Lajme

E enjte, 9 janar 2003

Përmbajtja:

• Kërkesë, me shkrim, e Sabri Hamitit, kryetar i Grupit Parlamentar të LDK-së për një seancë të veçantë të Kuvendit të Kosovës lidhur me sigurinë në Kosovë

• Kuvendi i Kosovës miratoi në parim ligjin për menaxhimin e financave publike dhe rregulloren e punës

• Kryesia e parlamentit vendosi që në seancën e radhës së Kuvendit, të debatohet për çështjen e sigurisë në Kosovë

• Qytetarët kërkojnë kompensim për pronat ku është vendor KFOR-i, por ende mungon pergjegjja pozitive

• B. Fleçer shpreson se së shpejti do të arrestohen vrasësit e Zemajve nëse ata janë në Kosovë!

• Administrata e UNMIK-ut ka filluar edhe zyrtarisht punën në pjesën veriore të Mitrovicës

• Bordi i UP nuk mori dje vendim për vendim për zgjedhjen e dekanëve të fakulteteve, por atë do ta bëjë sot

• Franca dënon ashpër aktet hakmarrëse të cilat nuk e kanë vendin në një Kosovë moderne dhe demokratike

• Sot në Prishtinë organizohet një protestë paqësore gjithëpopullore

• Gjukanoviq deklaroi se statusi i Kosovës duhet të zgjidhet sa më parë

• Koalicioni serb "Kthimi" ende nuk ka marrë vendim për ndërprerjen e bojkotit në Kuvendin e Kosovës

• Sipas të dhënave jozyrtare në duart e qytetarëve të Maqedonisë janë rreth 600 mijë armë

• NATO-ja ia dorëzon misionin paqeruajtës që drejton në Bosnjë Bashkimit Evropian në vitin 2004

• Është arrestuar një veprimtar veteran i demokracisë kineze nën akuzën e subversionit

• Dy aeroplanë luftarakë turq janë përplasur në ajër në provincën juglindore Malatva të Turqisë

• Forcat izraelite kanë vrarë tre palestinezë

• Koreja e Veriut është pajtuar të zhvillojë bisedime me Qeverinë e Koresë së Jugut

• Aksident i rëndë ajror në Turqi, vdesin 75 pasagjerë

• Një mision diplomatik i Bashkimit Evropian do të vizitojë një numër vendesh arabe

• Në Poloni nga fillimi i dimrit kanë vdekur si pasojë e motit 230 vetë

• Në një aksident ajror në Karolinën e Veriut kanw humbur jetën 21 udhëtarë

• Korea e Veriut i akuzoi SHBA për rritje të rrezikut të luftës në gadishullin korean

• Izraeli nuk heq dorë nga ndalimi i udhëtimit për të dërguarit palestinez në një konferencë në Londër

Kërkesë, me shkrim, e Sabri Hamitit, kryetar i Grupit Parlamentar të LDK-së për një seancë të veçantë të Kuvendit të Kosovës lidhur me sigurinë në Kosovë

 

Prishtinë, 9 janar 2003 (QIK) - Në seancën sotme të Kuvendit të Kosovës u vendos që në mbledhjen e ardhshme ky Kuvend të diskutojë për sigurinë në Kosovë. Kërkesën për këtë mbledhje e ka bërë me shkrim, Sabri Hamiti, kryetar i Grupit Parlamentar të LDK-së.

 

Po e japim të plotë këtë kërkesë.

"Askush nuk është mbi ligjin", që i detyrohet drejtësisë, apo "Zero tolerancë ndaj krimit", që i detyrohet sigurisë në Kosovë, janë fraza të përsëritura deri në lodhje nga ndërkombëtarët, që kanë rezervuar për veti kompetencat për këto fusha të jetës.

"Dhashtë Zoti që këto vrasje të jenë të fundit", është prapë frazë e përsëritur në trajtë të lutjes nga njerëzit e vendit, qofshin ata përfaqësues apo qytetarë të zakonshëm.

