Lajme, 27.12.2002 (a)

27/12/2002 - Trepça.net

Lajme, 27.12.2002 (a)

Përmbajtja:

Ministri shqiptar i ekonomisë kërkon nga Shtajneri realizimin e Marrëveshjes e tregtisë së lirë
Në Deçani është protestuar kundër dënimit të pesë ish-eprorëve të lartë të TMK-së
Lotaria e Kosovës është pranuar në organizatën e lotarive shtetërore evropiane
Gjingjiq thotë se koha punon kundër Serbisë në çështjen e Kosovës
Është klonuar qenia e parë njerëzore, një foshje femër
Presidenti i Koresë së Jugut fton Korenë e Veriut të anulojë planet për reaktor bërthamor
Zgjedhje historike presidenciale në Keni
Inspektorët nuk kanë gjetur asnjë provë për të mbështetur pretendimet amerikane dhe britanike
Organizata ndërkombëtare për energji bërthamore ka hedhur poshtë qëndrimin e Koresë Veriore
Në Francë janë arrestuar edhe katër të dyshuar tjerë për terrorizëm
Gjatë sulmit amerikano-britanik janë vrarë tre irakianë kurse 16 janë plagosur
Rusia dhe Irani janë dakorduar që të përshpejtojnë kompletimin e centralit bërthamor
Të pakten 8 palestinezë janë vrarë, 30 plagosur dhe 20 janë arrestuar nga armata izraelite
Rreth 30 mijë turq qipriotë kanë demostruar në dobi të ribashkimit të Qipros

Ministri shqiptar i ekonomisë kërkon nga Shtajneri realizimin e Marrëveshjes e tregtisë së lirë

Tiranë, 27 dhjetor 2002 - Ministri shqiptar i ekonomisë Arben Malaj i ka dërguar dje një letër kryeadministratorit të Kosovës Mihael Shtajner për fillimin e bisedimeve për Marrëveshjen e tregtisë së lirë mes Kosovës dhe Shqipërisë.

Ai ka kërkuar që autoritetet e UNNMIK-ut të bëjnë gati ekipin e tyre që do të bisedojë me palën shqiptare për të gjitha detajet e një marrëveshje të tillë. Kjo kërkesë u bë pasi Shqipëria dhjetë ditë më parë mbylli marrëveshjet e tregtisë së lirë me të gjitha vendet e tjera të rajonit.
Mirëpo, deri më tash Shqipëria nuk ka pasur ndonjë efekt ekonomik nga nënshkrimi i marrëveshjeve me vendet e rajonit.


Në Deçani është protestuar kundër dënimit të pesë ish-eprorëve të lartë të TMK-së

Deçan, 27 dhejtor 2002 - Disa mijëra qytetarë të Deçanit dhe vendbanimeve përreth dje sërish kanë protestuar kundër dënimit kohë më parë të pesë ish-eprorëve të lartë të TMK-së me 31 vjet heqje lirie, duke përfshirë edhe ish-komandantin e Zonës së Tretë të këtyre trupave Daut Haradinaj.
Këshilli organizativ i protestave në Deçan dje ka dalë edhe me disa kërkesa politike, duke kërkuar pos lirimit të ish-pjesëtarëve të UÇK-së edhe shfuqizimin e menjëhershëm të preambulës së Kartes Kushtetuese të Serbisë e Malit të Zi ku Kosova mendohet të jetë pjesë e Serbisë. Kjo kërkesë e fundit është bërë në adresë të bashkësisë ndërkombëtare.

Është hera e parë që në një protestë të tillë janë dëgjuar kërcënimet e natyrës: "Mos e prekni TMK-në se ajo kthehet në UÇK"!.


Lotaria e Kosovës është pranuar në organizatën e lotarive shtetërore evropiane

Prishtinë, 27 dhjetor 2002 - Lotaria e Kosovës është pranuar në organizatën e lotarive shtetërore evropiane me seli në Llozanë të Zvicres si anëtare e barabartë, konfirmoi drejtori i Lotarisë së Kosovës Bashkim Sllamniku. Ndërkohë, veprimtaria e kësaj lotarie në Kosovë është pezulluar me vendimin e përbashkët të UNMIK-ut dhe të Qeverisë së Kosovës.
Para disa muajve Qeveria e Kosovës dhe UNMIK-u kërkuan nga lojërat e fatit t'i paguajnë nga dy milionë euro dhe pastaj ta vazhdojnë punën. Mirëpo, askush nuk ka arritur t'i paguajë këto para dhe kështu të gjitha lojërat e fatit u mbyllën.


