Lajme, 21.12.2002

21/12/2002 - Trepça.net

Lajme, 21.12.2002

Përmbajtja:

Në Prishtinë po i zhvillon punimet konferenca dyditore e të rinjve nga të gjitha viset shqiptare
Pjesë nga intervista e Presidentit të Kosovës Ibrahim Rugova dhënë "Zërit të Amerikës"
Admirali Xhonson dhe gjenerali Mini kanë vlerësuar se gjendja e sigurisë në Kosovë ka shënuar përparime të mëdha
Forcat paqeruajtëse ndërkombëtare kanë gjetur granata dore në shkollat e Pejës dhe Deçanit
Komisioni Evropian thotë se rritja më e madhe e prodhimit është shënuar në Kosovë
Papa Gjon Pali ka nënshkruar një dekret tjetër drejt shenjtërimit të Nënës Tereze
Shtajner nënshkruan dy ligje të miratuara, por i kthen Kuvendit dy ligjetë tjera pë t'i rishikuar
Drejtuesit serbë të Universitetit serb të Mitrovicës janë pajtuar të jenë pjesë e sistemit arsimor të Kosovës
Qeveria e Kosovës do të hapë Zyrën e Stabilizim-Asociimit
Krimi i organizuar është një problem shumë serioz në Shqipëri
Shqiptarët e Malit të Zi shprehen mbështetje për kandidatin për president, Filip Vujanoviq
SHBA kanë vënë veto në një rezolutë të KS që dënonte Izraelin për vrasjen e një britaniku dhe të dy palestinezëve
Kolumbia, Rusia dhe Pakistani janë cilësuar si vendet më të rrezikshme në botë për gazetarët
Të pakten 20 udhëtarë të një treni në Indi drohet se kanë humbur jetën
Uashingtoni thotë se këtë fundjavë do t'u japë inspektorëve të armëve të OKB-së të dhëna të reja
Hans Bliks tha se Shtetet e Bashkuara dhe Britania duhet t'i japin atij më shumë të dhëna
Shtetet e Bashkuara dhe Britania thonë se raporti irakian është plotë gënjeshtra dhe mungesa
Senatori amerikan Lot dha dorëheqjen nga posti i udhëheqësit republikan në Senat

Në Prishtinë po i zhvillon punimet konferenca dyditore e të rinjve nga të gjitha viset shqiptare


Konferencën e hapi kryetari i Forumit të Rinisë të LDK-së Lulzim Zeneli, ndërsa këtë tubim të të rinjve e përshëndetën Presidenti i Kosovës, Ibrahim Rugova dhe kryetari i Kuvendit Nexhat Daci.
Duke përshëndetur këtë konferencë Presidenti Rugova, çmoi lart nismat dhe proceset demokratike të të rinjve si dhe temat që janë shtruar për diskutim në këtë tubim, si integrimet shqiptare, integrimet evropiane si dhe raportet e të rinjve në rajon. Poashtu Presidenti Rugova përkrahu bashkëpunimin e të rinjve nga viset shqiptare dhe e vlerësoi si një nismë të parë të integrimeve brenda rinisë shqiptare.

"E shoh të vlefshme këtë konferencë, sepse ju edhe më parë keni filluar një bashkëpunim ndërmjet të rinjve shqiptarë në përgjithësi dhe mund të themi se janë shenjat e para të integrimeve brenda rinisë", tha Presidenti Rugova duke përshëndetur këtë tubim të të rinjve të cilëve u uroi suksese në punën dhe aktivitetet e tyre të mëtejshme.
Ndërkaq kryeparlamentari Nexhat Daci në fjalën e tij përshëndetëse tha se të rinjtë duhet të jenë bartës të proceseve të reja e demokratike. "Rinia shqiptare në Kosovë e ka obligim që të krijohet ai ambient jetësor i cili mund të absorobojë të gjitha vlerat qytetëruese dhe t'i tregojë bashkësisë ndërkombëtare se Kosova dhe shqiptarët gjithkund janë të pjekur dhe mund t'i përgjigjen të gjitha sfidave".


