Kuvendi i IV-të i LDK-së

• Kryetari Rugova tha se do të punojë për të krijuar një Kosovë demokratike, tolerante, paqësore dhe të pavarur
• Përfunduan diskutimet në Kuvendin e LDK-së, votohet lista prej 102 kandidatëve për Këshillin e Përgjithshëm
• Deklarata e Kuvendit IV të LDK-së e miratuar më 8 qershor 2002
• Delegatët e Kuvendit të katërt të LDK-së miratuan Programin dhe Deklaratën politike
• Thekse nga Programi i LDK-së
• Diskutime në Kuvend
• Fjala e kryetarit të LDK-së në Kuvendin e katërt zgjedhor
• Kuvendin IV të LDK-së e përshëndetën shumë mysafirë
• Dr. Ibrahim Rugova me aklamacion u rizgjodh kryetar i LDK-së
• Në Prishtinë i filloi punimet Kuvendi i katërt i LDK-së
• Propozimi i Komisionit kandidues që Ibrahim Rugova të zgjedhet kryetar i LDK-së
• Sot paradite i fillon punimet Kuvendi IV i LDK-së

Kryetari Rugova tha se do të punojë për të krijuar një Kosovë demokratike, tolerante, paqësore dhe të pavarur   Prishtinë, 8 qershor 2002 (QIK) - Dr.Ibrahim Rugova, pas zgjedhjes edhe një mandat kryetar i LDK-së, i deklaroi "Zërit të Amerikës" se do të mbajë besimin që ia dhanë delegatët e Kuvendit të katërt të LDK-së "për të punuar për të mirën e Kosovës, për të krijuar një Kosovë demokratike, tolerante, paqësore dhe të pavarur".

Dr.Rugova theksoi se "ishte qëndrim i gjithë Kuvendit që Kosova duhet të njihet sa më parë, pra pavarësia e saj, sepse do të qetësonte rajonin dhe do të hapte perspektiva për zhvillimin ekonomik e demokratik të Kosovës".

 

Përfunduan diskutimet në Kuvendin e LDK-së, votohet lista prej 102 kandidatëve për Këshillin e Përgjithshëm

 

Prishtinë, 8 qershor 2002 (QIK) – Rreth programit të LDK-së u zhvilluan debate të frytshme dhe konstruktive, sikurse që u debatua edhe rreth çështjeve e problemeve të tjera. Akademik Nexhat Daci, duke u përqendruar në programin e Lidhjes Demokratike të Kosovës, z. Daci foli për rrjedhat shoqërore dhe inkuadrimin e kësaj partie në këto rrjedha, duke u paraprirë shumicës së rrjedhave.

  

Ndërkaq, Fatmir Rexhepi, kërkoi nga delegatët dhe nga partia që të gjenden alternativat për financimin e LDK-së, buxhetin e qëndrueshëm, sepse pa fonde dhe pa buxhet, tha ai, është vështirë të zhvillohet një aktivitet i dendur dhe për t'u kryer punët të cilat kërkohen nga programi dhe obligimet që dalë nga aktiviteti partiak.

 

Ai tha se duhet të kontaktohet dhe të zhvillohet një kontakt më i dendur me diasporën. Njëkohësisht ai u bëri thirrje institucionëve kombëtare, përkatësisht Qeverisë që të ketë parasysh dhe të parashikojë financimin e aktiviteteve të partive politike më një përqindje të caktuar nga buxheti i vet.

Muharrem Shabani tha se duhet të kërkohet nga insititucionet shtetërore që të caktohen datat historike dhe përvjetorët, në mënyrë që ata të shënohen në mënyrë zyrtare. Ndërkaq, Dr. Alush Gashi mbështeti programin dhe diskutimin e propozuar nga Sabri Hamiti. Rregulloren e Kuvendit IV e paraqiti Naim Jerliu.

 

Pas debateve u aprovua perogrami i LDK-së, Deklarata politike, Rregullorja e punës së Kuvendit IV të LDK-së. Pastaj u paraqit lista prej 102 kandidatëve për Këshillin e Përgjithshëm nga 285 delegatët e deleguar nga degët e LDK-së në Kosovë dhe në Diasporë, prej të cilëve do të zgjedhen 75 anëtarët e rinj të Këshillit të Përgjithshëm.

     

   

Deklarata e Kuvendit IV të LDK-së e miratuar më 8 qershor 2002

 

I. LDK-ja vlerëson se tri vjet pas lufte, Kosova e lirë ka pasur një progres të madh në të gjitha fushat e jetës.

II. Lidhja Demokratike e Kosovës do të punojë intensivisht në njohjen formale sa më të shpejtë të Pavarësisë së Kosovës. Kjo do të qetësonte rajonin tonë, këtë pjesë të Evropës e të botës, do të hiqte frikën e qytetarëve për të ardhmen e tyre dhe do të shpejtonte proceset demokratike e ekonomike të Kosovës.

