Rugova: Pavarësia e Kosovës të njihet drejtpërdrejt

Pragë, 30 dhjetor 2002 - "Unë insistoj që pavarësia e Kosovës të njihet drejtpërdrejt nga Shtetet e Bashkuara, nga Bashkimi Evropian dhe nga OKB-ja që do ta formalizonte", tha Presidenti i Kosovës Ibrahim Rugova, duke shtuar se "situata e re e krijuar qe tri vjet e gjysmë në Kosovë, pra progresi, realiteti i ri, të gjitha, janë parakushte që të njihet drejtpërdrejt Kosova".   Në një intervistë dhënë radios "Evropa e lirë", Presidenti Rugova, lidhur me standardet që kërkohen nga bashkësia ndërkombëtare, tha se qe tri vjet e gjysmë punohet në këto standarde.    "Kohët e fundit, kryeadministratori Shtajner i ka reduktuar në pesë-gjashtë pika, që, de facto janë të gjitha ato në të cilat kemi punuar qe tri vjet e gjysmë.

   

Them se më përpara duhet të njihet pavarësia e Kosovës ose nëse shkojmë me këto terma që po thonë statusi para standardeve, ose pas standardeve, UNMIK-u do të vazhdonte atëherë me një formë më të reduktuar, ndërsa NATO-ja do të kishte baza këtu përgjithmonë, pasi do të jemi anëtar i NATO-s, anëtar i Bashkimit Evropian dhe do bënte sigurinë e Kosovës dhe ne sigurisht do të forcoheshim në planin e sigurisë", thekson z.Rugova.

Në një pyetje lidhur me simbolet që ka propozuar dhe nëse ato do të jenë të pranueshme për të gjitha palët, Presidenti Rugova tha se ekzistojnë procedura, si në çdo shtet, se si aprovohen këto. "Unë si kryetar i Kosovës kam marrë këtë iniciativë, për flamurin për himnin. Himni, siç e dini, ka qenë një këngë e 1912, që e kanë kënduar luftëtarët e atëhershëm, populli, të gjithë.

 

Më duket edhe në Shqipëri dhe në vise të tjera shqiptare është kënduar, prandaj do të regullohet në pikëpamje profesionale, artistike dhe me standarde shtetërore. Po ashtu, edhe flamuri i ruan elementet themelore të përgjithshme kombëtare dhe specifikat e Kosovës, pra të Dardanisë antike dhe të Dardanisë së mëvonshme. Kjo do të bëhet në konsultim me të gjitha institucionet e Kosovës....

 

Shqipëria aktualisht i përdor simbolet që kanë qenë gjithëkombëtare, si shtet aktual - ne do t'i kemi simbolet tona, që të jemi anëtar i OKB-së". Ndërkaq lidhur me me pozitën e minoriteteve, zoti Rugova tha se ka pasur një progres, edhe sa u përket serbëve. Serbët që janë në Kosovë, janë të integruar në institucione, në parlament, në qeveri, pastaj në ministritë e ndryshme, ku minoritetet i kanë dy ministri, gjuhët e tyre janë edhe gjuhë zyrtare.

"Ne parimisht jemi për kthime individuale të të gjithëve. Është kthyer një numër i madh, rreth tetë mijë vetëm gjatë dy vjetësh, që do të thotë se ka një kthim pozitiv, por nuk jemi për atë dhe është e pamundur të bëhet siç propagandon Beogradi kthime masive etj., sepse do të krijonim çrregullime dhe besoj edhe vetë qytetarët serbë të Kosovës nuk dëshirojnë të ketë gjëra të tillë...

 

Ndikimi i Beogradit, ndërkaq, mund të jetë pozitiv - ata kanë të drejtë të interesohen për serbët, por jo të përzihen në punët e Kosovës, ashtu siç kemi ne të drejtë të interesohemi për shqiptarët në Maqedoni, në Luginë të Preshevës apo në Mal të Zi, por kurrsesi të mos krijojmë çrregullime brenda shteteve të caktuara", theksoi presidenti Rugova.

Copyright©2000-2002 Trepca.net - Të drejtat e rezervuara.