Lajme, 26.12.2002 (b)

Përmbajtja:

• Shpallen dhjetë subjektet më të suksesshme kulturore për vitin 2002

• "Kemi përjetuar fyerjet e papresedencë në botë", thotë ambasadori britanik në Beograd

• Nga një shpërthim në qendër të Kumanovës është një i vrarë dhe pesë të plagosur

• Në shkup ka përfunduar takimi i liderëve politikë të Maqedonisë

• Forcat izraelite kanë vrarë sot katër palestinezë në operacione të ndryshme

• Lordi Robertson ka mbrojtur politikën e administratës së Bushit përkitazi me Irakun

Shpallen dhjetë subjektet më të suksesshme kulturore për vitin 2002

 

Prishtinë, 26 dhjetor 2002 - Në ambientet e hotelit "Iliria" në Prishtinë, Drejtoria e Drejtoratit për Kulturë, Rini, Sport e Gjini i Kuvendit Komunal të Prishtinës, shpalli dhjetë subjektete më të rëndësishme kulturore për vitin 2002.

Drita Rudi, drejtoreshë e Drejtoratit për Kulturë, Sport, Rini e Gjini të KK të Prishtinës tha përkundër aktivitetit të begatshëm gjatë vitit të kaluar, ka pasur edhe vështirësi të ndryshme e në veçanti në pengesa të natyrës materiale.

 

Vetëm 250 mijë euro vetëm për vitin 2002, nuk kanë mjaftuar që të përmbushen të gjitha kërkesat për aktivitetet e kulturës, sportit e rinisë, kur të kihet parasysh se Prishtina është kryeqyteti i Kosovës, tha zonja Rudi.

Ndërkaq, kryetari i KK të Prishtinës, Ismet Beqiri, premtoi mbështetje të fuqishme për Drejtoratin për Kulturë, Rini, Sport e Gjini të KK të Prishtinës, sepse, siç u shpreh ai, Prishtina është qendër kulturore e sportive e Kosovës.

 

Poashtu z.Beqiri siguroi se ky Drejtorat do ta ketë tretmanin ashtu siç edhe e meriton.

Me mirënjohje u nderuan:

 

• Instituti i Monumenteve në Prishtinë,

• Ansambli kulturo-artistik i Universitetit të Prishtinës,

• teatri "Dodona",

• Qendra e Pionierëve 2000,

• kori i fëmijëve "Xixëllonjat",

• Qendra Rinore në Prishtinë,

• Teatri Kombëtar,

• Kori i vajzave "Tefta Tashko" dhe

• kompania ndërtimore "Standard" me seli në Prishtinë.

 

---

 

"Kemi përjetuar fyerjet e papresedencë në botë", thotë ambasadori britanik në Beograd

 

Beograd, 26 dhjetor 2002 - "Kemi përjetuar fyerjet e papresedencë në botë, incidentin në qendër të Beogradit, kryeqendër e Serbisë, në vetë zemrën e kishës", ka deklaruar anbasadori i Britanisë së Madhe në Beograd Çarlls Kraford, duke shtuar se "është vështirë të mendohet të ndodhë diçka më e vrazhdët". Për ambasadorin Kraford pengimi i shërbesës së Kishës anglikane ishte një ngjarje e lig dhe një fyerje e rrallë.

Të martën nja 50 qytetarë me qirinj dhe ikona në duar kanë penguar shërbesën e Kishës anglikane në patrikanën e kishës ortodokse serbe në Beograd me rastin e mbrëmjes së buzmit sipas kalendarit gregorian e në të cilën është dashur të marrë pjesë edhe ambasadori Kraford.

 

---

 

Nga një shpërthim në qendër të Kumanovës është një i vrarë dhe pesë të plagosur

 

Kumanovë, 26 dhjetor 2002 - Nga shpërthimi i një mekanizmi në qendër të Kumanovës që besohet të ketë qenë granatë dore është vrarë Radivoje Grozdanovski, kurse pesë persona të tjerë janë plagosur, njofton policia e Maqedonisë. Mekanizmi shpërthyes ishte i vendosur në një kontejner bërllogu në qendër të qytetit, kurse policia ka ndërmarrë hetime.

 

---

 

Në shkup ka përfunduar takimi i liderëve politikë të Maqedonisë

 

Shkup, 26 dhjetor 2002 - Në shkup ka përfunduar takimi i liderëve politikë të Maqedonisë te presidenti i vendit Boris Trajkovski, të cilët kanë konfirmuar përcaktimin për implementimin e plotë dhe të shpejtë të Marrëvshjes Kornizë.

 

Ata kanë vlerësuar se një nga priortetet në Maqedoni është përforcimi i stabilitetit dhe afrimi me BE dhe NATO-s. Në konkluzionet e takimit triorësh thuhet se qeveria do të përgatisë një pako ligjesh për decentralizim deri në muajin maj të vitit të ardhshëm.

Trajkovski shpërthimin e djeshëm në Kumanovë e ka quajtur "akt terrorist kundër stabilizimit të shtetit".

Në këtë takim kanë marrë pjesë vetëm tre liderë nënshkrues të Marrëveshjes së Ohrit: Cërvenkovski, Xhaferi dhe Ymeri, kurse Georgievski nuk mori pjesë.

 

---

 

Forcat izraelite kanë vrarë sot katër palestinezë në operacione të ndryshme

 

Ramallah, 26 dhjetor 2002 – Forcat izraelite kanë vrarë sot (të enjten) katër palestinezë në operacione të ndryshme të rrufeshme në Bregun Perendimor, përfshirë edhe militantin e Xhihadit islamik, për të cilin është njoftuar në emitimet e mëhershme, njofton Rojter.

 

Këto operacione janë ndërmarrë përkundër thirrjeve të Uashingtonit për paqe, që kanë për qëllim mbështetjen arabe për luftën e mundshme kundër Irakut.

 

---

 

Lordi Robertson ka mbrojtur politikën e administratës së Bushit përkitazi me Irakun

 

Londër, 26 dhjetor 2002 – Sekretari i përgjithshëm i NATO-s Xhorxh Robertson ka mbrojtur politikën e administratës së Bushit përkitazi me Irakun dhe ka thënë se amerikanët nuk do të ndërmarrin aksion ushtarak unilateral.

 

Robertson ka thënë sot (të enjten) se presidenti Xhorxh Bush iu ka përmbajtur rreptësisht mënyrës së Kombeve të Bashkuara për çarmatosjen e Irakut.

 

Z. Robertson ka tërhequr vërejtjen gjithashtu se anëtarët e NATO-s janë moralisht të obliguar t'u japin SHBA-ve çfarëdo ndihme që kërkojnë nëse dështon procesi i inspektimit të armëve dhe Kombet e Bashkuara vendosin të fillohet aksioni ushtarak kundër Irakut.

 

Kërkimi i armëve të shkatrërrimit në masë në Irak ka vazhduar pa ndërprerje edhe gjatë periudhës së Krishtlindhjeve.

Copyright©2000-2002 Trepca.net