III. LDK-ja do t'i përkrahë institucionet e Kosovës Presidencën, Kuvendin dhe Qeverinë.

IV. LDK-ja do të angazhohet për një zhvillim ekonomik të Kosovës, për privatizimin, investimet dhe krijimin e vendeve të punës për të rinjtë. Këtë do ta bëjë në kuadër të institucioneve të Kosovës dhe do të japë iniciativa si parti në bazë të Programit të saj operativ.

V. LDK-ja do të punojë së bashku me institucionet e Kosovës, KFOR-in dhe UNMIK-un në forcimin e sigurisë dhe të stabilitetit politik.

VI. LDK-ja do të angazhohet për mbrojtjen dhe integrimin e grupeve etnike, minoriteteve, në shoqërinë dhe në shtetin e Kosovës.

VII. LDK-ja do të punojë për një qarkullim të lirë në gjithë territorin e Kosovës dhe në integrimin e qytetit të Mitrovicës.
  

VIII. LDK-ja do të forcojë edhe më shumë bashkëpunimin me UNMIK-un, KFOR-in, OSBE-në dhe me shoqatat joqeveritare e qeveritare që veprojnë në Kosovë.

IX. LDK-ja do të punojë në integrimin më të shpejtë të Kosovës në BE, në NATO dhe do të forcojë lidhjet miqësore me SHBA.

X. LDK-ja do të punojë që Kosova të ndërtojë marrëdhënie të mira me fqinjët e saj.

XI. LDK-ja do të punojë në ruajtjen dhe ngritjen e imixhit pozitiv të Kosovës në planin ndërkombëtar.

XII. Të shënohet 12 qershori si ditë nacionale e Kosovës.

    

        

Delegatët e Kuvendit të katërt të LDK-së miratuan Programin dhe Deklaratën politike

 

Prishtinë, 8 qershor 2002 (QIK) - Kuvendi i katërt i LDK-së po i vazhdoi punimet sipa srednit të paraparë të ditës. Deri më tash delegatët miratuan Porgramin e LDK-së, aprovuan një Deklaratë politike, dhe propozuan kandidatët e mundshëm për Këshillin e ri të Përgjithshëm.

Për momentin delegatët janë duke votuar me vota të fshehta për kandidatët e propozuar, kurse procesi i numërimit të votave paksa do të vonojë.

Në vazhdim do të japim pjesë nga Programi i LDK-së dhe Deklaratën e plotë të Kuvendit të katërt.

     

Thekse nga Programi i LDK-së

 

LDK u bë promotore e demokracisë dhe kundërshtare e madhe e totalitarizmit

Lidhja Demokratike e Kosovës, si lëvizje dhe parti demokratike moderne mbështetet në traditën e përpjekjeve të shqiptarëve për pavarësi dhe liri të Kosovës.

 

Menjëherë pas formimit të saj në dhjetor të vitit 1989, nga një grup intelektualësh në krye me Dr. Ibrahim Rugovën, mori në gjiun e vet njerëz të shtresave të ndryshme që mbështesin vlerat morale e qytetëruese të shqiptarëve se liria dhe pavarësia janë parakushte të ekzistencës së një populli.

 

Ajo u bë integruese dhe harmonizuese e energjive të kombit, që shpien në një bashkim mendor e shpirtëror, për të mbrojtur të drejtat e popullit të vet pa prekur të drejtat e të tjerëve.

Duke u bërë artikuluese e vullnetit për pavarësi të Kosovës, LDK u bë promotore e demokracisë dhe kundërshtare e madhe e totalitarizmit, duke bërë një përqëndrim politik e një organizim të gjithanshëm, ku konkurrenca e ideve ka vlerë e kuptim deri në nivelin e marrëveshjes dhe atëherë merr formën e veprimit të pahamendje. Si forca më e madhe bashkuese politike e shqiptarëve ajo u priu veprimeve politike shtetformuese të Kosovës.

Lidhja Demokratike e Kosovës, drejt qëllimit madhor historik – pavarësisë së Kosovës, kërkoi harmonizimin e energjive të brendshme të shqiptarëve dhe ndihmën e miqve që njohin të drejtat e kombeve për vetëvendosje. Si artikuluese autentike e vullnetit politik të popullit të Kosovës, kjo lidhje këtë vullnet e ngriti në vullnet institucional: me organizimin e shpalljes së Deklaratës Kushtetuese 1990, nxjerrjes së Kushtetutës së Kaçanikut 1990, organizimit të Referendumit për Pavarësinë e Kosovës 1991 dhe Zgjedhjet parlamentare e presidenciale të Republikës së Kosovës 1992 e 1998. Në të dy zgjedhjet Lidhja Demokratike e Kosovës e ka fituar shumicën absolute në Parlamentin e Republikës së Kosovës dhe Dr. Ibrahim Rugova është zgjedhur Kryetar i Kosovës.

