Lajme, 30.12.2002

30/12/2002 - Trepça.net

Lajme, 30.12.2002

Përmbajtja:

N. Daci: Kosova do të ndërtojë ardhmërinë e saj sipas vullnetit të popullit
Demaçi: Standardet e UNMIK-ut - pretekst për të shkurajuar shqiptarët nga kërkesa e tyre për pavarësi
Riza Halimi akuzon qeveritë e reja në Beograd për shmangie nga përcaktimet programore për luginën e Preshevës
Leka Zogu: "Unë jam për pavarësinë e Kosovës"
Një grup hulumtuesish të KMDLNJ-së vizituan burgun e Dubravës
Tribunali i Hagës kërkon dorëzimin e Millutinoviqit, kurse ministri serb i drejtësisë kërkon dorëheqjen e Del Pontes
Del Ponte këmbëngul se Ratko Mlladiq fshehet në Serbi
Ambasadori amerikan thotë se implementimi i Marrëveshjes së Ohrit do ta përmirësojë statusin e qytetarëve shqiptarë
Policia maqedonase ka arrestuar 25 femra rumune, moldave dhe ruse të dyshuar se janë marrë me prostitucion
Janë hedhur dy bomba në fshatin Ratajë të Tetovës
Policia ka arrestuar punëtorn e bagazheve në aeroportin e Parisit pasi i janë gjetur armë
Një militant islamik ka vrarë tre mjekë misionarë amerikanë dhe ka plagosur rëndë një tjetër në Jemen
Trupat izraelite kanë vrarë një të ri palestinez dhe kanë plagosur një tjetër në Tulkarem
Vatikani do t'i bëjë publikë dokumentet historike për raportet e veta me Gjermaninë midis viteve 1922-39
Pauell thotë se Uashingtoni shpreson për një zgjidhje paqësore të krizës irakiane
Shtetet e Bashkuara kanë ndërmarrë hetime për të vërtetuar nëse vërtet ka ndodhur klonimi i parë i njeriut
Kenia ka president të ri
Koreja e Veriut kërcënon sërish

N. Daci: Kosova do të ndërtojë ardhmërinë e saj sipas vullnetit të popullit

Prishtinë, 30 dhjetor 2002 - Kosova do të ndërtojë ardhmërinë e saj sipas vullnetit të popullit dhe kurrë nuk do të kthehet nën regjimin e Serbisë, ka deklaruar kryetari i Kuvendit të Kosovës Nexhat Daci në një intervistë për mediat e Prishtinës.

Ai ka thënë se viti 2003 do të jetë vendimtar për fatin e Kosovës dhe ka theksuar rëndësinë për hyrjen e saj sa më të shpejt në strukturat evroatlantike që të japë kontribut për paqen dhe stabilitetin në rajon.

Kryeparlamentari Daci e ka vlerësuar shumë të suksesshme punën e deritashme të Kuvendit të Kosovës.


Demaçi: Standardet e UNMIK-ut - pretekst për të shkurajuar shqiptarët nga kërkesa e tyre për pavarësi

Prishtinë, 30 dhjetor 2002 - Veprimtari i njohur nga Kosova, Adem Demaçi, tha të dielën për "Zërin e Amerikës" se standardet e përcaktuara nga misioni i Kombeve të Bashkuara janë pretekst për të shkurajuar shqiptarët në kërkesat e tyre për pavarësi.

Zoti Demaçi thotë se bisedimet do të mund të fillonin në momentin kur Beogradi do të hiqte dorë nga synimet e tij mbi Kosovën. Demaçi thekson se gjendja e pakicave kombëtare ka shënuar përmirësim, përfshirë këtu edhe pakicën serbe e cila, sipas tij, vazhdon të jetë ende nën ndikimin e drejpërdrejtë të Beogradit.


