Lajme

E shtune, 4 janar 2003

Përmbajtja:

• Reno Harnish: Përderisa të mos zgjidhet çështja e të kthyerve, do të jetë vështirë të arrihet stabiliteti afatgjatë në Kosovë

• S.Hamiti: Përcaktimi i statusit të Kosovës është një prej obligimeve nga programet e partive politike

• "Ekonomist": Në Institutin për Paqe të SHBA-ve politikëbërësit amerikanë ishin dukshëm më të disponuar për pavarësinë e Kosovës

• Anëtarët e Kryesisë së Parlamentit të Kosovës diskutojnë finalizimin e Regullores së punës së Kuvendit

• Energjia elektrike do të faturohet dhe të paguhet edhe nga serbët në veri të Mitrovicës

• Merxha e ka quajtur tendencë manipuluese iniciativën e Trajkoviqit për krijimin e koalicionit serbo-rom

• Dalin në shesh mosmarrëveshjet mes Beogradit dhe udhëheqësve serbë të Kosovës

• Policia greke bëri të ditur se ka asgjësuar tri grupe trafikantësh shqiptarë të drogës që vepronin në Athinë

• Prosper: Është koha e fundit të zgjidhet çështja e kriminelëve të luftës

• Koreja e Veriut nuk pranon asnjë kusht për bisedime me Washingtonin

• Presidenti Bush shpreson në shmangien e luftës me Irakun

• Fatkeqësi hekurudhore në Indi - 15 të vdekur

• Rebelim në një kamp izraelit të internimit

• Administrata e presidentit Bush nuk ka qëllime armiqësore ndaj Koresë Veriore

• Holanda ka kërkuar nga Rusia të lejojë grupin të vazhdojë vëzhgimin e luftës në Çeçeni

• Paqeruajtësit rus në Gjorgji kanë vrarë dy banorë vendas që kishin sulmuar një oficer rus

• Nga moti i lig gjithandej Evropës kanë vdekur rreth 200 veta

• Dy vetë kanë vdekur dhe disa të tjerë janë plagosur në demonstratat kundërqeveritare në Venezuelë

Reno Harnish: Përderisa të mos zgjidhet çështja e të kthyerve, do të jetë vështirë të arrihet stabiliteti afatgjatë në Kosovë

 

Prishtinë, 4 janar 2003 - "Përderisa të mos zgjidhet çështja e të kthyerve, do të jetë vështirë të arrihet stabiliteti afatgjatë dhe kjo na brengos të gjithëve ne që punojmë në ndërtimin e një shoqërie civile aktive dhe të angazhuar përbrenda një Kosove të qëndrueshme dhe demokratike", thotë Reno Harnish, shef i Misionit amerikan në Prishtinë.

 

Në një shkrim autorial të botuar në numrin e sotëm të gazetës "Zëri" z. Harnish thekson se "çështja e të kthyerve është gjithashtu shumë e rëndësishme për Shtetet e Bashkuara dhe partnerët e saj ndërkombëtarë".

"Miqtë tuaj amerikanë, sikurse dhe përkrahësit tuaj të tjerë në bashkësinë ndërkombëtare, kuptojnë se kjo është një çështje e fuqishme emocionale.... por ne kërkojmë nga ju këtë për hir të të gjithë qytetarëve të Kosovës dhe ardhmërisë së saj", thotë Harnish.

Ai më tutje thekson se "çdonjëri në Kosovë mund të jetë shumë krenar për përparimin e bërë në Kosovë këtë vit. Qeveria e Shteteve të Bashkuara është e kënaqur me përparimin e bërë dhe me lidershipin që shumë liderë politikë kosovarë kanë treguar në vitin 2002".

 

Zoti Harnish në fund thekson se kjo është dëshirë e tij për vitin e ri që çdonjeri që thërret Kosovën "shtëpi" të mund të jetojë këtu në paqe dhe siguri në shtëpitë e tyre.

 

 

S.Hamiti: Përcaktimi i statusit të Kosovës është një prej obligimeve nga programet e partive politike

 

Prishtinë, 4 janar 2003 - Çështjet kryesore në të cilat do të përqendrohet Parlamenti i Kosovës do të jenë statusi përfundimtar i Kosovës dhe privatizimi i pronës. Shefi i Grupit parlamentar i LDK-së Sabri Hamiti thotë se përcaktimi i statusit të Kosovës është një prej obligimeve që rrjedh nga programet e partive politike.

 

Ai thekson se partitë që kanë fituar zgjedhjet janë të obliguara që t'i realizojnë programet e veta në të gjitha instancat e institucioneve të Kosovës.

 

Zoti Hamiti shtoi se këto parti kanë përgjegjësi dhe kanë obligime para zgjedhësve që të punojnë realizimin e programeve të tyre edhe sa i takon statusit politik të Kosovës, por edhe të gjitha problemeve të tjera.