Duke folur për prioritetet e Konferencës së sotme, Lulzim Zeneli, tha se ajo si prioritet ka afirmimin, shpalosjen dhe artikulimin e vizioneve dhe të ideve kreative të të rinjve, ide këto që do të jenë të përqafuara dhe mirëseardhura për proceset e filluara dhe të atyre që priten të fillojnë në rajon.
Në vazhdim kryetari i FR të LDK-së pasi shtroi pyetjen se cili është pozicioni dhe roli i të rinjve në rrjedhat e përgjithshme politike dhe shoqërore në rajon dhe cila është fuqia e të rinjve që mund të ndikojë në proceset e integrimeve të gjithanëshme evroatlantike, tha se ka një varg pyetjesh që meritojnë diskutim dhe debate me konsekuencë, dhe në mesin e të gjitha këtyre, kontribut simbolik do të japë edhe konferenca e sotme.
Ndërkaq duke folur për periudhën e paslufëts në Kosovë, z.Zeneli vlerësoi se Kosova në vitet e paskonfliktit ka shënuar progres në të gjitha fushat e jetës. "Kjo është një e arritur jona e përbashkët si popull dhe pa harruar të nënvizojmë ndihmën e vazhdueshme e te pakursyer të bashkësisë ndërkombëtare, e cila është prezente në të gjitha segmentet e organizimit dhe të zhvillimit të vendit".

Ai theksoi se krejt "kjo e arritur, në brendi ka një komponente të veçantë, ka energjinë e pashterrshme të rinisë, të gjeneratës së re, e cila ka vullnetin, dhe kurajon që synimet e saja t'i bëjë relitet, që jetën e sotme ta kthejë në shpresë, në një perspektivë për një të ardhme më të sigurtë, në një garancë për paqe, siguri dhe demokraci në këtë pjesë të evropës dhe botës".
Zeneli nënvizoi se të rinjtë janë ata që për vite të tëra në mënyrë të argumentuar kanë ndërtuar angazhimin për jetësimin e vullnetit të popullit të Kosovës për liri, pavarësi, dhe demokraci, për një Kosovë të pavarur dhe të integruar.
Por ai nuk harroi pa përmendur edhe problemet me të cilat po përballet shoqëria shqiptare në tërësi në hapësirat ku ajo jeton, si papunësia në rritje, dukuritë negative që lidhen me krimin dhe kontrabandën e organizuar, trafikimi etj.
Në fund z.Zeneli tha se "të rinjtë në çdo variant janë edhe një shansë më shumë për integrime të gjithanshme evroatlantike, prandaj të nderuar të pranishëm sot jemi këtu për të diskutuar dhe debatuar hapur për të gjitha këto çështje".
Konferenca po i vazhdon punimet me diskutimet e pjesëmarërve dhe do të vazhdojë edhe nesër.


Pjesë nga intervista e Presidentit të Kosovës Ibrahim Rugova dhënë "Zërit të Amerikës"

Prishtinë, 21 dhjetor 2002 (QIK) - Presidenti i Kosovës Ibrahim Rugova i dha mbrëmë një intervistë radiotelevizionit "Zëri i Amerikës" në të cilën shfaqi qëndrimin e tij për temat më aktuale politike në Kosovë, përfshirë këtu qëndrimin e tij lidhur me pavarësinë e Kosovës, si dhe për çështjen e himnit dhe flamurit shtetëror të Kosovës.
Fillimisht Presidenti Rugova gjendjen aktuale për tre vjet e gjysmë në liri në Kosovë e vlerësoi shumë të mirë. Kosova gjatë kësaj kohe ka pasur suksese dhe rezultate, si në konstituimin e ndërtimin e institucioneve të Kosovës që po funksionojnë tash, ashtu edhe në planin e sigurisë ku është bërë një përparim i madh.

Siguria është me e mirë... Shërbimi Policor i Kosovës është forcuar së bashku me policinë e UNMIK-ut dhe KFOR-it dhë kështu bashkarisht po e mbajnë nën kontroll sigurinë e Kosovës, tha Presidenti i Kosovës, duke theksuar se edhe në planet e tjera, si në fushën ekonomike, është shënuar një progres.