Riza Halimi akuzon qeveritë e reja në Beograd për shmangie nga përcaktimet programore për luginën e Preshevës

Preshevë, 30 dhjetor - Në fund të vitit 2002, kur po mbaron viti i dytë i angazhimeve për zgjidhjen politike të krizës në Luginën e Preshevës, mund të konstatohet se është duke u zhvilluar një proces i ngadalshëm me anë të të cilit është realizuar vetëm një pjesë e vogël e programit të qeverisë federative dhe republikane për zgjidhjen e kësaj krize, thotë prefekti i Preshevës, Riza Halimi, në një deklaratë me rastin e këtij fundviti.
Zoti Halimi thekson se në dy vitet e kaluara, me anë të donacioneve ndërkombëtare dhe të Trupit Koordinues, u realizuan projekte në infrastrukturat lokale, u krye rekonstruimi dhe rehabilitimi i objekteve shkollore dhe ambulancave si dhe të objekteve të banimit në
vendbanimet e Zonës së Sigurisë Tokësore, ku gjer më tani vetëm pjesërisht është kthye popullata e zhvendosur. Ai shton se për kthimin e popullatës së shpërngulur më së paku është bërë në komunën e Medvegjës, ku nga rreth 6.000 shqiptarë, që jetonin para vitit '99, aktualisht aty gjenden më pak se 1.000 banorë shqiptarë.

Mirëpo, edhe në Malësinë e Bujanovcit dhe Karadakun e Preshevës ende disa mijëra shqiptarë nuk janë kthyer, për shkak të mungesës së kushteve elementare për jetë normale ashtu edhe për shkak të prezencës së jashtëzakonshme të forcave ushtarake dhe të policisë speciale.
Riza Halimi akuzon qeveritë e reja në Beograd, jo që nuk kanë vazhduar me dinamikën e paraparë ta realizojnë Planin dhe Programin e tyre për zgjidhjen e krizës, por, që është edhe më brengosëse, në kohë të fundit vërehet gjithnjë e më qartë shmangja nga përcaktimet themelore të këtij programi, thuhet në një deklaratë të gjatë të Ruza Hilimit.


Leka Zogu: "Unë jam për pavarësinë e Kosovës"

Tiranë, 30 dhjetor 2002 - "Unë besoj se do të vijë koha, kur do të jem i detyruar me marrë disa hapa, por jo aq shumë në politikën shqiptare të brendshme, dmth. në çështjet e partive, në çështjet e tilla, por më tepër në çështjet e përditshme", tha mbreti i shqiptarëve apo trashëgimtari i Fronit Shqiptar Leka Zogu, në një intervistë dhënë gazetës së Prishtinës "Bota sot", e cila botohet në numrin e nesërm festiv.
Leka Zogu thotë se Mbretëria dhe Statuti Themeltar i vitit 1928 është i bazuar. "Mbreti është si kryeplaku i katundit, kur ka ndonjë ngatrresë në mes të shtëpive të ndryshme, a plagë të ndryshme, shkojnë e marrin mendimin e tij dhe kryplaku ua jep këshillat e veta. Mbreti duhet të veprojë në një mënyrë që është e paanshme, të mbajë një ekuilibër të plotë të interesave brenda partive politike", thotë ai.
Duke folur për Kosovën, Leka Zogu tha se dihet shumë mirë qëndrimin i tij karshi Kosovës. "Unë e quaj Kosovën si një hise e kombit shqiptar. A do të jetë e pavarur, a do të bëhet pjesë e Shqipnisë, a do të bëhet një ditë konfederatë shqiptare, ajo tash për tash është për t'u shikuar".
Ndërkaq lidhur me udhëtimet e zyrtarëve të Tiranës në Beograd e Moskë, ai nuk deshi t'i komentojë, por shtoi: "Unë nuk shoh se ka arsye Serbia në angazhimin në çështjen shqiptare. Tashti është Serbia dhe Mali i Zi, mbaroi puna me Jugosllavinë".
"Unë jam për pavarësinë e Kosovës që e shof si hap i parë, le ta them si hap i dytë, se hapi i parë asht ba me gjakun që është derdhur në luftën e 99-tes. Hapi i dytë tashti asht bashkimi i trojeve shqiptare, e kjo më ban me shpresue që shqiptarët ma në fund po fillojnë me e arritë qëllimin", tha Leka Zogu.
I lutur të komentojë debatet për flamurin e Kosovës, trashëgimtari i Fronit Shqiptar, tha: "Unë do ta shihsha me dhimbje që të ndryshoshin flamurin dhe himnin në Kosovë, për arsye se jemi të një gjaku, sepse jemi të dy të një kombi, por ajo është në kompetencën e presidentit tuaj, nuk asht në kompetencat e mia. Kjo është në kompetencat e shqiptarëve, kështu që unë nuk mund të bëjë komente, nuk me takon mua se nuk me kanë pyetur".
I pyetur se kur do të vizitojë Kosovën, Leka Zogu u pëgjegj:
"Unë planifikoj, unë do të dëshirojsha shumë që me familje të shkojsha me i ba një vizitë Kosovës. Kjo ka qenë një andërr, që do të dëshirojsha me e gëzu. Por hala Kosova nuk është tërësisht e pavarur, ka edhe faktorë ndërkombëtarë, edhe faktorë të brendshëm në Shqipëri që më shkaktojnë disa ngatërresa.