Duke u përcaktuar për tolerancë dhe dialog, LDK thuajse një decenie bëri përpjekje që çështja e Kosovës të zgjidhet me mjete politike e demokratike. Ajo organizoi një rezistencë të fuqishme të gjithë popullit të mbështetur në marrëveshje e solidaritet duke ndërtuar jetën institucionale që sot njihet në botë si shtet paralel i pavarur".

Në vitet 1998 e 1999, kur Beogradi vendosi të shkatërrojë me luftë shtetin e Kosovës duke bërë masakra e shkatërrime me përmasa të gjenocidit mbi shqiptarët, LDK – ja përkrahu, ndihmoi dhe mori pjesë në rezistencën e armatosur. Si rezultat i rezistencës së organizuar të Kosovës dhe i mbrojtjes së një populli, pasoi intervenimi ajror i NATO–s. Kështu më 12 qershor të vitit 1999, forcat e NATO–s dhe të KFOR–it hynë në Kosovë, që sot konsiderohet nga populli si ditë e lirisë së Kosovës.

Lidhja Demokratike e Kosovës gjatë veprimit të saj gjithmonë ka vlerësuar se pavarësia e Kosovës, si çështje ekzistenciale për Kosovën dhe popullin e saj, është çështje e madhe politike edhe për rajonin dhe nuk mund të zgjidhet pa ndihmën ndërkombëtare, në rend të parë të SHBA-ve dhe Bashkimit Evropian. Tash që kjo ndihmë është bërë vepër, LDK–ja bashkëpunon ngushtë me KFOR–in, UNMIK–un dhe OSBE–në për ta rindërtuar Kosovën në fazën kalimtare drejt qëllimit përfundimtar të lirisë, të pavarësisë dhe të demokracisë së saj.

 

Lidhja Demokratike e Kosovës këtë Program e ka vënë në zbatim në zgjedhjet për pushtetin lokal të organizuara në vitin 2000 si dhe në ato nacionale për pushtetin qendror, respektivisht, për institucionet e Kosovës të organizuara më 2001, në të cilat ka fituar shumicën e vendeve.

Kuvendi i Katërt zgjedhor i LDK – së Programin për zgjedhjet nacionale 2001, që është program operativ e shpall platformë të tashme, afatmesme dhe afatgjate të veprimit të vet në ndërtimin e shoqërisë dhe shtetit demokratik e prosperues të Kosovës (...).

   

       

Diskutime në Kuvend

 

S.Hamiti: Nuk ka Kosovë të pavarur pa demokraci, as demokraci pa Kosovë të pavarur

LDK-ja ka qenë dhe ka mbetur partia e parë dhe më e madhe demokratike në botën shqiptare postkomuniste. Prandaj, deri më sot e përgjithnjë është vendosur në qendër e në krahun e djathtë të politikës shqiptare.

LDK-në e kanë formuar intelektualët në krye më Ibrahim Rugovën, prandaj në themelin e saj janë vendosur përgjithmonë kultura, vlera, virtyti, besimi e toleranca si përbërës të kulturës autentike shqiptare dhe të përgjithshme perëndimore.

Në LDK, që në fillim, në vijim e më vonë, kanë hyrë shqiptarët e moshave e të shtresave të ndryshme, duke ia dhënë karakterin e një organizmi të gjerë. Prandaj, ajo është karakterizuar me bashkimin e solidaritetin duke u bërë zëartikuluese e vullnetit politik të qytetarëve.

LDK duke shprehur vullnetin politik të qytetarëve që në fillim dhe në vijim ka shpallur idenë dhe veprimin politik që Pavarësia e Kosovës, si zgjidhje optimale është domosdo e ekzistencës dhe parakusht për lirinë dhe demokracinë e saj. Prandaj veprimi i saj politik ka shkuar nëpër shkallët e rezistencës politike e të rezistencës së armatosur kundër pushtimit.

LDK është kundër diktaturës dhe anarkisë, duke ditur që vullneti politik mund të jetësohet e funksionalizohet vetëm kur të kthehet në institucione demokratike. Prandaj ka kultivuar demokracinë e brendshme nëpërmjet zgjedhjeve brenda saj, ashtu dhe duke zbatuar procesin e konkurrencës për të zbatuar vlerat në zgjedhjet e lira e demokratike për institucionet pushtetore.

LDK në natyrën e veprimit të vet ka marrëveshjen e bashkëpunimin. Prandaj ka krijuar një marrëdhënie me partitë e tjera shqiptare në Kosovë e jashtë saj për të arrituar bashkimin për qëllime të mëdha; poashtu ka krijuar lidhje e miqësi me të gjithë që përkrahin lirinë e demokracinë e Kosovës.

LDK ka kaluar nëpër sprova të rënda, mirëpo ka qëndruar sepse ka pasur vizion e qëndrueshmëri të programit.

