Një dëshmi për vrasjen e kolonel Zemajt

- Klasa politike kosovare ka dënuar vrasjet në Pejë. Flet një prej dëshmitarëve të pranishëm

- Në vendngjarje ndodhej dhe një xhip me targa shqiptare dhe një “askona” që kanë bllokuar trafikun

Nga Peja Bashkim Shala  / SHEKULLI

PEJË - "Unë rastisa i pari në vendin e ngjarjes, pothuaj një a dy minuta, pasi kishte ndodhur vrasja”,- thotë për "Shekullin” një burim që dëshiron të mbetet anonim, i afërt me ngjarjen e mbrëmjes të së shtunës.

Ai po ashtu dëshmon se makina xhip e kolonelit Zemaj ishte e ndaluar jashtë rrugës në drejtim të Pejës dhe se në timonin e saj ishte i ndjeri Zemaj, të cilin nuk e ka njohur, edhe pse me drita të automjetit të vet, po përpiqej të ndriçonte mjetin e bërë shoshë nga plumbat.

"U ndala të shoh se ç’ kishte ndodhur, kur një sirenë po binte pa pushuar", - shton burimi, duke shpjegur se shoferit i kishte mbetur dora në sirenë tek po jepte sinjal, duke besuar se këtë, po e bënte për të kërkuar ndihmë. I njëjti burim ka përshkruar ngjarjen prej orës 17:15 deri 17:35, e cila "po paraqiste rrezik edhe për kalimtarët e rastit dhe për pjesëtarët e tjerë të trafikut".

"Ende pa ardhur policia, insistova të ndaloja patrullën e parë të KFOR-it dhe ndonjë veturë tjetër për të dërguar në spital njerëzit, porse askush nuk ndaloi",- shton ai, duke shtuar se më vonë ka ardhur edhe një patrullë tjetër e KFOR-it, e cila ka filluar të lokalizojë vendin.

Dëshmitari thotë policia e ka marrë nën kontroll vendin e ngjarjes, diku pas 25 minutash, kurse për autoambulancën ai dëshmon se ka ardhur edhe më vonë. Nga fjalët që ka dëgjuar aty, tregon se janë parë dy makina, një xhip i Shqipërisë dhe një "Ascona", të cilat kanë ngushtuar kalimin e automjeteve që po hynin në Pejë.

Për to kanë thënë se kanë ikur me shpejtësi të madhe rrugës për në Fabrikën e Birrës. Po ashtu ka shtuar se afër xhipit të Zemajt ishe i ndaluar një autobus, duke mos mundur të sqaronte nëse Zemaj kishte gjë të bënte me të. Për këtë fakt një polic që ka ardhur ndër të parët në vendin e ngjarjes, thotë se Zemaj ishte ndaluar që të niste djalin e vet Enisin për në Prishtinë.

Ai thotë se të shtënat e shumta nga armë të tipit "Kallashnikov" janë zbrazur fillimisht në derën e parë të shoferit, duke besuar se udhëtari në ndenjësen e pasme do të shpëtonte nga plumbat. Vrasjen e familjarëve Zemaj të Strellcit të komunës së Deçanit e kanë dënuar gjithë partitë politike në Kosovë. Ata e kanë konsideruar një akt terrorist, kriminal dhe që pengon stabilitetin e Kosovës.

Në një reagim të saj, Lidhja Demokratike e Kosovës e ka cilësuar vrasjen në Pejë të motivuar politikisht. Ndërsa për PDK-në është një akt dhune i papranueshëm. AAK-ja gjithashtu ka dënuar vrasjen dhe ka kërkuar që organet e rendit dhe ato të drejtësisë të kryejnë punën e tyre në zbardhjen e vrajses.

Ndërkohë zëdhënësi i UNMIK-ut ka deklaruar dje se ende nuk ka asnjë motiv, për vrasjen e Tahir, Enis dhe Hasan Zemajt. Zëdhënësi i UNMIK-ut deklaroi se kush ka informacion për këtë ngjarje të njoftojë në polici. Për të dënuar vrasjen e ish -komandantit të FARK-ut, Tahir Zemaj, të dielën në mbrëmje në qendër të Prishtinës u zhvillua një protestë paqësore me moton “Ndal Vrasjet dhe Dhunën Politike në Kosovë!”

Protesta u organizua nga Forumi Rinor i Lidhjes Demokratike. Pjesëmarrësit ndezën qirinj për nder të viktimave, Tahir Zemaj, të birit dhe nipit të tij. Pas këtyre protestave në Prishtinë, protesta të reja kundër vrasjeve dhe dhunës politike janë paralajmëruar edhe në komunën e Decanit.

http://www.shekulli.com.al/bota/7janar2003/deshmia.htm

Copyright©2000-2003 Trepca.net - Të gjitha të  drejtat e rezervuara.