Lajme, 23.12.2002

23/12/2002 - Trepça.net

Lajme, 23.12.2002

Përmbajtja:

Presidenti Rugova bën përurimin e Shtëpisë së Pavarësisë së Kosovës
Buxheti i konsolideruar i Kosovës për vitin 2003 do të jetë 489 milionë e 100 mijë euro.
Emërimi i presidentit Rugova, Senator Nderi i Parlamentit Evropian i ka gëzuar pa masë mërgimtarët shqiptarë
Kryetari i BI të Kosovës Dr.Rexhep Boja ka vizituar KK të Prishtinës
Patrik Mur: Serbia e humbi luftën dhe bashkë me të humbi çdo të drejtë për t'u marrë me Kosovën
Të rinjtë e trojeve shqiptare bënë thirrje për njohjen formale të pavarësisë së Kosovës
Florian Miftari e Elvira Dushku u zgjodhën basketbollistë të vitit 2002
Selman Berisha futbollisti më i mirë i vitit 2002 në Kosovë
Batiq: "Definimi i përherëshëm i statusit të Kosovës nuk varet ekskluzivisht nga vullneti ynë"
Svillanoviq: Përgjegjësia për Ballkanin, por edhe për Kosovën, gjithnjë e më shumë po kalon tek BE-ja
AAK miraton deklaratën për shtetin e pavarur të Kosovës
Alfred Moisiu: I vetmi mik që kemi janë SHBA-të
Shqipëria e Maqedonia u dakorduan për tekstin e memorandumit për mirëkuptim
Dështojnë zgjedhjet në Mal të Zi
Briegel trajner i ri Kombëtares së Shqipërisë
Gjatë një shkëmbimi zjarri në Afganistan është vrarë një ushtar amerikan dhe një militant i Al Kaidës
Ish-komandanti i Kmerëve të kuq, Sam Bit, është dënuar nga një gjykatë e Pnom Penit me burg të përjetshëm
Policia indoneziane ka shpallur emrat edhe të gjashtë të dyshimtëve në lidhje me sulmin në Bali
Iraku nuk ka kundër nëse CIA dërgon agjentë të saj
Kabineti palestinez ka shtyrë zgjedhjet presidenciale dhe parlamentare
Fqinjët e Afganistanit nuk të ndërhyjnë kurrë më në punët e brendshme të Afganistanit
Ushtria amerikane ka filluar në Kuvajt manovrat më të mëdha ushtarake
Në Kabul kanë mbërritur ekspertë gjermanë për të hetuar shkakun e aksidentit të helikopterit
Opozita gjermane ngul këmbë për ligjin e emigrimit

Presidenti Rugova bën përurimin e Shtëpisë së Pavarësisë së Kosovës

Prishtinë, 23 dhjetor 2002 - Presidenti i Kosovës, Dr. Ibrahim Rugova, do të bëjë sot në Prishtinë përurimin e "Shtëpisë së Pavarësisë" së Kosovës, ku më parë ishte selia e Shoqatës së Shkrimtarëve dhe të institucioneve të Kosovës në vitet e nëntëdhjeta. Ky përurim bëhet pikërisht në 23 dhjetor, në 13-vjetorin e themelimit të Lidhjes Demokratike të Kosovës (LDK).
Në natën e parë të sulmeve të NATO-s më 24 mars 1999 forcat serbe ia vunë zjarrit kësaj selie, duke e djegur tërësisht.
Në këtë shtëpizë të vogël për afro dhjetë u zhvillua një aktivitet i dendur politik, jo vetëm i LDK-së por u zhvilluan edhe shumë veprimtari të tjera nga më të ndryshmet.


Buxheti i konsolideruar i Kosovës për vitin 2003 do të jetë 489 milionë e 100 mijë euro.

Prishtinë, 23 dhjetor 2002 - Sot po i vazhdon punimet seanca e Kuvendit të Kosovës, ku në rend dite është buxheti i propozuar i Kosovës për vitin 2003. Ekspozenë për propjektbuxhetin për vitin e ardhshëm e paraqiti Ali Sadria, ministër i ekonomisë dhe i financave.

