Lajme, 24.12.2002

24/12/2002 - Trepça.net

Lajme, 24.12.2002

Përmbajtja:

Kadare: Fitorja më e rëndesishme për shqiptarët - hapja e horizontit drejt Evropës
KKSHA emëron Skot Beits si këshilltar të lartë për marrëdhëniet me qeverinë
KKSHA e konsideron Kushtetutën e Serbisë dhe Malit të Zi rrezik ndaj stabilitetit në Ballkan
Gjenerali Mini thotë se vetëm Kosova multietnike mund të bëhet pjesë e Evropës
Nga përplasja e aeroplanit ukrainas druhet se kanë humbur jetën 46 pasagjerë
"Tajms": Lufta e planifikuar kundër Irakut do të jetë një nga operacionet më të shpejta ndonjëherë të aplikuara
Armata izraelite është tërhequr në periferi të Betlehemit për shkak të Krishtlindjeve
KB po parapërgatiten për një luftë të mundshme në Irak
Përpjekjet e SHBA-ve për çarmatimin e Irakut ndodhen në fazën përfundimtare
Izraeli është përgatitur në rast të ndonjë sulmi ndaj Irakut
SHBA hedhin poshtë "shantazhet" e Koresë Veriore
Pengjet kërkojnë kompensim nga Moska
Aviacioni irakian ka rrëzuar një aeroplan vëzhgues pa ekipazh të Shteteve të Bashkuara
Ka filluar marrja në pyetje e njerëzve brenda Irakut
Netanjahu përjashton çfarëdo rrethane që një shtet i pavarur palestinez të ketë armatën e vet

Kadare: Fitorja më e rëndesishme për shqiptarët - hapja e horizontit drejt Evropës

Uashington, 24 dhjetor 2002 - Në një intervistë që i dha Zërit të Amerikës, shkrimtari Ismail Kadare tha se ky dhjetëvjeçar ka patur mjaft densitet në jetën shqiptare. Fitorja me e rëndësishme ka qenë hapja e një horizonti drejt Evropës, pas ngjarjes kryesore të fitores se lirisë nga ana e shqiptarëve të Kosovës.

Familja evropiane, tha shkrimtari Kadare, siguron ekzistencën e mëtejshme të shqiptarëve, pra që Shqipëria të fitojë Evropën e humbur. Kjo ka të bëjë me prijen natyrale drejt zhvillimit, që është shume rëndësishme për një popull.
Në këtë intervistë Kadare foli edhe një tjetër aspekt të unitetit të kombit, që është gjuha shqipe. Shqipja, tha Kadare, është një nga gjuhët më të njëjtësuara të botës. Gjuhët nuk krijohen nga shkrirja e dialekteve tha ai, por nga zgjedhja e një dialekti.

Kadare tha se regjimi komunist ka dashur të ketë një diskriminim për shqipen e veriut, por kjo nuk mund të luante një rol tek një gjuhë e zhvilluar siç është ajo shqipe.
Pyetjes se sa aktiv mund të ketë qenë terrorizmi në Shqipëri, Kadare iu përgjigj se nuk mund të thuhet që Shqipëria nuk ka terrorizëm, për arsye se atje ka patur gjithmonë terren për këtë fenomen.

Fondacione të huaja në Shqipëri, Maqedoni, apo Kosovë kanë dashur të sjellin një ideologji tjetër, në këto vende atë të radikalizmit të fesë. Udhëheqësit në Shqipëri dhe Maqedoni e kanë shpërfilluar këtë fakt, tha Kadare. Shqipëria, shtoi ai, duke qënë një vend me tri fe, nuk mund të përjashtohet nga radikalizmi i çdonjërës prejt tyre.


KKSHA emëron Skot Beits si këshilltar të lartë për marrëdhëniet me qeverinë

Uashington, 24 dhjetor - Këshilli Kombëtar Shqiptaro-Amerikan (NAAC/KKSHA) ka emëruar z. Skot Beits si Këshilltar i Lartë për Bordin Drejtues për Marrëdheniet Qeveritare. "Skot Beits i sjell organizatës sonë një eksperiencë të shumanshme për qeverinë amerikane dhe për marrëdhëniet ndërkombëtare", thuhet në një njoftim të KKSHA.
Ndërkaq Skot Beits thotë se "të forcosh zërin e shqiptaro-amerikanëve do të thotë të forcohet demokracia jonë këtu dhe të promovohet stabiliteti dhe paqja ne Ballkan.