Aktualisht ekonomia e Kosovës është 50 për qind private, ndërkaq 50 për qind në sektorin shtetëror e së shpejti duhet të privatizohet. Në përgjithësi kai pasur një progres të mirë të Kosovës, nënvizoi Presidenti Rugova.
Në pyetjen se a është tash koha e përshtatshme apo jo për statusin e Kosovës, Presidenti i Kosovës tha: "Unë e kam thënë edhe më parë dhe po e përsëris se rruga më e shkurtë, më e sigurt dhe më e mirë është që të njihet pavarësia nga Shtetet e Bashkuara të Amerikës, nga Unioni Evropian dhe pastaj të formalizohet nga OKB-ja. Këtë konstatim tonin e mbështesim në progresin e Kosovës që e ka arritur gjatë këtyre tre vjet e gjysmë pas lufte.

Kjo zgjidhje do të qetësonte popullin e Kosovës, do të hiqte frikën për të ardhmen dhe të gjithë qytetarëve të Kosovës dhe po ashtu për rajonin në këtë pjesë të Evropës Juglindore dhe të botës. Çështë e vërteta, Kosova de facto sot është e pavarur.

Pra që nga 12 qershori i vitit 1999, kur ka hyrë NATO dhe kur është kthyer populli i Kosovës, Kosova mund të thuhet se është e pavarur. Por, njohja formale e pavarësisë së Kosovës do t'i shpejtonte shumë proceset demokratike, ekonomike të Kosovës. Prandaj insistojmë që Kosova të jetë e pavarur".
Ndërkaq i pyetur se sa janë të volitshme zhvillimet në rajon për kërkesat që lidhen më pavarësinë e Kosovës, duke pasur parasysh edhe kartën kushtetuese të Serbisë dhe Malit të Zi, zoti Rugova u përgjegj:
"Shikuar në përgjithësi, tash pas tre vjet e gjysmë ka shumë ndryshime pozitive në rajonin e Evropës Juglindore. Kam edhe një qëndrim tjetër.

Nuk dua të jam pesimist, por është më mirë të njihet pavarësia e Kosovës sa më shpejt. Ndërkaq sa i përket provokimeve të ndryshme, siç është rasti mes Podgoricës dhe Beogradit, mandej provokimi tjetër që kemi pasur para një kohe me kufirin Kosovë-Maqedoni, ne kemi kërkuar që të qetësohet kjo punë.

Këto e bëjnë edhe më të domosdoshme që të njihet pavarësia formale e Kosovës. Por ne do të kemi marrëdhenie më fqinjët tanë në baza reciproke. Prandaj pavarësia e Kosovës do ta qetësonte këtë pjesë të Evropës".
Lidhur me debatet që janë nxitur me propozimin e tij për krijimin e simboleve të Kosovës, Presidenti Rugova tha se "është normale t'i kemi simbolet tona shtetërore".
"Unë e them në kuptimin amerikan ato janë edhe simbole kombëtare, sepse amerikanët fjalën kombëtare, e përdorin pra nacionale dhe në kuptim shtetëror dhe këto nuk i dëmtojnë simbolet tradicionale, pra që ekzistojnë sot dhe që i përdorin të gjithë shqiptarët.

Momentalisht janë në përdorim simbolet e shtetit të Shqipërisë së tashme. Andaj Kosova duhet t'i këtë simbolet e veta, që të jetë anëtare e OKB-së, pra ta ketë identitetin e saj. Besoj se këto simbole shtetërore do të aprovohen dhe miratohen me një procedurë të rregullt nga institucionet e Kosovës dhe natyrisht në bisedime dhe konsultime me qytetarët dhe me popullin e Kosovës".
Presidenti Rugova në vazhdim të kësaj interviste tha se grupet etnike në Kosovë marrin pjesë në të gjitha institucionet lokale dhe qendrore, apo shtetërore, në Parlament, në komuna, në Qeveri dhe shqiptarët si shumicë jemi treguar mjaft të kujdesshëm që grupet etnike të inkuadrohen, përkatësisht të integrohen në shoqërinë tonë.

