Lajme, 20.12.2002

20/12/2002 - Trepça.net

Lajme, 20.12.2002

Përmbajtja:

Ministri i Ambientit dhe Planifikimit Hapësinor u prit në KK të Prishtinës
Nesër në Prishtinë i fillon punimet konferenca dyditore e të rinjve nga të gjitha viset shqiptare
Në Gjenovë organizohet një mbrëmje bamirësie për fëmijët e Kosovës
KS: Për fillimin e bisedimeve për statusin përfundimtar të Kosovës të përmbushen të gjitha standardet
Në Kosovë po bëhen përgatitjet për ngritjen e një universiteti amerikan
Universiteti serb i licencuar nga UNMIK-u për strukturat komunale në Mitrovicë është ilegal
Reth 7000 litra benzinë të kontrabanduara janë zënë nga policia e UNMIK-ut në rrugën Mitrovicë – Prishtinë
Konstituohet Senati i UP përkundër vendimit të Ministrisë së Arsimit që kjo çështje të shtyhet deri më 15 qershor
Riatdhesohen në Shqipëri 37 të burgosur nga burgjet greke
Zonat veriore të Shqipërisë kërkojnë më shumë ndihmë nga qeveria
B.Trajkovski: Maqedonia nuk mund t'i pranojë tezat se përcaktimi i kufirit duhet të presë zgjidhjen e statusit final të Kosovës
Në Rripin e Gazës është vrarë një palestinez i armatosur dhe një kolon izraelit
Bush pritet të bëjë sot komentet e para lidhur me deklaratën e Irakut
Kryengritës të dyshimtë islamikë kanë vrarë tri vajza të reja në Kashmirin indian
Forcat izraelite kanë vrarë një vajzë 11-vjeçare palestineze
SHBA-të pohojnë se Bagdadi nuk ka vepruar në përputhje me rezolutën e Kombeve të Bashkuara
Para një kampi fushor gjerman në Afganistan ka hedhur veten në ajër nja kamikaz afgan
Bashkëpunim më i madh në mes të policisë evropiane "Europol" dhe autoriteteve amerikane
Janë arrestuar nëntë anëtarë të Organizatës ilegale baske ETA

Ministri i Ambientit dhe Planifikimit Hapësinor u prit në KK të Prishtinës

Prishtinë, 20 dhjetor 2002 - Ministri i Ambientit dhe Planifikimit Hapsinor z.Ethem Çeku, me bashkëpunëtorë vizitoi sot Kuvendin Komunal të Prishtinës dhe u prit nga z.Ismet Beqiri, kryetar.
Në takim u bisedua lidhur me disa projekte të caktuara që kanë të bëjnë me rregullimin e ambientit hapsinor ne këtë komunë si dhe për kthimin e normalitetit në këtë fushë që tashmë ka marrë përmasa degjeneruese.

Ministri Çeku tha me këtë rast se është në fazën përfundimtare hartimi i ligjit për planifikimin hapsinor në mënyrë që sa më pare që të jet e mundur të vëndosim bazamentin për planifikim të qëndrueshëm hapsinor jo vetëm në komunën e Prishtinës, por edhe me gjërë në nivel të vendit.

Poashtu, po bëhën përgatitje edhe për formimin e një grupi ekspertësh, i cili do të merrej me hartimin e një programi konkret për Prishtinën në këtë fushë.
Kryetari i komunës së Prishtinës Ismet Beqiri theksoi se edhe në të ardhmen nuk do të mungojë bashkëpunimi me nivelin qëndror me qëllim që t`i jipet krah zhvillimit të kësaj komune në të gjitha fushat. Gjithashtu ai theksoi se me Ministrinë e Ambientit dhe Planifikimit Haëpsinor do të thellohen marrëdhëniet dhe do të shkëmbehen përvojat e pikëpamjet në mënyrë që Prishtina të kthehet në një qendër të planifikuar urbane dhe të jetë konkurente me qytetet simotratë Evropës.