Ndiehem i nderuar për ftesën që më ofroi KKSHA dhe pres me padurim të bëhem pjesë e një lëvizjeje që po ndërton shpresë si këtu ashtu edhe në Ballkan", tha Beits me rastin e emërimit.
Z. Beits do të këshillojë anëtarët e KKSHA-së në baza vullnetare dhe nuk do të pranojë asnjë shpërblim në para.


KKSHA e konsideron Kushtetutën e Serbisë dhe Malit të Zi rrezik ndaj stabilitetit në Ballkan

Uashington, 24 dhjetor 2002 - Këshilli Kombëtar Shqiptaro-Amerikan (KKSHA) denoncon plotësisht formulimin e kushtetutës se re të Unionit të Serbisë dhe Malit të Zi (ish-Jugosllavisë) e cila e deklaron Kosovën si pjesë qendrore të Serbisë.
KKSHA e konsideron afirmimin e një deklarate të tillë territoriale prej Serbisë si një kërcënim të drejperdrejtë ndaj stabilitetit të Ballkanit dhe si një shkelje të qartë ndaj Rezolutes 1244 të Këshillit të Sigurimit të OKB-se, e cila e vendos Kosovën përkohesisht nën administratën e OKB-së derisa të arrihet një marrëveshje për statusin përfundimtar të Kosovës.
KKSHA gjithashtu shpreh keqardhje për shkak se Bashkimi Evropian (BE) dhe Misioni i OKB-se në Kosovë (UNMIK) po i mbyllin sytë ndaj shkeljeve të tilla të ligjit ndërkombetar që ka bërë kohet e fundit Serbia.

Ndërkohë që udhëheqësit e Kosovës po mbahen në standardet më të larta dhe po kritikohen ashpër në përmendjen me të vogël të mundësisë së pavarësisë së Kosovës. Një tolerancë e tillë e BE-së dhe UNMIK-ut ndaj politikës serbe jo vetëm që është politikisht e dëmshme, por gjithashtu është moralisht e papranueshme, thekson KKSHA.


Gjenerali Mini thotë se vetëm Kosova multietnike mund të bëhet pjesë e Evropës

Prishtinë, 24 dhjetor 2002 - Komandanti i KFOR-it, gjenerali Fabio Mini thotë se vetëm Kosova multietnike mund të bëhet pjesë e Evropës, kurse për bashkësinë ndërkombëtare kthimi i të ikurve do të jetë prioritet gjatë vitit 2003. Gjenerali Mini i ka bërë këto komente në takimin me gazetarët në Prishtinë.


Nga përplasja e aeroplanit ukrainas druhet se kanë humbur jetën 46 pasagjerë

Teheran, 24 dhjetor 2002 - Ekipet iraniane të shpëtimit kanë gjetur 25 nga gjithsej 46 udhëtarë, që kanë humbur jetën kur një aeroplan ukrainas është përplasur në malet e Iranit qendror, kanë deklaruar sot (të marten) zyrtarët në televizionin shtetëror, njofton Rojter.

Aeroplani Antonov An-140 transportonte të hënën paradite zyrtarët ukrainas dhe rusë të aerpolanit në qytetin Isfahan, 266 mila në jug të kryeqytetit Teheran, kur humbi kontaktin me tokën afër aerportit.
Dëshmitarët e kanë parë përplasjen e aeroplanit në male. Trupat dhe mbeturinat e aeroplanit janë gjetur një kilometër larg nga vendi i ngjarjes. "Të 46 udhëtarët, përfshirë edhe ekuipazhin, kanë humbur jetën. Jam shumë i pikëlluar", ka thënë ministri iranian i transportit, Ahmed Koram.

Aeroplani ka fluturuar nga qyteti ukrainas Karkiv, ka marrë karburante në qytetin e Detit të Zi, Trabzon, në Turqinë verilindore. Në aeroplan s'ka pasur udhëtarë të zakonshëm. Zyrtarët ukrainas po fluturonin për të testuar aeroplanin e të njëjtit model, një nga të cilët qe rrrëzuar më parë.


