Natën e Krishtlindjeve është plaçkitur shtëpia e udhëheqësit të OJQ shqiptaro-amerikane “Team Kosova” në Orllan

Podujevë, 30  dhjetor 2002 (TN) - Në natën e Kërshëndellave ne erdhëm në shtëpi rreth orës 19.30 sepse 3 orë ishim jashtë dhe kur erdhëm e pamë se ishim të plaçkitur, ka deklaruar z. Xhon Çesnut (John Chesnut) udhëheqës i OJQ shqiptaro-amerikane “Team Kosova”. duke shtuar se plaçkitësit kishin hyrë dhe kishin dalur për dritare pasi kishin grabitur në të katër dhomat e gjumit. Një polic i SHPK-së i ka deklaruar z. Çesnut se shtëpia e tij pas plaçkitjes dukej sikur shtëpitë e shqiptarëve pas plaçkitjes së forcave serbe.

  

“Plaçkitësit kishin marrë gjithë pajimet e fëmijëve playstation, por ata kishin vjedhur edhe bizhuterinë e gruas përfshirë edhe unazën antike që ia kishte dhuruar gjyshja.”, ka njoftuar Xhon Çesnut.

 

Atij i është vjedhur edhe kompjuteri Lap-top, rreth 800 euro dhe disa gjëra tjera të vlefshme. z. Xhon Çesnut ka pohuar se kjo vjedhje i ka shqetësuar shumë fëmijët e tij e veçanërisht fëmijën Lidian 5 vjeçare që ka qarë dhe pyetur çka do të bëhet nëse hajant do të hyjnë në shtëpi derisa fëmijët mund të jenë brenda.

 

“Ne shpresojmë se kriminelët do të sillen para drejtësisë sepse SHPK-ja ka reaguar shumë shpejt, por kjo u ka ndodhur edhe shumë familjeve tjera të Kosovës dhe ne kemi më shumë konsideratë për qytetarët e Kosovës për atë që kanë përjetuar gjatë regjimit të Millosheviqit. Pranë drurit të Krishtlindjeve ne presim rezultatet e policisë dhe lutemi para Jezu Krishtit për të na shpëtuar ne dhe ata që na plaçkitën”, ka përfunduar z. Çesnut.

Copyright©2000-2002 Trepca.net - Të drejtat e rezervuara.