Nesër në Prishtinë i fillon punimet konferenca dyditore e të rinjve nga të gjitha viset shqiptare

Prishtinë, 20 dhjetor 2002 - Nesër, më 21 dhjetor, në mjediset e hotelit "Grand" në Prishtinë, në orën 11.00, i zhvillon punimet Konferenca dyditore e të rinjve, me temën "Të rinjtë - një shans më shumë për integrime", e organizuar nga Forumi i Rinisë së LDK-së.
Në këtë konferencë, përfaqësuesit e organizatave rinore politike nga Kosova, Shqipëria, Maqedonia, Mali i Zi dhe Lugina e Preshevës do të diskutojnë për rolin dhe ndikimin e të rinjve në proceset demokratike dhe të integrimeve të gjithanshme. Pritet që pjesëmarrësit në fund të kësaj konference të miratojnë një deklaratë të përbashkët.
Fillimet e punimeve të kësaj konference do t'i përshëndesë edhe Presidenti i Kosovës, Dr.Ibrahim Rugova, ndërsa të ftuar janë edhe Kryeparlamentari Nexhat Daci, Kryeministri Bajram Rexhepi dhe ministri i kulturës, sportit dhe rinisë Behxhet Brajshori.


Në Gjenovë organizohet një mbrëmje bamirësie për fëmijët e Kosovës

Gjenovë, 20 dhjetor 2002 - Me moton "Me gjithë zemër", më 30 dhjetor, në Teatrin "Carlo Felice" (Karlo Feliçe) të Gjenovës organizohet një mbrëmje bamirësie për fëmijët e Kosovës.

Në këtë mbrëmje do të marrin pjesëe edhe këngëtarët e njohur Dennis Fantina, Filippa Giordano, Mango e Stadio. Sigla është realizuar nga Klaudio Balioni. Ky manifestim do të transmetohet në TV nga RAI1 më 4 janar.


KS: Për fillimin e bisedimeve për statusin përfundimtar të Kosovës të përmbushen të gjitha standardet

Nju Jork, 20 dhjetor 2002 - Këshilli i Sigurimit të Kombeve të Bashkuara ka përkrahur dhe ka verifikuar raportin e delegacionit të tij i cili javën e kaluar qëndroi në Kosovë dhe në Beograd, me konkluzionin se parakusht për fillimin e bisedimeve për statusin përfundimtar të Kosovës paraqet përmbushja paraprake e të gjitha standardeve të përcaktuara me rezolutën 1244 të KS.

Në bazë të raportit të shefit të delegacionit, diplomatit norvegjez, Ole Peter Kolbi, ky qëndrim ka marrë mbështetjen e plotë të përfaqësuesit të UNMIK-ut.

Delegacioni e ka njoftuar Këshillin e Sigurimit për përparimin e dukshëm në Kosovë i cili pasqyrohet me formimin e institucioneve kalimtare të vetëqeverisjes në formë të Kuvendit dhe organeve lokale të pushtetit.

Më tutje në raport konstatohet se këto rezultate janë realizuar pikësëpari falë angazhimit të bashkësisë ndërkombëtare, por theksohet se përcaktimi për atë proces në Kosovë është më i vogël sesa ka mundur të pritet.

Poashtu konstatohet se edhe shumëçka duhet të bëhet në vendosjen e qeverisjes së ligjit, sigurimit të kthimit të papenguar dhe jetës së pjesëtarëve të bashkësive etnike në Kosovë dhe të përgatitjeve për fillimin e privatizimit.

Gjithashtu në raport u jipet përkrahje qëllimeve reale të cilat i ka përcaktuar misioni i UNMIK-ut në ndërtimin e një Kosove demokratike dhe multietnike, me konstatimin për lidhmërinë reciproke të stabilizimit dhe sigurisë së Kosovës dhe stabilizimit të shteteve përreth.