Por shpresoj se do t'i kalojmë këto, dhe kur të jemi pak më të lirë, atëherë shpresoj me ardhe me ju vizitu atje. Edhe me e pi një kafe në Prishtinë dhe në disa vende të tjera që i kam në dashuri".


Një grup hulumtuesish të KMDLNJ-së vizituan burgun e Dubravës

Prishtinë, 30 dhjetor - Një grup hulumtuesish të KMDLNJ-së, në kuadër të aktivitetit të vet në monitorimin e gjendjes së të drejtave të njeriut, vizituan burgun e Dubravës, pasi që nga disa të burgosur morën disa letra, në të cilat ankoheshin për kushtet jo të mira dhe trajtim jo të mirë gjatë vuajtjes së dënimit.

Këto letra u pasuan me disa veprime të dhunshme nga ana e disa të burgosurve, të cilët u barrikaduan në pavionin II, duke shkatërruar orenditë dhe duke ia vënë flakën një pjese të këtij pavioni, thuhet në një kumtesë të KMDLNJ-së.
Ekipi i KMDLNJ-së hasi në mirëkuptim të plotë nga udhëheqësit e Shtëpisë Ndëshkimore - Korrektuese në Dubravë, të cilët e lejuan vizitën në të gjitha pavionet dhe mundësuan papengueshëm kontaktin dhe bisedat me të burgosurit, për të cilët u përcaktua ekipi i KMDLNJ-së. Bisedat u bënë pa praninë e personelit zyrtar - rojeve të burgut. Gjithashtu, anëtarët e ekipit të KMDLNJ-së patën qasje edhe në brendi të burgut, përkatësisht qelitë e burgut.
Pas vizitave në të gjitha pavionet, bisedës me drejtuesit ndërkombëtarë dhe vendas të SHNK të Dubravës dhe bisedave me të burgosurit e të gjitha kategorive, KMDLNJ ka një pasqyrë të qartë për kushtet në të cilat e vuajnë dënimin me burg të paraburgosurit në këtë SHNK dhe për trajtimin ndaj tyre.
Së shpejti, KMDLNJ do të dalë me një analizë të kësaj vizite dhe opinioni do të informohet në mënyrë më të përafërt dhe objektive, thuhet në një kumtesë të KMDLNj-së.


Tribunali i Hagës kërkon dorëzimin e Millutinoviqit, kurse ministri serb i drejtësisë kërkon dorëheqjen e Del Pontes

Beograd, 30 dhjetor 2002 - Tribunali i Hagës ka kërkuar sërish nga Beogradi që ta dorëzojë menjëherë Millan Millutinoviqin, kurse ministri serb i drejtësisë Vlladan Batiq ka kërkuar nga kryeprokurorja e Gjykatës së Hagës Karla del Ponte që të japë dorëheqje për shkak se udhëhiqet, siç thotë nga parimi i drejtësisë selektive.

