Mesazh i Presidentit Rugova drejtuar qytetarëve të Kosovës për Vitin e Ri 2003

Mesazh i Presidentit Rugova drejtuar qytetarëve të Kosovës për Vitin e Ri 2003


Prishtinë, 30 dhjeor 2002 / TN /QIK - Presidenti i Kosovës Dr.Ibrahim Rugova, me rastin e Vitit të Ri 2003, u ka drejtuar qytetarëve të Kosovës një mesazh, me këtë përmbajtje.
"Qytetarë të nderuar të Kosovës,
zonja dhe zotërinj,
Në këtë natë gëzimi të Vitit të Ri, Ju shpreh urimet e mia të përzemërta me dëshirat më të mira për mirëqenien e lumturinë Tuaj dhe të familjeve Tuaja.
Viti që po lëmë mbas ishte një vit i progresit të gjithanshëm për vendin tonë. Ishte një vit i funksionimit dhe i punës së frytshme të Institucioneve shtetërore të Kosovës: Presidentiti, Kuvendit dhe Qeverisë.

Po ashtu gjatë këtij viti u mbajtën zgjedhjet e dyta lokale me mandat katërvjeçar që Kosovën e shpiejnë në jetën e rregullt demokratike. Kështu u plotësua struktura institucionale e Kosovës në të gjitha nivelet.
Gjithsesi gjatë vitit që po lëmë pas u shtua gjendja e sigurisë së Kosovës dhe e sigurisë të të gjithë qytetarëve.
Në planin ekonomik patëm edhe një vit të ngritjes të sektorit privat që sot përbën gjysmën e ekonomisë së Kosovës. Njëherësh arritëm sukses edhe në konsolidimin e jetës sociale për të gjithë qytetarët. Po ashtu sukses shënuam edhe në integrimin e grupeve etnike, minoriteteve.
Zonja dhe zotërinj,
Në përmbyllje të këtij viti e përuruam Shtëpinë e Pavarësisë së Kosovës, që është pjesë e progresit tonë.
Pra ishte edhe një vit i frytshëm i lirisë. Ishte një vit i afirmimit më të madh të kërkesës së popullit për njohjen formale të Pavarësisë së Kosovës.
Zonja dhe zotërinj,
Viti në të cilin po hyjmë do të jetë vit i një progresi më të madh dhe të konsoliduar në të gjitha fushat e jetës në të mirë të të gjithëve.
Do të punojmë intensivisht me miqtë tanë për njohjen sa më të shpejtë formale të Pavarësisë së Kosovës.

Pra që të kemi Kosovën të pavarur e demokratike të integruar në NATO, në BE dhe në miqësi të përhershme me SHBA. Kjo do të qetësonte popullin e Kosovës dhe do të hapte perspektivë për shpejtimin e proceseve demokratike e ekonomike të vendit tonë.
Do të punojmë në konsolidimin e mëtejshëm të sigurisë dhe të stabilitetit politik. Objektiva tona të përbashkëta janë: zhvillimi ekonomik, privatizimi, investimet dhe krijimi i vendeve të reja të punës për të rinjtë e Kosovës. Do të punojmë për krijimin e një baze ligjore për privatizimin dhe ringjalljen e ekonomisë. Sektori privat do të ketë përkrahjen tonë në të gjitha fushat.
Në planin e integrimit të grupeve etnike, minoriteteve do të konsolidojmë një proces të hapur të integrimit. Kjo ka për qëllim që të krijojmë një shoqëri të tolerancës, të mirëkuptimit dhe të prosperitetit për të gjithë.
Gjatë vitit që po vjen do të punojmë në hapjen e zyrave diplomatike në vende të Europës në bashkëpunim me UNMIK-un, që të sigurojmë përfaqësimin e interesave të Kosovës. Në këtë drejtim në vitin që po lëmë pas bëmë hapin e parë me emërimin e Senatorit Dol, Ambasador Nderi në SHBA.
Po ashtu do të ndërtojmë marrëdhënie të mira me të gjithë fqinjtë tanë.
Po ashtu do të punojmë për afirmimin dhe formalizimin e shenjave dhe simboleve shtetërore të Kosovës në konsultim me të gjitha institucionet dhe popullin e vendit tonë.
Një punë të veçantë do të bëjmë në bartjen graduale të kompetencave te institucionet e Kosovës në bashkëpunim të ngushtë me UNMIK-un dhe të gjejmë forma më produktive të veprimit të përbashkët që të shpejtojmë më shumë progresin e Kosovës.
Qytetarë të nderuar,
Në këto momente gëzimi i përkujtojmë me krenari të gjithë ata që ranë për lirinë, pavarësinë dhe demokracinë e Kosovës, për të mirën tonë. Do të shpejtojmë procesin e ndriçimit të fatit të të zhdukurve në vitin që po vjen.
Zonja dhe Zotërinj,
Në këtë natë gëzimi urime të përzemërta i shprehim UNMIK-ut, OSBE-së dhe komandantëve e ushtarëve të KFOR-it, NATO-s që po bëjnë mbrojtjen dhe sigurinë e Kosovës. Urime të sinqerta u shprehim përfaqësive diplomatike në kryeqytetin e Kosovës, në Prishtinë.
Po ashtu urime të sinqerta u shprehim organizatave joqeveritare ndërkombëtare në Kosovë.
Njëherësh urime të përzemërta u shprehim përfaqësive dhe institucioneve financiare në Prishtinë që po kontribuojnë në zhvillimin ekonomik dhe në perspektivën e Kosovës.
Zonja dhe Zotërinj,
Në këtë natë gëzimi, u shprehim urime nga zemra kosovarëve në botën e jashtme në SHBA, në vendet e Evropës dhe në vende të tjera që po ndihmojnë progresin e Kosovës.
Zonja dhe zotërinj,
Në këtë natë gëzimi urime të përzemërta për Vitin e Ri i bëjmë Presidentit Bush, Kryeministrit Bler, Presidentit Shirak, Kancelarit Shrëder dhe Kryeministrit Berluskoni, që po përkrahin konsolidimin e Kosovës.
Urim të veçantë i dërgojmë Atit të Shenjtë Papa Gjon Pali II, që gjithmonë lutet për Kosovën.
Qytetarë të dashur,
Në këtë natë gëzimi t'i ndajmë së bashku dëshirat, synimet dhe veprimet për një Kosovë më të pasur, më të fortë dhe më të bukur. Dhashtë Zoti që Vitin tjetër të Ri, ta presim me realizimin e njohjes formale të Pavarësisë së vendit tonë të shtrenjtë.
Me fat Viti i Ri 2003!
Gëzuar!
Zoti Ju bekoftë!
Zoti e bekoftë Kosovën tonë të dashur!", thuhet në fund të mesazhit të Presidentit të Kosovës, Dr. Ibrahim Rugova, drejtuar qytetarëve të Kosovës, me rastin e Vitit të Ri 2003.