Në Kosovë po bëhen përgatitjet për ngritjen e një universiteti amerikan

Uashington, 20 dhjetor 2002 - Në Kosovë po bëhen përgatitjet për ngritjen e një universiteti amerikan. Tashmë është themeluar fondacioni për Universitetin e ardhshëm i cili mendohet fillimisht 100 studentë dhe dy degë: atë të biznesit dhe të shkencave shoqërore.

Drejtori i planifikimit akademik pranë këtij fondacioni dr. Endrju Gradinski thotë se pranimet e studentëve në këtë universitet do të bëhen në bazë të meritave dhe gjuha e vetme e mësimdhënies do të jetë anglishtja, pra do të jetë një universitet në gjuhën angleze.
Z. Gradinski në një interevistë dhënë "Zërit të Amerikës" tha se nisma për krijimin e Universitetit amerikan në Prishtinë është një nismë vendore. Fondacioni është themeluar nga Agan Ismaili i cili është nga Kosova. "Aktualisht në bordin ka intelektualë nga Kosova dhe amerikanë të njohur.

Një nga gjërat për të cilat krenohem më shumë është fakti se unë jam një person i huaj që punojë për një organizatë joqeveritare kosovare dhe jondërkombëtare", tha z. Gradinski.

Ai shtoi se 65 për qind e kurseve bazë në Universitetin amerikan të Kosovës do të jepen nga profesorë amerikanë. Për sa i përket të tjerëve, tha Gradinski po studiohet mundësia për të marrë kosovarë që janë arsimuar jashtë vendit dhe që njohin mirë universitetet e stilit amerikan. Ai theksoi se diplomat e këtij universiteti do të njihen nga universitetet tjera të botës.
Dr. Gridinski shpreson se klasa e parë në këtë universitet do të pranohet në verën ose vjeshtën e vitit 2003.


Universiteti serb i licencuar nga UNMIK-u për strukturat komunale në Mitrovicë është ilegal

Mitrovicë, 20 dhejtor 2002 - Vendimi i shefit të UNMIK-ut për licencimin e Universitetit serb të Mitrovicës është vlerësuar i padrejtë nga zyrtarët komunalë dhe ata të Fakultetit Xehtaro Metalurgjik në Mitrovicë. Ndërkohë që zyrtarët e UNMIK-ut thanë se kjo është bërë me qëllim që shkollimi i lartë i pjesëtarëve të minoritetit serbë të jetë nën kontroll të UNMIK-ut.
Zëdhënësi i UNMIK-ut Xhorxhi Kakuk tha se qëllimi i këtij licencimi është që ky universitet të legalizohet se paku deri në muajin gusht të vitit 2003. Derisa uniersiteti serb në veri të Mitrovicës është licencuar nga UNMIK-u studentët shqiptarë të Fakultetit Xehtaro-Metalurgjik janë të detyruar që ligjeratat e tyre t'i mbajnë në fshatin Shipkoc në periferi të Mitrovicës. Ndërkohë Shefqet Ibrahimi thotë se vendimi i kreut të UNMIK-ut Mihael Shtajner është diskriminim për ta.
Edhe zëvendëskryetari i Asamblesë komunale të Mitrovicës Mursel Ibrahimi thotë se ky universitet do të ishte i pranueshëm vetëm nëse do të funksiononte në ombrelën e Universitetin e Prishtinës dhe ku do të kishin qasje studentët e të gjitha përkatësive etnike. Ai nënvizoi se ky universitet për strukturat komunale është ilegal dhe i panjohur.


Reth 7000 litra benzinë të kontrabanduara janë zënë nga policia e UNMIK-ut në rrugën Mitrovicë – Prishtinë

Mitrovicë, 20 dhjetor 2002 - Retha 7000 litra benzinë të kontrabanduara janë zënë të mërkurën në mbrëmje nga policia e UNMIK-ut në rrugën Mitrovicë - Prishtinë, njoftuan burimet e policisë ndërkombëtare në Mitrovicë.

Pjesa veriore e Kosovës paraqet një portë për hyrjen e mallërave të kontrabanduara. Zëdhënësja e policisë së UNMIK-ut tha se policia ndërkombëtare e UNMIK-ut i ndaloi dy kamionë të cilët i drejtonin boshnjakë nga Serbia që po transportonin 7000 litra benzinë.