Ministri Sadria foli gjerësisht për projektbuxhetin e vitit të ardhshëm duke shpjeguar edhe elementet e shumta nga të cilat përbëhet ai. Mes tjerash ministri Sadria tha se shkalla e papunësisë në Kosovë është 47 për qind, por sipas vlerësimeve të ndryshme kjo shkallë arrin edhe deri në 60 deri më 70 për qind. Ai vlerësoi se ekonomia e Kosovës sivjet ka shënuar rritje reale në krahasim me një vit më parë.
Z.Sadria dhe sqarime të hollësime edhe sa i përket formimit të buxhetit të konsoliduar të Kosovës nga taksat, tatimet, akcizat dhe të hyrat e ndrshme që e formojnë atë. Sipas tij shpenzuesit më të mëdhenj të buzhetit janë mirëqenia sociale, arsimi, shëndetësia etj.
Ministri Sadria tha se totali i buxhetit të konsolideruar të Kosovës për vitin 2003 do të jetë 489 milionë e 100 mijë euro.


Emërimi i presidentit Rugova, Senator Nderi i Parlamentit Evropian i ka gëzuar pa masë mërgimtarët shqiptarë

Bruksel, 23 dhjetor 2002 - Emërimi i presidentit të Kosovës Ibrahim Rugova, Senator Nderi i Parlamentit Evropian i ka gëzuar pa masë mërgimtarët shqiptarë, anëtarët dhe simpatizantët e shumtë të LDK-së në shtetet e Beneluksit, si dhe miqtë e njohur të Kosovës në kryeqytetin e Bashkimit Evropian, thuhet në një kumtesë të Degës së LDK-së për shtetet e Beneluksit.
Titullin Senator Nderi e ndajnë personalitetet e rangut të lartë siç janë Otto fon Habsburg, deputet në disa mandate në Parlamentin Evropian, përfaqësues i një prej familjeve më të mëdha aristokratike të botës, Leo Tindemans, ministër dhe ish-kryeministër i Mbretërisë së Belgjikës, etj.
Si njeri nga personalitet më të shquara në Evropën Juglindore, presidenti Ibrahim Rugova, gjatë dhjetë viteve të fundit, është nderuar me shumë tituj të lartë, siç është Çmimi Sakharov i Parlamentit Evropian, doctor Honoris Causa në Sorbonë të Parisit, qytetar nderi i shumë qyteteve evropiane, si dhe ka qenë për disa vite në rrethin e ngusht të kandidatëve për Çmimin Nobel për Paqe.
"Bota perëndimore euro-atlantike, për çdo ditë e më shumë është duke e njohur e vlerësuar lartë Presidentin Rugova, vizionin e tij paqësor për rregullimin e marrëdhënieve në mes popujve dhe kontributin e tij të madh për demokratizimin e Kosovës, stabilitetin e Evropës juglindore dhe integrimin e saj në Bashkimin Evropian.
Në këtë ndërrim motesh, Presidentit Rugova i urojmë titullin Senator

Nderi dhe dëshirojmë shëndet e suksese, në udhëheqjen për shumë vite të shtetit të Kosovës", theksohet në këtë kumtesë të Degës së LDK-së në Bruksel.


Kryetari i BI të Kosovës Dr.Rexhep Boja ka vizituar KK të Prishtinës

Prishtinë, 23 dhjetor 2002 - Për një vizitë pune sot në Kuvendin Komunal të Prishtinës ka qëndruar kryetari i Basjkësisë Islame të Kosovës Dr.Rexhep Boja me bashkepunëtorë.

Me këtë rast ai është pritur nga kryetari i KK te Prtishtinës z.Ismet Beqiri, i cili zotin Boja e ka falenderuar për vizitën dhe e ka siguruar atë se institucioni të cilit ai i prin do të jetë çdo herë i gatshëm për bashkëpunim në mënyrë që Prishtina t`i tejkalojë më lehtë dhe shpejt problemet që ka në fusha të ndryshme dhe i ka ofruar përkrahjen edhe në të ardhmen.
Pasi uroi z.Beqiri për zgjedhjen e tij kryetar i kryeqytetit, z.Boja tha se ndjek me vëmendje zhvillimet në komunë dhe ai bashkë me institucionin që drejton janë të interesuar që Prishtina të ecë drejt zhvillimit dhe prosperitetit të përgjithshëm.
Boja përmendi edhe bashkëpunimin e mirë që ka BI-ja me besimtarët tanë katolikë në Kosovë dhe në këtë plan, tha ai, nuk ka paragjykime, sepse i takojmë këtij kombi dhe këtij vendi. Z.Boja me këtë rast falënderoi KFOR-in për vizitat që ia ka bërë shumë herë BI-së.