"Tajms": Lufta e planifikuar kundër Irakut do të jetë një nga operacionet më të shpejta ndonjëherë të aplikuara

Londër, 24 dhjetor 2002 - Siç shkruan në numrin e sotëm gazeta "Tajms" e Londrës, lufta e planifikuar kundër Irakut është koncipuar si një nga operacionet më të shpejta ndonjëherë të aplikuara, me siguri me shfrytëzimin e armës së re sekrete me të cilën duhet të thyhet rezistenca irakiene dhe të rrëzohet Sadam Hyseini.
Krijimi i projektilëve me teledirigjim satelitor do të rriste superioritetin amerikan mbi Irakun aq sa natën e parë të sulmeve ajrore me qindra objektiva do të shkatërroheshin ose dëmtoheshin. Por xhokeri më i ri teknolgjik amerikan është bomba mikrovalore e cila mund të ndërpresë furnizimin me energji elektrike në Bagdad dhe me atë rast të mos dëmtohet asnjë ndërtesë.

Versionin e mëparshëm të kësaj ideje e kanë testuar amerikanët gjatë sulmeve ajrore mbi Jugosllavinë në vitin 1999 kur me bomba "cluster" me fije karbonike është qëlluar sistemi energjetik në Beograd dhe në qytetet e tjera, duke shkaktuar mungesa të mëdha të energjisë elektrike, shkruan "Tajms".


Armata izraelite është tërhequr në periferi të Betlehemit për shkak të Krishtlindjeve

Betlehem, 24 dhjetor 2002 – Armata izraelite ka thënë se është tërhequr në periferi të qytetit të Bregut Perendimor Betlehem, vendlindje tradicionale e Jezu Krishtit, për të lejuar të zhvillohen normalisht shërbimet e lutjeve të Krishtlindjeve.

Zyratarët ushtarakë kanë thënë se nuk do të ketë trupa në qytet gjatë periudhës së Krishtlindjeve vetëm nëse informacionet e intelligjencës bëjnë me dije se militantët palestinezë planifikojnë të bëjnë farë sulmesh atje.

Kristianët e zonave palestineze, turistët dhe pelegrinët e huaj do të lejohen të hyjnë në Betlehem me leje të sigurimit. Është viti i dytë që Qeveria izraelite ia ka ndaluar liderit palestinez, Jaser Arafat, t'u bashkohet shërbimeve të Krishtlindjeve, duke e akuzuar atë se s'ka bërë mjaft për të penguar sulmet kundër Izraelit.


KB po parapërgatiten për një luftë të mundshme në Irak
Gjenevë, 24 dhjetor 2002 - Kombet e Bashkuara po përgatiten për një luftë të mundshme në Irak. Si ka konfirmuar në Gjenenvë një zëdhënës organizatat humanitare të KB kanë përgatitur pajisjet për të nisur dërgimin e ndihmave shtesë në rajon, artikuj ushqimorë, medikamente dhe kanë bërë apel për ndihma.

Gazeta britanike 'Tajms' bazuar në dokumente të besueshme të KB, raporton se Organizata për Ushqim dhe Bujqësi FAO ka tubuar artikuj ushqimorë për 900.000 refugjatë. Ndërkohë u ka kërkuar 10 vendeve për vënie në dispozicion 37 milionë euro si preventiv.


Përpjekjet e SHBA-ve për çarmatimin e Irakut ndodhen në fazën përfundimtare

Ushington, 24 dhjetor 2002 - Përpjekjet e SHBA-ve për çarmatimin e Irakut sipas vlerësimit të funksionarëve të qeverisë amerikane ndodhen në fazen përfundimtare. Qeveria amerikane akoma nuk ka hequr shpresen se KB do të mund t'ia dalin për çarmatimin e Bagdadit. Megjithatë duhet vendosur se si mund të detyrohet Sadam Hysein të bëjë hapat e nevojhshëm. Me kontrollimin e një fabrike armësh në El Fao inspektorët e armatimit të KB vazhduan e tyre në Irak.


Izraeli është përgatitur në rast të ndonjë sulmi ndaj Irakut

Jerusalem, 24 dhjetor 2002 - Izraeli sipas fjalëve të ministrit të mbrojtjes Skaul Mofas është përgatitur më shum se kurrë, me rastin e ndonjë sulmi të mundshëm ndaj Irakut. Si raporton e përditshme 'Maariv' armata ka përgatitur caqet e mundshme në rast të ndonjë sulmi hakmarrës.