 

 

"Ekonomist": Në Institutin për Paqe të SHBA-ve politikëbërësit amerikanë ishin dukshëm më të disponuar për pavarësinë e Kosovës

 

Londër, 4 janar 2003 - Gazeta londineze "Ekonomist" duke komentuar zhvillimet e fundit në raportet Beograd - Podgoricë vë në pah se ato kanë shqetësuar udhëheqësit shqiptarë të Kosovës që frikësohen se amerikanët dhe evropianët, të cilët janë duke zvogëluar praninë ushtarake, dëshirojnë fillimin e bisedimeve për statusin final në përpjekje për të detyruar kosovarët që të heqin dorë nga pavarësia.

 

"Në veçanti amerikanët që tani janë të fokusuar politikisht dhe ushtarakisht në Irak dhe në luftën kundër terrorizmit, dëshirojnë që shqiptarët dhe serbët të hapin dialogun", pohon gazeta londineze "Ekonomist" për të shtuar se ka pak gjasa që bisedimet për statusin final të Kosovës të fillojnë para një ose më shumë vitesh.

 

Në një takim të mbajtur vonë në Institutin për Paqe të Shteteve të Bashkuara polikëbërësit amerikanë ishin dukshëm më të disponuar për pavarësinë e Kosovës, pos tjerash edhe si pasojë e përpjekjeve që para evropianëve të braktisin këtë hapësirë, thuhet në këtë shkrim.

 

Sidoqoftë në të dy anët e Atlantikut ekziston pajtueshmëria se serbët dhe shqiptarët duhet të fillojnë të bisedojnë së paku për gjërat siç janë energjia elektrike apo transporti. Presioni i bërë mbi ta në këtë drejtim është duke dhënë frute, pohon "Ekonomist".

 

 

Anëtarët e Kryesisë së Parlamentit të Kosovës diskutojnë finalizimin e Regullores së punës së Kuvendit

 

Prishtinë, 4 janar 2003 - Anëtarët e Kryesisë së Kuvendit të Kosovës për dy ditë me radhë do ta diskutojnë në Brezovicë finalizimin e Regullores së punës së Kuvendit e cila pritet të miratohet në seancën e parë të këtij viti.

 

Kjo rregullore paraqet aktin më të rëndësishëm të Kuvendit të Kosovës dhe ajo tashmë është kryer dhe pritet të finalizohet nga anëtarët e Kryesisë së Kuvendit dhe grupi punues i saj e pastaj të procedohet e të miratohet nga Kuvendi i Kosovës. Në këtë takim do të marrin pjesë edhe ekspertët e Instituti Nacional Demokratik dhe përfaqësues të Misionit të OSBE-së në Kosovë.

 

 

Energjia elektrike do të faturohet dhe të paguhet edhe nga serbët në veri të Mitrovicës

 

Mitrovicë, 4 janar 2003 - Drejtori i ri i KEK-ut në njësinë e Mitrovicës Lazër Krasniqi ka deklaruar se do të angazohet që energjia elektrike të faturohet dhe të paguhet edhe nga serbët në pjesën veriore të Mitrovicës gjë që deri më tash nuk është bërë.

 

Faturimi i energjisë edhe në atë pjesë të qytetit është një nga çështjet primare për të cilët do të angazhohet, thotë Krasniqi. Ai ka shtuar se qytetarët që nuk i kryjnë obligimet ndaj KEK-ut do të shkyçen nga rrjeti elektrik.

 

 

Merxha e ka quajtur tendencë manipuluese iniciativën e Trajkoviqit për krijimin e koalicionit serbo-rom

 

Prishtinë, 4 janar 2003 - Kryetari i Partisë Rome të Bashkuar të Kosovës Haxhi Zylfi Merxha e ka quajtur tendencë manipuluese iniciativën e Momçillo Trajkoviqit për krijimin e koalicionit serbo-rom.

 

Ai ka theksuar se romët e Kosovës kanë përfaqësuesit e vetë legal në institucionet e Kosovës dhe kundërshtojnë çdo përpjekje siç është ajo e Trajkoviqit.

 

Askush e veçmas njerëzit si Trajkoviqi që i kanë luftuar dhe i luftojnë institucionet legale të Kosovës nuk kanë të drejtë të manipulojnë për qëllime të errta me vullnetin e shprehur të romëve.

 

 

Dalin në shesh mosmarrëveshjet mes Beogradit dhe udhëheqësve serbë të Kosovës

 

Beograd, 4 janar 2003 - Dorëheqja e Rada Trajkoviqit nga posti i shefit të deputetëve të Koalicionit serb "Kthimi" nxori në shesh mosmarrëveshjet mes Beogradit dhe disa prej udhëheqësve serbë të Kosovës. Në radhë të parë shihet se zëvendëskryeministri serb Nebojsha Çoviq nuk e ka përkrahjen e plotë të serbëve të Kosovës për marrjen e vendimeve.