Patrik Mur: Serbia e humbi luftën dhe bashkë me të humbi çdo të drejtë për t'u marrë me Kosovën

Pragë, 23 dhjetor 2002 - "Serbia e ka humbur luftën dhe nuk ka më as të drejtë ligjore, as të drejtë morale, të ndërhyjë në Kosovë dhe kjo tashmë është çështje vetëm midis kosovarëve dhe komunitetit ndërkombëtar", thotë analisti i radios "Evropa e lirë" Patrik Mur.

Duke komentuar zërat që pohopjnë në mënyrë të përsëritur se Beogradit duhet t'i jepet një farë roli, dialogu, bashkëkoordinim, të paktën për të evituar që serbët në Mitrovicë dhe në enklavat e tjera të kenë shumë frikë dhe pasiguri, analsiti Mur tha se "gjëja më e mirë për pakicën serbe në Kosovë dhe për njerëzit në Serbi, është që problemet reale të të cilëve janë varfëria, krimi dhe mungesa e stabilitetit politik, dhe jo çështjet irredentiste, gjëja më e mirë për të gjithë të interesuarit është që të bëhet e qartë se nuk ka më lidhje mes Serbisë dhe Kosovës, se Kosova administrohet nga njerëzit e vet, dhe nga ndërkombëtarët, ndërsa Serbia të trajtoi problemet e veta të brendshme".
Më tutje analisti Mur thekson se askush nuk i tregoi Gjermanisë perëndimore pas krijimit të saj në vitin 1949 se duhet të luajë një rol për minoritetet gjermane në Evropën Lindore dhe se e njëjta gjë vlen edhe këtu.

Serbia e humbi luftën dhe bashkë me të humbi çdo të drejtë për t'u marrë me Kosovën dhe tani kjo është çështje që u përket vetëm njerëzve që banojnë në Kosovë dhe komunitetit ndërkombëtar. Serbia ka probleme të tjera me të cilat duhet të merret, tha mes tjerash analisti i "Evropës së lirë".


Të rinjtë e trojeve shqiptare bënë thirrje për njohjen formale të pavarësisë së Kosovës

Prishtinë, 23 dhjetor 2002 - Me aprovimin e një deklarate të përbashkët, dje në Prishtinë i përundoi punimet Konferenca dyditore e organizatave rinore nga të gjitha trojet shqiptare me temën "Të rinjtë - një shans më shumë për integrime".

Pjesëmarrësit e Konferencës u kanë bërë thirrje faktorëve ndërkombëtarë-Shteteve të Bashkuara, Bashkimit Evropian dhe Kombeve të Bashkuara që formalisht të njohin pavarësinë e Kosovës.
Në këtë deklaratë të rinjtë nga të gjitha rajonet ku jetojnë shqiptarët vlerësojnë se kjo është zgjidhja e vetme me të cilën do të sigurohej stabiliteti i Kosovës dhe mundësi më të mëdha për integrim në Evropë.


Florian Miftari e Elvira Dushku u zgjodhën basketbollistë të vitit 2002


Ndërkaq në kokurrencën e femrave basketbolliste më e mirë e vitit 2002 u shpall Elvira Dushku e Universitetit të Prishtinës. Pas saj e radhiten Ardiana Kursani (Gjakova), Dafina Krasniqi (Bashkimi), Djellza Shaqiri (Universiteti), Doruntinë Vuniqi (Universiteti), Elma Kabashi (Trepça), Erlinda Musliu (Bashkimi), Kimete Haliti (Kastrioti), Teuta Abdullahu (Universiteti) dhe Vlora Braha (Universiteti).
Epiteti i basketbollistit më të mirë shqiptar për vitin 2002 i takoi Aleksandër Damo, basketbollist i Dukagjinit të Pejës, ndërkaq basketbollist më i mirë i huaj në Kosovës u zgjodh Marin Përskallo lojtar i MEB Prishtinës. Skuadra më e mirë u zgjodh MEB Prishtina kurse në konkurrencën e femrave këtë epitet e fitoi Universiteti.

