Lajme, 26.12.2002 (a)

26/12/2002 - Trepça.net

Lajme, 26.12.2002 (a)

Përmbajtja:

Komiteti për siguri dënon vrasjen e serbit në Cërnicë të Gjilanit
Edhe në Kosovë solemnisht u kremtuan Krishtlindjet
Në Pejë nga një shpërthim autobombë ka humbur jetën Adem Zeka
Policia serbe nuk identifikon autorët e krimeve ndaj shqiptarëve
Shtajner: Statusi i Kosovës nuk mund të zgjidhet kurrsesi me hapa të njëanëshëm
Faruk Ramadani u shpall boksieri më i mirë për këtë vit
Nga një shpërthim në qendër të Kumanovës është një i vrarë dhe pesë të plagosur
Beogradi dhe serbët e Kosovës kanë arritur marrrëveshje për strategjinë e përbashkët
Në kufirin verior të Maqedonisë nuk ka grupe terroriste dhe as kampe për stervitje
Ushtarët izraelitë kanë vrarë sot një militant të lartë të Xhihadit islamik
Një tiketë llotarie në Virxhini të SHBA-ve ka fituar shumën prej 315 milionë dollarësh
Seuli shqetësohet nga lëvizjet në Korenë Veriore
Australia do të ndërmarrë masa sigurie për ambasadat
Si pasojë e reshjeve të mëdha të borës në disa pjesë të SHBA kanë humbur jetën të paktën 15 përsona
Vritet udhëheqësi i degës së partisë promoskovite në kryeqytetin e Çeçenisë
Tre persona janë vrarë në provincën Penxhab të Pakistanit

Komiteti për siguri dënon vrasjen e serbit në Cërnicë të Gjilanit

Gjilan, 26 dhjetor 2002 - Vrasjen e serbit Trajan Trifunoviq në fshatin Cërnicë e ka dënuar edhe Komiteti për siguri dhe emergjencs i komunss ss Gjilanit, në takimin e parë që ka mbajtur pas zgjedhjeve të dyta lokale dhe ku kanë marrë pjesë edhe përfaqësuesit e KFOR-it, SHPK-së, tri subjektet politike që kanë vende në asamble si dhe përfaqësuesi i minoriteteve.

Komiteti e ka vlerësuar sigurinë e përgjithshme në tremujorin e fundit, e cila deri në rastin e fundit në Cërnicë, ku në rrethana ende të pasqaruara, u vra një serb lokal i këtij vendbanimi të përzier, ishte mjaft stabile.
Mbetet përgjegjësi e organeve të policise dhe gjyqit që ta zbardhin rastin dhe ndaj kryesve të merren masat e duhura ligjore, ndërsa institucionet e komunës u shprehën të gatshme për t`i ofruar një ndihmë momentale familjes së të ndjerit Trifunoviq, nëse ajo ka nevojë.


Edhe në Kosovë solemnisht u kremtuan Krishtlindjet

Prishtinë, 26 dhjetor 2002 - Me rastin e kremtimit të Krishtlindjeve në të gjitha kishat katolike në Kosovë u mbajtën mesha tradicionale. Manifestimi qendror u mbajt në kishën "Shën Ndou" në Prishtinë, ndërsa meshën solemne e udhëheqi ipeshkëvi i Ipeshkëvisë së Kosovës imzot Mark Sopi.

Në këtë manifestim morën pjesë personalitete politike e ushtarake ndërkombëtare dhe vendore.
Pasi uroi besimtarët imzot Mark Sopi bëri thirrje për mirëkuptim, dashuri dhe tolerancë njerëzve pavarësisht nga përkatësia e tyre etnike e fetare, duke shtuar se e veçanta e kësaj feste është se pak ditë më parë Papa Gjon Pali i Dytë njohu mrekullitë e Nënës Terezë për të bërë kështu hapat e parë në procesin e shenjtërimit të saj.