 

Rada Trajkoviq ka deklaruar se përçarjet brenda serbëve kanë vështirësuar në masë të madhe aktivitetet drejt zgjidhjes së problemeve të tyre.

 

Ajo ka theksuar se veprimi i Çoviqit ishte jashtëzakonisht i vështirësuar, kjo për shkakun se ai synonte marrëveshje me bashkësinë ndërkombëtare që i ka vështirësuar në radhë të parë pozuicionet negociuse sepse kur ofroni koncepte të ndryshme atëherë duhe të ofroni edhe mjetet për zbatimin e tyre.

Ndërkohë shefi i ri i koalicionit serb "Kthimi" Dragisha Kërstoviq ka paralajmëruar se aktivitetin e këtij koalicioni do ta karakterizojë puna më e madhe ekipore në bashkëpunim me forcat relevante të Kosovës.

 

Ai poashtu ka vlerësuar se këtë vit mund të fillojë dialogu mes Beogradit dhe Prishtinës, por sipas tij kjo do të varet nga shkalla e plotësimit të standardeve - kthimit, decentralizimit dhe të çështjeve të tjera vitale për serbët.

 

Kërstoviqi thotë se ende nuk është marrë vendim për kthimin e koalicionit në punimet e Kuvendit të Kosovës dhe se kjo çështje do të shqyrtohet me zyrtarët më të lartë në Beograd.

 

 

Policia greke bëri të ditur se ka asgjësuar tri grupe trafikantësh shqiptarë të drogës që vepronin në Athinë

 

Athinë, 4 janar 2003 - Policia greke bëri të ditur se ka asgjësuar tri grupe trafikantësh shqiptarë të drogës që vepronin në Athinë.

 

Në operacionet e njëpasnjëshme janë arrestuar 8 shtetas shqiptarë dhe tre bashkëpunëtorë grekë, ndërsa janë sekuestruar sasira të konsiderueshme droge si dhe katër armë.

Këta persona u arrestuan një natë para Vitit të Ri dhe këtë festë e kaluan në qelitë e një burgu të Athinës.

 

 

Prosper: Është koha e fundit të zgjidhet çështja e kriminelëve të luftës

 

Uashington, 4 janar 2003 - Zyrtari i lartë amerikan në Departamntin e Shtetit, përgjegjës për çështjet e krimeve të luftës, Pjer Rishar Prosper, ka deklaruar se "është koha e fundit që njëherë e përgjithmonë të zgjidhim çështjen e kriminelëve të luftës dhe këtë problem ta lëmë pas vetes".

 

Prosper këtë deklaratë ia ka drejtuar zyrtarëve të Beogradit, duke thënë se "tri certifikimet e gjertanishme për ndihmën ekonomike për Jugosllavinë për Kongresin amerikan janë të tepërta".

 

 

Koreja e Veriut nuk pranon asnjë kusht për bisedime me Washingtonin

 

Seul, 4 janar 2003 - Koreja e Veriut fajësoi të premten Shtetet e Bashkuara për ballafaqimin e tensionuar rreth programit të saj bërthamor, por u shpreh se ekzisojnë mundësitë për zhvillimin e bisedimeve për të zgjidhur krizën, sikur Uashingtoni të pranojë të hyjë në negociata me Penianin për një traktat mossulmimi.

 

Ambasadori i Koresë së Veriut në Kinë, i cili përvijoi pozitën e vendit të tij gjatë një konference shtypi në Pekin, tha se Koreja e Veriut nuk do të pranonte asnjë kusht për zhvillimin e bisedimeve.

Uashingtoni ende nuk ka reaguar ndaj këtyre komenteve, por administrata e presidentit Bush këmbëngul që para se të fillojnë bisedimet, Koreja e Veriut duhet të ndalojë veprimtarinë në programin e saj të sapo riaktivizuar bërthamor.

 

 

Presidenti Bush shpreson në shmangien e luftës me Irakun

 

Uashington, 4 janar  2003 - Presidenti Bush tha se udhëheqësit të Irakut, Sadam Husein, po i afrohet dita të vendosë sesi të veprojë dhe shtoi se ai ende shpreson që Shtetet e Bashkuara mund ta shmangin luftën me Irakun. Presidenti Bush thotë se i takon Presidenti Sadam Huseinit të vendosë që të çarmatoset për të shmangur një ndërhyrje ushtarake.

 

Ndërkohë që Bush komentonte rreth gjendjes në Irak, Uashingtoni vazhdoi dislokimin e trupave dhe pajisjeve të tjera në rajonin e Gjirit Persik. Më shumë se një mijë trupa morën urdhër të enjten të dislokohen në rajon.

