Podujevë, 27 dhjetor 2002 (TN) – Jemi të lumtur që mund t’ju themi se vizita e fëmijëve të Kosovës – Podujevës në Republikën e Çekisë ishte frytdhënëse dhe e suksesshme, tha komandanti i Batalionit të Dytë të KFOR-it çeko-sllovak, nënkoloneli Piter Prohaska në konferencën e mbrëmshme për media në të cilën mori pjesë edhe zv. kryetari i komunës Agim Kikaj, Mr. Shpejtim Bulliqi drejtor i drejtorisë së arsimit dhe ushtarakë të KFOR-it çek.

z. Prohaska ka njoftuar për takimet e fëmijëve kurse mbitogeri Mraz  dhe kapteri Vollni në detaje informuan për takimet dhe punën e përbashkët të nxënësve nga Kosova me ata të shkollave çeke, sidomos për takimet në Nova Paka dhe në Pragë.

Zv. kryetari Agim Kikaj njoftoi për takimet e delegacionit të komunës së Podujevës me kryetarët e komunave Usti nad Orlici dhe në Horni Pllana si dhe përvojat e fituara gjatë këtyre takimeve.

“Binjakëzimi me komunën Usti nad Orlici është çështje për të cilën do të bashkëbisedohet në vizitën që delegacioni i asaj komune pritet ta bëjë vitin e ardhshëm”, ka theksuar z. Kikaj ndër të tjera. Drejtori i drejtorisë për arsim  Mr. Shpejtim Bulliqi ka folur për ndjenjat e fëmijëve llapjanë dhe shoqërimin e fëmijëve që bashkërisht kanë krijuar ëndërrat e përbashkëta.

Z. Kikaj ka njoftuar se organizata “Qindkëmbëshja” e udhëhequr nga Grande Bella Jensen do të grumbullojë mjete materiale në vlerë prej 40 mijë euro për riparimin e shkollës fillore “Nuhi Gashi” në Bradash, projekt që do ta realizojë KFOR-i çek si dhe për ftesën e Ministrit të Mbrojtjes të Republikës Çeke z. Jaroslav Tvrdik për 80 fëmijë tjerë të Podujevës që planifikohet ta vizitojnë këtë shtet vitin e ardhshëm.