Ai nënvizoi se Nëna Tereze i ka kaluar edhe kufijtë njerëzor dhe është bërë nënë e mbarë njerëzimit, tha me këtë rast imzot Mark Sopi. Ai shtoi se njerëzimi deri më tash nuk ka pasur një grua të tillë që mbarë bota e ka quajtur nënë, por tash ka Nënën Terezë.
Kremtja e Kërshëndellave tha ai nënkupton edhe një tërësi feste liturgjike popullore dhe folklorike.
Pos meshave të zakonshme në qytetet kryesore të Kosovës festa e Krishtlindjeve është shënuar edhe me manifestime të ndryshme kulturore e artistike që kanë zgjatur deri në orët e para të mëngjesit.


Në Pejë nga një shpërthim autobombë ka humbur jetën Adem Zeka

Pejë, 26 dhjetor 2002 - Dje rreth orës 18:40 në aksin rrugor në drejtim të Spitalit të Përgjithshëm të Pejës ka ndodhur një shpërthim autobombë nga i cili ka humbur jetën Ade, Zeka 55-vjeçar nga fshati Raushiq i Pejës

Ndryshe, Ademi është babai i dëshmores së kombit Nurie Zeka.
Edhe zëdhënësi i Shërbimit Policor të Kosovës ka konfirmuar se nga një masë shpërthyese ka humbur jetën Adem Zeka nga fshati Raushiq, ndërkaq bashkëshortja e tij është lënduar rëndë.
Nuk dihen ende as autorët dhe as motivet e këtij shpërthimi për të cilin policia e Kombeve të Bashkuara ka ndërmarrë hetime. Bomba ishte e vendosur në automobilin që e ngiste Adem Zeka.


Policia serbe nuk identifikon autorët e krimeve ndaj shqiptarëve

Beograd, 26 dhjetor 2002 - Policia serbe mbetet e shurdhër ndaj kërkesave të gjykatave që të identifikojë personat që kanë bërë vrasje dhe kanë marrë pjesë në fshehjen e krimit ndaj shqiptarëve të Kosovës, kufomat e të cilëve janë gjetur në varrezat masive, thuhet në tekstin e Institutit për Raportime mbi Luftën dhe Paqen.

Ky institut konstaton se gjatë zbulimit të varrezave masive në Bajtajnicë deri tash janë gjetur 770 kufoma të vrarë nga paramilitarët apo popullata serbe thuhet në raport.


Shtajner: Statusi i Kosovës nuk mund të zgjidhet kurrsesi me hapa të njëanëshëm

Prishtinë, 26 dhjetor 2002 - Shefi i UNMIK-ut Mihajl Shtainer thotë se kur flitet për statusin e Kosovës, kjo çështje nuk mund të zgjidhet kurrsesi "me hapa të njëanëshëm, siç është preambula e Kartës kushtetusese të bashkësisë shetërore Serbi-Mali i Zi apo ndonjë vendim në Prishtinë".
Në një bisedë për mediat e Kosovës në gjuhën serbe Shtainer ka thënë se "askush nuk mundë të ketë të drejtën e vetos, kurse në fund për atw çështje do të vendosë Këshilli i Sigurimit i Kombeve të Bashkuara", por ka shtuar se "Kosova akoma nuk gjendet në ate fazë".
Kryeadministratori ka theksuar se shqiptarët si shumicë duhet të angazhohen për pakicat, por se pakicat, veçanërisht ajo serbe, duhet të pranojnë "realitetin e ri në Kosovë, që është ndryshe nga ai i vitit 1999".
Shtajner ka theksuar se shqiptarët si shumicë duhet të angazhohen për pakicat, ndërkaq pakicat, veçanërisht ajo serbe duhet të pranojnë realitetin e ri në Kosovë që është ndryshe nga ai i vitit 1999.


Faruk Ramadani u shpall boksieri më i mirë për këtë vit

Prishtinë, 26 dhjetor 2002 - Faruk Ramadani boksier i Klubit "Kastrioti" të Ferizajit, me të gjithë meqet e fituara, pa asnjë humbje, u shpall si boksieri më i mirë i Kosovës për këtë vit. Ndërkaq, si trajner më i mirë u shpall Afrim Majanci nga Klubi i boksit "Prishtina", ekip ky që u shpall edhe si më i miri për këtë vit.