Vladan Batiq, ndër të tjera i sheh për të madhe kryeprokurores del Ponte se insiston për dorëzimin e presidentit të Serbisë, sikurse kjo të ishte gjëja më e rëndësishme në botë, siç e ka formuluar.
Ndërkaq, kryeministri serb Gjingjiq ka thënë se Millan Millutinoviq, të cilit dje i skadoi mandati i presidencës duhet t'i dorëzohet vullnetarisht Tribunalit të Hagës për krime lufte.


Del Ponte këmbëngul se Ratko Mlladiq fshehet në Serbi

Hagë, 30 dhjetor 2002 - Kryeprokurorja e Tribunalit të Hagës Karla del Ponte edhe mëtej pohon se Ratko Mlladiq është i fshehur në Serbi. "Mjaft kemi pritur. Unë kam dëshmi se Mlladiq gjendet në Serbi.

Në korrik i kam paraqitur autoriteteve serbe një raport të hollësishëm për lëvizjet e Mlladiqit, por ato nuk kanë ndërmarrë asgjë për arrestimin e tij", tha zonja del Ponte për një gazetë gjermane. Ajo ka shtuar se Mladiqi nuk po arrestohet për faktin se është nën përkujdesjen e ushtrisë.
Kryeprokurorja e Tribunalit të Hagës po ashtu ka theksuar se autorutetet serbe nuk kanë ndërmarrë asgjë për arrestimin e të akuzuarëve të tjerë. Ajo ka thënë se ka informacione për vendin e fshehjes së Radovan Karaxhiqit dhe ka shtuar se nuk e ka të qartë se si është e mundur që NATO-ja nuk ka arrestuar deri tani.


Ambasadori amerikan thotë se implementimi i Marrëveshjes së Ohrit do ta përmirësojë statusin e qytetarëve shqiptarë

Shkup, 30 dhjetor 2002 - Ambasadori amerikan në Shkup Nikollas Bigman thotë se tash në Maqedoni duhet t'i jepet përparësi zhvillimit ekonomik dhe të papunësisë. Ai ka theksuar se implementimi i Marrëveshjes së Ohrit do ta përmirësojë statusin e qytetarëve shqiptarë.
Z.Bigman ka thënë për radion "Evropa e lirë" se NATO-ja ka ndihmuar procesin për një armatë dhe polici multietnike në Maqedoni. Poashtu ai ka shfaqur shpresën se Qeveria e Maqedonisë do të punojë në këtë drejtim dhe do të rekrutojë policë jomaqedonas, por duke e bërë të njëjtën edhe në armatë.

Shqiptarët dhe të tjerët duhet kuptuar se për atë duhet kohë. "Shpresoj se shqiptarët dhe të tjerët do të kenë durim sepse kjo nuk mund të bëhet për një apo dy dite", ka thënë z.Bigman.


Policia maqedonase ka arrestuar 25 femra rumune, moldave dhe ruse të dyshuar se janë marrë me prostitucion

Shkup, 30 dhjetor 2002 - Policia e Maqedonisë ka bastisur disa klube nate në Shkup, Ohër dhe Strugë dhe ka arrestuar rreth 25 njerëz në kuadër të aksionit për goditjen e rrjetit të kontrabandës me njerëz.

Ministria e brendshme maqedonase ka njoftuar mbrëmë se organet e saj së bashku me njësinë për luftën kundër tregëtisë me qeniet njerëzore i zhvilloi këto kontrolle në bazë të të dhënave për tregëti me njerëz, përkatësisht të qytetarëve të huaj. Kontrollët u zhvilluan në orët e mesnatës së shtunë.

Në një nga barët i quajtur "Flamengo" u gjetën gjashtë të ashtuquajtura vallëtare të gjitha shtetase të huaja,nga të cilat 3 rumune, një moldave dhe dy ruse. Në këto aksione të policisë kanë marrë pjesë inspektorë sanitarë dhe të punës.

