Rugova: Kjo shtëpi sot edhe formalisht po hyn në historinë e Kosovës për ta ruajtur kujtesën historike

Prishtinë, 23 dhjetor 2002 - Presidenti i Kosovës Ibrahim Rugova me një solemnitet rasti përuroi sot në Prishtinë Shtëpinë e Pavarësisë së Kosovës, në 13-vjetorin e themelimit të Lidhjes Demokratike të Kosovës. Fjala është për selinë e dikurshme të Shoqatës së Shkrimtarëve të Kosovës, e cila për një dekadë u bë vatër e të gjitha aktiviteteve të një lëvizjeje të gjerë politike me synim të qartë që Kosovën ta shpiejë drejt pavarësisë.

 

Pikërisht në orën 12.00, para saj ishin tubuar me qindra qytetarë, aktivistë, politikë, zyrtarë të lartë qendrorë e komunalë për marrë pjesë në përurimin e Shtëpisë së Pavarësisë.

Pas ekzekutimit të këngës "Kur ka ra kushtrimi n'Kosovë", të cilën Presidenti i Kosovës e ka propozuar për himn të ardhshëm të Kosovës, para të pranishmëve foli Presidenti Rugova. "E kemi organizuar sot këtë ceremoni të përurimit 'pa ftesa' ashtu siç u tubuam para 13 vjetësh, pa ftesa pra, për të themeluar LDK-në", tha në fillim të fjalës së tij Presidenti Rugova dhe theksoi:

 

"Sot po bëjmë përurimin e 'Shtëpisë së Pavarësisë së Kosovës'. Këtë akt solemn po bëjmë në ditën e themelimit të LDK-së, më 23 dhjetor, pra në 13-vjetorin e jetës së saj. E bëjmë këtë akt solem në 13 vjetorin ethemelimit të LDK-së, sepse LDK-ja ishte që nga fillimi themeli dhe bërthama e institucioneve të Kosovës".

Në vazhdim Presidenti Rugova tha se menjëherë pas themelimit të LDK-së dhe institucioneve të tjera u morën vendime të mëdha në këtë shtëpi, dhe kjo shtëpi është - shtëpi e Pavarësisë, shtëpi e lirisë, shtëpi e demokracisë, shtëpi e rezistencës së gjithanshme të popullit të Kosovës.

 

Pasi përkujtoi se në fillim ishte seli e Shoqatës së Shkrimtarëve të Kosovës, e cila po ashtu ishte ndër bërthamat e para të lirisë dhe të pavarësisë së popullit të Kosovës, Dr.Rugova tha se në këtë shtëpi u shtyp dhe u përkrah Deklarata e Pavarësisë së Kosovës, Kushtetuta e Republikës dhe u organizua Referendumi për Pavarësinë e Kosovës më 1991.   Pastaj u nxor dokumenti i tri opcioneve nga të gjitha partitë politike të trojeve shqipare, u organizuan zgjedhjet e para parlamanetare - presidenciale më 1992 dhe akete e tjera.

 

Pasi i përmendi vetëm disa veprime e akte madhore, Presidenti Rugova tha se këtu u themelua edhe Qeveria e Republikes së Kosovës që veproi me ministritë e veta, siç ishin Ministria e Arsimit, e Shëndetësisë dhe këtu përmes këshillave të arsimit e të shëndetësisë, pastaj të financave, Ministria e Mbrotjes, ajo e Punëve të Brendshme dhe po ashtu më 1998 u mbajtën përsëri zgjedhjet e dyta nacionale dhe përfaqësuesit politikë të UÇK-së kanë mbajtur këtu konferencat për shtyp, pra zëdhënësi i veprimeve të tyre në terren.

"Për dhjetë vjet, kjo shtëpi ishte shtëpi e të gjitha institucioneve të Kosovës, e shoqërsië civile të të gjitha grupeve, e partive politike, ishte shtëpi e popullit të Kosovës, sepse nëpër të kaluan me mijëra qytetarë të Kosovës për t'i plotësuar nevojat e jetës së përditshme dhe për të marrë pjesën e aktet madhore me rëndësi kombëtare për lirinë dhe pavarësinë e Kosovës", theksoi Dr.Rugova dhe shtoi se kjo shtëpi u bë forca gravituese e popullit të Kosovës për liri, pavarësi dhe demokraci.

 

"Ishte kjo shtëpi shtetërore e Kosovës, po ashtu ishte shtëpi përfaqësuese e Kosovës dhe e interesave të saj, sepse nëpër të kanë kaluar me qindra diplomatë, kongresmenë, senatorë e deputetë amerikane, evropianë dhe të shumë vendeve të tjera", tha Dr. Rugoiva dhe vlerësoi se edhe nga bota u bë shtëpi e nderuar nga të gjithë.

"Përurimi i kësaj shtëpie është shenjë e progresit të Kosovës së lirë qe tre vjet e gjysme në liri, dhe njohja formale e pavarësisë së Kosovës do të ishte vazhdim i kësaj shtëpie", tha Presidenti i Kosovës dhe bëri të ditur se me një vendim të veçantë e ka shpallur "Shtëpi të Pavarësisë së Kosovës", e cila do të ketë edhe objekte përcjellëse si tërësi e kompleksit të pavarësisë që do ta ndërtohet në të ardhmen. Me këtë rasti poashtui bëri të ditur se për Shoqatën e Shkrimtarëve do të gjendet zgjidhje aftagjate dhe shkrimtarët do të kenë një objekt të vetin ku do të veprojnë.

Kjo shtëpi, do të hapet për publik më 2 korrik 2003, pasi të kenë përfunduar të gjitha punimet dhe të jetë kompletuar.

"Sot kjo shtëpi e rindërtuar është bërë sikur shumë shtëpi të rindërtuara të Kosovës. Kjo shtëpi sot edhe formalisht po hyn në historinë e Kosovës si shtëpi e ndritur, e cila do ta ruajë kujtesën historike që të na japë shtytje për të ardhmen", tha Rugova, duke përkujtuar me pietet të lartë të gjithë që nuk janë më me ne si profesor Agani, Enver Maloku, Xhemail Mustafa, Shaban Manaj, Ismet Rraci, Smajl Hajdaraj, Ukë Bytyçi dhe të tjerët që kanë rënë në fushat e luftës.

"Mund të themi se pas Shtëpisë së Lidhjes së Prizrenit, që ishte shtëpi e lidhjes së gjithë shqiptarëve, sot në kryeqytetin e Kosovës po e përurojmë 'Shtëpinë e Pavarësisë', që do të jetë shtëpi e lirisë, e pavarësisë, e popullit të Kosovës", tha z.Rugova, i cili nga ky solemnitet përshëndeti UNMIK-un, KFOR-in, OSBE-në, pastaj Presidentin Bush, Kryeministrin Bler, Presidentin Shirak, Kancelarin Shrëder dhe Kryeministrin Berluskoni dhe në mënyrë të veçantë Atin e Shenjtë, Papa Gjon Palin II, që gjithmonë përkujdeset për Kosovën.

Duke e përmbyllur fjalën e tij Presidenti Rugova tha: "Me fat Krishtëlindjet dhe Viti i Ri, me fat "Shtëpia e Pavarësisë" së Kosovës. Zoti e bekoftë Kosovën!"

Copyright©2000-2002 Trepca.net - Të drejtat e rezervuara.