Skuadra më korrekte u zgjodhë Exklusive nga Prishtina. Trajneri më mirë i vitit ishte Aleksandar Perinçiq ish-trajner i KB Prishtina, ndërkaq trajner më i suksesshëm dr. Masar Nixha i Dritës, në konkurrencën e femrave si trajner më i mirë u zgjodh Shkëlzen Fetiu (Universiteti). Gjyqtarë më të mirë u shpallën Mehdi Gashi nga Prishtina dhe Hajredin Zeka nga Peja.


Selman Berisha futbollisti më i mirë i vitit 2002 në Kosovë


Pas tij u radhitën dy futbollistë të Flamurtarit, Përparim Hasani me 66 pikë dhe Ismet Munishi me 53 pikë. Ndër të shpërblyerit nga FFK-ja ishin edhe:

Beqir Aliu - punëtor sportiv i vitit, Vehbi Brahimi si gjyqtari më i mirë i vitit 2002, trajneri më i mirë i vitit u shpall Bylbyl Sokoli. Ndërkaq klubi më i suksesshëm i vitit 2002, u shpall KF “Besiana”.

Manifestimi kishte edhe një paqartësi që ka të bëjë me krytrajnerin e Dritës Selami Osmanit, i cili ishte në listën e të shpërblyerve, por që ai nuk u ftua të marrë shpërblimin që shkaktoi huti në mesin e të pranishmë.
Laueratët e vitit 2002 në futboll janë:

1. Selman Berisha (Drita) 71 pikë
2. Përparim Hasani (Flamurtari) 66
3. Ismet Munishi (Flamurtari) 53
4. Ndrec Komani (Besiana) 50
5. Xhevdet Llumnica (Prishtina) 44
6. Kushtrim Munishi (Besiana) 43
6. Uliks Emra (Prishtina) 43
8. Krenar Voksh (Besa) 27
9. Admir Pruthi (Vëllaznimi) 26
10.Milaim Humolli (Prishtina) 22 pikë


Batiq: "Definimi i përherëshëm i statusit të Kosovës nuk varet ekskluzivisht nga vullneti ynë"

Beograd, 23 dhjetor 2002 - Ministri i Drejtësisë i Serbisë, Vladan Batiq thotë se definimi i statusit të Kosovës do të jetë pika më e ndërlikuar në kushtetutën e ardhshme të Serbisë, mbase është e qartë, siç ka theksuar se "definimi i përherëshëm i statusit të Kosovës nuk varet ekskluzivisht nga vullneti ynë".
Në një intervistë për një televizion lokal, Batiq ka thënë se "Komisioni kushtetues duhet të arrijë koncenzus për ate çështje".


Svillanoviq: Përgjegjësia për Ballkanin, por edhe për Kosovën, gjithnjë e më shumë po kalon tek BE-ja

Zveçan, 23 dhjetor 2002 - Ministri i Jashtëm jugosllav, Goran Svilanoviq ka vlerësuar se "përgjegjësia për mbarë Ballkanin, pra edhe për Kosovën, në esencë gjithnjë e më shumë po kalon tek Bashkimi Evropian nga gjithë faktorët tjerë të angazhuar dhe eksponuar më shumë deri tash".
Në intervistën për një stacion televiziv serb të Kosovës, Svilanoviq nuk ka përmendur faktorët në fjalë, por ka thënë se nuk është i sigurtë nëse opionioni është i vetëdijshëm se "qendra e vërtetë e vendosjes është Brukseli".


