Forumi i Rinisë së LDK-së dënon ashpër aktin kriminal të vrasjes së kryetarit të FR në Deçan, Hasan Zemaj, dhe të kolonel Zemajt me të birin

Prishtinë, 5 janar 2002 - Forumi i Rinisë së LDK-së dënon ashpër aktin kriminal dhe makabër të vrasjes së kryetarit të FR të LDK-së, dhe anëtar i Kryesisë së degës së LDK-së në Deçan Hasan Zemaj, ish-ushtar i UÇK-së, dhe të kolonel Tahir Zemajt dhe djalit të tij Enisit.

Në një komunikatë të FR të LDK-së thuhet se kjo vrasje ka goditur thellë gjithë opinionin e Kosovës, e në veçanti të rinjtë e LDK-së, pjesë e së cilës strukturë organizative për më shumë se një dekadë ishte edhe vetë Hasan Zemaj.

Vrasja e mbrëmshme në Pejë, s'ka si të mos kuptohet ndryshe veç me motive të qarta politike, thuhet në vazhdim të komunikatës dhe theksohet se ata që kryejnë vepra të tilla kriminale po e vrasin ardhmërinë e Kosovës, po e vrasin të ardhmen e rinisë sonë.

Forumi i Rinisë së LDK-së me këtë rast edhe njëherë bën thirrje që t'i jipet fund dhunës dhe vrasjeve politike në Kosovë dhe kërkon nga organet e rendit, sigurisë dhe drejtësisë që aktorët e tillë të izolohen, të kapen dhe të nxirren para drejtësisë, thuhet në fund të kësaj komunikate.

Copyright©2000-2003 Trepca.net - Të gjitha të  drejtat e rezervuara.