Sali Berisha ka hedhur idenë e bashkimit të të gjitha partive të djathta opozitare në një forcë të vetme

Tiranë, 26 dhjetor 2002 - Kryetari i Partisë Demokratike të Shqipërisë Sali Berisha ka hedhur idenë e bashkimit të të gjitha partive të djathta opozitare në një forcë të vetme. Por, një propozim i tillë ka ngjallur reagime brenda partive opozitare.

Z. Berisha ka thënë se gjatë vitit 2003 do të diskutohet strategjia e përbashkët që mendon Partia Demokratike, përkatësisht të jetë një hap drejt bashkimit të forcave të djathta.

Mirëpo, kryetari i Partisë Republikane Fatmir Mehdiu është shprehur se ky propozim i Berishës në parim është një gjë e mirë bashkimi i opozitës. Legalistë thanë se nuk do të pajtohen me shkrirje në një parti të vetme.

Ndërkaq kundër idesë së z. Berisha ka dalë gjithashtu Balli Kombëtar si dhe Partia Demkrate e Reformuar. Shpëtim Roçi kryetar i ballistëve e ka quajtur thjesht shaka idenë e Berishës.


Nga një shpërthim në qendër të Kumanovës është një i vrarë dhe pesë të plagosur

Kumanovë, 26 dhjetor 2002 - Nga shpërthimi i një mekanizmi në qendër të Kumanovës që besohet të ketë qenë granatë dore është vrarë Radivoje Grozdanovski, kurse pesë persona të tjerë janë plagosur, njofton policia e Maqedonisë. Mekanizmi shpërthyes ishte i vendosur në një kontejner bërllogu në qendër të qytetit, kurse policia ka ndërmarrë hetime.


Beogradi dhe serbët e Kosovës kanë arritur marrrëveshje për strategjinë e përbashkët

Beograd, 26 dhjetor 2002 - Kryeministri i Serbisë Zoran Gjingjiq ka deklaruar se gjatë takimit të djeshëm në Beograd me përfaqësuesit politikë të serbëve të Kosovës është arritur marrëveshja për hartimin e strategjisë së përbashkët për përmirësimin e kushteve për bashkësinë nacionale serbe në Kosovë.

Gjingjiq nuk ka dhënë shumë hollësi për këtë strategji, por ka theksuar se hap i parë dhe më i rëndësishëm është formimi i vetëadministratave lokale të popullit serb në komunat në të cilat ata përbëjnë shumicën dhe në lokalitetet ku bëjnë shumicën sikurse bashkësitë lokale dhe fshatrat.
Ndërkaq, zëvendëskryeministri serb Nebojsha Çoviq theksoi se në organizimin e ardhshëm institucional të serbëve të Kosovës UNMIK-u nuk mund të pengojë, ngase ky organizim sipas tij qenka paraparë në Kornizën Kushtetuese të Kosovës.


Në kufirin verior të Maqedonisë nuk ka grupe terroriste dhe as kampe për stervitje

Shkup, 26 dhjetor 2002 - Në kufirin verior të Maqedonisë nuk ka grupe terroriste dhe as kampe për stervitje, porse akoma ekzistojnë grupe të caktuara kriminale që dëshirojnë të shkaktojnë incidente. Kështu ka deklaruar gjenerali maqedonas Aleksandër Bojaxhijev.


Ushtarët izraelitë kanë vrarë sot një militant të lartë të Xhihadit islamik

Xhenin, Bregu Perendimor, 26 dhjetor 2002 – Ushtarët izraelitë kanë vrarë sot (të enjten) një militant të lartë të Xhihadit islamik në një shkëmbim zjarri në shtëpinë e tij në fshatin palestinez Qabatija afër qytetit Xhenin në Bregun Perendimor, njofton Rojter. Zëdhënësi i armatës izraelite ka thënë se gjatë këtij shkëmbimi zjarri janë plagosur edhe katër ushtarë izraelitë.
Banorët e fshatit kanë thënë se autoblindat izraelite kanë hyrë në fshat dhe e kanë rrethuar shtëpinë e Hamza Abu Roubit, 35 vjeçar, lider lokal i Xhihadit islamik dhe gjatë luftimeve është vrarë Abu Roubi dhe janë plagosur katër palestinezë të tjerë.