Vozitësit nuk e kishin dokumentacionin përcjellës për sasinë e benzinës. Kamionët u përcollën deri në zyrën e doganës në Mitrovicë dhe se ky rast i është dërguar hetuesisë.


Konstituohet Senati i UP përkundër vendimit të Ministrisë së Arsimit që kjo çështje të shtyhet deri më 15 qershor

Prishtinë, 20 dhjetor 2002 - Përkundër vendimit të Ministrisë së Arsimit, Shkencës dhe Teknologjisë se konstituimi i Senatit të Universitetit duhet të shtyhet për 15 qershor, dje u mbajt mbledhja konstituive e këtij organi.

Ministria e arsimit deklaron se sipas ligjit të ri të arsimit të lartë së pari duhet të konstituohet statuti i ri i Universitetit e pastaj të fillojnë procedurat tjera.


Riatdhesohen në Shqipëri 37 të burgosur nga burgjet greke

Tiranë, 20 dhjetor 2002 - Përgjigja e autoriteteve shqiptare i dha fund një greve urie të të burgosurve shqiptarë, që vuajnë dënimin në burgun e Janinës. 37 të burgosur do të riatdhesohen brenda këtij viti, pas një urdhëri të ministrit shqiptar të drejtësisë. Ndërkaq, sot pritet që Shqipëria dhe Greqia të hapin një tjetër pikë-kalimi kufitar mes tyre.


Zonat veriore të Shqipërisë kërkojnë më shumë ndihmë nga qeveria

Tiranë, 20 dhjetor 2002 - Komuna e Kastratit në rrethin e Malësisë së Madhe gjendet në kufirin e Shqipërisë me Malin e Zi. Në territorin e kësaj komune kalon hekurudha ndërkombëtare që lidh Shqipërinë me Malin e Zi, si dhe pikëkalimi kufitar doganor i Hanit të Hotit.

Megjithatë, drejtuesit e kësaj komune kërkojnë që ekonomia e banorëve të zonës të përfitojë më shumë nga projektet rajonale.


B.Trajkovski: Maqedonia nuk mund t'i pranojë tezat se përcaktimi i kufirit duhet të presë zgjidhjen e statusit final të Kosovës

Shkup, 20 dhjetor 2002 - Në një fjalim të mbajtur në parlament, presidenti maqedonas Boris Trajkovski paralajmëroi se nuk do të ketë tolerancë ndaj krimit dhe bandave kriminale. Ai tha se në forcat e sigurimit duhet të punojnë profesionistët dhe duhet respektuar struktura shumetnike.
Trajkovski lidhur me çështjen e kufirit ndërmjet Maqedonisë dhe Kosovës, tha se nuk duhet të bëhen kompromise, duke theksuar se Maqedonia nuk munt t'i pranojë tezat që përcaktimi i kufirit duhet të presë përcaktimin e statusit përfundimtar të Kosovës.

Sipas tij përcaktimi i vijës kufitare dhe çështja e Kosovës nuk janë të lidhura mes tyre. Trajkovski tha se pret mbështetje nga shqiptarët e Maqedonisë dhe theksoi gjetjen e zgjidhjeve praktike për njerëzit që jetojnë në të dy anët e kufirit.


Në Rripin e Gazës është vrarë një palestinez i armatosur dhe një kolon izraelit

Gaza, 20 dhjetor 2002 – Në dhunën e re, që ka shpërthyer sot (e premte) në Rripin e Gazës, gjatë sulmeve të trupave izraelite, është vrarë militanti i armatosur Mejdi Musa, i cili ka shtënë në ushtarët izraelitë, njofton Rojter. Zyrtarët spitalorë kanë thënë se janë plagosur edhe shtatë persona të tjerë gjatë shkëmbimit të zjarrit.
Disa orë pas sulmeve izraelite, një palestinez i armatosur ka shtënë në një automjet izraelit afër postbllokut të kibucit izraelit Gush Katif në Rripin e Gazës, ku sipas burimeve izraelite është vrarë një izraelit. Zëdhënësi i kolonisë ka thënë se viktima ka qenë kolon. Grupi militant Xhihadi islamik e ka marrë përgjegjësinë për këtë vrasje.