Kjo merr pak kohë, sepse ende një pjesë e këtij grupi, ose kësaj bashkësie, nuk është liruar nga logjika e vjetër. Ai tha se do të ketë një kujdes të veçantë për grupet etnike që ato të integrohen, si dhe të shikohen mundësitë e pajtimit gradual.
Ndërkaq, duke folur për bashkëpunimin me institucionet ndërkombëtare, me UNMIK-un, Presidenti i Kosovës vlerësoi se ka një bashkëpunim të mirë dhe se pas themelimit të institucioneve, do të shikohen forma më produktive të bashkëpunimit. Ndërkaq bashkëpunimin me KFOR-in e vlerësoi të shkëlqyeshëm.
Në fund të intervistës i pyetur se cila është porosia e tij për qytetarët e Kosovës në prag të Vitit të Ri, Presidenti i Kosovës tha:
"Të gjithë duhet të angazhohemi, e në radhë të parë në institucionet që i ka zgjedhur populli i Kosovës, që t'u përgjigjemi kërkesave të qytetarëve, kërkesave të popullit. Po ashtu edhe qytetarët duhet të angazhohen në aktivitetin e vet me respektimin institucioneve të Kosovës.

Gjithsesi të punojmë më shumë dhe të krijojmë një shoqëri më harmonike, ku duhet të kontribuojmë të gjithë", tha në fund të kësaj interviste Presidenti i Kosovës Ibrahim Rugova.


Admirali Xhonson dhe gjenerali Mini kanë vlerësuar se gjendja e sigurisë në Kosovë ka shënuar përparime të mëdha

Prishtinë, 21 dhejtor 2002 - Komandanti i Krahut jugor të Aleancës Veriatlantike admirali Gregori Xhonson ka qëndruar dje në Kosovë dhe ka vizituar Prizrenin dhe Mitrovicën. Në Prishtinë admirali Xhonson ka zhvilluar një takim me komandantin e KFOR-it, gjeneralin Fabio Mini, ku është biseduar për gjendjen e sigurisë.

Të dy bashkëbiseduesit kanë vlerësuar se gjendja e sigurisë në Kosovë ka shënuar përparime të mëdha krahasuar me një vit më parë dhe kanë premtuar se forcat ndërkombëtare do të vazhdojnë të ruajnë paqen në Kosovë, megjithë reduktimet që parashikohen të bëhen në vitin e ardhshëm.
Komandanti i Krahut jugor të Aleancës Veriatlantike admirali Gregori Xhonson ka pasur një takim të veçantë edhe me kryeadministratorin e Kosovës Mihael Shtajner.


Forcat paqeruajtëse ndërkombëtare kanë gjetur granata dore në shkollat e Pejës dhe Deçanit

Pejë - Deçan, 21 dhjetor 2002 - Forcat paqeruajtëse ndërkombëtare gjatë ditës së enjte kanë gjetur disa granata dore në dy shkollat e mesme në Pejë dhe një në një shkollë në Deçan. Sipas zëdhënësve të KFOR-it nuk dihet se nga kush janë vendosur këto granata të cilat menjëherë janë asgjësuar nga njësitet e forcave paqeruajtëse.


Komisioni Evropian thotë se rritja më e madhe e prodhimit është shënuar në Kosovë

Bruksel, 21 dhjetor 2002 - Komisioni Evropian ka bërë të ditur se në vendet e Ballkanit Perëndimor gjatë dy vjetëve të fundit është shënuar rritje ekonomike dhe rënie e inflacionit. Rritja më e madhe e prodhimit është shënuar në Kosovë me 11 për qind, në Shqipëri 6.5 për qind, në Jugosllavi 5.5 dhe në Maqedoni vetë 4.1 për qind.

Gjatë periudhës së përmendur në vendet e Ballkanit Perëndimor investime direkte të jashtme kanë arritur shumën prej 2.5 miliardë dollarësh, dy herë më tepër se në vitin 1998.


Papa Gjon Pali ka nënshkruar një dekret tjetër drejt shenjtërimit të Nënës Tereze

Vatikan, 21 dhjetor 2002 - Papa Gjon Pali i Dytë ka nënshkruar dje një dekret tjetër drejt shenjtërimit të Nënës Tereze. Zyrtarë të Misionit Bëmirës të Nënë Terezes në Vatikan dhe në Kalkutë të Indisë thanë se ceremonia për lumnimin e murgeshës shqiptare është caktuar të mbahet më 19 tetor të vitit të ardhshëm.

Lumnimi është hap i fundit zyrtar para shenjtërimit të mundshëm. Një mrekulli e dytë nevojitet para se ajo të shpallet e shenjtë.

