Bob Dol: Cilido të jetë posti dhe titulli im, unë jam i angazhuar për të ndihmuar popullin e Kosovës

Bob Dol: Cilido të jetë posti dhe titulli im, unë jam i angazhuar për të ndihmuar popullin e Kosovës



Populli i saj ka nevojë të ketë një zyrë. "Unë kam në dispozicion një zyrë avokatie, të përbërë nga ish-punonjës të Departamentit të Shtetit, Kongresit, apo ndihmës për presidentë të ndryshëm. Shpresojmë të organizojmë në momentin e duhur një vizitë të zotit Rugova, gjatë së cilës ai të takohet me presidentin Bush.

Do të përpiqemi të organizojmë takime të ndryshme për zyrtarë të tjerë të Kosovës, si kryetarin e parlamentit apo kryeministrin, me ligjvënës dhe përfaqësues të Departamentit të Shtetit si dhe Departamentit të Mbrojtjes. Ne do të shërbejmë në një farë mënyre si një mjedis ku të mblidhen të gjithë ata që janë të interesuar në përparimin e Kosovës", tha Dol.
"Prej më se 10 vjetësh unë kam qenë i interesuar në çështjen e Kosovës. Përveç kësaj kam kryesuar edhe Komisionin Ndërkombëtar për Personat e Zhdukur. Në kuadër të kësaj detyre kam punuar edhe në Kosovë në përpjekje për të gjetur personat e zhdukur gjatë konfliktit. E njoh mirë atë territor, pasi kam qenë me dhjetëra herë dhe sa herë shkoj, mahnitem nga energjia e popullit", theksoi Dol.
Ndërkaq, duke iu përgjigjur një pyetjeje lidhur me statusin final të Kosovës, ish-senatori Dol, pasi vlerësoi përparimet që janë arritur në Kosovë pas luftës, tha se "besonte se kjo do të ishte një nga përgjegjësitë që ne do të kemi kur të punojmë me doktor Rugovën dhe zyrtarë të tjerë të qeverisë së Kosovës, që të shohim nëse mund të gjejmë ndonjë rrugëzgjidhje.

Duhet të ketë ndonjë rrugë të mesme për zgjidhjen e kësaj çështjeje që t'u japë atyre sigurinë që u nevojitet në mënyrë që ata të vazhdojnë të bëjnë plane për të ardhmen", tha Dol. "Unë mendoj se ata janë të shqetësuar se nuk po i afrohen dot diskutimit për statusin përfundimtar. Disa kanë thënë 10 vjet, por unë mendoj se kjo çështje do të zgjidhet shumë përpara 10 vjetëve.

Dhe mua më duket se synimi duhet të jetë pavarësia, nëse duam të kemi stabilitet dhe të gjitha ato gjëra që duam të kemi në Kosovë për të gjithë njerëzit që jetojnë atje, ne duhet të diskutojmë sesi do të jetë ajo pas 5, 10, 15 vjetësh. Nuk besoj se ka ndonjë kufizim. Mund të jetë një vend shumë i vogël i pavarur, të ketë një ekonomi shumë të gjallë, njerëz energjikë dhe unë jam shumë optimist për të ardhmen".
Duke u përgjigjur në në një pyetje lidhur me praninë e vazhdueshme amerikane në Kosovë, përfaqësuesi i Kosovës në Amerikë, z. Dol theksoi se angazhimi amerikan nuk do të ndryshojë. "Ka gjëra të tjera që kanë dalë në plan të parë, si tragjedia e 11 shtatorit, lufta ndaj al-Kaidës, çështja e Irakut.

Të gjitha këto sigurisht që janë vënë në qendër të vëmendjes, por kjo nuk do të thotë se ne i kemi harruar përgjegjësitë tona për Kosovën, dhe pjesë e punës sime këtu do të jetë të punojmë me qeverinë amerikane dhe me këdo tjetër që është i interesuar për përgjegjësitë që kemi. Ne u bëmë premtime këtyre njerëzve dhe duhet t’i mbajmë premtimet tona dhe dihet që Amerika i mban premtimet e saj", theksoi Bob Dol.
Në mesazhin e tij në fund të intervistës për Kosovën dhe për popullin e Kosovës, ambasadori aktual dhe i qëmotshëm i Kosovës, tha:
- E falënderoj popullin e Kosovës, së pari për durimin, forcën dhe kurajën e tyre, sepse ata kanë vuajtur shumë këto 10-15 vitet e fundit. Tani ata janë para shanseve dhe lirisë dhe mua më duket se kjo është në mendjen e njerëzve çdo ditë. Por duke u nisur nga përvoja ime në atë pjesë të botës, veçanërisht në Kosovë, unë jam optimist dhe dua të bëj diçka për të ndihmuar, jo vetëm Presidentin, Kryeministrin apo Kryetarin e Parlamentit, por për të gjithë njerëzit atje që kanë nevojë vërtet për ndihmën tonë.

Dua t’u uroj të gjithëve mbarësi. Ne jemi shumë të lumtur për këtë që po bëjmë dhe kemi shumë besim tek njerëzit atje. Unë nuk do të angazhohesha për Kosovën nëse nuk do të kishte vërtet shpresa. Por cilido të jetë posti dhe titulli im, unë jam i angazhuar për të ndihmuar popullin e Kosovës.