AAK miraton deklaratën për shtetin e pavarur të Kosovës

Prishtinë, 23 dhjetor 2002 - Këshilli Kombëtar i Aleancës për Ardhmërinë e Kosovës, si organi më i lartë i kësaj partie, në një mbledhje të së shtunës ka diskutuar për zhvillimet e fundit politike në Kosovë.
Këshilli ka vlerësuar se populli i Kosovës tashmë është i përgatitur që të udhëheq me veten dhe Kosovën.
Këshilli Kombëtar i AAK-së ka miratuar edhe një deklaratë të emëruar si deklarata për shtetin e pavarur të Kosovës, përmes së cilës sovraniteti mbi Kosovën i takon vetëm popullit të Kosovës dhe askujt tjetër.
Deklarata e AAK-së për shtetin e pavarur të Kosovës
- Sovraniteti mbi Kosovën, jo vetëm de facto por edhe de jure i takon vetëm popullit të Kosovës dhe askujt tjetër i cili gëzon të drejtën e plotfuqishme për të vendosur për fatin e vetë edhe për zgjedhjen e statusit përfundimtar të Kosovës;

AAK kërkon nga Kuvendi i Kosovës, si kuvendi i parë i njohur ndërkombëtarisht dhe si organi më i lartë i pushtetit, miratimin e deklaratës për Pavarësinë e Kosovës;

AAK fton të gjitha forcat politike në Kosovë, pavarësisht nga dallimet politike, të gjithë qytetarët e Kosovës pavarësiht nga përkatësia e tyre politike, të gjithë qytetarët e Kosovës pavarësisht nga përkatësia e tyre etnike ose fetare të angazhohen fuqimisht për jetësimin e shtetit të pavarur të Kosovës;

AAK i fton të gjitha shtetet demokratike, e në vecanti SHBA dhe shtetet e Bashkimit Evropian që të mbështesin e të ndihmojnë popullin liridashës të Kosovës në krijimin dhe njohjen ndërkombëtare të shtetit të Kosovës;

AAK i bën thirrje KS të OKB që realitetin e ri të krijuar në Kosovë ta njehë si të arritur të përbashkët të popullit të Kosovës dhe të Bashkësisë ndërkombëtare dhe këtë ta miratojë me një rezolutë të re për njohjen e sghtetit të pavarur të Kosovës.
Kryetari i Aleancës Ramush Haradinaj ndërkaq, tha se Kosova është peng i statusit final për arsye se të gjitha preokupimet tjera të qytetarëve si zhvillimi ekonomik apo problemet sociale celësin sipas tij e kanë tek zgjidhja e statusit final. Prandaj sipas tij Aleanca beson se edhe subjektet tjera do ta përkrahin një nismë të tillë.
"Kjo deklaratë nuk dallon nga orientimet programore të cilësdo parti politike në Kosovë. Partitë më të mëdha politike kanë në programin e vet pavarësinë e Kosovës dhe janë deklaruar para qytetarëve e para instancave të veta për përcaktimin për pavarësi.


Alfred Moisiu: I vetmi mik që kemi janë SHBA-të

Tiranë, 23 dhjetor 2002 – Presidenti i Shqipëtrisë, Alfred Moisiu, duke folur për statusin përfundimtar të Kosovës në një intervistë për gazetën "Bota sot", ka theksuar se mendimet e veta i ka shprehur zyrtarisht e botërisht në takimet e ndryshme. Presidenti Moisiu thotë se Kosova është e lirë dhe kjo është shumë e rëndësishme. Statusi i Kosovës duhet të njihet sa më parë. Sa më shumë që shtyhet dhe të zvarritet, do të krijonte rrezikshmëri për rajonin, thotë ai.
Z.Moisiu shprehet se Kosova duhet t'i ngrejë institucionet demokratike dhe ka shumë rëndësi që UNMIK-u, gradualisht, t'ua kalojë kompetencat e veta institucioneve të Kosovës, qoftë në shkallë lokale, qoftë në shkallë të pushtetit të zgjedhur në Kosovë. Në vazhdim Presidenti Moisiu tha:
"Këto i kam folur me sekretarin e përgjithshëm të OKB-së, Kofi Anan në Nju-Jork dhe me personalitete të ndryshme amerikane. Pata një takim me ndihmës sekretarin e shtetit amerikan, me kryeministrin e Italisë Berluskonin, në Vatikan, pra kudo që me ka rënë çështja për t'u diskutuar. Këto do t'i shtrojmë, sepse është në interes jo vetëm të shqiptarëve, por edhe në interesë të paqes në Ballkan. Dhe në shqiptarët jemi faktorë shumë i rëndësishëm, element i paqes në Ballkan. Gjysma e shqiptarëve është jashtë shtetit shqiptar. Por ne tashti duhet t'i pranojmë kushtete e reja".
"Ne fatkeqësisht nuk kemi pasur miq dhe i vetmi mik që mund të themi që kemi, janë SHBA-të", tha Moisiu. "Një herë na shpëtoi që Shqipëria të copëtohej akoma më shumë dhe herën tjetër në Kosovë. Dhe sa herë që takohemi me amerikanët ne u themi se kemi një shprehje: miku i mirë njihet në ditë të vështirë.

