Deklaratë e Ambasadorit Xhon Menzis Lidhur me formimin e Qeverisë së Kosovës

Deklaratë e Ambasadorit Xhon Menzis Lidhur me formimin e Qeverisë së Kosovës

Prishtinë, 28 shkurt 2002 / TN / QIK - Ambasadori Xhon Menzis, shef i Misionit të Zyrës së SHBA-ve në Prishtinë, e përshëndeti marrëveshjen politike të arritur në mëngjesin e së enjtës mes udhëheqësve politikë të Kosovës në një takim me PSSP Mihael Shtajner.

Duke folur në një konferencë për media të mbajtur në Zyrën e SHBA-ve së bashku me shefat e misioneve të Britanisë së Madhe, Gjermanisë, Francës dhe Italisë, ambasadori Menzis e çmoi rolin shumë të rëndësishëm të PSSP Shtajner për kompletimin e kësaj marrëveshjeje:

"Gjatë muajve të punës së vështirë të bërë nga PSSP Hans Hakerup dhe shefat e misioneve të SHBA-ve, Gjermanisë, Britanisë së Madhe, Francës dhe Italisë, një marrëveshje për formimin e qeverisë së Kosovës shpesh dukej afër, por në çastin e fundit vetëm sa rrëshqiste nga dora.

Gjatë negociatave ishte e qartë se udhëheqësit e ndryshëm politikë ndiqnin vizionet e veta të ndryshme për ardhmërinë e Kosovës".

"Sidoqoftë, me ardhjen e PSSP Shtajner, në proces u injektua një energji e re dhe një qasje e re, dhe u gjet mënyra për të zhvilluar një vizion të përbashkët për ardhmërinë e Kosovës. Ne besojmë se ky mund të jetë një vizion i përbashkët për të gjitha bashkësitë në Kosovë.

Shtetet e Bashkuara e miratojnë këtë marrëveshje dhe i shprehin lavdatat PSSP-së Shtajner për suksesin e arritur, dhe për energjinë e investuar në arritjen a marrëveshjes që mundëson krijimin e institucioneve vetëqeverisëse të Kosovës në pajtim me Rezolutën 1244".

"Në veçanti shpresojmë të punojmë me Dr. Ibrahim Rugovën dhe me z. Bajram Rexhepin, si dhe me ministrat dhe zyrtarët e tjerë që do të emërohen në qeveri në ditët e ardhshme. Tani ne kërkojmë nga Kuvendi që të përkrahë këtë marrëveshje dhe të mirret përsipër detyra e qeverisjes me Kosovën".

"Edhe njëherë, urimet tona për PSSP-në Mihael Shtajner që e ka kryer punën shumë mirë. Z. Shtajner e ka përkrahjen e plotë dhe të prerë të qeverisë së Shteteve të Bashkuara në këtë proces dhe ne presim që të punojmë me të dhe më qeverinë e Kosovës në muajt e ardhshëm", thuhet në fund të deklaratës së ambasadorit Xhon Menzis.