Në një nga baret e natës në Ohër janë gjetur tri ukrajinase dhe një ruse, ndërsa në një hotel 13 qytetare të huaja, nga të cilat 10 moldave, dy ruse dhe një ukrainase.


Janë hedhur dy bomba në fshatin Ratajë të Tetovës

Tetovë, 30 dhjetor 2002 - Nga një makinë lëvizëse janë hedhur dy bomba në afërsi të dy shtëpive në fshatin Ratajë të Tetovës, por pa shkaktur dëme në njerëz. Nuk ka të dhëna për personat që i kanë hedhur këto bomba.

Gjatë kësaj fundjave në Tetovë ndodhi edhe një shpërthim me eksploziv në një një lagje të qytetit, Ndërkaq një grua u vra aksidentalisht me armë zjarri në një gëzim familjar.

Autoritetet maqedonase kanë paralajmëruar zhvilllimin e një operacioni për mbledhjen e armëve që mbahen ilegalisht nga qytetarët, por ende nuk është përcaktuar ndonjë datë zyrtare se kur do të zhvillohet ky operacion.


Policia ka arrestuar punëtorn e bagazheve në aeroportin e Parisit pasi i janë gjetur armë

Paris, 30 dhjetor 2002 – Policia ka arrestuar punëtorin e bagazhve në aeroportin e "Sharl dë Gol" të Parisit pasi i janë zbuluar në veturën e tij dy armë automatike, pesë eksplozive plastike dhe dy detonatorë.

Personi i arrestuar është me origjinë algjeriane dhe është arrestuar të shtunën pas një paralajmërimi të një personi se kishte parë armë në vendbagazhin e automjetit të tij në aeroport.

Edhe anëtarët e tjerë të familjes së tij janë marrë në pyetje, kurse ai vetë mund të mbahet në burg katër ditë pa akuzë. I arrestuari është një 27 vjeçar me origjinë algjeriane dhe jeton në preiferi të Parisit me familje.

Pas bastisjes së banesës së tij janë arrestuar gjithshtu edhe babai i tij, dy vëllezër dhe një mik i familjes, por vetëm janë marrë në pyetje. Njoftohet gjithashtu se policia e Parisit ka bërë një sërë arrestimesh të militantëve të dy shimtë islamikë, të cilët kanë planifikuar sulme në ambasadën ruse në qytet.


Një militant islamik ka vrarë tre mjekë misionarë amerikanë dhe ka plagosur rëndë një tjetër në Jemen

Sana, 30 dhjetor 2002 – Një militant i dyshimtë islamik ka vrarë sot (të hënën) tre mjekë misionarë amerikanë dhe ka plagosur rëndë një tjetër në qytetin e Jemenit jugor Xhibla, kanë bërë të ditur burimet spitalore vendëse, njofton Rojter.

Sulmuesi i armatosur me një automatik kalashnikov ka hapur zjarr në spitalin baptist në Xhibla, që ndodhet në provincën Ib, 170 kilometra në jug të kryeqytetit Sana. Zyrtarët jemenas kanë identifikuar vrasësin me emër Abid Abdel Rezak Kemal. Ndërkaq, emrat e viktimave ende nuk janë bërë të ditur.


Trupat izraelite kanë vrarë një të ri palestinez dhe kanë plagosur një tjetër në Tulkarem

Jerusalem, 30 dhjetor 2002 - Trupat izraelite dje kanë vrarë një të ri palestinez dhe kanë plagosur një tjetër në Tulkarem të Bregut perëndimorë, kur kishin hapur zjarr kundër një grupi nxënësish që hidhnin gurë kundër ushtarëve izraelitë. Ndërkohë, aramata izraelite njofton se dy ushtarë të saj janë plagosur nga zjarri që kishin hapur palestinezët kundër patrullës, në Rafah të Brezit të Gazës.