Mrekullia e parë ka të bëjë me indianën 30-vjeçare Monika Pestra e cila u shërua nga kanceri në stomak nëpërmjet lutjeve të Nënë Terezës. Mjekët e cilësuan shërimin e zonjës Pestra si të pashpjegueshme nga ana mjekësore.

Vatikani njoftoi në fillim të vitit se kjo mrekulli ishte autentike. Nëna Tereze është admiruar në gjithë botën për punën e saj për të ndihmuar të varfërit dhe të sëmurët e Kalkutës në Indi për më shumë se një gjysmë shekulli.


Shtajner nënshkruan dy ligje të miratuara, por i kthen Kuvendit dy ligjetë tjera pë t'i rishikuar

Prishtinë, 21 dhjetor 2002 - Shefi i OKB-së në Kosovë Mihael Shtajner ka nënshkruar dy ligje të miratuara disa kohë më parë nga Kuvendi i Kosovës. Kjo e rrit në gjashtë numrin e akteve ligjore të miratuara dhe nënshkruara këtë vit nga Kuvendi dhe kreu i UMMIK-ut.

Ai ka nëshkruar Ligjin për regjistrin e patundshmërive dhe Ligjin për hipotekat. Por në të njëjtën kohë Shtajner i ka kthyer Kuvednit dy ligje për t'i rishikuar edhe njeherë.


Drejtuesit serbë të Universitetit serb të Mitrovicës janë pajtuar të jenë pjesë e sistemit arsimor të Kosovës

Mitrovicë, 21 dhjetor 2002 - Sipas zëdhënses së administratës se UNMIK-ut, ka thënë se drejtuesit e Universitetit serb të Mitrovicës janë pajtuar të jenë pjesë e sistemit arsimor të Kosovës dhe kanë pranuar të bëjnë reformimin e sistemit të atjeshëm konform standardeve evropiane.

Prandaj ajo mendon se parlamenti i Kosovës duhet të licencojë punën e këtij universiteti. Kjo zëdhënëse po ashtu ka theksuar se Universiteti i Mitrovicës ka pranuar të punojë në kuadër të Ministrisë së Arsimit, por Parlamenti Kosovës nuk është pajtuar që ta vërë atë në sistem, thekson kjo zëdhënëse.
Ndërkohë rektori i këtij universiteti Gojko Saviq thotë se me vetë faktin se përfaqësuesit e serbëve të Kosovës kanë kërkuar që Universiteti të zyrtarizohet gjë që nuk është pranuar nga deputetët shqiptarë do të thotë se ata e pranojnë që ky universitet të jetë pjesë e sistemit arsimor të Kosovës.
Zyrtarët e UNMIK-ut thonë se ky universitet është akredituar e jo licencuar.


Qeveria e Kosovës do të hapë Zyrën e Stabilizim-Asociimit

Prishtinë, 21 dhjetor 2002 - Zyra e Kryeministrit të Kosovës, në fillim të vitit 2003 do të pasurohet edhe me një sektor shumë të rëndësishëm të lidhjes së Kosovës me Bashkimin Evropian - Zyrën e Procesit për Stabilizim dhe Asociim. Kjo do të jetë njësi përgjegjëse për procesin në tërësi dhe do të koordinojë punën dhe kontaktet e institucioneve të Kosovës me mekanizmat e bashkësisë evropiane.
Sipas Kryeministrisë, kjo Zyrë do të ketë sektorët përgjegjës për disa fusha të veçanta dhe do të jetë përgjegjëse për koordinimin e punës me ministritë, të cilat aktualisht po i emërojnë zyrtarët e tyre, si përfaqësues të tyre për këtë proces. Po ashtu do të ngrihet një rrjet ekspertësh brenda Qeverisë që do të punojë në çështjet e procesit të Stabilizimit dhe Asocimit.
Kontakti i parë i Kosovës me Komisionin Evropian për procesin e Stabilizim Asocimit do të jetë në pjesën e dytë të janarit 2003. Zyra e Procesit për Stabilizim dhe Asocim do të bashkëpunojë edhe me vendet në procesin e Stabilizim dhe Asocimit, për të këmbyer përvojat dhe për të koordinuar punët rreth këtij procesi.