E sot ku është e ku shkon Lidhja Demokratike? A kanë ndryshuar rrethanat? Si duket programi e veprimi i saj në këto rrethana duke ndjekur vizionet e saj.

Së pari Lidhja Demokratike do të ketë shndërrime të brendshme duke kaluar nga fronti i rezistencës e i refuzimit të hullitë e ndërtimit. Për këtë qëllim duhen anëtarë që i mban besimi në program, por edhe më shumë anëtarë që me dije e përkushtim programin do ta bëjnë vepër.

Së dyti, duke qenë dike pjesëmarrëse në pushtet e diku ushtruese e pushtetit, Lidhja Demokratike e ka të domosdoshme që programi i saj të bëhet konkret dhe të matet e të provohet me nevojat e interesat konkrete jetësore të qytetarëve. Suksesi i veprimit të këtillë do të provohet shumë shpejt në zgjedhjet e reja, qofshin nacionale apo lokale.

Së treti, LDK, duke ditur që Kosova qeveriset në një bashkëpunim ndërmjet të përfaqësuesve ndërkombëtarë dhe të përgjegjësve vendës, duhet të punojë me të gjitha energjitë për të marrë kompetenca e përgjegjësi për Kosovën, edhe në rastet kur ky proces ecën me vështirësi për shkak të një rezistence të paarsyeshme të burokratëve të UNMIK-ut.

Së katërti, të zgjedhurit e LDK-së, qofshin ata këshilltarë komunalë a deputetë të Kuvendit, qofshin ata funksionarë ekzekutivë apo ministra kanë përgjëgjësitë për zbatimin e programit të Partisë nëpërmjet të të cilit kanë marrë mandatet.

 

Janë naive e të papranueshme artikulimet e aty-këtushme, që funksionarët humbin ngjyrat e programit të partisë së vet për t'u bërë të gjithpranueshëm, gjoja se për të qenë të pavarur, të paanshëm. Respektimi i ligjit e ndershmëria janë alfa e omega e funksionarit, por njeriu në shërbim kurrë nuk mund të jetë i pavarur. Ai është në shërbim dhe ushtron kompetenca dhe përgjegjësi duke zbatuar një program e një mandat.

Së pesti, LDK ka një qëllim themelor, për ta bërë Kosovës të pavarur e demokratike. Tash këto janë të lidhura edhe së brendshmi edhe së jashtmi. Nuk ka Kosovë të pavarur pa demokraci. As demokraci nuk mund të ketë pa Kosovën e pavarur.

  
Sh.Ukaj: Të ashtuquajtura media të pavarura sulmuan brutalisht LDK-në

Delegati Shefki Ukaj në diskutimin e tij vuri theksin në avancimin e informimit brendapërbrenda LDK-së, duke kërkuar që udhëheqja e re t'i kushtojë rëndësi më të madhe këtij segmenti nëse ajo pretendon edhe më tutje të mbetet forca kryesore politike në Kosovë.

 

Ai në vazhdim tha se për të është e pakuptimtë përse Qendra për Informim e Kosovës (QIK), e cila ka qenë zëdhënës i fuqishëm për ndërkombëtarizimin e çështjes së Kosovës, përkatësisht pavarësisë së saj, të lihet anash dhe të tregohet shumë pak kujdes për të.

 

Z.Ukaj theksoi se nuk ishte e rastësishme se me të filluar bombardimet e NATO-s kundër pozicioneve militare e paramilitare serbe, forcat serbe në shenjë revanshi dogjën selinë e QIK-ut, që duke shpërndarë të vërtetën për Kosovën ishte në shenjestër të sulmeve të para.

 

Është fakt i pakontestueshëm se Qendra për Informim e Kosovës me stafin e saj të guximshëm dhe të palodhshëm me lajmet në gjuhën shqipe, anglishte, frengjishte dhe gjermanishte, duke shpërndarë me vite të tëra të vërtetën për Kosovën në të gjitha anët e botës, kishte krijuar emër dhe besim të madh në opinionin ndërkombëtar, tha Shefki Ukaj, duke shtuar se mjerisht, pas luftës në vend që QIK-u të forcohej, u la pas dore.

Me këtë rast ai kritikoi disa media të pavarura të cilat kanë sulmuar në mënyrë brutale LDK-në dhe udhëheqësin e saj, duke shpifur e gënjyer kundër saj dhe duke u përpjekur të krijojnë një imazh negativ për të dhe për ta kompremituar si lëvizje demokratike.

   

       

Fjala e kryetarit të LDK-së në Kuvendin e katërt zgjedhor

Ibrahim Rugova: Themi me mburrje se LDK-ja është kapitulli qendror i progresit të popullit të Kosovës

Prishtinë, 8 qershor 2002 (QIK) - Kryetari i LDK-së Ibrahim Rugova paraqiti referarin për punën dhe aktivitetin e LDK-së për periduhën mes dy kuvendeve. Në vazhdim po transmetojnë në tërësi fjalën e kryetarit Rugova.

