Xhon Menzis: Sundimi i ligjit apo sundimi i bandave, Kosova duhet të vendosë

Xhon Menzis: Sundimi i ligjit apo sundimi i bandave, Kosova duhet të vendosë

Prishtinë, 12 shkurt 2002 / TN / QIK - Ambasadori Xhon Menzis, shef i Misionit të SHBA-ve në Prishtinë, botoi sot një shkrim autorial me titull "Sundimi i ligjit apo sundimi i bandave, Kosova duhet të vendosë", në gazetën "Rilindja", në përvjetorin e 57-të të kësaj gazete.

"Kosova e sotme është shumë më ndryshe se Kosova e kohës kur u lind 'Rilindja'. Kosova e sotme është shumë më e lirë, shumë më demokratike, thellë e futur në rrugën e formimit të institucioneve demokratike të vetëqeverisjes.

Por, po ashtu, Kosova e sotme është një vend i ndarë keqësisht mes dy opcioneve - dhe mbetet të shihet se nëpër cilën rrugë do të shkojë ajo", shkruan Menziz dhe shtron çështjen se "a do të gëzojë Kosova sundimin e ligjit, apo do të bjerë nën sundimin e bandave".

Menzis më tutje shrkuan: "Të premtën e kaluar, bandat e demonstruesve të padisiplinuar, me sa duket nën drejtimin e elementeve kriminale të vendosur që të shkatërrojnë sundimin e ligjit, janë turrur me tërbim nëpër rrugët e Prishtinës, duke thyer dritaret, duke sulmuar policët ndërkombëtarë dhe ata kosovarë dhe duke sulmuar kosovarët e tjerë të cilët nuk pajtoheshin me mendimet e tyre arrogante lidhur me kauzën e tyre të "drejtë".

Sipas ambasadorit Menzis, "gjëja më e tmerrshme është se në rrahjen e shkaktuar nga demonstruesit u sulmuan dhe u lënduan dy policë amerikanë dhe pesë policë të tjerë ndërkombëtarë. Si mundi të ndodhë kjo? A harruan përnjëherë këta kosovarë gjithë atë që bashkësia ndërkombëtare `e veçanërisht amerikanët` ka bërë për ta që nga marsi i vitit 1999?".

"A kanë harruar këta vagabondë të paktë, këta kriminelë, se amerikanët ishin të parët që erdhën në Kosovë në vitin 1996 dhe se përkushtimi ynë ndaj paqes, drejtësisë dhe sigurisë në Kosovë është i thellë dhe afatgjatë? Ky numër i vogël i kosovarëve `të cilët është e qartë se nuk i shprehin pikëpamjet e shumicës dërrmuese të popullit të Kosovës` a i kanë harruar ata pamet dhe zhurmat e forcave ushtarake amerikane dhe të NATO-s, duke e çliruar Kosovën nga shtypja?", pyet Menzis.

Në vazdhim ambasadori amerikan thekson se "të gjitha mediat duhet të marrin qëndrim dhe të apelojnë në të gjithë kosovarët që të dënojnë dhunën dhe të mbështesin sundimin e ligjit dhe të punojnë nga e para për të arritur krijimin e shoqërisë civile, gjë të cilën edhe ne edhe ju e dëshirojmë për Kosovën".

Kjo vlen qoftë, nënvizon Menzis, kur është fjala për trazira dhe sulme mbi policinë dhe njerëzit e pafajshëm, për frikësimin dhe madje vrasjen e figurave politike (madje edhe vrasjen e disa ish-komandantëve të UÇK-së), ose pjesëtarëve të grupeve tjera etnike, apo kur kjo ka të bëjë me çfarëdo forme tjetër të dhunës së përdorur si mjet i të shprehurit politik, thuhet mes tjerash në artikullin e botuar në numrin e sotëm të gazetës "Rilindja" nga ambasadori amerikan Xhon Menzis.