndërmorën pasi forcat irakiane hapën zjarr kundër avionëve që po patrullonin zonën jugore të ndalim fluturimit.

 

 

Armata izraelite ka mbyllur pothuaj të gjitha zyrat e lidhjes me palestinezët

 

Ramallah, 11 janar 2003 - Armata izraelite ka mbyllur pothuaj të gjitha zyrat e lidhjes me palestinezët. Sipas njoftimit nga një zëdhënës i armatës izraelite ato masa kanë goditur edhe zyrat në Nablus, Tulkarem dhe Kalkilia. Ka mbetur zyra e vetme lidhëse në qytetin Jeriko, cili është i vetmi qytet i pa pushtuar në Jordanin përendimor nga Izraeli.

 

Nga ana palestineze hapi izraelit vlerësohet si përfundim i ripushtimt të Jordanit përendimor dhe shenja e fundit për fshirjen e marrëveshjeve paqesore para zgjedhjeve parlamentare.

 

Zyrat lidhëse ishin themeluar para 10 vitesh pas vënies së marrëveshjeve paqesore ndërmjet Izraelit dhe Palestines, për vënien e bashkëpunimit ndërmjet të dyja palëve për çështjet civile dhe të sigurisë.

Copyright©2000-2003 Trepca.net - Të gjitha të  drejtat e rezervuara.