Gjingjiq thotë se koha punon kundër Serbisë në çështjen e Kosovës

Beograd, 27 dhjetor 2002 - Koha punon kundër Serbisë në çështjen e Kosovës dhe statusi i saj duhet zgjidhur shpejt, ka thënë kryeministri serb Zoran Gjingjiq në një konferencë shtypi në fund të motmotit. "Kjo është një nga ato çështje ku koha nuk punon për ne.

Është çështje e cila duhet të zgjidhet në vitin 2003", ka thënë Gjingjiq, por ka shtuar se janë kohëra të vështira për Beogradin që të gjejë partnerë për bisedime.


Është klonuar qenia e parë njerëzore, një foshje femër

Majami, 27 dhjetor 2002 – Sipas njoftimeve të mediave pritet që kompania "Clonaid" sot pasdite (të premten) të kumtojë në një konferencë shtypi se ka prodhuar të parën qenie njerëzore të klonuar, e cila do të jetë një foshnje femër, e lindur e shëndoshë, njofton Rojter.

Konferena e shtypit do të mbahet në Hollivud, Floridë, në veri të Majamit. Klonimi është shikuar nga shumica e shkencëtarëve me skepticizëm.

Ata kanë dyshuar në aftësinë teknike të klonimit të qenieve njerëzore. Bagëtitë, minjtë, delet dhe shtazët e tjera janë klonuar me sukses të herëpashershëm. Disa shtazë kanë treguar defekte më vonë gjatë jetës. Shkencëtarët drojnë se kështu do të ndodhë edhe me qeniet njerëzore.


Presidenti i Koresë së Jugut fton Korenë e Veriut të anulojë planet për reaktor bërthamor

Seul, 27 dhjetor 2002 - Presidenti i Koresë së Jugut, Roh Muhjun i ka bërë thirrje Koresë së Veriut që të anulojë planet për të rivënë në punë një reaktor bërthamor, i cili mund të prodhojë pluton për armë. Z. Roh, që javën e shkuar fitoi zgjedhjet presidenciale në Korenë e Jugut tha se Pjonjangu po sfidon dëshirat e komunitetit ndërkombëtar për t'i dhënë fund përhapjes bërthamore.
Veprimet e Veriut, sipas tij, bien në kundërshtim me shpresat e Seulit për paqe në gadishullin korean. Më herët, Australia anulloi planet për të hapur një ambasadë në Korenë e Veriut. Disa vende perëndimore, përfshirë këtu dhe Australinë, forcuan lidhjet me Korenë e Veriut pas një samiti mes dy koreve para dy vjetësh.


Zgjedhje historike presidenciale në Keni

Keni, 27 dhjetor 2002 - Banorët e Kenias kanë filluar votimin për zgjedhjet presidenciale dhe të përgjithshme në vend. Pesë kandidatë janë në garë për të zëvendësuar në postin e presidentit, Daniel Arap Moi, të cilit i ndalohet me kushtetutë që të qëndrojë në post pas 24 vjetëve në pushtet.

Këto zgjedhje do të shënojnë herën e parë në historinë e vendit ku një president do të zëvendësojë një tjetër në rrugë demokratike. Rezultatet e zgjedhjeve priten të dielën.


Inspektorët nuk kanë gjetur asnjë provë për të mbështetur pretendimet amerikane dhe britanike

Bagdad, 27 dhjetor 2002 - Kreu i grupit të zyrtarëve irakianë që punojnë me inspektorët e Kombeve të Bashkuara për armët, tha se inspektorët nuk kanë gjetur asnjë provë për të mbështetur pretendimet amerikane dhe britanike se Iraku ka armë të shkatërrimit në masë.

