Lajme

E mërkure, 8 janar 2003

Përmbajtja:

• Janë demoluar e plaçkitur lokalet e «Rilindjes» në Pallatin e Rilindjes

• Kryetari i Kuvendit, Nexhat Daci, priti shefin e OSBE-së Paskal Fieski

• Kryetari i ASHAK-ut u prit nga kryetari i Kuvendit të Kosovës

• Mërgimtarët e Zvicrës ndihmuan 30 familje bonjakësh në Llap

• LDK në Gjermani: Vrasja e trefishtë në Pejë, grusht i rëndë për pavarësinë e Kosovës

• Të reshurat e pandërprera të shiut kanë shkaktuar vërshime në shumë pjesë të qytetit të Pejës

• Në varrezat e Prishtinës dje u varros me nderime prof. Ruzhdi Kastrati dekan i Fakultetit të Edukimit

• Me rastin e Krishtlindjeve ortodokse kryeadministratori i Kosovës Shtajner dje ka vizituar Graçanicën

• Senati i UP zgjodhi dje bordin e ri në kundërshtim me Ministrinë e Arsimit

• Autoritetet e komunës së Prishtinës kanë vazhduar aksionin për rrënimin e ndërtimeve pa leje

• Presidenti polak dekoroi ambasadorin shqiptar në Varshavë prof.Dr.Osman Krajën

• Nesër viziton Tiranën ministrja e Jashtme e Maqedonisë, Mitreva

• Në armatën e Maqedonisë përpos gjuhës maqedonase është paraparë të flitet edhe gjuha shqipe

• Filloi tërheqja e pajisjeve ushtarake të NATO-s nga Maqedonia

• Masa të reja për azilin në Britani

• Prindërit e foshnjes gjoja të klonuar i kanë ndërprerë testet

• Sekretari britanik i Mbrojtjes kërkon bashkëpunim ushtarak me Turqinë në luftën me Irakun

• Ushtria amerikane ka aktivizuar qetas Shtabin e ri të përgjithshëm në Katar

• Trupat izraelite kanë vrarë sot dy palestinezë në Bregun Perendimor dhe në Rripin e Gazës

• Anan kërkon përmbajtje nga palestinezët dhe izraelitët

• Bush ka propozuar shkurtim taksash federale për amerikanët gjatë 10 viteve të ardhëshme

• Ramsfeld: Iraku nuk u përmbahet kërkesave të Kombeve të Bashkuara

• Janë takuar ekspertë juridikë që përfaqësojnë grekët dhe turqit qipriotë

• Bush: Rrethana të ndryshme kërkojnë zbatimin e strategjive të ndryshme

• Arrestohen 6 algjerianë në Londër

• Masa të reja për azilin në Britani

Janë demoluar e plaçkitur lokalet e «Rilindjes» në Pallatin e Rilindjes

 

Prishtinë, 8 janar 2003 - Lokalet e gazetës «Rilindja» dhe të Radio-Rilindjes, në katet 3, 4 e 5 të Pallatit të Rilindjes, janë demoluar e plaçkitur. Kjo ka ndodhur brenda periudhës rreth 6-muajore, pas mbylljes së hyrjeve të Pallatit me grila nga ana e administratorit dhe pamundësimit të hyrjes në këto lokale të punonjësve të «Rilindjes».

Kjo gjendje u pa sot pasi Zyra e administratorit, në praninë e një zyrtareje të saj, mundësoi hyrjen e përfaqësuesve të «Rilindjes» në Pallat. Për këtë u njoftua policia menjëherë nga përgjegjësit e «Rilindjes» dhe ajo ka ardhur në vendin e ngjarjes.

Dëmet materiale nuk janë vlerësuar ende, por mendohet se mund të jenë deri në qindra mijëra euro, varësisht nga shkalla e dëmtimit të stabilimenteve të Radios dhe sistemit të kompjuterëve, shumë prej të cilëve nuk janë në zyrat ku ishin. Të pazëvendësueshme janë dëmtimet e arkivit, dokumentacionit, të «Rilinjes».

Paisjet dhe mjetet e punës së «Rilindjes» kanë mbetur në lokalet e veta në Pallat në pritje të një zgjidhje alternative për lokalin, që e kemi kërkuar dhe na është premtuar nga autoritetet.