- Sot kemi një moment solemn.

 

Është moment solemn, sepse mbajtja e Kuvendit tonë të katërt zgjedhor po bëhet në Kosovën e lirë, në Kosovën tonë të dashur. Dhe mbajtja e këtij Kuvendi koincidon pikërisht me 12 qershorin, kur po mbushen tri vjet të lirisë së Kosovës, ditën kur trupat e NATO-s hynë në Kosovë. Këtë ditë që tri vjet populli i Kosovës e feston si ditë nacionale të lirisë.

Sot, tri vjet në liri, mund të themi se Kosova ka pasur një progres të madh në të gjitha segmentet e jetës. Ky progres është bërë së bashku me UNMIK-un, KFOR-in dhe OSBE-në si dhe me shumë organizata qeveritare e joqeveritare që janë të pranishme në Kosovë. LDK-ja mund të themi me mburrje është kapitulli qendror i këtij progresi të popullit të Kosovës.

LDK-ja thuajse për dhjetë vjet veproi si parti-lëvizje në organizimin dhe mbajtjen e jetës së Kosovës.

 

Ajo, së bashku me partitë e tjera politike i vuri themelet e shtetit të Kosovës përmes veprave të mëdha siç janë Deklarata e Pavarësisë më 1990, Kushtetuta e Republikës së Kosovës më 1990, pastaj organizimi i Referendumit për Pavarësinë e Kosovës më 1991, kur për herë të parë në historinë e Kosovës u shpreh dhe u vërtetua vullneti politik i popullit në formë plebishitare.

 

Po ashtu akt madhor ishte organizimi i zgjedhjeve nacionale presidenciale e parlamentare më 1992 dhe më 1998 që mbanin në veprim shoqërinë dhe shtetin e Kosovës.

Do përkujtuar me këtë rast se LDK-ja bashkë me partitë e tjera u angazhua për koordinimin e veprimeve. Kështu më 1991 u themelua Këshilli Koordinues i partive politike shqiptare të Kosovës, në Maqedoni, në Preshevë dhe Mal të Zi.

 

Nga ky koordinim ka dalë dokumenti i rëndësishëm për zgjidhjen e çështjes shqiptare në rajonin tonë, që njihet si "dokument i tri opcioneve", që edhe sot shërben si bazë e veprimeve tona.

Në përgjithësi LDK-ja organizoi jetën në Kosovë në të gjitha fushat duke ndërtuar shtetin e Kosovës. Në vitin 1998, kur pushtuesi vendosi të sulmojë Kosovën duke bërë masakra e shkatërrime LDK-ja përkrahu dhe mori pjesë në rezistencën e armatosur në mbrojtje të Kosovës, që me ndërhyrjen e NATO-s dhe të miqve tanë u kurorëzua me lirinë e Kosovës, pikërisht para tri vjetëve.

Në Kosovën e lirë, LDK-ja u konsolidua më shumë, sepse sot ka mundësi të veprojë si parti e lirë e qytetarëve të lirë. Në zgjedhjet lokale të vitit 2001 LDK-ja doli fituese dhe po ashtu në zgjedhjet nacionale të vitit 2001 fitoi shumicën e vendeve në Kuvendin e Kosovës.

 

Qytetarët e Kosovës, edhe tash votuan për LDK-në, sepse i besojnë filozofisë së saj politike dhe veprimit praktik të saj në jetën e përditshme të Kosovës. Po ashtu u prit mirë nga qytetarët e Kosovës kompromisi demokratik i LDK-së me partitë e tjera për ndërtimin e institucioneve të Kosovës.

 

Gjithë këtë e bëri për të mirën e Kosovës. Kjo ndikoi pozitivisht ne stabilitetin politik të vendit. Dhe të gjithë ne nxorëm një mësim se në jetën demokratike kompromiset janë produktive, e sidomos kur janë në të mirë të Kosovës.

LDK-ja ka një organizim të gjerë e të qëndrueshëm në gjithë Kosovën si dhe në diasporë. Pra kjo parti vazhdon të jetë parti qendrore në jetën politike të Kosovës. Këtë e treguan edhe zgjedhjet brenda LDK-së, që u mbajtën gjatë marsit dhe prillit të këtij viti, ku morën pjesë me mijëra aktivistë të devotshëm të saj.

 

Mund të themi se me këto zgjedhje LDK-ja u përtri më shumë me njerëz të rinj dhe vuri në lëvizje potencialin e vet të madh të brendshëm. Pra reflektoi me energji pozitive.

 

Po ashtu me këto zgjedhje LDK-ja do të jetë më funksionale që t'u përgjigjet detyrave të ardhshme. Gjithsesi LDK-ja po profilizohet gjithnjë e më shumë si parti e tipit perëndimor. Ky ishte përcaktimi i vazhdueshëm i saj. Besojmë se ky Kuvend zgjedhor do të forcojë e modernizojë më shumë LDK-në duke respektuar traditën e saj trembëdhjetëvjeçare, duke ruajtur masivitetin e saj dhe duke u funksionalizuar.