Pavarësisht nga konjukturat e ndryshme që ekzistojnë në botë për zgjidhjen e çështjes së Ballkanit, ne gjithmonë kemi qenë që problemi i Kosovës duhet të zgjidhet një herë e mirë".
Në pyetjen se a kishte ndonjë plan për të vizituar Kosovën, presidenti Moisiu tha se "s'kishte ndonjë plan konkret, por unë absolutisht nuk jam kundër vizitës, qoftë ardhja e Rugovës këtu, qoftë vajtja ime atje. Nuk ka arsye që të mos takohemi, jo vetëm që nuk ka arsye, por ne duhet të takohemi".
Ndërkaq, duke iu përgjigjur një pyetjeje lidhur me debatin që ka filluar në media përkitazi me flamurin, himnin dhe stemën shtetërore të Kosovës, presidenti Moisiu u shpreh:
- Ky është një problem që i takon Kosovës që ta zgjedhin, sepse pozicioni i Kosovës akoma nuk është caktuar. Normalisht do të ishte sikur të kishim një shtet, një komb, dhe ne jemi një komb. Por, historia u tregua e padrejtë ndaj shqiptarëve, pavarësisht nga përpjekjet që kanë bërë shqiptarët, por edhe ne duhej ta mbronim veten, ta mbrojmë kombin ashtu siç duhet. Vetë Ballkani po shkon drejt integrimeve.

Unë mendoj së kthimi i kufijve nacionalë është zgjidhja që ka një gjykim jo të kohës. Rëndësi ka që ne të kemi lidhje të forta ekonomike, lidhje të forta kulturore, të zhvillimit në tërësi.
I lutur nga intervistuesi për mesazhin e tij në fund të intervistës, presidenti i Moisiu u shpreh:
"Uroj që vuajtjet e shqiptarëve të marrin fund sa më parë, që shqiptarët ta duan njëri-tjetrin, ta ndihmojnë njëri tjetrin", tha mes tejrash në një intervistë të gjatë për numrin e sotëm të gazetës "Bota sot", Presidenti i Shqipërisë Alfred Moisiu.


Shqipëria e Maqedonia u dakorduan për tekstin e memorandumit për mirëkuptim

Ohër, 23 dhjetor 2002 - Në bisedimet në Maqedoni ndërmjet ministrit shqiptar të Mbrojtjes, Pandeli Majko, dhe homologut maqedonas, Vllado Buçkovski, në Ohër, u ra dakord lidhur me tekstin e memorandumit për mirëkuptim midis dy vendeve. Ndërkohë, reagimet e para në Shkup për thellimin marrëdhënieve dhe bashkëpunimit ndërmjet Shqipërisë dhe Maqedonisë janë pozitive.


Dështojnë zgjedhjet në Mal të Zi

Podgoricë, 23 dhjetor 2002 - Votuesit në Mal të Zi nuk kanë arritur të zgjedhin presidentin e ri të vendit për shkak të pjesëmarrjes së ulët në votimin e së dielës.
Vëzhguesit e pavarur në këtë republikë thanë se niveli i pjesmarrjes në zgjedhje ishte nën 46%.
Kjo ndodh vetëm pak javë pas anulimit për herë të dytë të rezultatit të zgjedhjeve presidenciale edhe në Serbi. Në të dyja këto Republika ligji zgjedhor kërkon që në votime të marrin pjesë më shumë se 50% e elektoratit në mënyrë që rezultati të shpallet i vlefshëm.
Kryetari i parlamentit, ish-kryeministri Filip Vujanoviç, thuhet se ka marrë afro 86% të votave.
Në zgjedhje konkuruan edhe dhjetë kandidatë të tjerë.
Opozita pro-jugosllave kishte bërë thirrje për bojkotimin e zgjedhjeve.