Gazeta «Rilindja» dhe Radio-Rilindja kanë ndërprerë detyrimisht punën më 21 shkurt 2002 për shkak se Pallati i Rilindjes është marrë për t'u shndërruar në ndërtesë qeveritare, thuhet në një njoftim të Këshilit Drejtues të kësaj gazete.

 

 

Kryetari i Kuvendit, Nexhat Daci, priti shefin e OSBE-së Paskal Fieski

 

Prishtinë, 8 janar 2003 - Kryetari i Kuvendit të Kosovës, Nexhat Daci priti sot Paskal Fieskin, shef i Misionit të OSBE-së në Kosovë. Takimin me kryetarin e Kuvendit të Kosovës, zoti Fieski e quajti shumë të mirë dhe të mbarë. "Biseduam për të gjitha çështjet, si dhe për kthimin e Grupit parlamentar serb në Kuvendin e Kosovës", tha Fieski, pas takimit gati njëorësh me z.Daci, i cili nuk është prononcuar për media.

Shefi i OSBE-së përjashtoi mundësinë që një nga çështjet e diskutueshme në takim të ishte edhe raporti i monitorimit të punës së Kuvendit nga ana e OSBE-së. "Nuk kemi biseduar për asnjë raport monitorimi", tha Fieski.

 

 

Kryetari i ASHAK-ut u prit nga kryetari i Kuvendit të Kosovës

 

Prishtinë, 8 janar 2003 - Kryetari i Akademisë së Shkencave dhe të Arteve të Kosovës, (ASHK) akademik Rexhep Ismajli u prit sot nga Kryetari i Kuvendit të Kososvës Nexhat Daci.

Pas takimit zoti Ismajli tha se Akademi do të përkrahë parezervë institucionet e Kosovës në realizimin e programeve të tyre. "Në suaza të mundësive që kemi do të bëjmë gjithçka ç'është e mundur për të përkrahur programet e institucioneve të Kosovës", tha akad. Ismajli.

Ndërkaq Nexhat Daci tha se kishte dëshirë personale që me zotin Ismajli të shenonte fillimin e takimeve zyrtare për këtë vit, duke treguar respektin për institucionin më të lartë shkencor e kulturor të një vendi. Ai tha se takimi është mbajtur me qëllim që të shihet se si Akademia gjatë kësaj faze mund ta ndihmojë Kuvendin e Kosovës.

Akad. Ismaili premtoi se Akademia do të jetë e gatshme dhe e hapur për bashkëpunim.

Akademia e Shkencave dhe e Arteve e Kosovës është njëri nga institucionet që i vuri themelet e pavarësimit të Kosovës, me hartimin e Deklaratës Kushtetuese të Kosovës dhe po anëtarë të Akademisë kanë qenë dhe janë ideolog të lëvizjes për pavarësimin e Kosovës.

 

 

Mërgimtarët e Zvicrës ndihmuan 30 familje bonjakësh në Llap

 

Podujevë, 8 janar 2003 – Qerim Iseni ka sjellë nga Zvicra 6 mijë franka për 30 familje që rrisin jetimë në komunën e Podujevës. Mjetet materiale janë grumbulluar me inicitiavën e klubit islamik në Bozen, kurse z. Qerim Iseni në bashkëpunim me Bashkësinë Islame të Kosovës ka shpërndarë këto mjete në familjet e shumta që rrisin bonjakë në Kosovë.

Kjo ndihmë aktuale për këto familje llapjane nga Fondi Bonjakët e Kosovës ka zbutur pak gjendjen e rëndë materiale të fëmijëve jetimë.

 

 

LDK në Gjermani: Vrasja e trefishtë në Pejë, grusht i rëndë për pavarësinë e Kosovës

 

Shtutgard, 8 janar 2003 - Vrasja e kolonel Tahir Zemajt, ish-komandant i UÇK-së për ZO të Dukagjinit, të birit të tij Enisit dhe Hasan Zemajt, kryetar i FR të LDK-së në Deçan goditi rëndë Degën e LDK-së në Gjermani, anëtarësinë dhe simpatizuesit e saj dhe të gjithë ata që përkrahin vijën institucioanle të shtetit të Kosovës.