Bush pritet të bëjë sot komentet e para lidhur me deklaratën e Irakut

Uashington, 20 dhjetor 2002 - Presidenti Bush pritet që të bëjë komentet e tij të para publike lidhur me deklaratën e Irakut, që kur Amerika deklaroi se Iraku kishte bërë një shkelje materiale të rezolutës së Kombeve të Bashkuara.
Sekretari i Shtetit Kolin Pauell, tha të enjten se mungesat materiale në dokument do të thoshin se Bagdadi ishte "në rregull në rrugën e tij duke djegur shanset" për të evituar ndërhyrjen ushtarake.
Zoti Pauell tha se Shtetet e Bashkuara pranonin se inspektorët e OKB-së duhet të vazhdonin punën e tyre në Irak, por shtoi se pengesë ishte Bagdadi që nuk pranon se ka armë të shkatërrimit në masë.
Sipas BBC-së, në Shtëpinë e Bardhë ka një ndjenjë kënaqësie lidhur me atë se çfarë është arritur nga mbledhja e Këshillit të Sigurimit.


Kryengritës të dyshimtë islamikë kanë vrarë tri vajza të reja në Kashmirin indian

Nju Delhi, 20 dhjetor 2002 - Kryengritës të dyshimtë islamikë kanë vrarë tri vajza të reja në Kashmirin indian për arsye se s'kanë qenë të veshura me rrobe muslimane, që mbulojnë trupin e femrës prej kokës deri në thembër, njofton UPI.

Ato janë vrarë një ditë pasi janë paraqitur posterët me shkrim dore në distriktin Raxhouri, që ua tërhiqte vërejtjen femrave për konsekuencat për mosbartjen e këtyre rrobeve.
Viktimën e parë e ka vrarë një person i armatosur, i cili ka hyrë në shtëpinë e saj në fshatin Hsyote dhe ka vrarë 21-vjeçaren Nourin Kousar. Po në të njëjtin fshat është kidnapuar vajza 18-vjeçare Tahir Parvin, e cila pastaj është gjetur e vdekur në xhungël me kokë të prerë disa orë më vonë.

Ndërkaq, viktima e tretë ka qenë vajza e re Shehnaz Akhtar, e cila gjithashtru është vrarë në mënyrë sadiste.


Forcat izraelite kanë vrarë një vajzë 11-vjeçare palestineze

Qyteti Gaza, 20 dhjetor 2002 – Tanket izraelite kanë hyrë sot (të premten) në orët e hershme të mëngjesit në qytetin Deir al Balal në Gaza, kanë rrethuar shtëpinë e një aktivisti të Xhihadit islamik dhe kanë vrarë një vajzë 11-vjeçare palestineze, kanë bërë të ditur paburimet palestineze, njofton Rojter. Burimet ushtarake izraelite ende s'kanë dhënë komente për hyrjen në Deir al Balah.
Ndërhyrjet në zonat palestineze po ndodhin pothuajse çdo natë, me ç’rast forcat izraelite po shkatërrojnë shtëpitë e aktivistëve palestinezë. Zyratarët izraelitë kanë thënë se aktet policore janë masa sigurimi, ndërsa grupet e të drejtave të njeriut akuzojnë se po pësojnë të afërmit e pafajshëm të militantëve.
Vajza 11-vjeçare palestineze është vrarë në qytetin Rafah në kufirin Gaza-Egjipt. Palestinezët kanë thënë se ajo është vrarë nga breshëria izraelite me armë zjarri, por irzaelitët kanë thënë se nuk dinë gjë për këtë vrasje. Radioja izraelite ka thënë se vajza është vrarë sigurisht gjatë shkëmbimit të zjarrit nga predhat e rastësishme.