Briegel trajner i ri Kombëtares së Shqipërisë

Tiranë, 23 dhjetor 2002 – Ish-futbollisti i Kombëtares Gjermane Hans Peter Briegel është zgjedhur trajneri i ri i Kombëtares së Shqipërisë në futboll. Ai në këtë post zëvendëson trajnerin italian Dossena.

Menjëherë pas emërimit të tij Briegel ka premtuar se do të japë maksimumin e tij si trajner për kombëtaren e Shqipërisë. "Do mundohem për rezultate sa më të larta dhe nëse punojmë mirë kontrata ime do shtyhet deri në vitin 2006", - u shpreh Briegel.

Briegel si trajner debuton më 1994 ne Wattenscheid (Bundesliga 2). Pastaj ka qenë trajner i ekipit Eintracht Trier (1999), Hans Peter Briegel i bashkangjitet, si Co-Trainer, Karl-Heinz Feldkamp pranë Beshiktash Stamboll(1999). Pas dorëheqjes së Feldkamp, Briegel vazhdon një vit rresht të drejtojë ekipin turk.

Në sezonin 2001 / 2002 ka qënë trajneri i ekipit turk Trabzonspor, ku luan edhe futbollisti shqiptar Alban Bushi. Nga data 5 nëntor 2002 ai është zgjedhur anëtar i këshillit administrativ në ekipin 1. FC Kaiserslautern.


Gjatë një shkëmbimi zjarri në Afganistan është vrarë një ushtar amerikan dhe një militant i Al Kaidës

Bagram, Afganistan, 23 dhjetor 2002 – Një ushtarak amerikan ka thënë të hënën se trupat amerikane kanë vrarë një pjesëtar të grupit të dyshimtë të militantëve të Al Kaidës dhe kanë plagosur një tjetër gjatë shkëmbimit të zjarrit në fshatin Shkin të provincës Paktika, në Afganistanin Lindor, ku është vrarë gjithashtu edhe një ushtar amerikan, njofton Rojter.

Të dyshimtët e mbetur të Al Kaidës kanë ikur pastaj përtej kufirit në Pakistan. Po ky grup mund të jetë gjithashtu përgjegjës për një sulm me gjashtë raketa në bazën amerikane në të njëjtën zonë, që ka ndodhur më vonë në të njëjtën ditë.


Ish-komandanti i Kmerëve të kuq, Sam Bit, është dënuar nga një gjykatë e Pnom Penit me burg të përjetshëm

Pnom Pen, 23 dhjetor 2002 - Ish-komandanti i Kmerëve të kuq, Sam Bit, është dënuar nga një gjykatë e Pnom Penit me burg të përjetshëm, nën akuzën se më 1994 ka rrëmbyer dhe ka vrarë tre perendimorë, njofton AFP.

Gjykata ka dënuar Sam Bitin, 70-vjeçar, me dënimin e lartpërmendur për gjashtë krime të ndryshme, ka deklaruar për media sot (të hënën) kryesuesja e trupit gjykues.


Policia indoneziane ka shpallur emrat edhe të gjashtë të dyshimtëve në lidhje me sulmin në Bali

Xhakartë, 23 dhjetor 2002 – Policia indoneziane ka shpallur sot (të hënën) emrat edhe të gjashtë të dyshimtëve në lidhje me bombardimin në Bali më 2 tetor të sivjemë, me ç’rast patën humbur jetën mbi 190 veta dhe qenë plagosur ose zhdukur qindra të tjerë, njofton UPI.

Të dyshimtët e ri janë dy malezianë, Dr. Azhari dhe Nurdin Mohd Pop, dhe katër të tjerët indonezianë: Zulkarnien, alias Daud, Sad Al Ahmed Roishan, Heri Hafidin dhe Hutomo Pamungkas, alias Mubarok.


Iraku nuk ka kundër nëse CIA dërgon agjentë të saj

Bagdad, 23 dhjetor 2002 - Iraku nuk ka kundër nëse CIA dërgon agjentë të saj që t'u tregojnë inspektorëve të armatimit të OKB-së lokacionet ku Shetet e Bashkuara dyshojnë se zhvillohen armë për zhdukje në masë, ka thënë këshilltari i presidentit irakian, Amir al Saadi.
Ai tha në Bagdad se Iraku nuk ka më dokumente për t'i paraqitur Kombeve të Bashkuara që të mbështesë pohimet e tij se nuk posedonë armë për zhdukje në masë.
Bagdadi është i gatshëm t,i përgjigjet çfarëdo pyetje të shtruar nga Uashingtoni dhe Londra që thanë se deklarata irakiane nuk përmbushte kërkesat e rezolutës së Këshillit të Sigurimit për çarmatosjen e tij, tha Saadi.


