Mijëra qytetarë sot protestuan në Prishtinë kundër dhunës dhe vrasjeve në Kosovë

  

Prishtinë, 9 janar 2003 (QIK) - Me moton "Ndal dhunën politike", sot në qendër të Prishtinës protestuan në mënyrë paqësore mijëra qytetarë të kryeqytetit dhe të Kosovës, e të cilën e kishte organizuar Forumi i Rinsië së LDK-së në Deçan. Protesta është organizuar si shprehje e revoltës për vrasjen e kolonel Tahir Zemajt, djalit të tij Enisit dhe kushëririt Hasan Zemajt, kryetar i FR të LDk-së në Deçan, më 4 janar 2003në Pejë.

Para Teatrit Kombëtar pjesëmarrësve të kësaj proteste foli nënkryetari i Forumit të Rinisë së LDK-së, Sejdë Tolaj. Në fjalën e tij ai tha se "ka ardhur momemti i fundit që ne si qytetarë të Kosovës, të gjithë së bashku, t'i themi 'Stop vrasjeve në Kosovë' 'Mjaft më me vrasje politike".

 

Ai kërkoi nga organet kompetente që sa më shpejt të ndërmerren masa më serioze dhe më adekuate në lëmin e sigurisë, në mënyrë që të gjithë qytetarët e Kosovës të ndihen të sigurtë, duke shprehur revoltën e tij ndaj organeve që janë kompetente për sigurinë e qytetarëve.

 
Në vazhdim zoti Tolaj tha se intelektualët dhe personalitetet të cilët i përkushtohen çështjes kombëtare çdokund në botë mbrohen dhe respektohen, e jo si në Kosovë, të vriten nga një farë e keqe tanimë e instaluar në Kosovë.

Duke folur për varsjen në Pejë, Tolaj tha: "E vranë komandant Tahir Zemajn ata të cilët e kërcënuan vazhdimisht. E vranë kolonelin ata të cilët në vend të ushtrisë deshën banda, në vend të lirisë duan anarki, në vend të ardhmërisë ëndërrojnë të kaluarën, ata të cilët për pushtet rrezikojnë edhe vetë shtetin".
"E vranë Hasan dhe Enis Zemajn, ata të cilët nuk e çmojnë jetën dhe ardhmërinë e rinisë së Kosovës..., por nuk do të vritet kurrë as e ardhmja, as liria dhe as pavarësia e Kosovës, tha Sejdë Tolaj në fjalën e tij.

Deputetja dhe anëtarja e Këshillit të Përgjithshëm të LDK-së Nekibe Kelmendi, duke folur në këtë protestë tha se ajo është organizuar për të protestuar në mënyrë të qetë e dinjitoze për vrasjen makabër të kolonel Tahir Zemajt, djalit të tij Enisit dhe Hasan Zemajt, kryetarit të Forumit të Rinisë së LDK-së në Deçan. Duke folur për figurën e tyre, zonja Kelmendi tha se ata ishin të palodhshëm si në kohe lufte ashtu në kohë paqeje.

 

Ata nuk iu frikësuan rreziqeve që iu kanosën disa herë më parë në punën e tyre të shenjtë. "Këta tre tri trima, të cilët i vrau dora antishqiptare, tradhtare, edhepse të rrezikuar disa herë më parë, vdekjes më së paku iu frikuan". Ajo tha se nuk mund ta marrë me mend se në Kosovën e pasluftës do të protestohet sepse ka menduar se vrasjet kanë marrë fund ditën kur ka përfunduar lufta njeherë e përgjithmonë, tha zonja Kelmendi.

Protesta kaloi e qetë dhe pa incidente pas një gjysmë ore.

Copyright©2000-2003 Trepca.net - Të gjitha të  drejtat e rezervuara.