Në një reagim të Kryesisë së kësaj dege thuhet se "vrasja e kolonelit Tahir Zemaj u bë nga një dorë e zgjatur dhe e paguar nga forcat më të errëta kundërshqiptare". Më tutje në këtë reagim thuhet: "Si dorasi ashtu edhe porositësit e kësaj vrasjeje do të lënë të skuqur me dekada e shekuj pasardhësit e tyre nga të cilët përherë do të jetë i drejtuar gishti.

 

Këta janë ata që vrasin për një kafshatë bukë e këta janë ata që me vrasje dëshirojnë të nxijnë jetën e shqiptarëve të Kosovës duke sunduar mbi ta pa dëshirën e tyre... Kolonel Tahir Zemaj nuk i takonte partive politike edhepse, siç theksonte shpesh, kishte një simpati të madhe për LDK-në. I besonte ai LDK-së sepse mendonte se ajo është forca e vetme që mund të udhëheqë me Kosovën. Kolonel Tahir Zemaj kishte një vizion të qartë për të ardhmëbn e Kosovës jo vetëm tash në liri, por edhe atëherë kur dha betimin dhe rroku pushkën për çlirimin e saj".

Kryesia e Degës së LDK-së në Gjermani, në emër të gjithë anëtarësisë dhe simpatizuesve të saj, ngushëllonë familjen Zemaj, të gjitha institucionet e Kosovës, udhëheqësit e LDK-së së Kosovës e të Deçanit si dhe FR të LDK-ës së Kosovës e të Deçanit për humbjen që pësuan në këtë fillim viti.

 

 

Të reshurat e pandërprera të shiut kanë shkaktuar vërshime në shumë pjesë të qytetit të Pejës

 

Pejë, 8 janar 2003 - Të reshurat e shiut gjatë 24 orëve të fundit kanë përfshirë rajonin e Pejës. Ndërkaq në orët e paraditës së djeshme është vërejtur një rritje e nivelit të ujit që kishte dalë nga shtretërit e kanaleve. Me ndërhyrjen e ekipeve emergjente për rajonin e Dukagjinit gjendja është përmirësuar. Drejtuesi Drejtoratit të Komunës së Pejës për Emergjencë Gani Krasniqi deklaroi se është arritur të sanohet gjendja kritike që mbretëroi gjatë ditës së djeshme në disa pjesë të qytetit, ku disa lagje më tepër gjasonin në lumenj të vërtetë.

 

 

Në varrezat e Prishtinës dje u varros me nderime prof. Ruzhdi Kastrati dekan i Fakultetit të Edukimit

 

Prishtinë, 8 janar 2003 - Në Prishtinë dje u varros me nderime prof. Ruzhdi Kastrati, dekan i Fakultetit të Edukimit të Universitetit të Prishtinës, i cili vdiq pardje në moshën 60-vjeçare.

 

Në përcjelljen e fundit të profesor Kastratit morën pjesë shumë të afërm, miq, bashkëpunëtorë dhe studentë të tij. Në mbledhjen komemorative u vlerësua lart kontributi i tij 35-vjeçar në procesin mësimor.

Vdekja e papritur e gjeti pardje në detyrën e dekanit në Fakultetin e Edukimit në ligjeratën e tij të parë me studentë të këtij fakulteti.

 

 

Me rastin e Krishtlindjeve ortodokse kryeadministratori i Kosovës Shtajner dje ka vizituar Graçanicën

 

Prishtinë-Graçanicë, 8 janar 2003 - Me rastin e Krishtlindjeve ortodokse kryeadministratori i Kosovës Mihael Shtajner dje ka vizituar Graçanicën për t'i uruar për këtë festë banorëve serbë.

 

Ai tha se ka shkuar atje që t'i bashkohet ceremonisë së Krishtlindjeve dhe të dëgjojë mesazhin për një shpresë të re dhe pajtim për të gjithë njerëzit në Kosovë, ka thënë kryeadministratori i Kosovës Shtajner gjatë shërbesave në kishën serbe të Graçanicës.

Në këtë manifestim fetar në Graçanicë ishte edhe komandanti i forcave paqeruajtëse të KFOR-it Fabio Mini.

