Para mijëra qytetarëve, sot në Deçan u zbulua solemnisht shtatorja e Salih Çekajt

  

Deçan, 7 shtator 2002 (QIK) – Para mijëra qytetarëve të Deçanit, Rrafshit të Dukagjinit, nga mbarë Kosova si dhe nga diaspora, sot në Deçan, u bë zbulimi solemn i shtatores së Komandantit të Brigadës 137, Salih Çekajt, ish-nënkryetar i LDK-së, Dega në Gjermani, njëri ndër themeluesit e njësive të para të armatosura të rezistencës në Kosovë dhe veprimtar shumëvjeçar politik.

Sali Çekaj u vra në Koshare gjatë luftimeve me forcat ushtarake serbe në vitin 1999, kur shpërthehej kufiri Shqipëri-Kosovë. Në një atmosferë madhështore dhe organizim të mrekullueshëm, zbulimin e shtatores impozante e bëri Presidenti i Kosovës, Dr. Ibrahim Rugova me të birin dhe të shoqen e komandant Çekajt. Në këtë solemnitet që ishte simbolik edhe për ditën kur u bë zbulimi i përmendores, 7 Shtatorin - Ditën e Kushtetutës së Republikës së Kosovës, që u aprovua në Kaçanik, ishin të pranishëm personalitetet më të larta të jetës institucionale, politike dhe publike të Kosovës, të komunës së Deçanit, TMK-së etj.

Për veprimtarinë e Salih Çekajt fillimisht foli, kryetari Kuvendit komunale të Deçanit Mehmet Bojku, njëri ndër përfaqësuesit e Këshillit Organizativ. Në fjalën e tij ai u përqendrua në jetën dhe veprën e këtij heroi të kombit shqiptar të Kosovës, personalitetin e tij dhe guximin në situata kritike e të rrezikshme për shqiptarët, atëherë kur lufohej për jetë a vdekje.

 

Në vazhdim ai vuri në pah disa nga tiparet që e dallonin dhe e veçonin Salih Çekajn, si guximi, vendosmëria, fjalët e pakta dhe energjia e madhe e veprimit, afërsia me njerëz dhe aftësia organizative, popullariteti e respekti që gëzonte në Rrafshin e Dukagjinit dhe në rrethin ku sillej. Në vazhdim z.Bojku foli për angazhimin e Salih Çekajt që të harmonizohej statuti komuës së Deçanit me Kushtetutën e Republikës së Kosovë, ku punoi më përkushtim, ndërsa më vonë u angazhua me tërë energjinë paralelisht në dy rrafshe - politik dhe ushtarak.

 
 
Presidenti Rugova: Salih Çekaj është hero i Kosovës, me jetën dhe veprën e tij

 

Pastaj fjalën e mori Presidenti i Kosovës, Dr. Iibrahim Rugova, i cili duke i përshendetur familjarët e Salih Çekajt, miqtë e dashamirët, mijëra të pranishmit dhe mysafirët tha: "Dita e sotme është një ditë e madhe për Deçanin dhe gjithë Kosovën. Është ditë e madhe, sepse jemi tubuar këtu të bëjmë zbulimin e shtatores dhe monumentit të trimit Salih Çekaj". Presidenti Rugova shtoi se dita e sotme, 7 shtatori ka simbolikë të madhe, sepse lidhet me Ditën e miratimit të Kushtetutës të Republikës së Kosovës, para dymbëdhjetë viteve, që njihet si Kushtetuta e Kaçanikut. "Salih Çekaj, si e gjithë Kosova e njohu dhe e përkrahu këtë Kushtetutë – themelin legal të shtetit të Kosovës.   Ai vendosi ta zbatojë – ta vërë në jetë pikërisht në Deçan", theksoi në vazhdim Rugova, duke theksuar se të gjithë veprimtarinë e vet politike dhe shtetërore e ushtarake e vendosi në këtë themel dhe e mbrojti këtë.