Mirëpo, dhuna e krimit që ndodhi në Kosovë, qoftë në trajtë të labirintit ndërmjet kompetencave e përgjegjësive të ndërkombëtarëve e të vendasve, për të mos thënë se po pretendojnë të shtrihen si një autostradë. Kjo, për t'u dëshmuar se Kosova është e çliruar gati tërësisht, por Kosova nuk është e lirë.

Evidencat e policisë thonë që mbas luftës në Kosovë ka pasur 900 vrasje, marrje të jetës me dhunë. Marrja me shifra është një lloj cinizmi, sepse çdo jetë e ka peshën e vet dhe çdo vrasje është një plagë shpirtrore e sociale për Kosovën. Vetë organet e ndjekjes e të gjyqësisë pranojnë që vrasjet më të rënda nuk janë sqaruar, pra, fajtorët nuk kanë dalë para drejtësisë.

E, pra, janë vrarë veprimtarë prominentë politikë, janë vrarë komandantë e luftëtarë të lirisë, janë vrarë deputetë e udhëheqës të lartë në komuna, janë vrarë intelektualë e publicistë, janë vrarë qytetarë të tjerë.
Vrasjet e fillimit të këtij viti në Pejë e në Sharr dëshmojnë që dhuna është bërë sistematike e krimi po rritet. Këtu ka të bëhet me një rrjetë të krimit politik dhe nuk duhet të humbim kohë për definimin akademik të tij.

Shtrohet çështja: çfarë të bëjmë?

Ekziston rreziku, që të rrëshqasim në shoqëri të krimit. Sepse, nuk është shoqëri e krimit ajo ku ndodh një krim, por ka rrezik që të shkohet kah shoqëria e krimit, aty ky ekziston frika a pafuqia që krimi të denoncohet dhe të dënohet, aty ku edhe dëshmitarët nuk dëshmojnë nga frika.

Forcat e sigurisë në Kosovë, që tash janë ndërkombëtarët, mjaftohen duke thënë që vrasjet e mëdha janë të bëra në mënyrë tepër profesionale (pra, tepër kriminele). Dhe, lypin ndihmë nga vendasit për ndriçimin e tyre. Por, harrojnë të thonë që ai që merr kompetencat merr edhe përgjegjësitë për sigurinë dhe se siguria nuk bëhet duke u marrë me të ndodhurat për më tepër duke u marrë me parandalimin e krimit. Deri më tash nuk e kanë bërë asnjërën e as tjetrën.

Forcat e sigurisë të Kosovës, SHPK-ja, kanë kaq pak kompetenca në fushën e vet të veprimit dhe deri më tash kanë dëshmuar një inaktivizëm të padurueshëm.

Ne (institucionet dhe opinioni), nëse përjashtohen fjalimet mortore apo mallkimet kolektive, gati kemi rënë në një apati të padurueshme. Gati asgjë, përpos deklarimit për rastet, të cilat po i zëvendësojnë rastet e reja.

Dijetari i madh shqiptar, Faik Konica, ka veneruaur që në jetën sociale të shqiptarëve një nga defektet më të mëdha historike është falja e krimit apo kriminelit. Sepse, krimi do drejtësi e jo mëshirë, përndryshe përsëritet ciklikisht.

 

Ne jemi në udhëkryq dhe duhet të dijmë që dhuna e krimi mund të hanë ardhmërinë e Kosovës, e jo vetëm të prishin imazhin e saj para të tjerëve. U pa këto ditë, që ndonjë zyre e huaj përfaqësuese, në trajtën e ngushëllimit, qiti fjalën fatale: Po shihet që në Kosovë mungojnë standardet. Dihen pasojat e këtij deklarimi në të folurit e sotëm, kur pritet të flitet për statusin politik të Kosovës.