Vatikani do t'i bëjë publikë dokumentet historike për raportet e veta me Gjermaninë midis viteve 1922-39

Romë, 30 dhjetor 2002 - Vatikani ka vendosur që gjatë shkurtit t,i bëjë publikë dokumentet historike për raportet e veta me Gjermaninë midis viteve 1922-39, që deri tash mbaheshin të mbyllura.
Kjo periudhë përputhet me kohën kur Eugenio Pacelli, i cili më vonë u bë Papa Piu, ishte ambasador i Vatikanit në Gjermani, kuse tash ka filluar procesi i lumturimit të tij. Papa Gjon Pali i Dytë ka miratuar publikimin e dokumenteve që të zbusë akuzat ndaj Piut se ai kishte simpati për nazistët.


Pauell thotë se Uashingtoni shpreson për një zgjidhje paqësore të krizës irakiane

Ushington, 30 dhjetor 2002 - Sekretari amerikan i shtetit, Kolin Pauell, tha se Uashingtoni shpreson për një zgjidhje paqësore të krizës irakiane. Pauell tha se Shtetet e Bashkuara nuk kanë marrë ndonjë vendim përfundimtar për të sulmuar Irakun, por vazhdojnë të përgatiten ushtarakisht për çdo gjë që të jetë e nevojshme.

Ai ka thënë gjithashtu se administrata e presidentit Bush shpreson për një zgjidhje paqësore të krizës irakiane, por po dislokon forca ushtarake në mënyrë që ato të jenë të gatshme për veprim.

Zoti Pauell i bëri këto komente disa ditë pasi sekretari i Mbrojtjes, Donald Ramsfeld, dha urdhër për dislokimin e forcave tokësore, avionëve luftarakë dhe të mbështetjes logjistike në rajonin e Gjirit Persik.


Shtetet e Bashkuara kanë ndërmarrë hetime për të vërtetuar nëse vërtet ka ndodhur klonimi i parë i njeriut

Uashington, 30 dhjetor 2002 - Shtetet e Bashkuara kanë ndërmarrë hetime për të vërtetuar nëse vërtet ka ndodhur klonimi i parë i sojit njeri, e nëse po, mos vallë është në kundërshrim me ligjet amerikane. Ditë më parë një kompani e ndërlidhur me sekta që besojnë se njeriu ka prejardhje jashtëtokësore, kumtoi në Holivud se kishte lindur foshnja e parë e klonuar.


Kenia ka president të ri

Nairobi, 30 dhjetor 2002 - Në kryeqytetin e Kenias, Nairobi, zhvillohet ceremonia e inagurimit të presidentit të ri të vendit, Mwai Kibaki.
Një tendë e posaçme është ngritur në një park të qytetit për ceremoninë e betimit të politikanit 71-vjeçar i cili, pas një aksidenti me makinë, përdor një karrocë për të lëvizur.
Koalicioni Kombëtar i Ylberit, i udhëhequr nga zoti Kibaki, arriti një fitore bindëse ndaj partisë KANU, e cila e ka udhëhequr Kenian që prej shpalljes së pavarësisë së këtij vendi afrikan më 1963.
Bashkësia ndërkombëtare e ka përshëndetur kalimin paqësor dhe demokratik të pushtetit.


Koreja e Veriut kërcënon sërish

Phenian, 30 dhjetor 2002 - Koreja e Veriut ka lënë të kuptohet se mund të tërhiqet nga Traktati për Mospërhapjen e Armëve Bërthamore nëse vazhdon të kundërshtohet programi i saj bërthamor.

Autoritetet e Phenian-it kanë dëbuar inspektorët ndërkombëtarë nga një instalim bërthamor në qytetin Yongbyon dhe kanë paralajmëruar se do ta riaktivizojë këtë objekt.
Shtetet e Bashkuara thanë se po shohin për rrugët se si mund të komunikojnë me autoritetet e Koresë së Veriut.
Sekretari amerikan i Shtetit, Kolin Pauell, tha se Uashingtoni është gati të presë disa muaj në mënyrë që t'i lërë vend diplomacisë të bindë Korenë e Veriut që të heqë dorë nga ambiciet bërthamore.