 

 

Senati i UP zgjodhi dje bordin e ri në kundërshtim me Ministrinë e Arsimit

 

Prishtinë, 8 janar 2003 - Senati i Universitetit të Prishtinës zgjodhi dje bordin e ri të këtij institucioni. Ndërkaq sot pritet të zgjedhen edhe dekanët e fakulteteve të këtij universiteti. Ministria e Arsimit, e Shkencës dhe Teknologjisë, kohë më parë me anë të një urdhërese pati shtyrë çdo zgjedhje në universitet deri më 15 qershor të këtij viti, në pritje të nënshkrimit të ligjit të arsimit të lartë nga kryeadministratori Shtajner.

 

 

Autoritetet e komunës së Prishtinës kanë vazhduar aksionin për rrënimin e ndërtimeve pa leje

 

Prishtinë, 8 janar 2003 - Autoritetet e komunës së Prishtinës kanë vazhduar aksionin për rrënimin e ndërtimeve pa leje. Në këtë qytet dje u rrënua edhe një objekt i mbindërtuar, ndërkohë që zyrtarët komunalë paralajmërojnë ndërprerjen e kaosit urbanistik në kryeqytet.

"Në vitin që sapo hyjmë në Prishtinë janë rrënuar katër mbindërtime të egra. Një mbindërtim u rrënua dje në qendër të Prishtinës. Viti 2003 do të jetë vendimtar do t'i japë fund ndërtimeve pa leje dhe kaosit urban në Prishtinë", deklaroi zëdhënësi i komunës së Prishtinës Veli Bytyçi. Ai bëri të ditur se gjatë vitit të kaluar janë regjistruar 285 ndërtime të egra.

 

 

Presidenti polak dekoroi ambasadorin shqiptar në Varshavë prof.Dr.Osman Krajën

 

Varshavë, 8 janar 2003 - Presidenti i Republikës së Polonisë, Alesandër Kwasnievski, dekoroi me rastin e përfundimit të misionit të tij në Varshavë Ambasadorin e Republikës së Shqipërisë, Prof. Dr. Osman Kraja me urdhërin "Kryqi Komandor i Urdhërit të meritave ndaj Republikës së Polonisë" me motivacionin "për merita të shquara në zhvillimin e bashkëpunimit polako-shqiptar".

Kjo është dekorata më e lartë që mund t'u akordohet shtetasve të huaj nga Presidenti i Polonisë.

Prof. Dr. Osman Kraja ka qenë Ambasador i Shqipërisë në Poloni që nga nëntori 1997 deri në dhjetor 2002. Njëkohësisht ai ka përfaqësuar Shqipërinë si ambasador jo rezident ne Ukrainë, Lituani, Letoni dhe Estoni.

Gjithashtu me rastin e përfundimit të misionit në Varshavë, Senati i Universitetit të Varshavës i ka dhënë Prof. Dr. Osman Krajës "Medaljen e Universitetit" me motivacionin "për vlerësim të bashkëpunimit të frytshëm shumëvjeçar me Universitetin e Varshavës".

 

 

Nesër viziton Tiranën ministrja e Jashtme e Maqedonisë, Mitreva

 

Tiranë, 8 janar 2003 - Nesër vjen për një vizitë njëditore në Tiranë Ministrja e Punëve të Jashtme te Maqedonisë, Ilinka Mitreva, gjatë së cilës ajo do te ketë nje numër takimesh me zyrtarët më të lartë shqiptarë.

 

Mitreva do të zhvillojë në Tiranë një takim me me Zv/Kryeministrin dhe Ministër i Punëve të Jashtme, Ilir Meta. Poasho zonja Mitreva do të takohet edhe me Kryetarin e Kuvendit, Servet Pëllumbi, me Presidentin e Republikës Alfred Moisiu dhe me Kryeministrin, Fatos Nano.

 

 

Në armatën e Maqedonisë përpos gjuhës maqedonase është paraparë të flitet edhe gjuha shqipe

 

Shkup, 8 janar 2003 - Qeveria maqedonase në mbledhjen e fundit miratoi ndryshimet dhe plotësimet në ligjin e mbrojtjes dhe të shërbimit të afatit ushtarak. Ministri i Mbrojtjes i Maqedonisë Vllado Buçkovski deklaroi se me ndryshimin e këtij ligji zvoglohet kohëzgjatja e shërbimit të detyruar ushtarak nga nëntë në gjashtë muaj.