Objektivat kryesorë të LDK-së në të ardhmen do të jenë: profilizimi i LDK-së, zhvillimi i strukturave të LDK-së që të jenë më afër qytetarëve-votuesve dhe kërkesave të tyre.

LDK-ja do të punojë në zhvillimin ekonomik të Kosovës, që të krijohen më shumë vende të punës për të rinjtë. Përkrah procesin e privatizimit dhe forcimin e mirëqenies së qytetarëve. Po ashtu do t’u japë përkrahje institucioneve të Kosovës: Presidencës, Kuvendit dhe Qeverisë. Do të ndikojë te këto institucione si dhe te institucionet e pushtetit lokal që të realizohen objektivat e saj. Po ashtu LDK-ja do të ndërmarrë iniciativa të ndryshme në zhvillimin e përgjithshëm të Kosovës.

LDK-ja do t'i kushtojë kujdes të duhur mbrojtjes dhe integrimit të grupeve etnike-minoriteteve në shoqërinë dhe shtetin e Kosovës. LDK-ja do të punojë intensivisht në njohjen sa më të shpejtë të Pavarësisë së Kosovës, si element kyç për të tashmen dhe të ardhmen e qytetarëve të saj.

 

Po ashtu LDK-ja do të vazhdojë të bashkëpunojë me KFOR-in, UNMIK-un dhe OSBE-në për më shumë siguri, zhvillim dhe stabilitet në Kosovë për të gjithë.

Sot kur po i zgjedhim organet e reja të LDK-së, i kujtojmë me krenari ata që nuk janë sot me ne për t'u zgjedhur prapë e që me vite e rritën veprën e LDK-së dhe madhështinë e saj. Pra e kujtojmë me nderim Prof. Aganin me energji të pashterrshme për LDK-në dhe Kosovën, Prof. Latif Berishën, Enver Malokun, Xhemajl Mustafën, Shaban Manajn e shumë e shumë aktivistë të tjerë të devotshëm.

Sot në këtë Kuvend dëshiroj t'i shpreh mirënjohje Presidentit Bush - pra Bushit Plak për Kërcënimin e Kërshëndellave me ç'rast vendosi "Vijën e kuqe" në mbrojtje të Kosovës më 1992. Kjo ishte një ngjarje me rëndësi në fillim të mbrojtjes së Kosovës që u realizua më vonë nga SHBA dhe aleatët evropianë.

Me këtë rast nga ky Kuvend përshëndesim Presidentin Bush, Kryeministrin Bler, Presidentin Shirac, Kancelarin Shrëder dhe Kryeministrin Berluskoni për përkrahjen që po i japin Kosovës në zhvillimin e saj në liri.

Si gjithmonë në mënyrë të veçantë përshëndesim Papa Gjon Pali II për kujdesin e tij të vazhdueshëm për Kosovën, për Dardaninë antike.

Paçim punë të mbarë.

Zoti e bekoftë Kosovën.

    

     

Kuvendin IV të LDK-së e përshëndetën shumë mysafirë

B.Mustafaj: LDK-ja diti dhe arriti të krijojë miq e aleatë për Kosovën dhe që e solli lirinë e pavarësinë

Prishinë, 8 qershor (QIK) - Në vazhdim punimet e Kuvendit IV të LDK-së i përshëndetën mysafirë të shumtë vendorë e ndërkombëtarë. Fjalën e mori i pari Majkëll Klein, përfaqësues i Zyrës amerikane në Prishtinë, i cili pasi përshendeti delegatët, kryetarin Ibrahim Rugova dhe mysafirët e tjerë, tha se LDK-ja e ka transformuar Kosovën, duke e theksuar se LDK-ja i ka dhënë Kosovës gati gjysmën e deputetëve për Parlamentin të Kosovës, ka dhënë kryetarin e Parlamentit dhe Presidentin e Kosovës. Ai i uroi punë të mbarë Kuvendin dhe suksese të mëtejshme LDK-së.

Ndërkaq, në emër të Partisë Demokratike të Shqipërisë, Kuvendin dhe kryetarin Ibrahim Rugova i përshendeti Besnik Mustafaj, sekretar për marrëdhënie me jashtë i kësaj partie.

 

Ai tha se PD-ja i ka dha këtë nder që ta përfaqësojë dhe ta përshendesë Kuvendin IV të LDK-së, Presidentin Rugova dhe popullin e Kosovës. Z. Mustafaj tha se LDK-ja ishte e para parti antikomuniste që ia hapi rrugën partive politike në Shqipëri dhe më gjerë.

 

Zoti Mustafaj pastaj dha vlerësime të larta për LDK-në, rrugën e saj të vështirë dhe të mundimshme, por që diti dhe arriti të krijojë miq e aleatë për Kosovën dhe që e solli lirinë e pavarësinë.

