Reagim i Degës së LDK-së në Nju Jork për vrasjen e kolonelit, Tahir Zemaj

Nju Jork, 5 janar 2002 - Dega e Lidhjes Demokratike të Kosovës në Nju Jork ka lëshuar një komunikatë në të cilën thuhet se me hidhërim të madh ka mësuar lajmin për vrasjen mizore të kolonel Tahir Zemajt, ish-oficer i lartë i Ushtrisë Çlirimtare të Kosovës, së bashku me të i birin 20-vjeçar, si dhe një të afërm të familjes së tij, nipin 30-vjeçar.

Në komunikatë më tutje thuhet se "LDK-ja në Nju Jork, kolonel Tahir Zemajn, i cili takon plejadës së kësaj gjenerate, e në veçanti në historinë e re, e moderne të Kosovës martire, për popullin e Kosovës, do ta kujtojë si ushtarak, politikan, burrë të zgjuar e trim, që dha gjithçka për fitoren e luftës të popullit Kosovës, e cila e lindi dhe e rriti atë në luftëtar trim dhe komandant legjendar".

"Për hir të së vërtetës, duhet pranuar se populli i Kosovës, dhe lufta që ai bëri i dha emër. Kosova e çmoi personalitetin dhe luftën e tij shumëplanëshe për liri dhe pavarsi. Dhe pikërisht për këto tipare dalluese, në veçanti gjatë luftës dhe pas luftës me armikun shekullor, atij dhe iu bë "gjykimi" fatal, që do të ishin atentatet si paralajmërim për kobin e zi që do ta gjente e deri tek vrasja mizore së bashku me djalin dhe nipin e tij këto fidanishte të shqiptarizmit".

Është edhe kjo vrasje si të gjitha ato që kanë ndodhur gjatë këtyre vjetëve që vjen nga kulisat e errëta të kësaj lufte të heshtur, që po i dëshiron dhe fundin tragjik Kosovës së Lirë, të gjithë patriotëve, demokratëve dhe nacionalistëve të cilët lindën dhe po vdesin më ëndrrën shqiptare për Kosovën e Lirë e të Pavarur... Kolonel Tahir Zemaj do të jetojë së bashku me Lirinë me Pavarësinë, për ato të cilat dha edhe jetën", thuhet në fund të komunikatës së LDK-së në Nju Jork.

Copyright©2000-2003 Trepca.net - Të gjitha të  drejtat e rezervuara.