 

Ky vendim hyri në fuqi prej dje dhe do të vlejë për ata persona të cilët në shërbimin ushtarak shkojnë edhe gjatë këtij muaji. Ministri maqedonas ka theksuar se ky vendim i qeverisë pritet të miratohet brenda këtyre muajve edhe nga Parlamenti i Maqedonisë. Prej këtij viti në armatën e Maqedonisë përpos gjuhës maqedonase është paraparë të flitet edhe gjuha shqipe.

 

 

Filloi tërheqja e pajisjeve ushtarake të NATO-s nga Maqedonia

 

Shkup, 8 janar 2003 - Zëdhënësi i NATO-s në Shkup thotë se tërheqja e pajisjeve ushtarake është rutinore dhe bëhet fjalë për pajisje që janë përdorur nga Misioni i mëparshëm i NATO-s "Dhelpëra e kuqërremtë" që kishte për qëllim vëzhgimin e gjendjes së sigurisë dhe vëzhguesve të OSBE-së para dhe gjatë zgjedhjeve parlamentare 15 shtatorit.

 

Ai tha se gjithçka që ka mbetur nga misioni i NATO-s "Dhelpëra e kuqërremtë" është grumbulluar dhe tërhiqet nga Maqedonia. Pajisjet ushtarake nga baza "Bunarxhik" me konvoj ushtarak do të drejtohen në Greqi për në postin e Selanikut, thotë zëdhënësi i Retklif.

Më 15 dhjetor në Maqedoni ka filluar misioni i ri i koduar "Harmonia e Aleancës" i cili parasheh më pak ushtarë dhe pajisje dhe siç thuhet nga përfaqësia e Aleancës në Shkup do të ketë edhe karakter këshillues.

 

 

Masa të reja për azilin në Britani

 

Londër, 8 janar 2003 - Të mërkurën në Britani kanë hyrë në fuqi masa të reja të imigracionit, të cilat kërkojnë që personat që duan të kërkojnë azil, duhet ta bëjnë këtë sapo të mbërrijnë në vend, ose sa më shpejt që të jetë e mundur.

Ata që nuk do të paraqesin kërkesë në rastin më të parë, mund të kthehen mbrapsht ose nuk përfitojnë asnjë ndihmë nga shteti.

Ministrja për Imigracionin në Ministrinë e Brëndshme, Beverli Hjuz, tha se ishte e paparanueshme që disa persona të kërkonin azil pasi kishin punuar ilegalisht në Britani për disa javë apo muaj, njofton BBC. Ajo tha se kishte një dallim të qartë mes emigrantëve ekonomikë dhe atyre që largoheshin nga vendi për t'i shpëtuar persekutimit.

 

 

Prindërit e foshnjes gjoja të klonuar i kanë ndërprerë testet

 

Florida, 8 janar 2003 - Prindërit e foshnjes, për të cilën thuhej se ishte qenia e parë njerëzore e klonuar në botë, i kanë ndërprerë testet, që do të provonin nëse pohimi i tyre është i vërtetë.

 

Kompania amerikane e klonimit "Clonaid" ka deklaruar se prindërit kanë vendosur të refuzojnë testin derisa t'u garantohet se foshnja Eva, nuk do t'u merret.

 

Avokatët në Florida kanë kërkuar nga gjykata të vënë Evën nën mbrojtjen e gjyqit. Po kështu, gazetarët, që merreshin me verifikimin në ishte e klonuar Eva, i kanë ndërprerë hulumtimet me motivacion se kjo mund të ishte një shaka.

 

 

Sekretari britanik i Mbrojtjes kërkon bashkëpunim ushtarak me Turqinë në luftën me Irakun

 

Ankara, 8 janar 2003 – Sekretari britanik i Mbrojtjes, Xhef Hun, ka kërkuar bashkëpunim ushtarak me Turqinë përkundër rezervave të saj ndaj luftës së mundshme me Irakun, të udhëhequr nga amerikanët.

Në një konferencë shtypi, z.Hun ka thënë se ka diskutuar "vështirësitë aktuale" me homologun e tij turk, Vexhdi Gonul, por ka refuzuar të jepë detajet. Z. Hun është zyrtari i fundit, që ka vizituar Ankaranë për të nxitur Qeverinë turke për të krijuar lehtësitë ushtarake për aleatët e NATO-s.