Pastaj, akademik Mark Krasniqi përshëndeti në emër të Partisë Shqiptare Demokristiane, duke theksuar meritat e LDK-së për lirinë e Kosovës dhe meritat e kryetarit Rugova, për siç tha ai, "lirinë që gëzojmë sot në Kosovë me ndihmën e aleatëve tanë SHBA-të, Evropën Perëndimore dhe NATO-n, por edhe me partitë alete të LDK-së". Mehmet Bardhi foli në emër të LDK- së Malit të Zi. Ai tha se shqiptarët e këtyre territoreve etnike falendrojnë Kosovën për ndihmën që u dhanë, sidomos në arsimimin e tyre.

 

Behlul Nasufi përshendeti në emër të Partisë për Veprim Demokratik në Preshevë, kurse Fuad Nimani nga Unioni Dekratik Shqiptar. Ndërkaq, Gjergj Dedaj, kryetar i PLK-së tha se Dr. Ibrahim Rugova është për Kosovën, ai që është për SHBA-të Abraham Linkolni dhe Uinston Çerçili për britanikët.

 

Në vazhdim Kuvendin e përshendeti Kaqusha Jashari kryetare e Partisë Socialdemokratike të Kosovës, Gani Xhafolli në emër të Lidhjes së Shkrimtarëve të Kosovës dhe përfaqësuesi i Sindikatave të Pavarura të Kosovës.

Kuvendi i vazhdon punimet e pasditës me zgjedhjen e Këshillit të Përgjithshëm nga delegatët e Kuvendit të degëve të LDK-së nga Kosova dhe diaspora.

   

      

Dr. Ibrahim Rugova me aklamacion u rizgjodh kryetar i LDK-së

 

Prishtinë, 8 qershor 2002 (QIK) – Kuvendi IV i Lidhjes Demokratike të Kosovës, që po mbahet sot në Prishtinë, rizgjodhi me aklamacion kryetar të LDK-së për mandatin dyvjeçar Dr. Ibrahim Rugovën.

Fillimisht propozimin e bëri Nimon Alimusaj, anëtar i Komisionit kandidutes, që u përcoll më duartrokitje të gjata e frenetike. Pastaj delegatët e Kuvendit IV të zgjedhur nga degët e LDK-së në Kosovë dhe në Diasporë, vendosën që kryetari të zgjedhet me aklamacion. Kështu, pas vënies në vota delegatët e Kuvendit me aklamacion rizgjodhën Dr. Ibrahim Rugovën, kryetar të Lidhjes Demokratike.

Zgjedhja e Kryetarit u ndoq me duatrokitje të gjata dhe të gjithë delegatët e mysafirët u ngritën në këmbë për ta përshëndetur Dr. Rugovën.

Pastaj Ibrahim Rugova falënderoi delegatët për besimin e dhënë edhe për një mandat të ri duke thënë së bashku me anëtarët e LDK-së dhe popullin e Kosovës do të punojë për realizimin e pavarësisë së Kosovës.

  

   

Në Prishtinë i filloi punimet Kuvendi i katërt i LDK-së

 

Prishtinë, 8 qershor 2002 (QIK) - Sot në Prishtinë, në mjediset e hotelit "Grand", diçka pas orës 10,00 i filloi punimet Kuvendi IV i Lidhjes Demokratike të Kosovës.

 

Pasi kori Colegium Cantorum këndoi Himnin Kombëtar, kryetari i LDK-së Dr.Ibrahim Rugova i shpalli të hapura punimet e Kuvendit, i cili fill pastaj i ftoi delegatët dhe mysafirët që me një minutë heshtje të nderojnë të gjithë të rënët për lirinë pavarësinë dhe demokracinë në Kosovë.

Në vazhdim u zgjodh Kryesia e punës së Kuvendit, kurse delegatët miratuan rregulloren e punës së Kuvendit dhe të organeve të punës.

Referatin për punën dhe aktivitetin e LDK-së mes dy kuvendeve e paraqiti kryetari i saj Dr. Ibrahim Rugova.

   

    

Propozimi i Komisionit kandidues që Ibrahim Rugova të zgjedhet kryetar i LDK-së

 

Prishtinë, 8 qershor 2002 (QIK) - Anëtari i Krysisë së LDK-së Nimon Alimusaj, lexoi propozimin e Komisionit kandidues për zgjedhjen e Dr. Ibrahim Rugovës sërish kryetar të LDK-së në të cilin thuhet.

Në këtë kuvend LDK-ja, po përmbyllë zgjedhjet e katërta partiake të saj të cilat i ka filluar disa ditë më pare dhe i ka mbajtur me 1467 aktive, në 498 nëndegë dhe në 36 degë brenda dhe 16 në diasporë. Sot ajo me këtë kuvend kaq madhështor po zgjedh udhëheqjen më të lartë të saj - Këshillin e Përgjithshëm dhe Kryetarin e partisë.