Duke u gjendur në këtë ngushticë:

1. Kuvendi i Kosovës duhet të ngritet në nivelin moral e politik të përfaqësuesit të qytetarëve, duke kërkuar besimin e tyre, që dhuna e krimi të ndalen e të izolohen, duke përdorur gjithë fuqinë e vet të veprimit;

2. Kërkohet nga partitë, si organizime të mëdha politike, që ta ushtrojnë tolerancën, të kuptojnë konkurrencën si procedurë demokratike të shfaqjes së kualitetit, të kuptojmë që qeverisja fitohet vetëm me votë, që grindja nuk është metodë e marrëveshjes, por dialogu dhe të bëhen të vetëdijshme për përgjegjësitë që kanë për të krijuar qëndrimin e përbashkët kundër dhunës e krimit, veçanërisht kundër dhunës politike;

3. Thërrasim intelektualët, dijetarët e të tjerët, të mundin frikën dhe me autoritetin e tyre të flasin e të punojnë kundër dhunës. Ndoshta këtu më të fortit e më të zëshmit mund të jenë të rinjtë;

 

4. Presim nga mediat e shkruara e elektronike, të cilat ushtrojnë ndikim duke marrë opinione e duke krijuar opinione, që të kërkojnë të vërtetën e të maten me të vërtetën. Ky kërkim i të vërtetës gjithnjë bëhet me ligjën universale të komunikimit: mendimi dhe fjala janë të lira, por rrena dhe shpifja publike janë të dënueshme.

 

Presim, pra, nga mediat të lirohen nga gjuha e egër e agresive, të pushojnë nga propaganda e trashë, më në fund të pushojnë së prodhuari "atdhetarë" e "tradhtarë". Sepse, fuqia e këtyre mediave rritet duke krijuar vlerat dhe jo duke i përbaltur vlerat.

5. I thërrasim qytetarët të denoncojnë dhunën e krimin në secilin hap, se vetëm kështu do të fitojnë edhe lirinë personale.

Duke parë çështjen e sigurisë si çështje ekzistenciale e politike të Kosovës sot, në emër të Grupit parlamentar të LDK-së kërkoj që të thirret një mbledhje e veçantë e Kuvendit për të biseduar për fenomenin, për të dëgjuar përgjegjësit për siguri e drejtësi në Kosovë dhe për të nxjerrë rekomandimet për veprime konkrete.

 

 

Kuvendi i Kosovës miratoi në parim ligjin për menaxhimin e financave publike dhe rregulloren e punës

 

Prishtinë,, 9 janar 2003 - Në seancën e sotme plenare të Kuvendit të Kosovës, e para në kët vit, miratoi në parim ligjin për menaxhimin e financave publike si dhe miratoi rregulloren për punën e Kuvendit.
Ministri i Ekonomisë dhe Financave Ali Sadria paraqiti para deputetëve ekspozenë.

 

Ai tha se miratimi i një këtij ligji është një bazë e fuqishme ligjore e cila do të garantonte shpërndarjen, shfrytëzimin dhe menaxhimin e drejtë të parave publike, të cilat më vonë do të ndikonin në përmirësimin e mirëqenies së qytetarëve dhe do të realizonte interesat e të gjithë qytetarëve të Kosovës.

"Ne jemi të frustruar dhe të zhgënjyer se ndarjet buxhetore për vitin fiskal 2003 janë miratuar në formë të rregullores së UNMIK-ut. Kuvendit nuk i është dhënë mundësia që të japë çfarëdo kontrubuti domethënës në lidhje me atë ndarje buxhetore", tha Sadria.

Vërejtjet e ministrit konsistonin në faktin se ky buxhet do të menaxhohet nga administrata e UNMIK-ut, duke thënë se ka pasur edhe veprime arbirtare nga UNMIK-u duke mos përfillur vendimet e Kuvendit të Kosovës sa i takon menaxhimit të financave. Sadria tha se kjo çështje në të ardhmen duhet të ndryshojë dhe të të ndryshojë përmes këtij projektligji.