 

 

Ushtria amerikane ka aktivizuar qetas Shtabin e ri të përgjithshëm në Katar

 

Ushington, 8 janar 2003 – Ushtria amerikane ka aktivizuar qetas Shtabin e ri të përgjithshëm në Katar, duke i dërguar atje planifikuesit e luftës nga Komanda e Shtabit të Përgjithshëm në Tampa, në funksion të përshpejtimit të përgatitjeve të luftës së mundshme me Irakun, kanë bërë të ditur zyrtarët amerikanë ushtarakë, njofton AFP.

Sekretari amerikan i Mbrojtjes, Donald Ramsfeld, ka thënë se forcat amerikane kanë vazhduar të dislokohen në rajon më qëllim që presidentit Bush t'i ofrohet opsioni i përdorimit të forcës ushtarake për të detyruar çarmatosjen e Irakut.

 

 

Trupat izraelite kanë vrarë sot dy palestinezë në Bregun Perendimor dhe në Rripin e Gazës

 

Gaza, 8 janar 2003 – Trupat izraelite kanë vrarë sot (të merkurën) dy palestinezë në Bregun Perendimor dhe në Rripin e Gazës gjatë kundërpërgjigjeve të armatës në sulmin vetëvrasës palestinez kur qenë vrarë 22 veta, bëjnë të ditur dëshmitarët, njofton Rojter.

 

Sipas dëshimitarëve okularë dhe mjekësorë palestinezë, viktima e parë është një palestinez 30-vjeçar, i cili është qëlluar në kokë derisa ushtarët e tjerë po shikonin dhe kështu është vrarë jashtë kolonisë ebraite Neve Dekelim në Rripin e Gazës.

Ndërkaq, në qytetin Saida të Bregurt Perendimor, afër Tulkarmit, po sipas këtyre dëshmitarëve, është vrarë 17-vjeçari Ahmed Ajaj, pasi më parë ushtarët izraelitë kishin rrënuar shtëpinë e tij.

 

Aramata izraelite ka thënë se trupat e saja kanë hapur zjarr në zonën, që janë sulmuar me granata, koktej molotovi dhe zjarr antitank, por nuk mund të konfiirtmopjnë se ushtarët kanë vrarë ndokë.

 

 

Anan kërkon përmbajtje nga palestinezët dhe izraelitët

 

Nju Jork, 8 janar 2003 - Sekretari i përgjithshëm i Kombeve të Bashkuara, Kofi Anan, u ka bërë thirrje militantëve palestinezë që të ndërprejnë sulmet e tyre ndaj izraelitëve. Tek Izraeli Anan apeloi që të reagojë më i përmbajtur ndaj atentateve palestineze.

 

Përmes një komunikate Sekretari i Përgjithshëm i Kombeve të Bashkuara përsëriti edhe njëherë qëndrimin e tij se sulmet terroriste me bomba janë të pajustifikuara.

 

Sulmet vetëm sa godasin rëndë çdo përpjekje për gjetjen e një zgjidhje paqësore në Lindjen e Mesme. Ndërkaq Izraeli me pak durim do të kontribonte në moseskalimin e dhunës në rajon, është shprehur Anan.

 

 

Bush ka propozuar shkurtim taksash federale për amerikanët gjatë 10 viteve të ardhëshme

 

Uashington, 8 janar 2003 - Presidenti i Shteteve të Bashkuara, Xhorxh Bush ka propozuar shkurtim taksash federale për amerikanët gjatë 10 viteve të ardhëshme në shumë prej 674 miliardë dollarësh.

 

Bush ka thënë se kjo pako do te ndihmojë ekonominë e dobësuar amerikane për të cilën tha se akoma është më e fuqishmja në botë. Aika thënë se pakoja e tij e masave “për rritje dhe punësim” do të inkurajojë gjithashtu shpenzime për konsum, do të nxisë investime që do të krijojnë vende pune dhe do të ndihmojë të papunët.

 

 

Ramsfeld: Iraku nuk u përmbahet kërkesave të Kombeve të Bashkuara

 

Uashington, 8 janar 2003 - Sekretari amerikan i Mbrojtjes, Donald Ramsfel, ka deklaruar se Iraku nuk u përmbahet kërkesave të Kombeve të Bashkuara që të spastrohet nga programet e supouara të armëve kimike, biologjike dhe bërthamore.