Hosam Muhamed Amin tha se rezultatet e inspektimeve mbështesin pretendimin e Irakut se nuk ka armë të tilla dhe as programe për zhvillimin e tyre.
Inspektorët e vazhduan të enjten punën e tyre duke intervistuar rektorin e Universitetit Teknologjik të Bagdadit, ndërkohë që vazhdojnë procesin e kërkimit për armë të shkatërrimit në masë.


Organizata ndërkombëtare për energji bërthamore ka hedhur poshtë qëndrimin e Koresë Veriore

Vjenë, 27 dhjetor 2002 - Organizata ndërkombëtare për energji bërthamore ka hedhur poshtë qëndrimin e Koresë Veriore sipas të cilit vendi duhet të riaktivizojë centralet atomike për prodhimin e energjisë elektrike.

Riaktivizimi i reaktorit në Jongbon nuk mund të arsyetohet me mungesë të energjisë elektrike në Korenë Veriore, tha shefi i autoritetetit të Kombeve të Bashkuara për energji nukleare, Mohamed el-Baradej.


Në Francë janë arrestuar edhe katër të dyshuar tjerë për terrorizëm

Paris, 27 dhjetor 2002 - Njësitë antiterrorisite në Francë kanë arrestuar edhe katër të dyshuar tjerë për terrorizëm. Katër meshkujt janë arrestuar që ditën e martë nga forcat policore, njoftoi një zëdhënës i policisë në Paris. Sipas të dhënave të para ata janë me prejardhje nga Algjeria.

Njëri prej tyre mendohet të jetë vëllau i Murad Ben Xhelalit i cili së bashku me anëtarët e talibanëve afganë dhe rrjetit terrorist të El Kaidës po mbahet në burgun e bazës amerikane Guantanamo në Kubë.


Gjatë sulmit amerikano-britanik janë vrarë tre irakianë kurse 16 janë plagosur

Uashington, 27 dhjetor 2002 - Aviacioni amerikano-britanik ka sulmuar stabilimente komanduese-kontrolluese të Irakut afër Talilit, pasi avionë irakianë kishin shkelur zonën jugore të ndalim fluturimeve, njoftoi Komanda qendrore e armtës së Shteteve të Bashkuara. Agjencia zyrtare irakiane e lajmeve tha në Bagdad se gjatë sulmit u vranë tre irakianë kurse 16 janë plagosur.


Rusia dhe Irani janë dakorduar që të përshpejtojnë kompletimin e centralit bërthamor

Teheran, 27 dhjetor 2002 - Rusia dhe Irani janë dakorduar që të përshpejtojnë kompletimin e centralit bërthamor, Bushar të Iranit dhe të studiojnë ndërtimin e një centrali tjetër energjetik bërthamor, siç thonë, për qëllime civile.
Shtetet e Bashkuara kanë kërkuar që Irani, i pasur me naftë, të braktisë projektet e tilla, duke thënë se mundë të shfrytëzojë teknologjinë për ndërtimin e armëve bërthamore.


Të pakten 8 palestinezë janë vrarë, 30 plagosur dhe 20 janë arrestuar nga armata izraelite

Ramallah, 27 dhjetor 2002 - Së paku 8 palestinezë janë vrarë, 30 plagosur dhe 20 janë arrestuar nga armata izraelite anembanë Bregut Perëndimorë dhe Brezit të Gazës, thonë burime palestineze të sigurisë.

Në mesin e të vrarëve ka qenë edhe një nga liderët lokalë të Xhihadit Islamik, i cili ishte vrarë në shtëpin e tij në Qabatia.

Janë plagosur edhe disa ushtarë izrelitë gjatë shkëmbim zjarrit me militantin palestinez, kur kishin shkuar ta arrestojnë.


Rreth 30 mijë turq qipriotë kanë demostruar në dobi të ribashkimit të Qipros

Nikozi, 27 dhjetor 2002 - Rreth 30 mijë turqë qipriotë kanë demostruar në dobi të ribashkimit të pjesëve greke dhe turke të Qipros që ishulli të mundë t'i bashkohej Bashkimit Evropian.

Demostruesit kanë kërkuar dorëheqien e liderit të turqve qipriotë, Rauf Denktash, të cilin ata e kanë akuzuar për blokimin e një marrëveshjeje me grekët qipriotë.