Poashtu deputetët mratuan edhe Rregulloren e re për punën e Kuvendit të Kosovës, e cila është hartuar nga një komisionin i posaçëm. Deputetët e pëkrahën këtë rregullore me disa vërejtje, sidomos për pjesën që ka të bëjë me statusin e deputetit dhe anëtarëve të komisioneve parlamentare.

Regullorja synon të përcaktojë të drejtat dhe detyrat e deputetëve, punën e komisioneve parlamentare dhe kodin e mirësjelljes së tyre.

 

 

Kryesia e parlamentit vendosi që në seancën e radhës së Kuvendit, të debatohet për çështjen e sigurisë në Kosovë

 

Prishtinë, 9 janar 2003 - Kryesia e parlamentit të Kosovës vendosi sot që në seancën e radhës së Kuvendit, si pikë e veçantë e rendit të ditës të jetë çështja e sigurisë në Kosovë. Këtë kërkesë e bëri shefi i Grupit Parlamentar të LDK-së Sabri Hamiti në seancën e sotme të Kuvendit të Kosovës.

 

Me këtë kërkesë janë pajtuar edhe grupet parlamentare të PDK-së dhe AAK-së. Pritet që për këtë çështje deputetët të debatojnë në seancën e së enjtës së ardhshme.

 

 

Qytetarët kërkojnë kompensim për pronat ku është vendor KFOR-i, por ende mungon pergjegjja pozitive

 

Gjilan, 9 janar 2003 (QIK) - As takimi i katërt me radhë ndërmjet KFOR-it dhe pronarëve të tokave në Gjilan, të cilat shfrytëzohen nga kampi "Montith" nuk solli ndonjë rezultat konkret.

 

Përgjegjja që sollën ushtarakët amerikanë, në këtë takim të ndërmjetësuar nga administratori i UNMIK-ut, Bob Simons dhe ku ishin të pranishëm edhe drejtori i gjeodezisë, kadastrit dhe pronës, Abdullah Ismajli si dhe zyrtarë të UNMIK-ut dhe institucioneve tjera ndërkombëtare e vendore, ishte e shkurtër.

 

"Gjenerali ynë në Shtutgard, që është përgjegjës për këtë çështje, ende nuk ka marrë ndonjë vendim", ka thënë avokati i KFOR-it në kampin "Bondstill", kapiteni Mur, ndërsa ka sqaruar se autoritetet më të larta ushtrisë amerikane janë duke punuar për të gjetur një zgjidhje konkrete dhe adekuate për kompensim të pronave në Kosovë, të cilat, nga qershori 1999, janë shndërruar në "territor" të KFOR-it.

Në të vërtet, duket se ende ka moskuptim në faktin se kush është i obliguar ta bëjë kompensimin për pronat në Kosovë, KFOR-i apo Kombet e Bashkuara, të cilat i kanë dhënë atij mandatin për të mbështetur rëvinien e një procesi të paqes së qëndrueshme në Kosovë.

Palët e dëmtara kanë angazhuar në këtë proces edhe avokaten nga Prishtina, Nekibe Kelmendin, e cila tha se zgjidhjen e këtij problemi duhet kërkuar në prizmin e sisemit ligjor për pronat.

 

Ajo tha se është e vetëdijshme se interes fundamental për qytetarët e Kosovës është prania e KFOR-it dhe siguria për të cilën kujdesen paqeruajtësit këtu, por edhe pronat janë të shenjta dhe askush nuk mund të pengohet në shfrytëzimin e lirë të tyre, sepse ato kanë qenë burime të ekzistencës familjare për shumicën e këtyre pronarëve.

Ndërkaq, administratori Bob Simons mendon se hapi i parë është që të bindet KFOR-i për të bërë kompensim, sepse, sipas një marrëveshjeje tekniko-ushtarake, KFOR-i ka të drejtë të mos kompensojë askë për pronën ku është vendosur. Ai ka shprehur keqardhje që ky problem nuk është zgjidhur as pas tri e më shumë vitesh.

