E mërkure, 28 nëntor 2001

• Sot në Prishtinë u bë përurimi i monumentit të Skënderbeut

• Në Prishtinë u mbajt një Akademi solemne për nder të 28 Nëntorit - Ditës së Flamurit

• Solana: është koha që popullit të Kosovës t'i mundësohet një infrastrukturë dhe një jetë e re

• Dr. Rugova: Me Solanën biseduam për krijimin e isntitucioneve të qëndrueshme

• Në pritje të zbulimit të monumentit të Skënderbeut në Prishtinë

• Sot në mbarë Kosovën po festohet Dita e Flamurit

		Sot në Prishtinë u bë përurimi i monumentit të Skënderbeut   M.Krasniqi: Skënderbeu do të mbetet frymëzim, prijës e udhërrëfyes i të gjitha brezave të sotëm e të ardhshëm   Prishtinë, 28 nëntor 2001 (QIK) - Sot aty rreth orës 15,30 u bë përurimi i monumentit të Skënderbeut në qendër të Prishtinës, në ditën e 28 Nëntorit - Ditës së Flamurit, ku që nga orët e mëngjesit ishin tubuar me dhjeta mijëra qytetarë të Prishtiëns, Kosovës dhe viseve të tjera etnike shqiptare dhe nga diaspora.
		Duke folur para mijëra qytetarëve të tubuar, kryetari i Këshillit organizativ për ngritjen e monumentit të Skënderbeut akademik Mark Krasniqi.   Pasi përshëndeti dhe uroi të gjithë pjesëmarësve qëndrim të këndshëm dhe të paharrueshëm në Prishtinë në përurimin e monumentit të Heroti tonë Kombëtar, Mark Krasniqi tha se "sot po përurojmë me respekt e devocion, me mallëngjim e dashuri ndaj stërgjyshit tonë të lavdishëm e të pavdekshëm, ndaj babait shpirtëror të kombit shqiptar".

Në vazhdim tha akad.Krasniqi tha se do t'i drejtohet me një përshëndetje Heroit Kombëtar: "Mirëse erdhe në mesin tonë o i madhi Skënderbe"!

 

"Kaluan shumë shekuj që të presim me përmallim e dashuri me lot të zemrës e me shpresë të pashuar. Por padrejtësia historike ndaj popullit shqiptar ta preu rrugën e Dardanisë sonë antike, rrugës së Kosovës së sotme kreshnike. Ti ke qenë gjithmonë gjallë në shpirtin e zemrën e të gjitha gjeneratave tona gjatë gjithë këtyre 533 vjetëve, që na ndajnë fizikisht prej Teje", theksoi akad.Krasniqi.

 

Në vazhdim ai tha: "Ti sot erdhe në Kosovën tënde, e cila ende nuk i ka shëruar plagët e rënda të robërisë shekullore. Por megjithëse e plagosur, e djegur, e shkatërruar, Kosova sot qëndron në këmbë pa okupatorin, duke bërë hapat vemdimtarë drejt lirisë dhe pavarësisë së plotë për çka kemi luftuar shekuj me radhë deri në ditët e sotit të frymëzuar e të përkrahur nga heroizmi Yt i pashoq nga idelai Yt dhe yni kombëtar për të qenë të lirë dhe zot në shtëpinë tonë".

 

Pasi foli për bëmat e Skënderbeut kundër hordhive otomane dhe u bë digë e pathyeshme e regjimit shkatërrues aziatik, akademik Krasniqi përkujtoi fjalët e thëna për Skënderbeut nga të huajt.
Në vazhdim z.Krasniqi tha: "Ti je krenaria jonë, Ti i bashkove i e pajtove në Kuvendin e Lezhës të gjithë krerët e prijësit shqiptarë, lidhe besën shqiptare për të mirën e kombit, për lirinë e Atdheut, duke u dhënë shembull brezave të ardhshëm për bashkim e bashkëpunim...