E konsideroj veten të privilegjuar dhe të nderuar që më është dhënë rasti në emer të komisionit kandidues dhe të kryesisë të jap propozimin e kandidatit për kryetar të LDK-së.

Themelimin i LDK-së si parti-levizje në dhjetor të vitit 1989 e konsiderojmë si ngjarje historike sepse kjo parti, dëshmon puna e saj, bëri hapa historik dhe pati rezultate historike:

LDK-ja orientim themelor që nga themelimi pati vetëvendosjen, pavaresinë dhe demokratizimin esencial të Kosovës në të gjitha segmented e shoqërisë, ishte më tepër se një dekadë integruese dhe harmonizuese e të gjitha energjive të kombit për të mbrojtur të drejtat e popullit të vet, tha z.Alimusaj.

 

LDK-ja pas 12 qershorit të vitit 1999, bashkëpunoi ngushtë me KFOR-in, UNMIK-un, OSBE-në dhe me faktorin e brendshëm për ta ndërtuar Kosovën dhe për ta çuar atë drejt qëllimit përfundimtarë.

Në vazhdim ai tha se padyshim se këto rezultate dhe ky funksionim për lakmi i LDK-së për 13 vjet rresht lidhet ngushtë me emrin e kryetarit të saj që nga themelimi e deri me sot, me emrin e dr.Ibrahim Rugovës.

"Në bazë të guximit dhe të urtësisë politike të këtij politikani, të një kalibri politik që ka kalon kufijtë kombëtarë dhe të paparë në jetën politike së paku në katër-pesë dekadat e fundit të shekullit të kaluar, LDK-ja nuk u shpartallua nga brutaliteti mesjetar i Beogradit, dhe nuk u margjinalizua as nga konkurrenca aq e madhe politike e pasluftës. Ajo ishte, mbeti dhe do të jetë edhe për një kohë forca më e madhe politike në Kosovë".

"Dr.Ibrhaim Rugova, për më tepër se një dekadë, ishte autoritet qëndror i Kosovës, i cili vazhdimisht e kishte nocionin e një bashkimi të disciplinuar të shqiptarëve;

Kështu Ibrahim Rugova me veprimtarinë e tij politike e kombëtare dhe me udhëheqjen e lëvizjes demokratike të shqiptarëve u bë udhëheqes historik i shqiptarëve të Kosovës. Ky status politik e kombëtar i Ibrahim Rugovës është provuar me përkrahjen e përgjithshme të qytetarëve që i dhanë Atij me votën e lirë në të gjitha zgjedhjet politike e përfaqësuese në Kosovë ( u zgjodh tri herë kryetar i Kosovës dhe tri herë kryetar i LDK-së).

Dr. Ibrahim Rugova u bë kështu promovues i demokracisë në botën shqiptare dhe udhëheqës politik i shqiptarëve i cili u çmua dhe çmohet njësoj brenda Kosovës dhe jashtë saj. Ai kështu i kaloi kufijtë tradicionalë të jetës sonë politike. Ai kështu ishte dhe është dukuri novatore ne jetën politike të Kosovës".

"Si i tillë Ibrahim Rugova në këto zgjedhjet e katërta të LDK-së me radhë të cilat po i përmbyllim me këtë kuvend është propozuar nga të gjitha strukturat e saj deri në këtë kuvend, për funksionin e kryetarit të Lidhjes Demokratike të Kosovës".

"Duke pasur parasysh të gjitha këto merita dhe vlera të Ibrahim Rugovës dhe propozimin e të gjitha strukturave të LDK-së, të cilat identifikohen me politikën e tij, kam nderin që në emër të Komisionit kandidues të propozoj për kryetar të LDK-së edhe për mandatin e ardhshëm dyvjeçar Dr. Ibrahim Rugovën", tha në fund z.Alimusaj.

    

      

Sot paradite i fillon punimet Kuvendi IV i LDK-së

 

Prishtinë, 7 qershor 2002 (QIK) – Sot, në orën 10.00, në Prishtinë, i fillon punimet Kuvendi IV i Lidhjes Demokratike të Kosovës. Referatin për punën katërvjeçare të LDK-së mes dy kuvendeve do ta paraqesë kryetari i saj, Dr.Ibrahim Rugova.

Në Kuvendin e LDK-së marrin pjesë 285 delegatë nga të gjitha degët e vendit dhe të diasporës, ku do të zgjedhet kryetari i partisë, Këshilli i Përgjithshëm prej 75 anëtarësh dhe organet e tjera partiake.

 

Gjithashtu delegatët do të miratojnë një deklaratë politike të Kuvendit të katërt, si dhe programin e statutin e partisë.

 
Kuvendi i zhvillon punimet në mjediset e hotelit "Grand" në Prishtinë.

 

Copyright©2000-2002 Trepca.net