Duke shpresuar se KFOR-i po angazhohet që të gjejë një zgjidhje unike për kompensim të pronave në Kosovë, në të gjithë sektorët, kryetari i komunës, Lutfi Haziri, tha se edhe ai përkrah kërkesat e qytetarëve për një kompensim real, që duhet të realizohet, jo duke u konfrontuar me KFOR-in, por përmes bisedave dhe në një rrugë normale.

 

 

B. Fleçer shpreson se së shpejti do të arrestohen vrasësit e Zemajve nëse ata janë në Kosovë!

 

Prishtinë, 9 janar 2003 - Rasti i vrasjes së Zemajve në Pejë ndryshon nga atentatet e tjera në Kosovë dhe ky ishte një atentat i planfikuar mirë. Vrasja ka ndodhur në rrethana të atilla që shumë pak njerëz kanë mundur të shohin se çfarë në të vërtetë ka ndodhur, deklaroi për radion Blu skaj zëdhënësi i policisë së UNMIK-ut Beri Fleçer.

 

Por një numër dëshmitarësh kanë dhënë informata të ndryshme për vrasjen që ndodhi në këtë qytet. "Ne kemi mjaft informata për armët që janë përdorur, për makinat, për drejtimin të cilin kanë ikur të dyshuarit. Jemi duke mbledhur informata dhe shpresojmë se së shpejti do t'i zbulojmë dhe do t'i arrestojmë vrasësit nëse ata janë në Kosovë", tha Fleçer.

 

Ai ka shtuar se atentatet e fundit nuk janë kërcënim i sigurisë së popullatës në Kosovë dhe sipas tij në përgjithësi njerëzit të cilët janë në shënjestren e këtyre atentateve e dinë mënyrën e jetës së tyre, duke shtuar se personat në fjalë nuk kanë kërkuar kurrë mbrojtje nga policia.

 

 

Administrata e UNMIK-ut ka filluar edhe zyrtarisht punën në pjesën veriore të Mitrovicës

 

Mitrovicë, 9 janar 2003 - Administrata e UNMIK-ut ka filluar edhe zyrtarisht punën në pjesën veriore të Mitrovicës me staf të kompletuar, kanë njoftuar burimet e Misionit të OKB-së në këtë qytet.

 

Faza e parë e punësimit gati është kompletuar, ngase 54 punëtorë lokalë kanë nënshkruar kontratat dhe kanë filluar punën së bashku me ndërkombëtarët, ka thënë zëdhënësi i UNMIK-ut në Mitrovicë, Xhorxhi Kakuk.

 

Sipas tij për dhjetë vendet e punës konkursi do të përsëritet për shkak se nuk janë gjetur njerëz të duhur për ato poste. Zyrtarët e UNMIK-ut përsëriten edhe njëherë se nuk bëhet fjalë për ndarjen e Mitrovicës, por për administrim të veriut nga Misioni i OKB-së.

 

 

Bordi i UP nuk mori dje vendim për vendim për zgjedhjen e dekanëve të fakulteteve, por atë do ta bëjë sot

 

Prishtinë, 9 janar 2003 - Përkundër paralajmërimit për zgjedhjen e dekanëve të fakulteteve të Universitetit të Prishtinës, bordi i tij në takimin e djeshëm nuk mori asnjë vendim lidhur me këtë çështje, për arsye të mospranisë të disa anëtarëve në këtë takim.

Ministria e Arsimit ka kërkuar që të mos bëhet zgjedhja e dekanëve përpara se të aprovohet ligji për arsimin e lartë.

Mirëpo, në takimin e sotëm të bordit të UP-së pritet votimi për kandidatët për dekanë të fakulteteve të propozuar nga Senati i Universitetit.