 

Në Ty pasqyrohen të gjitha vyrtytet e larta të traditës sonë të lashtë kombëtare. Ti ke qenë dhe do të mbetesh përgjithmonë frymëzimi, prijësi, udhërrëfyesi i të gjitha brezave të sotëm e të ardhshëm në rrugën e ndershme të realizimit të të drejtave dhe aspiratave të tona për liri, pavarësi, demokraci dhe tolerancë, për një jetë më të lumtur dhe më të qetë në trojet tona etnike".

 

Mark Krasniqi në përfundim të fjalës së tij tha: "Ti nuk i takon vetëm popullit tënd shqiptar, ti je personi më i madh i merituar i mbarë botës liridashëse të civilizuar. Ti je një ndër nejërëzit më të mëdhenj të shekullti 15, siç është Nëna Tereze gruaja më e madhe e shekullti 20. Mirë se ke ardhur në mesin e vëllezëve Tu"!

Pastaj akademik Krasniqi foli për vetë monumentin i cili është kopje e atij që gjendet sot në Krujë, vepër e skulptorit Janaq Paço si dhe për kontributet që u dhanë për ndërtimin e monumentit të Skënderbeut në Prishtinë.

Dr. Ibrahim Rugova: Gjeneratat e reja dhe fëmijët tanë do të rriten me Skënderbeun

Një falë përuruese e mbajti edhe Dr. Ibrahim Rugova, kryetar i LDK-së. Ai para mijëra qytetarëve të Prishtinës, Kosovës, territoreve etnike shqiptare dhe shqiptarëve që kishin ardhur enkas për këtë ngjarje nga diapsora iu drejtua:

 

"Zonja dhe zotërinj, qytetarë të nderuar të kryeqytetit, qytetarë të nderuar të Kosovës, mysafirë të nderuar nga Shqipëria, Maqedonia, Mali i Zi e Presheva, të nderuar miq ndërkombëtarë dhe përfaqësues diplomatik në Prishtinë.

 

Sot është një ditë e madhe për Kosovën, sepse po e përurojmë monumentin e Heroit Nacional të shqiptarëve në Prishtinë". "Shumë gjenerata të mëparshme si dhe gjenerata jonë e kemi ëndërruar këtë ditë. Gjeneratat e reja, fëmijët tanë do të rriten me Skënderbeun, do të rriten me Heroin e vet dhe me fat të rinjve të Kosovës", tha Dr. Ibrahim Rugova.

 

"Do të ndiehen edhe më të qetë edhe dëshmorët e shumë brezave dhe ata të luftës së fundit për liri dhe pavarësi të Kosovës. Sot Kosova është e lirë, e bënë të lirë nipat dhe miqtë e Skënderbeut. Gjergj Kastrioti ndihet i lumtur për lirinë e Kosovës, të Dardanisë antike.

 

Ndihet i lumtur, sepse miqtë e tij janë në Kosovë dhe me Kosovën, se Kosova dhe shqptarët po bashkohen e integrohen në botën perëndimore, aty ku e kanë vendin. Në atë botë, që e mbrojti me dinjitet dhe hapi perspektiva për shekujt e rinj evropianë e perëndimorë, për prosperitetin e civilizimit njerëzor".

 

"Shekuj me radhë Skënderbeu ishte simbol i lirisë dhe i pavarësisë për shqiptarët, ishte simbol i lirisë dhe i pavarësisë për Kosovën. Poashtu, shekuj me radhë Skënderbeu ishte simnol i lirisë dhe pavarësisë për shumë popuj evropianë dhe të botës. Ishte simbol edhe për lirinë dhe pavarësinë e Shteteve të Bashkuara të Amerikës. Ai e vazhdon këtë mision edhe sot", theksoi Dr.Rugova.

 

Në vazhdim ai tha: "I nderuari profesor Krasniqi, ju falemnenderit për angazhimin tuj, që në Prishtinë e ngritet këtë monument, e kryet edhe një punë që i ka hije profesorit. Falenderoj edhe udhëheqjen komunale të kryeqytetit, që përkrahu angazhimin e profesor Krasniqit dhe të gjithë ata që kontribuan, pra TMK-ja, pastaj të tjerët që i përshendeti profesor Krasniqi që e sollën monumentin, apo shtatoren e Skënderbeut në Prishinë, që e kemi këtu para nesh.