SHBA-të pohojnë se Bagdadi nuk ka vepruar në përputhje me rezolutën e Kombeve të Bashkuara

Uashigton, 20 dhjetor 2002 - Shtetet e Bashkuara pohojnë se Bagdadi nuk ka vepruar në përputhje me rezolutën e Kombeve të Bashkuara që i kërkon Irakut të çarmatoset ose të përballet me pasoja serioze.

Ambasadori amerikan në OKB, Xhon Negroponte, u tha gazetarëve se raporti që Iraku paraqiti kohët e fundit mbi armët e tij, përmban ato që ai i cilësoi si vrima dhe boshllëqe sistematike, të cilat përbëjnë të ashtuquajturën shkelje materiale, term ky që mund të përdoret si shkak për ndërmarrjen e veprimit ushtarak.
Por, kryeinspektorët e OKB-së për armët thanë se në deklaratën mbi armët irakiane që Bagdadi i paraqiti organizatës botërore kohët e fundit, ka shumë pak informacione të reja.
Kryeinspektori i OKB-së për armët, Hans Bliks, pas takimit me dyer të mbyllura me Këshillin e Sigurimit kur mbërriti në selinë e Kombeve të Bashkuara, tha se raporti ka informacione të mira rreth veprimtarive që nuk kanë të bëjnë me armë, por shumë pak informcion rreth armëve.

Ai theksoi se bashkëpunimi irakian me inspektorët ndërkombëtarë armëve në terren ka qenë i mirë, por paralajmëroi se momentalisht bota nuk mund të jetë e sigurt se Iraku nuk zotëron armë të shkatërrimit në masë.


Para një kampi fushor gjerman në Afganistan ka hedhur veten në ajër nja kamikaz afgan

Kabul, 20 dhjetor 2002 - Para një kampi fushor gjerman të trupave paqësore në Afganistan ka hedhur veten në ajër nja kamikaz afgan. Nga Kabuli njoftohet se si pasojë janë plagosur dy francezë dhe dy përkthyesë afganë. Burime tjera flasin edhe për të vdekur.

Sipas Bundesferit ushtarët gjermanë nuk janë goditur nga sulmi. Kamikazi ka aktivizuar një granatë dore kur duhej të kontrollohej nga ushtria. Një person tjetër poashtu i pajisur me mjete shpërthyese është arrestuar nga trupat paqëruajtëse.


Bashkëpunim më i madh në mes të policisë evropiane "Europol" dhe autoriteteve amerikane

Bruksel, 20 djetor 2002 - Ministria e drejtësisë e Bashkimit Evropian ka aprovuar një marrëveshje e cila lejon një shkëmbim më të madh të informacioneve në mes të policisë evropiane "Europol" dhe autoriteteve amerikane. Shumica e ministrave ka mbështetur një projekt adekuat për bashkëpunim më të ngushtë amerikano-evropian me rastin e procedurave të ekstradimit.

Gjermania nga ana e saj vazhdon të refuzoj këto plane. Përkundër mbështetjes së ofruar në luftë kundër terrorizmit në Gjermani zotëron shqetësimi se qytetarët evropian në rast ekstradimi në Shtetet e Bashkuara të Amerikës duhet të llogarisin edhe me dënimin me vdekje.


Janë arrestuar nëntë anëtarë të Organizatës ilegale baske ETA

Madrid, 20 dhjetor 2002 - Në jugperëndim të Francës janë arrestuar nëntë anëtarë të Organizatës ilegale baske ETA. Sipas të dhënave të autoriteteve spanjolle në mesin e të arrestuarëve ndodhen edhe dy drejtues të një grupi përgjegjës për sulmet me bomba dhe atentate.

Siç njoftohet nga Madridi bëhet fjalë për një mision të përbashkët të policisë spanjolle dhe franceze. Bashkimi Evropian dhe Shtetet e Bashkuara të Amerikës ETA-në e shohin si një organizatë terroriste.