 

 

Franca dënon ashpër aktet hakmarrëse të cilat nuk e kanë vendin në një Kosovë moderne dhe demokratike

 

Paris, 9 janar 2003 - Ministria e Punëve të Jashtme e Francës ka dënuar ashpër aktet hakmarrëse për qërimin e hesapeve të cilat nuk e kanë vendin në një Kosovë moderne dhe demokratike. Franca u bën apel të gjitha institucioneve autonome të përkrahin UNMIK-un dhe KFOR-in të angazhohen me vendosmëri kundër krimit të organizuar dhe të marrin përgjegjësi për kompetencat dhe punën e tyre për t'u afruar me normat evropiane, thuhet në fund të komunikatës së Ministrisë së Punëve të Jashtme të Francës.

 

 

Sot në Prishtinë organizohet një protestë paqësore gjithëpopullore

 

Prishtinë, 9 janar 2003 - Sot në Prishtinë, para Teatrit Kombëtar mbahet një protestë paqësore gjithëpopullore me moton "Stop vrasjeve politike". Kjo protestë mbahet me rastin e vrasjes së kryetarit të Degës së Forumit të Rinisë së LDK-së në Deçan, Hasan Zemajt, kolonel Tahir Zemajt e të birit të tij Enisit, e të cilën e organizon Forumi i Rinisë së LDK-së në Deçan. Protesta fillon në orën 13.00.

 

 

Gjukanoviq deklaroi se statusi i Kosovës duhet të zgjidhet sa më parë

 

Podgoricë, 9 janar 2003 - Kryeministri i sapozgjedhur malazez Milo Gjukanoviq deklaroi se statusi i Kosovës duhet të zgjidhet sa më parë. Ai vlerësoi se pa nevojë është vonuar me definimin e statusit përfundimtar të Kosovës, duke theksuar se duhet zgjidhur sa më parë këtë çështje.

Gjukanoviq pastaj ka theksuar se duhet definuar statuesi kushtetues e juridik i Kosovës që të mund të thuhet se është zgjidhur edhe problemi i fundit në rajon. Ai ka shtuar se Ballkani sa i përket sigurisë është sanuar në mënyrë afatgjate.

 

 

Koalicioni serb "Kthimi" ende nuk ka marrë vendim për ndërprerjen e bojkotit në Kuvendin e Kosovës

 

Beograd, 9 janar 2003 - Deputetët e koalicionit serb "Kthimi" në Kuvendin e Kosovës gjatë ditës së djeshme në Beograd u takuan me presidentin jugosllav Koshtunica, me patrikun Pavle dhe me përfaqësues të qeverisë serbe.

 

Në këtë takim u bisedua për pozitën e koalicionit "Kthimi" në Kuvendin e Kosovës. Megjithatë, ende nuk është marrë ndonjë vendim për ndërprerjen e bojkotit të pjesëmarrjes në Kuvendin e Kosovës. Deputetët serbë sot pritet që të takohen dhe me kryeministrin Gjingjiq.

 

 

Sipas të dhënave jozyrtare në duart e qytetarëve të Maqedonisë janë rreth 600 mijë armë

 

Shkup, 9 janar 2003 - Ministria e Brendshme dhe ajo e Mbrotjes maqedonase vlerësojnë se sipas të dhënave jozyrtare në duart e qytetarëve janë rreth 600 mijë armë. Qeveria e Shkupit në bashkëpunim me bashkësinë ndërkombëtare në gjashtë muajt e parë të këtij viti planifikon realizimin e projektit Kontrolli i armatimit të lehtë në Maqedoni. Fillimisht pritet hartimi i ligjit për amnistinë për dorëzimin vullnetar të armëve.

 

 

NATO-ja ia dorëzon misionin paqeruajtës që drejton në Bosnjë Bashkimit Evropian në vitin 2004

 

Bruksel, 9 janar 2003 - NATO-ja mund t’i dorëzojë misionin paqeruajtës që drejton në Bosnjë Bashkimit Evropian në fillim të vitit 2004, nëse misioni i BE-së në Maqedoni tregohet i suksesshëm. Kjo është bërë e ditur nga burime të NATO-s në Bruksel.

