Presidenti Rugova priti shefin e OSBE-së, ambasadorin Fieski

Prishtinë, 10 janar 2003 (QIK) - Presidenti i Kosovës Ibrahim Rugova priti sot shefin e OSBE-së në Kosovë, ambasadorin, Paskal Fieski. Në këtë takim është biseduar bashkëpunimin ndërmjet institucioneve vendore dhe ndërkombëtare dhe dënuan aktet e dhunës që ndodhën në Kosovë.

Pas takimit ambasadori Fieski, pasi dënoi aktin e fundit të dhunës në Kosovë, tha para gazetarëve se aktet e tilla nuk do të ndalojnë procesin e demokratizimit të vendit. Akti si ai vrasjes së kolonel Tahir Zemajt janë kundër shoqërisë demokratike, tha ai.

 

Zoti Fieski shprehu keqardhje që edhe në këtë takim është dashur të flitet për aktin e tmerrshëm kriminal që ndodhi në Pejë, të cilin e kanë dënuar fuqishëm të dy bashkëbiseduesit. Kjo lloj dhune nuk ka vend në shoqëritë demokratike, tha ambasadori Fieski.

Shefi i OSBE-së theksoi se edhe gjatë këtij viti do të vazhdojë bashkëpunimi me institucionet e Kosovës.

Lidhur me aktet e dhunës, Presidenti Rugova edhe me këtë rast theksoi nevojën e marrjes së masave sa më të efektshme në luftën kundër krimit në Kosovë. Ndërkaq Presidenti e vlerësoi shumë të suksesshëm bashkëpunimin me OSBE-në dhe shtoi se ky bashkëpnim do të vazhdojë edhe në të ardhmen.

 

Poashtu ai tha se e ka njohur ambasadorin Fieski me objektivat e institucioneve të Kosovës për zhvillimin ekonomik, privatizimin, investimet, për forcimin e një administrate publike, si dhe për integrimin e grupeve etnike në shoqërinë kosovare. Edhe me këtë rast Presidenti i Kosovës tha se insiston në njohjen sa më të shpejtë të pavarësisë së Kosovës.

Copyright©2000-2003 Trepca.net - Të gjitha të  drejtat e rezervuara.