 

Ramsfeld ka theksuar se lufta e udhëhequr nga Shtetet e Bashkuara kundër Irakut "qartë nuk është e pashmangshme", por tha se përqëndrimi i trupave amerikane në Gjirin Persik do të vazhdojë.

 

 

Janë takuar ekspertë juridikë që përfaqësojnë grekët dhe turqit qipriotë

 

Nikozi, 8 janar 2003 - Dje janë takuar ekspertë juridikë që përfaqësojnë grekët dhe turqit qipriotë për hapjen e shtigjeve lidhur me riunifikimin e ishullit sipas një plani të Kombeve të Bashkuara që kërkon nga liderët e dy komuniteteve të arrijnë marrëveshje deri më 28 shkurt.

Plani i Kombeve të Bashkuara kërkon ribashkimin e Qipros para se të pranohet në Bashkimin Evropian pjesa greke e njohur ndërkombëtarisht.

 

 

Bush: Rrethana të ndryshme kërkojnë zbatimin e strategjive të ndryshme

 

Uashington, 8 janar 2003 - Presidenti Bush thotë se kur përballesh me kërcënime botërore, rrethana të ndryshme kërkojnë zbatimin e strategjive të ndryshme. Në një fjalim të mbajtur dje në qytetin e Çikagos, presidenti Bush diskutoi mbi dy prej kërcënimeve më serioze, atij të Koresë së Veriut dhe Irakut, si dhe qëndrimet e tij të ndryshme për zgjidhjen e tyre.

Duke folur për Korenë e Veriut, ku qeveria e atjeshme ka rihapur objekte që mund të përdoren për prodhimin e armëve bërthamore, presidenti tha se ai nuk ka ndonjë synim që të përdorë forcën ushtarake në atë që ai e konsideron si arenë të diplomacisë.

 

Përkundrazi, së bashku me Kinën, Japoninë dhe Korenë e Jugut, ai po përdorë një politikë të përbashkët për ta bindur Penianin që të ndalojë programin e tij të armëve bërthamore.

 

 

Arrestohen 6 algjerianë në Londër

 

Londër, 8 janar 2003 - Autoritetet e shëndetësisë në Britani kanë paralajmëruar spitalet dhe mjekët e klinikave që të jenë në gjendje gatishmërie pas arrestimit të disa personave të cilët duket se po përgatisnin armë biologjike në Londër.

 

Gjurmë të një helmi shumë të fuqishëm, ricinë, u zbuluan nga forcat speciale të policisë në një apartament në veri të Londrës të dielën.

 

Ricina mund të shkaktojë vdekje edhe kur merret me doza shumë të vogla. Ende nuk ka ndonjë antidotë që ta trajtojë. Gjashtë algjerianë janë marrë në pyetje nga policia.

 

Kryeministri Toni Bler tha se arrestimet e fundit tregonin se rreziku nga terrorizmi ishte i pranishëm dhe real. Ndërsa Ministri i Mbrojtjes, Gjef Hjun, tha se arrestimet përbënin një sukses të madh të forcave të sigurimit.

 

 

Masa të reja për azilin në Britani

 

Londër, 8 janar 2003 - Të mërkurën në Britani kanë hyrë në fuqi masa të reja të imigracionit, të cilat kërkojnë që personat që duan të kërkojnë azil, duhet ta bëjnë këtë sapo të mbërrijnë në vend, ose sa më shpejt që të jetë e mundur. Ata që nuk do të paraqesin kërkesë në rastin më të parë, mund të kthehen mbrapsht ose nuk përfitojnë asnjë ndihmë nga shteti.

 

Ministrja për Imigracionin në Ministrinë e Brëndshme, Biverli Hjuz tha se ishte e paparanueshme që disa persona të kërkonin azil pasi kishin punuar ilegalisht në Britani për disa javë apo muaj. Ajo tha se kishte një dallim të qartë mes emigrantëve ekonomikë dhe atyre që largoheshin nga vendi për t'i shpëtuar persekutimit.

Copyright©2000-2003 Trepca.net - Të gjitha të  drejtat e rezervuara.