Misioni i Bashkimit në Maqedoni pritet të fillojë muajin tjetër. Ndërkaq në takimin e dhjetorit në Kopenhagë, Bashkimi Evropian ka ofruar 17 mijë trupa për të zëvendësuar ato të NATO-s në Bosnjë.

 

 

Është arrestuar një veprimtar veteran i demokracisë kineze nën akuzën e subversionit

 

Shangaj, 9 janar 2003 – Një veprimtar veteran i demokracisë kineze, i cili kohë më parë me një peticion me nënshkrime kishte bërë thirrje për lirimin e aktivistëve të tjerë të burgosur, është arrestuar tinëzisht nën akuzën e subversionit, kanë bërë të ditur sot (të enjten) familjarët dhe një grup i të drejtave të njeriut në Njujork, njofton UPI.

Veprimtari demokrat Han Lifa, që është figurë e shquar e lëvizjes për demokraci në Kinë, është arrestuar më 26 dhjetor të vitit të kaluar në Shangaj, kanë thënë familjarët me kusht anonimiteti për shkaqe sigurie. Njoftohet gjithashtu se z. Han është anëtari i shtatë i arrestuar nga grupi 192 veprimtarëve, të cilët në nëntorin e kaluar para Kongresit të Partisë Kineze, me një letër kishin kërkuar më shumë kërkesa për reforma demokratike.

 

 

Dy aeroplanë luftarakë turq janë përplasur në ajër në provincën juglindore Malatva të Turqisë

 

Ankara, 9 janar 2003 – Dy aeroplanë luftarakë turq janë përplasur në ajër në provincën juglindore Malatva të Turqisë, njofton BBC World. Sipas njoftimeve të pakonfirmuara të katër pjesëtarët e ekuipazhit kanë humbur jetën në këtë aksident.

 

Të dy aeroplanët kanë qenë të tipit luftarak F-4 dhe pësuan gjatë fluturimeve stërvitëse. Aksidenti ka ndodhur vetëm disa orë pas aksidentit ajror të një aeroplani udhëtarësh në Xharbakir në të njëjtin rajon, ku vdiqën 75 vetë.

 

 

Forcat izraelite kanë vrarë tre palestinezë

 

Nablus, Bregu Perendimor – Izraeli ka thënë se trupat e tij kanë vrarë sot (të enjten) një komandos të një grupi të armatosur palestinez, i infiltruar në vend, vetëm disa orë pasi kishin vrarë dy palestinezë të tjerë gjatë shtimit të masave pas bombardimit vetëvrasës në Telaviv, njofton AFP.

 

 

Koreja e Veriut është pajtuar të zhvillojë bisedime me Qeverinë e Koresë së Jugut

 

Phenian, 9 janar 2003 – Koreja e Veriut është pajtuar të zhvillojë bisedime me Qeverinë e Koresë së Jugut, dhe Seuli ka thënë se do të bëjë trysni në Veriun lidhur me programin bërthamor. Takimi do të jetë më i riu në serinë e takimeve të afrimit ndërmjet dy vendeve që nga takimi i tyre historik në vitin 2000. Takimi do të jetë në nivel të ministrave dhe i pari që kur Koreja e Veriut ka riaktivizuar prodhimin bërthamor.

 

 

Aksident i rëndë ajror në Turqi, vdesin 75 pasagjerë

 

Ankara, 9 janar 2003 - Një avion i kompanisë Turkish Airlines u rrëzua të mërkurën në juglindje të Turqisë ku gjetën vdekjen rreth 75 nga pasagjerët që udhëtonin në bordin e tij. Avioni, i cili kryente fluturime brenda vendit dhe ishte nisur nga Stambolli u përfshi nga flakët pak përpara se të prekte pistën e aeroportit të Diarbakirit.

 

Ndër dëshmitë e para menjëherë pas aksidentit ishte ajo e një gruaje, e cila nga shpërthimi kishte përfundur mbi një mullar me bar. Gruaja u tha gazetarëve se kishte parë të paktën dy të mbijetuar nga aksidenti.