Po kështu, njoftohet se në këtë fshat janë arrestuar edhe dy pjesëtarë të Xhihadit islamik. Ndërkaq, në operacione të veçanta në fshatrat palestineze, forcat izraelite kanë arrestuar nëntë palestinezë të kërkuar, ka thënë zëdhënësi i armatës izraelite.


Një tiketë llotarie në Virxhini të SHBA-ve ka fituar shumën prej 315 milionë dollarësh

Los Angjelos, 26 dhjetor 2002 – Një tiketë llotarie e shitur në natën e Krishtlindjeve të së mërkurës në Virxhininë Perendimore të Shteteve të Bashkuara ka fituar shumën marramendëse prej 315 milionë dollarësh, njofton Rojter. Llotaria është luajtur në 23 shtete të SHBA-ve plus Uashingtoni DC dhe Ujdhesat Virxhine. Numri fitues është 5, 14, 16, 29 dhe 53.


Seuli shqetësohet nga lëvizjet në Korenë Veriore

Seul, 26 dhjetor 2002 - Autoritetet e Koresë së Jugut janë shprehur se egziston nevoja për përpjekje të mëtejshme diplomatike që mund të bëjnë të mundur shmangien e krizës pasi Korea e Veriut filloi dërgimin e karburantit në një uzinë bërthamore që mund të përdoret për të prodhuar pluton.

Presidenti Kim Dae Jung i tha Këshillit të tij të Sigurimit se Seuli duhet të punojë me Shtetet e Bashkuara dhe Japoninë për të ndaluar keqësimin e situatës në Gjirin Korean.

Të mërkurën zyrtarë të Kombeve të Bashkuara thanë se koreanoveriorët kishin dërguar karburant në reaktorin e Jongbjonit, i cili nuk është përdorur që në vitin 1994.

Zëdhënësi i Agjencisë Ndërkombëtare të Energjisë Atomike tha se agjencia e tij ishte e shqetësuar, por ai tha se nuk kishte ende shenja se Korea e Veriut po përpiqej të rifillonte prodhimin e armëve bërthamore.


Australia do të ndërmarrë masa sigurie për ambasadat

Melburn, 26 dhjetor 2002 - Qeveria australiane po zhvendos një nga ambasadat e saj dhe po shqyrton mundësinë e lëvizjes edhe të ambasadve të tjera si rezultat i shqetësimeve në rritje për situatën e sigurisë pas bombardimeve në Bali në tetor.

Një zëdhënës i ministrisë së jashtme konfirmoi se një nga ambasadat që do të zhvendoset është ajo në kryeqytetin e Filipineve, Manila. Njoftimet e medias australiane thonë se do të zhvendosen edhe ambasada të tjera në Lindjen e Mesme dhe Azinë juglindore.
Zëdhënësi tha se do të rritej siguria në shumicën e misioneve australiane jashtë me struktura shtesë survejimi për t'i mbrojtuar ambasadat nga auto bombat.


Si pasojë e reshjeve të mëdha të borës në disa pjesë të SHBA kanë humbur jetën të paktën 15 përsona

Okllahomë, 26 dhjetor 2002 - Si pasojë e reshjeve të mëdha të borës në disa pjesë të SHBA kanë humbur jetën të paktën 15 përsona. Më së shumti janë qëlluar qytetet Oklahoma, Teksas dhe Luiziana, ku reshjet e borës janë shumë të rralla. Ekspertët thonë se moti i ligë do të vazhdojë edhe më tutje.


Vritet udhëheqësi i degës së partisë promoskovite në kryeqytetin e Çeçenisë

Grozni, 26 dhjetor 2002 - Një person i paidentifikuar ka vrarë Sajed-Amin Adizov udhëheqësin e degës së partisë pro-moskovite në kryeqytetin e Çeçenisë, Partisë së Rusisë së Bashkuar. Mediat ruse njoftojnë ndërkohë se 28 kryengritës çeçenë u janë dorzuar në Grozni autoriteteve federale.


Tre persona janë vrarë në provincën Penxhab të Pakistanit

Lahore, 26 dhjetor 2002 - Tre persona janë vrarë, kurse shtatë janë plagosur kur një sulmues i paidentifikuar ka hedhur një granatë në Kishën protestante në provincën Penxhab të Pakistanit.