 

Me fat Prishtinë, me fat Kosovë, zoti e bekoftë Skënderbeun siç e ka bekuar. Zoti e bekoftë Kosovë, ju falenderit dhe urime për monumentin e Skënderbeut. I nderuari profesor e solla kët copë ari që ta vendosni në monumentin e Skëndebeut një copë ari-kristal të Kosovës.

 

Ky është një ari natyral i kristaleve të Kosovës. Ju falendroj shumë juve qytetarë që keni ardhur ta ndani gëzimin së bashku këtu në Sheshin Skënderbe të kryeqytetit të Kosovës sonë ta dashur. Me fat", tha në fund të fjalës së tij Dr.Ibrahim Rugova.

 

Pastaj akademik Mark Krasniqi ia dorëzoi këtë objekt madhështor kryetarit të Kuvendit Komunal të Prishtinës, Salih Gashi. Ndërkaq, Sali Gashi në fjalën e tij të rastit tha: "Më në fund erdhi edhe ky monument i shumëpritur dhe i lavdishëm për popullin tonë,- ngritja e përmendores së Skënderbeut në Prishtinë.

 

Ky momenti i Heroit tonë kombëtar, kjo fazë historike sot po përfundon. Ja sot me 28 nëntor të vitit 2001, ëndrra e kahmotshme kombëtare e shumë brezave u bë realitet. Tash si kurrë më parë Prishtina, Kosova dhe populli i saj ndjehet i privilegjuar, që pati fatin të realizojë këtë projekt madhështor", tha ndër të tjerat prefekti i Prishtinës Salih Gashi.

 

Pastaj folën edhe Namik Dokle, kryetar i parlamentit të Shqipërisë dhe Bujar Bukoshi, kryetar i Fondit UFORK.

Në Prishtinë u mbajt një Akademi solemne për nder të 28 Nëntorit - Ditës së Flamurit

 

Skënderbeu ishte një strateg i madh i luftës

 

Prishtinë, 28 nëntor 2001 (QIK) - Pas intonimit të Himnit kombëtar dhe duke nderuar me një minutë heshtje të rënët në luftë, sot në Teatrin Kombëtar u mbajt një Akademi solemne me rastin e 28 Nëntorit - Ditës së Flamurit dhe zbulimit të monumentit të Skënderbeut në Prishtinë. Hapjen e akademisë para shumë përfaqësuesve të subjekteve poltike, fetare e publike dhe përfaqësuesve të huaj, e bëri drejtori i Institutit të Historisë, Jusuf Bajraktari.

 

Zoti Bajraktari në fillim tha se 28 Nëntori simbolizon edhe pavarësinë e shtetit shqiptar. Me 28 Nëntorin janë të lidhura në mënyrë të pashkëputshme ngjarje të rëndësishme të periudhave të ndryshme historike, duke përkujtuar se në këtë ditë, më 1443, Skënderbeu ngriti flamurin në Kështjellën e Krujës. Edhe sot, pas 89 vjetësh, vazhdoi ai, kemi mesazhin më kuptimplotë që mund t`i jepet popullit nga kryeqyteti i Kosovës, Prishtina krenare, nënvizoi Dr. Bajraktari.

 

Ai në vazhdim tha se sot Kosova po e feston këtë festë me një nga veprat më të shkëlqyera të historisë së saj, "ku edhe pak orë do të jemi dëshmitarë të gjallë të një ngjarjeje të rrallë e të papërsëritshme".

 
Ndërkaq, gjeneral Agim Çeku, komandanat i TMK-së në fjalën e tij tha se ka nderin të flasë për figurën e Heroit tonë të Gjergj Kastriotit- Skënderbeut, të këtij strategu, komandantit të rrallë ushtarak, dhe burrë shteti të madh, i cili ka qenë dhe vazhdon të jetë burim frymëzimi i të gjithë brezave, veçanërisht për ushtarakët.