Ndërsa sipas dëshmisë së një tjetri pasagjer që i mbijetoi fatkeqësisë, avioni i kompanisë Turkish Airlines u këput në mes kur ra në kontakt me tokën dhe u kaplua menjëherë nga flakët. Autoritetet turke e përjashtuan që në fillim mundësinë e një akti sabotazhi.

 

 

Një mision diplomatik i Bashkimit Evropian do të vizitojë një numër vendesh arabe

 

Bagdad, 9 janar 2003 - Një mision diplomatik i Bashkimit Evropian, i drejtuar nga Ministri i Jashtëm grek, Georg Papandreu, vendi i të cilit ka kryesinë e radhës të BE-së, do të vizitojë një numër vendesh arabe, për të mënjanuar luftën e mundshme me Irakun. Mendohet se misioni do fillojë në muajin shkurt.
Me këtë rast Papndreu sqaroi se në në mesin e përparësive të Bashkimit Evropian janë dhe çështjet që lidhen me konfliktin në Lindjen e Mesme si dhe me rajonin parë më në gjerësi.

 

 

Në Poloni nga fillimi i dimrit kanë vdekur si pasojë e motit 230 vetë

 

Varshavë, 9 janar 2003 - Si pasojë e motit të keq në një numër vendesh në Evropë, sot është ndërprerë trafiku rrugor, hekurudhor dhe ai nga ajri si dhe ka pasur një numër viktimash. Autoritetet në vendet skandinave dhe Rusi pohojnë se mbi 40 anije kanë mbetur të bllokuara në ujrat e ngrira. Në Poloni nga fillimi i dimrit kanë vdekur si pasojë e motit 230 vetë.

 

   

Në një aksident ajror në Karolinën e Veriut kanw humbur jetën 21 udhëtarë

 

Uashington, 9 janar 2003 - Një aeroplan udhëtarësh ka pësuar aksident në shtetin amerikan të Karolinës së Veriut, duke shkaktuar vdekjen e 21 personave. Aksidenti ka ndodhur si pasojë e problemeve teknike.

 

 

Korea e Veriut i akuzoi SHBA për rritje të rrezikut të luftës në gadishullin korean

 

Phenian, 9 janar 2003 - Koreja e Veriut i akuzoi SHBA për rritje të rrezikut të luftës në Gadishullin korean. Në një njoftim të agjencisë zyrtare koreanoveriore të lajmeve KCNA thuhet se problemi bërthamor është produkt i strategjisë amerikane për të zotëruar botën. Sipas tij SHBA kanë vendosur armë të shumta bërthamore në Korenë e Jugut e përreth saj.

 

Shtëpia e Bardhë kishte deklaruar më parë se tani është në dorën e Koresë së Veriut që të bëjë hapin tjetër nëse kjo kërkon dialog. SHBA hoqën dorë në këtë mënyrë nga kërkesa që para bisedimeve vendi komunist të merrte mbrapsht masat në lidhje me programin bërthamor.

 

 

Izraeli nuk heq dorë nga ndalimi i udhëtimit për të dërguarit palestinez në një konferencë në Londër

 

Jerusalem, 9 janar 2003 - Pavarësisht nga thirrjet e Bashkimit Evropian Izraeli nuk po heq dorë nga ndalimi i udhëtimit për të dërguarit palestinezë në një konferencë në Londër. BE-ja e pati kritikuar si dritëshkurtër vendimin e Izraelit, i cili u godit nga dy atentate vetëvrasëse në të cilat humbën jetën 22 vetë.

 

Në konferencën e organizuar nga kryeministri britanik Bler do të zhvillohen konsultime për reformën në administratën autonome palestineze. Ministri i Jashtëm izraelit Benjamin Netanjahu ritheksoi qëllimin e tij për të nxjerrë jashtë territoreve të pushtuara nga Izraeli presidentin palestinez Jaser Arafat.

Copyright©2000-2003 Trepca.net - Të gjitha të  drejtat e rezervuara.