SHBA hedhin poshtë "shantazhet" e Koresë Veriore

Uashington, 24 dhjetor 2002 - Shtetet e Bashkuara kanë thënë se nuk janë të përgatitura të dorëzohen para "shantazheve" në lidhje me programin bërthamor të Koresë së Veriut. Paralajmërimi u bë ndërsa sekretari amerikan i Shtetit Kolin Pauell zhvilloi konsultime urgjente në lidhje me tensionet në rritje mes Uashingtonit dhe Koresë së Veriut.
Të hënën, sekretari i mbrojtjes, Donald Ramsfeld tha se Veriu do të bënte gabim në se mendonte se shqetësimet për Irakun do ta largonin vëmendjen e Uashingtonit nga ambiciet e tij bërthamore.
Një zëdhënës i Departamentit të Shtetit tha se zoti Pauell kishte zhvilluar bisedime me ministrat e jashtëm britanik, rus dhe francez për të diskutuar hapat e Veriut për të riaktivizuar programin e tij bërthamor.


Pengjet kërkojnë kompensim nga Moska

Moskë, 24 dhjetor 2002 - Një gjykatë në Moskë pritet të fillojë shqyrtimin e kërkesave për kompensim knga qyteti prej pengjeve që mbijetuan dhe të afërmit e atyre që vdiqën gjatë rrethimit të një teatri në Moskë në tetor.

38 pretendetët thonë se autoritetet e qytetit të Moskës nuk bënë sa duhej për të parandaluar sulmin nga militantët çeçenë apo për të ndihmuar ata që mbetën brenda në teatër.
Ata kërkojne afro 40 milionë dollarë kompensim, një shumë që korrespondentët thonë se nuk është dëgjuar ndonjëherë në çështjet ligjore ruse.
Zyrtarët e Moskës thonë se gjyqi është i padrejtë dhe mund të jetë në barrë tepër e rëndë për financat e qytetit.


Aviacioni irakian ka rrëzuar një aeroplan vëzhgues pa ekipazh të Shteteve të Bashkuara

Bagdad, 24 dhjetor 2002 - Ushtarakët amerikanë thanë se aviacioni irakian ka rrëzuar një aeroplan vëzhgues pa ekipazh të Shteteve të Bashkuara mbi hapsirën jugore të Irakut.

Fluturakja vëzhguese amerikane pa ekipazh, Pretador dje u raportua e zhdukur në jug të Irakut, pasi ishte sulmuar nga aviacioni ushtarak irakian, tha gjenerali Riçard Majers. Zyrtari i Pentagonit tha se aeroplani ushtarak irakian kishte hyrë në zonën jugore të fluturimeve të ndaluara dhe kishte hapur zjarr kundër Pretadorit.


Ka filluar marrja në pyetje e njerëzve brenda Irakut

Bagdad, 24 dhjetor 2002 - Drejtuesi i Agjencisë të Kombeve të Bashkuara për çështje bërthamore, Mhamed el Baradei tha se është filluar me marrjen privatisht në pyetje të njerëzve brenda Irakut të cilët kanë informata të rëndësishme për programet irakiane të armatimit.
Në Uashington, zyrtarët amerikanë dezavuan një ofertë të Bagdadit se do të lejonte që agjentë të CIA-s të orientonin inspketorët e OKB-së për armatimin tek cilido lokacion i dyshuar, duke thënë se Iraku nuk e ka fjalën në procesin e inspektimit.


Netanjahu përjashton çfarëdo rrethane që një shtet i pavarur palestinez të ketë armatën e vet

Moskë, 24 dhjetor 2002 - Ministri i jashtëm Izraelit, Benjamin Netanjahu ka përjashtuar çfarëdo rrethane që një shtet i pavarur palestinez të ketë armatën e vet. Netanjahu ndodhet në Moskë në një turne evropiane që ka për qëllim të marrë mbështeje për izolimin e liderit palestinez, Jaser Arafat. Ndërkaq në Xhenin të Bregut perëndimor trupat izraelite vranë dy militantë palestinezë.