"Ardhja e Skënderbeut në Kosovë, është një moment i rëndësishëm që kemi pritur gjatë kohës dhe po vjen me një datë shumë të rëndësishme të historisë sonë", tha gjeneral Çeku. Ai në vazhdim theksoi se lufta e Skëndebeut kap një periudh 25-vjeçare me fitore e beteja të njëpasnjëshme. "Skënderbeu është i pari në Evropë, në periudhën e mesjetes, i cili krijoi një ushtri të përhershme, dy vjet para Francës", nënvizoi Çeku.

 

Skënderbeu ishte një mjeshtër i madh i luftës guerile, dhe në të njejtën kohë, ai ishte edhe një strateg shumë i madh në luftën e rregullt, tha ndër të tjerat gjeneral Çeku, komandant i Trupave Mbrojtëse të Kosovës.

Solana: është koha që popullit të Kosovës t'i mundësohet një infrastrukturë dhe një jetë e re

 

Prishtinë, 28 nëntor 2001 (QIK) - Unë kam zhvilluar një takim shumë të mirë me Hakerupin dhe me liderët e partive politike. Jam shumë i kënaqur që jam këtu,- u shpreh Havier Solana, në konferencën e mbajtur me gazetarë në Prishtinë.   Ai tha se ka qenë shumë i lidhur me Kosovën një kohë shumë të gjatë. "Është treguar një pjekuri e popullit dhe e liderëve të Kosovës", deklaroi Solana për zgjedhjet e 17 nëntorit.

 

Solana theksoi se edhe njëherë se Kosovës i erdhi rasti për t'i mbajtur zgjedhjet dhe për t`i zgjedhur liderët. "Kjo ka qenë një ngjarje shumë e rëndësishme për mua dhe shpresoj edhe për ju. Kosova ka shansën që të marrë në duart e veta të gjitha mundësitë për ta mbajtur Kosovën", u shpreh Solana.

 

"Bota sot është ndryshe nga ajo e para gjashtë muajsh, shumë ndryshime kanë ndodhur dhe shumë kërkesa do të parashtrohen nga bashkësia ndërkombëtare", nënvizoi Solana, duke shtuar se është i kënaqur që nuk është harruar Kosova, por që të mos harrohet atëherë ajo duhet t`i kryejë punët si duhet, duhet të merren përgjegjësitë siç duhet, mos të harrohet se kjo është një shoqëri multietnike.

 

Duhet treguar gatishmëri për bashkëpunim me ndërkombëtarët. Nuk duhet harruar se njerëzit më të mirë, duhet të vendosën në vendet e duhura. Është koha që popullit të Kosovës t'i mundësohet një infrastrukturë dhe një jetë e re.

 

Përparësia më e madhe është që gjërat të kryhen për të mirën e popullit të Kosovës. Unë jam shumë i lumtur që jam me ju dhe ky është mesazhi që ia kam thënë liderëve të Kosovës", nënvizoi mes tjerash Havier Solana.

Dr. Rugova: Me Solanën biseduam për krijimin e isntitucioneve të qëndrueshme

Prishtinë, 28 nëntor 2001 (QIK) - Shefi i diplomacisë së Bashkimit Evropian Havier Solana qëndroi sot për një vizitë njëditëshe në Kosovë, ku ka pasur takime të veçanta me kryetarin e LDK-së Ibrahim Rugova me atë të PDK-së Hashim Thaçi dhe të AAK-së Ramush Haradinaj, si dhe shefin e UNMIK-ut Hans Hekerup dhe komandantin e KFOR-it Marsel Valenten.

Pas takimit me zotin Solana, kryetari i LDK-së, Dr. Ibrahim Rugova para gazetarëve delaroi:
"Patëm, një takim të përzemërt me zotin Solana, i cili vazhdimisht është i preokupuar me Kosovën dhe për ngjarjet e bashkësisë ndërkombëtare. Dihen meritat e tij për Kosovën dhe natyrisht ai na përuroi për zgjedhjet, të cilat kanë kaluar në mënyrë të qetë".