 

"Dhe sot 7 shtatori i vitit 2002 po bëhet ditë e shënuar për ne me ngritjen e monumentit të Salih Çekajt, po bëhet ditë e rëndësisë së madhe. Gjithsesi duhet të themi se është ditë krenare për Deçanin e Kosovën, sepse kjo shtatore madhështore do të ndriçojë shpirtin tonë dhe vendin tonë", theksoi Presidenti Rugova, ndërsa ndërpritej me duartrokitje të gjata nga mijëra të pranishëm.

Presidenti tha pastaj se "prej sot, 7 shtatori do të ketë një simbolikë sublime dhe e dyfishtë me emrin dhe veprën e Salih Çekajt dhe të shtetit të Kosovës, kombit tonë. Në lëvizjen e lirisë të Kosovës dhe në historinë më të re të Kosovës, Ai hyn edhe si trim i betejës së Koshares, që me bashkëluftëtarët e vet dhe me Agim Ramadanin e me shumë trima të tjerë e thyen murin e Berlinit shqiptar dhe forcuan Pavarësinë dhe lirinë e Kosovës".

Presidenti Rugova duke folur për personalitetin e madh të tij tha se Salih Çekaj është Hero i Kosovës me jetën dhe veprën e tij. "Kam nderin t'ju njoftoj në këtë ditë të madhe, se së shpejti do nisim të bëjmë shpalljen formale të heronjve të popullit të Kosovës. Salih Çekaj aty e ka vendin e vet", tha Presidenti i Kosovës.

"Salih Çekaj, si të gjithë burrat e mëdhenj që bëjnë punë të mëdha, janë të urtë, stabilë, të guximshëm, fjalëpak, pra si bir i shquar i traditës shqiptare të Kosovës. Prej sot Beteja e Koshares po bëhet me monumentin e kryetrimit të saj, Salih Çekaj.

 

Njëherësh po stoliset edhe Kushtetuta e shtetit të Kosovës. Prej sot Deçani dhe Kosova po bëhen më të pasur me shtatoren – monumentin e Salih Çekajt, sepse burrat e mëdhenj e pasurojnë dhe nuk pushojnë ta pasurojnë vendin – shtetin e vet. Këtë e bëri Salihu ynë i dashur dhe vazhdon ta bëjë edhe sot dhe do të vazhdojë në të ardhmen", tha Presidenti I Kosovës, Dr. Ibrahim Rugova, duke uruar: Salih Çekaj, me fat shtatorja dhe monumenti yt. Me fat Deçanit dhe Kosovës. Ndërkaq, emocionet dhe duatrokitjet shpërthenin nga të gjitha anët.

Ndërkaq, Migjen Çekaj, i biri i heroit Sali Çekaj, duke përshendetur Presidentin Rugova, mysafirët dhe të pranishmit e tjerë, u pëqendrua në disa momente kyqe të jetës së babait të tij dhe veprimtarit të dalluar, duke vënë në spikamë ato veti të tija si prindë, si bashkëshort dhe si njëri i afërtë më të tjerët.

 

Ai tha se baba i tij luftoi dhe u vra, që Kosova e shqiptarët ta gëzonin lirinë e sotme dhe të mirat që i sjell liria. Migjen Çekaj, në vazhdim falenderoi strukturat komunale që e dhanë trollin për ndërtimin e shatores së Salih Çekajt, njerëzit nga Diaspora, të cilët kontribuan në ndërtimin e kësaj shtatore, Këshillin Organizativ dhe të gjithë ata që sot erdhën t'i bëjnë nderime babait të tij, i cili luftoi dhe u vra për çlirimin e shqiptarëve të Kosovës dhe për pavarësinë.

Për të nderuar veprën e madhe të Salih Çekajt, u organizua një manifestim i rrallë artistik, ku u prezentua Adelina Ismaili me Këngën e ushtarit dhe këngët e saja më të popullarizuara, si "Ushtrinë time do ta bëjë me Ibrahim Rugovën" që i emocionoi mijëra qytetarë të Kosovës, të cilët morën pjesë në këtë solemnitet, poashtu madhështor.

Copyright©2000-2002 Trepca.net