Presidenti Rugova: Pavarësia e Kosovës, përpara standardeve

Prishtinë, 27 dhjetor 2002 - Presidenti i Kosovës, Ibrahim Rugova i dha mbrëmë një intervistë të drejtpërdrejtë RadioTelevizionin 21 të Prishtinës.   Duke folur për zhvillimet aktuale në Kosovë, Presidenti Rugova tha se përgjithësisht është i kënaqur me proceset demokratike, me tolerancën ndëretnike, integrimin e minoriteteve, bashkëpunimin e institucioneve vendore me ato ndërkombëtare, megjithatë nënvizoi se demokracia nuk është kurrë e mjaftueshme, aq më tepër në një vend si Kosova, vetëm tre vjet pas luftës.   Presidenti Rugova është i mendimit se më përpara duhet të vendoset statusi i Kosovës, pra pavarësia e saj, dhe më pas të plotësohen standartet e parashikuara nga bashkësia ndërkombëtare. Ai tha se pavarësia do të përshpejtonte procesin e realizimit të standarteve. Në pyetjen se si mund të përshpejtohet integrimi i minoriteteve në Kosovë, Presidenti Rugova u shpreh se megjithëse në zgjedhjet e para lokale serbët nuk morën pjesë, ata u nominuan. "Kemi pasur progres në integrimin e grupeve etnike.

  

Kështu në Parlament ato janë mjaft të prezantuara. Serbët janë grupi i tretë në parlament. Dy ministri janë të minoriteteve. Ka ende serbë që ende mendojnë me logjikën e vjetër të dominimit.

 

Ajo kohë ka kaluar, por shumica e tyre kanë filluar të integrohen dhe të gjejnë vendin e vet në shtetin e Kosovës", tha Presidenti Rugova. Sipas tij, në enklava ka siguri më të mirë dhe shqiptarët si shumicë garantojnë për grupet etnike. "Por edhe ato (minoritetet) duhet të shprehin vullnetin e tyre dhe të angazhohen, sepse perspektivën e kanë në Kosovë. Qëllimi ynë nuk është izolimi, por integrimi i minoriteteve", tha z.Rugova.

Presidenti i Kosovës më pas theksoi se përgjithësisht është i kënaqur me proceset e demokracisë në Kosovë. "Mos të harrojmë që janë 3 vjet e gjysmë pas lufte. Ne jemi një shoqëri e dalë nga lufta, por megjithatë kemi ruajtur frymën demokratike edhe mes nesh.

 

Zgjedhjet dhe krijimi i institutcioneve janë hapa pozitivë. Ka më shumë tolerancë dhe siguri. Fatkëqësisht kemi ende raste dhune, si disa shpërthime kohët e fundit, por gjendja e sigurisë është shumë më e mirë dhe në progres e sipër. Demokracia s’është kurrë e mjaftueshme, por jemi në proces e sipër", u shpreh Rugova.

I pyetur se kur do të fillojë procesi i përcaktimit të statusit përfundimtar të Kosovës, Presidenti Rugova tha se është mirë që Kosova pas këtij procesi prej 3 vjet e gjysmë të ketë një njohje të pavarësisë së saj që do të qetësonte rajonin, do të hiqte frikën e popullit të Kosovës për ta ardhmen dhe zhvillimi do të ishte më i madh.

 

"Nuk dua të bëj parashikime, por janë pjekur kushtet që të zgjidhet kjo çështje dhe të njihet pavarësia. Insistoj që statusi të zgjidhet përpara standardeve sepse do të përshpejtonte edhe realizimin e standardeve. Kështu UNMIK-u do të vazhdonte të monitoronte Kosovën në një formë tjetër, ndërsa KFOR do të mbetej për të garantuar sigurinë e përgjithshme", tha z. Rugova.

Duke folur për përfshirjen e Kosovës në kartën kushtetuese të unionit të ri Serbi-Mali i Zi, Rugova tha: "Ata kanë logjikën e vjetër të dominimit, madje mitologjik në lidhje me Kosovën, por juridikisht dhe legalisht preambula nuk ka asnjë vlerë. Ajo nuk mund të ndikojë kurrsesi në proceset këtu".

Presidenti Rugova foli edhe për bashkëpunimin e institucioneve vendore dhe ndërkombëtare, duke vlerësuar se përgjithësisht ky është bashkëpunim i mirë, por duhet të gjehen forma më produktive.

 

"Kur emërova ambasadorin Bob Doll si përfaqësues të Kosovës në SHBA, e bëra në kompetencat e mia të rezervuara, ndërsa për ambasadat duhet të bisedojmë me kryeadministratorin Mihael Shtajner dhe të ngjallim këto organizma.

 

Vitin e ardhshëm do të përpiqemi me kryeadministratorin që të hapim zyra në Evropë, që të mos mbetemi në mëshirën e fjalëve dhe skemave të ndryshme. Kosova duhet të dalë më shumë në arenën ndërkombëtare", tha Rugova.

Presidenti premtoi gjithashtu se së shpejti do të shkojë edhe për një vizitë zyrtare në Tiranë, për të përmirësuar bashkëpunimin e gjithanshëm mes Shqipërisë dhe Kosovës. Ai foli edhe për rëndësinë e autostradës Durrës-Prishtinë, për të cilën tha se do të ketë vlera ndërkombëtare.

Një temë tjetër e intervistës ishte edhe çështja e simboleve shtetërore të Kosovës, e cila ka ngjallur shumë polemika. Rugova i vlerësoi këto polemika si pozitive dhe saktësoi se simbolet kombëtare nuk do të hiqen kurrsesi.

 

"Simbolet kombëtare nuk do të hiqen. Por duhen ato shtetërore për t’u bërë anëtar i OKB-së. Himni është një këngë e vjetër e vitit 1912, shumë e dashur dhe e kënduar nga shqiptarët, që do të modifikohet. Flamuri është ai që unë e përdor prej disa vitesh si flamur të Presidencës. Ky është propozimi im dhe duhet të diskutohet nga të gjitha institucionet e tjera të Kosovës", tha Rugova.

Copyright©2000-2002 Trepca.net - Të drejtat e rezervuara.