Deklaratë e Presidentit Rugova me rastin e aktit kriminal në Pejë

Prishtinë, 5 janar 2003 - Presidenti i Kosovës Ibrahim Rugova, me rastin e aktit të mbrëmshëm kriminal që ndodhi në Pejë, ka lëshuar një deklaratë në të cilën thuhet.

"Me dhembje të thellë e morëm lajmin për vrasjen e luftëtarit të lirisë, kolonel Tahir Zemajt, dhe të birit të tij, Enisit, si dhe të Hasan Zemajt, kryetar i Forumit Rinor të LDK-së dhe anëtar i Kryesisë së Degës së LDK-së në Deçan, që ndodhi mbrëmë në hyrje të Pejës.

I dënojmë ashpër këto vrasje kriminale me motiv politik. Ky ishte një akt terrori i drejtuar kundër progresit dhe pavarësisë së Kosovës, kundër ardhmërisë së fëmijëve tanë.

Kërkojmë nga organet kompetente të ndjekjes, ato të drejtësisë dhe nga UNMIK-u, që këta kriminelë të zihen dhe të nxirren para gjyqit sa më shpejt.

Shoqëria jonë duhet t'i izolojë këta kriminelë që punojnë kundër lirisë dhe pavarësisë së vendit tonë, kundër të mirës së Kosovës", njofton Zyra e Presidentit të Kosovës.

 

 

 

Presidenti Rugova ngushëlloi familjen e Tahir Zemajt

 

Prishtinë, 5 janar 2002 - Presidenti i Kosovës Ibrahim Rugova, i ka dërguar një telegram ngushëllimi familjes së kolonel Tahir Zemajt, në të cilin thuhet:

"Me rastin e vrasjes së më të dashurve Tuaj, Tahir Zemajt, kolonelit dhe luftëtarit të lirisë, dhe birit të tij, Enisit, pranoni ngushëllimet e mia dhe të popullit të Kosovës.

Kjo vrasje ka tronditur gjithë Kosovën dhe është një akt terrori kundër luftëtarëve të lirisë, kundër pavarësisë së Kosovës.

Tahir Zemaj në historinë më të re të Kosovës do të mbetet një burrë i madh, luftëtar i lirisë dhe hero i Kosovës.
Familje e nderuar,

Bëhuni të fortë në këto momente të rënda. Ne jemi pranë Jush", thuhet në telegramin e ngushëllimit të Presidentit Rugova.

 

 

 

Presidenti Rugova ngushëlloi familjen e Hasan Zemajt

 

Prishtinë, 5 janar 2002 - Presidenti i Kosovës Ibrahim Rugova, i ka dërguar një telegram ngushëllimi familjes së Hasan Zemajt, me këtë përmbajtje:

"Me rastin e vrasjes së Hasan Zemajt, më të dashurit Tuaj, kryetar i Forumit Rinor të LDK-së në Deçan, pranoni ngushëllimet e mia dhe të popullit të Kosovës.

Vrasja e të riut dhe aktivistit Hasan Zemaj, së bashku me kolonel Tahir Zemajn, është akt terrori kundër lirisë, pavarësisë dhe kundër rinisë së Kosovës.

Familje e nderuar,

Në këto momente të vështira për të gjithë ne, bëhuni të fortë, sepse gjendemi me Ju", thuhet në telegramin e ngushëllimit të Presidentit Rugova.

Copyright©2000-2003 Trepca.net - Të gjitha të  drejtat e rezervuara.