 

 

Fatkeqësi hekurudhore në Indi - 15 të vdekur

 

Nju Delhi, 4 janar 2003 - Gjatë një fatkeqësie hekurudhore në perëndim të Indisë, sipas të dhënave më të reja, kanë vdekur 15 njerëz dhe 50 të tjerë janë lënduar. Në Gatanandur në shtetin Maharashatra është ndeshur një tren udhëtarësh me një tjetër tren mallrash.

 

Autoritetet theksuan se faji ishte i perosnelit të hekurudhës dhe jo teknik. Gabimi ishte shkaktuar me rastin e dhënies së sinjaleve të gabuara.

 

 

Rebelim në një kamp izraelit të internimit

 

Jerusalem, 4 janar 2003 - Ushtria izraelite ka mposhtur një rebelim të palestinezëvë në një kamp internimi. Qetësia në kampin Ofer, në veri të Jerusalemit, është vendosur sërish me ndihmën e gazit lotsjellës, theksoi një zëdhënës i ushtrisë.

 

Të 40 të plagosurit për shkak të lëndimeve që pësuan nga gazi lotësjellës, u detyruan t'i nënshtroheshin trajtimit mjekësor. Sipas të dhënave të një organizate izraelite për të drejtat e njeriut, Izraeli po mban pa të drejtë, mbi 1000 palestinezë në këto kampe internimi.

 

 

Administrata e presidentit Bush nuk ka qëllime armiqësore ndaj Koresë Veriore

 

Uashington, 4 janar 2003 - Administrata e presidentit Bush nuk ka qëllime armiqësore ndaj Koresë Veriore, por Shtetet e Bashkuara kërkojnë nga Pheniani t'u përmbahet marrëveshjeve ndërkombëtare dhe të eliminojë programin e tij për armë bërthamore, tha Stejt Departmenti Amerikan.

Zyrtarët nga Koreja Jugore, Japonia dhe Shtetet e Bashkuara kanë planifikuar të takohen nga fillimi i javës së ardhëshme që të diskutojnë tensionimet bërthamore me Korenë Veriore.

 

 

Holanda ka kërkuar nga Rusia të lejojë grupin të vazhdojë vëzhgimin e luftës në Çeçeni

 

Amsterdam, 4 janar 2003 - Holanda, si kryesuese e re e OSBE-së, ka kërkuar nga Rusia që të lejojë grupin të vazhdojë punën në Çeçeni ku vëzhgonte luftën midis separatistëve çeçenë dhe trupave ruse.

 

OSBE-ja ishte detyruar të ndërpresë aktivitetet e saja vëzhguese në Çeçeni pas dështimit të bisedimeve me Rsuinë, kur i përfundoi mandati në 31 dhjetor.

 

 

Paqeruajtësit rus në Gjorgji kanë vrarë dy banorë vendas që kishin sulmuar një oficer rus

 

Abhazi, 4 janar 2003 - Paqeruajtësit rus në Abhazi, Republikën kryengritëse të Gjorgjisë, kanë vrarë dy banorë vendas të cilët kishin sulmuar një oficer rus. Paqeruajtësit rus patrullojnë kufirin administrativ të Abhazisë që nga vitet e herëshme të 1990, kur atje kishte shpërthyer dhuna.

 

 

Nga moti i lig gjithandej Evropës kanë vdekur rreth 200 veta

 

Paris, 4 janar 2003 – Moti dimëror tejet i lig po bën kërdi gjithandej Evropës dhe kështu si pasojë e tij kanë humbur jetën nga të ftohtit e acarit rreth 200 njerëz në Poloni, dy veta i ka mbytur shtrëngata në Gjermani, kurse disa shtete evropiane kërcënohen nga vershimet, njofton AFP.

 

 

Dy vetë kanë vdekur dhe disa të tjerë janë plagosur në demonstratat kundërqeveritare në Venezuelë

 

Karakas, 4 janar 2003 – Në demonstratat kundërqeveritare në Venezuelë dy veta kanë vdekur dhe disa të tjerë janë plagosur pasi snajperistët kanë hapur zjarr kundër demonstruesve antiqeveritarë, njofton AFP.

 

Dëshmitarët kanë thënë se policia ka shtënë prapa, kurse protestuesit pro dhe antiqeveritarë kanë gjuajtur me gurë njëra palë tjetrën. Një zyrtar ka deklaruar se dy persona kanë vdekur në spital nga plagët e plumbave pas përleshjeve të dhunshme ndërmjet përkrahësve dhe kundërshtarëve të presidentit Hugo Çavez.

Copyright©2000-2003 Trepca.net - Të gjitha të  drejtat e rezervuara.