Kabineti palestinez ka shtyrë zgjedhjet presidenciale dhe parlamentare

Ramallah, 23 dhjetor 2002 - Kabineti palestinez ka shtyrë zgjedhjet presidenciale dhe parlamentare të caktuara gjatë muajit janar, duke fajsuar për këte okupimin ushtarak izraelit të qyteteve të Bregut Perëndimorë.
Zyrtarët palestinezë thanë se ata nuk munden të organizojnë zgjedhje në këto rrethana, por vetëm pasi të ishin tërhequr trupat izraelite.
Bashkimi Evropian ka shfaqur mirëkuptim për vendimin, por tha se zgjedhjet mbesin apsolutisht të domosdoshme kur do të piqen kushtet e sigurisë.
Këto zgjedhje kërkoheshin nga Perëndimi si pjesë e reformave të Autoritetit palestinez.


Fqinjët e Afganistanit nuk të ndërhyjnë kurrë më në punët e brendshme të Afganistanit

Kabul, 23 dhjetor 2002- Fqinjët e Afganistanit, Kina, Irani, Pakistani, Uzbekistani, Taxhikistani dhe Turkmenistani nga konferenca në Kabul janë zotuar të mos ndërhyjnë kurrë më në punët e brendshme të Afganistanit.

Deklarata që nënshkruan ministrat e Jashtëm të atyre vendeve bën thirrje për marrëdhënie miqësore, respekt të përbashkët për sovranitetin dhe integritetin territorial, dhe vetëpërmbajtje nga aksionet që mundë të provokojnë paqen.


Ushtria amerikane ka filluar në Kuvajt manovrat më të mëdha ushtarake

Uashington, 23 dhjetor - Ushtria amerikane ka filluar në Kuvajt manovrat më të mëdha ushtarake në rajonin e Gjirit Persik, që nga lufta e vitit 1991, në përgatitje për një luftë të mundëshme kundër Irakut. Mijëra trupa nga Divizioni i Tretë i ushtrisë dhe qindra mjete të blinduara po marrin pjesë në manovra, që kanë për qëllim të përmirësojnë aftësitë e tyre në fushë betejë.

Ndërkohë që manovrat filluan dje, aeroplanët amerikanë dhe britanikë të koalicionit lëshuan fletushka mbi dy qytete në Irakun jugor, në të cilat irakianët informoheshin rreth transmetimeve radiofonike, që nxisin opozitën lundër presidentit Sadam Husein. Në Irakun verior, njoftohet se agjentë të zbulimit amerikan po punojnë me forcat kundër Sadam Huseinit.


Në Kabul kanë mbërritur ekspertë gjermanë për të hetuar shkakun e aksidentit të helikopterit

Kabul, 23 dhjetor 2002 - Pas rrëzimit të një helikopteri të të ushtrisë gjermane në Afganistan, në Kabul kanë mbërritur ekspertë gjermanë, për të hetuar shkakun e aksidentit. Ministri gjerman i mbrojtjes, Peter Struk tha se nuk ka të dhëna që helikopterin ta kenë rrëzuar me zjarr armësh.


Opozita gjermane ngul këmbë për ligjin e emigrimit

Berlin, 23 dhjetor 2002 -Në mosmarrëveshjen për ligjin e ri të emigrimit, politikanë drejtues të partive unioniste i shtruan kërkesa qeverisë federale. Por njëkohësisht ata e përjashtuan një afrim të pozicioneve të tyre me ato të qeverisë.

Kryetarja e Partisë Kristjandemokrate, Angela Merkel tha se çështjet e emigrimit në vendin e punës, të integrimit dhe të së drejtës së qendrimit të refugjatëve duhet të rishikohen. Kjo temë do të luajë një rol të rëndësishëm edhe në zgjedhjet e parlamentit të Landit të Hesenit dhe Saksonisë së Poshtme.