Krimi i organizuar është një problem shumë serioz në Shqipëri

Tiranë, 21 dhjetor 2002 - Krimi i organizuar është një problem shumë serioz në Shqipëri dhe strukturat evropiane kërkojnë një bashkëpunim të ngushtë nga autoritetet shqiptare për ta luftuar këtë dukuri. Këtë qëndrim e shprehu të enjten në Uashington, Kris Paten, komisioner i marrëdhënieve me jashtë të Bashkimit Evropian.

Zoti Paten ka folur shpesh kohët e fundit për krimin e organizuar në Ballkan dhe sa e rëndë është gjendja në këtë drejtim në rajon. Në një konferencë për këtë çështje që u mbajt muajin e fundit në Londër ai tha se e sheh këtë fenomen si një problem shoqëror, politik dhe ekonomik.

Të enjten ai shpjegoi se sa serioze është gjendja në Shqipëri. ”Duhet të them se situata në drejtim të krimit të organizuar dhe korrupsionit është e rëndë në gjithë Ballkanin, dhe veçanërisht në Shqipëri”, tha zoti Paten.


Shqiptarët e Malit të Zi shprehen mbështetje për kandidatin për president, Filip Vujanoviq

Podgoricë, 21 dhjetor 2002 - Shqiptarët e Malit të Zi shprehën mbështetje për kandidatin për president të këtij vendi dhe kryetarin aktual të Parlamentit Filip Vujanoviq. Liderët e partive politike shqiptare në këtë Republikë i ftuan zgjedhësit shqiptarë që të dalin në zgjdhjet presidenciale më 22 dhjetor dhe të votojnë për kandidatin e Partisë Demokratike Socialiste në pushtet në Malin e Zi.
Zëdhënësi i Unionit Demokratik të Shqiptarëve Ferhat Dinosha vlerësoi se përkrahja e kandidatit për president Vujnoviq do të krijonte partneritet më të madh midis partive shqiptare dhe pushtetit në Mal të Zi.


SHBA kanë vënë veto në një rezolutë të KS që dënonte Izraelin për vrasjen e një britaniku dhe të dy palestinezëve

Nju Jork, 21 dhjetor 2002 – Shtetet e Bashkuara kanë vënë veto në një rezolutë të Këshillit të Sigurimit, të sponsoruar nga Siria, me të cilën dënohet Izraeli për vrasjen kohë më parë të një britaniku dhe të dy palestinezëve, që kanë punuar për Kombet e Bashkuara në Bregun Perendimor dhe në Gaza, njofton Rojter.

Dymbëdhjetë anëtarë të KS-së, përfshirë edhe Britaninë, kanë votuar në favor, kurse Bullgaria dhe Kameruni kanë abstenuar. Por, vota negative e Shteteve të Bashkuara, një nga anëtaret e përhershme të Këshillit me fuqinë e vetos, ka domethënien se rezoluta në fjalë nuk është aprovuar.


Kolumbia, Rusia dhe Pakistani janë cilësuar si vendet më të rrezikshme në botë për gazetarët

Bruksel, 21 dhjetor 2002 - Kolumbia, Rusia dhe Pakistani janë cilësuar si vendet më të rrezikshme në botë për gazetarët nga Federata Ndërkombëtare e gazetarëve, me qendër në Bruksel. Gjatë këtij viti 67 gazetarë, fotografë apo kameramnë janë vrarë duke kryer detyrën.

Megjithatë kjo shifër është më e ulët se ajo e vitit të kaluar, ku 100 gazetarë humbën jetën si pasojë e profesionit të tyre.


Të pakten 20 udhëtarë të një treni në Indi drohet se kanë humbur jetën

Nju Delhi, 21 dhjetor 2002 – Të pakten 20 udhëtarë drohet se kanë humbur jetën dhe 100 të tjerë janë lënduar pasi gjatë natës një tren ekspres ka dalë nga binarët në Indinë jugore, njofton AFP.

Një zyrtar i lartë ka thënë sot (të shtunën) se kjo fatkëqësi hekurudhore ka ndodhur në distriktin Kurnul të shtetit Andra Pradesh. Deri tash janë zbuluar 10 trupa vetëm nga një vagon.