 

Në vazhdim Dr. Rugova tha se është biseduar rreth përgatijes së seancës plenare të Parlamentit të Kosovës, dhe krijimit të institucioneve të qëndrueshme, në zhvillimin ekonomik, politik dhe social të Kosovës. "Natyrisht, ne do të punojmë në planin e objektivit tonë nacional për pavarësinë", tha Dr. Rugova, i cili falenderoi z. Solana që ka gjetur kohë ta përgëzojë Kosovën e që gëzon përkrahjen e BE-së në ndërtimin e institucioneve dhe në zhvillimin ekonomik të saj, tha ai.

Hashim Thaçi, kryetar i PDK-së u tha gazetarëve se takimi me Solanën tregon edhe njëherë që bashkësia ndërkombëtare mbështet proceset politike në Kosovë. Kjo vizitë do t'i kontribuojë qëllimit të implementimit të rezultateve të zgjedhjeve, tha ndër të tjera ai.

Ndërkaq, Ramush Haradinaj deklaroi se ishte një takim miqësor dhe se zoti Solana vjen me mesazhin më të mirë, pra me urimin për popullin e Kosovës për zgjedhjet e lira dhe të suksesshme. "Poashtu uron që ne të gjejmë rrugë që të implementojmë rezultatin zgjedhor dhe t'i kthehemi përgjegjësive që i kemi ndaj Kosovës dhe ndaj qytetarëve", tha Haredinaj.

Në pritje të zbulimit të monumentit të Skënderbeut në Prishtinë

 

Prishtinë, 28 nëntor 2001 (QIK) - Asnjëherë në kryeqytetin e Kosovës nuk ka pasur më shumë njerëz në sheshin kryesor "Nëna Tereze" dhe nëpër të gjitha rrugët e rrugicat e Prishtinës. Me mijëra njerëz kishin ardhur nga të gjitha qytetet e Kosovës, nga territorët etnike shqiptare dhe nga diaspora.

 

Asnjëherë nuk është ndjerë atmosferë më solemne dhe më madhështore se sa ditën e sotme - më 28 Nëntor. Qendra e qytetit ishte në shenjë të këtij solemniteti: aparatura e zërimit, bina solemne dhe njerëzit që poashtu, me një durim të mahnitshëm presin fillimin e manifestimit qendror - zbulimin dhe përurimin e monumentit të Skënderbeut në Prishtinë.

 

Mirëpo, edhe pas pritjes së gjatë dhe fillimit e mbarimit të Akademisë solemne në Teatrin kombëtar të Prishtinës, zbulimi i monumentit të Skënderbeut nuk u bë. Në vazhdim u komunikua se akti i zbulimit solemn do të bëhet në orën 15,00. Arsyetimi: shtatorja e Heroit tonë kombëtar, nuk kishte arritur në Prishtinë, edhe pse mbrëmë në measnët e kishte kaluar kufirin e Kosovës.

 

Një rrugëtim i shkurtër nga Prizreni në Prishtinë po zgjat si tepër shumë dhe me ngathtësi. Njerëzit filluan të hedhin pakënaqësitë e para si "punët tona janë kështu..." deri në shpresën se koha do të shkurtohet. Por sheshi "Nëna Tereze" nuk zbrazej, sikurse që nuk zbrazej dendësia e njerëzve përreth bazamenti të monumentit të Skënderbeut, që priste të vëhej në vendin e vet...

Sot në mbarë Kosovën po festohet Dita e Flamurit

Prishtinë, 28 nëntor 2001 (QIK) - Me manifestime të ndryshme, sot në mbarë Kosovën po festohet 28 Nëntori - Dita Flamurit. Në të gjitha qytetet e Kosovës që nga dita e djeshme kanë filluar manifestimet për nder të kësaj dite të shënuar të historisë sonë kombëtare.

 

Me këtë rast janë përgatitur programe të veçanta, por edhe manifestime sportive, dhe se kudo janë bërë homazhe në varrezat e dëshmorëve. Kështu ka qenë në Gjakovë, Prizren, Gjilan, Ferizaj, Pejë, Mitrovicë gjetiu.

Përndryshe sot moti në mbarë Kosovën është pa të reshura, por ajo që e prish deri diku atmosferën festive është mungesa e energjisë elektrike, sepse edhe sot janë fuqi reduktimet.