Uashingtoni thotë se këtë fundjavë do t'u japë inspektorëve të armëve të OKB-së të dhëna të reja

Uashington, 21 dhjetor 2002 - Shtetet e Bashkuara thonë se këtë fundjavë do t'u japin inspektorëve të armëve të OKB-së të dhëna të reja që ato disponojnë për programet e armëve të Irakut.

Ky njoftim pason ankesën e kryeinspektorit të Kombeve të Bashkuara për armët, Hans Bliks, se ekipit të tij nuk po i jepeshin të gjitha të dhënat që kishin siguruar shërbimet sekrete të Shteteve të Bashkuara dhe Britanisë.
Bagdadi vazhdimisht e ka mohuar se ka programe për zhvillimin e armëve të shkatërrimit në masë. Ndërkohë, presidenti Bush ka anuluar një turne në Afrikë nga data 10 deri në 17 janar.

Një zëdhënës tha se zoti Bush do të qëndronte në Uashington, pjesërisht, për të mbikqyrur situatën në Irak, por anulimi i këtij turneu nuk duhej parë si dëshmi se Amerika ishte më pranë luftës. Njoftohet se presidenti Bush ka dhënë urdhër për dyfishimin e numrit të trupave amerikane në rajonin e Gjirit Persik.


Hans Bliks tha se Shtetet e Bashkuara dhe Britania duhet t'i japin atij më shumë të dhëna

Uashington, 21 dhjetor 2002 - Kryeinspektori i Kombeve të Bashkuara për armët, Hans Bliks, tha se Shtetet e Bashkuara dhe Britania duhet t’i japin atij më shumë të dhëna zbulimi rreth objekteve ku Iraku mund të ketë fshehur armë të shkatërrimit në masë.

Në një intervistë me BBC-në, zoti Bliks tha se qeveritë e këtyre dy vendeve kanë burime dhe teknologji spiunazhi që u mungojnë inspektorëve, kështu që ato duhet t'u tregojnë atyre se ku të kërkojnë. Më parë, zoti Bliks kritikoi deklaratën e Irakut mbi armët, duke thënë se ajo nuk përmban ndonjë ndryshim të rëndësishëm nga të dhënat që Bagdadi u kishte dhënë inspektorëve në vitin 1998.


Shtetet e Bashkuara dhe Britania thonë se raporti irakian është plotë gënjeshtra dhe mungesa

Uashington, 21 dhjetor 2002 - Shtetet e Bashkuara dhe Britania thonë se raporti irakian është plotë gënjeshtra dhe mungesa dhe sekretari amerikan i Shtetit, Kolin Pauell, thotë se raporti përbën një shkelje materiale të rezolutës së OKB-së për çarmatim.

Mirëpo, sekretari Pauell e bëri të qartë se nuk do të ndërmereret menjëherë ndonjë veprim kundër Irakut dhe se Shtetet e Bashkuara kërkojnë instesifikimin e inspektimeve, përfshirë intervistat me figura kyçe në programet irakiane të armëve. Nndërkohë, kryeministri i Britanisë, Toni Bler, u tha trupave britanike që të përgatiten për një luftë të mundshme me Irakun.

Gjatë një fjalimi në radion ushtarake britanike, kryeministri Bler tha se mbetet e pa qartë nëse do të arrihet në përfundimin se Iraku ka shkelur rezolutën e Kombeve të Bashkuara. Ai theksoi se misioni kyç i trupave është të përgatiten në mënyrë që Britania dhe Shtetet e Bashkuara të mund të ndërmarrin veprime ushtarake kundër Iraku nëse ato duhet ta bëjnë një hap të tillë.


Senatori amerikan Lot dha dorëheqjen nga posti i udhëheqësit republikan në Senat

Uashington, 21 dhjetor 2002 - Senatori amerikan Trent Lot dha dorëheqjen nga posti i udhëheqësit republikan në Senat, në klimën e debateve mbi komentet që linin të kuptohej se ai mbështeste ndarjen raciale.

Me anë të një deklaratë zoti Lot tha dje se po heq dorë nga posti drejtues në interes të atij që ai e quajti "program më i mirë i mundshëm për të ardhmen e vendit". Por zoti Lot tha se ai do të vazhdojë ta mbajë vendin e tij si senator i Misisipit, kështuqë republikanët do të vazhdojnë të përbëjnë shumicën në Senat.